رواية ايام من رماد الفصل الثالث عشر بقلم احمد
دمعة: راح يمشي وصحتو بصوت ناصي وبست ايدي ونفخت عليها على اساس دزيتلو بوسة وضحك هو وكمل طريقو
رجعت عند البنات وسألتني سوسن گلتلها بعد باجر اروح وطارت من الفرح خطية سناء حسيتها ضاجت لان هي الوحيدة الي مجبورة تروح باجر
رانيا: صدگ دمعة ناظم كم اخت عندو
دمعة: ثلاثة ثنين متزوجات ووحدة باقية
رانيا: شلونها وياج
دمعة: بالبداية جانت ما تحجي وياي وضايجة عبالها ناظم ينساها بسببي بس من حجى وياها قبل كم يوم تغيرت كلش وصرنا كلش صديقات
رانيا: ديري بالج لا تخدعج
دمعة: لا اعتذرت مني ومبينة صادقة بكلامها
رانيا: تمام
سناء: ماعرف شلون يفكرن بعض بنات اخوج تزوج قابل يبقى علمودج هسا صارت عندو زوجة ومسؤولية عوفيه يلتهي بحياتو
دمعة: مو هي كلش متعلقة بيه حتى هو گال وذاك النهار اخوه يگلو متعلقة بيك اكثر من الكل وهي گالت ناظم عندي بالدنيا لهذا جانت ضايجة
سوسن: اني ماگدر الومها لان لو مصطفى متزوج يمكن نكره زوجتو اذا تحرمنا منو
سارة: ولج دمعة اخوه ما يجي يخطبني ويخلصني من جهرة اية
اية: والله الي يبتلي بيج امو داعية عليه
سارة: لا داعيتلو
دمعة: لا يخطبج ولا تخطبيه هو مو مقرر يتزوج هسا
سارة: خرب حظي مثل جهرة اية
رحمة: يمة دمعة تعالي وياي
دمعة: تمام .. واخذتني لغرفتها
رحمة: ها شلون صرتي
دمعة: الحمدلله كلش
رحمة: راح منج الوجع
دمعة: اي راح وبعد باجر نروح اني وناظم للدكتورة علمود المراجعة
رحمة: وشلون ناظم وياج خوما قصرتي وياه او هو زعجج
دمعة: لا ماما من ذاك اليوم التزمت بكلامج وكلش متافهمين اني وياه
رحمة: الله يسعدج يا يمة انتي وزوجج
دمعة: آمين
رجعت للبنات وجانن مخلصات التنظيف والمواعين وگعدنا كلنا بالغرفة مالتنا وجانو موجودين ويانا مصطفى وميزر
سناء: صدگ يمة شو مغلسين على زواج الولد صارو شياب وبعدهم
رحمة: والله يا يمة الي يسمع بينا گاعدين بالشركة يرفض لهذا مصطفى وابوج دا يدورون بيت اجار قريب من الشركة علمود ننتقل عليه
سوسن: شو ما ندري بهالحجي هذا
رحمة: ماردنا نحجي بيه قبل ما يصير شي
سناء: وشلون تلحگون عالمصرف والاجار
مصطفى: كلنا نتشارك بالاجار من ميزر لابوي والي ما يشارك يروح يشوفلو غير ديرة
سناء: ابوي ما ينطي
مصطفى: الباب يفوت جمل
سناء: بصدمة .. تريد تطرد ابوي
مصطفى: لا ما استقبلو من الاساس اني عندي اهم شي البنات وامهاتي ثنينهن البقية يا يدفعون يا يتوكلون على الله
ميزر: هسا ابوي يطلعلنا بحجة انو يبقى بالشركة اغلب الايام
مصطفى: حتى لو يجي كل شهر ساعة وحدة يدفع حتى لو يجي زيارة يتطمن علينا يدفع غير هيج خلي يبقى بالشركة اريد اشوف شگد يتحمل
ميزر: الله كريم
دمعة: بس شلون نعرف بيتكم وين
مصطفى: باوع هاي الخبلة هسا شنجاوبها
ميزر: من تجين للشركة اطلعي گبل بعدين گبل وشوية بعد گبل وتوصلين بيت من تدگين الباب يطلعلج طفل يگول طاح صبغ ويسكر الباب
سوسن: هههههههههه ولك خبيث فوگ ما تسأل عليكم علمود تجيكم
دمعة: ههههههه شگد خبيث صوجي اسأل
مصطفى: بعد بوية ما لگينا البيت علمود نوصفلكم الطريق
دمعة: تمام
مصطفى: ضرب ميزر على راسو .. وانت اعقل شوية
ميزر: اااااخ ضربتك حية
مصطفى: من ايمتى الحية عدها ايدين
ميزر: باوع لرونق بضحكة خبيثة
رونق: بضحكة .. وربي ان گلت رونق حية اگوملك
دمعة: ميزر مادري بيك تتشاقة هيج قبل جنت احسك معقد
ميزر: لعد شلون نصبت على رونق غير يوميا اضحكها لحد ما يصير بيها مغص
رونق: وربي جان يطلع سوالف من تحت الگاع ويبقى يصنف عالرايح والجاي لحد ما يتعب
دمعة: بس احسن شي سويتو انك تركت الجگاير
مصطفى: غير الفضل لرونق ادبتو
ميزر: اقسم بالله مرة گالتلي اذا دخنت اكفر بيك وبقيت ساعتين اني مصدوم منها
رونق: دفنت وجها بالمخدة .. ولك ميزررررر كافي فدوة
مصطفى: ههههههههه گومي رونق گومي اكفري بيه ترا يستاهل
دمعة: ودخنت بعدها لو لا
ميزر: شحدي ادخن اصلا من يومها من الخوف ما انام الا تغنيلي يلا تنام واذبحلك طير الحمام
مصطفى: الحمام شدخلو
ميزر: شعرفني شافتني صرت مسكين بردت گلبها بالحمام
دمعة: بقينا النهار كلو نضحك على سوالف رونق وميزر وميزر من النوع الي مفضوح ماعندو ستر مغطى شكو موقف صار وياهم هو ورنق فضحو
من صار وقت العشى بس حمينا الي زاد من الغدا وتعشينا بيه وجان مصطفى محضر كرزات وحلويات للتعليلة وگضيناها للفجر سهر
مرة نلعب محيبس مرة حزازير مرة نحجي عن فد موقف وجانت من ضمن احلى السهرات الي سهرتهن بحياتي وما انسى تفاصيلها طول عمري
بعد صلاة الفجر تمددت بفراشي وحسيت نفسي بعدني دمعة الطفلة الي عمرها 10 سنين وهسا اجيت من الشغل تعبانة ولازم انام
رغم حياتي سعيدة ومو ناقصني شي نهائيا وكلش سعيدة بمعاملة ناظم الي بس من اتذكر طفولتي احس گلبي ينعصر
اتمنى بعدني طفلة ما اعرف من الحياة كلشي مجرد انو اكل وانام واشتغل لان اعتبر الشغل لعب ومحد يجبرني على شي
غفيت بوسط افكاري ما گعدت لصلاة الظهر وگضينا يومنا بونسة مثل البارحة والعصر اجى زوج سناء علمود ياخذها
خطية تگول لولا العيب الا ابجي لان راح اروح وانتن كلكن متجمعات وودعتنا وراحت وكلامها كلش قهرني حسيتها راحت وهي مكسورة الخاطر
ومر ذاك اليوم طبيعي وثاني يوم جان الموعد ان نروح اني وسوسن ورانيا واني جنت اول وحدة لازم اروح علمود المستشفى
الساعة 10 الصبح اجى ناظم علمود ياخذني بين ما كملت وجهزت نفسي جابت ماما رحمة علاگة سودة وگالت هاج ذني
دمعة: شنو ذني
رحمة: ذني الفلوس جنت اجمعهن الج من الفلوس الي خصصهن الج مدير الشركة من تعورت رجلج
دمعة: حييييييل وبعدج تتذكريهن
رحمة: اكيد يا يمة غير هذا حقج
دمعة: اخذيهن الج ماما اني ماريدهن
رحمة: لا يمة ذني حقج انتي شلون اخذهن
دمعة: اخذت العلاگة ورجعت فتحت ايدها وحطيت العلاگة بيها .. هاي اخذتهن وتبرعت الج بيهن .. وبوستها وطلعت من الغرفة
ناظم جان واگف ويا مصطفى وميزر ينتظرني گدام البيت ميزر اجى باتجاهي باسني بخدي وگلي انتبهي منو ترا مو عاجبني وضعو
استغربت من كلامو بس مصطفى ما حجى شي وتذكرت تصرفات ناظم بوقت العقد گلت يجوز نفس السبب لهذا ميزر ضايج منو
بعد ما ودعنا مصطفى مشى بالسيارة ناظم وگال ها تونستي لو لا
دمعة: كلش تونست
ناظم: بزعل .. انتي متونسة واني ضايج عليج
دمعة: سكتت وحسيت نفسية مسوية ذنب رغم اني ما مسوية شي
ناظم: گرص خشمي .. جاي اتشاقة وياج يولي بسرعة صدگتي
دمعة: يعني ما ضجت علي
ناظم: تلعثم بالكلام .. ها احممم شنو بس
دمعة: شبيك
ناظم: شجاوب
دمعة: الجواب الصح
ناظم: اذا اگول ضجت عليج تزعلين واذا اگول ما ضجت عليج تزعلين
دمعة: لا ما ازعل
ناظم: شوفي اني اريدج دائما وياي بكل لحظة وكل يوم بس بنفس الوقت ارتاح من تتونسين يعني مجرد گلتيلي تونستي عند اهلج يعني اني متونس
دمعة: اممممممم تمام
ناظم: مسكني من شفايفي .. ليش تگولين اممممم مو تعرفيني بس اسمعها يجي ببالي اعضج
دمعة: اريد احجي وهو ماسك شفايفي ولزمتني الضحكة وگوة عافني .. بعد ما اگولها
ناظم: تمام
دمعة: اخذ ايدي بايدو وحجينا بمواضيع مختلفة واغلب الوقت هو يشرحلي شلون جان يحسب الوقت لحد ما يجي وياخذني
رحنا للمستشفى اول شي وفحصتني الدكتورة گالت متحسنة كلش وفتحت الخيط وگالت لناظم دير بالك عليها جسمها صغيرة وما يتحمل الضغط
هزلها راسو بمعنى فهمت وكتبتلي ادوية اخذناهن واول ما طلعنا ذبهن ناظم وگال ما تحتاجيهن بس هيج عالفاضي
ضحكت على تصرفو وركبنا بالسيارة گلتلو الادوية بلاش قابل بفلوس گال حتى لو بلاش ما يحتاج وسكتت ما حبيت اجادلو
كملنا طريقنا للبيت اول ما وصلت سلمت على عمي وعمتي ورحت للمطبخ جانت سما دا تطفي الطباخ علمود تحط الغدا گمزت عليها وحضنتها گلتلها اشتاقيتلج
سما: ياااااااااااااا
نضال: بسم الله الرحمن الرحيم شصاير .. واجت تركض
دمعة: انخلست ومدري شنو اسوي من جهة سما صار وجهها اصفر من الخوف ومن جهة اجت عمتي تركض اذا اكللها جنت اشاقي سما لو ترزلني لو ترزل سما
نضال: ولج احجي شبيج تصرخين
سما: ماكو شي يمة فزيت ما جنت منتبهة لدمعة
نضال: صخام الصخمج جان صار بي شي من الخوف
سما: قابل بكيفي
نضال: سمي بالله واشربي ماي .. وطلعت من المطبخ
سما: هو هيج الي يشتاق لاحد جان انشليت من الخوف
دمعة: بخوف .. والله مو قصدي اخوفج جنت اتشاقة وياج
سما: روحي بدلي ملابسج روحي
دمعة: طلعت من المطبخ واني خايفة وزعلانة بنفس الوقت لان زعلتها وزعلانة بسبب غبائي يعني شجان صار لو مسلمة عليها بهدوء
واني اصعد الدرج صارت دموعي تنزل غصب عني واني عالدرج نزل كاضم شافني ابجي واستغرب گلي شبيج دمعة ليش تبجين
عفتو وركضت للغرفة دخلت بيها وسندت نفسي عالباب وانفجرت بالبجي جان ناظم بالغرفة واني مو منتبهة عليه
ناظم: ها دمعة شبيج
دمعة: سس سمما
ناظم: بخوف .. شبيها سما
دمعة: مو مو اا اني
ناظم: اهدي وسمي بالله واحجيلي خلي افهم
دمعة: اني فززتها
ناظم: اي ومن فززتيها شصار
دمعة: هي خافت
جان مبين عليه مو فاهم شي فعافني ونزل تحت يريد يعرف شصاير وبعد شوية رجع وگف بالباب مال الغرفة ويباوعلي بحيرة
ناظم: هسا اذا اگول خبلة هم احد يلومني
سما: ولج دمعة هاي شبيج
دمعة: اني مو قصدي والله
سما: دگومي يولي گومي كاتلة نفسج من البجي
ناظم: ههههههه ياربي صبرني
سما: اسكت عوفها هاي لان تحبني تبجي لان خوفتني
دمعة: رحت ويا سما للحمام غسلت وجهي وهديت شوية ونزلنا اني وياها جانو كاضم وناظم گاعدين مقابيل بعض وكاتمين ضحكتهم گوة
نضال: ها يمة ليش تبجين
دمعة: لان ما جان قصدي اخوف سما
نضال: عادي يا يمة الموضوع مو مستاهل تبجين
دمعة: مو اني جنت غلطانة لان فززتها
نضال: يلا حصل خير
دمعة: تمام
شلون نريد ناكل طلعت ضحكة صغيرة من كاضم وناظم صار وجهو احمر واول ما تلاگت عيونهم ببعض انفجرو بالضحك
دمعة: عمو شوف شلون يضحكون علي
محمد: الي يضحك اليوم يبات خارج البيت
ناظم: سكت فورا
كاضم: زادت ضحكتو .. يابة مسكت ناظم من الايد التوجعو
محمد: ههههههه هاي هي عرفنا نقطة ضعفو
ناظم: صخم الله وجهج يا دمعة هسا يذلوني بهالموضوع
دمعة: تستاهل .. وطلعتلو لساني
ناظم: هههههههه يصير خير يصير خير
دمعة: كملنا الغدا ونقلنا المواعين عالمطبخ اني وسما وهي حطت الجاي عالنار واني بلشت بالمواعين وبين ما شربو جاي وخلصو جنت مخلصة تقريبا نص المواعين
جابت الستكانات سما وجانت تريد تساعدني گلتلها ما يحتاج ما بقى شي بس احجيلي شلون صرتي نسيت حتى اسألج
سما: كلش زينة صخونة خفيفة
دمعة: وربي رغم الونسة عند اهلي وجمعتهم بس ما رحتي عن بالي
سما: يا روحي انتي فديتج بس لو تبطلين خبال قبل ما تخبليني وياج
دمعة: ههههههههه
سما: يمة جان وگف گلبي من فززتيني فوگها جنت افكر ومندمجة بتفكيري وگمزتي علي عقل ما بقى براسي
دمعة: اني مدري شلون اجتني هالفكرة الخايسة
سما: حاولي ما تعيديها ترا اكو ناس تصير بيهم خوفة او سكري او ابو صفار من الخوف اني الله سترني بس غيري يجوز ما يتحمل
دمعة: لا هاي هي من شفت خوفتج اليوم عرفت غلطي
سما: تمام
ناظم: سما اطلعي شوية عندي موضوع ويا دمعة
سما: شنو من موضوع
ناظم: لو اريد احجيلج ما گلتلج اطلعي
سما: عندكم غرفة فوگ روحو بيها احجو اسراركم
ناظم: اطلعي هسا مو وقت بياختج
سما: ههههههه تمام
دمعة: جنت اغسل مواعين ومو مهتمة كلش من طلعت سما شو ناظم اجى حضني من ورا وحط ايديه على بطني .. ناظم لا يجي احد عيب
ناظم: محد يجي بعدين خلي يجون قابل حاضن صاحبتي غير انتي مرتي
دمعة: جنت احرك جسمي علمود يبعد عني .. فدوة ناظم عيب من اهلك احضني بغرفتنا مو هنا فدوة ابعد
ناظم: حط ايد على بطني وايد على صدري وعصرني عليه وقيد حركتي وحط راسو برگبتي من ورا الشال .. اسمعيني قبل ما اروح
ماراح اجي عالعشى طالع ويا جماعتي نتعشى خارج انتي من تتعشين تگولين لاهلي راسج يوجعج وتروحين تاخذين دوش وتنتظريني بالغرفة
دمعة: تمام تمام بس ابعد
ناظم: خوش بس تعالي اودعج
فرني عليه وباسني على شفايفي الا اختنگت وراح اول ما طلع غسلت ايديني ووجهي علمود يروح التوتر والحمدلله سما ما رجعت فورا
سما: ها شيريد منج الخبل
دمعة: باوعتلها ورفعت حاجبي .. لعد ليش طلعتي
سما: لا تصيرين عقدة قابل راح اگلو حجيتيلي
دمعة: بعدج صغيرة بنيتي من تكبرين اگولج
سما: يااااااا ولج اني اكبر منج ب 5 سنين
دمعة: لا بعدج زعطوطة من تتزوجين تصيرين جبيرة
سما: ايا زعطوطة يا زوجة الزعطوط
دمعة: ههههههههه ناظم شدخلو
سما: هيج مزاجي
بقينا اني وياها نصنف على بعض بس ما حجيتلها كلام ناظم لان مو من حقي اطلع الكلام الي هو ما حجاه بوجودها
من صار وقت العشى سألت عمتي على ناظم گلتلها طالع ويا جماعتو وراح يتعشون بالمطعم گالت تمام وحطينا العشى اني وسما
تعشيت عالسريع وغسلت المواعين بين ما خلصتهن اذن العشاء ترخصت من عمتي وگلتلها البارحة بقيت سهرانة ويا خواتي وتعبت گالت براحتج
رحت صليت العشاء واخذتلي دوش ورجعت جهزت نفسي وحطيت مكياج بين ما خلصت دا احط عطر ودخل ناظم للغرفة
باوع علي وضحك واجى تقرب مني وحضني وباسني بوسة كلش قوية ورفعني عن الگاع بحضنو ومن انگطع نفسي نزلني
ناظم: اخذ دوش واجيج
دمعة: تمام
