رواية فصلية بديلة ( شموخ ) الجزء الثاني الفصل الخامس والعشرون 25 بقلم ام ملكوت

:-صعدنه فوك السطح وبقينه ننتظر بالبرد واطرافنه جمدت منا لصعد راهب النه وكفنه باستقامه ودكيناله تحيه هز راسه بايجابيه وصبح علينه ردينه عليه وكال وهوه يلف الحبل على ايده..

_كلولي بله شكم مره تلعبون رياضه باليوم..

بقينه الفريق كله واحد يصفن بوجه الثاني شكم مره باليوم هه المفروض يكول شكم مره بالسنه تلعبون رياضه ..واحد من الولد كله مانلعب سيدي

بس مرات نركب بايسكلات كلهه اتفقت على كلامه واحنه البنات بقينه نصفن لان محد لعبت رياضه لو ركبت بايسكل بحياتهه باوعلنه هوه وكال موجه الكلام النه..

_وانتن ليش صفنتن ماتلعبن رياضه يعني..

صفنه وجاوبت نيابه عنهم..

_سيدي احنه مانلعب رياضه بس نفر البيت بكل وجبه تنظيف وطبخ فتعتبر رياضه مشي هاي واثقال بالنسبه النه..

رفع حاجبه باعجاب ورجع عكدهن بجديه وكلهه ضحكت على كلامي عبالك بي شي غلط احنه اشو

شايلين البيت كله بعد وين نلكه وقت نلعب رياضه ونروح للجيم .. هز راسه بايجابيه وكال موجه الكلام الي...

_تمام اذا تكولين تمارسين رياضه المشي بكل وجبه اريد تشوفيني وتمشين حوالين المكان  ٧٠ مره ..

باوعتله باستغراب وكلهه بهتت ملامحهه حسبنه هل شي عقاب على كلامي بس ماهمني دكيت تحيه وكتله بثبات "حاضر سيدي " رحت امشي حوالين

السطح ورغم جانت اطرافي وجسمي يرجف بالبدايه بس من استمريت بالمشي دفيت وعركت بقوا همه يلعبون حبل وجان اللعب من نفس لعبنه

واحنه صغار لا هذا اقسى لعب حبل شفته ..شوه طفولتنه من هل منظر وانه اشوفه لازم الحبل من طرف والضابط سالم من طرف ويلف الحبل حيل

اذا ماهرولت مثل الارنب تطيح بالكاع ويتشوه وجهك وجسمك من الصبابه كلت همزين طلعت من هل تدريب الي خلك انه اطيح وانجرح والبرد

يكص يبووو بس والله فريقنه كفو رغم سرعه الحبل الا انهم اسرع منه وماواحد بيهم طاح لو دحك بالحبل .. وره تقريب النص ساعه كملت لفاتي

وما جنت تعبانه هواي بس رجلي احسهن خدرن من المشي وانهد حيلهن المهم رحت وكفت كباله دكيتله تحيه وكتله..

_سيدي كملت ٧٠ لفه

_تعالي وياهم يله..

فتحت حلكي وغميت كصتي لو مغلسه وضاله امشي مو احسلي شلون بيه هسه ورجلي يرجفن من المشي هفف .. تافافت و اجيت وكفت اخذت

نفس طويل وبده بدون مايحذرني ويخليني استعد حتى بقيت اهرول بمكاني وكوه اشيل جسمي جا شكد سمنانه دخيل الله حتى هيج ثكيله

وماكدر اهرول تعبت وحسيت نفسي راح اطيح بقيت ااشرله يوكف ماكدر احجي وافشل روحي كدام زملائي وهمزين فهم علي ووكف .. سندت

اديه على ركباتي وصرت الهث بتعب احس كلبي راد يوكف رفعت عيوني بدون راسي باوعتله وهوه

متخصر وعاكد حواجبه يباوعلي بغضب تحمحمت وعدلت وكفتي وكال وهوه ياشر على طول جسمي..

_اللحمات الزايده هذن منا بعد اسبوع ماريدهم مفهوم

_بس سيدي وين الحك

_مفهوممم

_حاضر سيدي

_يله هسه الكل ينبطح بالكاع

_حاضر سيدي..

كناله حاضر وبقينه واكفين عبالنه راح يفرشون شي بالكاع حتى ننبطح عليه بس اشو وكف متخصر كبالنه وكال..

_تردون اشيلكم واحد واحد وانومكم بالكاع ..

1 تعليق

طخت براسنه واجينه بسرعه تمددنه البنات بجهه والولد بجهه ورجلينه بالوسطه يعني محد يشوف الثاني الا يوكف على حيله المهم انبطحنه والكاع

يبوو برودتهه تطك بالعظم امرنه نسوي بالاول تمارين الضغط لربع ساعه حتى ادينه ماتت تالي ارتاحينه ٥ دقايق ورجعنه نتمرن عل شناو وهل مره

خله لاي شخص بينه يطيح بالاول عقاب بقينه نصفن من جهه جسمنه متفلش ومن جهه عقاب شطلعت هاي ماتصورت التدريبات العسكريه بهل

قساوه ولو انه متطلعه عليهن بس التجربه اصعب من الشوف .. المهم صرنه نلعب وواحد وره الثاني صار يطيح بقيت انه وثنين من الولد نتسابق وانه

كوه اشيل روحي وارجعهه صار جسمي بثقل الجبال بس ماتحملت اديه ماتت وطحت بالكاع

الهث وصدري يصعد وينزل متنفسه بجنون اجه وكف فوك راسي يباوعلي وهوه ضايج انحنه شوي على وجهي وانه نايمه وهمس ..

_ عقوبتج ماراح تاخذيهه هسه وانما بعد اسبوعين لو ما نزلتي وزنج تمام..

هزيت راسي بايجابيه لان مابيه حيل احجي وجسمي مايسندني حتى اكوم شفته وكف على حيله وراح يم الولد لحدما طاح واحد منهم والثاني

فاز كلهه صفكتله وخزرهم راهب مايريد واحد يصفك اخيرا لميت الحيل الباقي بيه وكمت وكفت يم البنات .. رجع كللنه ننام هل مره على ظهرنه

باستقامه وكلهه تافافت باوعلنه بخزره تحمحمنه ونمنه نفس وضعيتنه مالت مساع اجو فريقه

بيدهم بلوك واحنه واحد صفن بالثاني  تقدموا خلو كل واحد على بطنه بلوكه وصل يمنه والتفتت على راهب كتله..

_سيدي راح تضربون البلوكه علينه نفس الجيش

_اي 

_جا مانتاذه

_تحملي وهذا المطلوب..

بقينه مفهين شسالفه ماندري التفتت على جهه الولد وشفته راح وكف يم اول واحد ورفع رجله ضرب البلوكه ونكسمت نصين على صدر الولد

فتحت حلكي بصدمه ونوب هذا الولد كام مابي شي ولا عبالك كسروا بلوكه على بطنه .. وكف وضرب الجان بصفه وكسر البلوكه كام الثاني

وضرب الثالث وصاروا واحد يضرب بلوكه الثاني عبالك اسفنجه مو بلوكه شكبرهه وشثكلهه كملوا الولد واجه راهب عل بنات رفع رجله وحجت البنيه بخوف..

_سيدي لا فدوا والله تتكسر عظامي وين اولي بهل برد ..

باوعلهه ببرود وكلهه تنزل ايدهه عن البلوكه لا يسحكهه عاد هيه من الخوف نزلتهن بسرعه ضرب البلوكه وصاحت ااخ والبلوكه انطرت نصين عكدت

حواجبي باستغراب وانه اباوع لوجه البنيه وهيه جامده بمكانهه عبالي اغمى عليهه وصار عندي فضول اعرف شلون تنكسر بدون مانتاذه بس اشو

هاي كامت تضحك مامصدكه عظامهه ضلت سليمه .. زفرت براحه وقويت نفسي باوعتلهه وهيه كسرت بلوكه البنيه الثانيه وكذلك الثالثه والى ان

وصل دوري رفعت رجلهه وانه لميت قوتي ببطني وغمضت عيوني حيل ضربت البلوكه وحسيت بشعور ماكدر اوصفه وكأن جبل تفلش على صدري

بس سرعان ماراح الالم وراح وياه كل الضيقه الجانت بصدري حسيت انشرح صدري وخنكه مجهوله جانت بي اختفت.. فتحت عيوني متفاجئه

وحتى زفرت براحه لا اراديا بقيت اباوع لراهب وهوه يباوعلي متخصر منتظرني اكوم نسيت نفسي

وانه متمدده بالكاع عوزي بس مخده وغطه وصوبه بلا زحمه عليهم .. المهم استوعبت اخيرا و كمت بسرعه دار وجهه عني وكال موجه الكلام للكل..

_الكل ياخذ الحبال وينزل للطابق الثالث بقاعه الحديد مفهوم

شمر الحبل من ايده ونكتهه بقوه ودخل اخذنه الحبال احنه ومشينه وراه نزلنه بالمصعد على دفعتين ودخلنه للقاعه المليانه حديد واثقاال

توزعنه باركانهه ودخل راهب وهو لابس تشيرت نص ردن اسود وبنطرون عسكري وسلساله برقبته منطوي وعضلاته بارزه طكطك رقبته بطريقه

رجوليه وانه مفهيه على تفاصيله اجت عينه علي وسويت نفسي اباوع للضابط سالم تحمحمت

وشفته اخذ السجل من الشرطي مدري شكتب واشرلنه نلتم يمه رحنه حواليه وكال..

_راح اصيح باسمائكم وانطيكم ترتيبكم بالقاعه تمام

_نعم سيدي..

ضل يصيح باسامينه وكل شخص ياشرله على جهاز ويكله روح والبنات وزعهن على اجهزه المشي والركض عرفته وزعنه حسب احتياجاتنه وصل

دوري وبقيت بالوسطه ماوداني لمكان عاد راح هوه عل ميز جاب اثقال صغيره اشرلي اوكف على جهه ووكفت والكل يباوع بتساؤل كلي ارفع اديه

كبالي ورفعتهن وخله الاثقال بباطن ايدي انحنه شوي يم رجلي الجانن ثابتات وضربني وره ركبتي خلاني اوكف مثل الكاعد على كرسي وكال ابقه

هيج لحدما يامرني استقيم .. بقه الكل يلعب رياضه ومنهم حديد واثقال وانه واكفه هيج  والاثقال لازمتهن بيدي حسيت رجلي تشنجت

وماتعيني بعد باوعلي واشر للضابط سالم واجه اخذهن مني وكلي ابقى على وضعيتي جاب اثقال اكبر من الاخذهن بشوي وخلاهن بيدي ماحسيت

بفرق جبير منا لجاب اثقال كبار وخلاهن بيدي حسيت ايدي اليمنه صارت ترجف من وحدهه تعبت اعصابهه وراد يطيح الثقل من ايدي باوعت لراهب

وهوه يراقبني من بعيد واشرتله عليهه وهوه بقه يباوع بترقب لحدما تعودت ايدي عل ثقل وبطلت رجفه بعد ١٠ دقايق اشر لسالم وجاب اكبر منهن بعد

وخلاهن بيدي واحس طاح حضي مو بس تعبت على الاوزان الشلتهه وهاي الوكفه راح اضل اسبوع نايمه بالفراش لا احرك ايد ولا رجل .. رجعت ايدي

ترجف فتره وماتحملت طاح الثقل من ايدي وردت ادنك اخذه لزم ايدي راهب وثبتني على وكفتي ونزل هوه اخذ الثقل وخلاه بيدي ..بقه واكف

يباوعلهه بترقب وهيه ترجف جاب ثقل ثاني شوي اخف منه وخلاه باعلى المعصم مالتي بنفس الايد وصار الحمل حملين باوعتله عاقجه وجهي بالم وكتله..

"ماكدر بعد اشيلهن ايدي تاذت" هوه ابد ولا يسمعني ومستمر يشتغل على ايدي ياخذ وزن ويخلي اخف منه لحدما مل وشافهه مستمره

ترجف اخذ الثقل من ايدي وامرني اعدل وكفتي زفرت بتعب ووكفت زين  وانه ادلك بايدي اخفف الالم انطه الاثقال لسالم وهوه يكول..

_الضاهر الحادث السويتي من قبل اثر على اعصاب ايدج لهل سبب لازم تدربيهه وتركزين عليهه اكثر 

_بس سيدي انه رحت لدكتور اعصاب وطلعلي بالاشعه ان مابيهه شي

_الضعف مايبين بالاشعه 

_زين شلون هسه انه ماعرف شسويلهه حتى بالدوره الانضباطيه حاولت وياهه شهرين وماكو فايده 

_مو مشكله جبيره هاي ويه الوقت والتدريب المكثف تتعودين عليهه

_بس سيدي كالولي ان التدريب المكثف يتعب الاعصاب اكثر 

_يتعبهن حتى يقون شلتي اول ثقل جان خفيف لو ثكيل 

_ثكيل

_ولمن شلتي اثقل منه تالي رجعتي شلتي شلون حسيتي

_خفيف

_هيه هاي طبيعه الاعصاب لمن تتعود على وزن معين يبدي التاثير عكسي وياهه يصير الثقل القليل

بخفه الريشه بالنسبه للثقل الجبير المتعوده عليه ايدج فعوديهه على الاشياء الثقيله حتى مايهزهه ثقل السلاح

_زين سيدي وين عرفت عندي مشكله بايدي وماكدر الزم السلاح

_مكتوب بشهاده اختبار المديريه فلازم نركز على تدريبهه اكثر من بقيه التدريبات

_هاا حاضر سيدي

_ يله روحي لحكي زميلاتج بالركض ماريد دهون زايده خلي ببالج للاسبوعين الجايه اذا شفت وزنج على حطته لو زايد تاخذين تدريبات قاسيه لا تكولين 

_حاضر سيدي ..

ابتسمت بوجهه وبهتت ملامحه وتوتر تحجج بالولد وراح يمهم وهوه يتشرد بعيونه عني رغم كل هل سنوات مرت الا ان توتره وتصرفاته الغريبه بعدهن

طابعات بشخصيته.. رحت ويه البنات لكيت بس البايسكل فارغ صعدت وبقيت العب وراهب ورا ضهري يم الولد بس عينه علي اشوف صورته

يراقبني كل شوي من الجامه الكبالي وابتسم على شكله وانه كلبي مدري شماله متحمس رغم اكره شخص يراقبني بعيونه بس شكله راهب مو مجرد شخص المهم مرت تقريب الساعتين وهمه يبدلون اماكنه كل نص ساعه بحيث كل الاجهزه يلي بالقاعه

جربناهن كلنه والجسم مفعم بالحيويه بس تالي يطلع التعب بينه ويتشنج الجسم علينه بالبيت.. خلص تدريب راهب لليوم وباجر ياخذنه ساعتين ثانيه

بدلنه الزي العسكري بزي فريق الادله الجنائيه واخذنه المحقق ساهر محاضرات وواجبات ومر اليوم مثل اخر يومين كملنه دوامنه واجه بابا

اخذني للبيت وانه امشي كوه كل زوايا جسمي متفشله صعدت بالسياره سلمت عليه وسالته ..

_اكول بابا شنو اليوم ترحون لاهل البنيه 

_اي بابا تردين ترحين ويانه 

_اي جا شلون غير اخت العريس انه اريد اروح اسولف وياهه اشوف اسلوبهه شنو ولو تعبانه ومتفلشه بس ميخالف كلشي يهون لعيون اخوي العود

_ههه مكيفه بعرس اخوج هاا

_يبوو مامنطيه فرحتي لاحد اخوي الزود هذا 

_الله يحفضكم ويديمكم سند لبعضكم يارب

_ويديمك خيمه وتاج على راسنه حبيبي..

ابتسم وكمل سواقه كلهه دقايق ووصلنه للبيت دخلنه السياره بالكراج ونزلت امشي كوه دخلت للمطبخ شفت امي لابسه وكاشخه اجيت حضنتهه وكالت وهي مبتسمه..

_الله يساعدج بنيتي هاي شصاير بيج

_ويساعدج يبعد روحي اليوم طاح حظي حشاج بالتدريب جسمي متفلش 

_الله يكوي حيلج ويهون عليج بنيتي 

_يبعد حيلي انتي الا صدك شنو هل حلا شنو هل كشخه شهل زين شلون رجلج رح يطلعج هيج ماخاف عليج من عيون الوادم

_هههه ويني يا يمه راحت ايام الشباب والحلا

_لااا بعدج اربعينيه صاكه ماشاءالله عليج جنج العافيه 

_هههه حبيبتي انتي العافيه مالتي يله هسه كافي غزل روحي ارتاحي وحضري نفسج حتى ترحين ويانه تره ب٤ نطلع 

_تمام سيدي 

_شكله التدريب مأثر بيج

_اي والله يايمه تصدكين فلشوا بلوكه على بطني اليوم 

_يااا كونج تاذيتي

_لا بس باول الضربه تالي راح الالم عبالك ماصاير شي حتى ضليت مفهيه 

_جا شلون يسوون هيج هسه لو كاسريلج ضلع وين ننطي وجهنه

_لا تخافين علي امي هوه هذا التدريب الزين وهمه لو يدرون بهذا الشي خطر ماراح يسوونه النه

_اي بس ديري بالج يايمه لا تنكسرين مابينه حيل وينهد بعد عليكم

_انشاءلله امي العزيزه يله خلي اروح اسبح واشبع من بنتي حتى ابدل ونطلع

_تمام روحي يمه اخذي راحتج ريانه نايمه بغرفتج

_هاا تمام..

بستهه بخدهه ورحت لغرفتي شفت ريانه نايمه بعدهه ذبيت ملابسي ودخلت للحمام سبحت وبقيت كاعده عل طبله الصغيره والماي مايل

للحروره يتصبب على ضهري لحدما ارتخى جسمي وحسيت الم الورم راح كمت واشوف الحمام كله بوخه ومابي قطره اوكسجين عاد نشفت بسرعه 

وطلعت وانه لافه المنشفه على جسمي كلت لا اختنك ومحد يدري بيه .. المهم رحت للكنتور ادورلي شي مناسب لهل طلعه بقيت اكلب بالملابس

لحدما طحت بفستان طلعه حلو استغربت انه ماشتري فساتين تالي طخت بالي وكلت يجوز مالت جنان ناسيته عندي .. طلعته وكلت اجربه اشو

لبسته طلع يجنن علي مالابسه فستان طلعه كل عمري كاضيتهه بناطير ..نسقت وياه حجاب وجنطه وكعب حضرتهن هذن على جهه واجيت كعدت

بنيتي لعبت وياهه شويه بوستهه شمشمتهه تالي شفتهه صحصحت اخذتهه للحمام سبحتهه ونشفتهه وطلعت لبستهه بنطرون وقميص بلون

الفستان حتى تنسق ويه امهه جا شلون رشيتلهه من عطري اسمه "الخيال"  واخذت عطر الاطفال مالتهه رشيت رشه وحده بيدي ومسحت ملابسهه ورقبتهه وشعرهه خاف تختنك ..سويت شعرهه كيرلي ومنا

هوه نازل على اكتافهه ويلمع سواد نفس شعري و من الله مفلفل مايحتاج جهاز بس ابرمه باصبعي

ينبرم .. خليته مفتوح الهه ورفعت بس النازل على عيونهه بقراصات صارت تنوكل بخاشوكه .. بستهه

من خديداتهه وندك الباب كلت تفضل ودخل سلام شاف ريانه واجه باتجاهه وهوه يصوفر ويكول..

_ااالله شنو هل جمال ولج خالو تردين يخطبونج الناس لابنهم تعاي بله خلي اشمنج تعاي

_لا تبوسهه هواي وتحمض تخرب كشختهه

_افاا عليج اليوم اسويهه ليمونه الج 

_لاا سلاام

_مالج شغل انتي بينهه وبين خالهه طلعي منهه..

1 تعليق

ضحكت على سوالفه وهوه شايلهه ويبوس بخدهه ويشم برقبتهه ويشهك وهيه مكيفه وتضحك على سوالف و تلعب بسلسال رقبته اخذهه وطلعوا بره..

شفت الساعه صارت ب٣ ونص ماضل شي كمت للميز وبديت اخلي مكياج ومدري شعجب صار حلو علي شفته جا غير اخت العريس لازم

اطلع حلوه علمود تكول حماتي تشبه اخوهه حليوه .. المهم كملت وصاح بابا يله نروح كمت بسرعه لبست حجابي رشيت عطر واخذت جنطتي

البيهه النقال وشغلات ريانه لبست برجلي وطلعت اركض على صوت الهورن اخذت ريانه من سلام وصعدت وره يم امي وكاعد محمد وبابا كدام فتح

باب الشارع سلام وطلعنه من البيت ومرتضى من عركتنه لهسه ماشايفته ولا لامحه خياله بالبيت وهل شي احسن لان ماكدر الزم روحي واسكت اذا

شفته كبالي.. وصلنه وره ١٠ دقايق لبيت البنيه وجان قريب عل دائره مالتي كلش صف السياره بابا  ونزلنه ..دكينه الجرس شويه وفتحلنه الباب

راهب بقينه واكفين مصدومين وهوه يباوعلنه واحنه نباوعله ثواني ياله استوعب عباله اجينه نشوفهم مايدري احنه الخطابه تحمحم وسلم على ابوي ومحمد وكال تفضلوا دخلنه وانه افكر ولهسه متفاجئه يعني

فعلا طلع شكي بمكانه وطلعت العروس اخت راهب بس شلون ومنو من البنات راح يخطبهه محمد .. بابا ضحك على هل صدفه ودخلوا للديوان

مشيت وراهم وريانه بيدي بقه واكف صافن عليهه مستغرب ماسلم علي ولا كال شهل صدفه او نطق بكلمه حتى انحرجت منه كلش وماعرفت شكول

وشسوي تخربطت افكاري عاد سويت نفسي ملتهيه بريانه ووكفت يم باب الصاله نزلت نزعتهه حذاءها وهوه دخل يم ابوي ومحمد وانه وامي

دخلنه للصاله اجت خالتي وفاء سلمت علينه ويااا الله شكد كبرانه خطيه ورايح حيلهه .. سلمت على امي وشافتني وحجت بصوت عالي..

_يااا شمووخ هااي انتي خاله

_خاله وفاء حبيبتي شلونج 

_شهل صدفه يبعد خالتج هيج جمعتنه الدنيا وراح تسوينه أقارب..

امي واكفه مستغربه بعدهه ماتعرف شسالفه ومنين يعرفوني رحت حضنتهه وهيه حضنتني حيلل

ابتعدت وباستني بخدي وضلت تتمعن بملامح وجهي وهي تمسد على خدي وتكول..

_كبرانه حبيبتي ومتغيره حيل عن قبل اليلمحج من بعيد يشوفج مثل ماجنتي صغيره واليشوفج عن قرب يعرف انج متغيره عن قبل والوكت ماخذ نصيبه منج

_يعمري خالتي انتي هم متغيره وشكلج متعوب خير انشاءالله عساج تكونين بصحه زينه

_بعد كبرنه ياخاله وراح ذاك الحيل والقوه الجنت عليهن بس الحمدلله صحتي اشوه وهاي باقيه اركض من الضغط للسكر وشوفه عينج اخذ حيلي المرض

_حبيبتي كونج سالمه وربي يشافيج 

_يبعد روحي الا صدك هاي الحلوه الصغيرونه منين

_هاي بنتي خاله اسمهه ريان 

_يمه فدوا للبنيات تعاي تيته ابوسج فديتهه تنطيج شبه بشبابج

_اي كلهه تكول هيج ..

نزلت عليهه باستهه بخدهه وريانه ماقصرت من تشوف واحد يبوسهه تحضنه وتضل تتعيقل عليه متعوده على سلام من يبوسهه وتحضنه من رقبته

عاد خالتي وفاء كيفت من شافتهه هيج شالتهه عن الكاع وبقت تبوس بخدودهه وتضحك على

سوالفهه.. التفتت على امي البعدهه واكفه وكتلهه ان خالتي وفاء هيه المره الامنتني ببيتهه لمن

ضعت .. عاد صار التشكرات والتبوس ماله والي خلصن بوس وكعدنه عل قنفه التفتت على خالتي لزمت ايدهه بوديه وكتلهه..

_خاله منو من البنات هيه العروس بان لو عبير

_لا خاله بانه تزوجت قبل شهر العروسه هيه عبير

_يااا عبيير زين وشلون تزوجت بان ومنو اخذت

_اوس صديق راهب بالجامعه

_هاا الامه صديقتج

_اي بس ماتت امه خطيه قبل عرسهم بشهر تقريبا وتزوجوا هيج لا حفله ولا زفه سوده عليه

_خطيه الله يرحمهه ويصبر ابنهه واسراء تزوجت لو بعدهه

_اي خاله اسراء تزوجت صارلهه كم سنه وصار عدهه ولد سموه امير

_يفدوا جا مو على اساس ماتحب الزواج وماتريد تزوج انه الهه من اشوفهه 

_جا هل انتي ماتحبين الزواج جنتي وتزوجتي ياخاله البنات كلهن على هل طريق

_يوو زواج الاغبر 

_يا ليش خاله

_بعد ياخاله المهم عوفج من زواجي بله احجيلي شعجب تزوجت اسراء 

_جا بعد خاله اذا الحب دك باب الكلب ينجبر الانسان يتزوج

_هاا يعني عن حب اخذته 

_ايي وتدرين منو هوه

_منو

_المحامي يلي استلم قضيه الخطف مالتج ..

جابت سيره الخطف وامي فتحت عيونهه بصدمه وكالت موجهه الكلام الهه ..

_يا خطف تحجين عنه ام راهب فدوا اروحلج

_هيج سالفه صارت من زمان لمن شموخ جانت عدنه وفاتت السالفه وماتت 

_احلفج بعزيز كلبج تكليلي شصار وياهه وهيه عدكم ويا قضيه خطف الدخلت بيهه بنتي..

شفت خالتي بقت تباوعلي بحيره وتساؤل عرفتني ماحاجيه لاهلي عاد التفتت على امي لزمت ايدهه وهمست..

_امي عيب المره ابتلت من حجت خو مابتلت عوفينه من هل موضوع هسه ومن نرجع للبيت انه احجيلج الصار وياي بس لا تخافين ماصار شي

سيء واصلا السالفه راحت ومشت وهاي انه كدامج مابيه شي ركزي على خطيبه محمد هسه وهاي هيه

_من نرجع للبيت تحجيلي والا والله ماحجي وياج بعد ولا تحجين وياي

_انشاءلله امي حبيبتي من نرجع احجيلج كلشي

_هاذهو ..

التفتت على خالتي وهيه تلعب ويه ريانه وكل شوي تبوسهه بخدهه دخلت عبير وهيه شايله

صينيه الكهوه و المطركه صايره تجنن كلما كبرت تحلى ..خلتهه عل طبله واجت سلمت على امي

وانه كمت سلمت عليهه حضنتني حيل وهيه مبتسمه شكلهه تدري بيه اخت محمد بس ماتكدر تحجي كدام امهه عاد سايرتهه وحجيت..

_ اللهم صلي على محمد عين البارده عليج حقه اخوي لو يتخبل عليج ويوافق بسرعه واجه اتقدملج الواحد مو كل يوم يحصله هيج جمال 

_عمري انتي شموخه شهل صدفه الحلوه 

_اي كلش حلوه هل صدفه ..

باوعتلي واشرت على امهه عود اسكت ضحكت بكلبي عليهم وكعدتهه يمي بيني وبين امي وصارت امي تسالهه شكد عمرج وشنو تشتغلين وشنو

ترتيبج بين خواتج والى اخره سوالف النسوان التفتت على خالتي خليت ايدي على ايدهه وكتلهه..

_خاله وفاء جايين انه واهلي طالبين ايد حلوتكم على سنه الله ورسوله واخوي خوش اخو وكفو عند

الشدات وصدكيني واخذيهه وعد هل كلمتين مني محمد راح يصونهه ويدللهه وماينزل دمعتهه وبكفالتي وانه اخته

_والنعم منكم بنيتي

_فشكلتي يا خاله تنطينهه لاخوي هل قمر دين لو اجيب عشيرتي ونكعد بابكم 

_ههه مدامهه لاخوج انتي شلعي عيوني واخذيهن وياهه 

_يبعد روحي خاله سالمه عيونج لعد تسمحين لاخونه المدلل يجي يشوف عروسته المستقبليه حتى نقره فاتحتهم ونتفق على كلشي

_براحتكم بنيتي بس خلي تتستر 

_اي جا شلون لعد ..

التفتت عليهه وهيه كامت جوه تلبس على راسهه وترجع كامت خالتي للديوانيه حجت ويه راهب ان البنيه موافقه وهوه كذلك مدري شحجالهه واجت

مستبشر وجهه كالت راح يدخل الولد وكمنه انه وامي وخالتي كعدنه بجهه وهمه دخلوا كعدوا بجهه ثانيه بالصاله شويه ورادت خالتي تروح تصيحهه

كتلهه تكعد وكمت انه دخلت اتلفت بالبيت اشوفهه وين موجوده شفتهه طلعه من وحده من الغرف

واجيت عليهه كرصتهه بزندهه وهيه صرخت بصوت ناصي و لزمت ايدهه تفرك بيهه وحجيت بعتب..

_ولج مفلوكه تعرفيني اخت محمد وحتى ماكلفتي نفسج تسالينه علي لو تخابريني منه 

_هههه لا والله اعرف عنده اخت واخين بس صدمني قبل يومين من كلي اسم اخته شموخ

الراح تجي ويه امه فكتله يدزلي صوره الج ومن شفتهه بقيت فاتحه حلكي على هل صدفه 

_اي والله وتدرين شنو الصدفه الثانيه 

_شنو 

_اشتغل متدربه عند اخوج بالدائره 

_لا تجذبين 

_وعيونج

_يعني صرتي محققه لو شنو

_كالت شموخ بيهه هاله محقق وانشاءلله تصير هيج بالمستقبل وهاي انتي هسه محققه ومتدربه عند اخونه 

_اي والله كلشي تغير بعدما رجعت منكم ولا اراديا شفت نفسي احب هل مجال

_يلوك يعرج عيني يلوك بس شلونهه المعنويات من شفتي ابو الرهبان بعد كل هل سنين

_عادي انسان اعرفه وصادفته

_علينه شموخه

_هاا رجعنه على سوالفج القديمه 

_لا هل مره ماتفتكون مني خلي تفض الشغله واكعد اخذ افاده اخوي بله اشو ماجاب سيرتج

وكال شموخ تدرب عندي معناهه باله شي خل اشوفه كلبه من يا جهه صار يسرى يمنى

_هههه ولا تكعدين راحه الله يعين اخوي عليج

_شحلاهه كلمن تاخذ اخو الثانيه ويصير العرب عربين على كوله رهبانو

_هههه دمشي ولج حبيب الكلب ينتظرج 

_اي يله ماعندي شي امشينه..

لاول مره بعد كل هل سنين لمن حجت عبير هيج وربطتنه انه وراهب ما ضجت او تضايقت بالعكس حسيت بشعور حلو مجهول وغريب لا مو غريب

هل شعور قديم بس مدفون جان باعماقي وهسه بده يطلع لا ونوب استحيت واشتعل وجهي خجل ماعرف لان اعرف راهب ومو غريب علي 

ماعرف لان جنت متعوده على كلام عبير هذا وتلميحاتهه.. المهم اخذتهه ورحنه للصاله دخلت واجت عيني بعين راهب اختفت ابتسامته وباوعلي

بنضرات ماعرفت افسرهن ضوجه على حسره على خنكه على خوف ماعرف .. كعدت عبير يم امي عل قنفه الكبال محمد وانه كعدت يم خالتي عل جهه

مقابله راهب خليت ريانه بحضني.. وهوه مستمر يباوعلي ما اهتم للموجودين وتفكيرهم ونضراتهم علينه تحمحمت و تجاهلت نضراته وعيونه الاكلتني

انه وبنتي وبقيت اباوع لمحمد وعبير شلون عيونهم رغم خجلهه تتامل بعضهه والابتسامه مافاركتهم راح يفضحون نفسهم كبال امهه واخوهه

هل مفلوكه باوعتلي واشرتلهه تخفي ابتسامتهه وهيه فهمت علي همزين.. حجه بابا ويه راهب وخالتي على كلشي والعشاك انطوا موافقتهم ثنينهم

كدامنه ..قرينه فاتحتهم وطلبت المهر كتاب الله القرآن الكريم والغايب اليتيسر لاهلي ابتسمت برضى لان اعرفهن هاي اخلاق بنات خاله وفاء

ماهمهن المضاهر ولا همهن الفلوس وهنه اصلا موظفات وراتبهن بيدهن مايحتاجن المهر بس محمد اكيد مايقصر وياهه بكلشي تريده من حفله

خطوبه وصالونات وقاعه وعزايم والى اخره .. المهم قرينه الفاتحه بنيه التوفيق وحددنه الخطوبه بعد اسبوع يوم جمعه شربنه عصيرنه ودعناهم

وطلعنه طلعوا اهلي قبلي وانه بعدني البس بحذاء ريانه كملت وخليتهه واكفه يمي على مالبست حذائي راحت تركض.. تبعتهه عيني وشفتهه

وكفت كبال راهب رافعه راسهه وتاشر على الجكاره بيده عبالهه مصاصه بعد ايده ورفعهه من الكاع بيده الثانيه باسهه بخدهه وكلهه..

_تردين جكاره ام خدود 

_نمنم

_لا جؤ هاي مو نمنم 

_مااا

_تعالي انطيج نمنم..

ذب جكارته بالكاع وطفاهه برجله ودخل للبيت بقيت منتظره مدري وين اخذهه شويه وطلعوا وهيه بيدهه مصاصه ونستله تقدمت عليه وكتله بتردد..

_انطيني عنك لا تعبك

_بنتج

_اي 

_حلوه وماخذه خدودهه من خدودج 

_ههه غير امهه انه اكيد تطلع علي

_وابوهه

_شبي

_هيج انسي ..

استغربت ليش سال عنه وتالي كلي انسه المهم اخذت ريانه منه ودحكت ايده ببطني ابتعدت

بسرعه بتوتر وهوه باوع باحراج وطلعت على دكه الهورن صعدت بالسياره وكال بابا..

_وينج يا بابا طلعت سوالفجن بالباب

_لا بس ريانه جاعت وجابلهه راهب خطيه نستله..

كلت اسمه والتفتوا علي هوه ومحمد باستغراب وكلتلهم مصححه سوء الفهم..

_متعوده اصيحله باسمه من جنت عدهم عادي شبيكم

_همم تمام ..

همهم بابا ورجع انظاره للشارع وحرك السياره باوعت لريانه وشميت بيهه عطر غريب تقربت شميت ملابسهه واشمه عطر رجالي شهكت وكلت

افييش شحلاته هل عطر سالتني امي يا عطر وكتلهه هيج عطر ريانه .. سكتت عني ودارت وجهه عل شارع بشك مدري شمالني اليوم كلساع اجفص ..

وصلنه للبيت على صوت الاذان نزلنه ودخلنه ارتاحينه شويه تالي كمنه توضيته ووكفنه نصلي كلنه سويه اجه مرتضى من بره مغنتب صارله جم

يوم مدري شماله مرعوص حتى ما صلى الا لمن عاط عليه ابوي ياله كام توضه ووكف يصلي باوعت لسلام وهوه خازره وشاد قبضه ايده بعده ماناسي

سالفته ونيته ويه جنان وشكله ضامهه اله .. كمنه سوينه عشه انه وامي وفتحت موضوع الخطف عود انه كيفت عبالي نسته وهسه جيب اليقنعهه

اني موجوده كبالهه وماصارلي شي المهم كعدتهه عل كرسي وكعدت كبالهه لزمت ايدهه وكتلهه ..

_امي حبيبتي الحادثه اصلا مو خطف تماما وانما جان بوكتهه حضر تجوال وانه متيهتكم ومدري شخطر ببالي وكلت اخذلي تكسي اجي بي للبصره

بعد عقل زعطوطه جنت فمن غافلت خالتي وشردت منهه ركبت بسياره واحد عار واخذني من غير طريق وحاول يخطفني يعني

_خو ماسوه بيج شي شموخ

_لا امي اصلا ماخليته يكمل طريقه فريت السكان من ايده وضربت السياره بالحايط صح انجرحت شويه بس كدرت اطلع من السياره واشرد منه

وبعدها وانه امشي صادفت راهب وجماعته جانوا يدورون علي بنفس المنطقه وهيج اكون رجعت سالمه لبيت خالتي وفاء وهيه هاي القصه

_يله بله هذا كله صاير وياج واحنه بعاد عنج يايمه 

_سالفه مرت يامي سلامات والحمدلله رجعت سالمه وهاي انه كبالج كلشي مابيه والشغله تافهه اصلا 

_اذا هيج القصه تافهه ليش ماحجيتيلنه من الاول

_ما ردت اقلقكم وتدرين بابوي انتي يضل يوهوس ويلوم العالم 

_هفف تمام بس لازم تكليله اخاف باجر عكبه واحد منهم يجفصهه كدامه وتالي يزعل عليج ويضل يعاتبج

_اي وياج حق بعدين انتي كعدي وياه واحجيله خاف اكله انه ويرزلني لان ماحجيت 

_لاا مايرزلج غير بنيته انتي يكون افضل لو تحجيله انتي 

_ماكدر امي انتي كليله فدوا

_هفف تمام انه بعدين احاجي واكله 

_اي وقنعي ان ماصار شي سيء حتى لا يجي يستجوبني بعد 

_تمام 

_يله خلي اكوم اصب انه

_كومي..

كمت وكامت وياي هيه وكل شوي تباوعلي بترقب عرفتهه ماصدكتني بس المهم خليتهه تقنع ان ماصار شي غير هذا صدك ليكالوا حبل الجذب

قصير وهاي انكشفت جذبتي بعد سنين لمن سالوني اذا صار وياي شي سيء بيت خالتي وفاء او لا وكتلهم لا.. المهم صبينه الاكل بالصحون

ووديتهن للصاله والتمينه سويه تعشينه وكملنه ورحت اسوي جاي كلت خلي ارفه الجو شوي ماعبالك عدنه عرس عاد رحت جبت الديجي شغلته بالصاله

وهمه يباوعولي مايعرفون شسالفه ربطته على جهازي وشغلت اغنيه سلام "اخوي الزود" هوه سمعهه ورخت ملامح العصبيه منه بابا ابتسم وكال ..

_بويه شموخه نصي الصوت عيب من الجيران

_بابا عدنه عرس شكو بيهه وبعدين هذا اول عرس ببيتنه ومو ياهو الجان المعرس اخونه الزود هذا يله فردوهه وخلينه نفرح كلبه ..

ضحكوا على سوالفي ورحت فتحت شعري ورحت سحبتهم من اديهم وياي حتى بابا واحد لزم بايد الثاني ونهوس على طرب الاغنيه تالي دخلنه انه

وسلام بالوسطه ودك ركص وشلون عليه ركص هوه جنه كاوليه ومحمد كتله الخجل ومرتضى واكف بس يصفك هوه وبابا اخذت امي ويانه

وصارت تهز جتف وياي هيه امي راكوصه بس الوكت تعبهه وبتهه طلعت عليهه مو قليله بالركص .. غيرت الاغنيه وشغلت "لعب نلعب لعب"

ودخلنه ابوي وامي بالوسطه وصاروا يركصون حسيتهم رجعوا شباب بهاي الساعه وكلنه تفاجأنه من حركات بابا بالركص مدري وين جان ضام هل

موهبه عائله كاوليه والنعمه.. اخذ محمد ريانه على اكتافه ورفع اديهه وضل يركص ويه مرتضى يلي اخيرا فردهه وصار يضحك ويركص لعبنه لعب

بوقتهه من اغنيه لاغنيه لحدما مرت ساعتين وتعبنه طفيت الديجي وكعدنه بالكاع فحطانين .. شعوري بخطوبه واحد من اخواني شعور مميز

ماتحسه غير العدهه اخو وتفرح بزواجه وشلون مره اخذهه عزيزه وغاليه وثنينهم غوالي وفرحتي فرحتين صارت بيهم .. رجعت الدي جي لمكانه

وكعدت يم اهلي شوي نخطط للخطوبه والقاعه والافندي محمد مايريد عرس وحفله لانهم كبار بالعمر عشتو غير اكلب الدنيا عليه هم هوه جبيرنه

وهم اول عريس من خواني ويريد نسويله عرس عل سكيتي لا والله .. حجه هيج هوه لو ابتلى على روحه كلمن يرزله من صفحه اخر شي غصب عنه

كال اريد حفله مطنطنه ياله سكتنه عنه مايجي الا بالعين الحمره .. المهم عفتهم يخططون لقائمه المعازيم وشلت ريانه خليتهه بجربايتهه بغرفتي

وتمددت على جربايتي صفنت واجه بالي راهب باجر نكمل تدريب وهوه شدد على تدريب ايدي شلون اذا ماكدرت اسيطر على السلاح من تالي ..

نفخت بضجر وكمت خصري ياذيني من الركص وتعب الصبح احسه رجع علي وكفت كبال المرايه ضيكت بدي الترواكه وشفت بطني شلون بارزه

وكرش طالعلي من الخده والاكل قررت من باجر ابدي اصوم متقطع والعب رياضه .. رحت للكنتور حضرتلي ملابس للدوام شفتهن مكويات مابيهن

شي علكتهم بالتعلاكه طفيت الضوه وقتت النقال لفيت راسي ونمت للصبح .. كعدت نفس الروتين تريكت روبه وخيار مثروم وطلعت بعدما ودعت

امي وامنت ريانه عدهه .. ركبت سياره بابا اخذني للدائره ودعته ونزلت تمشيتلهه وفزيت على اثر شخطه سياره عبرت من يمي كلش باوعت

باستغراب وعصبيه وشفته راهب صفهه للسياره الجيب السوده ونزل باوعلي وسد الباب حيل برجله واجه يتبختر بمشيته وجنطته على كتفه شايلهه

وكف كبالي صبحت عليه ورد علي وهوه ياشرلي ادخل جوه تحمحمت ودخلت وراه وهوه يمشي سريع ..سجلت البصمه وصعدت للطابق الثاني

وهوه دخل مكتبه صبحت عل كل وكعدت عل كرسي اجت صديقتي تحمحمت و كالت ..

_اليوم محاضره #ابو_الرهبان 

_ #ابو_الرهبان؟؟.....

الفصل السادس والعشرون من هنا