رواية سواد الاثمد الفصل التاسع والعشرون بقلم نورس
واحد منهم صاح :- لك هاي سيارة عمي سلطان
خليت ايدي بيد هاجر وركضنا من جهة البستان شاردات منهم نركض ونتعثر وكل شوي ندير نباوع ورانا
خاف لاحگينا والخوفة مالية گلوبنا ..
صرنا بنص البستان وبس صوت أنفاسنا مسموع
رجلية ثگلن وحركتي صارت ابطأ وألهث ألهث بتعب
برجلي بس تك نعال واللاخ عفته بالعركة وهاي رجلي الحافية صارت فلم واني أمشي عليها بنص التراب
وهاجر مو أحسن من حالي لازمة نعالها بيدها وتركض ما لحگت تلبسه تبهذلنا بهذلة احنا وعباياتنا
وكل شوي تتلفت ورانا وتگلي بصوت يرجف
هاجر :- اجونا بان اجونا يمة يممة
أحس رجلية صارت خيوط هي شادتلها واني متحملت بعد صرت أسحل بروحي گوة وأجر برجلي جر
صحت وراها ألهث :- ولج اوگفي .. ولجج .. هاجرر
وگفت بمكاني ودنگت لازمة ركبي أتنفس سريع من حلگي فحطانة من الركض اندارتلي شافتني واگفة
اجتني بسرعة :- تسودنتي عش وگفتي امشينا بساع تاما يلحگون بينا
رفعت راسي واني على نفس الوضعية
حجيت بنفس متقطع :- تعبت .. ولج تعبت .. رجلي
باوعت لرجلي وحجت
- شبلاها رجليج
گعدت للگاع مديت رجل والثانية ثنيتها أباوع بيها
شهگت ولطمت على صدرها
- يمممة بان دم تعورتي ولج منين تعورتي
- گزازة طبت برجلي واني أركض گامت تبز بية
دنگت گعدت على ركبها لمستواي گامت تبجي
- كلو مني والله صوجي انا طاوعتج وهويتلج گتلج أندل البيت
- لتحجين هيج شبيج شعليج انتِ
تمسح بدموعها وعينها برجلي تلزم بيها
- تأذيج حيل ؟ دحگي شكثر دم ما يصير تضل هيج
- الزمي خلي اطلع الگزازة
انطيتها شالي بهذلني أجيبه مناه وأخليه مناه
وگع شعري على وجهي رفعت راسي ليورة وهزيته أوخر بخصلات شعري عن عيوني
لزمت رجلي أتلمس بيها أريد أشوف مكان الجرح طخيت الگزازة انبزت رجلي گمت أنگز من الوجع
لزمتها بسرعة سحبتها طلعتها من رجلي وشمرتها عني
الدم زاد ما وگف الجرح صغير بس عميق الگزازة كُلش طابة ليجوة زارفة رجلي زرف من هيج مديوگف نزف
هاجر :- توجعج مو ؟
- لا تدغدغني
اني بالگاع وهي واگفة يمي متخصرة وتباوع ورانا
عيني صارت تدور عالمكان الواگفات بيه البستان مو مفتوح لا شجر وين متندار وبيهن قاطعيهن صايرات وية الگاع
سألتها :- أگلج انتِ منين جبتينا شنو تيهنا ؟
- لا لاا هذا بستانهم من الصفحة هساع بس نكمل ليگدام نصير يم أشجار النارنج والساگية مناك ونندار على بيت أبو علي من الباب الخلفي صايرات بظهر بيتو
- ديلا لعد خلي نروح
دا أگوم گالت :- وتگدرين تمشين على رجلج هاي ؟
-أگدر أگدر بس گوميني
مدتلي ايدها گومتني من الگاع صرت أنكث بملابسي من التراب وبعدنا نحجي سمعنا صوت رجل قريب
صاح :- ياهوو هين؟..
باوعنا وحدة بوجه الثانية كاتلنا الخوف گلبي صار بين رجلي وهاي تطگطك بأصابيعها ولازمة بيدي حيل
طلع واحد من ورانا بدشداشته ملثم وجهه بشماغه وشايل بيده سلاح موجهه علينا
هاجر شافت السلاح بيده لو اجت توگع من طولها
من شافنا بنات وشلون نباوعله خايفات وحدة لازمة بأيد الثانية نزلها بسرعة وهو عاقد حاجبه
گال :- منين انتن شتعملن هين
- عمي والله ما نريد شي هساع نروح امشي بان
اندارينا اثنينا نريد نمشي رجع صاح ورانا
- اگفن
درنا وجوهنا نباوعله بتوتر
تقرب علينا كم خطوة وخلى السلاح بمتنه
گال :- بناتمن انتن عش طالعات بهالساع من الظهرية لحالجن بدون ازلمة
هاجر ضلت تباوع لوجهي عيونها مدمعة تريد تبجي
صاح بينا :- ما تحجن يولن
فزينا اثنينا من صوته
هاجر :- عمي لا تصيح شنية هي
- من يا عمام انتِ ؟
- ها
- عمامج عمامج منين
- ما أدري
- خرا بعمامج عوفيهم خوالج ياهم ؟
- ها خوالي ؟
باوعتلي بحيرة ورجعت تباوعله :- ما أدري
- خرا بخوالج خيولون أهلج وين أبوج اخوتج بس اعطيني اسم تاعرفو
الله ذب عليها ثول وفهاوة بهاللحظة بحيث نست حتى اسم أبوها من الخوف وعينها ما انشالت من السلاح
جريت نفس وحجيتله بسرعة
شهربان :- جنا دنمشي عالشارع واثنين شباب لحگونا بسيارتهم وذبولنا حجي وصخ واجينا لهنا نركض دنضيعهم
فز يندار يباوع :- ياهم ذول وينهم بس دليني تا افين حظهم هالسگط ولد السگط
- ما أدري والله ضلوا بالشارع
- انتِ مو من هين لهجتج ما تعودلنا بعدين شتسون لحالجن يا خوية ما يجوز وانتن بنات صغار والشارع ما يتأمن
- هي صارت بعد بس عفية خلينا نروح والله هسه أهلنا يستفقدونا ويضل بالهم
- بس فهمني انتن بيت أبو منو تا اوديجن بيدي غاد
هاجر :- انا من حريم بيت أبو مؤتمن وهالبت تصير بت حرمتو الثانية البغدادية
فتح عينه متفاجئ
- من بيت الخال فدار ؟ وعش ما تحجن من الأول
- عجل انتَ يبست گلوبنا بسلاحك شاهرو بوجهنا ما گدرت أرهملي چلمتين مثل الوادم
حجتها بغضب وانفعال ضليت صافنة عالتحول السريع صدرها يصعد وينزل بسرعة والخوفة بعدها بيها
الولد دنك راسه وصار يتعذرلنا اجت عينه على رجلي
- خوما تعرضولجن هالچلاب احجن لا تخافن تاورهم ور
- لا لا هاي رجلي انجرحت واني أمشي
- تعرفنهم انتن ؟
- لا والله مطالعة اني أول مرة
هاجر :- وآخر مرة
باوع داير مدايرنا سألنا :- وين رايدات هساع ؟
- لبيت مُتيم
عگد حاجبه وضيك عيونه :- ياهوو ؟
هاجر :- لبيت أبو علي
- هاه عجل امشن انا تاوصلجن لهناك
ردنا نعترض منطانا مجال وأشرلنا يلا وصار يمشي گدامنا
رجلي هاي المجروحة ما أگدر أمشي عليها طول الوقت رافعتها وواگفة تك رجل وساندة روحي بـ هاجر
گتلها :- انطيني شالي
- شتسوين
- خلي أشده عليها صارت خريطة دم وتراب ووصخ
- البسي نعالي
- اي حتى نصير اثنين مجرّحات دلبسيه شو گدامي
لبست نعالها ودنگت بيدها شالي شگته شوي بسنونها وأخذت منه قطعة صغيرة طويلة گعدت تلفها على رجلي
وهذا الولد واگفلنا على مسافة منتظرنا نخلص وكلما أرفع راسي أباوعله وتصد عيني بعينه يدور وجهه
شي بداخلي جان مرتاح بوجوده محترم وميباوع أحسن ميطلعولنا ذولاك السگط مرة اللخ واحنا لوحدنا
شدتها ودتگومني وشحاطة رجالية انشمرت يم رجلي
باوعناله نفس اللحظة
گال :- إلبسيها خوية ما يصير تمشين عليها وهي تاذيج
- لا عادي
- أبد والله ولا تسولفين إلبسيها تاشوف
لبستها وشلت تك نعالي صار يمشي واحنا وراه
ما كمل بنفس الطريق الجنا رايحيله طلع بينا من جهة ثانية لحد ما طلعنا البستان وصرنا عالشارع
أشرلنا عالسيارة فتحها صعدنا اثنينا ليورة وسد الباب وهو اندار صعد بكرسي السايق وشغل السيارة مشى
تقربت مني تحجي بصوت ناصي
هاجر :- والله لو يدرون بينا طالعات لحالنا وفوگها صاعدات بسيارة ازلمة غريب إلا يعملونا وصل
- دسكتي يمعودة يبس الدم بجسمي من وگفوا هذولاك بسيارتهم گلت هسه يلزمونا يسوولهم شي بينا
الولد الظاهر سمعنا واحنا دنسولف
گال :- خوية لا تخافن انا هم مو غريب مناه من ولد عمومتجن وأبو علي واخوتو ولد عمي هساع نصل هناك وانا أفهمهم السالفة لا يضل بالجن
هاجر وجهه صار يلطم عبالها نوصل لهناك وننزل للبيت رأسًا بدون محد يدري بينا حتى اني خوفتني
وصلنا بسرعة أقل الخمس دقايق وگفت السيارة گدام بوابة كبيرة نزل وأشرلنا بيده حتى ننزل
نزلنا نمشي وراه وصل للبوابة رد الباب بيده انفتح
ودخل يمشي گدامنا واني وهاجر نتهامس وراه بيناتنا
أول مدخلنا الگراج من بعيد وأشوف لمة مال زلم واگفين
گدرت أميّز شبير وعلي وواگف يمه واحد منطينا داير وجهه عرفته من ظهره واثنين زلم كبار معگلين
ومن أركز أشوف نفسهم الولد الأثنين واگفين گدامهم
وگفنا اثنينا نبلعم ونباوعلهم وهمه من بعيد شافونا
الأگرع اندار بسرعة ومن اجت عينه علينا خزرنا خزرة من هاي التمام عيونه تريد تنط من مكانها
هاجر :- والله ما أمشي لهناك
تحجي وصايرة بظهري لازمة بملابسي حيل والرجفة بصوتها گوة لازمة دموعها وهذول السگط يأشرون علينا ومدري شيگولون للواگفين مخليهم مشعوطين
احترك گلبي نزعت العباية لابسة جواها بنطرون وبدي نص ردن وخليتها بيدي لازمتها وية نعالي ومشيتلهم
أول مصرت قريبة عليهم باوعلنا متخصر تك ايد صاح
تيم الله :- هلا بالفاين حظهن
واحد من هذول الولد أشر عليَّ
صاح :- عمي هاي هااي البت العيونها ملونة ألكسرت السيارة
- لا تكذب شمرت الحجارة عليك بس انتَ وخرت راسك واجت بالجامة مال سيارة
هاجر :- اي صح انا دحگتو
صاح بينا مُتيم صاير أعصاب نار
- انكتمن يولن انكتمن شعدجن مفينات بهالظهرية لحالجن وين تردن
- لا تصيح هم البدوا وتحرشوا بينا
- چذابة عمي چذااابة ماشين بالدرب لا يمها ولا گرباها دحك فردة نعالها صفگتني بيه بنص وجهي ومن نزلت عليها دنجت للگاع تولتنا طابوك وحجار
- كذاب والله هو ضل يشمر حجي علينا الحيوان ابن الحيوان احجي الصدك لك احجي الصددك وصير زلمة
بعدني ممكملة حجايتي وهذا الرجال المعگل گام يصيح
سلطان :- بتمن هاي ولكم المفرعة بتممممن يعطون خبز ويسيبون للشارع ياهو أبوها هالبلا تربية
اشتعلت نار
- لا تجيب طاري بابا على لسانك مربيني أحسن تربية انتَ إلزم ولدك وربيهم تربية سز وبلا أخلاق ويتحرشون بالبنات
تخبل گام يشيل روحه ويرگعها يصيح مُتيم خلانا بظهره
تيم الله :- لا هيج الحجي عمي لا يصعد ضغطك
- ولك تراددني هالبزر تراددني
ذاك الرجال الثاني يباوعلي خازرني حيل
أبو مظفر :- بعدين هن شيسون بالشارع هم شباب طايشة من يدحگون المثلهن مفرعات ويتراددن وية الزلم طبعًا يذبولهن چم حجاية ما عليهم عتب إذا هن أهلهن مسيبيهن بالشوارع
- خوب انتَ سمعت السالفة هم هالسگط ذابيلهن حجي شباب وصارت جوة ايدهم سيارة ونفخوا روحهم زايد قابل ما نعرف احنا ؟
شهربان :- إذا ما مصدك حتى اسأل هذا الرجال الجابنا
هز راسه يأيد كلامي
211 تعليق
گلهم :- اي دحگتهن يتراكضن بالبستان وحچلي عالولد ومن عرفت بيهن يعودن لبيت خالي فدار اجيت وجبتهن لهين
وجوه الولد صارت تذب ألوان من انگلبت السالفة عليهم
واحد منهم راد يحجي اجاهم شبير من ورى اثنينهم ولزم بيهم من ياخة دشاديشهم يريد يرگع راس براس
شبير :- من رخصتكم عندي سالفة وية الشباب
أخذهم يسحل بيهم برة البيت
- عجل وتگوم تطگهم وتولي السيارة طابوك مكسرتها تكسير
- اعذرها عمي هي جانت نيتها تهف الطابوگة براس ابنك بس اجت بسيارة عمي سلطان
سلطان :- كونها جايبتها براسو ولا هالعملة الگشرة مطعجتها تطعج من كل صفحة بس گلي وين أهلها تاروح أگاومهم
- احنا أهلها
دگله صدره :- وإذا على سيارتك لا تشيل هم خسارتها عليَّ وانا الممنون
فش الرجال شوي وبعده يخازر بينا اني وهاجر
- بس ما يصير هالحجي..
قاطعه :- عمي گتلك سالفتها عندي والله لا تشيل هم والبنات انا أحاسبهن عالصار مثل ما غلطوا هن غلطن
سكته بكلامه وهدأ شوي
گله :- بس تيم عمي لا تبطي بتصليحها عليّ طلعاتي كلها بيها
- تامرني أمر هساع أخلي الولد ياخذوها للتصليح منا لباجر تردلك جديدة حدر باب بيتك
نفض عبايته من الگاع وشالها دار وجهه ومشوا اثنينهم
اندارلنا متخصر بس هو وابنه واگفين واحنا گدامهم
- انا المفروض من ساعة ما دحگت فردة هالنعال أعرف انتِ وراها
دنگت راسي وعلي عيونه بين التك اللي بيدي والتك اللاخ اللي بيد مُتيم
أبوه گله :- دحك الدور هافتهم بفردة وجايتنا بالتك الثاني
علي خيبر :- شني ولج سندريلا ؟
هز ايده ويضحك
فات شبير يمشي من بعيد وصل يمنا أخوه گله
- هاه ؟
باوع لأيده ويحرك بأصابعه :- عطيتهم المقسوم
رجع انتبه يباوع للنعال فتح عيونه
- هم هذا النعال؟ يابا إذا ما نفطتو وحرگتو ما أتسمى عالزلم
ومُتيم ضحك ودار وجهه ينزل بردان دشداشته
- والله ولك دهيرة مو نعال تگول قناص بغداد جايبتو ترس وجهو مخلية خشمو يصب دم وگبلها هم متكاونات بيه هي وأختها وية حرمة خالي فدار وبتها
علي خيبر :- هذا النعال مشارك حتى بمعركة بدر وأحد
- باع هاذ يگلك مقنصين بيه كفار قريش من فوك الجبل
تيم الله :- الغبرة بكل فاينة تعملها تنسالها فردة أگضبها منها غير تاخذين نعالج وياج ؟
خليت گذلتي ورى أذني :- شمدريني ملحگت آخذها وأشرد
شبير :- غنائم حرب هاي خوية
أشرلنا بيده جوة
- امشن فوتن لا تضلن واگفات هين
هاجر لازمة بعكسي حيل ولا عافتني مشينا اثنينا واني رجلي تعرج من الجرح والشحاطة گوة أمشي بيها
انتبهلي :- شبلاها رجلج ؟
- انجرحت بالبستان والرجال الجابنا انطاني الشحاطة مالته
شبير :- هالأگول بعدو گاضب الباب يريد شحاطتو الزلمة
- اخذها بابا علي ردها إلو وتشكرو عني
نزعتها أخذها وطلع وجابولي نعال لاخ كملت بيه مشي للبيت
دخلنا جوة بيتهم فارغ ما بيه أحد فات أشرلنا جوة
تيم الله :- فوتن بابا درة غاد بغرفتها
أخذتني هاجر ورحنا لنهاية الممر باب الغرفة مفتوح
شهربان :- اصبري يمعودة شبيج طايرة رجلي تأذيني
التفتت على صوتي شافتنا وضحكت سلمت عليَّ
در الزهراء :- هساع جنت أگول لأبوي ياخذني لبيت الخال فدار تاشوفج
هاجر فاتت گعدت عالجرباية نزعت حجابها وتهفي على وجها
- اسكتي ولج غير صارت سالفة شكبرها شگدها وبالشفاعات أبوج خلصنا من الحجي والملامة
باوعتلنا مستغربة :- عش شصاير ؟
گعدت تسولفلها الصار واني حايرة برجلي فتحت الوصلة أشوفها الدم وگف بس تأذيني حيل
هاجر :- يا بان هاي شصاير بيها تكشش
- أريد أغسلها وين الحمام ؟
أشرتلي در على حمامها گمت غسلتها من التراب والدم الجامد بيها وطلعتلهن جابت در من جرارتها علبة صغيرة طلعت منها گطن وبطل بيتادين مسحت الجرح بيه لفت رجلي بشاش طبي وثبتته
باوعت لدر :- مشروع دكتورة
- يمة هيج من حلگج لباب السما تاجيب معدل وأنقبل كلية طب
ابتسمت :- ان شاء الله تنقبلين بيها انتِ حبابة تستاهلين
ردتلي الأبتسامة وهي مستحية متباوع بعيني
شوي وسمعنا صوت مُتيم جاينا من الباب
لبست هاجر شالها بسرعة ودر گلتله :- تعال بابا
فات شافنا كلنا گاعدات عينه علينا اني وهاجر
- خابروني من بيت خالي تا يسألون عليجن
صرنا وحدة تباوع بوجه الثانية منتظرات رزالة وهو يباوعلنا بتركيز عبالك منتظر ردة فعلنا
گال :- بالله ما گتلي شتسون طالعات لوحدجن من البيت بنص الهوسة
- هاجر معليها اني لحيت عليها دنجي هنا يم نورجان
- جان گلتن لواحد من الولد يوصلجن شتسوالچن بالله
- محد مجان فارغ كلها ملتهية بالعزيمة
- هالنوبة صارت بعد ماريدها تنعاد ما انطيت بيجن جدامهم تاما تحصلن حجاية زايحة من أحد
هاجر :- التوبة لو طاوعتها بحجاية بعد
مدنگة راسي مسوية روحي ملتهية برجلي
- سوادين أحاجيج
رفعت راسي أشرت على روحي
هز راسه :- اي انتِ وياج الحجي الطلعة هين لحالج مو هينه تاخذيلج واحد من ولدنا وياج وروحي سيبي وين ما تردين ممنوع هالتصرف يتكرر وأسمع بيج طالعة من البيت لوحدج سمعتي لو لا ؟
هزيت راسي ضل ساكت شوي يباوعلي بخزرة
أشرلنا بيده :- يلا امشن تاردجن لبيت خالي
- ماريد أروح
- وعش يابة ؟
- أريد ابقى هنا يم در
- هي در جنت جاي وجايبها عندكم
در الزهراء :- اي بابا خلينا هين هناك ببيت خالي فدار هوسة وهساع وكت الغدة صايرين خبصة
- وتضلن لوحدجن ؟
ضل ساكت بحيرة يباوعلنا فاتوا شبير وعلي وگفوا بالباب
اندار لأبنه :- علي ضل هين يم البنات لا تخليهن
- لا وين أضل يردوني هناك ببيت خالي فدار
- لا ما يريدوك انكتم وابقى هين عينك على خواتك
دنك راسه علي ايده ورى رگبته ضايج
رجع گال :- وانتَ شبير امشي وياي خالي رايدنا وياه
- يابا حرمتي ضلت لحالها بالبيت تكرب اجيت تا اخذ چم ماسحة منكم وأرد لبيتي
- شوفو شيريد منك وروح كل ساع يخابرني جيب أخوك وتعال
حجاها وشمر سويچ مال سيارة على علي
گله :- عجل اخذ البنات وروح لبيت عمك شبير لا تخلي حرمتو لحالها
شبير :- خالك كلما ضاج راح ذبحلو ذبيحة ولم الوادم لبيتو لا شغلة ولا عملة فلوسو زايدة يحتار شلون يتلفسهن
طلعوا اثنينهم وعلي لحگهم برة
سألت در :- شبيها نورجان ليش راحت لبيتهم
- البيت متروك صارلو مدة وينرادلو تنظيف اجى عمي گبل شوي واخذها لهناك تاينظفوه
علي طلع شغل السيارة وصاح علينا يستعجلنا قفل بيبان بيتهم ورحنا لبيت شبير على مسافة قريبة
نزلنا اني والبنات وعلي ضل يطبك السيارة
لگينا نورجان مخبوصة دافعين التخم ومطلعين غراض برة والشبابيك جانت بلا بردات والمنظفات تارسة الگاع
خليت اصبعي على حلگي أشرت للبنات بلا صوت
اجيتها من ورى ندستها بخصرها صارت هي عيطة وهي گمزة
اندارت تباوعلنا فاتحة عيونها
نورجان :- هاي شجابكم
سلمن عليها البنات وگفت متخصرة أباوع للبيت مو مثل بيوت عمامهم الكبار بس حلو صغير على گدهم
حاوطت عكسي وخلت راسها على كتفي تحجي بزعل
- هاي انتن كلجن متجمعات واني هنا دا أشتغل
شهربان :- يلا هياتنا اجينا دنعاونج
در :- لا بان ما يصير تتحركين على رجلج زايد اگعدي تاتطيب
- أگلج خاف صدگتي روحج من گتلج دكتورة جنت دا أجاملج ترى
ضحكت وتوزعنا كل وحدة لزمت شغلة حتى نخلص
هاجر ودر كل وحدة بيدها وصلة صارن يمسحن الأثاث مال بيت كله تراب واني ونورجان نغسل بالأرضية
لشوي اجى شبير شاف حالنا والگاع ناگعة اجته نورجان
- شوف شُبير غرگنا
واگف بالباب متخصر وبيده اللخ جگارة يباوعلها
شبير :- يولي انتِ مو مثقفة ؟
- اي
- عجل المثقفين ما يگولون غرگنا
صفنت بوجهه :- لعد شيگولون
- غرقنا غررقنا
سحب آخر نفس وتشكل ويانا رجع التخم لمكانه والبنكات صعد هو نظفهم وشكل البردات وعلگهم
علي جان گاعد بالحديقة گام شبير سحله ويانا خلاه يغسل گراج البيت وللمغرب احنا على هالحال
لازمة الصوندة ولازمة ماسحة ابعد بالمَي أطلعه برة البيت وصلت ليبرى ذبيته للگراج
علي خيبر :- ها هاا يمعودة هساع غسلتو
- ارجع اغسله
حجيتها ورشيت الگراج بالمَي
- والله لو يطلع جدي من گبرو يگلي رد امسحو ما أمسح ظهري شكّل صار ساعتين
صاح عليه شبير :- امسح لك امسسح لا أطلع ادوس راسك
- عمي مسحتو والله مسحتو لعب هذا
رفعت الصوندة رشيت عليه شوي مَي ووخرتها بسرعة
- هاك تعال تعااال دحگها شتعمل
صاح عليه خرسه عض اصبعه يباوعلي ويأشرلي عود بسيطة دفعتله الماسحة بأبتسامة بريئة
صار يمسح واني أرش وكل شوي أرجع على نفس المكان خليته يگمز ومن يحجي أصيح لشبير
النوب گام يمسح ويدردم بينه وبين روحه حتى ليسمعه
شلت الصوندة رشيته بالمَي ووخرت
باوعلي :- يول شبلاج مزعط
- ما أدري يمعود بالغلط
رجع اندار يمسح رجعت رفعتها رشيته شوية
صاح :- خرررررب
- بالغلط بالغلط
حجيتها وانطيته ظهري مبتسمة
هي لحظات يمكن قبل لا أدير وجهي إله واجاني بيده سطل مال مَي شكبره ذبه عليَّ تنگعت من فوك ليجوة
شهگت وأمسح بعيوني ووجهي وأوخر بشعري
شهربان :- الهمجي الحيوان أنعل أبووك
- لا تغلطييين على أبوي طايحة الحظ
صرت أصيح عليه على صوتي طلع شبير من البيت
شاف الگراج فايض واني وعلي ناگعين بالمَي وواحد يشمر عالثاني باوعلنا متحلف يريد يرگع راس براس
أخذ العودة مال ماسحة كسرها برجله ولزملنا العودة
شبير :- يابا والله وروح أمي الجوة الترراب لا ما نشفتوا الگراج هساع أكسسرر هالعودة على ظهورركم يلاا جدامي تاشوف قشامر مناعيل الوالدين
گمنا نشتغل بسرعة النوب هذا كسرله ماسحة وضلت بس وحدة صرنا نتعارك عليها اني وعلي
صاح بينا شبير ورفع العودة
عافها إلي بسرعة صرت أمسح بيها وهو أخذ المكسورة
ظلمت الدنيا واني وعلي بعدنا بالگراج انكسرت ظهورنا يلا نشفناه شمرت الماسحة ودخلت أعرج برجلي
أحس الجرح كام يصّل عليَّ ومنا الشاش متبلل وملابسي تذب مَي صرت أرجف من البرد
نورجان جابتلي ملابس منها بدلت وغيرت اللفاف مال رجلي لزمت مشط وگعدت تمشطلي
أباوع للبنات هم هلكانات من التعب وشبير وعلي برة
هاجر :- اشتعلتي بان انا لو ضالة هناك بالعزيمة ماخذتلي چم حوسة وياهم ولا فواينج اليوم بينا بالله من أرد لبيت عمي فدار ويسألوني عش عفتينا شگلهم
- معليج نذبها براس شبير نگلهم هو جابنا حتى ننظفله بيته
- التوبة عمي التوووبة لو طاوعتج بعد
على گعدتنا شبير اختفى نص ساعة ورجع جايبلنا عشا
انطيناهم عشاهم هو وعلي برة حتى ناخذ راحتنا
ضلينا عندهم لنص الليل صارت الساعة قريب الـ ١٢:٠٠
طلع علي يشغل سيارته وشبير أخذ در يدفع بكرسيها وياهم هاجر واني ضليت بالباب أحجي وية نورجان
گالت :- ضلي يمي حبابة
- ما أگدر والله ماما هناك لوحدها ما أگدر أعوفها
باوعت للباب ونصيت صوتي :- أخاف هذن البربوقات يستفردن بيها
سلمت عليها وطلعت صعدت بالسيارة ومشينا
رجعنا لبيت مُتيم حتى نرجع در وية موگفت
وگفت سيارة لخ يسوقها مُتيم ويمه عمته شيخة وبالمقعد الخفلي گاعادت اثنين بنات كبار معرفتهن
نزل اجى لسيارتنا من جهة علي
تيم الله :- شو تأخرتوا
- هاي ردتنا من بيت عمي شبير
- بالعجل يلا وصل البنات لبيت خالي لا تخليهم يحجون
إلتهى ينزّل كرسي در وعمته وهذن البنات نزلن
اندارلهن :- ها شو نزلتن هساع تا أدخل السيارة
الشيخة :- ما تسوى يمة هذا البيت نحرك رجلينا شواي
اجى لدر فتح الباب من جهتها
اندارتلي قبل لتنزل :- بان ضلي نامي عدنا اليوم
ابتسمتلها وقبل لا أرد عمتهم الكبيرة حجت
- خلي البت ترد لأمها درة لا تعمليلنا سالفة بهالليل مالنا إلها گدرة
حجت تتوسلها :- عمة فدوة بس الليلة
- دررررة
فزت بسرعة على نبرة أبوها العالية
كمل وهو خازرها :- خلي البت ترد لأهلها
ضلت ساكتة ودنگت راسها بلا نقاش نزلها خلاها بكرسيها
ضليت أكل بروحي من الصار اني أصلًا جنت رايدة أگول إلها مرايدة أضل بس حجاية شيخة وأبوها كُلش حزت بخاطري وتضايقت منهم
مدنگة ألعب بأظافيري وآكل بشفتي
وحدة من هذن البنات گالت :- هي هاي مو بت حرمة خالي الاخرى ؟
باوعتلها :- اسمي شهربان مو هاي
- عوذة تريد تاكللها بشر
أباوعلهم عاقدة حواجبي ووجهي كله مبينة بيه الضوجة
مُُتيم يباوعلي ساكت اجى سد باب در وگال لأبنه
- بساع وصل البنات وردلي لا تبطى هناك الوكت تأخر
تحركت السيارة ومشينا مبتعدين بالطريق هاجر تحاجيني وعلي يحجي يريدني أرد واني ساكتة
أول موگف السيارة گدام بيت فدار نزلت بسرعة
بابهم الكبير مال گراج جان مفتوح الكراسي جامعيهن برة واحد فوك اللاخ والگاع مغسولة بالجديد
مدخلت ..
مشيت بوجهي للحديقة گعدت هناك ايدي على وجهي
ضلت حجايتهم تدك براسي مدري شبية كُلش أخذ الموضوع أكبر من حجمه عندي
يعني شقصدها " لا تعمليلنا سالفة " اني صرت مشكلة ؟
وهذاك الأگرع مصدك نفسه حتى يطردني عبالك اني كاتلة روحي حتى انام ببيته والله فلا أرجعلهم بعد
على صفنتي حسيت بحركة يمي وخيال صار فوك راسي
انداريت شفته مآب بيده عكازات طبية يمشي عليها ساندة جسمه بدون لا يطخ رجله المچبسة عالگاع
وگف يمي رجعت درت وجهي بضوجة هو حس عليَّ
مآب :- شبلاج گالبة الخلقة
- مبية شي
- لا مبين وجهج يتلاطم
ضليت ساكتة شوي رجع ندسني بعكازته بخاصرتي
درتله :- هاا
- وجعااا
- عوفني مآب والله مالي خلك
- احجي شنو مضايگج
سكتت أباوع للحديقة ببال شارد وأتنفس سريع منفعلة داخلي مشتعل نار نارر رفعتله راسي
- اني بنية مو زينة مو ؟
- من گال
- كلهم يگولون
- انا ما گلت
- انتَ أولهم ..
فتح عيونه متفاجئ :- انا ؟
- اي انتَ بيوم الطلعتوني من ذاك البيت وحكمت عليَّ گتلي وحدة بربوك حالج من حال البرابيك بذاك البيت
أحجي منفعلة نزلت دمعتي درت وجهي مسحتها بسرعة
- ما جنت گاصدها من كل گلبي
- كذاب
ضحك يقلدني :- والله مو كذاب
نزلت دموعي واني دايرة وجهي عنه لا يشوفني بس صوتي واني اجر النفس فضحني
مآب :- يول شبلاج بس گليلي أحد محاجيج ؟
- كارهة روحي أدري اني وحدة متسرعة ومرات أسوي شغلات مدري شلونها بس متكون إلي بيها نية سيئة والله يأذوني ومن أرجعلهم الأذية يگعدون يحاسبوني على رد فعلي لأذيتهم وأطلع اني الغلطانة ومو خوش بنية
أحجي وأرفع بملابسي أمسح دموعي
- انتِ گلبج أنظف من گلبهم وذنبج أطهر من ذنبهم
باوعتله من بين دموعي ساكتة اجانا صوت أخوه من ورى
مؤتمن :- هاي انتِ هين وأمج صار ساعة تدورج جوة
درت وجهي عليه بعده بالدشداشة الشماغ على كتفه وملامحه حتى وهو طبيعي تحسه منفعل وعصبي
سند مآب خلاله كرسيين بالحديقة واحد گبال الثاني گعد ورفع رجله عالكرسي اللاخ
رجع يحاجيني :- ليمت طلعتن من البيت انتِ وذيج الخانسة ما دحگتچن أبو علي گال انا أخذتهن من الباب
ضليت ساكتة يعني مگايللهم
دك تليفونه مشى يخابر على مسافة من يمنا جريت غصن صغير يابس صرت أحرك بالتراب
- يولي
انداريتله گال :- لا تتضايگين من الحجي الناس إلهم الظاهر ما يدرون شنو بنيتج لا تعتبين على أحد
هزيت راسي وگمت وگفت واني أنكث ملابسي
مشيت شوي عنه ووگفت أباوعله ظهره عليَّ
طلعله جگارة ورثها وصار يدخن رجعتله
ذب نفس وهو يباوعلي :- هاه
- اريد اسألك سؤال
- گولي
- تعرف محامي زين يگدر يمشيلي بالدعوى مال حضانة
- حضانة بنتج ؟
هزيت راسي گال :- سهلة بس انتوا عاقدين محكمة ؟
- لا
- عجل لازم تصدقين عقد زواجكم
- شلون يعني ؟
- تجيبين عقد الشيخ والشهود الشهدوا ويتصدق
- عندي العقد مال شيخ
- هم يفيد بس هم بعد ينرادلج شهود ولازمج شغلة لخ
- شنو
- تطلبين إثبات نسب
ضليت صافنة مفهمت شي هو حس
كمل كلامه :- يعني يدزون عالطفل يفحصون دمو ودمج تاتثبتين هي بنتج
- هذن كلهن سوة ؟
- على حد علمي يصير بس بعد المحامي هو يرتبها أكثر قانونيًا حسب شطارتو
- زين تعرف انتَ محامي يسويها إلي
- أعرف بس لو نحاجي أبو علي أحسن كلهم ربعو وهو يدلينا على واحد مضبوط يخلصلنا الشغلة بچم جلسة
رديت بسرعة بانفعال :- لا ماريد هذا الأگرع خيولي
- ها هاا مو هساع گلنا خوش بنية عش هالتجاوز
ضليت ساكتة مكتفة ايدي لصدري وهو يباوعلي بشك
ضيك عيونه :- يولي احجي الصدك هو تيم المكدرج ؟
- لاا
من حجيتها طلعت ماما من البيت صاحت بأسمي عفته ومشيتلها بسرعة طبيت جوة دخلنا لازمة بيدي
شدن :- خوفتيني عليج فجأة اختفيتي لحد ما احاني مؤتمن گلي تيم ماخذج انتِ وهاجر لبيتهم
- اي صارت بسرعة وانتِ جنتي ملتهية
من فتنا صارت فرحة بوجهنا وگدامنا هاجر وعلى جهة گاعدة هديل ويمها ابنها تلبسه بتيشيرته
وأسمعها ترزل بيها :- مشيتلي چم يوم عن البيت طارت وفرت
هديل :- بت البومة فوك راسها شلون ما ترديها تطير وتفر
حجتها وهي تباوعلنا اني وماما دا أحجي جرتني ماما درتلها عضتلي شفتها بمعنى اسكتي وسحبتني للدرج
مشينا عنهن وأسمع هاجر تبررلها
هاجر :- والله عمة ما ببالي نتأخر لهساع طار الوكت واحنا ننظف
صعدنا للغرفة فاتت وسدت الباب
321 تعليق
- ليش مخليتيني أردها ؟
- شتردين ترى هذن ميسكتن ليروحن يطلعن حرگتهن بمرة مآب
- دترزل بيها من وراي معليها هي اني أخذتها
- مراح تسويلها شي فدار هنا لتخافين
باوعت للغرفة :- لعد اني حروح خاف يجي
- لا ضلي هنا راح ينام جوة يم مآب اليوم
انتبهت لرجلي وسألتني عليها گتلها انجرحت واني أنظف
بدلت ملابسها لبست لبسة خفيفة وگعدت تمشط بشعرها وتتعطر واني أحاجيها على حجي مآب
ضفرت شعرها وخلت گيتر طفت الأضوية عافت إضاءة صفرة خفيفة مشتغلة بالغرفة مددت واني أباوع للسگف وفكري كله بموضوع الدعوى والمحامي
جرتني لصدرها :- لا تحملين نفسج فوك طاقتها يماما غمضي عيونج ونامي والصباح رباح
- ما أگدر ما اگدرر فكري كله بيها
اختنگت ودمعت عيوني :- ماما متخيلة من جبتها ولهاليوم مشايفتها بس مرة وحدة أقل الخمس دقايق وعماتي جرنها جر من حضني حتى مشبعت منها
- ولا راح تشبعين
تنهدت تنهيدة طويلة وايدها تلعب بشعري
گالت :- وكلي أمرج لرب العباد هانت والله هانت بس ريحي نفسج شوي
سكتت شوي ورفعت راسي أباوعلها
- عود ليش من أجيب طاريها تسدين الموضوع بسرعة
- گلبي ينقبض من تذكريها مجنت رايدتلج ضيم الضنى بهالعمر
رجعت راسي على صدرها :- ردتجن تكملن دراستجن وتتخرجن وراها لاحگات عالزواج والأطفال بس كُلشي صار لا عالبال ولا عالخاطر
سكتنا اثنينا بديت أغفي شوي شوي لحد منمت
گعدت الصبح بس اني بالغرفة وأسمع صوت زلم وهذا مؤتمن المغثة صوته شعلوه بس يصيح
گمت باوعت من الشباك يطل عالحديقة صدك شفته هناك يتأمر على هذا وذاك والگراج متروس شباب
شنو معقولة عزيمة لخ ؟ ..
رحت للحمام غسلت وجهي عدلت شعري بأيدي شلون مكان وخليته مفتوح ونزلت جوة
هواي نسوان موجودات بس من گرايبهم يشتغلن
گلت أصير خوش بنية وأروح أساعدهم خلصتها أفتر ورى ماما تروح منا وتجي منا لحد ما اندارتلي
- تريگتي ؟
- لا
- اوگفيلي هنا هسه اجيج
راحت للمطبخ شوي ورجعتلي بيدها لفة وكوب چاي
اخذتهن منها :- سلكي روحج بيها لبين ميجهز الغدة
- شنو هم عزيمة ؟
- جاييلهم زلم حتى فدار عود ديرجع اليوم لبغداد خابر مكان شغله بلغهم أجل روحته لباجر
- والله اني من الوزارة هذا رجلج إلا اطلعه چلاليق عايف الوطن وملتهي بخطار بيته
خزرتني كاتمة ضحكتها وتتلفت
- عزة بعينج صوتج لا يسمعونج شيخلصنا
رجعت لشغلها إلتهت واني گعدت عالدرج آكل صرت فرجة للرايح والجاي كلها تباوع حسيت روحي بية شي
حتى اللفة مكملتها گمت غسلت وباوعت داير مدايري
ماكو أحد تسحبت للغرفة البيها مآب المكان الوحيد الهادئ بالبيت ومحد تتقرب لهنا لأن هيج وكت ياخذ علاجه يسطره سطر وينام
فتحت الباب دخلت وسديته على كيفي باوعتله نايم ولا حاس بالدنيا تقربت يمه جريت باكيت جگايره
گعدت ورى الميز صار بيني وبينه طلعت وحدة خليتها بين شفايفي وشغلتها وية طگة الجداحة اجاني صوته
مآب :- ياهو هين ؟
مديت راسي والجگارة بحلگي وهو رفع راسه يشوف
فتح عينه :- لا يا طايحة الحظ
فز من مكانه گوة يتحرك أشرلي
- جيبيها شو جيبيها
حجيت والجگارة بحلگي :- ما
- لجج بان لا تسودنيني جيبيها گتلج ما أگدر أگوم
- وهو المطلوب
گام يطحن بروحه ويغلط عليَّ ماد رجله ميگدر يحركها
استغليت الفرصة دخنتلي وحدة سريع سريع ومديت ايدي دا أرجع الباكيت انضربت حيل على ايدي
صرخت بوجع وباوعتلها لازملي وحدة من العكازات
- شبيك شدعواك هي جگارة
- أدبسز طايحة الحظ ما ينلامون بيج
گمت أهفي بأيدي أوخر بالدخان
- أحتاجها أرتاح عليها
- طياح حظ هاذ اسمو
- والله مو بيدي هذا العلاج اللي دا آخذه مدري شلونه مديسوي حاجته
فتح عينه :- بعدج تحنين للحبوب ولج ؟
دنگت راسي :- لا
خليت گذلتي ورى أذني وباوعتله :- بس من أتضايق ويضيك صدري أحس روحي تلوب وتحترك أريد أي شي يطفي ناري وأركض للجگاير
ضل ساكت ومركز وياي أشوف تعابيره متضايق مني
- عليك الله لتگول لأحد
- هي هم عايزة تاتروحين تگليلهم هو عزمني على جگايرو وتزينين راسي وراسج
ابتسمت :- خوش فكرة
مشيت منه وهو يغلط عليَّ طلعت وسديت الباب وراي
صارت بوجهي مرة أخوه شافتني واني أطلع ضلت عينها وراي ما اهتميت إلها
ضلوا على هوستهم لليل يلا خفّت رجل الخطار من البيت ضلوا بس گرايبهم من النسوان يلمن الهوسة
طلعت برة صار بوجهي شبير وعلى مسافة منه مؤتمن
شبير :- ها مكينة
- أگلك وين مرتك
- يم أمج
ضيگت عيوني وهو رافعلي حاجبه
- شو دا أحسها مسبة
طلعت نورجان وگفت يمي حاوطت ايدي
درتلها :- وين جنتي صار ساعة أدورج
دنحجي وشبير گال :- وخرن هيج تايفوتون
سوينا مجال ونباوع ورانا طلعوا علي ووياه ولد شاب شايلين فرشة كبيرة طلعوا خلوها بالگراج
وطلعت وراهم أخت شبير شافته
سهاد :- ها خوية بعدك هين سودة عليَّ انكسر ظهرك من ساعة رديت من دوامك لدوخة الخطار
- اي والله طفيت كلش
69 تعليق
- اخذ حرمتك ورد لبيتك ارتاح ما عدنا شي بعد
فاتوا مُتيم وخاله من برة يمشون ويسولفون بينهم
شافوا الولد ينقلون بالفراش مال بيت ليبرة
أشرلها :- شعدكم سهاد
- طلعنا الفراش تايغسلنو البنات خالي انحاس بالرجلين
صاروا يمنا
تيم الله :- وعليمن انتن تغسلنو الولد موجودين
شبير سوة روحه مسمع
- لا خلهم انا والبنات نتعاون عليهن خطية هم تعبوا من الصبح ولهساع على فرة الوحدة
ما ناقشها اندار صاح :- عليييي ..
اجاه بسرعة
- گول يابة
- تگابلوا انتَ ويمان اغسلوا الفراش
باوعوا واحد بوجه الثاني لزمتني الضحكة
- يابة انشگينا شك والله خلي بس نرد للبيت نزت هدومنا
- هو انتوا ما بينتوا للعصر يلا دحگت طولكم ورى ما فض الغدة خلصوني بساع تاتردون لبيوتكم يلا تاشوف
شبير لزم راسه عود شوفوني دايخ ما أگدر أشتغل بعد
وگعت براس علي وابن عمته وفدار هم واگف يباوعلهم تفشلوا ما گدروا يعترضون بعد
طلع مؤتمن شايل فراش لاخ خلاه فوك البقية وهديل من الباب تگلهم
هديل :- هذا هذا هم بدربكم فدوة
يمان :- ول الدور ذن گامن يجيبن ويكومن
علي خيبر :- ما صدگن
شبير صاح عليهم :- ديلا يلاا بلا لغوة زايدة
تيم الله :- عينك عالجماعة لا هم درب الشردة سواية العزيمة
- يابة بس دلزموني العودة مال ماسحة وانا أشوف شغلي وياهم
راح جابله عودة فتحها من الماسحة ووگف فوك راسهم
واني دا أباوعلهم نبهني صوته
تيم :- مآب گلي تدوريلج محامي
ضليت ساكتة وهزيت راسي بلا ما أباوعله
- ما تحجين ؟
باوعتله بسرعة :- اي اي مو دا أهزلك راسي
- وعش تنترين نتر
- اني لو انتَ مدري شلونك من البارحة بس تشمر بالحجي
- انا أشمر حجي ؟
ضليت ساكتة مجاوبته هز ايده :- سوادين اي والله
خاله واگف قريب يسمعنا صاروا يحجون بالدعوى مال حضانة وهذا الأگرع يعددله أسماء محاميين جماعته
فدار :- بس لازم تاخذها وتروح لبغداد غير ؟
هز راسه گتله :- ليش ببغداد
- لمحكمة الأحوال الشخصية مال كرخ نمشيلج بيها
سحب نفس من جگارته وذب الدخان :- اصبريلي بس تاخابر المحامي أستفسر منو وآخذ موعد تا آخذج ونروح ونشوف إذا أمج تروح ويانا
حجاها وباوع لخاله
فدار :- خوش حجي عجل من تتأكد من صاحبك جيبهن وتعال
فات مؤتمن من برة صاح لأبوه راحله
مُتيم باوع لنورجان اللي بس عيونها تدور بينهم وهم يحجون سوالها حركة بوجهه ابتسمت
- ليمت امتحاناتكم ؟
نورجان :- مضل شي عمو بس هالشهر ونگعد منتظرين بس ينطونا الجدول مال إمتحانات
- خلصت السنة شدي حيلج
هزت راسها اجت عينه عليَّ
كمل كلامه :- تا تبدين انتِ وهاي السوادين تتحضرن للسادس
شهربان :- يصير ؟
- ان شاء الله بس خلي نفض من سالفة ريحانة ونلتهي وراها بالتقديم مال خارجي
صاحوله من برة راح طلع أحس هم كبير إنزاح من صدري
نورجان :- من ترحون تجيبوها عادي أروح وياكم ؟
- ميخالف ناخذج بس ادعي تتسهل الأمور وتمشي بسرعة
- صرت خالة إلا أشبعها ملابس وألعاب كُلشي أشتريلها
ابتسمت وعيني على شبير وهو يصيح عالولد
عافهم واجى يمنا راد مَي ويسب بيهم
جبتله من جوة ورجعت انطيته لگيته على وگفته ويباوع لنورجان ملزمها العودة ماخذة مكانه
شهربان :- هسه يلزموها يكتلوها
- تاگطع البرجلي على راسهم مناعيل الوالدين
اجتنا تركض بيدها موبايل وباكيت جگاير يصبن مَي
نورجان :- شُبير موبايلك غرق
- لااااا
أخذه منها بسرعة يباوع بيه ويتفحصه ولا يشتغل
- وين جان ؟
- ما أدري عفته عالصبة والولد من ديرشون ممنتبهين وتبلل
صارت روحه بخشمه وعاگد حواجبه
نتر بيها :- غبررة ثولة أكو واحد يخليه بالگاع كلها مَي
انقهرت وصوتها اختنك
- ما أدري شبيك
- ثووولة
گامت تبجي وهو ولا عبالك توه ديضحك ويتشاقة
- دتگولك الولد ممنتبهين وذبوا عليه مَي شعليها دتصيح عليها ؟
- انتِ سدي حلگج
فتحت عيوني وبعده عينه بالموبايل
رفع عينه يباوعلها :- ابجي يولي ابجي على حظي الردي
عافتنا وفاتت جوة تشاهك
- شُبيرر شبيك شنو هالأسلوب هذا
أشرلي بأصبعه :- اششش اشش يولي سدي حلگج ما يجي من حدر راسجن بس المصايب انتِ واختج كاتلجن الثول
- لتتجاوز
- سايبات وطايحات حظ وما فوك راسجن اللي يربيجن تايطلعلجن گلب
- متربيات أحسن من تربيتك السكير أبو العرررك
فتح عيونه حيل واجاني رجعت ليورى بخوف
صاح :- ياهو السكير ولجج ياهو السكيرررر
على صوته انتبهولنا الولد
- انتَ السكير مخايفة منك
- أنعل أبووج اليوم لابو الجابج
لزمني من شعري يعت بية واني لازمة ايده الولد أجوا يتراكضون والبنات طلعن من جوة على صوتنا
اني أغلط وأسب بيه ودموعي تنزل وهو يصيح ويسب
بس سباته قوية وكلها على بابا شاطت روحي
گوة فلتوني من ايده وعلي دفعني بعيد عنه وهو يتهادد
صحت :- امداك وامدة أمك الخايسسس الحيوان عود شوفوني اني زلمة تفووو عليك
حجيت هيج لو ثور وهاج دفعهم عنه ولگفني من بينهم دغمني براسي والحيوان ايده ثگيلة ضربته تأذي
لزمت ايده عضيتها حيل نترني وچلب بيدي لواها ورى ظهري بكل قوته أحس روحي راحت
لحد مفات خاله من برة صاح بيه اجى دفعه عني
شافني أبجي وأشهك لازمة ايدي تخبل عليه
فدار :- طايح الحظ سسسگط شنو تمد ايدك عليها
- ما تحترم خالي ما تحتررم هيج بت برعة ووكحة ما دحگت بعمري عررررج سجودة البربوك يمشي بدمها
سهاد :- سبت أمو خالي انتَ ترضاها هالبزر تجيب طاري الموتى على لسانها الوصخ
فرحة :- عبنها أدبسز وبت مستهترة زلمة لا بعمرج ولا بگدج شنو انتِ تا تتجاوزين عليه
نزلت دموعي وأشهك وأأشر لفدار على شبير
- هو همممم سب بابا
ديحجي صاح بيه خرسه
- حدددك هين ولا چلمة لا تخليني أدحك خلقتك بعد ولي عن وجهي
باوعله متفاجئ :- خالي صدك تحجي
- اكلللل تبن واطلع يلا
دفر الباب برجله حيل وطلع وخاله يغلط عليه وهذن تگابلن يمه يحجن عليَّ ويلومن بيه شلون طرده
تجاهلهن واجاني جرني من ايدي فوتني جوة
گعدت بالصالة والشهگة بعدها بصدري ايدي موتتني
- شو ايدج بس أشوفها
طخها شاغت روحي صحت متوجعة ووخرتها بسرعة
باوعلهن صاح :- شدن وين شددددن اندهنها
ماما جانت بالطابق الفوك متدري بالصار لحد منزلت هي وراها هاجر ونورجان عيونها مورمة من البجي
اجت مفزوعة أول مشافتني
شدن :- شبيهاا ؟
- تگاونت هي وشبير وگضبها من ايدها دحگيها بس لا كاسرها الزمال
گعدت يمي مرعوبة تباوع لأيدي واني ميتة من الوجع
فرحة :- عش ما تگول هي وحدة صلفة ومهترة ما تگضب لسانها الزفر
- بسج عاد فضت
سهاد :- سبت أمو خالي شتريدو يدحك لحلگها الحلو
- مثل ما سبها سبتو طبو ووجع
رادت تحجي سكتها مشت ضايجة ومرة خالها وراها
رجع اندار لماما :- خليها إلها بمَي دافي ومسديها إلها
- شبيه أول تالي يتصرف هالشكل
124 تعليق
- طگت براسو بعد
گومتني للمغسلة فاتحة المَي جوة ايدي وتغسل بوجهي توخر خصلات شعري اللازگة عن وجهي
اجت نورجان وگفت بالباب
- ماما علي ديصيحلي
جان ديريد ياخذ عماته يرجعهن للبيت وصاح لنورجان
اندارتلها :- روحي ماما وراج دوام اني هنا أدير بالي عليها
ضلت تباوعلي شوي وراحت حالها مو أحسن من حالي صارت بين نارين
باوعت لوجهي بالمراية صاير أحمر دم وعيوني منفوخة وشعري صار كفشة شكبرها هلسه بيده الچلب
صرت أذب على وجهي مَي وما على لساني غير جملة
- اني إلك شبير .. اني إلك
... 《 شدن 》 ...
فاتت للغرفة بيدها مرهم
هاجر :- هذا عمة جبتو
تشكرتها وأخذته منها وعيني على بان اللي بس تصفّن وساكتة
خليت شوي على ايدها ودلكتها إلها براحة ايدي
أحاجيها مترد الوجه جامد ما بيه تعابير
هاجر ضلت واگفة بالباب تباوعلنا
گالت :- عمة آخذها يمي بالغرفة ؟
درتلها ورجعت أباوع لبان
- ترحين يم هاجر ؟
- اي بان حبابة تعاي بس انا لوحدي محد بيها
- خليها معاجبها
قاطعتني وهي تگوم :- راح أروح يمها
أخذتها وطلعن تنهدت تنهيدة طويلة ولزمت راسي
فات فدار للغرفة
فدار :- هاه شلونها هاي بنتج أم سيقان
- أيدها تأذيها بلكي منا لباجر يخف الوجع
انتبهت ديحضر بغراضه :- حتطلع اليوم ؟
- الفجر على فرغة الطريق
ضليت ساكتة عيوني تراقبه وهو يتحرك انتبهلي
گال :- شبلاج حايرة بزمانج
وگفت گدامه أحاجيه برجاء
- فدار فدوة خلي نرجع وياك
رد بسرعة :- لا
- عليك الله يعني گعدتنا هنا شنو وانتَ تروح الأسبوع كله وتجينا يوم حتى منفهم منك شي شنو هاللذة من الفگر ؟
- ما أگدر بابا افهتمي ما أگدر آخذجن ذاك نسيبج مناك سايب وذيج عمة بناتج تتهادد عليجن ما أأمن أخليجن هناك وانا هم مو مثل گبل وياي مآب ومعتمد عليه
- لعد حول شغلك لهنا
رفع راسه من التليفون باوعلي
گتله :- لتباوع هيج دا أحجي صدك
- بكل عگلج حجي لسان هو شنو
- مو صعبة انقل شغلك لهنا وفضت راحت يعني انتَ متأمن تعوفنا هناك لعد اني اللي مأمنة عليك ؟
- ما عليّ شي
حاولت وياه سدها بوجهي من كل صفحة ضليت الليل كله أتگلب بفراشي فنها عيني لو لاحها النوم
گعدت الصبح راسي مأذيني أباوع للساعة تسعة الصبح
ما أدري بروحي شوكت نمت فدار رايح حتى ممگعدني
ضليت مسطورة النهار كله دوخة فضيعة لازمتني گوة أجر بروحي جر وعلاجي أدور عليه مدا ألگاه
گلبت الغرفة گلب ودورت بين ملابسي .. طار
للظهر جاييلهم خطار وفرحة على راسنا اني والبنات ومؤتمن كل شوي يصيح چاي، گهوة
بنت فدار الصغيرة انتبهتلي
گالت :- عمة دايخة ؟
- كُلش
- روحي ارتاحي احنا هين كافيات
مشيت عنهن وأسمع هديل تنتر بيها وراي
صعدت لغرفتي مسيطرت على روحي رأسًا لزمت الفراش خليت راسي ونمت وجريتها للعصر
گعدت على ايد بان وهي تهزني فزيت عرگانة
شهربان :- اسم الله حبيبتي شبيج گالن البنات تعبانة وشفتج تأخرتي بالنومة
مسحت وجهي وطمنتها گمت غسلت ونزلنا اني وياها
اجتني هاجر گالت :- عمة مؤتمن رايدج
مشيتله للصالة گاعد هو وامه وخواته اثنين وعلى جهة زوجته تصبلهم چاي
مؤتمن :- أم بان حاجية لأبو علي علمود محامي مو ؟
هزيت راسي وباوعت لبان اللي فز گلبها
گال والجگارة بحلگه وبيده استكان چاي يخوط بيه
- هساع خابرني بلغني أگلج تتحضرين انتِ وبان هاليومين تطلعون لبغداد
ضلت عيني على بان تريد تطير تطير وصدرها يصعد وينزل بسرعة تنفسها سريع
فرحة :- شعدهن غاد ؟
ضل هو يسولفلها على موضوع بنت بان واحنا طلعنا
شهربان :- حترجعلي هو گلي اني أجيبها إلج
- تيم ؟
هزت راسها مبتسمة ضحكت لضحكتها
مشيت للمطبخ اريد آكل لگمة من الصبح معدتي فارغة
شدن :- متغدية ماماتي ؟
- لا
- ليش لهالوكت بلا غدة
- ما اشتهيت ..
هاجر واگفة يمنا گالت :- حتى هاجر ترى مماكلة
- شبيجن اليوم
هاجر :- تريگنا متأخرات وما اشتهينا بعد
حميت الأكل وصبيت إلي وإلهن وهاجر تعاوني وبان يمنا گاعدة تسولف بريحانة روحها متلهفة لشوفتها
گعدنا ناكل تلاثتنا وهن يسولفن بينهن
- ماما مُتيم گال بس نخلص من موضوع ريحانة أقدملج خارجي للسادس
باوعت لهاجر :- وانتِ ليش متكملين ؟
- لا يمعودة شكمل ويني انا وين الدراسة
- شنو المشكلة
- ياهو اليرضى ؟ أبوي بطلنا من وكت ما عدنا بنية تكمل أختي الجبيرة تگاونت وياهم مگاون وبطلاع الروح خلاها تخلص الثالث متوسط وگعدها أول واحد دك بابها انطاها
- وانتِ ؟
- انا واختي من صرنا متوسطة أخوي بطلنا ما خلانا نكمل يگول عيب شكبرجن وتمشن للمدرسة گعدنا وسكتنا
- هذا الحجي يم أهلج هسه انتِ مرة متزوجة معليهم بيج
- ومن گال هنا يرضون
- فدار يرضى وإذا مقبل ماما تقنعه مو ؟
باوعتلي خزرتها عضت شفتها تضم الضحكة
رجعت تگلها :- تقنعه مثل مقنعته بيوم اللي شلت شاربه بالمكينة وهي تگوله مزيل
- ياا طرگاعة على راسج وگضبج ؟
- ويييين يلا عرف بالسالفة مدري منو الكسيف اللي فتنله لو مآب لو شُبير الغثة
شدن :- كافي أكلي
حجيتها واني أشوف هديل تفوت هذن ميصدگن بس يسمعنها يسولها سالفة شكبرها لحد مطلعت
شهربان :- هسه مگلتي تردين ترجعين لو لا ؟
- ها ما أدري
- شوف حظي لعد منو اليدري شعندج مگابلة الحيطان إلتهيلج بشي أحسن باقية جوة رحمة فرحة البربوقة وبناتها
- باان
باوعتلي خزرتها اريدها تسكت وهي ممهتمة
هاجر :- ما ادري والله أشوفنها صعبة
- لا صعبة ولا شي مبينة انتِ وحدة كسولي مو صوجج
- هههههههه لا والله جنت زينة بالمدرسة
عفتهن يسولفن وگمت للمطبخ دا أسويلي چاي
فاتت زوجة مؤتمن انتبهت لعلاجي عالكاونتر
- هذا من شوكت هنا واني انثولت عليه بالغرفة
- يجوز ناسيتو
أخذت حبايتين وشربت مَي انتبهلتها متوترة وتباوع للباب مال مطبخ وتتلفت وترجع تباوعلي
- خيرج رشا
رشا :- أم بان انا من أمس رايدة أحاجيج
تحجي بصوت ناصي وكل شوي تندار للباب
- خوفتيني وكلام الله گولي شكو
- بنتج هاي صار يومين أدحگها تندار للحجرة البيها مآب وتسد الباب تاخذلها بالساعة يلا ترد تطلع
يبس الدم بجسمي تلعثمت ورديت بسرعة
- لا عيني متوهمة ترى مبينهم شي بس هب من جنا ببغداد متعلمة عليه وبينهم ميانة واجت لهنا عبالها الوضع مثل هناك
- إذا تدرين انا اسكت بعد وإذا ما تدرين هاي انا بلغتج تشوفين شغلج وياها ترى تجيب العين لروحها ووادمنا ما ترحم واحنا عتدحگين بيتنا ما يفرغ من الخطار
ضليت ساكتة بس صرت أغلي أغلي من جوة
تشكرتها ووصيتها :- بس عفية رشا لتجيبين طاري لأحد اني أحاجيها بعد متفوت للغرفة
- يا لا توصين عش انا اجيتج
- اي فدواتج
طلعت واني أخذت كوب الچاي وانتظرتها بين مخلصت غداها وغسلن المواعين هي وهاجر جريتها على صفحة
231 تعليق
- شكو يوم شبيج
شدن :- صدك تتحجين انتِ تردين تزينين راسي
- غير دا أفتهم شكو منفعلة
- شعندج بغرفة مآب ؟
ضلت ساكتة تباوعلي رجعت شعرها ليورة
- ما عندي شي
- بان لتكذبين ترى وصلني الحجي شعندج بغرفته ؟
- ممسوية شي والله شبيج
- رجال متزوج أول وتالي يبقى محرم عليج شنو فايتة غرفته لوحدكم
فتحت عيونها :- دتشكين بية يعني ؟؟
- أشك بيج شنو طايحة الحظ مو تعرفين بمآب عينه عليج ؟ ولتگوليلي ماكو شي مو غشيمة اني
بهتت ودنگت راسها مختنگة
- والله ما بيناتنا شي
نصيت صوتي أتوسلها
- فدوة لوجهج ماما لتسويلي مشكلة وتجيبيلنا الحجاية شكلك مصار كم يوم من اجن لهنا مآب لتحتكين بيه ولا بأي واحد من الولد لتنسين عنده مرة
- دتحجين عبالك حاطة عيني عليه
- اني ادري بنيتج شنو بس هو ما أعرف شنو نيته تجاهج لا تكثرين الحجي عليكم ومآب تجنبيه أريح لراسج وراسه
هزت راسها واحنا دنحجي مرت بنت فدار الصغيرة ضلت عينها علينا ومشت عبرتنا ..
... 《 نورجان 》 ...
مر أسبوع بالدوام بطلاع الروح لحد موصلنا للخميس
بان كل شوي تتصل تسأل عالوصتني عليه
كشيت مديت راسي باوعت برة الغرفة
سمعت صوت الدوش بعده ديسبح بالحمام
مشيت بسرعة لمحفظته سحبت منها خمسة وعشرين ضميتها بصدري ورجعت المحفظة لمكانها
انداريت بفزة على صوته
شبير :- نورجان طالع ساعتين برة ما أرجع لليل شلون تضلين هين لو آخذج لبيت خالي ؟
- لا حخابر علي ياخذني لبيتهم يم در
ضل ساكت يباوعلي بشك واني أبلعم گوة لازمة روحي
اجاني وگف گبالي
- بس لا بعدج زعلانة على زعلة أختج ام خشم اليابس
رديت بسرعة :- اي
- ختولي فد وحدة أدبسز لسانها زفر
71 تعليق
- انتَ هم سبيت أبونا ترى وبان كُلشي ولا تجيب طاري بابا گدامها بحجاية محلوة
- وهي هم ردت سبت أمي يعني وحدة بوحدة
- بس انتَ ضربتها
- وهي عضتني دحگي لهساع أثر سنونها طابع بيدي
يحجي وواگف گدام المراية ينشف بشعره
كمل :- وخالي مناك طردني من بيتو لخاطرها وانتِ هين گالبة الخلقة صار چم يوم
مشيت يمه صرت گدامه اتوسله
- خلي ناخذلها هدية ونروح نراضيها والله هي گلبها طيب وتحبك بس انتَ زودتها وياها ذاك اليوم
- خاب اتخسى انا اعتذرلها فوك الطردة الأكلتها من خالي اشتعلت روحو وروحها بفرد نار وحدة
- يعني متروح ؟
- أگلها خالي طاردني تگلي نروح لبيتو تغنين انتِ
لبس ملابسه أخذ موبايله والسويچ وطلع من الغرفة
- والله تستاهل شما تسوي بيك حقير سائب
مد راسه :- شگلتي ؟
گلبي صار بين رجلي وانخطف لوني فات للميز أخذ محفظته
گال :- شبلاج وجهج يلطم تردين انتظرج آخذج وياي ؟
- لا لاا روح اني اتأخر بعدني ممبدلة
- يلا لتتعطلين تاخابر علي يجيج
رجع طلع يلا جريت نفس عبالي سمعني
بدلت ملابسي وسمعت صوت هورن من جوة لبست شوزي اخذت الفلوس والموبايل ونزلت بسرعة
قفلت الباب وطلعتله صعدت بالسيارة
علي خيبر :- قفلتي البيبان ؟
- اي
حرك السيارة مشينا شوي ترددت بالبداية لحد متشجعت
گتله :- علي عادي تمر للصيدلية ؟
- شعندج
- محتاجة كم غرض مناك
مگال لا طلع بينا للشارع العام ووگف گبال صيدلية
دا أنزل گال :- اگفي تانزل وياج
- لا لا ما يحتاج هسه بسرعة اجي
73 تعليق
مقبل لح تذكرت شوصتني بان
گتله :- محتاجة غرض نسائي
حجيتها بسرعة بدون لا أباوعله هو أفتهم هز راسه
وگف السيارة على مسافة من الصيدلية مد راسه يباوع
- روحي يلا هي بنية الواگفة أصلًا
نزلت بسرعة دخلت گدامي رجال وزوجته مشتهم وباوعتلي
- گولي عيوني
ضلت عيني تدور عالصيدلية والأدوية وأهز برجلي
رجع فززني صوتها :- گولي حبيبتي شتدورين
عدلت وگفتي گتلها على حبوب منوم سألتني لأي عمر
گتلها :- رجال بالغ
- شنو الأعراض المخليتو مينام
- يشرب چاي هواي
ابتسمتلي انطتني واحد حاسبتها عليه وأخذت كيس سانتي مثل مگالتلي بان حتى علي ليشك وطلعت
رجعنا لبيت عمو تيم هناك بان خابرتني گالت من أرجع لبيتي أسولف وياها بالمحادثة حتى شبير ليسمعني
بقيت يمهم لليل يلا اجى شبير ورجعنا للبيت
يوم خميس وباجر عنده عطلة يخلصها سهران بالصالة عالتلفزيون والچاي محضره عالطباخ
مشيت لهناك وعيني عالصالة أتلفت خليت المنوم بالكتلي مال چاي وخطته وبان گلتلي أخلي كمية لأن الچاي يقلل مفعول المنوم
عفته بسرعة ومشيتله :- محتاج شي
- راح تنامين ؟
34 تعليق
- لا بعدني گاعدة يمكن حگعد ادرس
- خميس وتدرسين ؟ منين نزلت هالشطارة عليج
- إمتحاناتي مبقالها شي
هز راسه مشيت للغرفة ضليت گاعدة على أعصابي حاولت ألهي روحي بالدراسة وبان كل شوي تراسلني
شلت كتابي وطلعت من الغرفة مديت راسي للصالة
كتلي الچاي يمه وهو يصب ويشرب
ضليت أحوص أروح وأجي اباوعله هو انتبهلي
شبير :- باجر نورجان باجر تعبان هساع
شاف الكتاب بيدي عباله دا أگوله درسني رجعت للغرفة
أخذتلي بالساعتين إلتهيت عنه گمت دا أشوفه
التلفزيون بعده مشتغل وشبير ماكو تقربت من ورى التخم لگيته نايم متمدد وايده على عيونه
ركضت للموبايل راسلتها
( بان نام شسوي هسه )
( متأكدة ؟ )
( اي )
( اصفگيه راشدي تأكدي بالأول )
دزت مسج ثاني
(المكينة وين ؟ )
( هيانها يمي )
( زيني شاربه وصوريلي )
باوعت للمكينة مترددة وميتة خوف اخذتها ومشيت لهناك
وگفت أباوعله تقربت أهمسله
- شُبيررر .. شُبيرر گاعد لو نايم ؟
ضربت خده عالخفيف ماكو هو والميت سوة
68 تعليق
شغلت المكينة وتقربتله شالت شوي من طرف شاربه وخرت بسرعة ايدي ترجف
گمت خابرتها :- بان والله اخاف ما أگدر شكله يكسر الخاطر شلون نايم
- أشعلج انتِ ورجلج لج امشي كملي الگتلج عليه وصوريلي
حجيت بتردد :- بان ..
- وروح بابا يا نورجان إذا مسويتيها بعد ما بيناتنا كلام
سدت الخط بوجهي رجعت لمكاني لزمت المكينة مشيتها شوي على شاربه ودموعي تنزل
عالنص وگفت مگدرت أكمل شلت التليفون صورته ودزيتلها الصورة فتحتها وخابرتني بسرعة
نورجان :- مگدرت خفت والله
- اشتعلت روحج لو مخليتني ماخذة شاربه كامل ولا هالدگة
- حموت بان والنبي إلحگيني بس يگعد ويشوف يموتني كتل
- خابري علي گوليله يجيبج عدنا
- وشُبير ؟
- خليه يولي هو يگعد الصبح يشوف روحه بنص شارب
سديته منها وخابرت علي واني أبجي ضل يسأل شكو وشبيج عباله متعاركين اني وشُبير استعجلته يجي
بدلت ملابسي وقفلت كل بيبان البيت وطلعت انتظر بالحوش عشر دقايق وسمعت هورن السيارة برة
طلعتله بسرعة صعدت وهو يباوع يريد يفهم
- عليك الله امشي
علي خيبر :- بس فهميني شصاير عمي طاگج ؟
- لا لاا والله
- عجل شبيج
- أريد أروح لماما
- ما رضى ياخذج ؟
هزيت راسي هو افتهمها هيج وصلني لبيت عمو فدار للباب وراح دفعت الباب الخارجي وفتت جوة
بان منتظرتني بالحديقة تروح وتجي
اجتني حضنتني باوعت لأيدي بعدها الرجفة بيها
شهربان :- علي يدري ؟
- لا گتله شُبير نايم قفلت البيت واجيت
76 تعليق
- زين سويتي
دخلنا جوة ماما تفاجأت بيها معبالها أجي بهالوقت
خلصتها شلون وشلون ميتة خوف وبان تطمن بية إلتهيت سوالف وية البنات نسنّي السالفة شوي
ثاني يوم الصبح الوضع سكتة شبير ماله صوت
ولا أحد يدري بالصار ضلت بيني وبين بان
نزلنا الدرج نضحك واحنا دننزل صار بوجهنا شبير گاعد بالصالة يمه مؤتمن ومآب طالع من غرفته
سويت درب الشردة رجعت وگفت بنهاية الدرج
وبان كملت مشي للصالة وگفت بالباب تباوعله مبتسمة
كتفت ايدها لصدرها نزلت كم باية أريد أشوفه
شهگت وخليت ايدي على حلگي مزين شاربه كامل
رفع راسه اجت عينه بعينها عض شفته ويهز راسه بتوعد عود بعيني
مآب اندار شافها ورجع يباوعله
- يول لو بان ببيتكم جان گلت هاي عمايل الكلفة شالتو إلك بمكينتها بس يابة بت فقيرة گاعدة وساكتة
بان :- مو ؟
- شنو أول تالي تزين شاربك الشارب عزيز ولك
56 تعليق
- تغيير
حجاها وهو يباوعلها عرفته مستحي يگلهم عليَّ
رجع ظهره عالتخم گال :- أختج وين ؟
- مريضة بالفراش
- يا عيني سودة عليَّ
- اي والله تكسر الخاطر حرارتها كُلش مرتفعة
- اندهيها عجل تاخذها للدكتور
- لا لا ميحتاج سويتلها كمادات هسه تصير زينة
- هااا عدها العافية
- الله يعافيك ونعيمًا عالحلاقة الجديدة
حجها بإستفزاز ودارت وجها أحسه يريد يطلع بروحها
ضل شوي يم الولد وراح واني ضليت معلگة فوك
من طلع من البيت خابر على موبايل ماما يريد بان
ردت عليه :- يابا إذا ما زينتچن حفر ما أتسمى عالزلم
- حتى شاربك زينته زلمتيش الدتحجي عنه
- هيّن وذيج أختج لا تخليني أدحگها ما مسؤول عن تصرفاتي
باوعتلي لزمتني الخوفة من صوته ميبشر بخير
- كون صدك تمد ايدك وتضربها إلا ألزم الصورة العندي وأنشرها بكل الگروبات وأكتب عليها شاهد قبل الحذف ج**** بنصف شارب وأسويك مضحكة لأمة محمد
- يا صورة ؟
- من يصير عندك نت ادزها إلك لو يجوز تشوفها منشورة عالفيس بكيفك بعد
- أشعل أصلج بان أشششعل أصلج والله
- تأدب وبعد لتجيب طاري بابا على لسانك
- ألزمج لو ما ألزمج انتِ وذيج الصفرة اااااخ يابا شمشتهي أشرب من دمچن طبك
سدت الخط بوجهه وهي أضحك رجع دز رسالة
( اشتعلت أمج على هالخلفة الگشرة )
بان :- غير لو يلزم لسانه الزفر حتى شاربك اخذته مرة اللخ شاخذلك بعد
بعدين عرفت هو مضايج بس علمود شواربه اني من طالعة البارحة مقفلة بيبان البيت كلها من برة وهو جوة من گاعد الصبح متخبل منا سالفة شاربه ومنا اني ماكو والبيت مقفول عليه متخبل علينا
ضلينا يومين كلما يجي نشرد فوك ونسد الباب علينا
بالليل نايمات عالفراش درتلها
نورجان :- شوفي بان راسلني
- شوفي شيريد
حجيت وياه يقنع بية يريدني أرجع للبيت
گالت:- لتسمعيله ديستدرجچ حتى يستفرد بيج هناك
- اي گتله ما أجي
صفنت شوي وباوعتلها :- لعد شلون ودوامي باجر
- نگلهم يجيبولج ملابسج والكتب لهنا
ثاني يوم غبت تأخر الوقت البارحة ومحد موجود يجيبلي ملابسي اجانا شبير وعمته يشوفون مآب
شبير دخل بغرفة مآب وعمته گاعدة بالصالة شافتني
شيخة :- عش ولج ما مداومة اليوم
- مجايبة ملابس عمة
- هاي بعدج ما رادة لبيتج من ذاك اليوم ؟
دنگت راسي ضليت ساكتة
اندارت شيخة لماما :- شبلاهم متلاغين هي وشبير ؟
511 تعليق
شدن :- والله ما ادري مليت واني اسألها شصاير متحجي
- احجي ولج نورجان شبلاكم كل واحد بكتر
شبير :- ماكو شي عمة صحت عليها علمود سالفة وأخذت بخاطرها گلت اخليها عند امها ترتاح
اندارينا على صوته واگف بالباب
- وليمت ناوي تردها هاي اليوم فاتها الدوام
- ما صار شي بالليل أجيها ونرجع للبيت
نورجان :- لا ما اروح يكتلني والله
- عش تكتلها ولك جعل ايدك بالكسر كون
صفك ايد بأيد :- ديلا استلم
- گومي البسي يمة امشي وياي لبيت أبو علي وفنو الگربلج هالما بگلبو رحم
- عمي ما كاتلها والله ما كاتلها شلون سالفة هاي
- شحدك تمد ايدك عليها
گمت بدلت واجى علي وأخذنا اني وعمة شيخة لبيتهم وشبير ضل يم مآب ببيت خاله ارتاحيت أكثر
بقيت ببيت عمو تيم اليوم كله
بالليل صعدت لغرفتنا القديمة وحاطة كتبي أدرس در جايبتلي الواجب من بنات صفي
ناثرة كتبي ومندمجة انفتح الباب وفات شبير
گمت لحيلي أطگطك واني أباوعله سد الباب واجاني
نورجان :- شُبير والله آسفة والله ما أعيدها
صار گدامي وأشرلي بالسبابة
- اشششش ولا صوت
نزلت دموعي ودنگت راسي لزمني من فكي رفع وجهي
جابني براشدي فر راسي فر شهگت واجيت اوگع لزمني ثبتني طلعت شهگة مني غصب عني
خزرني :- اشش ولا نفس أسمعلج
- آسفة .. والله آسفة ما .. ما أعيدها بعد
احجي وبين كلمة والثانية أشهك بجي
- لا هم عايزج تعيديها تازين راسج هالمرة صدك
ضل لازم وجهي عاگد حاجبه ويباوعلي دار وجهه استغفر
- يعني من تدرين بروحج خوثة ومو گدها عش تورطين روحج بهالسوالف
انهاريت بجي من گال هيج وهو يريدني أسكت
گال :- انا ادريج طينة كلو من حدر راس ذيج أم الفواين دحگيلي تاشوف
رفع وجهي يحاجيني :- دحگي أحاجيج انا هساع راح انسى الصار وانسى إلج ايد بالسالفة ربج يومها ما عندي دوام على قفتلج بيبان البيت عليَّ لا والله جان طلعلتج سواديني من صدك وابتليت بيج
رفع ايده يتوعد :- بس هاي اختج انا إلها ووصيها تاتمسح الصورة گبل لا أگضب هالتليفون وأكسرو براسها
هزيت راسي
گال :- مو بس تهزين براسج ويومين ترحين تفينين وياها بان مالج غرض بفواينها والله لوسمعت بعد إلج ايد بسالفة هي عاملتها انتِ تصيرين حصتي وميحتاج أگول شراح اعمل بيج سمعتي لو أعيدد ؟ بان معليج بيها بعد انتِ بكتر وهي بكتر
عافني ومشى للفراش نزع ساعته وغراضه خلاهن يم راسه وفتح الحزام ذب بنطورنه والقميص وتمدد
خلى ايده على راسه صاح :- إذا كملتي طفي الضوة
ركضت بسرعة لميت كتبي وطفيته دا امشي اطلع
صاح بية مخلاني رجعت لمكاني واگفة وخر ايده باوعلي
- ما تنامين
- عادي اروح يم در ؟
رد بحزم :- لاا
حجاها ورجع ايده على عيونه ضليت على وگفتي بالربع ساعة مقلدلي مشيت على كيفي دحست روحي يمه
جرني خلى راسي على صدره
نزلت دموعي :- أعتذر والله جنت ضايجة منك من يوم متعاركتوا انتَ وبان وشفتها شلون تبجي من ايدها
- بسج سالفة وصارت خليني ناسي لا تذكريني
هديت بحضنه رفعت راسي
- يعني مزعلان مني ؟
45 تعليق
- لا إله إلا الله يول ما زعلان بس نامي
سكتت رفع الغطى برجله فتحه غطانا اثنينا
مر شوي وكت أنفاسه انتظمت رجعت رفعت راسي أباوع لوجهه مديت ايدي فوك شفايفه مبتسمة
فتح عيونه نزيت وشلت ايدي بسرعة
- وتالي
- والله مسويت شي دا احجي بيني وبين روحي
- شتحجين ؟
- دا أگول حلو بدون شوارب
أخذله صفنة بوجهي ضحك ودار وجهه
- يول انتِ بصيحة تعترفين حتى على أمج وأبوج متعبين
رجع راسي لصدره
- نامي هساع لا تخليني أرد اكمل
من الخوفة وطبع چف ايده
على خدي غمضت بسرعة
ونمت.....
ثاني يوم برجعتنا من الدوام علي جابنا مو شبير
مر اليوم عادي وجنت خفيفة لأن خلصت من الكتلة
گعدنا نتغدة اني ودر وعمة يمنا تسألنا عن يومنا
سمعنا صوت سيارة شخطت من بعيد دقايق وفات شبير من برة شافني گاعدة دفر باب المطبخ واجاني لزمني من شعري من ورى وشالني يسحل بية
صرت أبجي وأصرخ وعمته لازمة بيه ودر تصرخ وخواته اثنين جانن يمنا يحاجنه بس يردن يفتهمن
وهو ولا عبالك يسمع سحلني لغرفة عمته شمرني بنص الغرفة للگاع وطبك الباب قفله وهم يدگدگون
بعدني ممستوعبة الصار اريد اجر النفس اجاني من ورى رفعني من شعري من الگاع سطرني براشدي ولحگه باللاخ
حسيت حرارة نزلت من خشمي عيوني غوشت واني اباوعله
لزم رگبتي خنگني شالني عن الگاع
شبير :- مو بنية ولج يالساقطة مو بنيية وتضحكين عليَّ صار سنتين
فاتحة عيوني حيل وأشهك أشمر بيدي أريد نفس عافني وگعت للگاع تكسرت تكسير وأگح حيل
منطاني مجال اتنفس رجع رفع راسي من شعري بيد والايد الثانية لزمني من فكي عاصره حيل
نزلت دموعي واني أباوعله
مشفت گدامي شبير إنسان ثاني ما أعرفه ولا شايفته
عيونه حمرر دم تريد تطلع من مكانهن خازرني حيل وعروك ايده بارزة گد مضاغط على أعصابه
هز راسي حيل :- احجي ولججج احجي منو ويامن من يمت وانتن طارحاتني زوج أنتِ وامج احجي تاما أطلع بروحج هسساع
يصرخ بعلو صوته احس وجهي تشنج گد مضاغط عليه حرف ما أگدر انطق من الصدمة
الولد كاسرين الباب من برة وفاتوا عمو تيم وأخوه سلام وولد عمومتهم اثنين واگفين ورى وعمة والبنات يصرخن
فاتت شافتني لطمت على وجها وتصيح عليه
شيخة :- شعامل بالبتتتت ولك كسسسر بيدك كون
- أطلع بروووحها اليوم والله ما تضل عدلة
دفعه عمو تيم أعصابه براسه
تيم الله :- احجي عددل ولا تضل تلوص بالحجي فهمنا شصايرر تانفهم
- مو بنييييية مو بكرر ضحكن عليَّ هي وأمها وكربسنها براسي تسمع لو لاا مو بكررررر
خواته لطمن على وجوهن وعمته مخلية راسي بحضنها واني أشهك بجي وهو يصيح ويسب ويغلط
67 تعليق
صاح بيه عمو تيم :- بسسسس اكل تبن
- كلووو منك انتَ وخالي گتلكم ما رايدها ما ررررايدها انتوا لحيتوا تا اعقد عليها تدررررري بية انا واحددد زايعتو الگاع تدري بأخوووك سگط ابن سطعش سگط شنوووو انا ومأمنها برگبتي
وهاي أخته فوك راسي تلطم على رجلها
- مو بتتت ولج يمعزاية طلعتي مو بتت وكل هالوكت ساكتة وما ندري ؟
سهاد :- مو انا ادري گتلكم ما دحگنا إلها بياض ماخذتو الحجي ديلا اكلوها تزين راسك يشبير
عمو تيم صاح بيهن وشبير يصيح مناك وعمته وگفت تحاجيه
شيخة :- بس كلي منين دريت ياهو الگلك
- ما يهمني شلون وصل الحجي هاييي بعد ماريدها هساع تجيب الشيخ تاطلگها
تيم الله :- انچببب واكل خرا تاحاجيك
- شتحاجيني أگلوووو تقشمرت بيها وامها ما صدگت زتتها براسي تا أستر عليها ماررريدها بعد وروح امي
- انا وخالي إلنا علم بالسالفة
ضل ساكت يباوعله سكت شوي وضحك عض شفته
- هو الظاهر بس انا القشمر هين وكلها تدري
راد يحاجيه عمو تيم دفر باب الغرفة بكل قوته لدرطة كسر الباب وگام يشيل ويشمر شيجي گدامه
گاعدة بزاوية الغرفة وأباوعله سادة أذني بأيدي
صوته يرعد رعد متهستر بشكل يخوف راد بس يلوحني من بينهم الولد صايرين بوجهه يردون يسحبوه يطلعونه
صاح :- ما أخليها والله ما تصيرلي بعد مررررة
طلعوه گوة يجرون بيه واني فاتحة عيوني بس الشهگة تطلع من صدري الغرفة فرغت بس صياحهم مالي البيت
گمت من مكاني وطلعت من الغرفة ليبرة للگراج وطلعت من البيت بكبره للشارع امشي سريع رجلي حافية وأتلفت بنص الشارع والشمس تدك براسي
الشهگة أحسها تطلع من روحي أمشي واروح يمنى واجي يسرى ممسيطرة على مشيتي
صارت بوجهي سيارة سودة دك هورن عالي
عيني تغوش أريد بس أركز أشوف الگدامي وگعت من طولي بنص الشارع اغمى عليَّ
فتحت عيوني على مَي ينذب على وجهي وايد تضرب بخدي على كيف أصوات وشوشة فوك راسي
لحد مركزت لگيتني بحضن ماما اللي تباوعلي وعيونها مليانة دموع ويمها بان وبنات مركزت بالوجوه
دفنت راسي بحضنها أشهك بجي وهي تحجي وياي تريد تفهم مني وأسمع صوت علي يحاجيها
علي خيبر :- والله ما ادري جنت قريب من بيت خالي دحگناها انا ويمان بنص الشارع دگيتلها هورن وگعت للگاع جبتها بساع هين
مؤتمن :- ما خابرت ابوك صاير شي بالبيت ؟
- لا والله اجيت أركض ايدي تربطت من دحگتها
شال مؤتمن موبايله وطلع يخابر وكلها تسأل شصاير
وبان تبجي لبجيتي وتگلي
- ضربج علمود سالفة المكينة مو ؟
زادت بجيتي وضميت وجهي بحضن ماما اللي متخبلة بس تريد تاخذ مني كلمة تريحها
أخذتني ساندتني هي وبان جسمي متكسر گوة اتحرك وگفت عالمغسلة تغسل وجهي من الدم
اخذتني للغرفة وتحاجيني انفجرت بجي أشكيلها
نورجان :- عرف ماما شُبير عررف اني مو بنية عرررف گلوله وفضحوني يمه ويم اهله كلهم عرفوا اني مو طاهررة كلهم عرفوا
رفعت راسي أباوعلها مصطكة الدنوت بعينها
- راح اموت ماما والله راح اموت گلبي أحسه يريد يوگف ما أتحمل حجيهم ما أريدد اسمع
... 《 شهربان 》 ...
فرفحت روحها وهي بحضن ماما صوت شهگتها احسه بگلبي
وجها صاير خريطة وشعرها فلم لحاله گوة تجر النفس
ماما تهسترت عليها احتارت شلون تسكتها ويا كلمة تسمعها حتى تخليها تهدأ شوي
أسمعها وروحي تنعصر من جوة على حالها ما بيدي شي
صوت من برة يصيح بأسم ماما باوعتلي رحت يم نورجان وأشرتلها براسي روحي گامت طلعت
بان :- كافي نورجان كافي حيوگف گلبج
تشهك حيل بحيث گوة ينجر النفس وياها صرت أفرك بصدرها وأحجي وياها مترد عليَّ فاصلة
دقايق وصرنا نسمع صوت صياح عالي بالبيت
أكثر من صوت وشي داخل بشي گدرت أميز بس صوت ماما
الصوت يعلى ويزيد وهاي تخبلت صارت تسد بإذانها وتضم روحها بحضني تريد تشرد من الدنيا
نورجان :- سكتيهم بان سكتيهم ماريد أسمع صوتهم ماريد أسمع حجيهم سكتيهم عليج الله
گمت جريتها من ايدها ورحنا لغرفة مآب وسديت الباب
شفته ديريد يگوم باوعلنا اثنينا متفاجئ
مآب :- بان شصاير برة شنو هذا الصوت
گعدت بالزاوية لامة رجليها لصدرها وايدها على أذانها
مآب يباوعلها وممفتهم شي يسأل شبيها
أسمع صوت رجال يصيح من برة مآب ركز شوي
گال :- هذا مو صوت عمي سلطان ؟
أشرلي تعاي گوميني مشيتله نزلت رجله المچبسة عن الجرباية أخذ عكازاته ساعدته يگوم وطلع من الغرفة
سديت الباب ورجعت لنورجان گعدت جريتها لحضني
صارت تبجي وتون
- ضميني بان .. ضميني بحضنج .. ماريد أشوف احد ولا أسمع صوت .. ضميني منهم حبابة
- اششش والله يمج ما أعوفج
ما صدگنا نست الصار وعاشت حياتها .. شافت الأمان بشُبير وروحها تعلقت بيه .. بيوم وليلة هدموا هالأمان على راسها .. ماما خلصت عمرها تخيط بجرحها حتى تنسى .. رجعوا هسه فتگوا هالجرح بديهم
على وضعنا وانفتح الباب وفاتت مرة مؤتمن تجر بماما وتدفعها ليجوة ويمهن مآب يصيح فوتيها
وماما روحها مشتعلة مشتعلة تصيح بعلو صوتها
شدن :- خليه يطلگها لا أول ولا آخررر وحدة تتطلك
فاتت للغرفة روحها محترگة وتغلط على هذا عمهم
ومآب من الباب يحجي عليها حتى تسكت
وهي ترده :- ولك يگولي مو شرررريفة ؟؟ نورجان ؟ بنتي اني المو شريفة ؟ يخسى والله يحجي بشرفها هالغيرة سز اي والله غيرة سززز مو كلمن لبسله عگال وتحجب صار زلمة وعرف شلون يسولف
مشى مآب ووصى رشا تبقى يمها متخليها تطلع هذاك عمهم من برة بعده يصيح وصوت الولد يمه عالي
انتبهتلنا دنگت عليها لزمت وجها
- ماما نورجان حبيبتي باوعيلي أمي انتِ أروحلج فدوة لتسوين هيج بنفسج والله هو الخسرج والله أجيبلج حقج منه هالچلب لا تاخذين أغاته وأخليه يعض أصابيعه العشرة ندم
خليتها گاعدة يمها وگمت منهن الباب زوجة مؤتمن لازمته متخلينا نطلع واني واگفة قريبة أريد أسمع
كلمة تنفهم وعشرة لا انداريت أباوع لماما
صرت گدامها :- انتِ شلون أصلًا متنطيهم علم بهيج موضوع ؟
- عوفيني بان مالي خلگج كُلش
- هو انتِ شوكت صارلج خلك إلي ؟
رفعت راسها تباوعلي فاتحة عيونها صايرات حمر
- شبيج بيا حال اني هسه
- تتذكرين انتِ ليش شردتيها من بيت عمو لو لا ؟ تتذكرين ليش أخذتيها وعفتني ورحتن ؟ مو جنا نريد نخلصها من زواجها من عبد ووگعت براسي ؟؟
صحت بعلو صوتي :- ترحيييييين تزوجيها لهذا ليش ؟
- وهو جان بيدي يعنـ...
قاطعتها :- اي بيدج كُلشي جان بيدج تسوين ضيعتينا ماما ضيعتيني وضيعتي حتى نورجان بزواجها من شُبير
تيم الله :- هاه هااه لا هيج الحجي
انداريت لگيته واگف بالباب خازرني مسحت دموعي عفتهم وطلعت من الغرفة وضل هو يحاجي بيهن
مريت من الصالة اريد اطلع ليبرة وهم كلهم ملتمين
فرحة :- دحگوا مو أگلكم بنات گحاب وعينهن گوية ما تاخذون الحجي
صاح بيها مآب :- يمممممة
ضل يتلاغى وياها واني طلعت برة للحديقة گعدت للگاع أشهك بجي امسح دموعي وترجع تنزل بقهر
يباوعولنا بالعين الصغيرة محاسبينا بشر كلهم كلهم يتسابقون على بيعتنا وشمرتنا واحد عالثاني من خالو فؤاد لعمو سالم لهذول الجنا حاسبيهم سند
عبالك ممكتوبلنا الراحة وحرام علبنا نعيش عيشة مال أوادم وين ما نروح دك وضرب وإهاين ومعايرة وذل
وگفت أضرب برجلي بالصبة وأصيح
بان :- جبان جبااااان واحد جبان ضيعتنا ودرتلنا وجهك وخليتنا ملطشة إلهم مجبت حق نورجان وخليتها تنذل إلهم مجبتتتت حقها حارررررث الجبان
انجريت حيل من عكسي ودارني عليه صاح
تيم الله :- تسودنتني شبلاج
نزلت للگاع أبجي ومدنگة راسي وهو أسمعه يستغفر
نزل للگاع لمستواي على ركبه ويباوعلي
- شو دحگيلي بسج عاد
- مليت والله مليتتت من كُلشي لا أريد أسمع أحد ولا أحد يحاجيني عوفوني والله مخنوگة
أحجي وأبجي تنهد گال
45 تعليق
- ابجي ميخالف ابجي تارتاحين
- ما أرتاح ما راح أرتاح المثلنا ما مكتوبة إلنا الراحة
- لا تجزعين الجزع ضعف وانتِ إنسانة قوية تحملتي شغلات أكبر من عمرج وعديتي مصايب ما جنتي محسبة راح تخلصين منها بس ربج شگفج عنها
- إذا هو قوي هيج ليش مخلصنا من ظلمهم ليش محاسب عمتي على بوگتها لبنتي من حضني هذيج هي تفرفر بالدول واني الماكلة تبن هنا أدور عليها دوارة ليش محاسب المجرم عبد الكريم عالسواه بأختي وخراب حياتها
- شلون تردين ربي يستجيب إلج وانتِ تعاتبين رب العالمين وشاكة بعدم الأستجابة ؟
- ممنتظرة إستجابة لأن أدري اني إنسانة سيئة وعندي كومة ذنوب ما ادري بأي عين منتظرة منه رحمة
- احنا مو معصومين تانگدر نكون خالين من الذنوب بس رب العالمين يگول { وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّـهَ يَجِدِ اللَّـهَ غَفُورًا رَّحِيمًا } هذا موجود بالقرآن وماكو أعلى من كلام القرآن ..
ساكتة أسمع لكلامه ودموعي على خدي صافنة بالگاع
گال :- دحگيلي بان ..
رفعت راسي عيني بعينه
تيم :- انتِ مو إنسانة سيئة انتِ بس تحملتي فوك طاقتج وقدرتج تاشوف جدامي بنية قوية صبرت على هواي مصايب كبار ما يحملوها
گام وگف ومد ايده يأشرلي ألزم بعكسه دا أگوم
چلبت بقميصه وگمت لحيلي أنكث بملابسي
طلعله جگارة ورثها وذب الدخان من صدره
- مو مشكلة لو بچيتي احنا بشر مو حديد وإلنا طاقة تحمل بس وراها المفروض نرد نگف لحيلنا ونواجه مشاكلنا مو نضل بس نتشگى ونبجي
أشرلي بيده :- جدامي هساع يلا فوتي جوة گبل لأمج وأختج ضلي بسدهن نورجان تشوف روحها بيج
- نورجان معايفتها ولا راح أعوفها بس لو قصدك على ماما ما أصالحها وجنت قاصدة الكلام الگلته جوة
حجيتها واني أمسح وجهي وأعدل شعري
- وتالي وية عنادج ؟
- والله ما أصالحها
حجيتها درتله وجهي ومشيت فتت للبيت
مر يومين ..
طش الخبر بسرعة بين العمام والگرايب والنسوان صارت تجي لبيت فدار تريد تشمشم أخبار
ومرة فدار ما قصرت هي من جهة تطعن بينا وبشرفنا گدامهم وخوات شبير يشهرن من جهة لخ
ما خليت وحدة توصلها صعدناها لغرفة ماما وقفلنا الباب وماما جانت تواجهم بالحجي واللي تتمشكل وتتلاغى وياها مؤتمن يصيح بيها يخرسها ويطرها
عمامهم الكبار هم مسكتوا يردون شبير يطلك نورجان
وشبير محد يدري بيه وين من يوم المشكلة مختفي عن البيت
مُتيم هو المتصدي لعمامه الكبار وما انطى بنورجان ولا بماما لأن ضامة الموضوع عنهم وگلهم اني وخالي ندري
بيوم اللي اجى فدار للغربية جمع عمام مُتيم لبيته يريد يشوفهم على شنو منتفضين بالله حتى يسكّتهم
عفتها فوك يمها هاجر ونزلت جوة اسمع صوتهم جاي من الأستقبال ناس ترفع وناس تكبس
مشيت للمطبخ البنات ملتمات هناك وماما واگفة دتسمع الحجي وكلها ساكتة يردون يسمعون
صارت عيني عليها تباوعلي وتدير وجها من ذاك اليوم واني وياها منتحاجى
فات مؤتمن :- چاي چااي
أخته گامت تدردم بصوت ناصي حتى ليسمع
- كل ساع چاي كل ساع چاي جزعت أرواحنا
صاح بيها :- وسسسم ومرض
سكتت بسرعة تتحرك تحضر بالإستكاين وهو واگف
مشتله ماما
شدن :- أريد اطلع
- وين تردين ؟
- راح أطك مؤتمن راح أطككك واني أسمع كلامهم خليني بس أطلع أحجيلي كم حجاية أبرد گلبي
- أبوي ما يرضى
ضلت تلح عليه وهو راسه يابس أكثر من أبوه
اخذ صينية الچاي واندارلها :- ضلي هين
راحلهم وماما واگفة تاكل بروحها
الحجي يغث ما يحمله بشر وهم واگعين بينا طعن وذم فدار يحجي ومُتيم يحجي وهم يزيدون لحد مگبت هوستهم وصار صياحهم يوصل ليبرة
دتمشي ماما لزمتها زوجة مؤتمن من ايدها تمنعها
- وخررري
رشا :- خية استري علينا وين تردين
- وخرري دا أگولج
فلتت ايدها ومشتلهم وأسمع صوت عمهم يصيح
سلطان :- ول گتلو اكتلها حطلك چيلة براسها واكتلها واغسل عارك بسسس ابن أختك أغم كل خير ما بيه
فتحت عليهم الباب وفاتت واني وراها
- انتَ ولك تكتل بنتي اني غسل عار ؟
فدار يصيح بيها وابنه فزلها يريدها تطلع
وعمهم يردها :- بنتج مو شريفة احمدي ربج لهساع مخلينها تشتم الهوا مدري منين لفاجن فدار علينا
- عجيب ارتقوا كافي تشوفون الشرف قطرة دم لأن مو مقياس ترى المرة مو مجرد جسم والستر والعفة والشرف بأمور أكبر من غشاء البكارة اللي بعض البنات ونسبة ٣٠٪ ميطلع إلهن لأسباب خاصة ببناء جسم المرأة
- عجل مچذب غير انطيتيها وطلعت مو بكر
فدار أشر لأبنه بمعنى عوفها وخلاها تحجي براحتها
- أصلًا غشاء البكارة عبارة عن كذبة ما إلها وجود وما مذكور بالقرآن أنه يدل على شرف البنية هاي إذا قاري قرآن وإذا جان موجود لعد شنو اللي يحدد شرف الذكر لو الذكر شريف ما يغلط ..
حتى بزمن النبي صلى الله عليه وسلم ماكو هيج بس هذي عادات سويتوها انتوا العشاير بسبب جهلكم وتخلفكم ونسبتوا شرفكم وخليتوه بجسد البنات اللي هن أضعف وأرق مخلوق بهالكون
ولأنكم ما عندكم شرف فتحسون بالنقص وتكملون نقصكم بهذا التقليد البالي وتحسون برجولة من تقتلون بنية بحجة غسل العار
مُتيم مدنك راسه وفدار يحك بحاجبه وهو يسمعلها ومؤتمن واگف بالباب يسلت جگاير معاجبه الوضع
تخبل عليها هذا الرجال وزاد عليه من شاف فدار ساكت
- انا الما عندي شرررف ؟ ولك فدار حرمتك تگلي مو شريف وانتَ جاعد تتسمع وساكتت ؟؟
گام وگف لحيله
36 تعليق
فدار :- حجت الحجي الجنت مستحي أگولو بوجهك ذميتوها وذميتو بنيتها وردتها إلك بناتها صارن بناتي بيوم العقدت عليها من تمسوهن بحجاية تمسوني انا
- غم الزلم اي والله التمشي بحجي نسوانها بعت أهلك يفدار بعتنا لجل وحدة جليلة حيا وبت حررام دارت راسك بچم حجاية
هذا حجى هيج وفدار تفرعن عليه هجم عليه لزمه من خوانيگه وگع عگاله للگاع والولد فزوا يفاككون بيهم
وفدار يصيح ويغلط على عمهم :- انتَ تگول على حرمتي بت حرررام ؟ لابوكم لابو مراضعكم
دفعه عنه اجى يوگع لوما الولد ركضوله لزموه
ويباوع لفدار :- تطگني ولكك فدارر انا تطگني لجل وحدة ما تسوالها فلسين هي وبزرها
- تسواكم كلكم واحدكم حاط بوجهو نگلة مال شوارب وهو ما عندو ذرة شرف بكل روحة إلي لبغداد تنفخ ريشاتك وتجيها تعلك عليها تعلك بالحجي شحاسب روحك ولكك حرمتي هاي عررضي اللي يمسها بحجاية يمسني انا إحترامها من إحترامي وانتَ وأخوتك كل إحترام ما خليتولي وطلعتوني عن طوري
وعمامهم الباقين يحجون عليه ما راضين بالحجي
واحد منهم گله :- تتهادد علينا لخاطر هاي ؟
ويأشر على ماما اللي واگفة بالباب تسمعلهم
- عجل ببيتي ودايسين بساطي وتذمون بحرمتي وبناتي جدامي ؟ لا والله الما يحترم عتبة البيت الدايسها مالو ضلة هين ولالو گدر عندي بيتي يتعذركم
حجى هيج وهذول گاموا يشيلون بروحهم ويرگعوها بالگاع
- تطرردنا ولك ؟ تطردددنا من بيتك ؟
ولا رد ويأشر بيده للباب برة
انتبهت لهذا چبيرهم يريد يدنك ياخذ عگاله مشيت دست عليه برجلي وأفرك بيه بالگاع منا ومنا
بان :- عگال الما بيه غيرة يرهم مربط للطليان
شال عكازته يريد يضربني وصاروا مُتيم ومؤتمن بوجهي اجت الضربة بصدر مُتيم والعمام يتصايحون
دفعني فدار على ماما :- اخذيها وطبن جوة
جرتني وسدوا الباب نسمع صوتهم عفتهم وصعدت لنورجان مبتسمة گلبي بارد من الصار متشفية بيهم
هدات الهوسة وكلمن طش لبيته وفدار صاير أعصاب ما يتحاجى بس واحد يذب كلمة گباله يگب بوجهه
حتى فرحة تجنبته وماما مگابلة نورجان اللي تمرضت من يومها حتى أكل متاكل معلگيلها مغذي
لليل كُلش صاحوني من جوة نزلت دا أشوف منو
بنت فدار گلتلي :- أبو علي يريدج برة
طلعتله واگف بالحديقة يدخن ويمه مؤتمن ومآب گاعد
اول مشافني ضحك
مآب :- عگال الما بيه غيرة مو ؟
وخرت گذلتي ورى أذني ووگفت يمه
- صحتني
هز راسه ذب طفى جگارته بالباكيت وضل لازمها
تيم الله :- بعدج إلج نية ترحين لبغداد ؟
- اي حاجيت المحامي ؟
- حاجيتو ومن ذاك اليوم عود نروح وصارت هالسالفة بعد وإلتهيت رديت خابرتو اليوم وگال باجر فارغ عطي خبر لأمج تاتحضر للفجر نتوكل
رديت بسرعة :- ماما متروح
- عش يابة ؟
- متروح
باوعلي بشك :- متروح لو بعدج متحاجيها ؟
ضليت ساكتة
- يول عش عنودية انتِ وراسج يابس
- إذا راحت ماما ما أروح
درت وجهي ودا أمشي صاح من وراي
- سوادين سسوادين
تحضرت للفجر وماما مدري من الولد گلها ما راحت بس گعدت تحضرلي الجنطة وتخلي بأوراقي والمستمسكات العندي واني أبدل بملابسي
أخذت جنطتي تقربت بست نورجان ونزلت بسرعة
فدار هم جان گاعد واگف برة يم السيارة مال مُتيم
مشيتلهم ركزت بنظري لگيته جايب عمته گاعدة بالصدر
مشيت سلمت وصعدت رفع ايده لخاله سلم ومشى
جان عبالي كل نسوانهم شايلات بگلبهن علينا وكارهاتنا من ورى الصار بس عمتهم جانت حبابة طول الطريق تسألني على نورجان وماما وتحجي وياي طبيعي
وخلصوا الطريق هي ومُتيم يحجون بشبير اللي لهسه ممبين
شيخة :- أخوك غاط محد مدحگو وگلبي غادي نار عليه
- ما عليه شي
- يا برود گلبك اخيك ولك شلون تتبرى منو
- جاي يروح لدوامو يا يمة ما تفرق نومتو بيا بيت ما عليه شي لا تخافين
- تندل مچانو ؟
هز راسه بلا ما يرد
211 تعليق
وشيخة تنهدت :- عجل ما تحجي وتگول ضالة مثل السمچة المتزوهرة وراه
- جاهل ؟ صغير ما يعرف ؟ اتركوه شوي يختلي بنفسو ويراجع روحو بلكي يرد عقلو لمچانه
- لا تلومو هو غلطان ما أگلك ما غلطان بالعملو بس لا تدير وجهك عنو انتَ وخالك تدرون بالسالفة من زمان وخاشينها عنو طبعًا يضوج ويتكدر
- هو انا هم صوجي المفروص من ساعة ما دريت أگعدو تاحاجيه أفهمو أحسن ما يسمع من غيري بس صارت بعد
شهربان :- منو الگله ؟
باوعلي من المراية ورجع نظره للطريق
- واحد رايد يخرب
- يعني تعرفه ؟
هز راسه وضل ساكت عرفته ميريد يحجي
وصلنا لبغداد عبالي نورح لبيت فدار بس تفاجأت من طلع بينا لبيته من هيج جايب عمته ويانا
ضلينا نرتاح نمنا شوي وتغدينا والعصر رحنا اني وياه لمكتب المحامي
دخلنا تصافح هو وياه وسلم عليه بحرارة مبينين على معرفة قديمة
گعدنا عالكراسي وهو گدامنا على مكتبه ضيفنا گهوة وضلوا هو والأگرع يسولفون واني أهز برجلي
بعدها مُتيم باوعلي ورجع يحجي للمحامي
- انا انطيتك فكرة عالقضية بالتليفون بس تبقى تفاصيلها عند البنية
هز راسه :- عاشت ايدك لهيج گلتلك جيبها وتعال
حجاها واندارلي وجهلي السؤال
- صارلكم شگد متزوجين ؟
- سنتين تلاثة ما أدري
- عقد زواج ؟ ورقة تثبت اي شي جوة ايدج
- عندي عقد الشيخ
طلعتها من الجنطة انطيتها إله صار يباوع بيها لابس نظارته يقرا ومركز قرا اسم عمو سالم وسجود وشاكر
- منو هذوله ؟
- سالم عمي وسجود عمتي وشاكر عم زوجي
- كلش زين يگدرون يحضرون كشهود للمحكمة بأعتبارهم شهود عالعقد
- ما أتوقع
رفع راسه بسرعة :- ليش ؟
- خلافات عائلية بس عندي شاهد لاخ ..
باوعت لمُتيم واني أفرك بيدي :- همام ابن عمتي
سالني أكثر من سؤال عن علاقتي بعبد جاوبت عليها كلها مُتيم وصاني ما أضم شي كُلشي أسولف
- طيب ..
عاف عقد الشيخ من ايده ونزع نظارته
- دعوى إثبات الزوجية بسيطة عدنا شهود وعدنا اسم الشيخ العقدلكم نگدر هم نبلغه ويجي يشهد ونگدر وراها نباشر بدعوى التفريق حتى يتم الطلاق بينكم لأن حسب ما ذكرتيلي هو رافض يطلگج
- صحيح بس وبنتي ؟
رجع ظهره عالكرسي
- هذي بصراحة شوي معقدة لأن الطفلة عند أبوها والأب مختفي المحكمة ما راح تمشي بدعوى إثبات النسب إذا الطفلة مموجودة لأن محتاجين دمها للفحص
تيم الله :- والحل ؟
- نگدر نتخذ إجراءات قانونية بعيدة عن محكمة الأحوال بحق الأب حتى نرجع الطفلة
- ايدنا بيدك گلي شنو المطلوب تا اسويه عندي جماعة ينبشونو إلك من جوة الگاع
رجع سألني :- عندج إثبات ان الطفلة عنده ؟
- اي
حجيتها وطلعلته الصورتين اللي شمرهم لبيت فدار
كملت :- هذني الصور لبنتي وزوجته شمرهن لبيت زوج والدتي وياهن طلقة
- الطلقة موجودة ؟
- لا عند زوج امي اخذها حتى يشتكي عليه علمود التهديد اللي شمره ومن يومها وهو مختفي
45 تعليق
- تمام
صار يجمع بالأوراق وگام يتحرك بالمكتب يشيل ويخلي
گال :- باچر الصبح نروح لكاتب العدل حتى البنية تنظملي وكالة بالقضية واني اكمل باقي الإجراءات وأرفعها للمحكمة وانتوا بعد توكلوا وانتظروا مني اتصال لموعد الجلسة
گمنا وگفنا والمحامي والأگرع تصافحوا مرة لخ
اجت عيني بعين مُتيم
گتله :- ينلگي ؟
هز راسه والمحامي يگلي :- ينلگي بابا ينلگي وين يروح
سملنا وطلعنا بعد ما اتفقوا على الأتعاب لكل قضية
صعدنا بالسيارة راسي عالجامة وأباوع للشارع
تيم :- لا تشيلين هم مو گنالج نلگاه بأربيل ولحگتو مو عاد ببغداد هاگدها
هزبت راسي وضليت ساكتة المهم أخلص منه حتى لو الوضع مطول صبرت هواي مراح تفرق هالفترة
رجعنا للبيت وشيخة تسألنا وتستفسر من عدنا
ثاني يوم رحنا لكاتب العدل بصمت ووقعت عالوكالة وصار المحامي يمثلني قانونيًا بنفس اليوم رفع دعوى إثبات الزواج للمحكمة بعد ننتظر أول جلسة
بالليل مُتيم طلع من البيت وباجر عساس نرجع للأنبار
گعدت يم شيخة وصارت تمشطلي شعري وتضفره
شيخة :- بانة يا حلاها
گصايبها وراها
اجى الخطاب يخطبها
وأبوها ما نطاها
ابتسمت وانداريت عليها وهي كملت تغنيلي :
بانة بنت أبوها
عشر زلم حبوها
واحد يگل للآخر
انا نسيب أبوها
ضحكت :- شدعوى عشرة شيخة
- ايا طايحة الحظ شني شيخة بگدج انا
- اسمج حلو
- عود تقشمرني
ضحكت بصوت عالي اندفع الباب وفات مُتيم اول مشافني گمز ورجع منين ما اجى
انداريتلها :- شبيه هيج گمز ؟
- عجل انتِ مفرعة بزوندج علينا لابستلج وصلة ما تغطي وانا وليدي يستحرم
جنت لابسة بدي بحمالات تعلاگة شمرتلي شال منها
گالت :- اتستري بيه بعد عمتج لو تغيرين لبستج لا تفترين جدامو هيج
خليته على كتفي وگمت منها صعدت فوك جنت عايفة جنطتي هناك أبدل بس اني وشيخة ننام بالغرفة الجوة
وگفت گدام المراية أباوع للضفاير السوتهن إلي وأضحك شعري شگدوته گوة لازمته القراصات
طلعتلي ملابس واني أدندن بأغنية لصابر الرباعي
سكتت شوي ورفعت راسي مركزة ..
دا أسمع صوت من جوة مو صياح بس عبالك هوسة وناس دتتلاغى
لبست بسرعة وفتحت الباب دا أريد أنزل الدرج
شفت عبد! ..
اصطكيت بمكاني لا اني المكملة ولا اني الراجعة
يمشي ويباوع عالبيت ممنتبهلي ومُتيم ايده مربطة ليورى ظهره وفوك راسه اثنين لازمين مسدسات
جمد الدم بجسمي أشوفهم ميشوفوني صعدت بسرعة وگفت ورى المحجر ومادة بس راسي أباوع
شيخة لابسة إيزار الصلاة وواگفة تتصايح وياه
وهو ولا جنه طاووس نافخ ريشاته ايده ورى ظهره بخاصرته سلاح ويفتر يروح ويجي گدام مُتيم اللي عيونه حسيتها تريد تطلع من مكانها گد مخازره
عبد الإله :- أبو علي ليش ما تسمع الحجي مو خابرتك گتلك تشيل ايدك من السالفة ؟ رايح وترفع دعاوي بالمحكمة وجار مرتي وراك شتريد بالضبط ؟
صار گدامه نزل على ركبه وشال مسدسه يضرب على راسه
- إلا تخليني أفرغه براسك وأشيل خطيتك ؟
- زلمة انتَ
رجع گام :- ما مليت ؟ من بغداد لأربيل للأنبار ورجعت اجيت وجبتها وياك لبغداد كم مرة بمرة نبهتكم انتَ وخالك تطلعون روحكم وما تندگون بية ما تسمعون الحجي
- مو أگلك زلمة
دفره برجله بنص وجهه دنك راسه متأذي ورجع رفعه يباوعله ما على وجهه أي تعبير عكس عيونه اللي جنت تسولف تريد تاكل عبد أكل
وگف عبد يفتح بالبيبان ويفوت للغرف، المطبخ والحمام
ويصيح :- وينها هي الأدبسز وينها
واني صايرة فوك ضامة روحي ورى الدرج
حسيت صوته صار حيل قريب گمزت من مكاني ليفوك وأسمع صوت شيخة تحاجيه
شيخة :- ما عندك مخافة الله خاش علينا بليل أظلم لا خليت حرمة لصاحبو ولا للحريم الجاعدة بيه
- يوم وخري خلي أصعد
- اتخسى أبو شارب الأملط انا أصير أمك ابعد غاد ابعدد
- يلا ميخالف مرة بگد امي ما أگدر أحاجيج بس تشوفين هذا النچر المربط ؟ هسه گدامج أحطلي طلقة براسه أخليج تلولين عليه بهالليل
- بت ما رايدتك شبعتها ضيم لحد ما گلت بس لا هاويتك ولا مواطنة عيشتك شتريد منها بعد طلگها تاتخلص وتخلصها
- معليج انتِ وخري هيج
ركضت للغرفة وقفلت عليَّ الباب الرجفة لازمتني
أسمع صوتهم بس صرت ما أفهم شيحجون
گمت اروح وأجي گوة مسيطرة على رجلية وواگفة
عيني تدور بالغرفة وين أضم روحي منه بالكنتور ؟ جوة الجرباية ؟ بين الغراض وين أروح يا ربي ؟
وجهي يصب عرك وأفرك بأيدي عقلي واگف ما براسي غير شي واحد هسه يدفر الباب ويطب يسحلني
مصارت گدامي غير البلكونة مشيت لهناك أباوع ليجوة
الگاع بعيدة إذا أطفر أصير تفصيخ بس السياج مال بيت قريب من البلكونة إذا عبرت منها للسياج وللگاع
ضليت لازمة الحايط مترددة والخوفة لازمتني
سمعت صوت الباب باوعت وراي اليدة مال باب تتحرك
صعدت بسرعة عالحايط مال بلكونة تعلگت بيه ونزل جسمي
من الجهة اللخ ضليت معلگة بالهوا
أحرك برجلي أريد بس توصل للسياج حتى أسند طولي عليه
حطيت رجلي صرت فوك السياج مقدمة رجل ومرجعة رجل نزلت بجسمي على كيفي لا اوگع صايرة عالحافة
مديت ايدي چلبت بالحايط ودا أنزل زلگت ووگعت للحوش على صفاحي عضيت شفتي ونزلت دموعي
الوگعة صار بيها صوت طبة قوية
دست على روحي والوجع الخزف جان أكبر من كُلشي بساعتها گمت أعرج وصلت للباب فتحته وطلعت
دنيا الليل وشارع أظلم وفارغ ما بيه بشر
صاف سيارته السودة على مسافة بسيطة من البيت
صرت بنص الشارع أمشي بسرعة ودموعي تنزل رجلي ما تعيني عالركض أمشي وأتلفت مثل المخبلة
اشتغلت گلوبات السيارة الأمامية من وراي وصوت هورن السيارة صكّ بأذني...
