رواية فصلية بديلة ( شموخ ) الجزء الثاني الفصل السابع والعشرون 27 بقلم ام ملكوت

:-توجهت لمكتبي ودخلت راكع الباب وراي بضجر رفست القنفه وخليت اديه وره رقبتي بحيره وغضب وانه افتر بالمكتب احاول اجر النفس

اخذت باكيت جكايري وطلعت للحديقه شغلت اول وحده وعبيت صدري بدخانهه رفعت راسي للسما وزفرته بقهر وغصيت بعبرتي صرت اكح وكل كحه

تزيد خنكتي أكثر شمرت الجكاره وكعدت عل صخره بتثاقل ساند عكس اديه على رجلي وصافن بالفراغ شويه وشفت بنيه وكفت كبالي ظنيتهه

شموخ وكلبي فز ويه وكفتي وشفتهه نفس البنيه يلي رجلهه انفسخت بالتدريب عكدت حواجبي باستغراب وسالتهه..

_نعم متدربه رحاب محتاجه شي

_لا سيدي بس شفتك بهل حاله وقلقت عليك بعدك مريض تريد اسويلك كمادات شي

_متدريه رحاب خليج عند حدود التدريب ولا تجاوزين الحد بينج وبين رئيسج واهتمامج وكرمج هذا واصل ومشكوره..

عفتهه تريد تحجي ودخلت لمكتبي صح غلطت باسلوبي وياهه بس عرفت سر اهتمامهه والنيه من وراه وماريدهه تركز بهل اشياء وتنسى تدريبهه او

تطلع عليهه سمعه من وره اهتمامهه ولولا اسلوبي هذا جان استمرت وزادت باهتماماته كدام زملائهه وهيج رح تتعرض لمشاكل .. المهم دخلت للمكتب وسالم

جابلي ملف قضيه جديده فتحته وجانت عباره عن جريمه قتل زوج لزوجته بحجه غسل عار عكدت حواجبي باستنكار وقريتهه والعرفته ان

زوجهه رتبته ملازم وقاتلهه بسبب الخيانه وشارد اله اسبوع مدري وين جانوا ياله قدموا شكوى هسه .. المهم اخذت رقم هويته الحاطينهه

بتفاصيل الملف ورقم تلفونه .. كمت طلعت تلفون الشغل خليت رقمه واتصلت طلع الرقم مامتوفر يعني الاخ حارك شريحته سويت اكس على رقم

تلفونه بالملف واخذت موقع بيته وشغله وبيت اهله انطيت بلاغ للفريق على ماجهزت نفسي ولبست ملابس مدنيه طلعت لكيتهم جاهزين اخذنه

سياراتنه وصرنه نجوب المواقع ندور عليه ونسال الناس عنه وماطحنه بي بس كدرت اعرف شوي عن سمعه مرته بالمنطقه والفهمته انهه خوش مره

وتحملت خباله كل هل سنين وكعدت على جهاله ولا ممكن تخونه وتروح تعبهه عل خالي بلاش.. المهم اخذت كلشي ممكن يفيدني من الناس

وسجلت شهاده الهه من بعض النسوان يلي جانت تحجيلهن وتشكيلهن همهه منه .. كملت من منطقه بيته ورحت لشغله لكيته مقدم استقاله وطالع

فرحت لبيت اهلهه كعدت استجوبتهم وحاولت اطلع صدكهم من جذبهم وشفتهم ماراضين عن تصرفه واصلا تبروا منه وكالوا وين ماتلكوه عدموه .. 

عاد طلعت بس ماعفتهم خليت مجموعه تراقب بيتهم ويحاولون يتواصلون ويه يلي بالداخل ويسحبون كلام منهم افتريت عل جيران وصلوني

باصدقاءه ورغم بعضهم ماحجه شي وانسحل للحجز الا ان البعض منهم انطوني عنوان الاماكن يلي يروحلهن باكثر اوقاته واغلبيه الوقت جان

يروح لبيوت الدعاره السريه اخذت كل العناوين لان جنت حاس انه راح يكون ضام راسه هناك بس خاب احساسي لمن رحت ومالكيته عاد شلعت

المكان بكبره حجزت الكحا* يلي بهل بيوت وفرغت المكان منهن خليت مجموعه ثانيه تراقب بالبيوت ومنهن بيت اهل المغدوره ورجعنه للدائره

ذبوهم بالسرداب ونزلت على اهل الدعاره دك ولطم لحدما اعترفوا ان جان يجي دائما وقبلما نوصللهم بساعه وصله خبر ان رح نداهمه وشارد

اول ماخطر ببالي جماعته يلي انطوني عنوانه باوعت لسالم وصدري يصعد وينزل اخذ نفس فحطان اشرتله براسي ..افتهم علي هز راسه

بايجابيه اخذ الفريق وياه وراحوا لبيوتهم سحلوهم الي على ما خلصت تحقيق ويه الدعاره رجعوهم للحجز ونزلولي الاصدقاء الوفيين بس

ماتعبت روحي وياهم بديت اهدد بالتكسير وماعفتهم الا لمن اخذت الصدك من لسانهم وعرفت منهم ان عنده مره وبيت ثاني بغير محافظه و محد

يندله وين رجعتهم للحجز شكم يوم واهاليهم يرحون ويردون عليهم يتوسلون اخلي سبيلهم وانه قصدا ادخل اهلهم عليهم حتى يتاثرون بيهم

ويحجولي المضموم بس عبث عاد خلصت المده المحددهه النه قانون الحجز واخليت سبيلهم بس طلعت وره كل واحد مراقبين بدون مايحسون

عليهم يراقبون كل تفاصيل يومهم ومرت ايام وانه ماطايح ببيته وانشغلت بقضايا غير هل قضيه واكثر من مره اجلتهه واساسا ماجان المطلوب غير

ان الكه مكانه واسلمه للمحكمه لان كل الادله وكاميرات المراقبه وبصماته عل جثه يدلن على ان هوه القاتل وهروبه اكبر دليل على اثبات التهمه

عليه باقي بس اجيبه واخلي يعترف بلسانه حتى يتحاكم.. المهم كضيت كل وقتي بالشغل ولهيت نفسي تماما عن التفكير بشموخ لحدما بيوم اندك

الباب وانه اشتغل كالعاده كلت تفضل ودخلت شموخ رفعت راسي باوعتلهه باستغراب واخذتني افكاري بيهه احس رجعتني للصفر دخلتهه علي هاي....

.

.

"في لحظةٍ ما وفي موقفٍ ما تشعر بأن الحياة دفعتك للأمام 

دفعتك دون أن تشعر تتفاجأ بأنها دفعتك نحو الظروف لتواجه كل شيء بمفردك

وتجد نفسك  أصبحت بشخصية غير الذي كنت عليها تسير لاتدري أين وجهتك ومالذي يجب أن تفعله

تتكالب 

عليك الحياة وتغرس أنيابها في أحلامك وأمنياتك لاتهتم لك ومن أنت ومالذي مررت به،

وأنت في هذا العمرالذي يقال فيه عمر الزهور

لكن كل ماعليك فعله أن تقاوم 

ان استطعت وأن تدعُ الله أن لاينهار كُل شيء دفعةواحدة"

:- دوامه سوده تحيط بيه عاصفه قويه تاخذني من مكان لمكان همسات شخص مالوف ينده باسمي كسل وحيلي مهدود يخليني عاجزه عن ان افتح

عيوني واتخلص من هل كابوس شي نايم على صدري وحاجب عني النفس اصرخ وانده لاهلي بس ماكو فايده صوتي مكتوم ومستمر هل شي يضغط على انفاسي وصدري حسيت عضامي تكسرت استسلمت من هل

حرب ورخيت جسمي قريت المعوذتين بكلبي وانه نايمه يلا راح الجان كاتم على صوتي وانفاسي فتحت عيوني بتعب وذبول خفقان كلبي اذاني

وكأني جنت احارب حتى اجر النفس واصحى نزلت دمعه مكتئبه وحايره من عيني صفنت وتذكرت محمد وكأن كوابيسي كل هل وقت بسبب

السويته بي وكأن هذا عقابي على ما بدر مني اتجاهه يمكن هذا اسوء شي ممكن يمر بي الانسان لمن يضطر يسمع لوهاوس نفسه ويطيح بالغلط

ويغرق بي لدرجه ان يكسر كلب شخص ويظلمه .. حركتني عيوني والجيوب الانفيه هاجت علي بقيت افرك بوجهي حيل لحدما راحت الحركه حسيت عيوني

انطمن وصغرن وحورن من هل حساسيه المجهوله.. كمت من فراشي بثكل واجت عيني على حالتي بالمرايه تجاهلت شكلي الهزيل ودخلت

للحمام فتحت الماي الدافي المايل للحروره اكثر ودخلت جواه بملابسي سبحت كوه علي نشفت

وطلعت بدلت ملابسي وكعدت امشط بشعري وصافنه افكر بيلي صار وياي اخر اسبوعين....

••بعد كلام مرتضى وياي بيوم ميلاد شموخ قررت افكر زين بفسخ الخطوبه وادورلي على سبب وجيه لاهلي وطريقه مناسبه احجي بيهه ويه محمد تكون

مو جارحه بس ماحسبت حساب للصار بعدهه .. ثاني يوم حضرت نفسي ورحت للشركه بس غير عن العاده مانزل محمد يستقبلني استغربت

وصعدت بالمصعد وحدي..وانه صافنه تذكرته من يصعد وياي باخر اسبوع ويتغزل بيه تذكرت فرحته الجانت تصرخ بعيونه واحس بيهه تحوم علي

تذكرته من كلي دافعت عن مكانج بغيابج وكتله تشبه فريال بهل موقف ضحكت خفيف لا اراديا 

وبهتت ملامحي لمن انفتح الباب وشفته كدامي وعيونه ذبلانه ركزت بملامحه التعبانه وابتسامته المتصنعه وحجيت بتساؤل..

_صباح الخير محمد ليش هيج شكلك تعبان مانايم شنو

_ ويهمج هل شي 

_شنو 

_جنان خلينه نحجي جوه لا تطلعين..

استغربت ولزمت كلبي متوتره لمن كال اسمي بدل اسم جنه وصعد يمي بالمصعد داس عل طابق الاخير واستغربت فعله لان كلي جوه وهسه صعدنه

للطابق العلوي بقيت ساكته واباوعله من المرايه المقابيلي بترقب وكف المصعد ونفتح الباب طلعنه ومشينه عل درج واحنه ساكتين لحدما طلعنه على

السطح ..وكفت يم الباب وهوه بقه يمشي لحدما ابتعد مسافه عني باوع للجو بعيون حيرانه والتفتت علي وكال والخنكه مبينه ذابحته..

_جنان 

_هاا محمد

_شصاير وياج بهاي الايام الاخيره ليش يومج وياي تكضي صافنه ورايحه بغير عالم 

_لا مابيه شي 

_معقوله لان طلبت ناجل الخطوبه

_لا

_معقوله بدر مني شي خلاج تتغيرين علي

_لا

_لعد شنو البيج ومنو يلي ببالج ليش بكل مره نكعد سويه تبتسمين ولمن تنتبهين علي تبهت ملامحج نفس قبل شوي 

_لا قبل شوي تذكرت سالفه تضحك بيني وبينك وابتسمت

_وقبلها جنان وين جان بالج يسرح عني احنه اتفقنا من بدايه مانضم شي على بعضنا وكلشي يصير

ويانه نحجي ونتناقش بي واكيد لو صاير شي وياج راح اطلعلج الحل من جوه الكاع حتى لو على حساب سعادتي 

_مو هيج بس السالفه ومابيهه اني...

بقيت ساكته ماعرف شلون ابدي وشنو اكله كل الافكار الجانت براسي تلاشت و كل قواي تبددت نزلت راسي بخجل منه وخوف وحزن من رده فعله

ومن حيرتي الكاعد تاكل بيه من جهه اريد محمد ومن جهه اريد مرتضى ماعرف اذا صح افسخ خطوبتي من محمد واروح لمرتضى ولا اعرف اذا

قبولي لمشاعر مرتضى ودخولي وياه بعلاقه صح ..نزلت دمعتي على خدي خايفه وكلبي يرجف

بقه واكف بمكانه ما حرك ساكن لحدما طلعت مني شهكه لا اراديه سمعته استغفر بهمس وكال وهوه داير وجهه يباوع للشوارع..

_جنان خلي نفسخ الخطبه..

رفعت راسي بصدمه وكتله بصوت يرجف وانه اعصر باصابع اديه الجمدن ..

_شنو بس ليش

_مثلما سمعتي خلينه نفسخ الخطوبه لانهه من الاساس غلط وماجان لازم تصير ابد

_ ليش

_احسن 

_شنو الجبرك تكول هيج وتبادر بفسخ العقد بعد كل هل فرحه الفرحتهه انت

_ولهذا السبب خلينه نفسخ لان مثلما كلتي الفرحه الفرحتهه انه يعني بس انه الشخص الوحيد الحب وفرح ونزلت دمعته ممنون بهل خطبه 

_محمد

_لا تحجين شي اعرف شنو البداخلج واعرف متردده شلون تحجيلي عنه وانه كتلج لمن اعرف المحيرج راح الكالج الحل حتى لو جان على حساب سعادتي وهذا افضل حل حتى مايانبج ضميرج 

او تجرحيني خلينه ننهيهه لهنا "خير الكلام ما طاب وقل" 

_اسفه محمد

_لا تتاسفين جان غلطي من بدايه لمن شفت كلبج عند غيري وحاولت امتلكه

_لا الغلط من كلبي الضعف واستسلم لمن سمع الكلام النتظره كل عمره

_هاذهو الله يوفقج ويه اليحبه كلبج

_وانت

_لا تديرين بال انه اعرف اعيش بعيد عنج مثلما عشت من قبل لحدما اشوف بنت الحلال التحبني هل حب التحبينه الغيري..

التفت وتاملت بعيونه الخضرا والخذلان مخضرم بيهه نزلت دمعه مكسوره على خده ونزلت راسي باسف منهاره بالبجي ماكدرت اتحرك ولا اطلع من

يمه ولا اضم دموعي عنه تمنيته اي تمنيته جانت باعماقي امنيه مجهوله ماعرف سببهه شنو بس تمنيت يجي يضمني لصدره ويهديني تمنيت لو

كلامه وياي مزيف او مجرد شقه تالي يجي يبوسني على جبيني ويكلي ردت اختبرج بس كل هاذي الاشياء يلي جانت مكونه امنيه صغيره

باعماق روحي ماصارت و ماتوقعت هل امنيه البريئه تتحول لكابوس وتخيم على ايامي الجايه .. عافني بحالتي هاي ودخل للشركه بدون مايحجي

ولو كلمه ثانيه سندت ضهري عل حايط  وردت بس ذكرى وحده حلوه من مرتضى تجي بالي وتمحي كل ذكريات محمد وحبه بهل ايام يلي فاتت

العشتهه وياه تمنيت اتخلص من هل وجع يلي سيطر على كلبي ولو بذكرى بسيطه من مرتضى تفرحني بس عبث خيم مثل امنيتي على بالي

وصرت اتذكر كلماته وحبه الي .. ضربت على كلبي محاوله اخفف الخفقان الدمرني من الخوف وهد حيلي مسحت دموعي وحسيت ماكدر اقوه عل

شغل اليوم ولا اكدر اكابل محمد وكأن ماصاير شي .. نزلت بالمصعد للطابق الارضي وطلعت من الشركه بقيت واكفه بالباب والجو يكص من برودته

مثل بروده ايامي بدونه اتصلت على احسان وانه ابجي وكتله يجيلي .. كلهه ربع ساعه وصفت سياره احسان كبالي صعدت بيهه والتفت علي يسالني والقلق على ملامحه..

_شكو شصاير وياج ليش جنتي تبجين من اتصلتي وليش ردتي ترجعين للبيت وانتي توه وصلتي 

_لا بس ماعندي شغل اليوم وكلت خلي ارجع ارتاح 

_وليش صوتج مخنوك وتبجين جنتي من خابرتيني

_لا بس منشوله ماجنت ابجي يله نرجع للبيت بردانه تره..

_تمام ..

دار وجهه عني بشك وحرك السياره وانه الطريق كله صافنه وروحي مهدود حيلهه مسافه الطريق وصلنه ونزلت قبلما يدخل السياره للكراج دخلت

البيت وبوجهي لغرفتي سديت الباب عايفه وراي امي تصيح علي بقلق .. ذبيت حجابي والستره وغصت جوه اللحاف وانطلقت دموعي تجري على

خدي وصوته لمن حجه بخنكه وكال خلي نفسخ الخطبه يتردد لمسامعي كل شوي وينكسر خاطري اكثر دك الباب بابا وهوه يحجي من وراه بقلق..

_بابا جنان شبيج ليش رجعتي من الشغل وانتي توه رحتي جنانه بنيتي فتحي الباب يابويه شصاير وياج لا تخوفيني عليج

_بابا مابيه شي خلوني وحدي فدوا اريد انام

_متعاركه ويه محمد..

من جاب سيرته غصيت بعبرتي وبقيت ساكته شكله فهم علي ورجع كال..

_تمام بابا نامي ورتاحي هسه وبليل نحجي تمام

_انشاءالله بابا ..

راح من يم الباب وبعد محد اجالي بقيت ملازمه الفراش ٣ ايام وامي توكلني كوه وباليوم الرابع جابتلي الاكل مثل كل مره وكعدت توكلني وكالت بتردد..

_يمه شصاير بيج ليش هيج وجهج ذبل بسرعه احجيلي يايمه مو انه امج شصار بينج وبين خطيبج 

_امي 

_كولي يبعد حيلي شبيج

_اريد افسخ الخطوبه

_ليش ياا يمه

_محمد مو مناسب الي وماريد يربطني بي اي شي

_صلي على محمد يمه الولد اجه وجايب شيوخ الدنيا لعيونج واهله شفتهم عين الله عليهم ماطلع منهم شي غلط اهدي يايمه والزواج مو لعبه يمته ماتردين تزوجين ويمته ماتردين تفسخين

_ماريد امي ماريد بعد شي لا اريد اتزوج ولا احب ولا انحب ولا اطلع من غرفتي حتى ماريد احد يحبني ماريد احد يسال علي ويهتم بيه ويقلق

خلوني وحدي انه انانيه واستاهل كلشي يصير وياي استاهل اضل وحدي استاهل الناس تتجاهلني

استاهل الحزن والكآبه الماخذات كلبي استاهل كلشي سيء صارلي وراح يصيرلي عوفوني دخيل الله عوفونييي..

بقيت ابجي واضرب على رجلي فقدت كمت ماحس بقوه الضربه تعبت وتعبت نفسيتي احس راح اتخبل هل ضغط مو كده انه ولا حمله اريد اخلص من

الدنيا ومن روحي اريد الزم كلبي واموته تمنيت الموت بهاي اللحظه ماخذني تمنيت لو حلال واخلص روحي من هل عذاب عقلي مشوش كلبي

متردد حيلي مهدود تفكيري كل شوي ماخذني لواحد منهم ماصرت اميز بين الصح والغلط كلبي ياذيني وارق ماخذ حيز بداخلي .. كامت امي

حضنتني وابوي اجه يركض هوه واحسان على صوتي اخذني من امي لحضنه وبقه يقره علي قرآن لحدما هدات وخلصت دموعي بقيت صافنه بالفراغ

وطالعه الدنيا من عيني وانه اشهك رفعت راسي باوعت لابوي وهوه عيونه حمره وكتله بذبول..

_بابا 

_عيونه وحيله شبيج يبعد ابوج مرمرتي كلبي عليج

_اريد اموت

_الموت الي ولا الج ليش بويه هيج تسوين تردين تموتيني وتخلصين مني تردين تشوفيني مجلوط ونايم بكبري

_بابا تعبت اريد اموت والله تعبت روحي كاعد تحتر....

غصيت بكلمتي ونزلت دموعي وانه اباوع لابوي نزلت دمعته علي باسني براسي حيل وحضني لصدره عصرني تذكرت محمد جانت حضنته نفس

هل حضنه حنينه ودافيه وكل الحب بيهه غمضت عيوني حيل وغفيت بحضن ابوي من دون ماحس وانه اتخيله حضن محمد ..ليش هوه انه شلون احس وصارلي ٣ ايام

مانايمه غير ساعتين لو ساعه باليوم لمن يغلبني النعاس والتعب ويوجعني راسي من البجي .. مرت يومين ثانيات وسمعت ان محمد ابن عمو شهم رح

يخطب صفنت واجه ببالي محمد اليوم المفروض خطبتنه انه وياه اليوم المفروض اشوف الفرحه تلمع بعيونه واليوم جان المفروض اسعد

يوم اله شكالي كلبي لمن فكرت اسحب هل سعاده والامل منه شكالي ربي من اقتنعت بكلام مرتضى وهملت محمد .. فركت وجهي بتعب ورجعت

لغرفتي يلي ماصار ٥ دقايق مفاركتهه رجعت تمددت بالفراش ورن نقالي معلن عن اشعار رساله .. اخذته وشفتهه من مرتضى دخلت عليه ولكيته

دازلي اكثر من رساله قبل يوم ويومين وكلاثه وهسه جانن ٥ رسايل فقط فتحتهن وشفته كاتب...

💬جنانه حبيبي ليش هيج تسوين ليش ماتردين علي صارلج ايام شبيج كالولي مريضه تردين اجيلج

💬جنانه لا تختبرين صبري ردي علي من احاجيج ليش مغلسه 

💬جنااان ردي دخيل الله تره راح تطلعيني عن طوري ليش تشوفيني اراسلج ماتدخلين عليهن وماتردين شنو ثور انه هناا معتبرتني 

💬ضلي هيج مو صوجج صوجي انه جاي اراسلج واطمن عليج انتي دواج اللبس وبس ..

بقيت اباوع لرسايله بدون مشاعر انعدم الاحساس من كلبي طلعت من المحادثه بدون ما ارد عليه كالعاده من فسخت عقدي ويه محمد وكتله عليه

لحد هسه مرت ايام ما احاجي او بالاحرى اشوف الرسايل ومارد وحتى بالجذب ماكلف نفسه واتصل علي لو اجه لبيتنه شافني من سمع بيه

مريضه بس حتى لو اجه احس كلبي مات اتجاهه ومادري الحب الجان بكلبي اله وين راح بعدهه سمعت خطوبه محمد ابن عمو شهم بعد شكم يوم صارلي شويه واهس كلت بلكي اطلع من

جو الكآبه العايشه بي وهم التقي بمرتضى وانشغل بي عن التفكير بمحمد ..ااخ ربي صارت الشغله بالعكس بدال ماجنت اتمسك بمحمد حتى انسى

مرتضى صرت هسه انشغل بمرتضى حتى انسى محمد بس الفرق ان مرتضى جنت انشغل بي بحب ومحمد هسه انشغل بالي بي بتانيب الضمير والحنين لسوالفه وحبه .. دزت

علينه خالتي سماء حتى نروح للسوك سويه ورحت وياهن بس ماعجبني شي او بالاحرى جان مالي خلك فره سواكه ودنيا صبح وانه النوم

مجافيني ..عاد رجعنه للبيت بعدما كملن كل مشترياتهن وعلى طول اليوم احس شموخ تريد تحجي وياي وتسالني اكيد سمعت بفسخ عقدي ويه

محمد فحاولت اتشرد منهه لان مالي نفس ولا الي روح شخص يفتح هل موضوع وياي ويلومني فوك طياح حظي لان اعرف السويته غلط والله لا

يسامحني على هل غلط السويته .. رجعنه لبيتنه بعدما تغدينه مباشرتا ومرت ايامي بالبيت مارحت للدوام بعد وماهمني انفصل اتعاقب خلي شيصير يصير ..

المهم قبل الحفله بيومين اخذتني امي للسوك اشتري ملابس للحفله لان راح يسوونهه بالقاعه وكل الدنيا معزومه عليه حتى خوال وخالات

شموخ يلي مو دائما يتواصلون وياهم همين راح يجون للخطوبه والاقارب وجماعه محمد يلي بالخارج كذلك راح يجون علموده ورح تصير حفله

مطنطنه بكل معنى الكلمه فلازم نطلع كشخه الحفل ونبيض الوجه كخوات وبنات عم العريس وهل شي شويه رفه عن نفسي وخاصه لمن رحت

للمول وشفت الفساتين كبالي واحد احلى من الثاني وماتعبت بالفره والاختيار .. اختاريت احلى فستان بالمحل لون فستقي ومنفوش مو بينصل

جربته وطلع يجنن علي حجزت عند الكوافيره وكلت هل مره اريد انتحر بالايام المتعبه واهتم بروحي وبشكلي وطبعا امي وابوي من شافوني

طلعت من كآبتي وصرت اخطط شلبس بالخطوبه وشنو اريد اجيب كيفوا وصاروا همه ياخذوني ويجيبولي بدون ماكلهم حتى انسى السالفه

الصارت .. اجه يوم الخطوبه ورحت من الصبح للكوافيره سوتلي مكياج وتسريحه لطيفه برزت جمال شعري وطوله وتناسقه ويه الفستان كملت

كلشي وره ٤ ساعات واتصلت على بابا قفلوا البيت من يمهم واجولي لبست الجبه والحجاب لفيته خفيف على شعري حتى لا تخرب التسريحه

وطلعتلهم حرك بابا السياره بعدما مدح جمالي شويه واحسان يعيب علي غيران وانه اضحك عليه وصلنه لبيت عمو شهم ولكينه بابهم مفتوح

والسيارات كومه بالباب لان المعازيم تلتم هنا تالي يجيبولهم كوسترات توديهم للقاعه .. صف السياره بابا وره السيارات ونزلنه وداني احسان وهوه

مغطيني عن عيون الزلم الواكفه باب الديوان .. دخلت للمطبخ وسد الباب اجيت سلمت على خالتي والبقيه سلمت من بعيد مابيه حيل اسلم عليهن

وهنه الف وحده ماشاءالله عاد فلتت لغرفه شموخ كبل فتحت باب الغرفه ومالكيتهه استغربت تالي طخت بالي انهه رايحه للصالون ويه مرت اخوهه ..

ذبيت حجابي والجبه عدلت مكياجي لان ساح شوي من عركت وبقيت منتظرتهه ماطلعت لان مالي خلك اختلط ويه الناس بس تذكرت جمانه

هيه الوحيده ويه شموخ الاكدر اكعد وياهه براحتي ونسولف عاد كمت طلعت دورت عليهه ياله لكيتهه بين النسوان ورحتلهه سلمت عليهه كعدت يمهه وهيه تكول مادحه جمالي..

_شهل جمال ولج راح تكسلين عل عروسه 

_هههه جمال عيونج انتي هم مو كليله شر طالعه تخبلين جنج اميره بس لو تدنفشين شويه 

_بربج وين اكو اميره سمينه

_ههه ولو هم صدك خليج هيج جا اميره المحسن

_هههه اي والله

_ اكول شموخ رايحه ويه العروس مو

_اي هيج اعتقد لان ماموجوده بالبيت من اجينه

_الا صدك يكولون خطيبه محمد تشبهني 

_اندري اشو خالتج سماء تكول العروس تنطي شبه لجنان بس على جبيره 

_صار عندي فضول اشوفهه والله يمته نروح للقاعه

_كال عمي شهم بعد ساعتين نطلع بس نتغده 

_هاا تمام جا خلي اروح يم خالتي اشوفهه خاف محتاجه شي

_اخذيني وياج هوه انه ردت انوم علاوي واروحلهه بس بعد مانام شوفه عينج هوسه 

_خطيه ودي يم ابوه هناك بالديوان هدوء يكدر يخلي على جهه ينومه

_اي بله هسه اتصل عليه واكله اذا قبل اودي يمه 

_تمام ..

اخذت نقالهه وطلعنه للصاله وابنهه علاوي شايلته على ايدهه عمره سنتين ماشاءالله صار عدهم هيه ومحسن ٣ ولد زيودي وحسوني وعلاوي وكاتلين

نفسهم عل بنيه هسه يردون بنيه تونسهم ماكو وجمانه رحمهه بي مؤقت الا كل سنتين ضبط ياله تحبل لا مانع ياخر هل مؤقت ولا منشطات يقدمه

سبحان الله يعني منا وهيج بعدما صار علاوي عمره سنتين بعد تحبل وبلكي تجيب البنيه التتمناهه هيه ومحسن .. المهم بقيت لازمه علاوي

ابوس بي وهوه متنحس خطيه نعسان ومايكدر ينام من هوسه الجهال وجمانه تحجي ويه رجلهه شويه تالي سدته وراحت صاحت لابنهه زيودي يلي

صار عمره ٩ سنوات ماشاءالله عليه انطيتهه علاوي  انطته اله وشاله على كتفه وداه لابوه بالديوان رحنه انه وياهه للمطبخ وكفنه ويه خالتي نساعدهه

بتحضير الماعين لان الزلم بدوا يطبخون بره.. وبنات خالاتي يلي صار من صغري لهسه شايفتهن بس مرتين لمن توفه جدي وبيبي اهل امي اجن

سلمن علي ودكن سوالف وياي حتى انحرجت منهن لان ماعرف اسولف ويه اشخاص بمثابه الغريب بالنسبه الي عاد بقيت بس مبتسمه واهز

براسي مثل الطرمه .. اجت خالتي سماء التهن وياهه عني وهي تسالهن عن خواتهه ودراسه الولد وغيرهه عاد انه سحبت روحي منهن عل بطيء

ورحت احضر استكاين الجاي .. كلهه ساعه و استوه السوب يم خالتي وكملوا الزلم طبخ بره صارت الهوسه مالت الاكل المعتاده والبنات كلهن

طلعن من المطبخ بقينه بس انه وجمانه لابسين حجاباتنه ونناوش سلام ومحسن البلامه والكوس هنااك واجه مرتضى شافني وبهتت ملامحي ودكات

كلبي زادت بشكل مزعج .. هوه باوعلي من فوك ليجوه واشرلي عل صينيه اخذتهه انطيتهه اله

وهمس من بين سنونه عبالي راح يتغزل بجمالي لو يسالني عن حالي اشو هذا كبل كال..

_ليش ماتردين علي مسويه نفسج ثكيله شنو وبعدين شهل لبس هذا وشعرج طالع نصه من الحجاب وسلام ومحسن يطبون ويطلعون محد علمج العيب والحرام انتي 

_شبيك على كيفك اكلتني بكشوري الواحد يسلم بالاول

_عوفج من السلام لحكيني لغرفه شموخ وهسه انه اسلم عليج براحتي 

_شتريد تسوي

_اريد احاسبج على هل لبس والمكياج عبالك راقصه كبالي مو بنيه عزبه..

باوعتله باستغراب وصدمه وهوه نتر الصينيه من ايدي وطلع بقيت واكفه بمكاني وافكر من كل عقله يعني هسه هذا حجه هل كلام وراح بدال مايكلي

كلمه حلوه جاي يكلي جنج راقصه رغم مكياجي مناسب ونازك ما ملطخ وفستاني مستور بس ردانه تور منقوش حتى ايدي ماتبين زين وهمه الولد لا

يمي ولا بكرباي ياخذون الصواني من جمانه ويطلعون محد خله عينه علي .. جريت حسره وختنكت بيهه بلعت غصتي بصعوبه ورحت للثلاجه

اخذتلي بطل ماي شربت ورحت لغرفه شموخ وانه دمعتي بعيني من كلامه واسلوبه كلت لا يجي ويلكاني بالمطبخ ويسحبني بيده للغرفه اعرفه

مايهمه عيب وزحمه يسحبني كبال النسوان ومايهتم حتى لو اهلي كاعدين وتالي الحجي يصير علي مو عليه.. 

بقيت شويه منتظرته ما اجه كلت همزين لا يجي مالي خلك اتناقش وياه واسمعلي حجايه تغثني وانه منا شلون طالعه روحي .. كمت ردت اطلع

ونفتح الباب بسرعه ودخل هوه دار وجهه علي وقفل الباب تراجعت خطواتي وتقرب بسرعه لزم الحجاب شمره مني شهكت ورحت اريد اخذه

ماحس الا حضني من وره ضهري ..تقشعر بدني وبقيت ادفع بي مايتحرك وهوه مخلي وجهه بشعري يشم بي تعصبت كلش وشاطت روحي رغم

يعرفني احبه بس لا ممكن اتقبل منه هيج اشياء وخاصه اني بعدني على ذمه رجال غيره رفعت ايده اللافهه على خصري عضيته حيل وهوه عاط

دفعني وباوع لايده بعصبيه وانه رحت لفيت الحجاب على راسي اجه لزمني من رقبتي واردف من بين سنونه وعيونه شايطه..

_صايره جسره وتتجراين علي وتلبسيني شكو  عود تردين تبينين انج ثكيله لو تندمتي على محمد لان عفتي وبقيتي حزنانه عليه

_وخر محمد شهل حجي ..

خربطت باسمه ويه محمد لو هوه انتقم شد قبضه ايده على رقبتي واحس مدري شنو طك بيهه حتى ردت اتقيئ شمرني عل جربايه وهوه يخنك بيه

حسيت روحي رادت تطلع بين اديه وانه ارفرف جواه مثل الحمامه المذبوحه هنااك ياله حس على روحه وابتعد بعدما اسودت الدنيا بعيني وراد يغمى

علي .. ابتعد ورفعت ايدي كوه لزمت رقبتي ضليت اكح واجر النفس بالغصب صفن لحضه وجرني عليه حاضني لصدره ويمسح على ضهري

حتى اتنفس وانه حيلي رايح احسه وعيوني دمعت بلعومي ورم وصرت كوه اتنفس شويه وكال بتردد..

_ليش تسوين هيج وتخبليني تدرين بيه شكد احبج ليش تخليني ايام وليالي اراسلج وماتجاوبيني وفوكاتهه هسه جايه تخربطين بين اسمي واسم ذاك العار 

_مخبل انت مو صاحي ردت اموت جوه ايدك مرتضى

_اي مخبل انه مخبل شلون تردين عقلي يضل براسي وانه اسمع البنيه الاحبه تصيحلي باسم شخص ثاني ومو اي شخص لا خطيبهه

_يعني تدري بيه عندي خطيب و بعدني على ذمته وتجرات حضنتني ومديت ايدك علي.. يعني لهل درجه الحب عامي عيونك وماتكدر تفرق .. بين الحلال والحرام والصح من الغلط .. اتجاه الشخص التحبه

_مو بيدي عشكج عاميني عن كل الدنيا حتى بصلاتي اتذكرج واضطر اروح اسبح واعيد صلاتي جنان انه اريدج اريد اخذ راحتي وياج لمن

اشتاقلج اكدر اتقرب منج ابوسج اشمج احضنج انام على صدرج مايصير هيج كلما احضنج لو اتقرب تدفعيني يمته تخلص ويطلكج ذاك الحقير..

فتحت عيوني بصدمه من حجه هيج باوعتله بقرف وكتله محاوله استوعب معنى كلامه..

_ وشنو يعني تريد تسوي كل هذا بالحرام 

_ليش حرام مدام انه احبج وتحبيني ماكو شي غلط وانتي بت عمي مو غريبه والحب مو حرام

_مرتضى تحجي كل هل حجي وتفكر بيه بصلاتك وتروح تسبح شنو يعني كلامك هذا من حرام

_اي صح حرام اتذكرج بصلاتي بس مو بيدي لمن اتذكر تفاصيل جسمج وشفايفج تجي بالي ماتحمل اصير اريدج واضطر اترك صلاتي واروح للحمام 

_ وانت تصلي يعني تفكر هيج

_اي بس مرات شبيج ..

بقيت مفهيه بوجهه مستحيل اكو هيج شخص صاحي ممكن يتوجه لرب العالمين ويفكر بهل سوالف الطايح حظهه ويتخيلهه وينسه صلاته وربه

المتوجه اله .. لا ونوب يكلي اريد احضنج وابوسج يعني هاي مخطوبه وهيج يطلب مني لو تطلكت من محمد شيسوي يعني يريد يخليني اشرد منه

وماختلط بي بمكان واحد بعد لان هذا ابد مو صاحي ومخبل اخاف يختلي بيه ويسويلي شي تالي وشلون بيه .. بس رغم كل كلامه الا ان افكاره

بالصلاة كارثه اكيد راكبه جن لو شيطان لهل مرتضى حتى هيج صاير بي  مامعقوله الانسان توصل بي يستهين بصلاته وبالحلال والحرام بهاي

الطريقه .. من بين هوسه افكاري وعدم استيعابي فزيت لمن لزم خدي ودار وجهي عليه محاول يبوسني مدري شصار بيه لحضتهه خليت ايدي

على حلكي ودفعته برجلي من صدره بكل قوتي بحيث طاح من الجربايه وكبل انضرب راسه بالحايط ضربه قويه شهكت وردت اروحله بس من شفته كام معصب

كلت مابي شي خليت وشردت بروحي العزيزه منه فتحت قفل الباب وطلعت من الغرفه ولاكتني بت عمي شعلان التريده ..تجاهلتهه وعبرت من يمهه

وانه بالي يمهه بس لا يطلع مرتضى وراي وتشوفه وتشك بينه وين انطي وجهي وهيه فضيحه وين ماتروح تضل تحجي وتزيد من يمهه وتسوي عاليهه

واطيهه.. بقيت بالمطبخ كبال الغرفه واراقب بيهه وهيه تحوم حوالين الغرفه تريد تدخل بس ماتكدر لان يدرن بشموخ ماتحب واحد يدخل غرفتهه

وخاصه عدهه اوراق تدريبهه وواجبات الدوام تتخبل اذا ضاع منهن شي عاد كلهه تتكفه شرهه ..مرت ربع ساعه تقريبا وهيه لمن ماشافت

احد طلع وراي راحت انفتح الباب وطلع مرتضى من الغرفه واجه للمطبخ باوعلي وهز راسه بوعيد وهوه يطلع ركع الباب وراه وراح ..مدري شنو ذنبه

هل باب كلما شاف مرتضى انركع .. لزمت رقبتي تاذيني وتذكرته من خنكني مساع وطلع الدنيا من عيني غصيت بعبرتي ونزلت دمعه مهضومه من

عيني معقوله هوه هيج شخصيته عصبيه زياده لو يريد يتحكم بيه وبلبسي بحجه الحب لو تعصب من سيره محمد ليش سوه هيج اذا فعلا يحبني لان

مامعقوله اكو شخص يحب بنيه وتوصل بي المواصيل ان يخنكهه وياذيهه هذا مو حب وغيره وانما مرض وهوس.. ولو من ناحيه اخرى وياه حق

يعصب لان اختبرت صبره وتجاهلته كل هل ايام ومارديت عليه ومنا خربطت بين اسمه واسم محمد ..ورغم غلطي حاول يبين اشتياقه وحبه الي

ويحضني بس مادري صرت اشك بمشاعره اتجاهي اذا جانت حب او شهوه او تملك ماعرف شنو اليحسه مرتضى اتجاهي وماعرف اذا نيته ويايزواج لو بس لعب مثلما بينلي مساع ..

اووف اووف وين راح يوديني دهري بعد وشراح تكون نتيجه هل مشاعر المالهه تفسير من ناحيه مرتضى ومن ناحيه كلبي الماعرف بروده اتجاهه شنو سببه ..

فزيت من صفنتي على صوت خالتي وهي تصيحلي اتغده رحت يمهه و اجت عينهه على رقبتي شهكت وكالت وهيه تتلمسهه..

_يا خاله شبيهه رقبتج هيج حمره صايره....

الفصل الثامن والعشرون من هنا