رواية درب العشك الفصل الثامن عشر 18 بقلم شمس

والتقينا بعد غيبة ..

بعد الم وقهر ودموع ومرض ..

شفت ضحكاتي ودمعاتي يتسابقن ..

كل من حاير بموقف وبالغزل يتنافسن ..

اني صافن وهي بذهول .. 

هو هذا العشگته اشو ملامحة تغيرن ..

اني اشواگي تجمعن.. 

واحس هواي اتأخرت ..

اريد احجي اريد احظن اريد اطلع شوگ گلبي ومعرفت ..

لان من شفت ضايع حسنها .. اتخربطت وتبهذلت ..

گمت ادور عيوني عنها . واسوي روحي ماشفت ..

هي ماگدرت تعاتب بس دمعات عيونها الجرت ..

وجنها تگلي مو مهم نحجي ونعاتب ..

المهم التقينا وبعد هالغيبه ارجعت…… بقلمي …....

من شافتني بقت تون بصوت ودموعها جرت ..

قرفصت يمها وابجي وياها ..

ها يروحي هذا كله الصار بيج بسبب صگر ..

يروحلج صگر وعشيرته فدوه يبعد روحي ..

هي زادت بالبجي وگامت تشهگ .

والله من يوم العفتيني ماشفت الراحة ولاالنوم ..

اني بلياج مااسوة شي ..

ارجعيلي مريتي مالي غيرج ولاتصدگين بيوم تجي وحده بمكانج .. انتي ماخذه عقلي وگلبي وماافرط بيج لو يموتوني ..

كل الي سمعتيه والي وصلج خطأ. 

اعذريني يروحي المفروض من البدايه افهمج واحجي .

صوجي لان سكتت واستهانيت بالسالفه ..

بس ماادري هيج الامور راح توصل ..

لاتخلين الناس تفرقنا .

كافي فراگ . تشتتنا وتعبنه . ارجعيلي رفيف واوعدج كل الي ترديه اسويه ..

احلفج بأبنج ارجعيلي وصيري اقوى من قبل ولاتخلين المرض يهزمج .

لاتفكرين بصگر . صگر ملكج الج ومايشوف غيرج بعينه .

احجي وطلعت كل الي بگلبي .

وهي تشهگ وتبجي .

نسيت الدكتور الوگف ونسيت روحي من شفتها ..

باوعت الدكتور ماهو .

مااعرف شوكت طلع ..

تقربت حضنتها .. 

بوست عيونها وخدودها وشفايفها وشامتها ..

كل جزء بوجهها بسته .

وهي مغمضه . حسيته هدأت من حضنتها .

عبالك تگلي لاتعوفني خليني بحضنك .

جان ودي احضنها بأثنين ايديه ..

گلتلها سامحتيني حبيبتي ..

نزلت دموعها وهزت راسها ..

وكانت هاي اول ردة فعل منها حسب مااعرفت من رحيق دخلت رحيق وشافتنا بعيج من منظر هي وامها .

گامن يبجن ..

رحيق .. اووووف من عنادكم . حطمتوا حياتكم وحبكم وضيعتوا فرحتكم علمود شي مايسوه ..

گلتلها اني الغلطان وشتگولون عليه حقكم .

بس خاله لاتحرموني منها ماعندي غيرها ..

ام رافد .. يمه اني من شفت بنتي رجعت تضحك وتتحسن هاي بالدنيا شعندي غير سعادتها ..

رحيق .. خلي نشوف الدكتور شيگول ونطلع ..

سألنا الدكتور . گال اهم شي نفسيتها .. اذا مرتاحة تتحسن وبأسرع وقت .

بس انتوا ابعدوها عن التوتر .

واي شي يصير اتصلوا عليه او جيبوها ..

باوع الرفيف .. گالها خو من البدايه وگولي اريد زوجي .

ليش قلقتي الي يحبوج بهالشكل ..

هي ابتسمت ..

اخذها وطلعنا . گلتلهم اني عندي قضيه ومااگدر اطول وباجر محكمه ..

لاتگولون الرفيف .. بس گلولها ابوه مريض وراح يشوفه 

رحيق .. ع الاقل بات اليوم وارجع باجر من الصبح .

خطيه متشوفها شلون فرحت من شافتك ..

گلتلها هاي هي ..

خابرت مسلم گتله نبات هنا الليله ..

گال همزين گتلي انت بات عند انسابتك واني اشوفلي فندق ..

صگر .. مو ياخذك الواهس وتلعب بكيفك . ترى اگول المنى واخليك يصير حالك اكثر مني .

مسلم .. لامروتك . والله مااسوي بس اباوع هم حرام واحد يباوع ..

اخذت رفيف واخواتها ورحنا البيت اختها ..

زوج اختها حباب رحب بيه ومال احسبوا البيت بيتكم ..

رادت رحيق تدخل رفيف للغرفه .

گلتلها اني جاي وياج .

گالت اريد ابدللها ..

گلتلها غير مرتي شبيج .

رفيف ماشالت عيونها عني ..

اختها تبدللها واباوع الجسمها بس عظم ماعدا بطنها شويه بارزه ..

لبستها تراك .

انتبهت الشعرها مگصوص . انقهرت بس مابينت ..

شلناها اني ورحيق وخليناها ع السرير .

لان اني ايد وحده واخاف اذيها ..

طلعت رحيق .

نزعت حذائي . وتمددت يمها وحظنتها ..

خليت راسها على ايدي .

بقيت العب بشعرها .

وابوس بخدودها واهمسلها احبج .

ادري بيها تغار .

ابتسمت وسحبت راسها .

صايرة تخجل .

گلتلها اريد اسمع صوتج يروحي اشتاقيت الصوتج ..

باوعتلي وضحكت .

ورجعت غفت بحظني واني هم تعبان غفينا سوه ..

بس هالمره تختلف ..

صدگ نمت واحس التعب كله راح مني ..

لليل اجت رحيق جايبه صينيه العشا ..

گالت مادام وعت على نفسها وتفتح حلگها ..

گعدها تاكل شويه .

بلكي ترد عافيتها وهذا الطفل خطيه شنو ذنبه .

مسويتلها شوربه وكباب شوي ومقبلات ..

گعدتها رفيف حبيبتي . گومي اتعشي وياي ..

هي فزت وصاحت بصوت عالي صگرررر ..

يمكن حلمانه ..

گلتلها اني هنا يمج حبيبتي شبيج ..

ردت روحها من شافتني وگالت عبالي عفتني ..

ضحكت گلتلها من اروح فدوه الهذا الصوت شگد اشتاقيت اسمعه ..

رحيق وامها اجن يرگضن .. وگامن يبجن .. 

گلتلهن شوفن مرتي شلون تحبني .

ماكو رجال بالدنيا تحبه مرته هيج ..

رحيق .. بهاي صدگ . رادت تموت على فراگك .

صگر .. وهسا راح تاكل وترجع تسمن لان تدري بيه مااحب الضعيفات .

وحتى ابنه يكبر ويقوى ..

رفعنا ضهرها بالمخدات .

وگمت اوكلها شوربه .

ولان معدتها فارغه .

ماگدرت تاكل هواي ..

شربتها عصير .. وكلما تعطش انطيها سوائل الليل كله گاعد وياها .

گلتلها حبيبتي من الصبح ارجع اني . ابوي مريض كلش وبس يصير زين اجي اخذج .

وعندج علاج . اريد اجي اشوفج تمشين على رجليج .

گالت بس موتتأخر . كان صوتها خافت من تحجي لان فترة طويله داخله بصدمه وماتحجي ..

…………………………………………… 

اجاني مسلم الفجر ورجعنا للبصرة ..

بالطريق خابرني ابوي ..

-انت وين .

-جايين بالطريق 

-المره ماتت . 

-لا ياالهي الى رحمة الله .. استغفر الله ياربي سامحني ياالهي .

ضجت حيل والطريق كله استغفر ..

وصلنا بدلت بسرعه ورحنا للمحكمه .. 

لگيت ابوي وعمامي والمحامي ..

وابوي يصفگ ايد بإيد ..

اجه القاضي ودخلنا . ولد المرحومه سووها هوسه وامنا راحت بسببك والا نخليك تختخ بالسجون ..

دخلنا للقاضي .. وجنت مامتوقع يحكم عليه بالسجن على ذمة التحقيق ..

بقى بالي يم رفيف .. اذا عرفت شيصير بيها .

ليش هيج حظي ..

ماصدگت رجعت الحظني .

هسا القدر لعب لعبته مرة ثانيه وبعدها عني ..

اخذوني للسجن . عمامي وابوي انخبصوا ..

گلتلهم شبيكم زعطوط وخايفين عليه .

مايصير الا الي الله كاتبه .

صحت مسلم على جههة .

گتله هاك موبايلي . وخابر على رحيق اخت رفيف هاي كلها تحاول تطلع اي عذر الرفيف ولاتگلها انسجنت .

علمته ع الرمز .

وگتله شيصير تجي تگلي ..

دزيت رساله قبل ماانطيه الرساله ..

💬حبيبتي شلون صرتي اذا تحبيني صدگ اكلي واخذي علاجاتج وخلي بالج على ابنه .

اني بس يتحسن ابوي اجيج ..

دخلت للسجن . واحس الدنيا عوجه وياي ..

راح مسلم جابلي ملابس وفراش ومخده وجرجف ..

وصابونه وكلشي عبالك رايح الفندق مو للسجن .

هاي سوالف ابوي اعرفهن ..

ابوي اخذ ناس وشيوخ وراح لاهل المرة وگاللهم احنه حاظرين الكل طلباتكم .

والي تردوه يصير ..

وهذا قضاء وقدر .. وهذا يومها والحادث سبب ومامتعمد

هو .

خلونا نحلها بيناتنا احسن ..

بقوا يساومون وعبالك المرة جانت معيشتهم وراحت وانگطعت العيشه ..

امهم بعدهي مانشف گبرها وهي بيها قلب وضغط وسكر ومن ماتت ذبوا البلاوي كلها عليه ..

طلبوا عشرين مليون ..

الشيوخ اعترضوا وزعلوا ورادوا يگومون من مضيفهم .

وگالوا . ابنه رجال والسجن للزلم ..

واذا طلبنا تقاريرها من المستشفى..  

وعرف القاضي امكم بيها كل هذي الامراض .

وماتت بسببهن مو بسبب الحادث .

الحادث بس استعجل موتها ..

راح يخفف الحكم وسنه زمان ويطلع ..

عاد من شافوا تهديد من ابوي وافقوا على 15 مليون 

وراحوا تنازلوا ..

حكموا عليه كم شهر حق عام .. مع وقف التنفيذ وطلبوا كفاله ..

دفعتها وطلعت ..

عشر ايام بقيت بالسجن متخبل على مرتي ومشتاق اشوفها ..

طلعت للبيت سبحت وزينت .وردت اطلع گال ابوي وين .

ذابج طليان ومسوي غدا والناس مگلوبه وانت تريد تطلع 

بقيت ورى الغدا بس اريد الناس تخف .

خابرت رفيف ..

رفعته ..

هلا يروحي . سمعتها تبجي . صگر انت وين 

رفيف .. عود هسا اريد اجيج البغداد ..

رفيف .. اني بالبصرة سمعت مسجون صدگ. 

صگر .. طلعت يروحي ماكو شي وهسا اجيج .

ركبت سيارتي ورحت .

دگيت الباب طلعوا الحمايه گبالي ..

رامي .. اسمع مو عبالك قابلين برجعتها الك . بس لان مريضه وهي طلبت مانگدر نحجي بس تطيب .

نگعد ونسولف ..

صگر . تدلل الي تريده يصير .. اذا خلصت اريد اشوف مرتي ..

رافد .. رامي كافي مو وكتها .. تفضل صگر ..

دخلت وشفتها اجت من باب المطبخ تمشي بهدوء ..

مثل طفل هستوه يتعلم المشي ..

وصلت يمها بستها براسها . هي بسرعه حضنتني گدام اخوانها استحيت .

همه دخلوا للاستقبال قبلي ..

واني لزمتها وامشي . گلتلها شلون صرتي ..

رفيف .. اني زينه بشوفتك انت شلون صارت ايدك ..

صگر .. تروح كل آلامي من اشوف ضحكتج ..

گعدنا يم اهلها ..

گلتلهم من رخصتكم .. اني اريد ارجع مرتي ..

الي صار سوء تفاهم وكبر وتحول الى مشكله اذتنا كلنا .

وبعدتني عن مرتي . 

وصارت هواي حوادث بينا بسبب هذا الامر ..

اني لا هسا ولا قبل ولامستقبلا ..

افكر بوحده غير رفيف ..

واخطاء غيري مو لازم اتحملها اني ورفيف ..

خلونا نفتح صفحة جديده ونعيش حياتنا وخاصه عدنا طفل بالطريق جاي ..

رامي .. رفيف ماترجع وي اهلك ..

رافد .. شوف صگر .. اختي تأذت عندكم وتمرضت واحنه الي تدمرنا من شفناها بهيج وضع ..

وحلفت ماترجعلك بعد ..

بس من شفتها طابت بشوفتك . وهاويه ترجعلك .

مانگدر نوگف بطريقها ..

بس اذا تحبها وتريد راحتها .. 

تستقرون بيت وحدكم ..

تعرف رفيف شلون جانت عايشه .

وهذا الوضع مايعجب اهلك . 

ولاراح يگدرون يتعايشون وياها ولاهي تگدر تتعايش وياهم .

طباعها غير طباعهم ..

لاتعتبرها شرط او تهديد ..

بس احنه نريد سعاده اختنا . 

واذا تفكر بيها سعادتكم هم .

تبتعدون عن المشاكل .

وتصيرون اعزاز . ومن ترحون كلها تستقبلكم وتمرحب بيكم ..

احسن من المشاكل الي راح تنكد حياتكم ..

صگر .. باوعت الرفيف مدنگة وماتگدر تحجي . واعرفها ماراح تگول شي فوگ كلمه اخوانها .. لان تحبهم وتحترمهم .. واني هم قدرت موقفها ..

گلتلهم .. باوع خويه .. اني الابن الوحيد الشيخ عشيره .

والعيون كلها عليه . ومااريد انذم والناس تاكل وجهي وتگول عاف ابوه وراح ..

سعادة مرتي من سعادتي . وبودي استقر وحدي بس مااريد اطلع بزعل ..

خلوني امهد الامر للشيخ . واحجي وياه بطريقتي واشوف بيت واجهز روحي يله ..

رافد .. لا طبعا مانريدك تزعل وي اهلك بس حاول تحجي وي الشيخ . وحتى اذا تشوفون مشتمل حتى .

وقريب عليهم حتى الطرفين يرضون .

واذا ماعندك .

اني ورامي نساعدكم ..

صگر .. أفه عليك ياخوي . الحمد لله عندي خير من الله 

بس مثل ماگلتلكم انطوني مهله احجي وي الشيخ .

ورفيف راح تبقى هنا الى تصير زينه وتدخل على بيتها كامل مكمل ..

ضحكت وباستني .

رامي .. نحن هنا بالعجل بعتينا .. لو من لگه احبابه نسى اصحابه ..

گامت حضنت اخوانها وباستهم ..

واني هم گمت سلمت عليهم واخذت من خاطرهم وبست راس ام رافد .

وتصافينا ..

رفيف .. اخواني خلونا وحدنا گتله حبيبي عدنا موعد للدكتوره العصر متاخذنا .

صگر .. اگلج ويعرفون الطفل شنو .

گتله اي بالرابع هسا يعني يعرفوه 

رحنا العصر للدكتوره .. شافت وضعي گالت الطفل ضعيف وخامل . وراح انطيج مقويات اله ..

گلتلها دكتوره شنو جنسه . گالت ولد ..

ضحكت . هو كلشي من الله نعمه بس ردت اول طفل ولد حتى يشيل اسمه ..

طلعت من الدكتورة . گالتله راح يجينا ولد حبيبي ..

ضحك .. ومايعرف شيسوي .

اخذنا اني وماما اشترالنا عشا سفري..

واخذ الاهلة هم كباب ومشاوي من المطعم الاهله .

واخذ بقلاوه .. من الفرحة مايعرف شيسوي ..

خابر الاخته گالها لاتسوو عشا اني اجيب وياي عندي مفاجأة الكم 

وصلنا للبيت ورجع الاهله .. گتله حبيبي دير بالك ع نفسك وع كيفك بالطريق ..

صگر .. وصلت للبيت . نزلت الاكل .والبقلاوه .

گلتلهن تعالن عاونني ..

سمعت ابوي يحجي .. ولك صگير متنا من الجوع . وين لسا ..

گتله يابه هاي جيتي من الدكتوره اخذن رفيف .

بيها ولد طلع ..

ابوي ضحك هههههههه واخيرا اجه الشيخ الصغير .

گام وفتح ايده . حضني وگال ..

الله يكثر نسلك ويعلي شانك ان شاء الله. 

امي گامت تبجي ..

الله عوضنا بمكان اسد ..

حضنتني هم واخواتي انگلب البيت مناحة ..

زينب اجت باركتلي . 

وگالت بارك الرفيف بمكاني ..

گلتلها وليش ماتختبرنها انتن ..

دگيت عليها وگلتلها البنات يردن يسلمن عليج .

وحبيبتي بروح حلوه .

حجت وياهن وضحك وسوالف .

الشيخ .. بويه مريتك زينه صارت .

صگر .. ان شاء الله احسن .

الشيخ .. وشناوي ترجعها تبقى عند اهلها . 

صگر .. يابه هو اريد احجي وياك بهذا الموضوع ..

اني اريد اگعد وحدي ..

امي لطمت ع صدرها .. ياااا وتعوف ابوك ودارك 

الشيخ . خلينا نفهم ..

صگر .. يابه اني تعبت ومرتي تعبت من ورى عمتي وسوالفها . 

وشوف عينك صار شهرين يمكن اني بمكان وهي بمكان 

تعذبنا وهي تمرضت وصلت الموت .

وشوفتك صورتها شلون صايره ..

امي .. واذا رجعت هنا شيصير قابل ناكلها . عمتك وماتطب البيت بعد من وراها ..

صگر .. ها بويه شفت هذا الي گتلك عليه . راح يبقى المنابز والحجي نفسه .

اني اشوف بيت هنا يمكم قريب .

ومااعوفكم كل يوم يمكم . بس خلوني اعيش حياتي من رجعنا من دبي لسا ماشايف الراحه ..

الشيخ .. هاهي الي تشوفه بس بشرط .

البيت يمنا هنا بالمنطقه . والطفل اذا جابت كل يوم تجيبه الي مو تبعدوه عني ..

صگر .. هههههه هاي بسيطه بعد گمت بست راس ابوي بس امي شكلها ماراضيه .

بستها وبست راسها وگلتلها انتي الخير والبركه بس عن المشاكل ماتكيفين انسعد ..

سكتت ماحجت .

خابرت رفيف وگلتلها فرحت ..

ثاني يوم بديت ادور على بيت .

سألت المكاتب كلها .

لگيت بيتين قريبات على اهلي ..

واحد جبير بس بنائة مو كلش زين .

وواحد صغير مساحته 200 بس حلو ومرتب .

وبنيانه حديث ..

بس واجهة البيت يرادلها صبغ .

دزيت صوره الرفيف عجبها . 

اتفقت وي ابو المكتب وتكاتبت وي صاحب البيت .

وطلعت عمال صبغوا الواجهه .

والباب مال الشارع .

البيت نضيف من الداخل وگاعة گرانيت. والمطبخ كله سيراميك وحار وبارد ..

الله سهلها علينا بسرعة بسرعه ..

جبت اخواتي نضفن البيت ونقلت غرفتي وغراضي ..

عندي مكتبه صغيره فوگ بيت اهلي وبيها كتبي مال قانون .

نقلتهن وسويتلهن مكان ورتبتهن .

رحت شفت طباخ وكاونتر وميز مال طعام . اني ماافهم بهاي السوالف .

ادز صور الرفيف وهي تختار .

الى رتبت البيت كله .

جان الجو حار صيف .

مااشتريت فراشات . بس الستاير اشترتهن رفيف من يمها .

اخذت سبالت للبيت .

وطلعت واحد يركبهن .اخواتي ماتركني وحتى زينب .

شهرين احنه نرتب بالبيت ونسوي يله خلصنا .

طلع يخبل .

ناقصه بس مرتي تدخلها ..

عزمت اهلي يجونا . بيوم الي جبت رفيف .

لگيت ابوي محضر خروف . ذبحة بعتبه الباب وجوه رجليها .

باست اديه وباس راسها .

گالها طبت الخير ان شاء الله. 

ابريلنا الذمة واستري ماشفتي منا .

رفيف .. لا عمو مبريه الذمه انتو اهلي ..

دخلت اني گاعده .. دخلت رفيف باست راسها وسلمت عليها .

عاد اني شويه صارت زينه وگالتلها ع الخير الولد والبيت تشوفون على عينه السعاده .

اجن اخواتي سلمن عليها . وبعدين زينب واكفه وراهن ومتوترة . شافتها رفيف ..

گالتلها شلونج زنوبه .

عاد زينب ضحكت وحضنتها ..

وطبعا من ذاك اليوم هن صديقات كلش. 

زينب . سامحيني رفيف كله بسببي .

رفيف .. مالج ذنب انتي انسي وخلينا بالحاظر .

ضحكنا وتغدينا سويه .

اخواتي طابخات وجايبات الگدور .

اني ردت اجيب من المطعم بس ماقبلن ..

وبيومها اكلنا بماعين سفري ههههه .

لان جهزت البيت كله وناسي اشتري ماعين وخواشيك .

وذني السوالف .

خو اخواتي تجمعن ع الگدر وياكلن . ارتاحيت من شفت لمتنا وضحكتنا.  الله لايدخل دخيل بيناتنا ..

بعد ماطلعوا اهلي ..

اخذت مرتي الحظني وطلعت شوگ الاشهر الي راحت .

شميتها وبستها وسويت كل الي بنفسي ..

گلتلها حبيبتي اريد لحم لحم ماكو بس عضام .

ضحكت هي وگالت .. الناس ميته ع الرشاقه وانت تگول لحم .

صگر .. ايباه ليش هو اكو احلى واطيب من اللحم يسوي واهس للمص ..

رفيف .. صگر شنو هاي صاير كلش ..

صگر .. اكلج مشتاق وخليني براحتي ..لاتمنعيني ..

رفيف .. راد يتقرب . ابني گام يدفر .. ههههه گال اااااه ياربي حتى وي ابني ماگعد حظنا . 

اذا هذا ببطنج هيج يسوي من يجي شلون ..

بيومها تونسنا وكان احلى يوم . صدگ اللقاء بعد الفراق اله طعم ثاني ..

والله ليجيب فراق ان شاء الله.. 

(الكاتبة شمس)

اني رجعت الدوامي .. بعد ما صگر مسويلي اجازة ع ضوء تقاريري ..

وجان صگر كل يوم يوصلني للدوام ويرجع ياخذني. 

حياتي مستقرة وحلوه وياه .

وعلاقتي بأهله صارت احسن ..

اروحلهم كم ساعه بالليل ونرجع مااطول. 

خالتي مو هالگد تگعد ويانا .

بس ابقى يم البنات بغرفه زينب سوالف وضحك .

حملي تعبني وصرت بطه مثل ميسميني صگر .

بس بطني حيل صغيره .

اشتريت غرفه الابني وجهزتها من كلشي . 

اهلي اجونا وجابو هدايه للبيت .

رافد جاب تخم للصالة .

ورامي جاب مجمده لان كانت بس ثلاجه عدنا .

وماما جابت مايكروف بالاضافه لشغلات نواعم طقم مواعين وگدور وگلاصات وهيج شي ..

فرحوني حيل ..

من صرت بشهر السابع رحت راجعت الدكتورة ..

واخذتلي سونار .

شفتها طولت بالفحص . گلتلها دكتورة شكو الطفل بي شي ..

گالت انتظري .

كملت گالت گومي ..

گمت واني گلبي مقبوض .

گالت باعي ماما .

طفلج صغير . وبالاضافه اني شاكه يمكن يطلع بكليه وحده ..

هي گالت هيج واني وگعت ..

مااتحملت الخبر .

مو كافي كلشي يمشي عكس وياي ..

ياربي شنو هذا الابتلاء الي مايخلص ..

شفت ماما يمي وتبجي عليه . عبالها راح يصير بيه مثل قبل ..

گلتلها ماما ابني ماما ..

ماما .. الحمد لله ياربي الحمد لله تحجي تحجي مابيها شي .

دكتوره بنتي مرت بفترة صعبه . 

وجانت مريضه وفقدت مدة طويله عادي اصيح زوجها يمها 

گالت صيحي ..

صاحته ماما واني دموعي تنزل ..

گال ها حبيبتي خير شكو .

لزمر ايده وابجي .

صگر ابني صگر .

هو غمض عينه وگال شبي .

گتله عنده كليه وحده .وضعيف خاف ميعيش ..

الدكتوره .. ماما لاتخافين . جائز عنده ضمور بالكلى . وهواي عايشين بكليه وحده .

والطب هسا تطور وعلاج اكو گولوا يالله لويش هالتشائم

صگر .. والنعم بالله الي كاتبه الله يصير ..

اخذنا العلاج وطلعنا  . واني متكيه ع صگر واحس رجلي ماتعيني ..

گطعت الادويه بهالفترة كلها . بس المقويات اخذها .

گمت اخذ فيتامين .

سويت كلشي حتى ابني تصير عنده قوه ويطلع بالسلامه 

اووووف ياحبيبي اني السبب بعدك بگد العدسه وشيلتك همومي .. 

دخل صگر .. لاتگولين هيج .هذا قدر الله . 

وانتي مالج سبب واني اعرفه راح يطلع قوي . 

الي صبر وهو بلااكل وشرب ببطنج هذا قوي لو مو قوي 

ثاني يوم رجعت البيتنا . واخذلي صگر اجازه حتى ارتاح .

طبعا هذا المدير لو ميعرف صگر جان فصلني من زمان 

بقيت اكل اطلع اشياء ع اليوتيوب واسويها .

اكلات تنطي مناعه للطفل .

شنو اقراه اسويه واشربه او اكله حتى لو مااگدر 

من غير الفيتامينات ..

وصار يوم ولادتي .. 

جنت خايفه ومتوترة وماگدرت اولد طبيعي ..

شگد حاولوا وياي وفوگاها ضغطي ارتفع اضطروا يسوولي .. عمليه ..

طلعت من البنگ اهذي بأبني اني حتى مالحگت اسميه لان جنت خايفه اسميه ومااتهنى بي ..

اگله صگر ابنا عايش يگلي والله عايش .

وكل ساعه احلفه .

الم بطني موتني .

نطوني مهدئ ونمت .

الى ان صحيت .

شفت امي مخليته بحضنها .

گلتلها ها ماما زين .

ماما .. مبروك حبيبتي يتربى بعزكم . وج طلع بس يعيط گلب المستشفى علينا ..

اجه الشيخ وخالة ام اسد .

باركولي ..

واخذة يأذن بأذنه .. وسموه ع اسم اسد ..

ماحجيت ولااعترضت ..

لان هو اول حفيد عنده ومن حقه يسميه .

وبعدين الاهم سلامة ابني مو المهم الاسم ..

ويارب يطلع صدگ اسد ويعيش براحة وسعاده ..

بعد ماطلعنا من المستشفى ..

ذبح ذبيحه عمو الاسد ..

واجه خله جوه راسي خمس اوراق .

گال انتي جبتيلي الي يشيل اسمي من بعدي تستاهلين اكثر ام اسد ..

فرحت الكلامه واني اشوف الدمعه بعينه ..

الحمد لله الي خلاني اشوف هذا اليوم .

سعادتي بأبني وبصگر الي ممصدگ عنده ولد ..

كل ساعه يباوعله واذا بجه يخبص الجوه .

ولان مريض يخاف عليه ..

بعد الاربعين اخذته الطبيب ببغداد وبدينا وياه بعلاج .

وحاليا عمر اسد سنه .. واحنه لسا مستمرين نراجع بي ومساكتين عنه .

دعواتكم الابني ربي يشافيه ويعافيه ويخليه الي .

هذي قصتي بدرب العشگ الي مشيته .

صحيح اخذني الطرق متعرجه . بس بالاخير گدرت اتخطى كلشي وتستقيم خطواتي ..

اتمنى استفاديتوا منها وعجبتكم ..

واشكر كاتبتنا الي عاشت ويانا لحظاتنا اثناء سردها للقصه ..

لاتنسوني بالدعاء العائلتي وابني وربي يحفظكم جميعا تحياتي الكم ..