رواية وراء اسم مستعار الفصل الأول بقلم مريم سمير
_ اسرا_ئيلي! انت فاهم انت بتقول ايه؟
= كل الي فاهمه أننا اتجوزنا
_ جواز باطل أنا مسلمة وانت يهودي أو يمكن ملكش دين أصلا!! ، متجوزني ب اسم مش اسمك ، انت لا يمكن تكون الراجل الي حبيته واخترت أتجوزه! ، انت ازاي عملت فيا كده ؟
= مكنش ينفع اعمل غير كده عشان نتجوز
_ دا مسموش جواز ، قدام ربنا أنا عمري ما هكون مراتك ، انت هترجعني البيت حالاً وتطلقني من سكات
= أفندم؟؟ أطلقك؟ دا انا كل حلمي إني اتجوزك وتبقي معايا
_ وهم ، كل دا كان وهم ، الخطوبة والحب وتخطيطنا سوا لمستقبلنا كل دا مش حقيقي
= بصيلي يا مريم ، مفيش حاجة اتغيرت
_ بصالك ومش عارفة انت مين
= أنا جوزك ، واحدة واحدة هتتعودي و..
_ اتعود علي ايه؟ احنا مستحيل نعيش مع بعض ، لو عملت كده هبقي بكفر ولو عيشت معاك لحظة هبقي خاطية
= متكبريش الموضوع احنا اتجوزنا خلاص ، اتجوزنا علي ديانتك وانا راضي
_ احنا هنضحك علي مين؟ علي الناس؟ حتي ولو عرفت ، هعرف أضحك علي نفسي؟ ، طلقني دلوقتي ورجعني البيت أنا مش هبات هنا
= أنا مش هعمل كده يا مريم
_ وانا اختار اني أموت نفسي علي إني اتجوزك
= خلاص الجواز تم ، ارضي بالواقع ، أوعدك اني هعمل كل حاجة عشان أخليكي مبسوطة ، أنا مش عاوز غيرك
_ هبقي مبسوطة وانا متجوزة إسرا_ئيلي؟ جا**سوس خا**ين با_ع ضميره ونفسه وبلده ؟
= كانت عملتلي ايه مصر ؟ ، علي الأقل أنا عندي قضية
_ عمركم ما كان عندكم قضية ، هتعيشوا وتموتوا زي الفيران ، لا ليك وطن ولا ليك قضية ، انتوا قتالين قتلة ومعندكمش ذرة رحمة ولا دين ، كنت فاكرة اني عرفت أختار صح ، وقفت قدام أهلي عشانك بس قولت أكيد انت هتعوضني ، هوريهم وشي ازاي دلوقتي؟ هقولهم ايه ؟
قرب مني = عشان خاطري يا مريم متعيطيش
سحبت سكينة من علي طبق الفاكهة
_ انت لو قربت مني هقتل نفسي ، انت سامع؟
= طب أهدي، اهدي وسيبي السكينة دي ، هنتفاهم
صوتت _ أنا عاوزة أمشي من هنا حالاً
= انتي عارفة الساعة كام؟ ، مينفعش تمشي ب فستان الفرح دا في الشارع دلوقتي، الناس هتقول علينا ايه؟
_ اي حاجة هتبقي أهون من اني اكون معاك
مسك ايدي وضغط عليها ب غضب
= انت هتفضلي معايا ب رضاكي أو غصب عنك ، أنا عملت كل دا عشان بحبك ، انتي يستحيل تبقي ل بني ادم تاني ، لو حصل هتقتلك وأقتله ، انتي سمعاني؟
_..
هدي وساب أيدي = أنا آسف أنا مش عارف عارف عملت كده ازاي ، انتي كويسة ؟
_ ابعد عني ، مش عاوزة أسمع منك حاجة
= طب أهدي، أنا هخرج برا واسيبك لوحدك النهارده تكوني عقلتي ونتكلم بكرة
_ أنا مش هبات في الفندق دا انت سامعني ؟
خرج برا الأوضة وقفل عليا بالمفتاح واتكلم من برا
= بكرة تعرفي أنا قد ايه بحبك ، أنا جوازي منك خطر علي شغلي لأنك مصرية مسلمة ، ومع ذلك اتجوزتك ، انتي ليه مش حاسة ؟
_ انت مريض! انت مستحيل تكون طبيعي
صوت خطوات رجله بعدت ، فضلت قاعدة علي الارض وانا العياط مالي وشي ، مين يصدق الي بيحصل؟ الراجل الي كنت فاكرة هيبقي ليا الأمان الي عشت طول عمري عاوزة أحس بيه ، يبقي هو نفس الراجل الي عاوزة أهرب منه؟ ، ازاي في يوم وليلة تتغير كل حاجة ؟ هقف قدام أهلي ونفسي ازاي بعد الي عملته؟ أنا الي اختارت ، كنت أول مرة اختار ، ياريت كنت قبلت يتفرض عليا كل حاجة ولا أني احس الي حساه دلوقتي ، لازم أهرب!
رنيت عليه ف رد
_ أنا.. عاوزة أخرج أشم شوية هوا ، لو قعدت في الاوضة المقفولة دي هموت
= بعد الشر عليكي ، انا جاي حالا
قفل معايا وانا بترعش ، مجرد فكرة اني أهرب دي ممكن تخليه يقلب الدنيا عليا ، مش هيسكت الا لما يلاقيني ، ولو لقاني ف أنا ساعتها انتهيت .
سمعت باب الاوضة بيتفتح ف مسحت وشي بسرعة ، دخل ووقف قدامي = غيري الفستان ، أنا جايبلك في الشنطة هدوم كتير اختاري الي يعجبك ، العربية بتجهز عشان هخرجك خروجة تجنن
بصيتله ومردتش = اه ، هسيبك تجهزي ، أنا برا
خرج برا ف طلعت طقم من الشنطة ، لبسته ولبست معاه حجاب ، مكنش فيه غير هيلزات ، لو لبست واحد فيهم مش هعرف أجري بيه ولو ملبستش هيشك إن أكيد بخطط ل حاجة، نفخت ب قلة حيلة ولبست هيلز منهم ، خرجت ف لقيته قدام الاوضة
= شكلك حلو أوي
_..
= العربية جهزت
اتحركنا ونزلنا تحت في الريسيبشن
= خليكي هنا ثواني أشوف السواق راح فين ، مش هتأخر
ابتسمت ب تصنع ف ابتسملي ومشي ، قلعت الهيلز الي في رجلي بسرعة وبدأت اشوف اي مخرج من الفندق دا ، جريت علي باب الخروج الي ورا ، كان فيه بدروم فيه خردة وفي آخره باب خلفي ، دخلت البدروم بسرعة وسمعت صوته وهو عالي وبيزعق ب إسمي
= مريييييييممممم!!!
اتخشبت مكاني وحسيت ب رعشة جسمي كلها من الخوف ، أيدي ورجلي تقريباً بقوا تلج من كتر منا مرعوبة ، سمعت صوته تاني وهو بيقول
= هي مخرجتش برا ، اقلبوا عليها الفندق لحد ما تبان ، ومحدش يلمس منها شعرة واحدة سامعين؟؟؟
حطيت ايدي علي بوقي لما لقيت صوت نفسي بيعلي ، غمضت وانا بعيط وبدعي إن متجليش أزمة التنفس ، بتخليني أطلع اصوات عالية واكيد هيعرف مكاني في اقل من دقيقة ، حاولت أنظم نفسي علي قد ما أقدر ، شوفت ظل رجلين قدام باب البدروم ، بلعت ريقي بصعوبة والباب اتفتح بالراحة ، غمضت عيني ب قوة وانا بعيط
_ أنا آسفة، مش هعمل كده تاني
= أنتي.. مين؟
فتحت عيني لما لقيته مش صوت ديفيد
_ أنا..
= انتي مرات رجل الأعمال الي برا ؟ أنا شوفتكم من شوية وانتوا طالعين أوضتكم
_ أنت الي شيلتنا الشنط؟
= أيوة، انتي بتعملي ايه هنا ؟ جوزك قالب عليكي الفندق برا ، انتي تايهة وعاوزة تروحيله طيب؟
رديت بسرعة _ لاء ، أنا عاوزة أهرب ، ارجوك ساعدني وخرجني من هنا
= اساعدك ازاي!! ، أنا شيال هنا يفندم ، يعني شغلتي اشيل شنط ، المدير أو جوزك لو عرفوا اني هربتك مش هيرحموني ، دي سمعة مكان
_ أنا ممكن اديلك المبلغ الي انت عاوزه ، أنا معايا فلوس كتير اوي ، حسابي في البنك ممكن أحولهولك كله لو هربتني من هنا
سكت ودخل البدروم وقفل بسرعة لما لمح راجل من رجالة ديفيد جاي علينا ، الجارد خبط ف رد هو
= ايوة؟؟؟
° فيه حد جوا ؟
= دا البدروم يفندم وجاي أنضفه ، فيه حاجة ؟
° مشوفتش ست لابسة بني عدت قدامك؟
سكت وبصلي ، بصيتله ب رجاء ف رد عليه
= شوفتها راحة نحية الريسيبشن من شوية
الجارد طلع يجري علي جوا ف نفخت ب راحة
= أنا ضيعت ، اكيد هترفد من هنا علي بكرة الصبح بكتير
_ أنا آسفة ، كل دا بسببي ، أنا ممكن أساعدك صدقني
=..
_ هو مفيش مخرج من هنا ؟
= الباب الي وراكي ، بيوصل علي الطريق العمومي وفيه مواصلات بتعدي من عليه
_ أنا مش عارفة اقولك ايه ، هقابلك تاني قريب وأديك الي اتفقنا عليه
فتحلي الباب الي ورا = انتي راحة فين أو لمين؟
_ لسه معرفش بس المهم أخرج من هنا
= انتي متعرفيش طريق بيتكم؟
_ مفيش وقت انا لازم امشي
= انتي متأكدة انك هتبقي كويسة؟
ابتسمتله _ إن شاء الله ، شكراً أنا مش هنسالك الي عملته معايا
خرجت من الباب ووقفت علي الطريق استني أي تاكسي ، كانت المواصلات قليلة والملاكي كتير ، حاولت أقف في مكان مداري عشان لو ديفيد خرج برا الفندق، وقفلي عربية ملاكي وخرج منها تلت شباب
° عاوزة تروحي مكان؟
_ أيوة، كنت عاوزة اروح مصر الجديدة
° ياه دا المسافة بعيدة اوي ، بس هنوصلك
بصيتلهم بخوف ورجعت خطوتين ل ورا
_ لاء شكراً أنا هعرف اتصرف
° ودي تيجي نسيب واحدة حلوة أوي كده في الشارع دلوقتي؟
_ انتوا عاوزين ايه؟؟ بالله عليكم امشوا أنا مش ناقصة مشاكل
° مش هيحصل مشاكل لو جيتي معانا ، هنقضي سهرة هتبسطك أوي
مسك ايدي وشدني ، نزلت ب جسمي ل الأرض
_ سيبني ، سيبني بقولك
كان صوتي واطي ف ضحكوا ، مكنش ينفع أعليه اكتر من كده ، لو ديفيد شافهم هيقتلهم ويحبسني عمري كله في اوضة عشان ابقي ليه لوحده .
= سيبها، شيل ايدك من عليها
بصيت لمصدر الصوت لقيته نفس الشاب الي ساعدني من شوية ، الراجل سابني ووقف جمب صحابه الاتنين ف جه وقف جمبي
= امسكي النضارة دي وأقفي في جمب
_ دول تلاتة! ، انت هتعمل ايه؟
= امسكي الجاكت وأقفي في جمب
_ هو انت كل شوية هتديني حاجة ؟
= احتمال كمان شوية تبقي ذكري
_ مهو أيوة، لو روحت هناك هيضربوك ومش هيرحموك
= وانا مش هعرف أسيبهم ياخدوكي ومعملتش حاجة
سكت وبصيتله ° ها نجيب اتنين عناب ؟
= لاء دا أنت الي هتشربه لما أوطي ضغطك دلوقتي
وقف قدام اول واحد وضربه ف وقع علي الارض ، الاتنين التانيين بصوا لبعض ورجعوا بصوله بغضب ، واحد كتفه والتاني بدأ يضرب فيه ، طلعت الself defence من شنطتي وكهربت الي كان مكتفه ف وقع علي الأرض ف جري الشاب التالت
= هو الجهاز بتاع الكهربا دا معاكي من ساعتها ؟
_ أيوة
= طب مدام أيوة مطلعتهوش هكربتي أهلهم بيه ليه؟
_ خوفت يجيلهم ارتجاج
حط أيده علي وشه = انتي ازاي حنينة كده؟
ضحكت _ كنت ناسية أنه معايا والله ، انت كويس؟
= كويس ، هاتي النضارة عشان مش شايف
_ هو السليم فيك دلوقتي النضارة فعلا
= متهزريش ، هو انا اتعورت؟
_ أنت وشك كله أحمر!
= من الكسوف ؟
_ لاء من الدم ، قوم بسرعة نشوف تاكسي يمشينا من هنا قبل ما حد يفوق
= طب خلي حد فيهم يفوق وشوفي هعملك فيه ايه
بدأ واحد فيهم يفوق ف شد مني جهاز الكهربا وكهربه
= يلا يمتحرش يمتصابي هي نقصاك
ضحكت وقام من علي الارض وشاور ل تاكسي وركبنا
= هتروحي علي فين؟
_ مش عارفة ، أنا اهلي بعيد عن هنا لازم أركب مواصلات كتير عشان اعرف أوصلهم
= يعني متعرفيش هتقضي النهارده فين ؟
_ لاء
= عمارة ٥٢ يسطا لو سمحت
_ السواق ساق ف رجعت بصيتله عمارة ايه دي؟
= شقتي
_ أفندم؟
= انتي تروحي تشحني الكهربا الي معاكي دي عشان هتحتاجيها في منطقتي
_ أنا مينفعش اروح شقتك ، أنا هعرف اتصرف
= نفس الجملة الي قولتيها من شوية ولقيت تلاتة بيلفوا حواليكي ولا المروحة ، وبعدين متخافيش أنا هنام عند عم ابراهيم البواب الي تحت وهديكي مفتاح الشقة
_ اه ف يطلع البواب معاه نسخة تانية من الشقة وتدخل بعد الساعة ١٢ و..
= الساعة دلوقتي أربعة الفجر!
_ يعني فرقت ؟؟؟ الحاجة الاصفرة مخبيها فين عشان تعمل كده في بنات الناس ؟
= طب ايه نركن وأنزلك ب تمثيلك العار دا ولا ايه؟
_..
= وبعدين مين قالك اني جايب حاجة اصفرة؟ دي بتبقي غالية ، مشي الدنيا ب الحاجة الاخضرة
بصيتله بخضة ف ضحك = انتي شكلك طيبة أوي
_ مكنتش بخرج من البيت
= واضح جدا ، عشان كده فاكرة الدنيا كويسة
_ بس انت كويس مش كده ؟
= ما أكيد الي في وشي دا مش مكياج
_ انت لسه وشك بيجيب دم ، انت لازم تروح المستشفى
= يستي بسيطة ، تيجي ايه دي وسط الي الواحد بيشوفه كل يوم
_ ربنا يعينك ، أنا متأكدة إن زي ما وقفت جمبي ربنا عمره ما هيسيبك
= ونعم بالله
وصلنا ونزلنا من التاكسي، وقفنا قدام باب العمارة وبصلي
= الشقة الي قدام الاسانسير الدور التالت
_ أنا مش عارفة اقولك ايه من الي بتعمله معايا
= ولا اي حاجة ، المهم اطلعي ارتاحي
_ طب ووشك ؟
= عم ابراهيم سايب عنده شنطة اسعافات يا.. ، ايه دا؟؟؟؟ احنا مع بعض بقالنا ساعتين ومعرفش حتي اسمك!
_ مريم ، وانت؟
= أحمد
_ فرصة سعيدة جداً يا احمد
= أنا أسعد يا مريم ، خلي بالك وانتي طالعة السلم عشان فيه سلمة مكسورة في الدور التاني
_ هاخد بالي ، تصبح على خير
= وانتي من أهله
طلعت الدور التالت وفتحت الشقة بالمفتاح ، كانت شقة صغيرة ومكركبة شوية ف استنتجت أنها شقة عازب! ، نمت علي الركنة الي في الصالة من كتر التعب ، صحيت علي صوت خبط علي الباب ، كان صوت انوثي بحت رقيق
° اصحي بقي يا احمد ، كل دا نوم ؟
اتعدلت في قعدتي وروحت وقفت عند الباب
° انت لسه زعلان مني يحبيبي؟ طب حقك عليا مش قصدي
قولت بصوت واطي _ هو بيسمع الصوت دا ويزعل؟ ، اتاريه اتخض لما نطقت قدامه مهو مش واخد علي الاصوات دي!
° افتح بقي بدل ما افتح أنا منا مش همشي غير لما نطلع ونتكلم
_..
حطت المفتاح في الباب وفتحت ف لقتني قدامها ف صوتت ° انتي مينننن؟ وبتعملي ايه هنا؟
_ أهدي يا آنسة، أنا هشرحلك كل حاجة
° تشرحيلي ايه ؟ فين البيه الي عاملي فيها راجل محترم ، أنا اتخان!!!
_ مش زي منتي فاكرة والله ، اهدي وهقولك الموضوع
° هو فين؟؟ ، اشوفه حالا بدل ما ألم عليكم العمارة
احمد جه وهو بينهج ، كان بيجري علي سلم العمارة
اول ما شافته اتخضت ° انت وشك ماله؟ ايه الي عمل فيك كده؟
= انتي صوتك عالي ليه؟
° داخلة شقة خطيبي ولقيت واحدة في وشي عاوزني اعمل ايه؟ ازغرط؟
= وجهة نظر تُحترم والله
_ أحمد!!!
= قصدي.. ، انتي ايه الي مخليكي تخبطي عليا أصلا دلوقتي ؟
° مين دي يا احمد ؟ وبتعمل ايه في شقتك ؟ وانت كنت فين؟ ايه بتجيب فطار ليكم ؟
= والله علي لحم بطني من امبارح
_ هو دا وقته!
° ملك خطيبتي ، مريم.. بنت صاحب الشغل وكانت محتاجة مكان تبات فيه امبارح والوقت اتأخر ف باتت هنا ، حاجة تانية ؟
° انت لسه زعلان مني يا احمد ؟
= مش وقته ، ادخلي شقتك وهنتكلم بعدين
° انت هتدخل معاها؟ طب ثانية اجيب سلك الدش من جوا وجيالكم
= البت نظرياتها تحفة أنا مش عارف ارد
رفعت حاجبي ف رجع بصلها
= هي هتمشي عشان هتسافر لأهلها
° طيب ، هروح أعملكم فطار وجاية
مشيت ف رجعت بصيتله _ خطيبتك حلوة اوي ، ربنا يتمملك علي خير
= يارب ، نمتي كويس ؟
_ اه إلي حد ما
= طيب انا هروح اقعد مع عمي شوية لحد ما الفطار يجهز ، ادخلي انتي
_ أنا مش عاوزة اعملك مشاكل
= لاء ولا مشاكل ولا حاجة ، نفطر وانزل اوصلك لأقرب محطة
مشي ف دخلت الشقة تاني ، مرت نص ساعة كنت بنضف فيها ، خبط عليا ف فتحت ، دخل وبص علي الشقة ورجع بصلي
= انتي الي نضفتي ؟
_ أيوة
= تعبتي نفسك ليه؟
_ لا تعب ولا حاجة ، معملتش حاجة
= تسلمي ، هي الصورة الي كانت علي الحيطة راحت فين!!
شاورت علي الارض _ معرفتش أرجعها مكانها ، البرواز تقيل
بص علي الصورة وابتسم = ياه الصورة أخيراً وضحت
_ دي والدتك؟
= أيوة، بشتغل شغلانتي دي عشان اعرف اجيب فلوس عشان العملية بتاعتها لحد ما ربنا يكرم ب شغل احسن
_ ربنا يشفيها ويخليهالك يارب
= يارب ، ربنا يخليكي
شال البرواز وحطه علي الحيطة ، اختل توازنه بسبب تقل البرواز ف وقع علي الارض _ احمد انت كويس؟
= هو انا ناقص ، دا كانت الحتة السليمة فيا
ضحكت _ أنا مش عارفة اقولك ايه ، انت كل ضربه بتبقي بسببي
ضحك وبصلي ف جت خطيبته وقفت قدامنا
° طب ايه ، اجيب لمون ؟
= ياريت عشان نبلع بعد الاكل
° أحمد!!!!!
قام بسرعة من مكانه وانا كتمت ضحكتي ، قومت وقعدنا احنا التلاتة علي الطربيزة الي في الصالة ، كانت بتبصلي كل شوية ، حقها! ، لازم امشي في اسرع وقت عشان معملوش مشاكل زيادة .
الباب مرة واحدة خبط خبطة جامدة ف قومت من مكاني بسرعة
= مفيش حاجة متخافيش
راح نحية الباب واتكلم = مين ؟
° افتح يا احمد أنا جمال بيه
قال بصوت واطي = اه دا المدير بتاعي مفيش حاجة
° ومعايا أدهم بيه
رجع بصلي = مين ادهم دا ؟
برقت _ ديفيد!!!
