رواية سواد الاثمد الفصل السابع والعشرون بقلم نورس
- ماكو مآب مختفي رايح خالي لشقتو لاگي بابو مفتوح والشقة مگلوبة گلاب الدم مالي الگاع وهو مالو أثر
شدن :- اسم الله دم شنو وين راح الولد
- الدم إلو لغيرو ما نعرف قدمنا بلاغ بالمركز ومن المغرب ولهساع شوفة عينج ماكو خبر عنو عفنا الدورية يم العمارة وليد ضل واگف يمهم وهساع رادين لهناك
- زين موبايله شي محصلتوه
- الموبايل تاركو بالشقة دورناه ما بيه شي
- عجيب وهسه شحتسوون
- رايحين تا ندور عليه بالمستشفيات جائز متگاون ويَّ واحد وجايتلو ضربة قوية ورايح لهناك
- إلا هيج بس ممعقولة لهسه ممتصل حتى يبلغنا
- ما ندري والله حيرة
جان واگف متخصر بأيد والثانية بيده تليفونه يحجي ومتوتر حيل معالم الخوف والقلق واضحة بوجهه
طبعًا هذا مآب مو أي واحد، صديق دربه
باوعتلي نورجان مخطوف لونها لزمت ايدها
شهربان :- شبيج اصفريتي
- مسمعتي
تنهدت :- سمعت
- شلون لو صايرله شي من البارحة وكلها فاقدته
شدن :- ماكو شي ان شاء الله ماما لتخافين تفائلي هسه يحصلون عنه خبر
لزمتها ماما تهدي بيها تموت من الخوف بهيج مواقف
دك تليفون شبير بيده أشرلنا نسكت ورفعه رد
شبير :- ها أبو علي .. خوية مآب ماكو لحگت خالي للشقة لگيتو گاعد ايدو على راسو وشقتو معفوسة عفس .. اي بلغنا وهسع طالعين انا وخالي تانشوف اسمو بالمستشفيات .. ما ندري والله لو تجي ترى خالي وضعو مو تمام .. زين لا تنسى انطي خبر وياك لمؤتمن .. ناطركم هلا بيكم
سد الخط منه
طلع خاله من الغرفة الحواجب معگودة الوجه ميتفسر بيده سلاحه يخليه بحزام البنطرون أشر لشبير
فدار :- امشينا يلا ..
اندار لماما قبل ليطلعون :- بالج يندك الباب وتفتحينو قفلي البيبان زين وأي مكالمة لو رسالة تصل من غريب تخابريني
- فدار فدوة شيصير وياكم بلغنا لتخلي گلوبنا معلگه يمكم
هز راسه وطلعوا اثنينهم من البيت مستعجلين
ماما سوت الگال عليه عمو فدار قفلت كل البيبان من جوة التمينا كلنا بالصالة وعينّا عالموبايل مال ماما
لهناك وفزيت على ايدي ماما تهز بكتفي حتى اگعد
فتحت عيوني صارت گدامي
گالت :- گومن ماما للغرفة ليش هيج نايمات
لزمت رگبتي أحرك بيها متأذية نايمة گعدة ونورجان راسها بحضني هم فزت گعدت على حيلها نعسانة
گامت قبلي للغرفة عيني صارت عالساعة، أربعة الفجر
سألتها :- ماما ماكو خبر عن مآب ؟
- ماكو لحد قبل شوي أتصلت بشبير محصلت رد
مشت عني وضليت گاعدة بمكاني صافنة أضرب أخماس بأسداس عاللي ديصير نزيت على صوتها
باوعتلها :- ها
شدن :- شو بعدج گاعدة گومي لفراشج الجو بارد هنا
سكتت شوي أباوعلها وهي واگفة تقربت مني توخر شعري عن وجهي تباوعلي :- شبيج حبيبتي
بللت شفايفي وحجيت مترددة
- ماما معقولة عبد إله ايد بإختفاء مآب ؟
- ما أعرف جان بيّن لو هو ورى السالفة يتصل أو شي من هيج فدار وصاني عالتليفون إذا واحد إتصل
- والتهديد اللي شمره للبيت
صفنت بكلامي بحيرة
كملت كلامي :- تعرفين كُلش زين لو عبد طلع ورى إختفاء مآب اني راح أصير بوجه المدفع
گالت :- لتفكرين زايد بالموضوع فدار والولد دا يدورون عليه والشرطة دتدور وياهم منا للصبح كُلشي يبين ان شاء الله گومي نامي وارتاحي
گومتني ورحت نمت للغرفة حشگت روحي يم نورجان
انطيتها ظهري وجهي للحايط وايدي جوة خدي صافنة
أضوية الغرفة طافية والفراش دافي البيت هدوء حيل
الأجواء كلها جانت تساعد عالنوم مع هذا مگدرت أرجع لنومتي ضليت أتگلب بمكاني أفكر بالصار لحد ما راسي وجعني وما أدري شوكت نمت محاسة على نفسي
فتحت عيوني الصبح دنيا نهار ضوة الشمس ضارب من الشباك عالغرفة گعدت لحيلي أتمطى هدأت شوي أسمع صوت من برة صارت بوجهي نورجان دتلم بشعرها
گتلها :- دتسمعين ؟
باوعتلي وسكتت مستغربة
ركزت شوي بالصوت صوت مرة دتبجي والصوت هنا بالبيت فزيت بسرعة من فراشي ونورجان وراي
طلعنا من الغرفة للصالة صوتها جاي منا شفت ماما
خليت ايدي على گلبي يلا گدرت أجر نفس
جان واگفة وعلى مسافة من الباب اثنين نسوان وحدة منهن لابسة عباة راس واللخ بالگاع دتبجي وتنحب
المرة لازمتها تريد تگومها وتحجي وياها تهديها
- لا هيج ام مؤتمن گولي يا الله استهدي برحمانج الولد لهساع ما سامعين عنو شي مو زين لا تفاولين عليه
فرحة :- راح وليييييدي شسوي بروحي ولج خية صارلو يومين مختفي ومحد دررررى عنو لحد سأل وين أعطي وجهي وييين أدورو إلمن أفزززززع
- اللي يسمعج يگول أبوه واخوتو شايلين ايدهم عنو مو عتشوفينهم يتراكضون تا يحصلون خبر عنو
- عجل وينهم لحد خابر ولا انطانا چلمة تبرد الگلب گلبي نارر على وليدي انا أگلج مآب صايرلو شي
- فالج ما گبلناه دگومي شو گومي من جيتي ولهساع جبتج الدرب كلو عتونين
مشتلها ماما تساعدها حتى يگومنها من الگاع
شو هاي شيلي ايدج وادفعي اي ماما بكل قوتج
رجعت ماما ليورى متفاجئة رد فعلها
صاحت :- وخررري مني كلو منج بومة الشوم من يوم ما لفيتي علينا انتِ وبزرتج والمشاكل ما عتفراگنا
- يا شوف شلون بالله هو هذا حجي شعليها المرة يمج گرباج
- عجل مچذبة كل مصيبة والأخرى نطيح بيها بألف يا رب يلا نطلع منها وهذاك البلاية گلب عيتراكض وراها وجار ولدي وياه لخاطرها هي وبزرتها انا لو صار بواحد من ولدي شي ربحي بمنو بشدن لو بناتها
- لا حول ولا قوة إلا بالله الله يهديج بس دگومي من الگاع اگفي لحيلج
گومتها المرة ومشت بيها گعدتها عالتخم ومستمرة تون
ماما واگفة تباوعلهن واحنا واگفات وراها
باوعت لوجها شفتها ضايجة من الصار ومن كلامها بس ضلت ساكتة مشت للمطبخ انداريت على نورجان
شهربان :- منو هذن ؟
أشرتلي عليهن وهن گبالنا
- هاي ام العباية عمة شيخة تصير عمته لشُبير وهذيج البصفها مرة عمو فدار ام مآب
عاد هنا طخت براسي من هيج دفعتها لماما
عفناهن ومشينا وراها للمطبخ جانت تتحرك تروح وتجي
شهربان :- ماما بيج شي ؟
اندارتلي بنص إلتفاته :- اني لا شبية قابل
- شفتج تضايقتي من كلامها
نورجان :- بعدين ليش سكتيلها جان رديتيها
اندارت علنا انتجت بظهرها عالكاونتر وايدها ليورى
- گلب والدة ماما محد يحس بحرگتها بس المجربها شتحجي معذورة ما أحط عليها خطية
- هاي الخطية بأول فوتة إلج لبيتها رادت تسممج
انداريت لنورجان متفاجئة بكلامها وبرد فعلها جانت تحجي ومكتفة ايدها لصدرها متضايقة معاجبها الصار
جرت نفس طويل وردتها
شدن :- تتجازى هي وربها
باوعتلي :- امشن غسلن دتتريگن لبين ما أجهز الريوك
جربت كرسي من الطاولة وگعدت
- ريوگيش منو إله نفس ياكل
- انتِ بالذات غصبًا ما عليج تاكلين دتاخذين علاجج كلنا ترى متضايقين وخايفين عليه بس مو ننسى روحنا
جهزت الريوك وگعدنا بالمطبخ تلاثتنا أكلت كم لگمة بدون نفس من ورى ملحة ماما ونورجان نفس الحالة
أباوعلها مدنگة بيدها الچطل تگلب بماعونها
وماما گعدت ويانا ما أكلت بس شربت چاي وتصفّن
فاتت المرة عمة شبير للمطبخ فزن اثنينهن سلمن عليها
ووگفت تحجي ويَّ ماما عالصار
شيخة :- اعذريها انتِ تعرفين حجواتها مو جديدة وهي هساع هم متلوعة على وليدها ما تدري عنو
- لا عيني معذورة مو حقها اني من يمي گلبي مشتعل نار عليه
اجت عينها عليَّ انتبهتلي گاعدة
استغربت :- هاي البنت منين ؟
ابتسمت ماما وردتها :- هاي بنتي بان
- يا يمة گرة عينج برجعتها لحضنج وعتگولن تشبه نورجان وينو الشبه كل وحدة تگول الزين عندي
گعدت على واحد من الكراسي وطلبت من ماما حبوب وجع راس لمرة فدار راحت ماما تجيبلها
نورجان يمها تسولف وياها وتسأل عن أخبارها وكل شوي باستها مبينة علاقتها زينة بيها
باوعتلي :- وانتِ شلونج عمة
صفنت شوي متوقعت سؤالها خليت شعري ورى اذني مرديت عليها وهي ضلت تباوعلي مضيگة عيونها
رجعت ماما بيدها الشريط مال حبوب أخذته نورجان وياه مَي وراحت للصالة گامت وراها المرة
شيخة :- أگوم أشوفها لا تصد بوجه البنية
راحت وراها شوي ورجعن اثنينهن
ماما گالت :- ها خما مرضت تاخذه
- لا أخذتو وحطت راسها تا تنام خليها تهود شوي خطية من ساعة ما درت وهي عتون وتنوح
- الله يساعدها مو هينة والله
گعدت وهي تجر حسرة :- اي والله الوحدة بينا ما يلوحها كسران الظهر إلا لو لاح واحد من وليداتها أذية اندعلو عمة الله يردو سالم لأهلو عبن يتيمات ودعوة اليتيم مستجابة
شدن :- عيني ام تيم تفضلي ويانا عالريوك لو أسويلج شي ثاني ؟
- لا حبيبة رحم الله والديج بس فد استكان چاي راسي موتني
- بعيني
وگفت تجددلها الچاي وتحضر بالإستكان ويسولفن
سألتها ماما :- شلون دريتوا بالصار
- فرحة سامعة تيم ومؤتمن وهم عيسولفون بالجية لبغداد وچافتة عليهم تصرخ عاد اجاني عمت عيني تيم گلي يمة إلحگيها ابقي وياها بالبيت عاد للصبح ما ضلت خلت سلام يجيبنا لهين وسلام راح لحك خاله واخوتو
هن يحجن واني صافنة بالي مو وياهن أباوع للشباك مال مطبخ عيني عالحديقة فززتني حجايتها من شرودي
شيخة :- بنيتج متعوبة يشدن
صارت عيني بعينها تباوعلي مركزة بوجهي توترت
خلت ماما الچاي گبالها وگعدت
- لج عيني اسأليني اني عنها هسه عود زينة لو شايفة حالها بأول أيام حبيبتي انتهت ماخذين البنية منها حتى ممخلينها تشوفها
- ووينها هساع بنتها ؟
- عند أبوها
وگعدت تسولفلها بالتفاصيل وعن حالتي وروحتنا لأربيل
- شوف شوف الچلاب شعاملين بالبنية
- تشوفين
- حسبي الله عليهم حوبتها ما تتعداهم هاي أنا وهاي انتِ إلهم يوم ويگعون وگعة ما من وراها گومة عبنهم غاطين بالحرام
- الله ينتقم منهم ويشوفني بيهم يوم مخلونا نتهنى يوم واحد براحة من سالفة لسالفة
- دام بنياتج بحضنج سالمات وفدار حدرج واحنا هم أهلج لا تشيلين هم إلا ما ربج يفرجها
- ونعم بالله
وصتني ماما عالعلاج گمت للغرفة أدور العلاگة
جريتها من الميز وگعدت عالجرباية والعلاگة بحضني
اجت وراي نورجان گعدت يمي تباوعلي شسوي
أخذت علاجي وشربت مَي انتبهت إلها ايدها على خـدها وصافنة بوجهي لوحت بأيدي گدام وجها
- هنا شبيج وين صفنتي
نورجان :- كلما يحجون بالصار وياج وتنعاد عليَّ السالفة أخاف أكثر من قبل
حجتها واختنگت نزلت راسها تفرك بأيدها
- شبيج نورجان
رفعت راسها عيونها مغورگة :- بان انتِ كارهتني مو ؟
- شنو هالحجي الماصخ هذا ليش حتى أكرهج
- لأن جان المفروض اني أكون بمكانج وأتزوج عبد
فزيت گمت على حيلي
صحت بيها :- اشش اششش عابت شلون حجي يقبض الگلب منو جاب طاري صخمان منو الشاكيلج انتِ
- كلما أتخيل الصار وياج وان انتِ ماخذة مكاني أكره روحي ألف مرة شگد توسلت بماما بيومها حتى نرجعلج بس مقبلت من ورى محمد وخافت ليفتن على طلعتنا
شهگت شالت ايدها تمسح طرف خشمها :- وراها جان عبالي ماما أخذتج وطلعتوا مناك للسليمانية وجنت كلما اسألها عنج تتحجج بشي عبالي انتِ وياها محطيت ببالي عمو سالم وعمتي سجودة مزوجينج بمكاني لعبد
جريتها لحضني أهدي بيها
- كافي بجي نورجان فات وكته هالحجي واني مدا ألومج لا انتِ ولا حتى ماما عالصار والله
- يعني عود ليش هيج يسوون بينا شنو سوينالهم احنا بشنو أذيناهم حتى بعيدين عنهم سنين ولا وصلناهم شنو استفادوا من زوجوج إله
- كُلشي محسوب حسابه لا ببالهم ثار ولا غيره جانوا ديضحكون علينا بهالحجي بس بسيطة وربج ضامتلهم ضمة لعمج وهاي عمتج البربوقة إلا تكسرهم تكسير
رفعت راسها باوعتلي :- شلون يعني شراح تسوين
- مو وكته هالحجي حتعرفين من يجي وكتها
مديتلها ايدي أگومها :- امشي غسلي وجهج يلا
راحت للحمام وگفت يم الشباك عيني صارت عالباب مال شارع اكو سيارة واگفة بالباب مبينة من جوة
رجعت نورجان سألتها :- سيارة منو هاي برة
- سألت ماما گالت عمو فدار وگفها من البارحة خاف ليصير شي لو واحد يتعرضلنا للبيت بغيابهم
ضلينا على هالحال للظهر واحنا على أعصابنا محد بيهم ديرد على إتصالاتنا وأمه موتت نفسها من البجي عليه
الساعة ثنتين الظهر انفتح الباب مال شارع وفات مُتيم لازم خاله سانده ويحجي وياه ساكت وجهه ميتفسر
دخلوا الصالة وراهم أخو مآب يمشي تلگتهم مرته
عين تباوع للوجوه وعين عالباب
فرحة :- هاااه وينو .. وليدي مآب وييين عش ما جبتو
لزمها ابنها يهديها من رد فعلهم عرفنا بعدهم ملاگينه
صرخت :- كلو مننننننك انتَ طيييرت الولد وجبتو وراك لبغداد مليت راسو بشغلك كاتتتتلك هالشغل گتلك ردو لهييين للغربية بين أهلو وجدام عيني ما ردييييت كلوو منك يفدددددار راح وليدي حسبي الله علييييك
صاحوا بيها الولد وهي تصيح وتدعي عليه
- جعلك بمچانو شذنبو ولد بعز شبابو تايروح من ايدي من وراك ومن ورى شغلك والله لو صار على وليدي شي أحط چيلة براسسسك وأموتنك ما يردني شي عنك
صاح عليها مُتيم :- دجوزي عادددد وكتو هالحجي شجاي تشوفين بيا حال هو وانتِ تلگيتيه عتدعين
ضلوا يحجون عليها وابنها وعمتهم يمها لازميها وهي تبجي مُتيم أخذ خاله گعده عالتخم جان ساكت ما رد على كلامها مبين تعبان حيل وجهه مغيم
مؤتمن :- مرة أبوي بلا أمر عليج جهزيلو الحمام وملابس تايفوت يغير ملابسو ويمددلو ساعة صارلو من البارحة على وگفتو هاي
- صار من عيوني
مشت ماما بسرعة لغرفتهم صارت عيني عليه واگف الحواجب متطابگة لابس شفقة عينه بتليفونه
رفع عينه بأتجاهنا اني ونورجان بدون ليشيل راسه حسيت عيونه عليَّ بللت شفايفي ودنگت بسرعة
شحيت بنظري عنه أباوعلهم بس فضولي مخلاني رجعت باوعتله بعده على وضعه تأكدت ديباوعلي اني
من صارت عيني بعينه رجع نزلها عالموبايل
همستلي :- تدرين أول مرة أشوفه هالشكل
انداريتلها بسرعة :- ها منو ؟
- عمو فدار شبيج
باوعتله گاعد مرجع ظهره عالتخم ايده على عيونه مغطي وجهه وگف يمه مُتيم خلى ايده على چتف خاله
طبطب عليه :- گول يا الله خالي وربك ينلگي
شال ايده وباوعله تنهد تنهيدة طويلة وگام وگف لحيله
فدار :- ردلهم تيم لا تخليهم لوحدهم
- سلام هناك لا يضل بالك
- ميخالف انتَ أحسن شباب طايشة تريدلها چبير يگف على راسهم يوجهم لتخليهم يتصرفون شي من شورهم أنا بس أنام هالساعة وأجي وراكم من البارحة من الدوام ما مغمض عيني
- هذا هو يجرالك ارتاح انتَ وأنا ماخذ مؤتمن ورايح
راح فات للغرفة والأگرع وابن خاله واگفين يحجون ويَّ عمتهم وام مآب يسألنهم عالصار وشسووا
انتبهت لمُتيم أشر لعمته بحركة بوجهه بأتجاه المطبخ
راح هو قبلها وهي شوي وراحت وراه نورجان على وگفتها تباوع لأم مآب وهي متربعة بالگاع تنوح وابنها يمها گاعد ركبة ونص ويحجي وياها يريدها تسكت
مؤتمن :- ما گالوها هيج يا يمة ما عتشوفين حالنا شلون صاير ما تشوفين حال أبوي شلون تعبان ومتكدر
- اشتعلت روحو لأبوووك اهو منو الوصلنا لهالحال غير أبوك وعمايلو وطلعاتو العوجة سكتت وسكتت لحد ما أكلت تبن وهالراح أخيك من ايدي من وراه
- صدك چذب يمة شلون حجي هذا وهو شعليه حتى گعدتو لمآب ببغداد مالو أيد بيها ابنج الحط راسو إلا يجي لهين لا تلومين أبوي
دفعته عنها :- دگوم مني گووم ابن أبوك شترجى منك لا بارك الله بيكم من خلفة گشرة ما ينطلع بيكم بس بسواد الوجه
گام :- رحم الله والديج مقبولة منج
ضاج حيل من حجيها اندار علينا متنك شافنا واگفات بالباب نباوعلهم انطانا نظرة خلستنا اثنينا نتر بينا
مؤتمن :- شعدجن واگفات هين
تطافرنا بسرعة جوة
طبينا للغرفة وسدينا الباب گعدت هي عالجرباية وسحبت تليفون ماما تگلب بيه واني أروح وأجي بمكاني
باوعت عليها مندمجة ولا يمي رجعت للباب فتحته وطلعت أباوع محد موجود لا ابن فدار ولا أمه
تسحبت على أطراف أصابعي للمطبخ أسمع صوتهم
عقدت حاجبي هذول بعدهم واگفين هنا
تقربت من الباب وگفت ورى الحايط يحجون بصوت ناصي كلمة توصلني وكلمة لا مديت راسي أكثر
أسمعها تگله :- أحلفك بداعة بنيتك مآب ما بيه شي
- والله ما ندري يا يمة ما سمعنا عنو خبر ما ضلت مستشفى ما سألنا بيها عليه
- عجل شبلاها وجوهكم ما تسر من ساعة الأجيتو لهين
- بيني وبينج الحجي ما ردت حرمة خالي تسمعنا
- خير ان شاء الله گول
- شاكين بهذا نسيبها لحرمة خالي الثانية جائز إلو ايد بالسالفة لأن گبلها بفترة زاتلو طلقة على بيت خالي وعيهدد بالتليفونات
- دخيلك ربي وشيريد هذا المصگوع شجابو عليكم
- شلون حرمتو شاردة وخاشينها عدنا من هيج
- شيريد من هالجاهل هاي شو بنتو وأخذها
- صار شگد أطورد وراه فر راسي فر بالله الكريم أخابرو يرد يصيح ويهدد أروح لعمه يگول ما أدري بيه وين أوگع على مچانو ثاني يوم ألگاه مغيرو گبل لا أوصلو
- وشراح تسوون
- من الظهر خالي أخذلو دوريتين وراح لبيت هذا عمو شاكر سحبوه للتوقيف يستجوبوه ولو ما ظنتي راح يحجي شي هذا ملعب بعد أكثر من عبد هسع ياخذلو چم ساعة بالمركز ويطلعوه ولا چن صاير شي
- ديلا بالله خاف الدور يرد عليكم
- لا شيرد علينا خالي مهددهم إن ما حجوا شي بالمركز يلم الولد ويروح لبيتو
- هي هاي سالفة بالله البيت بيه حريم بيه عوائل خالك هم مدري شلونها طلعاتو
- لا على كيفج يعجبج خالي شمرلو هالحجايتين گبل لا تصير صدك ويسويها يعني عندهم علم لوما حجوا ودلونا بمكان عبد نسويها وياهم عشاير تلگيهم هساع مفرغين البيت گبل بوكت هي جرة إذن مثل ميگولون
- انتَ هم دير بالك على روحك وعلى اخوتك هاي ناس ما عندها مخافة الله
- أفا عليج خط أحمر انا منو اليگرب
واني على وضعي مادة راسي أسمعلهم ما أحس إلا طالع من المطبخ وصار بوجهي فزيت بمكاني عدلت وگفتي
عگد حاجبه :- هاي جنتي تتسمعين ولج ؟
اجت المرة على صوته وگفت تباوعلي وجهي صخن
هزيت راسي :- لا
- عجل شموگفج هين
ضليت ساكتة هو عرفني من نظراته إلي مو مال أكذّب
گال بنفاذ صبر
- اسمعي يولي هالحجي ماريدو يطلع هساع والله لو سمعت أحد غيرجن يدري بالسالفة انتِ تصيرين حصتي سمعتي ؟
ضليت على سكوتي
نتر بوجهي :- سوادين أحاجيج
- اي افتهمنا
شيخة :- لا هيج يمة على كيفك خالك تعبان ما صار شي روح انتَ بعد توكل لدربك احنا هين موجودين شيصير وياكم خابرنا
- عينج على هاي النسرة يمة لتخليها تذب الحجي يم حرمة خالي
مشى عني وهو خازرني وعمته تحجي عليه وتجر بيه راحوا اثنينهم للصالة مشيت وراهم أخذ ابن خاله وطلع
لزمتني عمته على جهة تحاجيني بصوت ناصي
گالت :- سمعتي الحجي يعمة مو
هزيت راسي بدون لا أحجي تنهدت وطبطبت على كتفي
- تهون يمة تهوون إلا ما تفرج بس أندارلج فدوة لا تجيبين طاري لأحد عالحجي السمعتيه ما بينا حيل للهوسة وهاي أمو دحگيها محترك گلبها اللي تگضبو تاكلو بسنونها بس تسمع تندار عليجن
- لا مراح أحجي
- اي عفية مبينة خوش بنية تسمعين الحجاية
مشت عني وهي مطمئنة رجعت للغرفة أفكر بكلامهم يعني هم مثلي شاكين بعبد اي ليش منو غيره يسويها
ما مرت أقل الساعتين واندك جرس البيت فاتن اثنين بنات من برة طلعن بنات فدار المتزوجات جايات گعدن گابلن أمهن ماما راحت للغرفة لفدار گلتله نسابتك بالباب
فز من فراشه وطلع استقبلهم ودخلهم للأستقبال
شوي وطلع من الأستقبال صاح :- ام بان وينج
اجته ماما بسرعة
شدن :- ها
- چايج بساع
- بعيني
شاف بناته گامن عليه يسلمن لمهن لحضنه باس راسهن
وحدة منهن سألته :- ما لگيتوه لهساع ؟
- لحد الآن ماكو شي بس ما يدوم هالحال اخوتو طاشين والشرطة هم عتدور عليه لا تبجين بابا ينلگي
مسحت دموعها :- يا رب الله يسمع منك
- لا تضلن تولولن هالشكل اگضبي امج هديها يلا أبوية
طيب خاطرهن ورجع لخطاره اللي يشوفه هسه ويسمعه ولا يگول نفسه قبل شوي بذاك حاله
ما طولوا نسابته شوي وفات لغرفته غير ملابسه وطلع وياهم بسياراتهم وضل البيت بس احنا ونسوانهم
ضلوا اليوم كله كل شوي واحد من الولد يتناوب عالبيت يتفقدنا ونگعد نلزمه نسمع منه شصار وياهم
اني روحي صارت بعمتهم هذاك الأگرع ميضم عليها شي كلما يخابر تليفونها أطفر وراها أتسمعلهم وهي حست عليَّ عرفتني گمت أحوس صارت تحجي گدامي
فدار محزم الولد يريد يروح لبيت عم عبد حتى يرميهم بس نسابته السادة ممخلينه لازمه السيد چبيرهم
گايله :- الشرطة والجيش محاوطينكم أقل تصرف منكم تدخلون بيه السلاح مو بصالحكم خلوا كلشي يمشي بالمركز أحسن لسلامة ولدكم
عاد فدار ما قصر بشاكر شاتله شتلة عنده بالتوقيف وشامره بالسجن وما مقصر بيه ما مخليهم يطلعوه
لليل اجتنا ماما للغرفة
شدن :- ماما لو تگومن تصعدن بالغرفة الفوك هاي خليها للخطار ينامون بيها زحمة أگلهم يصعدون
أخذنا حاجاتنا وصعدنا اني ونورجان للغرفة القديمة الجنا ننام بيها أول مگعدنا ببيت فدار منزلين واحد من الأسّرة للغرفة الجوة وباقي سرير واحد أبو نفر
باوعتلها :- تنامين بالگاع ؟
هزت راسها فرشنا فراشنا بالگاع ومددنا اثنينا
غمضت عيوني بتعب راسي صاير شثگلة اليوم كله قلق وتفكير وآخذ هذا العلاج يسطرني سطر أنام يلا أرتاح
رغم الوقت تأخر بس البيت ما هدأ أسمع أصوات من جوة ناس تروح وناس تجي ونقاشات وسوالف متخلص
وين يلا ماما فاتت للغرفة وسدت الباب باوعت لفراشنا
شافتني :- هاي بعدج گاعدة
- شگد تعبانة وراسي مأذيني بس مدا أگدر أنام
- علاگتج مال علاج وين دا أنطيج حبوب تريحين عليها
- ما أدري عفتها جوة يمكن
رادت تنزل مخليتها جانت سابحة ولابسة تراك شعرها مبلل والجو بارد مو مال تنزل كل شوي گعدت تنشف بيه
انتبهت لنومتنا :- ليش أمي فارشات بالگاع
- أحسن ديصيرلنا مجال ننام سوية السرير ميكفينا
- مرتاحات ؟
- اي شوفيها غطت بنومتها
مشطت شعرها وطفت الأضوية عافت واحد أصفر خفيف مشتغل ومددت عالجرباية حتى تنام
سألتها :- شو مرجعتي لغرفتج حتنامين هنا ؟
- اي ليش
- لا بس استغربت
- أول مرة شنو
عيني ضلت عليها تتگلب كل شوي وتصفّن بالسگف
گامت حولت من مكانها واجت يمنا نامت بالگاع
- ماما بيج شي
- شبية
- شو دا أحسج ضايجة
- ماكو شي حبيبتي بالي وياهم ويم هذا الولد خطية
- عمو فدار هنا ؟
- اجوا قبل شوي هو وابنه ورجعوا طلعوا ضلوا ولدهم لازمين الباب ويمهم دورية معايفينا نامي وانتِ مرتاحة لتخافين
جرتني لصدرها حضنتها حيل ونمنا ليلتها ..
استمر هالحال تلث أيام بيتهم مخبوص وهم مخبوصين دورية رايحة ودورية جاية وخطارهم ما كف من البيت
ماما وگعت بيها أكلهم شربهم واني ونورجان وياها نعاون عالخفيف، عمة مُتيم من اجن بنات فدار يم أمهن خلتهم يرجعوها ثاني يوم للغربية ما ضلت هواي
جنا بفرحة وحدة صرنا باثنين وحدة من بناتها (الكبيرة) جانت تشمر حجي لماما من جوة لجوة واختها اللخ تسكت بيها وماما هم سكتت عنها مجان إلها خلگها
خافت لا احنا نتلاغى وياهن وتصير مشكلة بيناتنا واحنا بوضع ميسمح خاصة خالهم والولد كلهم أعصاب
فدار مجان ينام بالبيت يجيله ساعة ساعتين بالنهار يبدل ملابسه ويرجع يطلع مُتيم وشُبير بعد مشفتهم
باليوم الرابع دنيا نص الليل فاتت ماما بيدها بطل مَي
- بان أخذتي علاجج ؟
- هسه آخذه
- ليش هيج مهملة يا ماما ميصير هالشكل إلتزمي بأدويتج أكلج هم صاير مدري شلونه
گعدت عالجرباية طلعتلي الحبوب وفتحتلي البطل أخذته منها بلعتهم وشربت فاتت نورجان گوة مفتحة
نورجان :- لزموني المخدة راح اوگع
- سودة عليَّ تعبتي يماما مو گتلج عوفي اني أكمل
- وأعوفج تشتغلين لوحدج ؟ مكافي صار كم يوم تفترين وگايمة بيهم كلهم ميصير هيج
شهربان :- شو دا أحسه بسمار ترى اني مو زينة بشغل المطبخ ما معتوب عليَّ
ضحكت ومددت بفراشها على بطنها تباوعلنا
- معليج اني ماخذة مكاني ومكانج بالشغل
نزلت من الچرباية مددت يمها ندستها ببطنها ضحكت
جريت نفس وسكتت باوعت لماما تباوعلنا بشرود
گتلها :- ماكو خبر عنه مو
- ماكو مخلوا لا مستشفيات لا مركز يعتب عليهم حتى بالطب العدلي راحوا يدورون فدار يريد يتخبل وگوة لازمينه لام الولد يريد يهد على بيت شاكر
- يعني هو متأكد عبد ورى الموضوع ؟
- طبعًا يشكون بيه هالگد منو غيره ديدز تهديدات ولا مرة ولا مرتين گالوا يجوز عنده عداوة منا لو منا مآب رتبة وأبوه هم رتبة بالدولة المثلهم عداواتهم متخلص
- بس حيبقى عبد بالوجه مدام شامر تهديد للبيت
- مندري دتشوفين كلها مراقبة تليفوناتها عسى ولعل واحد يتصل هسه مخطوف ورايدين فدية آمنت بالله ليش هالشكل ماكو لا حس ولا خبر خوفج لو يطلع بيه شي وكلام الله فدار يشعل عبد وأهله حتى لو مالهم ايد
- كاميرات ماكو بالشارع يراقبون طلعته ودخلته للشقة
- أكو بس گالوا بعيدة عالعمارة الساكن بيها شايفيها الولد ممبين شي
- والله حيرة أمه حتنجلط عليه
- ليش هينة هي يماما ابنها متعرف عنه شي صار كم يوم الله يساعد گلبها ما أگول غيرها
- هي كل شوي ذابتلها حجاية عليج وانتِ مقهورة عليها
- لأن ضايگة لوعتها
طفينا الأضوية وظلمت الغرفة كلمن نامت بفراشها
صفنت بالظلمة ما سديت عيوني ضلت حجاية ماما تدور براسي خليت ايدي على حلگي أكتم شهگتي
نزلت دموعي صار وجه ريحانة گدامي هاي صار عمرها فوك الشهرين واني مو يمها ولا شايفتها شلون دتكبر
جان صدري يدر حليب بأول أيام وراها انقطع لوحده لأن مرضعتها ولا مرة جان يصير عندي ألم خفيف وقتها
شكلها ؟ لون عيونها علينا لو على أبوها ؟ منو دا يدير باله عليها وبحضن منو دتكبر، منو الماخذ مكاني
ضلت شوفتها حسرة بگلبي ..
على نومتي وفزيت بنص الليل ماما ونورجان على نومتهن گعدت أفرك براسي گمت لعلاگة العلاج وگفت يم الشباك اكو ضوة قليل يوصلني طلعت حباية أخذتها
الغرفة جانت ظلمة تقربت من الشباك وعقدت حاجبي
وخرت البردة أباوع زلم تارسين الحديقة وباب الشارع
الحديقة ظلمة بيدهم فلاشات گدرت أميز منهم بس شبير جان أطولهم بس مدا أگدر اشوف أشكالهم
واگف لازم واحد مربطه بالگاع مشدودة عيونه وسادين حلگه وواگفين يم راسه يحجون بيناتهم
بهاللحظة انفتح الباب مال شارع وفاتوا اثنين لابسين دشاديش وغتر متنگبين بيهن سلاحهم على متونهم
مشوا وصلوا يمهم واحد منهم دنك للگاع ولزم الولد المربطينه من شعره ورفعه خلاه گباله وجه بوجه
جر الوصلة من حلگه أشوف شفايفه صارت تتحرك
شو هذا گام وجر سلاحه گلبه وبسرعة رفعه وانطى للولد ضربة بنص وجهه بطرف السلاح خربط معانيه
داخ وگع للگاع صار يگح اختلست من منظر الدم
وگف المحزّم لحيله رجع سلاحه لمتنه نزل الغترة عن وجهه وطلعله جگارة بيده جداحة يريد يورثها
واحد منهم رفع الفلاش خلاه بوجه المحزّم يحجي وياهم وجگارته بحلگه فتحت عيوني على وسعها
هذا مُتيم! ..
سديت البردة بسرعة گلبي يدك
أباوع لأيدي لازمتني الرجفة مدري من البرد لو الهبطة
رجعت لفراشي جريت الغطة غمضت عيوني
هذا الأگول عليه مسالم شلون معرفته ؟
ضل ببالي منو هذا المربطينه وهيج مسوين بحاله
صبّح الصبح گعدنا بالمطبخ دنتريك وماما تحاجيني
شدن :- ماعونج على مكانه
- ما أشتهي ماما مسدودة نفسي
- لخاطري بس شوية حتى لو لگمتين
وهي تحاجيني فاتت بنت فدار للمطبخ وگفت عالطباخ تسوي چاي سمعتها اندارت علينا مكشرة الوجه
گالت :- احنا بيا حال وانتن جاعدات تتشهن وتاكلن منو الألو نفس يا برود گلوبجن
- عندي بنية مريضة عندها علاج شلون يعني أموتهن من الجوع ؟
- يول حگج أكل بلاش وبيت مدفاية بيه انتِ وبزرتج موش انتِ المحروك گلبج همج ولد همج طرگاعة
اندارتلها ماما :- تشوفيني مسويتلهن المفطح يعني؟ كلها خلك بيضتين اثنينهن بيها ومخلصنها إسلوب المعاير هذا بطليه الحمدلله ما ميتات من الجوع
- أعاير يوم الأدحك الجدامي فارغ عين وما همو أحد غير خيسة بطنو جان استحيتي عاد من أبوي
- استغفر الله هديل البية كافيني ماريد أتلاغى وياج خلصي شغلج البيدج وتوكلي
- والله عمي خوش البيت بيت ابونا والگوم حاربونا من تالي تجي المثلج تزت حجي عليَّ انا ؟ يول دحگي عدل احنا وين وانتن وين لا تطيرن زايد تاما ينگصلجن جناح
باوعت لماما لزمت راسها وهذيج بعدها تذب حجي
دا أگوم فزت ماما جرتني من ايدي گعدتني
خزرتني :- انتِ اگعدي معليج
- مدتشوفيها ؟
- لخاطري والله ما بية حيل للمشاكل خليها تلغي لوحدها وتسكت
گعدت واني أجر النفس بحرگة وأباوعلها أريد آكلها
مندارة منطيتنا ظهرها واگفة عالكاونتر وتحضر بأستكاين الچاي ولسانها يذب ولا سكتت
هي تحجي وماما ساكتة فار دمي متحملت أبقى گاعدة
گمت منهن ودا أريد أطلع من المطبخ
گالت :- الدور يتگلبن وهن الما عاجبهن البرابيك
انداريت عليها اجت عيني على قوري الچاي عالطباخ من حرگة گلبي مشيت للقوري جريته وشمرته عليها
گمزت بفزغ تصرخ لازمة ايدها مسلوخة وماما ونورجان فزن من مكانهن اجن امها واختها يتراكضن من جوة
ماما اجتني تدفع بية تريد تطلعني من المطبخ
صاحت :- امشششي اطلعي .. روحي للغرفة وسدي الباب .. دا أگلج امششششي تعاي اخذييييها نورجان
سحبتني نورجان من ايدي وأخذتني للغرفة مال ماما
گعدت عالجرباية صوت صريخهن يوصلنا وخرت شعري ورى اذني رفعت راسي صارت بوجهي نورجان خايفة
نترت بيها :- شبيج هيج تباوعين
- ليش حرگتيها
- يعني مسمعتيها شگالت ؟ احنا البرابيك مو ؟ طبها مرض خليها تحترك تستاهل
اجت گعدت يمي
- هسه يرجعون يصيحون عليج وماما حتصير بالوجه
- زلمتهم اللي يطلع ويلومني حتى أزين شاربه بالقندرة
أثناء مدا أحجي فاتت ماما عصبية سامعتني
شدن :- لا عفييييية عليج سباعية انتِ وين أكو منج
صرت بوجها رفعت أصبعي
- لتلوميني زين لو لا
- واني مو گتلج عوفيييييييها تحجي لوحدها ؟؟ مو گلت انتن لتتلاغن وياهن اني أعررررف شلون أردهن؟ ليييييش تتعمدين تأذيني بان وتخليني علج بحلوگهم
- ماما دتگول عليييييج بربوك تعرفييييين شنو يعني بربوك لو لا تسمعين معايرهن تخلصيها علييينا اسكتن تسمعيهن يفشرن اسكتن يغلطن اسكتن كله اششش اششششش ليمتى ماما ليمتى جززعت روحي
- يا بششششششر يجي أبوها وأگوله على سوالفها انتِ شنو حتى تتصرفين من راسسسسج ولجج تحرگييييها بالله اجه على وجها وتشوهت البنية منو الراح ينلام اني لو انتِ مو راح يگولون هي الممربيتهن
- طبهم وجع شيردون يگولون آخر همي بناتهم يتجاوزن ويفشرن علينا ولازم نسكت وإذا ردينا عليهن نطلع احنا الممتربيات واحنا المو آدميات بس هن المبجلات اللي ميغلطن دخلي يجي واحد ويشمرله حجاية علينا حتى أحط رجلي بحلگه وخلي يگولون عود ممتربية
- راح تخبليني بان راح تخبليييييني
- شتردين تسوين سوي صرخي عليَّ اضربي رزلي بس لتگوليلي تجاوزي الحجي والغلط اللي ديسمعوه إلنا احنا بشششر ماما مو أصنام حتى نسمع ونعبّر ولا كأن شي صاير اللي تجيبنا بكلمة أردها بعشررة مخايفة منهم وخليهم عود يگولون عني ممتربية .. راضية
- تعبتيني وكلام الله
دارت وجها مني بيأس لزمت راسها تفرك بيه بدوخة
نورجان :- يعني هي احترگت حتموت ؟
اندارت عليها :- شتموت انتِ الثانية ايدها انحرگت هسه خابرن أخوهن حيجي ياخذهن للطبيب يشوفوها
باوعتلي جرت نفس طويل
- ضلن هنا لحد تطلع
گتلها :- هي هاي العايزة ننحبس بالغرفة
- بان ويييييامن دا أحجي ؟
سكتت عنها ودرت وجهي عافتنا وطلعت من الغرفة
گعدت عالچرباية أهز برجلي بأعصاب تالفة
بان اسكتي .. بان معليج .. بان لتحجين
- بان اهدأي شبيج
باوعتلها :- شأهدأ نورجان دنتعير بالأكل والشرب والنومة هن بنات الخير واحنا جايات من بيت رعيان مال غنم فوك المعاير حجي يدوس بالبطن وأمج تگولي اسكتي
- ماما متعودة ترى مو بس هنا حتى هناك خوات شُبير ميحبني ودوم جانن يسمعني حجي إلي ولماما
- وشجابرنا على هيج عيشة ؟ عتبي مو على مرة فدار ولا بناتها متوقعة هالحجي منهن بس أعتب على ماما الأخذت واحد متزوج وعنده عائلة شجانت متوقعة يعني من صارت زوجة ثانية ونزلت على شرچ ؟
- بس عمو فدار هو اللي رادها وهي هم انحطت بموقف خلاها تنجبر توافق عليه
- أهوووو بالله متسكتين يمعودة انجبرت وانجبررت عبالك خلصت حلول الدنيا ماكو طريقة غير زواجها من فدار لا أكو مراكز وتروح تبلغ لا أكو محاكم
- بان ليش نكذب على روحنا المثل عمو سالم وعمتي سجودة مو بشر طبيعين هذول مجرمين كم مرة بمرة حاولنا نشرد ولزمونا كم مرة عزلت ماما بينا حتى نعيش لوحدنا ومخلونا بحالنا احنا مو گدهم
بعدين عمو فدار يحبها وبكل مشكلة جانت تصير ويانا بتليفون واحد يجي يركض لخاطرنا هو والولد لو عمو تيم اللي عاف الغربية وشغله وأهله واجى لبغداد حتى يدور عليج بان ترى احنا المحتاجيهم مو هم محتاجينا
- ههه يحبها الحب وحده مو كافي أكو شغلات أهم المفروض نركز عليها ماما خلك بديل بحياة فدار لا أكثر هاج شوفة عينج أول ما انجمعن بمكان واحد صارت فرحة أم البيت وهي أم ولده وبناته وهي الأولى بحياته
من يردون يحجون بمرة فدار حيگولون أم مؤتمن ميگولون شدن گدام عينج دتشوفين شلون تركضلهم ليل نهار حتى تخدمهم وهن گاعدات مستراحات فوگاها يشمرن حجي شفتي واحد بيهم طلع وردهن ؟
- عمو فدار مو هنا ميعرف باللي ديصير ولو يدري بحجي بناته ومرته جان هو تدخل وسكتهن صدگيني بان عمو يحب ماما اني عشت وياهم أكثر منج وشفت بعيني شلون يعاملها فنها لو تحركت حتى عاملة مخليلهن هناك حتى لتصير مشاكل عالشغل
- العاملة مخليها لمرته الأولى مو لأمج هنا أمنا الخدامة هذا مقامها عنده للخدمة والفراش
- دتظلمينه والله ليش هالگد تضوجين منه
- مضايجة منه هو ضايجة من زواجهم اللي غلط بغلط لو غير واحد جان سكتت وانچبيت بس ماخذتلها واحد متزوج لجج شناقصها ؟ أمووت أحترك بدمي بكل مرة أسمعهن يذبن حجاية عليها شگلك بواگة الزلم ماما متستاهل هيج عيشة مو هذا مقامها نورجان افتهميني
سكتت عني جابت علاگة العلاج وبطل مَي واجتني
- تماما اهدأي هسه واخذي علاجج تلفت أعصابج
باوعتلها شوي وهي ملتهية تطلع بالحبوب
سحبت العلاگة من ايدها
- هو اني ويامن دا أحجي انتِ أصلًا صايرة نسخة مصغرة من شدن بكُلشي قابلة
مدنگة دا آخذ علاجي سمعت صوت شهگاتها
رفعت راسي بسرعة دموعها عشرة عشررة وتباوعلي
نورجان :- ذاك اليوم گتيلي حجاية گلتي اني ما ألومج ولا ألوم ماما عالصار وياي بس انتِ بكل حجاية وبكل كلمة دتلومينا عبالك احنا الأختارينا هالعيشة هاي
وتردين الصدك ؟ اني عندي أضل هنا وأسمع حجيهن علينا وأغلس ولا أروح لعمو سالم وعمتي سجودة حتى يبيعوني لواحد مثل ما باعوج لبيت شاكر وباعوا هبة
عافتني ومشت للجهة الثانية من الچرباية تبجي
جريت نفس طويل وضليت ساكتة ما گمت وراها
گعدت للگاع ظهري عالچرباية صوت بچيتها ترن بأذني
لحظات ولگيت راسها بحضني مديت ايدي لشعرها مثل لون الذهب عيونها وخشمها حمر من البجي
- مالي غيرجن بالدنيا بان لتدورين وجهج عني
- آسفة
باوعتلي :- مزعلانة منج
- تعرفيني من تنهار أعصابي أگوم أشمّر حجي بلا وعي
- أدري لهيج اني ما آخذ بكلامج ولا أزعل منج
ضلينا على وضعنا لفترة لحد ما انفتح الباب دخلت ماما
گمت من مكاني
- الحمدلله خلص الحجر
مشيت للباب صاحت وراي
- تعاي دا أحاجيج
كملت مشي وطلعت من الغرفة وهي وراي
صاحت :- بان ويامن أحجي انداريلي
انداريت بنفاذ صبر :- نعم ؟
- انتِ ليش صايرة متحترمين
- تردين تحبسينا بالغرفة ليمتى يعني ترى مخايفة من أحد ماما خليهن يجن هياني گاعدتلهن
درت وجهي وصعدت للغرفة الفوك البيت جان فارغ
اجت وراي نورجان شافتني أحوس بالغرفة
گالت :- عليمن تدورين ؟
- على موبايل ماما
- هياته عندي
طلعته من جيبها أخذته منها ومشيت گعدت على طرف الچرباية فتحت الفيس وصرت أدور بالمحادثات
لگيت صبا رادة على مسجاتي راسلتها بسرعة شفتها متصل ردت عليَّ وضلينا نسولف بالعشر دقايق
سديت التليفون وجريت نفس براحة
سألتني بفضول :- منو هاي ؟
- بنت حماتها لعمة أمجاد مو گتلج گعدت فترة عندهم بالبيت ؟
هزت راسها :- اي وشعجب هسه ذكرتج
- اني راسلتها بيوم الرحتلهم جانت وياي جنطة جايبتها وياي من جنت يم عبد ومن يوم ولادتي الجنطة ضايعة ما أدري بيها وين راسلت نسمة قبلها گالت مو عندي وراسلت صبا لأن آخر مرة جنت عندهم والجنطة وياي
- ولگيتيها ؟
- اي عندهم ضاميها بس محتاجة أحد ياخذني لبيتهم دا أجيبها
سكتت شوي وسألتها :- شُبير هم مخابرج شوكت يجي
- لا مشايفته صار يومين
ضليت بحيرة من أمري طول اليوم
جاي فدار وعرف بالسالفة وصارت هوسة جوة أسمع صوتهم بس ما أفهم شيحجون طلعت وگفت عالدرج
أسمع صوت مرته جان عالي وهو يردها وماما يا دوب أسمع صوتها بينهم لحد مصاح صيحة رجت البيت
خرسهم كلهم صار هدوء فضيع وراها ومسمعت صوت
رجعت للغرفة دخلت نورجان تطگطك
- ها
اجت گعدت يمي :- عززة بان لو تشوفينه شلون صاح بيهن متت من الخوف اجيت أركض
- غير أفتهم شصار
- جاي هو تعبان وروحه صايرة بخشمه وهن استقبلنه بالصياح وبنته تبجي ومرته تترادد ويَّ ماما
- وأكيد أمج وگفت تبرر أعذروها ترى بنتي مريضة
- لا بالعكس وگفت تدافعلج گلتله لوما بان حارگتها جان اني گمت خليت كتلي الچاي براسها عالحجي الحاجيته علينا والتجاوز عمو مرضى على بنته ومرته تخبلت گامت تصيح فاررة راسك البغدادية لحد مصاح بيهن
- هم حجه على ماما ؟
- لا هي رزالة جماعية حتى مؤتمن جان گاعد صاح بيه
من هدأ جو البيت شوي نزلنا جوة جان البيت هدوء لأن فدار هنا محد يطلع صوت مرته وبناته بالغرفة
مريت من غرفتهم الباب جان مفتوح شوي گاعدة ماما عالچرباية وهو راسه بحضنها مغمض عيونه تدلكله
طلعت برة ونورجان تمشي وراي
صار بوجهنا ابن فدار الكبير گاعد على المرجوحة بيده موبايله رفع راسه شافنا عقد حواجبه صاح علينا
مؤتمن :- هين يولي وين طالعات
- شُبير موجود ؟
- شتردين بيه
- محتاجته بشغلة
أشرلنا :- لا ويلا جدامي جوة
سحبتني نورجان من ايدي وتأشرلي حتى ندخل
همستلها :- دصبري شبيج
شفته رجع دنك على موبايله مشيت للباب فتحته
دا أطلع صار بوجهي شاب ظهره عليّ من سمع صوت الباب انفتح اندار بنص إلتفاته فتح عيونه من شافنا
علي خيبر :- ها حدج يولي وين طالعة والباب متروس زلام
حجاها ودفعني من كتفي دخلني وفات سد الباب
باوعلنا اني ونورجان مستغرب
گال :- شعدجن طالعات
انتبهلنا مؤتمن وگام علينا عيونه صايرة براسه
نتر :- انا شحجيت ولجن ؟
- انتَ معليك
لزمني من ياخة ملابسي حيل عتني عت بيده
- ياهو المعليه ولجج انا تگليلي معليييييك ؟
لزمه الولد يوخره عني
- لا هيج عمي منا الناس
فكني من ايده گال :- اخذيها وروحي جوة نورجان
وخرت منهم عدلت ملابسي بنرفزة وهذا يخوزر
- لا تخزر ترى متخوف چلبي
مؤتمن :- شو ناوشنياها تا أگص هاللسان هذا المهتر
- هذن خواتك تروح تگص لسانهن احنا لتدّخل بينا
- غصبًا ما على راسسسج تاشوف بالله انتِ بنت أمج وأبوج اطلعي هساع جدامي
- مالك حق بابا مالك حححق تدّخل صياحك هذا ومرجلتك روح طبقهن براس بناتكم مو علينا
تخبل راد بس يلوحني من ورى الولد بسرعة تلاحگنا
گله :- عمي صوت سيارات برة
فتح الباب شوي يشوف ورجع اندار علينا خازرني
- علي فوت انده لأبوي گلو جماعتك وصلو
أشرله :- وهاي خليها تفوت تاما أطلع بروحها هين وأحسسسب الله ما خلقها ثقي بالله ولجج لو دحگتج واصلة للگراج أگضبج هين أعلگج من كراعينج بالباب وأسويج فررجة لأمة محمد
جرتني نورجان واني على وگفتي خازرته مشيت عنه
62 تعليق
صاح من وراي :- خفة هالعيون الملص هييين انا إلج
رجعت انداريت عليه لگيت الولد ديمشي ورانا
دفعني عالخفيف ليگدام
- يابا دمشي واتچفي الشرر عش هيج عنودية
مشينا گدامه دخلنا للبيت وگف بالكليدور ما دخل
گال لنورجان تصيح لعمو فدار راحت تركض جوة
وگفت تچتفت أباوعله شاب طويل أبيض عنده لحية خفيفة شعره لونه أسود فاحم بحيث رموشه راسمة عيونه رسم لابس هاينك أسود وبنطرون بيده ساعة
داير وجهه ولا يمي حس عليَّ دا أباوعله
علي خيبر :- هاه شعندج تدحگين
- انتَ ابن مُتيم ؟
عگد حاجبه :- ياهو هذا
- هذا الرجال الأگرع أبو عيون كحيلة
- هاااا وصلتي اي أبوي
- اي مو دا أگول هالعيون عيونه لمُتيم مو غريبة
ابتسم :- شنو يول گالبة خلقة اسمو
من ضحك بينت غمازة بخده الأيسر
اجت نورجان :- يگول خلي يوگفلي هسه حيبدل ويجي
باوعلنا اثنينا ضيك عينه مركز بوجوهنا
- يول ما عرفتها اختج من الشبه بس عرفتها من اللسان
- شعجب اجيت لبغداد
- رادوني هين بشغلة واجيت ويَّ عمي شبير الظهر
- شُبير هنا ؟
- لا طلع هو وأبوي بشغلة تا يگضوها ويردون لهين
تأفأفت بضوجة وچتفت ايديها لصدرها
گلها :- شعندج گولي محتاجة شي
شهربان :- اني محتاجتك بخدمة
- گولي أسمعج
- انتَ تعرف تسوق مو
- اي ؟
- أريدك تاخذني اليوم لبيت أقاربي ناسية جنطتي يمهم بيها حاجاتي
- وكتو هساع ما دحگتي الباب مليان زلام
- اني مبطرانة محتاجتها ضروري بيها مستمسكاتي
درت وجهي أريد أمشي رجع صاح وراي
- تعاي أحاجيج
انداريتله :- نعم ؟
- بس تا تفض الهوسة البرة ويمشون الناس راح أشوفلج سيارة أطبگها للباب بس أرمش إطلعيلي
نورجان :- موبايلي مو عندي يم شُبير
- عجل شلون
باوعتله گتله :- بس دگلي هورن واني أطلعلك
طلع فدار شافنا
گال :- هاه شعدجن هين فوتن جوة بابا لا تطلعن
سد الباب الداخلي وطلعوا اثنينهم من البيت
دخلنا جوة ماما واگفتلنا
شدن :- وين جنتن
- بالحديقة دنشتم هوا لو هم هذا حرام ؟
- متعرفين تحجين حجاية بلا متطولين لسان وياي
درتلها بملل :- جزعت ماما جززعت من خوفج الزايد شنو وييين عايشين بغابة حتى نحبس روحنا منهن ؟
- واني يمتى حابستج گتلج اگعدي بالغرفة لحد متبرد السالفة حارگة ايدها الأماية تلگيها دتتفاور عليج
- دخليها تجرب حظها وأشوفها الأمهات شتجيب
- عشتو شتجيب مايعات انتن بس لسان تلزمج تسويج وصلتين ما أتلاحگلج بطلي هوبزة بالله واستري علينا خلينا گاعدين مالي حمل مصيبة لخ
سندت ايدها عالباب بأيد وأيد لازمة بين عيونها بدوخة
تقربت منها نورجان :- شبيج ماما يوجعج شي
- راسي حينفجر من الصبح ولهسه حروح آخذلي بانادول بلكي أسكّن شوي
- مددي شوي وارتاحي
باوعتلي :- بلا هوسة بان
- استغفر الله يا الله افهتمنا والحُررر افتهمنا مراح أسوي شي ارتاحي
صعدت فوك غيرت ملابسي ولميت شعري وگعدت أنتظر إشارة منه حتى أطلعله عاد لهناك وسمعت الهورن
شلت حذائي ونزلت صارت بوجهي نورجان
صحت :- نونو گولي لماما طالعة ويَّ ابن مُتيم منتأخر ليضل بالها
حجيتها واني مدنگة أشد قيطاني طلعتله للباب
اول مفتحته صار گدامي أبوه منتچي على سيارته منطيني ظهره رافع تليفونه ملتهي يخابر
مديت راسي أباوع يمنى يسرى .. هذا وينه ؟
اندار صرت بوجهه فتح عينه على وسعها انطاني خزرة
وخر التليفون من أذنه
سوالي حركة بوجهه :- فوتي لج
رجعتله الخزرة فتت وطبگت الباب بوجهه كل قوتي
أسنع صوته رجع يسولف بالموبايل مشيت للحديقة گعدت عالمرجوحة روحي صايرة بخشمي
بالله هسه هذا وين راح .. لعد منو دك الهورن
دقايق وفات للبيت وراي شافني بالحديقة اجاني
تيم :- هيج تسدين الباب بوجهي ولج
- شكو دتزمخ بوجهي ؟
- وشعندج مفينة بالشارع متشوفين الباب هوسة
- طلعت أشوف ابنك
عگد حاجبه :- شرايدة منو ؟
گتله ياخذني لبيت حماتها لأمجاد شو هذا گلب عليَّ وصار عصبي ويصيح گمت من مكاني بعصبية
- أگلك احتررم نفسك ولا تصيح
- وقز القرط وصگع لهالصوت صوتج لج صوتتج تاما أور هاللسان المهتر جدامي يلا جووة ماكو طلعة من هين
- مو بكيفك
- عجل بكيف منو يول دحگي عدل صلافتج ورعونيتج الزايدة مو عليَّ انا كل چم يوم طالعتلنا بفاينة شكل ويين تردين بهذا حالج ؟ ما عتشوفين حالنا شلونو وكتت طلعة وخوارة هسساع ؟؟
درت وجهي عفته وطبيت جوة محترك دمي رجعت صعدت للغرفة عيوني تحرگني من گد مفايرة
صرت أروح وأجي بمكاني فاتت شافتني
611 تعليق
نورجان :- ها شو رجعتوا بسرعة
- عود هذا شحاسب روحه فد شخصية حتى هو يگلي شوكت أفوت وشوكت أطلع منو هو حتى يحاسبني
- عززة شبيج شصاير تعاركتي انتِ وعلي ؟
- يا علي انتِ اللخ
گعدت عالچرباية أهز برجلي اجت گعدت يمي
- لعد شبيج
- هذا الأگيرع مخلاني أروح
- عزة عمو تيم شافكم
- مو بكيفه مو من حقه يمنعني لا هو ولا غيره هذاك مؤتمن هم اني إله عبالهم مرجلة من يصيحون ويعلون صوتهم بوجهي بس بسيطة بعيني
انداريتلها :- بعدين هذا علي وينه ؟ زلمتيش هذا وأعتمد عليه هم صوجي أخذت بكلامه
- يلا ميخالف بس يجي شُبير أگله ياخذج وأصلًا صارت دنيا الليل بعد زحمة مو مال ترحيلهم خليها على غير يوم
- نورجان ما عندي بسس اليوم حيسافرون طيارتهم باجر متشوفيني مخبوصة عالروحة منو يجيبها إلي بعد
گالت :- خلي نگول لماما تأجر تكسي وتاخذنا لهناك
- مراح يخليها فدار وإذا مو فدار ابنه موجود وإذا مو ابنه الأگيرع واگفلنا عظم بالبلعوم مدا تفتهمين سستم حياتهم ؟ ما عندهم بنات طابة طالعة هذول مو مثلنا يردونا ننحبس مثل بناتهم وشيحجون نسكت وننچب أموووت وأعرف ماما شلون راضية بهالوضع ما أدري
- ليش ماخذة عنهم هيج فكرة والله هم مو هيج خاصة عمو فدار وعمو تيم من دون الكل مشجعين بناتهم ومنطينهن كامل الحرية بس هالفترة لأن موضوع مآب شاغلهم والوضع متوتر خايفين علينا لتلوميهم
- ولو مو من حقهم هيج يزمخون بوجهي كل واحد أعصابه براسه يجي يذب حرگته بـ بان شطلعت عاد
بالليل كُلش اجتني ماما للغرفة
شدن :- هاي تردين ترحين لبيت سعاد ؟
- اي نورجان گلتلج
- لا شفت المحادثة شبيها هالجنطة ليش تدگين عليها
- مستمسكات
- بس ؟
هزيت راسي وخرت گذلتي لورى أذني
تنهدت گالت :- دگومي إلبسي مُتيم يريدج جوة
- منوو ؟
- يووه قصدي تيم نزول عليج گالبة اسمه للرجال
گمت من مكاني :- بسيطة إذا مرزلته رزالة تسوى عمره اني مو بنت أمي
صاحت وراي :- لجج تعاي بان
هرولت جوة طلعت رجلي حافية والگاع مرمر ثلج
لگيته واگف بالگراج واگف ايديه بجيوب القمصلة
وصلت يمه :- شنو شحاسب روحك حتى تحاجيني بعنترة ؟ شوفة هالحال عليمن شنو تملكون مال قارون گعدنا ببيتكم بس ما اشتريتونا شنتصرف شنلبس وين نروح وين نجي محد إله الحق يتدّخل وهذاك إبن خالك البوخة اني إله مو بنت أمي إن ما زينت شاربه المهتلف
تيم :- زتيتي الحجي من بطنج ارتاحيتي هساع ؟
421 تعليق
- مُتيييم لا تاخذني على گد عقلي ترررى أسودنك والله
- عجل مو أگلج سوادين
- انتوا السوادين وبس تصيحون
- طالعة مفرعة والشارع خبصة سيارات وزلام وطرگاعة وأدحگج بهالمنظر شترديني أسوي؟ غير حاسبج وحدة من بناتنا وصراخي بوجهج من حرصي عليج
- واني من گتلك محتاجة هالطلعة مرايحة حتى أتونس أدري انتوا شگد مضغوطين بسبب سالفة مآب ترى حتى اني خايفة عليه بس لو مو شغلة ضرورية مجان فتحت حلگي گعدت وسكتت
- گالتلي أمج مستمسكاتج عندهم
- بعديش هاي صارت دنيا نص الليل والناس نامت وباجر طايرين لتركيا
درت وجهي ضايجة مچتفة ايدي لصدري
- دمشي إلبسي حذائج تانروح
باوعتله :- وين ؟
- لبيتهم غير
ضليت بس أرمش بعيوني وأباوعله
گال :- يلا يولي بساع لا تخليني أهوّن
ركضت بسرعة للكليدور حذائي بقت فوك صارت گبالي حذاء ماما جريتها من الكيشوانية گعدت ألبسها
خطفت گدامي نورجان طلعت من المطبخ ركض صعدت الدرج بسرعة صحت بوراها ما اندارت جنت مستعجلة
طلعتله أخذني وطلعنا لسيارته شفت علي گاعد بالصدر
صعدت ورى وسديت الباب
گتله :- زلمة كلف
61 تعليق
اندارلي مبتسم
- شبيج لج
- دگيتلي صدرك ومن احتاجيتك سويت وضع الأختفاء
- شعملج طلعت أدورلج سيارة تالي اجى أبوي من طلبت سيارتو نهرني وأخذتلي رزالة منو من حدر راسج
- النوب اني ؟
- لا جدي
صعد السيارة گال :- انكتموا اثنينكم بلا صوت
شغلها ومشت السيارة سألته
- تندل عنوانهم مو ؟
هز راسه بلا ميجاوب لزگت روحي يم الجامة أباوع للشارع صاير ضباب وباردة ثلج الجو مغيم بيها مطرة
وصلنا هناك دا أنزل گال :- اگفي تا أنزل وياج
طبك السيارة على جهة من الرصيف نزلوا اثنينهم
وگفنا يم الباب دك الجرس
علي خيبر :- الساعة وحدة الناس نامت
بعده ديحجي انفتح الباب طلعت أم صبا سلم عليها وحجالها عالجنطة فتحتلي الباب سوتلي مجال
گالت :- فوتي يوم من تالي توگفين مثل الغريبة
باوعلي :- تردين أفوت وياج
- لا ميحتاج
دخلت أمشي وراها تلگتني صبا اجت حضنتني
73 تعليق
صبا :- هيج يا بذاتة بس بالمصلحة تذكريني
- يمعودة زين مني وذكرت الجنطة عقل مضال براسي بس خابصة الدنيا بلا فهم
- شكو شصاير
- هو شنو المصاير صبا أشرد من زوجي وبنتي تنخطف مني وأنشمر ببيت دعارة غير مراجعات الدكاترة البزعت روحي غير التهديدات اللي كل يوم والثاني تنشمر لبيت زوج ماما أكثر من هيج شيصير بعد مو زين وواگفة دا أحاجيج وتذكرت الجنطة والغراض البيها
اجت أمها شايلة جنطتي أخذتها منها فتحتها اتأكد
گالت :- محد فاتحها ضميتها بكنتور صبا من يومها ومحد وصلها بعد
صبا :- شگد حاولت أتواصل وياج وحجيت لخالة أمجاد تنطيني رقمج أو رقم أمج گالت ما عندي
- ما عدنا تواصل وياها وما عندي شي يربطني بيها
أم صبا :- أمجاد تحبجن على محبة حارث لتلوميها عالصار هم الملوا راسها حتى تاخذ الطفلة منج
- هي مو صغيرة حتى يملون راسها عندها عقل وعندها ضمير جان شغلتهن وتصرفت على أساسهن بس المثل عماتي ضميرهن ميت فلتسولفيلي بالمحبة
سكتت شوي وسألتني :- هذا ابن الأنباري شنو وضعه لگيتوه
رفعت راسي بسرعة
- شمدريج ؟
شفتها ارتبكت وگامت تسفط بالحجي
- شنو يمعودة هو منو ضل ميدري أبوه كل يوم مجرجرله واحد للتوقيف حتى عمج وستار مسلموا منه
تأكدت من غراضي موجودة سديت الجنطة وباوعتلها
- سالم وستار شجابهم بالنص هو عبد المهدد
- ممخلي واحد يعتب عليه وهسه كلها حادة سنونها عالأنباريين جماعة شاكر من جهة وعمج وستار من جهة لخ
- فدار مديتصرف من كيفه أكيد جايبله بلاغ رسمي بتوقيفهم إذا تعرضوله هم الياكلوها
- مو گنالهم ابن دولة مينلعب وياه
حجتها وذبت حسرة طويلة خلت گلبي يلعب
اجت عيني على جنطهم بالصالة باوعت لصبا
- طالعين سياحة ؟
- لا خالو رتبلنا الوضع حنروح نستقر هناك
سكتت بس استغربت وضعهم أمها سلمت عليَّ ومشت ضلت صبا عينها وراها من ردت أطلع اجت حضنتني
حجت بصوت ناصي :- بان ترى احنا شاردين
وخرت راسي باوعتلها مستغربة
گالت :- اني أفهمج عالموبايل من ترجعين راسليني
- قلقتيني ترى احجيلي شصاير
- اشش صوتج ..
باوعت للباب گالت :- ترى عمج سالم وستار متورطين بسالفة ابن الأنباري يردون يكسرون عينه بأبنه
أخذت ثواني حتى أستوعب كلامها
- صدك تحجين ؟
- والله العظيم گتلج أفهمج عالتليفون روحي هسه لا أمي تشوفني تسويني وصل
- شروح يمعودة صارلهم كم يوم روسهم مفترة أمه وأبوه حيطگون وراه مخلوا مستشفيات لا مكان مدوروا بيه إذا تعرفين شي بعد احجيلي لتخليني أروح أبلغهم وشيصير خلي يصير
- لا فدوة بان لتخليني أتندم لأن گتلج والله أمي تگصبني إذا درت أصلًا ما أعرف كل السالفة بس سمعت أطراف الحجي من خالو طارق خابر ماما گلها تنطي مفتاح بيت خالة أمجاد لعمج سالم وحجالها الموضوع
من حجت هيج طخت السالفة براسي توسلتني حتى لا أجيب طاري لأحد لأن خالهم موصيهم ميحجون
34 تعليق
طلعت منها أضرب أخماس بأسداس
لگيته واگفلي بالباب وابنه على مسافة منتچي عالسيارة
تيم :- هاه جبتي حاجتج
هزيت راسي أشرلي للسيارة صعدنا لاحظ شرودي
باوعلي بالمراية :- شبلاج يولي حالج انگلب
- ماكو شي
سكت عني بس ممقتنع جان واضح على وجهي الخوف
مشى بنص الطريق صار يسأل ابنه على أهله هناك
- عمتي والبنات منو ضل يمهن ؟
- عمي سلام هناك
- لا تضل هين من باجر شوف منو اليرد من عمومتك رد وياه للغربية واخذ نورجان وياك كثرة بلا فايدة
- اللي تشوفو
رجع باوعلي بالمراية
- يولي احجي وحدة مسمعتج حجاية
- لا ليش
- من ساعة ما طلعتي من بيتهم وحالج مگلوب
سكتت شوي ترددت أحجي بالبداية بس كل فكري بساعتها جان يم مآب وشنو حاله هسه
گتله :- اني أعرف مآب وين
- لا صدك
- والله دا أحجي صدك مُتيم
- وين بالله ؟
- عمو سالم ونسيبه خاطفينه
ضرب بريك وهو يمشي سرعة انرجت السيارة بينا
صحت :- شبييييييك اجيت تگلبها بينا
اندارلي عيونه صايرة بگصته
- يول جاوبيني بلا مراوغ ياهو الگلج انتِ شدراج
حجيتله عالكلام الدار بيني وبين صبا ما طول السالفة فر السيارة ورجلعهم للبيت بنفس الساعة نزل عليهم
نزلت وراه دك الباب حيل
باوعلنا صاح بابنه :- امشي من جدامي اخذها واركب السيارة
- وياك ما أخليك
انفتح الباب طلعت أم صبا تباوعلنا بخوف
گلها :- سوي طريق
- شكو عيني لويش هيج تدگدك بالباب مو زحمة الناس منا
- دسوي طريق تافوت لا أذب حرگة خالي كلها بيجن هساع
- غير أفتهم شصاير ليش تخليني ألم الناس عليـ...
بعدها ممكملة حجايتها دفر الباب برجله وفات جوة بنص حوشها وگف يتلاطم وياها وهي تصرخ عليه
طلعن بناتها ركضن لأمهن خايفات ويبجن
باوع لحالهن واستغفر بنفاذ صبر اندار يدورني
أشرلي :- تعاي هييين
وگفت يمه هزني بطرف ايده :- احجي منو بيهن الحجتلج
أشرتله على صبا اللي تباوعلي بلوم صيحة منا وصيحة منا خلاهن يذبن اللي ببطنهن وعرف السالفة منهن
صار يتهدد وأصلخ وأذبح والمرة تبجي وتتوسله
- أسويييييها محاكم والله أجرجركم كلكم لو مآب صابو خدش واحد براسو ما تسلمون منها نسوان وزلم
- مروتك استرر عليَّ وعلى بناتي والله العظيم مالنا ايد بالسالفة
- عجل من تسمعين بيهم خاطفينو غير ترحين تبلغين مركز شررطة تجييين تبلغين أهلو تتسترين عليهم ولامة هدومج وماشية شگلتي لروحج
- هددوني وروحها لأمي هددوني بجهالي وأخوية گلي ألم العندي وأطلع لتركيا أستقر يمه حتى أخلص من تهديداتهم ما عندي أحد هنا واني مرة لا حول ولا قوة منو الألي هنا لو سحبوا واحد من جهالي إلمن أشكي
سكت عنها يباوع لحالها وبناتها وأبنها الصغير يبجي
ضل ساكت فترة طويلة طلعله جگارة ورثها وگف يدخن
ضل واگف على صفحة منطينا ظهره
باوعت لعلي گال :- ورت رسمي
- شكو
- صار بيها جگارة يولي واصلة عندو للضالين
خلص جگارته اجى انطاها لعلي أخذها منه
گلها :- دحگي يولي هاي انا رايح بوجهي عالمركز لا انتِ ولا جهالج طرف بالسالفة ولا راح أجيب أسمائكم كملي اوراقج واطلعي لأخوج لأن محد راح يسلم من الجاي
ضلت تتشكر منه احتارت شتحجي وتتعذرله سحبله منها كم حجاية انتبهت بيده تليفونه شاشته مشتغلة ضحكت وهزيت راسي ......
طلعنا للسيارة شغلها باوع لعلي
بعدها الجگارة بيده
زمخ بيه:-بالزبل يولي وين
جايبها للسيارة عتخنگنا
#تكملة_البارت_27
#سواد_الأثمد
1______27👇😊
#التكملة
نزل ذبها بوحدة من الحاويات البرة ورجع صعد
مشى شوي بالسيارة وگف بنص الشارع
اندار لعلي :- أگول انزل حول اخذ مچاني اخذ بان ورد لبيت خالي وشحدكم لو عرفت بيكم جايبين طاري لأحد بالبيت وعديلة مريم أگضب أطر راسك براسها
- عجل وانتَ ما ترد ؟
- طالع تاشوف هالسالفة المالها تالي وين راح تگضي
نزل من السيارة أخذ علي مكان أبوه دنك راسه عالجامة
گال :- مثل ما وصيتكم بابا
- هذا هو لا تشيل هم
ضرب عالبنيد مشت السيارة ابتعدنا عنه عينه ورانا
بان :- وين حيروح
- للمركز لو لواحد من جماعتو يبلغو بالصار
- جماعته منو ؟
باوعلي بالمراية ضل ساكت ما رد
رجعت باوعت ورانا اختفى
گتله :- علي إلك لو للذيب
- هاه شعندج الدور
- أندل عنوان بيت عمتي أمجاد
- وشعندج مفينة هناك
- نتأكد مآب موجود لو لا
- أبوي راح يتصرف اطلعي منها انتِ
- أبوك ماخذله دورية ورايح لبيت عمو سالم مگالتله عالعنوان مال بيت عمتي
- الدرة بان شعندج
- نروح إذا لگيناه نخابر أبوك يبلغ الشرطة ويجوون لهناك بلا منطول السالفة وإذا لا نطلع وكأن شيئًا لم يكن
- راح تورطيني يولي
- منو الراح يدري قابل بس اني وياك
لحيت عليه فر الستيرن وصرت أدليه عالعنوان
وصلنا لهناك صف السيارة بفرع ثاني نزلنا نتمشى للبيت
وگفنا گبال الباب محطوط عليه قفل كبير وزنجيل
- ها ارتاحيتي هساع ؟
باوعتله
گال :- الباب مقفول امشي نرد مو صوجج صوج الطاوعج
اندار ديرجع منين ما اجينا عفته ومشيت للباب كفيت رداني وصعدت عليه اندار شافني بسرعة اجى متخبل
علي :- يوووول تسودنتي انزلي .. ويامن احجي باااان .. دهيييييرة طرگاعة سودة
عبرت للجهة الثانية ونزلت للگاع صاح من ورى الباب
- ويييينج ؟
- دا أسمعك
- على هالوگعة گلت تكسرت والله عرررج ما يلوحج
- حتجي لو لا
صعد الباب وطفرلي بسرعة للحوش
- بالله لو واحد دحگنا هسع شنو موقفنا
- حيگول حرامي اجى يبوك
- انسبينا يربك
- يمعود الناس نايمة منو بحالنا
طلع تليفونه يضوي بالفلاش البيت أظلم ما بيه ضوة
مشينا جوة خلصها يلومني وشورطني وطاوعتج
انداريلته بنفاذ صبر :- علي معاجبك اطلع معاتبه عليك تجي
- وأعوفج لحالج تا يدگولي صفگة الربع
- لعد بلا هالحجي الماصخ خلينا ندخل نشوف البيت بسرعة ونطلع
مشينا جوة هو جان متردد بس مو خوف متردد من الفعل نفسه اثنينا بس هنا وبهالوقت المتأخر
حتى اني جنت خايفة گلبي يدك يدك سريع
وصلنا للباب الداخلي هو صار گدامي دفعه بيده
اندارلي متفاجئ :- يولي هذا مفتوح
- مو گتلك عمتي وزوجها مسافرين شفتحه هسه تشوف مآب هنا
أشرلي بأصبعه :- اشششش صوتج نصيه لا يطلع واحد هين
نسولف همس دخلنا نمشي على كيف ميضويلنا غير الفلاش مال موبايل شغلت نقط الكهرباء مشتغلت
گال :- جائز مفصولة من الجوزة الرئيسية
دخلنا للصالة نباوع بالمكان أثاثهم على حطته والوضع طبيعي ممبين أكو أحد هنا الغرف مقفلة مشينا للمطبخ
علي خيبر :- البيت فارغ يولي ما بيه أحد
- لو فارغ جان الباب الداخلي مقفول
- جائز جان أحد هين وطلع
- ما أدري هسه دنشوف
- لتطوليها بان أول تالي أبوي مبلغ ورايح لعمج تا يسحلونو للتوقيف وهو يعترف وين ضامو
سوالي مجال :- امشي يلا لنتعطل زايد أبوي لو عرف يرفعنا فلقة لو صارلج شي انا أطلع بالوجه
مشيت گدامه وهو يضويلنا مرينا من الصالة دنرجع
- هششش اوگف
- شكو
دنگت للگاع اجت بيدي كومة مال حبال ورى التخم
گتله :- شوف مو گتلك هنا مخلينه
- وهساع شفتهمتي
- بابا لتصير قشمر حبل طويل مثل هذا شيسوي هنا بالصالة
كفخني على راسي
- ياهو القشمر لج احجي عدل أخوج الصغير
- هي شنية لتضرب
- زوج وحك علي زوج وطاوعتج واجيت
- جبان مو بس زوج
- أبوي موصيني ما أمد ايدي على نثية بس حشا انتِ وينج وين الأنوثة
رجع انطاني كفخة
لزمت راسي :- خاب هيييي شنية
- وشنشانة
صرنا ندور بالصالة فريناها فر صعدنا للطابق الثاني الغرف الفوك كلها مقفلة حتى الحمامات دورناها
آخر شي ملينا ونزلنا وصلنا للباب دنريد نطلع سمعنا صوت دوريات شرطة انخطف لوننا واحد باوع للثاني
باوعلي گال :- دحنا يربك
ركضنا من ورى البيت واحنا نتلاطم
- هسه أبوك وكته شوكت لحك يبلغ شوكت اندل البيت
- لو دحگنا هين هساع ينحرنا عالقبلة
نزل على ركبته ومدلي ايده گال :- تعاي اصعدي تاعبرج
خليت رجلي على ايده منها وعلى كتفه گام لحيله رفعني من الگاع چلبت بالحايط صعدت عليه وباوعتله
- لعد وانتَ
- بس دطفري خرب روحج
رجع ليورى وبسرعة ركض طفر عالحايط بخفة صعد ونزل عالجهة الثانية دنك ينكت ملابسه باوعلي معلگة
گال :- يول متنزلين
- هاك جنطتي
- اشتعلت روحج زتيها
شمرتها عليه لگفها لبسها بكتفه استعجلني أطفر خفت
گتله :- انبطح بالگاع خلي أطفر عليك
- مضحك جدامج لجج بان
- أخاف
- نعلعلة شرفو اللي يسمعلج حجاية بعد
تقرب للحايط ومد ايده :- انزلي انا أتناوشج بساع يلا
65 تعليق
طفرت حاول يلزمني دست على رجله صار يگمز
- نعلعلة غيررتج اشتعلت روحج بتل بتل أشعل أهلج
- ديلا غير زلمة انتَ
- نعل مو زلمة راحت رجلي بالقرآن انداست
مشينا بسرعة بأتجاه السيارة من الفرع اللاخ ما وصلنا للباب الرئيسي مال بيتهم الدخلنا منه بعد مندري شصار ورانا اجوا الشرطة لا ؟ .. گمنا منشوف گدامنا
يمشي يعرج ثگل الوگعة مالتي كلها صارت على رجله
صعدنا السيارة وحرك بسرعة رجعنا لبيت فدار تلگتني ماما بخوف طلع مُتيم مبلغ خاله واللاخ جار سلاحه وماخذ ابنه وولد اخته وطالعة سياراتهم لبيت عمي
صعدنا بالغرفة الفوك أمه وخواته مخبوصات عليهم
وماما مو أقل من حالهن تروح وتجي بالغرفة بخوف
مددت عالچرباية غمضت عيوني بتعب
نورجان :- هذا الألبوم مال صور منيلج ؟
فزيت من مكاني بسرعة شفت الجنطة بيدها فاتحتها
جريته منها رجعته لمكانه
- عمتي أمجاد انطتنياه
- واللابتوب مالمن
- مالتي شنو تحقيق ؟
- لا والنبي بس دا اسأل
شدن :- لگيتي مستمسكاتج ؟
طلعتلها الجنسية وورقة عقد الزواج مال شيخ
أخذته تباوع بيه :- وعقد المحكمة ؟
- معاقدين
- وشلون طلعتي لبيروت لوحدج وانتِ قاصر ؟
- مو بهذن جان جواز وهوية مزورة مغيرين بيها مواليدي
- ومشت ؟
هزيت راسي :- مو بس هاي حتى قبلها بكم يوم جنا مسافرين اني وعبد من بغداد لأربيل سفر داخلي هناك حولونا لأمن المطار للتحقيق بتليفون واحد مشوها بسرعة وصعدنا الطيارة بدون تدقيق
- شنو هالعبد هذا
- حتى الفندق الجنا گاعدين بيه يعود لجماعته إلا لو واحد لگفنا قاصر ويَّ واحد بعمره وبدون عقد زواج قانوني جان أكلها وكتبوا بينا محضر
- اي تعلميني بيهم هناك بأقليم كردستان يشددون على مبيت الفنادق أكثر من بغداد بعد لأن أكو رقابة سياحية ومتشددين حيل يخافون من المخالفة القانونية
رجعت تباوع بالعقد :- ربج جايبته وياج هذا حيفيدنا كُلش هواي بالدعوى مال تصديق عقد الزواج وإثبات الأمومة
وگفت يمها :- يعني تصير وترجع ريحانة لحضني
- ترجع والله هي إلج كُلشي ماشي لصالحج بهيج دعاوى القاضي حتى مياخذ وقت طويل بالحكم بيها
جرتني لحضنها باست راسي
گالت :- مراح تطول وعيونج كلها فترة بسيطة وتخلصين منه هالسافل هذا وبنتج ترجعلج
أخذت العقد ضميته وخليت الجنطة جوة الچرباية
شهربان :- شعجب مرة فدار وبناته مالهن صوت گلت أرجع ألگاجن مكتولات
- هن لو يدرن بسالم وستار يعودولنا جان هدن علينا بهالليل وتعاي شيخلصج
37 تعليق
- يعني ميعرفن ؟
هزت راسها لا
گتلها :- جيد
انتبهت لنورجان گاعدة عالچرباية خانسة تباوعلنا
تقربت منها
- شبيج نورجان شو وضعج معاجبني
- مبية شي والله
- ليش تحلفين ؟ بس دا اسأل وجهج مصفّر
- ماكو شي
دنحجي فزينا على صوت طلقة قريب حيل
ماما ايدها على گلبها حجت بخوف
- عزة هالصوت جنة هنا بالبيت
سمعنا صوت صريخ نسوان من جوة نزلنا نتراكض ملحگنا لگينا مرة فدار وبناتها بالحوش يم الباب
والباب مفتوح على حيله مديت راسي أشوف وألگي مآب متمدد بالگاع وجهه مشوه والدم تارس الگاع راسه بحضن أمه ميتحرك....
