رواية حب من اول غرزة الفصل الثاني بقلم عمرو خالد ليث
: أنتي بتعملي أي هنا ؟
• جيت الحقك قبل ما تجيلي المستشفى متعور تاني او تالت مش فاكرة
: أنتي بتذليني!
• لا خالص أنا بعايرك بس تعالى أركب
: عربيتك؟
• لا سرقاها
: أنتي متأكدة أنك دكتورة!
مردتش عليا وركبت هي العربية وركبت انا وراها وأنا مش فاهم هي ظهرت إزاي دلوقتي، بحاول استوعب هي إزاي قدرت تضربه برجلها تخليه يطير بالشكل ده لحد ما وصل لحضني ..
: أنتي بتلعبي كراتية ولا بوكس؟
• أخدت تلات شهور تدريب بوكسينج
: موهبة ولا هواية؟
• مرقعة
: مرقعة؟
• اه والله كنت فاضية ونزلت اتدرب قولت يمكن تفيدني في أي حاجة والحمدلله لحقتك
: علىٰ فكرة أنا كنت هقوم بيهم هما الإتنين أنتي إللي سبقتيني بس
• ايوة مأنا عارفة
ولقيتها بتبصلي ورجعت بصة قدامها تاني، عارف معناها البصة دي كويس ..
: مين المعلم توفيق ده ؟
• ده واحد كان ناصب علىٰ خليل ورفع عليه قضية وأنا كنت بترافع وكسبتها
: أنت محامي!
• وشاطر
: اه انتو إللي مجموعكم مبيدخلكمش كلية كويسة فـ بتدخلوا حقوق وكده
• لا دي حلمي
: ماهو كلهم بيقولوا كده
• جايب 98 ٪ في الثانوية
: ومدخلتش طِب ليه؟
• مأنا قولتلك حلمي أدخل حقوق
قعدت ساكتة متكلمتش تاني لحد ما وصلتني عند البيت ..
: حمدلله على السلامة وخلي بالك من نفسك متعملش مشاكل مع حد تاني مش كل يوم هتجيلي متعور
• حاضر مش هعمل مشاكل وهنام بدري
: ومتنساش تشرب اللبن
• وهتغطى كويس كمان
: شاطر
وضحكنا وسلمت عليها ونزلت علىٰ طول طلعت الشقة فوق، فتحتلي أمي ودخلت ولسه هقعد ..
: شهد سألت عليك
• كلمتني
: هتفضل مطنشها كتير
• أنتي شايفة إللي أنا فيه طيب
: فهمها عشان متاخدش علىٰ خاطرها
• افهمها أي ماهو كل حاجة قصاد عينيها المفروض تبقى فاهمة ده لوحدها
: حتىٰ لو هي شايفة بردو هتبقى محتاجة أنك تقولها من باب التقدير
• هو مين إللي المفروض يقدر مين ومين إللي يراعي ظروف مين هي قالتلك أي بالظبط، ولا هي مش محتاجة تقولك أصلًا ماهي بنت أختك لازم تقولي كده
: البنت ملهاش ذنب في حاجة
• مش وقته خالص والله أنا تعبان وعايز أنام
كنت متأكد انها هتكلم أمي طالما معرفتش تاخد حق ولا باطل معايا، واللي لاحظته انها عايزة تسيطر علىٰ دماغي بأي شكل، لدرجة أنها بتبقى عايز تكسب تعاطفي وبتعيش دور الضحية وبتقلب التربيزة وأنا إللي بحاسب، عايشة بالمقارنات بتقارن نفسها بأي حاجة واي حد، كل شوية تقولي خطيب صحبتي عمل كذا، صحبتي خطيبها زعلان منها عشان عملت كذا، وكل مرة افهمها أننا ملناش دعوة بحد نركز مع نفسنا وبردو مفيش فايدة لحد ما قربت أجيب أخري .
خلوا بالكم في فترة الخطوبة إللي بيبقىٰ فيها الطرف التاني مريض بالنقص إللي بيكمله منكم .
خطيبك إللي دايمًا بيقارنك بأي بنت تانية، المقارنة مش الغرض منها أنه عايز يشوفك زيهم لا، الغرض منها أنه عايز يخليكي تشوفي نفسك أقل من إللي حواليكي، الغرض من أي مقارنة هي التقليل، السبب من أي مقارنة هو الشعور بالنقص إللي بيخليه يحس أنه كامل لما يقلل من الشخص إللي معاه، المقارنات في العلاقات ناقص، ولو شوفتيها بطريقة تانية زي أنه بيحبك وعايزك تبقي زيهم فأنتي غلطانة، إللي بيحبك هيوعيكي مش هيحطك في مقارنة، هيعلمك ويفهمك ويخليكي أحسن من أي حد في الدنيا، إنما المقارنة الغاية منها هو أنه يخليكي تحسي انك أقل من إللي حواليكي مش أنه يخليكي تبقي زيهم .. فأهربي أنتي مع واحد مريض بالنقص وبيعوض ده فيكي .
خطيبتك إللي بتقارنك بخطيب صحبتها إللي بيجبلها هدايا ومغرقها إهتمام وحب مش هتشيلك، خطيبتك إللي شيفاك مقصر معاها عشان خطيب بنت خالتها خرجها خمس ليالي في دهب مش هتصونك، خطيبتك إللي بتحب دايمًا تبص علىٰ غلطاتك وبتغطي علىٰ أي غلطة ليها بأنه أي المشكلة، في مقابل أي غلطة ليك بتقوم الدنيا مش هتقدر تعيش معاها، الشخص إللي بيبص حواليه وبيقارن حياته والناس إللي معاه بيهم ده مريض بالنقص في الرضا، مش بيرضى بأي حاجة، بيشوف الحاجة إللي في ايد الناس من حقه، عايز دايمًا كل حاجة يشوفها في ايد حد، أهرب يصاحبي متحكمش علىٰ نفسك بالتعب في إللي باقي من عمرك، متقولش بتحبك، متقولش بتدلعك، متقولش عايزاك تبقىٰ زيهم، إللي بتحبك هتستحملك، إللي بتحبك مش هتقارنك بحد، إللي بتحبك هتشيلك مش تزود الحِمل عليك .
: عايز فلوس
• أنت أي جايبك هنا ؟
: بقولك عايز فلوس الفلوس إللي معايا خلصت
• وأنا مش معايا فلوس يا سيف ومتجيش المستشفىٰ هنا تاني
: يعني أي!
• يعني أمشي من هنا بدل ما اهزقك
: تهزقي مين أنتي نسيتي نفسك
وراح مسكني من شعري شدني من علىٰ المكتب وقعت الأرض، ونزل يضرب فيا لحد ما شدني لأخر باب المستشفى وهو جاررني حرفيًا ومحدش قادر يقرب منه وأنا بصرخ ومش قادرة افلت منه ..
: سيبها
• أنت مين؟
: بقولك سيبها
ولقيته بيسيب شعري بعد ما لقيت حد وقف قدامه وبدأوا يتخانقوا مع بعض، فضلوا يضربوا في بعض وكان للأسف الشخص إللي جه المستشفىٰ متعور مرتين ولحقته مرة، وسيف ضربه في صدره الجرح اتفتح تاني والدم غرق المكان كله وهما لسه ماسكين في بعض لحد ما الأمن فض بينهم وسيف مشي من الأمن ..
: تعالى بسرعة الجرح اتفتح
• مفيش حاجة مفيش حاجة
: مفيش حاجة أي مش شايف الدم
اخدته ودخلت بيه أوضة الجراحة بسرعة، مسحت الدم كله إللي علىٰ صدره وكان فعلاً الجرح اتفتح والغرز اغلبها اتفكت، اضطريت افكها من الأول تاني واخيطها من أول وجديد ..
: هو مين المتخلف ده
• أخويا
: وعمل فيكي كده إزاي في نص المستشفىٰ
• أصله مدمن وكان جايلي عايز فلوس ومرضتش اديه حاجة
: يقوم يعمل فيكي كده!
• دي أقل حاجة بشوفها منهم
قعد ساكت متكلمش وبيحاول يتجنب أنه يسألني عن الحوار بعد ما عرف أن إللي عمل فيا كده أخويا، خيطتله الجرح وخلصت ولزقتهوله كويس ..
: حاول تبعد عن أي مشاكل الجرح لسه ملمش كويس
• مأنا بعيد المشاكل هي إللي بتجي لحد عندي
: والله أنت إللي محتاج تتلم
• أنتي لسانك ده مبيهمدش ابدًا أنتي لسه متجابة من شعرك من كام دقيقة
: خلاص متفكرنيش ما بصدق انسىٰ
• ماشي .. هي مين إللي واقفة بتبص كل شوية وتمشي دي؟
: دي فاتن ممرضة في قسم الطوارئ
• ومالها بتعمل كده ليه
: متاخدش في بالك .. هروح أشوف المدير وارجعلك متتحركش
سبته ومشيت روحت للمدير اشوفه بعد ما بعتلي عشان يعرف إللي حصل، روحت حكيتله إللي حصل وتفهم الموضوع وقالي أنه هيكلم الأمن يمنعوه لو جه تاني المستشفى، شكرته ومشيت علىٰ طول ورجعت تاني لـ زين بس ملقيتهوش، لقيت فاتن قاعدة بتظبط المكان ..
: هو راح فين إللي كان هنا ؟
• كان قاعد وفجأة قام ومشي لوحده
: حصل حاجة؟
• لا محصلش حاجة هو كان بيسألني علىٰ أسمك وكده
: وبعدين
• وقولتله إسمها الدكتورة سارة ومتعينة ليها سنتين هنا ومخطوبة بس خطيبها مش بيجيلها المستشفى نهائي ولا نعرف شكله
: متخلفة أقسم بالله متخلفة
كنت لحظة وهشد في شعري بسبب التخلف بتاعها، أستاذتت ومشيت قبل ما الشيفت يخلص بساعتين لأني لو قعدت شوية كمان هتشل حقيقي، ركبت العربية ولمحت محفظة واقعة علىٰ الكرسي إللي جنبي، مسكتها ولقيت جواها البطاقة بتاعت زين وعرفت أي إللي جابه المستشفى، كان جاي عشان ياخد المحفظة بتاعته ولكن دخل في حوار ملوش ذنب فيه واتعور بسببي، روحت علىٰ البيت علىٰ طول ولقيت أمي مستنياني علىٰ الباب ..
: إزاي تسمحي لحد يضرب أخوكي
• سيف كان جايلي المستشفىٰ يطلب فلوس ولما قولتله مش معايا ضربني وشدني من شعري المستشفى كلها كانت بتتفرج عليا وهو جاررني علىٰ الارض
: وليه مديتهوش فلوس
• أنتي سامعة قولتلك عمل معايا أي بقولك ضربني وشدني من شعري قصاد المستشفىٰ كلها
: واخوكي ويعمل إللي هو عايزه
• يعني أي؟
: يعني تطلعي مصروف لأخوكي يصرف منه
• أنا لو هسيب البيت خالص مش هديله ربع جنية
: طب يلا أنتي إللي طلبتيها شوفيلك مكان تعيشي فيه تاني غير هنا
• بتقولي أي؟
: إللي سمعتيه يلا امشي من هنا
• طب هاخد هدومي
: مفيش هدوم ولا هتاخدي حاجة من هنا وربنا يعوضنا عن خلفتك وتعبنا إللي راح علىٰ الأرض
فضلت واقفة قدامها بحاول استوعب هي قالت أي، ولسه هتكلم لقيتها قفلت الباب في وشي!
كنت عايزة أتكلم بس دموعي سبقتني، كنت بعيط من غير صوت، دموع بس بتنزل، عقل مش شغال، جسمي واقف كأنه مشلول مبيتحركش، مش مستوعبة أي حاجة حصلت، واقفة مستنية أصحى من الكابوس إللي فاكرة أنه هيخلص دلوقتي واصحى من النوم، اتحركت من مكان بعد ما كنت واقفة قدام باب شقتنا، واقفة قدام الباب إللي كنت جواه عايشة كابوس حقيقي، عايشة جناحاتي مكسورة، عايشة صوتي مكتوم، عايشة مجبرة، عايشة في مكان لو طال أنه يدفني مش هيتاخر، مشيت وأنا بجر في رجلي إللي مش قادرة تتحرك من مكانها، مشيت وأنا لأول مرة احس أني خسرانة كل حاجة حتىٰ أهلي .
: معلش أني برن عليك في الوقت ده بس لقيت محفظتك في العربية عندي
• ايوة انا كنت جاي المستشفى عشانها ونسيت اخدها قبل ما أمشي
: طيب لو أنت صاحي أنا ممكن اجيبهالك
• دلوقتي!
: اه اي المشكلة أنا لسه مخلصه الشيفت والساعة 6 الصبح يعني الناس صحيت
• مفيش مشكلة اجيلك فين؟
: لا أنا هجيلك متتعبش نفسك
مكنتش عارف أنام بسبب الجرح إللي في صدري، كنت طول الليل بفكر في الموضوع وازاي اخ يعمل كده في أخته في وسط الناس، واي البجاحة إللي عنده إللي تخليه يروح يطلب منها فلوس ولما مترضاش يضربها، دماغي كانت هتصدع من كتر التفكير بس قطعت عليا سارة لما لقيتها بترن، مكنتش أعرف رقمها ولا هي تعرف رقمي، بس شكلها أخدته من كارت الشغل، نزلت تحت البيت فضلت مستنيها لحد ما وصلت ..
: بنفسك يا دكتورة
• هعمل أي يعني طول عمري متواضعة
: لا واضح عليكي التواضع
• تعالى أركب
: علىٰ فين؟
• متقلقش مش هخطفك
: متقوليش أننا هنروح المستشفى تاني أنا بقيت اتشائم
: لا هعزمك علىٰ فطار تعويض عن الجرح إللي اتسبب فيه أخويا
• لا أنا متعود عادي
: طب تعالىٰ اركب هعزمك علىٰ فول وطعمية متحلمش بيهم
• وماله
ركبت العربية معاها وروحنا لـ محل فول وطعمية كان قريب من المستشفى بس حاجة جامدة كده مش زي بتوع الشوارع، روحنا وطلبنا الأكل، ولاحظت أنها مبتتكلمش خالص ..
: أنتي لسه لابسة الاسكراب
• بروح واجي بيه
: اشمعنا
• أصلي بتعب وكل شوية بغير وحوار
: غريبة اصل أعرف ان البنات بتهتم بلبسها وشكلها أكتر من أي حاجة
• ماهو عشان أنا بكذب مش بقول الحقيقة
: واي الحقيقة
• أمي طردتني من البيت
: يا شيخة أنا افتكرت في مصيبة ولا حاجة وماله ما كلنا بنتطرد
• لا طردتني بجد
ولقيتها بتسيب الأكل من ايديها وكان الموضوع واضح أنه جد فعلاً ..
: ليه كده حصل أي؟
• بسبب أني مش عايزة اسيب مصروف لـ سيف أخويا
: وهو في حد عاقل يرضى أخته تصرف عليه
• هو راضي وأهلي راضيين لا وكمان مجبرة أعمل كده لحد ما اكتشفت أنه بيجيب مخدرات وبيشرب وأمي وابويا عارفين ومحدش بيتكلم فيهم وأنا إللي شايلة الطين وبشتغل 12 ساعة عشان يجي هو ياخد المرتب يشرب بيه حشيش وهما موافقين وراضيين
: طب أهدي براحة مش كده
علت صوتها وبدأت دموعها تنزل وبتتكلم وصوتها خارج بالعافية كأن في حجر واقف في زورها ..
• طب ما تشوفي حد من قرايبك تكلميه
: في بينا عداوة
• طب هتروحي فين دلوقتي مينفعش تقعدي بره
: هتصرف متشغلش بالك
• سارة أنتي بنت مينفعش تعاندي
: مضطرة ولا اعيش من غير شخصية
• لا أكيد .. طب بقولك أي تعالى اقعدى مع أمي
: لا مش هينفع
: لي؟
• مش هينفع وخلاص
: طيب أختي متجوزة من كام شهر وجوزها مسافر وقاعدة لوحدها هاخدك تقعدي معاها
• يا زين بقا لا
: لا ليه معندكيش حجة يلا تعالي
• واختك هتقولها أي؟
: هقولها لقيت بنت غلبانة أهلها طاردينها وهناخدها نعطف عليها
• مش وقت خفة دم دلوقتي
: أمال فاكرة نفسك الوحيدة إللي دمك خفيف
ركبنا العربية واخدتها وروحنا لـ سما أختي إللي متجوزة من تلات شهور وجوزها سافر وقاعدة في شقة لوحدها في العمارة إللي جنبنا، اخدتها وروحنا واستقبلتنا سما ودخلت سارة قاعدة وهي مكسوفة ..
: مين الحلوة ؟
• دي الدكتورة سارة تمام
: دكتورة ؟
• أيوة في مشكلة بينها وبين أهلها وهي مشيت من البيت فـ خليها تقعد معاكي كام يوم كده وهي أصلًا شغلها بليل في المستشفى وبترجع الصبح
: حيلك حيلك أي الحوارات دي كلها وعرفتها منين ومستحيل تقعد عندي لا طبعا خدها معاك
• ما تهدي شوية حقيقي البنت كويسة ولو عرفتي قصتها هتصعب عليكي
: ما كلهم بيعيشوا دور الضحية عشان يصعبوا علينا
• بس دي معندهاش قصة دي عندها إبتلاء وجالها في أهلها
: مش فاهمة
• هفهمك
فهمتها كل حاجة وحكيتلها القصة كلها، وفعلا صعبت عليها ووافقت أنها تقعد معاها لحد ما نشوف هنعمل أي ..
: هي أختك محرجة ترفض؟
• ترفض أي لا هي بس كانت عايزة تعرف عرفتك إزاي وكده
: معلش تعبتك معايا واقتحمت حياتك وسببتلك مشاكل وحوارات ملكش ذنب فيها
• اي كل ده وبعدين اعتبريه رد جميل بعد إللي عملتيه معايا ساعة الخناقة
: لا عادي أي حد مكاني كان هيعمل كده
• وأنا بردو أي حد مكاني كان هيعمل كده بردو
: ماشي اتوكل أنت علىٰ الله شوف إللي وراك
• بتطرديني من بيت أختي!
: مش بطردك بس ادينا مساحتنا شوية
• اه أكيد حاضر
سلمت عليهم ومشيت علىٰ طول بعد ما اتطمنت عليها مع سما ومحدش هيعرف مكانها ولا هيروح يضايقها من أهلها، روحت البيت ومن التعب نمت محستش بنفسي نهائي، ما صدقت لقيت السرير واترميت عليه علىٰ طول .
صحيت تاني يوم الصبح وكنت فايق شوية، شربت كوباية الشاي ودخلت المكتب بتاعي عشان اشوف الورق بتاع القضية إللي محبوس فيها أبويا، فضلت أدور علىٰ أي تفصيلة امسكها مش عارف، حتىٰ عقد الإيجار مدته 10 سنين بمبلغ شهري 10 جنية إيجار، حتىٰ الثغرة إللي كنت همسكها وفاكر أنه عقد إيجار مدى الحياة وكان هيبقىٰ عقد باطل ساعتها طلع العقد مدته 10 سنين يعني مفيش مفر، لبست هدومي ونزلت روحت المخزن أشوفه، مكنش في حد واقف عليه ولا حتىٰ كان مقفول رغم أنه عدىٰ أربع أيام من ساعة ما قبضوا علىٰ أبويا، دخلت المخزن وفضلت اتمشى فيه، ومستغرب إزاي المخدرات كانت متسابة كده عادي حتىٰ مش متشالة في مكان معين، أكيد خليل مش بالغباء ده، فضلت بتمشى لحد ما لمحت حتة حشيـش صغيرة واقعة علىٰ الأرض، اخدتها وبشوفها لقيت ريحتها غريبة مش هي نفس الريحة ولا الطعم إللي متعودين عليه، أنا مش بشربها بس بحكم الشغل عارف ريحتها كويس لأنها مميزة، أنا شكيت في الموضوع واخدتها وروحت لـ سارة عشان اتأكد من حاجة منها ..
: أنت هتضفل رايح جاي كده كتير
• بيت أختي وبراحتي عايزة أي؟
: مش عوايدك
• قصدك أني مش بجيلك وقاطع صلة الرحم ومش بسأل عليكي
: اي الافورة دي أدخل ادخل .. علىٰ فكرة هي في البلكونة
• هي مين؟
: ست الدكتورة
• أنا مش جايلها هي علىٰ فكرة
: أمال جاي لمين
• لا ثانية أنا جايلها هي فعلاً ضروري
دخلت ولقيت سارة قاعدة في البلكونة بتشرب شاي وشكلها مراحتش الشغل عشان لسه صاحية منامتش ..
: صباح الخير
• صباح النور عامل أي دلوقتي
: أنا كويس الحمدلله .. مروحتيش الشغل ولا اي؟
• لا كلمتهم واخدت أجازة يومين قولتلهم تعبانة شوية
: الف سلامة عليكي
• لا أنا بستهبل عليهم أنا كويسة
: طيب ماشي
• خير في أي؟
: مفيش حاجة
• لا في حاجة وشك بيقول عايز أنك تقول حاجة
: ايوة انا جايلك أصلًا
• طب ما تقول
: مأنتوا إللي موتريني
• هسكت خالص
: أنا لقيت دي في المخزن إللي لقيوا فيه المخدرات بس أنا شاكك فيها لأن مش دي ريحة المخدرات
• طب كده محتاجين حد يحللها
: مأنا عشان كده جايلك
• طيب أنا اعرف دكتورة كويسة هي إللي هتساعدنا من غير أي مشاكل
اخدتها وروحنا معمل تحاليل دكتورة صحبتها شغالة فيه هناك عشان تشوف حوار المخـدرات ده ..
: ينهار أبيض يا سارة أي ده
• مخـدرات
: مأنا عارفة جيباها ليه؟
• تشوفيها
: ماشي شفتها شيليها يلا ولا ارميها
• أهدي يا فرحة أنا جيالك في مساعدة ضرورية
: جيبالي الزفت ده وجاية عايزة مساعدة ليه الاستف مش حلو ولا الديلر ضاحك عليكم
• لا عايزين نعرف المواد إللي مخلوطة بيها
: بس ده حوار
• مأنا جيالك عشان تخلصيه
: ماشي يا سارة ربنا يسامحني اقعدي .. وبعدين مين الحلو إللي بره ده؟
• هبقى أحكيلك
: طب هروح عشان ارجع بسرعة وتحكيلي
دخلت فرحة المعمل تشوف المواد المخلوطة في الهباب ده، خرجت لـ زين بره عشان اقعد معاه لحد ما فرحة تخلص ..
: راحت فرحة تشوف البتاعة دي
• هتاخد وقت؟
: لا لا متقلقش
• معلش يا سارة تعبتك معايا
: ولا تعب ولا حاجة انا إللي تعباك معايا
• لا خالص والله
: أنت عارف انا كان نفسي خطيبي يعمل معايا إللي عملته ده علىٰ الأقل يتطمن عليا أو حتىٰ يعرف روحت فين
• هو يعرف؟
: كلمته إمبارح بليل وعرفته وقالي سيبك مني يا سارة دلوقتي مش فاضي لمشاكلكم التافهة دي
• تافهة!
: اه تافهة بالنسباله وقبل ما أقفل في وشه بيقولي معكيش 500 جنية لحد أول الشهر، روحت قفلت في وشه من كتر الغيظ
• هو أنتي بتصرفي علىٰ اهلك واخوكي وخطيبك
: كان بالنسبالي الموضوع عادي لحد ما بقي إستغلال واستحقاق
• بلاش تعودي حد علىٰ حاجة مش من حقه عشان متبقاش فرض عليكي
: مأنا اخدت بالي واستوعبت متأخر
• حقك عليا
: يسيدي أنت ملكش ذنب في حاجة
• اي حاجة تهون عليكي وخلاص
لقيته بيحاول يهون عليا بأي حاجة، حسيت أني صعبانة عليه، ورغم أني مبحبش الشعور ده ولا ابقى صعبانة علىٰ حد بس حسيت أني مرتاحة أن في حد فاهم إللي أنا حاسة بيه وبيحاول يهون عليا ولو بكلمة، لقيت فرحة جاية منشحكة وبؤقها مفتوح مترين ..
: أي يجماعة الهبل ده
• في أي؟
: دي مش حشيـش
• أمال أي؟
: دي حنِة مخلوطة بزيوت ومواد عشبية
شكرا لزيارتكم عالم روايات سكيرهوم
