رواية لماذا انا الفصل السادس عشر 16 بقلم عبير السراي

علي:: اية

فتحت عيني لكيته بوجهي..

اية:: نعم..

علي:: حبيت اودعج...قبل لا اروح 

اية::رايح... الله وياك..

علي:: هالمرة حاحسب ساعه ساعة  لرجعتي..

راح اشتاق لعيونج...

اية::.دنكت..ترجع بالسلامة..

علي؛؛الله يسلمج.. .. تقرب علية.

 ابتعدت عنه ودرت وجهي. ..لزمني من راسي باسني من راسي ..وطلع...

بقيت كاعدة بمكاني.مكدرت ارجع لنومتي. ضل بالي يمه تعودت عليه وعلى وجودة يمي حتى لو ينام بالكاع بس يضل بنفس الغرفة احس بوجودة يمي احس بنفسة يمي ...

صارت بالعشرة يلة كمت من الفراش.. 

نزلت...

::صباح الخير...

الكل:صباح النور...

كعدت يم منى بس مالي خلك اكل ولا اشرب

معقولة اشتاقيتلة ...

منى::الشاغل عقلج... 

اية؛: اممم منو يعني...

منى::شمدريني منو براسج...

اية؛؛والله انتي بطرانة..

منى؛؛اشتاقيتيلة موو....

اية:: منوو هوّ...؟ 

منى::مابيهة شي اذا مشتاقتلة لا هو عيب ولا حرام 

اية؛؛انتي مأثرة عليج الخطوبة.. ضربت على عقلج....

منى::ههههه ايي فديته البارحة للصبح احجي وياه ...اووف شكد احبه..

اية::الله يهنيكم.. ويخليكم لبعض

منى:: والله يهدي سركم.انتي وعلي..... 

اية؛؛اكوم اشوف شغلي..احسن..

منى:: اخذيني وياج خية... 

بديت اشتغل بالبيت واني تفكيري كوله يم علي...تعبت معقولة مااكدر افاركه..شلون لعد اريد انفصل عنه...

اووف هم يجي يوم وتنحل واعيش حياتي مرتاحة...

صار العصر...وكاعدين اني وعمتي والبنات ودك علي على عمتي...

ام عمار؛:الوو هلا بوليدي... 

علي:: هلا يمه ..شلونج... ابوي شلونه

ام عمار::بخير مادامك بخير.. 

علي؛؛ البنات الولد شلونهم...

ام عمار؛؛زينين الحمد لله...

علي؛؛ هاا اكولج يمه اية شلونها بدلت الضمادة 

ام عمار::والله يمه ماسألتهة... 

هاك انته احجي وياهة...

آآشر لعمتي..بمعنى ..لا مااحجي وياه...  لكن انطتني...

اية بتردد؛؛ الووو...

علي:؛_______ 

اية:الوو علي... تسمعني...

علي؛ اخذ نفس... اسمعج.. واريد اسمعج بعد صوتج ردلي الروح.. هسة يله اخذت نفس.. 

معقولة فراك نهار هيج سوة بيه... 

اية:: _____احمم..شنو ردت تسال..

علي:: اووف منج ..... شوكت تحنين... 

اية؛هاا...

علي؛؛بدلتي الضماد...؟؟

اية:امممم ..لا..علي ترى طابت.. 

علي:: ادري طابت بس هاي العصارة..حتى تخفي الاثر مال حرك...

اية:: اهاا ماشي...هسة اضمدها...

علي::عفية بالحبابة... يله مع السلامه...

اية؛؛الله وياك...

سديت الفون اباوع عل بنات يباعلي ويضحكن.....

منى:: يوومه فديت الخجلان...

مها:: يمه الحب يمه...

اية:: عزززة شبيجن يا حب شنو القصة...

منى:: يمه منج اثاريج مو هينه... وتكليلي لا بالي مو يمه ومااحبه وما..وما... 

مها:: لا عيوني اثاري شرارة الحب مشتعلة من زماان...واحنه ياغافلين الكم الله ..هههه 

ام عمار:: عوفن البنية شتردن منهة...

اية:: مو صوججن صوج اني اكعد يمجن...

عفتهن وكمت وصعدت للغرفة... 

اووف معقولة اني هم ارتاحيت.. بعد ماسمعت صوته... يارب شديصير وياي... احبة ومااحبه .. اريدة ومااريده بنفس الوقت شسوي... 

شوية واجتي مها ومنى..

مها؛؛ هاا يحليوة... شنو زعلتي...

منى::حبي والله نشاقة وياج...

اية:: لا عادي مصار شي...بس اني توترت شوية..

مها:؛ اكولج ايوو انتي مثل اختي الصغيرة

اذا حبيتي علي لو تعلقتي بي فهذا شي مو عيب .

.. انتو راح يصيرلكم 9 اشهر متزوجين...يعني لازم تشوفين حياتج... وتكملينهة ..الى متى تبقين معلكة لا انتي متزوجه ولا ..انتي ممتزوجه..لازم تتخذين قرار ..كل هذا الوقت يمر من عمرج... صدكيني ..

. لازم تنطين فرصة... وتحاولين تنسين الفات وتبدين صفحة جديدة..لازم   بينج وبين نفسج تتخذين القرار.

 انتي مو صغيرة واعية ودارسة...وتعرفين الصح من الخطأ....

لو شتكولين منى...؟

منى::  والله كلامج درر وصحيح...وعلى كولتج هي واعية وتعرف الصح من الخطأ... والي داشوفه علي يحبج...

 من نكعد لاحظته طول مااحنه كاعدين عينه بس عليج ...

اية؛؛.... والله ماادري احس نفسي ضايعه... مااعرف اتخذ قرار .. 

مها::يله الله كريم... ان شاء الله تنحل... 

منى::ان شاء الله ...يله تعالي انزلي..

اية::اووك تمام

نزلنه وكعدنه يم عمتي وعمي...

ابو عمار:: هاا بوية اية شلونج...

اية::الحمد لله تمام... 

ام عمار:: يكول عمج اذا تردين ترحين لاهلج تغيرين جوو..

 اية:: صدك والله... ياريت...

ابو عمار:: خلي يجي محمد وياخذج.. 

اية:: مشكور عمو..

رحنه حضرنه العشة.. اجتمعوا الولد ...وخلينه العشة... كملنه... ومحمد.. دخل للحمام وبدا يحضر نفسة ... لان راح يشوف خطيبته   ... 

صعدت حضرت نفسي.. وكملت ونزلت وطلعنه اني ومحمد...

.وصلنه لبيت عمي... دخلت اني سلمت عليهم وطلع عمي يتلكه محمد... دخلوا للستقبال رحت كعدت يمهم وعمتي كاعدة ..وعمي سوالف هو ومحمد.

  بقينه بالنص ساعه كاعدين ورهف ماكوو...محمد التفتلي وغمزلي ..قصدة رهف ماكو...

ضحكت...

عمي يغمزلي :: بوية حمودي انته جايب مرت اخوك.. لو تشوف خطيبتك...

محمد::هاا... لا جايب مرت اخوي ...

عمي؛: هاا يعني ماتشوف خطيبتك..

محمد:: هاا. عمي...بكيفك.. .

عمي:: هههههه. بوية اية روحي صيحي اخيتج تسلم على خطيبهة...

اية؛؛ ايي حاضر عموو...

دخلت والكه رهف متحضرة وخايفة تدخل... 

اية:: يووومه فديت الخجلانه...

رهف::اووف بس خجلانة احس قلبي حيوقف...

مرت عمي:: يله اخذي العصير عيب من الولد... 

 رهف:: حاضر.. بسسس

اية؛؛لا بس ولا شي...

دخلنه  للاستقبال كووة ...والصينية تختض 

رهف ::سلام عليكم ...

محمد::وعليكم السلام..

قدمت العصير لمحمد... ولعمي واجتي تطلع.. 

اية:: وين رهوفة تعالي اكعدي يمي..

اني كاعدة قريبة على محمد...

كعدت بصفي..وصرت اني بينهة وبين محمد...

اجه اتصال لعمي وطلع برى يحجي ...

عمتي غمزتلي وطلعت بمعنى تعالي وياي واني شلون

 احب الخباثة...

محمد::احم احم...

اية::احماات...

محمد:: اني جايبج تشوفين اهلج 

اية::اممم ايي

محمد::لعد كاعدة يمي المن... اهلج وطبوا جوة...هههههه

اية:: ههههه كاعدة على قلبك... 

محمد:: ايي والله... 

اية:: ههههه وسفة عليك اني خيتك.. هيج تكولي ...

محمد::خيتي وعلى راسي ..بس حسي شوي....

اية؛؛ههههههه ...اوك راح احس.... يابا مرخصتكم...

محمد::مرخوصة ....

دخل عمي وكعد يمهم.... محمد ياشرلي ..بمعني ارجعي اكعدي...

اية؛؛ يله مرخصتكم...  

رحت يم عمتي ومرت عمي..والبنات...بقينه نسولف تقريبا نص ساعة وراح محمد بعد مافقد الامل انو يكعد وحدة هههه

بقيت يم بيت عمي بدون أحداث تذكر... 

رجعت قبل رجعت علي بيوم بالليل...جنت متحمسة لرجعته..نمت كعدت الصبح قبل لا يجي بسرعه سبحت ولبست وخليت مكياج خفيف....ولفيت الحجاب...ونزلت ..

صباح الخير...

الكل::صباح النور...

منى::اليوم نشاط وحيوية.. 

ام عمار:: هاا بدينه خلي البنت على راحتهة...

منى:: يمه شنو حجيت اني ....

اية؛؛ مو تعرف نواياج... 

دااحجي وسمعت صوت علي برى ديسلم على عمي...

اوووف قلبي احسة حيطلع من مكانه... تلبكت .. بس لازم اكون قوية وماابين هالشي كدامه... 

علي:: السلام عليكم...

الكل::وعليكم السلام..

ام عمار:: يمه هلا بوليدي.. توة مانور البيت...

باس ايد امه وراسهة..

علي:: منو بوجودج يالغالية... عساج بخير..

ام عمار:: بخير من شفتك...

مكدرت انزل عيني من عليه شكلة بالزي العسكري ..دماار.. شهالوسامة يربي...

منى:: حمد الله عل سلامه اخوي الغالي... 

علي::يبعد عمري... شلونج ...

باس منى من راسهة...

اووف وصل السرى الي....

اية:: حمد الله عل سلامه...ومديت ايدي من بعيد مردته يتقرب اكثر...

لزم ايدي ...

علي:: الله يسلمج... وباسني من راسي... 

نزلت مها وسلمت عليه ..واجوي اطفالهم يركضون عليه... ويبوسون بي... شلون مكيف بيهم...

بقى ساعه تقريبا كاعد ..بعدين شال جنطته وصعد للغرفة .. عمتي اشرتلي بمعنى روحي وراه....

انتظرته يصعد شوية وصعدت وراه.. لكيته كاعد عل جرباية..... شافني وتبسم. .. 

اية:: محتاج شي.. 

علي::ايي محتاج...... 

اية؛؛يعني..

علي::ااممم .. ممكن تنطيني ملابس.. 

اية؛؛ اهاا... رحت فتحت الكنتور..طلعت تراك.. رصاصي.. ودااسد الباب.. وجان الكاه واقف ورة الباب...سد الباب وحصرني بين الكنتور والحايط...

اية بخوف؛؛ هاا علي.. 

علي::شبيج خفتي ....بس اريد اشبع شوف منج ..اووف شكد اشتاقيت لعيونج ...

اية::عللي...اريد اروح

علي؛؛ لا تخافين .. 

اية؛؛مماااخاايفة.. بسس اريد اروح.. 

علي::اسف اذا خوفتج ..بس اريد اشبع من عيونج..اذا تردين ترحين ملازمج.. ولا جابرج ...تكدرين ترحين... 

اية؛؛اووك..

طلعت من الغرفة.. واني احس جسمي يرجف مااسيطر عليه...رغم بديت احس بمشاعر تجاهة..لكن مااتحمل قربة مني...

نزلت ...

مها؛؛ هاا ايوو شبيج..

اية؛؛هاا.. شنو

مها::بيج شي وجهج اصفر.. 

اية؛؛لا ماكو شي سلامتج...

بدينه تحضير الغدة والطبخ... نزل علي ...بس سمعت صوته ارتبكت... مااعرف شنو مشاعري.. احبه لو اكرهة ... صح السوة بيه مو شوية لكن ليش حنيت اله ليش احب اشوفه احب اسمع صوته ....لكن اذا تقربلي ...كل هالشي يختفي..   مااتحمل قربه مني... ياربي شديصير بيه...شهالضياع الاني بي .....

خلصنه الغدة وكعدنه نتغدة بس مكدرت اكل... 

علي بهمس:: ليش متاكلين....

بدون مالتفتت اله .:: مااشتهي...

ام عمار؛: اية ليش متاكلين...

اية:: مااشتهي... 

كمت عل مطبخ... شوية ولحكني علي..

علي:: اية.. ليش مااكلتي

اية:: نعم... مااشتهي...

علي؛: اني اسف اذا ضايقتج.. اذا قربي يزعجج او يضايقج 

...فوعد مني ماازعجج ولا اضايقج...اتمنى تعذريني لان ....صدكي حبيتج واريد اتقرب الج وادخل قلبج .... مااريد شي ثاني..

...واذا كان هذا الشي ضد رغبتج مستعد ابتعد بالقدر الي ترتاحين بي...واكرر اسفي ... 

عافني وطلع. لكن حسيت براحه لان تفهمني.. وتفهم قربه

 مني يضايقني...

وفعلا ابتعد....و   صار كلامنه  على كد السلام وبس...

مشت الايام .. وصار تقريبا شهرين...على نفس الروتين 

 وعلي ابتعد كلش  حتى من يجي من الدوام ميكعد بالبيت هواي.. احسه يتهرب مني او من واقع حياتنه .. وماانكر اشتياقي.اله  اريد اشوفه ..وبسس.....

 وتقرر عرس محمد ورهف بعد عيد الاضحى..  

واجه العيد لكن علي كان بالدوام ومكدر يجي...رغم توسلات عمتي ...لكن حسيت الرفض منه....

رحت يم بيت عمي يومين ورحنه للسوق.. حتى نكمل جهاز رهف وحجزنه البدلات والصالون...ورتبنه.. امورنه.. ورجعت للبيت 

احس نفسي مختنكة رغم الكل فرحان مابين تجهيزات العرس.. وحاولت الهي نفسي بشغل البيت اهرب من واقع انو حياتي مابيه اي طعم....

بعد يومين لعرس محمد.رحنه اشترينه ملابس واكسسوارات..وكذا ..

 . اجه علي .وكان اسلوبة بارد... ومبتعد ..واني ابين اني ممهتمتلة لكن شي بداخلي حزين من برودة هذا...

صار يوم الحنه ورحت يم بيت عمي على حنه البنات....صارت الحنه واجوائها...والضحك والرقص...واجت عمتي والبنات ومحمد حتى يحنون رهف..

وبعد ما خلصت الحنه  رجعت وياهم للبيت..،

دخلت للغرفة.. سبحت ..وحضرت لبسي للعرس ...

ودخل علي...

علي::مرحبا..

اية؛؛اهلا..

علي:: شلونه الحنه تونستي...

اية:: ايي .. اجوائة حلووة.. 

علي؛: تمام ...

نزل فراشة وتمدد ..

علي؛؛تصبحين على خير...

اية::اجمعين....

نمت كعدت الصبح...  نزلت حتى انظف البيت ويه. البنات.. وجان البيت كولة كاعد وهوسة الاطفال ..

. بديت انظف ...مجنت مشتهية اكل..تعبت من حياتي كولهة .. اريد شي يفرحني حتى علي البدأ قلبي يحن اله واحب تصرفاته ..ومغازلاته صار انسان بارد ... احس نظراته متخاطفة الي ..

ماادري ليش هالشي .. ضايقني. وخلاني انسانة بلا مشاعر ..

بعد مكملنه الغدة وخلصنه شغل المواعين والمطبخ .الناس بدت تزيد .. والبيت انترس ناس...

صعدت للغرفة حتى اجهز نفسي..  فتحت الباب لكيت علي.ديبدل.. بس البالشورت والفانيله...

اية:: اسفة..اسفة..

علي؛؛ اية... تعالي معندي شي....

لبس البنطرون بسرعه دورت وجهي ودخلت للحمام...

غسلت بسرعه وطلعت لكيته كاعد بس اكو علبة مغلفة يمه  ...

علي:: ممكن تكعدين شوي 

اية؛؛ هااا.... اي عاادي...

علي:: اممم .. عرفت انو قبل كم يوم عيد ميلادج... صح..

اية:: منو كلك ..اصلا محد يعرف ...

علي:: اممم عرفت وخلاص..

اية؛؛ اهااا .. تمام...

علي:: ولو هي هدية متاخرة لكن اتمنى تتقبلينها ...

اية؛؛ بسسس... 

علي::لا بس ولا شي... اتفضلي اتمنى تعجبج...

فتحت المغلف .. جهاز حديث (بدون ذكر اسم الجهاز)...

اية:: وااو بس هذا غالي... 

علي:: بس اكيد مايغلى عليج... اكيد تردين تصورين .ومن هاي السوالف .. .  مااريدج اقل من الحواليج...

ومخلي بي شريحه.. بس ياريت متنطين رقمج لاي احد 

اية:: شكررا.. اي شي اكيد بس عمتي .. وبنات عمي..

علي:: ورقمي... ؟؟

اية:: ليش.. انت موجود يمي... اقصد وياي بالبيت...

علي:: يعني اذا رحت للدوام مراح تقلقين ...او تكولين خلي اطمئن عليه...

اية:: يعني انته انطيتني الجهاز حتى بس اخابر عليك....؟؟ وثانيا عمتي دائما تتصل عليك وتطمنه .

علي::اممم لا اكيد بس شفت البنات البارحة يصورن .. كلت بس اية ماعدهة جهاز... و ثانيا ادري بيج مستحيل تتصلين عليه .. 

بس حبيت امازحج....

اية:: اهاا اوك... اكرر شكري .. 

علي:: لا ولو ...ادللي... اعوفج تجهزين نفسج...

اية:: اوك...

علي:: لا تطلعين بالزفه انتظريني اني اجيج واخذج.. ماشي

اية:: اووك تمام...

بديت اجهز نفسي لبست فستان. ردن  وردي .بورد ناعم..وشال وردي فاتح. ..

 وحذاء ابيض  كعب عالي... .وميكاب خفيف ونازك... 

ونزلت .الديجي مشتغل باعلى صوت و..البنات يركصن ..والجو مشتعل..

قبل وقت الزفة ...عمتي صاحتلي ...

ام عمار:: يمه اية  صيحيلي علي خلي اساله عل سيارات...

اية:: حاضر يمه...

طلعت دااشوف علي...لكيته واكف هو وكيان ويمهم بنات حلوات بلبس فاضح..... ويسولفون ويضحكون... حسيت نفسي اشتعلت ناااااار... ودخلن للبيت وعلي وكيان عيونهم عليهن... بقيت واكفه ومخنزرة...دخلن كيان شافني واكفة دور وجهة علي شافني حسيته ارتبك...

اشرتله بمعنى تعال...

عباله ردت اساله على البنات والموقف الصار...

علي::ذني بنات.جوار_____

قاطعته مخليته يكمل...

اية:: مومهم. امك تريدك جوة... 

عفته ودخلت... بس ...احس ماشفه غليلي...

هو شوية ودخل.. دخلت للمطبخ ..

اية :: عمتي هذا اجه...

طلعت صار بوجهي ... مدرتلة بال .. طلعت بوجهي....

كعدت يم البنات حاولن يركصني وياهن بس مقبلت... بقيت كاعدة... لحد مصار وقت الزفة.. 

صعدن البنات..بالسيارات... عمتي ومها ومنى ولمياء  صعدن ويه عمار بسيارته  واني صعدت بالكيا ويه البنات... 

شفت علي من بعيد يدور ... راح على سيارت عمار يحجي وياهم شفت عمتي اشرت على السيارة الصاعدة بيهة...

مشت السيارة. ..وصاح عل سايق وضرب السيارة بايدة....باعصاب....

وقف السيارة ..اجه علي وفتح الباب ...

علي:: تعالي اية انزلي...

اية؛: بخزرة..خليني هنا...

علي:: كتلج انزلي...

خفت منه...نزلت لزمني من ايدي طبك الباب بعصبية.. ومشينه ويجر بيه... وفتح باب سيارته ...بقيت اباوع عليه...

علي:: ااصعدي...

اية؛؛ اوووف صعدت بعصبية وجريت الباب....

اندار وصعد ... طول الطريق ساكتين...

 الناس تهوس وتضحك واحنه معبسين....

وصلنه ...اول موكف نزلت ..وصاح عليه...

علي؛؛ منتظرج...

مجاوبته...

دخلت جوة هووسة والنسوان يصفكن ويهوسن.. صحت على عمتي ومرت عمي... يجن ويانه بالسيارة...

طلعوا العروسة وصعدوا بسيارتهم... 

ورحنه اني وعمتي ومرت عمي والبنات..بسيارة علي...

الطريق كوله يسولف ويه عمتي ويضحك... 

هو بطبعه اجتماعي جدا..ويختلط بسرعه..

اني بقيت اباوع عليه صفح...وكل شوي دايرة وجهي... لحد ماوصلنه...نزلنه .من السيارة

. من شفت رهف واكفه بالباب وديذبحون الدجاجة... تذكرت من دخلت واغمى عليه بالباب ... ..

وصار رمي رصاص ...اني. طفرت وكمت اصرخ واسد باذاني.....من زمان اخاف من الصوت العالي وخصوصا الرصاص...

شوية ووقف الرمي عمتي اشرتلي ...بمعنى خلص..

دخلنه للبيت...واشتغل الديجي ..والمعزوفة...

تركص اكبر واحد... 

كعدت يم رهوفة شوية ااووف جنت فرحانة بجيتهة يمي  ..رغم مااعرف مصيري اكمل وياهة لو ارجع لبيت عمي... 

صارت وقت الزفة وصعدنه رهف للغرفة شوية واجه عمي ابو عمار ..ومحمد والنسوان كلهن صعدن ..

.ومثل مسوة عمي النه اني وعلي... 

بدى يقرة دعاء للستر وتوفيق الزوجين .... واحنه نصيح اامين..

تركناهم ونزلنه .. اني دخلت لغرفتي ..بدلت لبسي ولبست ملابس بيت.. ونزلت... 

لكيت البيت هوووسة..

بدت الناس تروح .. شوي شوي بس المقربين منتظرين العريس ينزل ...

اني بلشت اشتغل بالمطبخ .. ونغسل مواعين العشى اني ومنى ولمياء بين مكملنه المواعين وعزلنه المطبخ. وبدينه بالبيت .. نزل محمد وبدت الهلاهل....والجوكليت.

..وراح يم الزلم..

وصعدنه اني وعماتي والبنات لرهف نباركلهة.. .. من دخلنه .. شفتهة فرحانة وتضحك.. لكن عيونه حمر.. .. حسيت بضيقة بصدري مو قصدي احسدهة لو اخلي عيني عليهة .

.. لكن تمنيت نفسي بمكانهة... حصرتني البجيه ودموعي بطرف عيني... رحت بسرعه للغرفة...فتحت الباب وبدون مااشوف سديت الباب ووكفت وراه وطكيته بجية...من كل قلبي....

 محسيت الا بعلي وراي... ديبدل ..

علي:: اية. صاير شي.. 

حاولت اخفي دموعي ... 

اية؛: ماكو شي... ماكو ...

علي:: بس كولي احد مزعلج.. احد سمعج كلمه.. لا تخافين كوولي..

اية:: بعصبية.. كتلك ماكو شي.

علي::بس فهميني...

اية:: شفهمك... . من دخلت حياتي بهذلتني . لا اني عايشة 

ولا اني ميته ....

شنو حياتي ..هاا  فهمني..  شنو حياتي .. اريد اعيش حالي حال البنات.. حياتي بلا ملامح... 

اريد انام واني مرتاحة... 

بعدني صغيرة عل الهم والضيم والتفكير احس كبرت قبل اواني   والسبب ..انته اقتحمت حياتي وخربت كولشي بيهة .. اريد افرح.. 

اريد اعيش مثل ايي بنت لا اني بالسما ولا اني بالكاع... انته كولي شنو حياتي...

(بصياح)لاتسكت جاوبني... 

حاول يحضني واني ادفع بي واضربه على صدرة ... 

اية؛؛ عووفنني دممررت حياتي...محسيت بنفسي.الا واني بين ادية .واغمى عليه....

 فتحت عيوني .. اباوع وعيوني مغوشات... واسمع عمتي  وعمتي ام عمار  .. يحجن.. 

عمتي:: هاا يمه ..ايوو. فتحي عيونج... 

ام عمار:: اية يمه شلون صرتي..

اية؛؛ وين اني...؟

ام عمار:: بالمستشفى.. يمه ...

عمتي؛؛ هاا يمه لا توجعين قلبي عليج...

مابيه احجي وياهم.. غمضت عيني. تعبانه واحس الدنيا 

تفتر بية..

سمعت صوت علي..

علي:: هاا يمه مكعدت..

ام عمار:: كعدت.. ورجعت نامت...

اني اسمعهم.. بس مااريد افتح عيوني .احجي وياهم..

ام عمار:: اندري شجاها حتى اكل متاكل... 

اجتي الدكتورة...

الدكتورة:: شنو مصحت ...؟

 عمتي:لا دكتورة صحت ورجعت نامت...

دكتورة: تمام... وين التحاليل..؟؟

علي::تفضلي دكتورة...

دكتورة: عدهة فقر دم حاد .. اممم ماكو حمل.. بس حالته النفسية ..شلونهة

ام عمار:: تعبانه والله..

دكتورة:: حاولوا تغيرون من نفسيتهة شوي ومن يخلص المغذي تكدرون تاخذوهة وحاولو تجبروهة عل اكل .. وخصوصا البرتقال والمعلاك.. الكرفس...

ام عمار؛؛خلي تكوم بسلامه  وتدلل... 

عمتي؛؛ يمه اية .... يله كوومي ...يبعد قلبي...

كومي خلي نروح ...

فتحت عيني يحجون وياي بس مااجاوبهم... مكتفية بالسكوت...

طلعنه وصعدنه بالسيارة...

بنص الطريق نزل علي...بس مرفعت راسي وشفته شسوة... عشر دقائق واجه وانطه علاكة لعمتي...وطلع بس طول الطريق ساكت... ويسوق بكل سرعته 

ام عمار:: على كيفك يمه لا تكلبهة بينه....

 خفف سرعته علي ..وجان ننضرب ..بالسيارة من ورى ...اني ضليت اصرخ لان الضربة كولش قووية.. وعمتي تهديني علي نزل من السيارة يركض عل السايق الضربنه...

صار صياح والناس التمت...وسدو السالفة 

واجه يصعد علي فتح باب السيارة وذاك كام يغلط على علي... وراحلة علي مثل البركان...

عمتي ام عمار راح تركض وراه.. 

اني محسيت بنفسي فتحت باب السيارة ونزلت ...وشفت الولد ..مطلع سجينه ويحاول يضرب علي... عمتي تصرخ ...

اني هم اصرخ خفت على علي ... بالبداية علي ..جان يحاول يضربه بس يتلافه السجينه.. الى ان هجم عليه.. وضربه بوكس...وكعه بالكاع وجان  يهجم على رجل علي 

 ضرب علي بالسحينه... اني شفت منظر السجينه برجل علي... متحملت.. كعدت بالكاع واصرخ.. وعمتي ام عمار ذبت

 نفسها على علي وعلي دفعها...

وعمتي خابرت عل االولد. اسمعهة تكلهم علي نضرب سجينه... وكذا مكانه... حتى يتلاحكونه... 

بس علي رغم السجينه برجله ...لكن ضرب الولد ضرب...

 بيني وبين نفسي كلت الولد ماات...لحد ما فرقوهم الناس 

حاولوا يرفعون السجينه من رجل علي .. بس محد تجراء... 

علي يباوع عليه ...

ويهمسلي مااكو. شي... 

واني اباوع دمايته ترست الشارع...

جابوله خاولي ..خلاه الخاولي بحلكه وسحب السجينه ....بس حسيتة شاغت روحه... 

لفاهة لرجله واجه علينه والناس يردون ياخذون للمستشفى مقبل ...

خابر عليه عمار..:: جايينك بالدرب...

صعدنه علي بالسيارة وحاول يهدينه ... ورجع للولد مخلاه يروح ..وخمس دقايق واجه عمار وكيان واحمد...

عمار خابر على جماعته.. بلغهم.. وعلي اباوعله وجهة صار اصفرر كركم...

صحت علي واني ابجي..

اية؛؛ علي تعال اصعد فدووة... 

علي:: روحوا انتو للبيت ...احمد تعال وصلهم...

ام عمار؛؛ ياا.والله مااعوفك... 

علي::يمه لا تسوين هيج ... 

اباوع على علي كووة يحجي يقلبي انعصر عليه عصر... 

عيونه عليه يحاول يطمني.. ..بس اشوفه كوة واكف عمار صعدة بسارته وكيان بقى يم الولد ابو السيارة واحمد اخذنه... للبيت عمتي كوة صعدت مقبلت ...

وصلنه للبيت. وكولها تسال شكو احمد نزلنه واخذ عمي وراحوا للمستشفى 

اني احس نفسيتي ندمرت.. مكدرت احجي بس دموعي تجري... 

.البنات يحاولن يهدن بينه.... شويه ونزل محمد...

محمد:: هاا شكو. ياستار... شبيجن تبجن...

منى حجتله الصار...تخبل ...

محمد:: واني اخر من يعلم غير تكولون ... 

راح يركض للغرفة يبدل ملابسة... ونزل هو ورهف...

اجتي رهف حضنتني وتحاول تهديني... 

صارت بالوحدة بالليل وهمة مااكو نخابر عليهم محد يجاوب ... الى ان خابر محمد على عمتي...

ام عمار؛؛ هاا يمه ..ولكم شلعتوا قلبي... 

محمد؛: هاا يمه زين ان شاء الله بس نزف دم هوااي وهسة يله لكو متبرع حتى يتبرعله بالدم ...ومنتظرين ...

ام عمار؛؛يعني هسة هو شلون صار...؟

محمد؛؛يمه لا تخافين ان شاء الله  ماكو شي .. يله لازم اروح ...

ام عمار؛؛ الله وياك يمه ..