رواية خيط وابرة الفصل الواحد والثلاثون بقلم شمس العراقية
عندما تقول " أصلح لي شأني كله " فأنك تتوكل على الله ، وهو سيصلح بحكمته حياتك، وسيطفئ بلطفه قلقك ، ويجبر برحمته كسرك ، ويقوي بعزته ضعفك
نور ـ صافنه عليه متمدد مخلي رأسه على المخده وشابك أيديه على رأسه واليشوفه يگول شايل هموم الدنيا كلها على ظهره وعذرته گلت يجوز صدك البيت مهوس ومل من الوضعيه وأني بإخر فتره كمت الوص لازم أرجع أنظم وقتي بين البيت وبين الدوام لازم ...
گمت خليت بنين بالسرير وعفته كاعد غافر محتاج شيء
غافر ـ لا .. ليش وين رايحه
نور ـ أقرا ما لحگت أوني كاعده أذا تحتاج شيء گولي
ـ ماشي وبنين نايمه لو بعدها كاعده
ـ لا بعدها بس هي رضعت هسه تنعس وتنام
ـ ماشي .. أخذت موبايلي وملازمي وكعدت أقرا بالأستقبال وأراسل صديقاتي بالكروب ونحجي على الملابس والمحاضره وهالأمور واني أراسل بيهن وأضحك على سوالفهن فزيت على صوته
غافر ـ كاعده تقرين محاضرتچ لو تراسلين صديقاتج
ـ لا اقرأ واسألهن على كم شغله .
ـ بدال هالسوالف گومي على بنتج تبچي وتردين تقرين أبقي بالغرفة أقري ماله داعي كاعده بالأستقبال لوحدج
2 تعليق
ـ مشىٰ مزعوج حرت وياه والله العظيم اني من ورا هوستي ما أقرا كدامه عدهم وسواس بالترتيب والنظافه طلعوها لروحي .. شلتهن وخليتهن عالتخم ولحكته لكيتها تتنعوص وهو يهز بيها أخذتها منه وهو راح نام وأسكت بيها متسكت تالي زهگت وعطت بيها دسكتي عاد شبيج نكرصتي وكرص اي والله .
ـ شگو تعيطين وتصحيين عليها خبتليها
ـ ما تشوفها زهگتني بس تبچي ما أعرفها شتريد
ـ طفله وتبچي وأنتِ إمها ما تعرفين شبيها وعلى شُنو زاهگه روحج منها على شغل المر والله أذا سمعتلج صوت ما تلومين الا نفسج .
ـ أكولك شگو تلوم بيه ترة بنتي وأذا صيحت عليها
ـ لا ما تصيحيين عليها من كثر خلفتج عاد هي هالطفله ومتعاجزه منها همزين ما مكابلتها كل الوگت بس الليل تلفين عليها وما عندج خلك تگابلينها .
2 تعليق
ـ تعال شُنو هالحجي شنو متعاجزه منها ترى بنتي وشصار اذا صيحت لو تريدلك حجه علمود تحجي عليه
ـ شنو تعال أشو أنتِ صايره ما تحترمين أحجي عدل نور لا أكوم أكسر حلكج وأحجي واطيح حظج هم وتعرفيني زين أذا أشوف غلط أحجي
1 تعليق
ـ لا والله صايره ما أعرفك لان أنت مو هيج
1 تعليق
ـ لا أني هيج بس أنتِ ما عندج وکت تفهميني
ـ غافر أحجيلي أنت شتريد بالضبط لان من المغرب لحد هسه انت ما سگتت وطلعتها لروحي
ـ أهووو
ـ وين رايح تعال أحاجيك جلبت بي دفعني
ـ بشنو نحجي هو شگو طفله وصيحتي عليها وما رضيت كفرت اذا منعتج كفرت الا تسوينها سالفه وزعله وشبيك وشبيك .
ـ لا أنت مو هنا سالفتك وأعرف شبيك بس راح أسكت أشوف تاليتها وياك
3 تعليق
ـً تسكتين! ليش شمسويلج خاتون منو يمج أنتِ شو متحمله عليه يابه أحجي أحجي طلعي البگلبج تاليتها وياي شنو مو .
ـ غافر خل هل اليل يعدي على خير فدوه لعينك لان واضح اليوم شيطانك ناكز علينا بالشر
ـ ليش هو أساساً شگو
ـ والله اسألك نفسك أستاذ! أنت خلقت مشكله وتريد تعاركني مو أني وبنين لكيتها حجه علمود تذب الغلط والحجي على نور وكلكم صح بس نور الغلط .
ـ أستاذ من يمتى تحاجيني بهذا الأسلوب! تسستهزئين حضرة جنابج
1 تعليق
ـ غافر الله موهيج قصدي .
ـ راجعي نفسج زين نــور راجعيها وعدليها وعدلي أطباعج وأسلوبج لا أغير أطباعي وأسلوبي وأتعامل وياج بالما ترضيج وترضيني والما يمشي عدل أسوك عليه بالقندره .
ـ طلع وعافني يربي هذا شبي متحمل عليه .. بقيت كاعده لما نومتها وأنتظرته ما أجه تالي طلعت عليه لكيته كاعد بالحديقه ويدخن جكاير لوحده تقربت عليه غافر گوم نام تأخر والوقت باجر عندك دوام .
ـ روحي نامي ما عليج بيه
ـ زعلان مني أسفه مو قصدي والله
ـ گتلج روحي نامي .
ـ ماشي بس لاتتأخر عليه تعال نام بفراشك ما رد عليه تالي رجعت نمت من تعب ما حسيت بي غير الصبح رايح ولا كعدني واليوم أساساً ما عندي دوام رجعت كملت نومتي ..
ما كعدت غير للعصر على صوت موبايلي رفعته غافر! كمزت باوعت الساعه بـ ٣ خرب شگد نايمه لو ميته موهيج بسرعه جاوبته ها غافر
غافر ـ صح النوم
نور ـ راحت عليه نومه مـا أدري والله
ـ نوم العافية يله گومي
ـ ليش مـا كعدتني
ـ جان عندي شغل هسه لزمت الموبايل
ـ تمام حبيبي تغديت
ـ أي ضل وگت غده هسه
ـ هم صدك
ـ يله گومي
ـ سد الخط وگمت والله هي گالتله كمت وبنين ماكو داخله غرفتي ومأخذتها جان كعدتيني الا تروحين تگولليله وتخلينه يعصب ..
طلعت لكيتها مخليتها وكاعده شافتني عوجت حلگها
صبيحه ـ همزين كعدتي لما رجلج يتصل عليج فلا تكعدين غير لليل لما يجي هو دگومي نظفي هالبيت طلبخيلج طبخه غسلي الكراج ورجلج سبح كوم ملابسه عالغساله لو هاي هم اني المم وراج
3 تعليق
نور ـ خاله ترى والله ماله داعي تخابرينه وتگولليله وتگدرين تكعديني واني اعرفه يروح الدوام واليوم ما عندي دوام وتعبانه ونمت وبنين باليل ما خلتني انام يعني شكو بيها اذا بقيت نايمه وأذا عالشغل بارحه نظفت خبصتيني بهل البيت بس تنظيف تنظيف شطلع بس بيتج بيت ترى هم عدنا بيوت .
ـ ليش عيني لازم بيتي ما عاجبج شتردين قصور ملكيه فوك قلة تدبيرج وساكته ومتحمله لا واسيت العمات وتباهيت بيج كدامهن ولالحكتي الجنايين والنساوين اللازمه بيتها رجلها وتربي خلفتها لا يبو حظي كاظيتها دراسة
وهسه تندرت يم صبيحه تكملين دراستج يم وحيدي شلعتي گلبه عبالي يتزوج يرتاح حاله حال ربعه لا يضل يودي ويجيب لدرب الكليات
ـ عطت وصحت بيها كاااااافي لخاطر الله گااااافي مــا مليتي ما بزعتي شتردين لخاطر شتردين مو طلعتيها لروحي كفرتيني بعيشتي لما بنت أختج وأنتِ أقرب خاله من خالاتي هو هيج يخالتي يا أخت أمي
.. عمي بس أسكتي بس كفي عني خليني أعيش يوم واحد بس يوم بدون نگ ومنا هيج أصيرلج كاع ومن الفجر أكعد الم كل شغل بيتج وأغسل وانظف واطبخ وأولي لدوامي أريد أشوف علتج وين أريد أوكع عليها قصص ماي هوبس
ـ أني هيج تحاجيني أصبريلي ينور خل يجي غافر أذا ما خليته يحطلج حد ويعلمج الأحترام يا ما محترمه أني الج
1 تعليق
ـ والله خاله شتسوين سوي شتطلع بيدج لاتقصرين للن عن نفسي طلعت روحي منج ومن البيت ومن گلشي بس هم راح أسكت وأصبر عليج وأكول ميخالف خالتي أخت أمي ميخالف ينور ..
سويت گلشي ونظفت رغم البارحه منظفه ما خليت ما لمعت لا ميز لا جراجف أستغليت اليوم هو بالدوام حتى مغاسل والكراج كله منظف أرضيات وجلف والله أختنگت سويت الأرضيه تلمع والشبابيك غسلتهن وهي تحجي
صبيحه ـ دمرتي شبابيك بالماي منو رايد منج تغسلين يالنداره ينمسحهن بالوصله مو تطربس بالماي هسه كله يزنجر
1 تعليق
نور ـ ما جاوبت غسلته ونشف ورجعت بالوصله لمعته بس شنو ظهري كمت ما أحس بي من التعب والشغل أشتغلت مثل المطي لما أجه هو أني على فره وحده .. كعدت بالحمام أنهزمت منه لان ما لحكت أسوي عشه كعدت جوه الدوش بجيت الا طلعت روحي والله تعبت يمتى ترحمين حالي أخذتيني جاهل صرت وحده عمرها أربعين سنه من قهرج ونگج بس كافي بس ..
سبحت وطلعت لكيته يضحك بنته الله يساعدك
نور ـ الله ينعم عليك .. جوعان أسويلك عشه هسه لو أشسور شعري
ـ لا عوفي العشه هسه وتغديت متأخر ما جوعان بس أسبح
ـ أي عيني أدخل الحمام لما أحضرلك ملابسك
ـ ماشي وأمي وين ما شفتها
ـ ما أدري يمكن بغرفتها
ـ ماشي حضريلي ملابسي لما أشوفها
ـ راح عليها وخفت تحجيله ويرجع عليه وكتها ما اضمن على نفسي شيصير بيه لان من كثر ما تعبت بس اريد اخلي رجلي على كاع ..
لحگته وگفت بس أسمعها تحجي عليه وحجي وحده متحمله صارلها سنين .
غافر ـ يمه فدوه لعينج وگته هالحجي هسه
صبيحه ـ أي وگته وحقك ما تدري مرتك شحجت عليه وما أحترمتني لسانها بطول النعال عبالك وحده غريبه مو خالتها
نور وما تحترم وبيتي ما عاجبها تريد قصر أم شبر ونص بيت أبوك مو من أعجابها وهو يلمع لمع من هي لفته جاف وخاس من الوسخ ما تخليني ساكته يا يمه مو گلبي طگ منها ومن جيفتها الوسخه
1 تعليق
ـ يمه شهل الحجي فدوه لعينج يا وسخ هذا تحجين عنه أنتِ ما تشوفين بعيونج لو شنو فهميني بالضبط ترى البيت يلمع مرايا وجاي أشوفها تشتغل وما مقصره بگلشي وأذا كم يوم هملته ما راح تنگلب الدنيا هي هم بشر وعدها دوام وطفله وراها ما تخليها تنام الليل شتصير ما تگولليلي .
ـ أي تدافعلها طبعاً مرتك حبيبة گلبك هاي نور قابل أمك
ـ ما أدافعلها بس هذا حق الله وينحجي شسويلها ترى أني هم بزعت من هالسالفه يوميه مشاكل ونگ شلعتي گلبي من يوم الأخذتها وزين تدرين بگلبي يهواها من هي طفله ومشيتي على رغبتي لأن أحبها ليش هسه مرمرتيني وياها .
ـ لا ما مشيت وياك ولا ردتها جنه لبيت كاظم لان مو من نسوانك أنت زلمه حيد تأخذلك وحده زعطوطه بگد زرك من عمت عينك على هيج حب يا يمه اليحب يحبله وحده تسوه مو جاهل گلشي ما تدبر بيضه ما تعرف تطك والبنات كلشي يعرفن اني اجتي يمي كامت تتعلم وتدرس وما عندي عشر ولد هو بس انت شلعت گلبي مرتك
بس گلبي جارعها وجارع لسانها ما تحترم أبد ما تحترم .
ـ شتردين يمه شتردين أطلگها أنتِ هذا التردينه أدري بيج تردين أكسر رگبتها وتكسرين گلبي لان كفرتيني زهگتيني من يوم التزوجت بي ماكو هيج قابليه عندج لما بنت أختج وأنتِ ربيتيها على أيدج شجاج كرهتيها
لو هذا هم حظي وعود كيفت بروحي گلت أخذت الأحبها
وعلواه تطلگها وأزوجك خاتونه الخواتيك مره تلم بيت أبوك وتكظب ظهرك مره بيها خير مو هاي أم لسان .
لازمه درب الكليات ولازمه موبايلها هي إمها وأخواتها وصديقاتها كل خير ما منها مكيفه ومسويه فضل
علينا خلفت الك هالبنيه .
ـ شهل الحجي يمه أتعوذي الشيطان فدوه لعينج لاتهجمين بيتي خلي الله ساتر علينا ترى زهكت بالقرأن زهكت رحمي حالي فدوه رحتلج .
نور ـ عفتهم يحجون ورجعت الغرفه صفنت على بنتي مصدومه بيها حيل الأعرفه عنها تحجي عبالي بس حجي مـا توقعت هيج تكرهني وما تريدني وتتمنى أبنها يطلگني لهل الدرجه خاله ..
نزلت دمعتي مقهوره على نفسي وعليه أدري تعب من هل الوضع وخفت يرجع يحجي عليه لو يسمع كلامها ويطلگني بس أجه باوعلي وضل ساكت خله موبايله على الشحن ودخل سبح ..
گمت سويت العشه وهو طلع من الحمام جاب بنين وكعد بصاله لما كملت العشه وصبيته وخليته بالصاله ورتبت السفره ورحتلها الغرفه خاله تعالي تعشي .. ما ردت عليه رحت أخذت صينيه وهو يباوعلي صبيت الها وأخذته خليته يمها ولكيته كاعد يتعشى وكعدت بصفه أكل وأني ساكته يحاجي بنته ويضحكها وأني خانگتني العبره بالكوه بلعت للگمه وگمت سويت الچاي ..
كملت شغلي وغسلت ملابسه وأخذتلها الچاي والأكل على حطته ما مأكله منه
غافر ـ تعشت
نور ـ لا ما مأكله .. سگتت ما حجه كملت شغلي وكعدت يمه وكعدت أرضع بنين وهو شال موبايله وطلع ها تطلع
غافر ـ أي ساعة زمان وأرجع محتاجه شيء أجيبلج وياي
ـ لا عيني أريد سلامتك .. تقرب باسني وصفن بوجهي .
ـ الله يسلمج .. نامي لاتتنظريني وراج دوام باجر واليوم تعبتي .
تأخر الوگت وهو ما بين كل ظني هو بره تالي طلعت لكيته راجع ومتمدد بالأستقبال عالتخم ونايم شُنو اليخليك تهجر فراشك..
صفنت عليه وعلى وعلى نومته وعلى كمية التعب البوجهه أنقهرت عليه حتى لو يدافعلي ما يگدر تضل أمه وهي الشيء الوحيد الباقيله من أهله ..
ما گعدته رحت جبتله الغطا وغطيته بلكي تكعد أمه وتشوف نتائج كلامها شسوت بإبنها بلكي ترتاح أذا بيته ينهجم ...
بوگتها بقيت للصبح كاعده وگمت لبست ملابسي ورضعت بنتي وسويت الريوك ودخلت الأستقبال ما لكيته باوعت چاي يشغل السياره رحت المطبخ وهو
أجه باوعلي أصبلك چاي .
غافر ـ بس أغير ملابسي تريكي لما أجي .
نور ـ ما أكلت غير لكمه وحده بقيت أنتظره أتخبل خبال من يضوج ويعزل روحه روحي تغيب بعزلته أحبه وأختنك من دونه...
طلع من الغرفه راح على أمه ما أعرف شحجى وياها وأجه
ما تتريك
غافر ـ لا أمشي أوصلج ماطول بنين نايمه
نور ـ تمام طلعنا وطول الطريق ساگت لحد ما وصلني وأني هم ما حجيت عفته على راحته وصلني وراح البيت
للظهر خابرني
غافر ـ نور وين مخليه الحليب هاي القوطيه خلصانه
نور ـ بالكنتور من يم الباب تلكاه ليش تبچي
ـ جوعانه تبجي من ضيمها
ـ ليش خاله وين
ـ ما موجوده طالعه على بيت خالي مشعان .
ـ تعال أخذني خلصت
ـ بس أرضعها طگت من البجي وأجيج
ـ سد الخط وشويه وأتصل
ـ أطلعيلي هاي جبتها وياي
ـ جان عفتها يم أمي
ـ هسه ويني وين أمج طلعي عاد
ـ أجيت .. طلعت وشفتها حالها حال مزوعه وملابسها منكعه وهو أحجي حرف يعيط أخذته وگبل سگت بحضني بس مهضومه مبين هواي باجيه ..
وصلنا البيت مواعين الريوك على حطتهن عالسريع أخذتها غيرتلها ونامت بحضني وهو ذب السويج وأجه يبوس بيها وهي بحضني أكول غافر ليش ما نوديها يم أمي هي كاعده ما عدها شيء ولبنى ولينا موجودات حالها من حال بنات لبنى مو أحسن وأني مو عن شيء والله بس بنتي وكحه وأتعب وخالتي ما تگدرلها مره جبيره بعد كيفك عيني
غافر ـ ماشي .. نوميها بسريرها گومي غيري ملابسج ولاتسوين غده وصيت من برا
ـ ليش وصيت جان أني هسه عالسريع طبخت
ـ لا وين تلحگين وخاف هاي تكعد تثولج هو غده
ـ گمت نومتها وتقربت حضنت أيده ونمت على صدره مشتاقتلك لاتضل ساكت خله أيده على رأسي ولمني لصدره وبقينا ساكتين ودك موبايله وأبتعد رحت غيرت ملابسي ووصل الأكل كعدنا نأكل أني وياه ..
ردت أنظف المطبخ بس هو ما خلاني
غافر ـ غسلي وتعاي نامي العصر نظفي .
نور ـ تمام ونمنا بس كلمن لحال .. أني هم تعبانه گبل غفيت ..
للمغرب كعدت هو ماكو وبنين ما موجوده طلعت خالتي راجعه شفتها بالمغاسل ركضت المطبخ بلشت أغسل وأنظف وباوعت عليهم مخليه بحضنه وكاعد بالحديقه .. لملمت المطبخ وبلشت تنظيف .
صبيحه ـ هسه تندرت مرت الراعي من تروح الغنم هذاك الوگت تصير أم بيت معدله من تغيب الشمس تكعدلي تنظفلي من خرب بحظك يا يمه .
نور ـ نظفت وأني ساكتلتها وسويت العشه وأجه وخالتي ما أجتي عزلت الها بالصينيه وأخذتها الها بس طردتني
صبيحه ـ شيلي ما أريد لا خلف الله عليج أعيش على لكمتج .
نور ـ خاله سمي بسم بالله وأكلي من البارحه أنتِ ما مأكله
ـ گتلج شيلي عاد مسويتلي الطلي هنا طماطات حمس هذن أضحكي بيهن على وليدي يأكل هو ساكت
1 تعليق
ـ شبيها الطماطه الحمس وبعدين ما مسويتها وحدها وياها كبه وفنكر وسلكت الج بتيته وبيض .. صدت وجهه وشلتها ورجعت من شافها عاف للكمه من حلگه ما تريد .. أخذها مني وراحلها وصوتها صار عالي .
صبيحه ـ شيله ما أكل
غافر ـ يمه ليش ما تأكلين
ـ سم ما أكل من أيد مرتك أمشي أخذ صينيتك وأنت أكل هذا الطبخ الك مو اليه لو مفكره بيه جان طبخت طبخه مالت أوادم
ـ يمه ما كافي عاد يعني شتسويلج بعد عوفي الزعل فدوه لعينج وهسه أدز عليها وأجيبها الج تبوس رأسج وتعتذر منج بس كافي عازله نفسج بغرفتج حتى بنين ما تكربين صوبها .
نور ـ ما ردت عليه وجاب الصينيه يريد يخليها عالكاونتر وگعت من أيده بالكاع ومن قهره الدولكه كزاز دفرها بأيده وكعت وتطشر الكزاز وبنين صرخت فزت من الخوف ضلت تصرخ وهو عاط بعلو صوتها خبلها
بالزايد
غافر ـ بصياح سكتيها سگتيها
نور ـ شأسكت منها أنت خبلتها هذا عمل عملك وأحنه شگو بإمك ترجع علينا ترى مو وضعيه هاي قسم بالله تعبت طلعت روحي لو تشوفلي حل لو أولي لبيت أهلي لان أمك كارهتني ما تريديني گوه هي گوه
ـ يا حل شتردين أنتِ أنوب
ـ والله الحل عندك طلعني بيت لوحدي سوي أي شيء بس ما أضل هنا عايشه حرب نفسيه ويه أمك مو عيشه هاي والله مو عيشه .
ـ منين طلعتيلي بسالفة البيت تردين بيت وأمي وين أعوفها حجي ما تعرفين تحجين أسكتي
ـ وتخلينا هيج
ـ شسويلج متگولليلي وسالفة البيت تنسينها هذا بيتي تكعدين وتنجبين بي وأمي تحجي تغلط تتجاوز تكسر حلكج حجايه ما أسمعلج .
ـ وين حاجيه هو أني ساكته ما خلصانه
ـ أي هذا هو .
ـ عفته ومشيت وصاح وراي
ـ وين موليه تعاي لمي هالكزاز مو كدامج المطبخ أنهجم
ـ منو هجمه غيرك أنت وأمك وين أولي أنوم بنتك خبلتوها وخبلتوني مو عيشه هاي والله مو عيشه
عفته ونومتها بالگوه ضلت بس تبجي وأفتر بيها لما نامت ورحت لميت الكزاز ونظفت ورجعت لفيت رأسي ونمت وثاني يوم ما رحت الدوام وصادف خميس كعدت وسگتت ومر كم يوم وهي لاتأكل ولاتشرب معانده يحجي وياها قافله أني هم بزعت منها گمت لا أودي ولا أجيب أطبخ وأكل حتى هو أصب ما يجي شسويلهم أضل أتوسل بيهم وحتى بنتي من أروح الدوام أبقيها يم أمي وللمغرب يله أجيبها من يمها حتى بنتي بعد ما ابقيها يمها أريد أشوف شنو حجتها ..
وخلال هل الأيام مو بس هي عزلت أكلها وعاندت بي وبيه هو كذلك تغيرت معاملته جذرياً صار غافر ثاني دوم معصب وبس يعيط وأعصابه فايره وأقل غلطه مني يگلب البيت جحيم على رأسي
... ودوم كاعد لوحده وصفناته كثرت حتى هجر فراشه هذاك غافر الما ينام الا ينومني بحضنه وما يوم دخل البيت أذا ما حضني وباسني .. حنيته حبه سوالفه غزله كلهن طفن رجعنا للصفر للعدم الماله بدايه! كلمن لحال
.. والبيت مكهرب وداخل بحالة أنذار أركض كدامه ووراه أخاف هيج أخاف هيج بس علمود أتجنب عصبيته وصوته ما أريد أسمع منه حجايه تغثني وتضل تكرظ بگلبي وتغير صورته الحلوه هو يجنن
.. غافر نسخته ماكو منها الأيام العشتها وياه والله جنت ملكة زماني بس أخ من القدر يدور أسباب وحجج ويقلب موازين حياتك فوك تحت..
گمت من الليل أطبخ علمود أحصلي حجايه تسممني
أبد ما أخلي قصور بس خلص قفلت جنيتها عليه ما تريدني ومن أجه گبل راحلها للغرفه وقبل لا أروح الغرفه سمعتها تحاجي
صبيحه ـ مو تريد منك بيت طلعها بيت لوحدها وبيت أبوك يضل أجيبله وحده تكظبه مره سباعيه أم بيت!
غافر ـ يعني تريديني أتزوج هذا الحل عفيه عليچ يمه
ـ أي شگو بيها والشرع حلل قابل عيب لو حرام وهي أجرلها وأذا تريد أشتريلها ملك وهذا البيت تزوج بي وحده تريحك وتريحني وتخلصك من طلبات المطاعم الما تخلص على أقل تتزوجلك وحده تطبخلك طبخه مال
أوادم تخلفك وأنت هم عاد روحك على المتزوجين يمه وأخلص ليش باقي معلعل والله يمه نور مو من نسوانك هي بنتها ما تدبرها عاد تدبر بيت شگده شگبره
1 تعليق
ـ يمه فدوه لعينج أذا اليه معزه عندج كافي سدي هذا الموضوع وتقبليها وأرضي بيها والبشر ما معصوم من الغلط ترى والله تعبان أكثر ما تتصورين وهي مرتي وأنتِ أمي لاتخليني بوسط قرارت مميته .
ـ أسم الله عليك وعلى عمرك وليدي تعال يمي يمه وليدي .
ـ باوعتلهم من الباب حضنته وتبوس بي وبجيت وأني أباوعلهم ليش هيج خاله لهل الدرجه وصلت بيج تردين تزوجينه وتهجمين بيتي تردين تأخذينه من حضني .
بس ما أسمح الها تهجم بيتي وباجر من يروح الدوام الج حجي وياها مو على كيفها ..
أجه نام وصافن عفته وأذا سواها وسمع كلام أمه وتزوج أمشي لبيت أبويه وبعد يحلم يسمع أسم نور والله أخذ أمي وأخوي وأخواتي حتى بالمنطقه ما أبقى
الصبح كعدت يلبس ملابسه ردت أكوم أسويله ريوك
غافر ـ وين تريگت
نور ـ شوگت موو هسه كعدت
ـ لا كعدت تريگت ويه أمي
1 تعليق
ـ بالعافيه
ـ ما تروحين الدوام شو ما محضره ملابسج
ـ لا اليوم ما عندي شيء باجر أدوام
ـ تمام .. ما أريد مشاكل بغيابي ما يحتاج أوصي
ـ مشاكل شنو ةمنو مسوي مشاكل شبيك غافر
ـ ما مسويه مشاكل بس أوصيج وأمي تحجي ميخالف خالتج شنسويلها نتحملها ومسأله وقت وتتعود وأنتِ هم ليني وساسي وأكسبيها والريج الطيب اله دور
ـ وليش ما توصيها موهي المفروض تكبر عقلها وتوسع گلبها وتتحملني وتعلمني مو بس ترجع تأكد عليه
ـ أشو ما تعرفين تحجين شنو تكبر عقلها صدك زعطوطه وعقلج على كدج ما تعرفين مالات الأوادم وأني أوصي وأعلم لو باقي ساكت أشرفلي
1 تعليق
ـ هذا الطلع منك ترجع عليه وتطلع السبب بيه
ـ نــور گافي من ساعه السوده الحجيت بيها وگتلج
ـ بس أني ما گلت شيء أنت گوه متحملني أقل حجايه تعصب وترجع عليه
ـ فضينا عاد حجيت حجايه لو كفرت .
ـ طلع وخلاني وخالتي واكفه تدعيله عبالك ضرتي مو خالتي ماكو هيج قابليه عدها أنتظرته يروح وأحچي وياها بس بعدين تعوذت الشيطان ورجعت الغرفتي أصير أحسن منها وأكبر عقلي وياها شسويلها يعني عفتها ورجعت نمت ..
للظهر كعدت على صوتها تدك الباب وبنين تبچي نفضت الغطا بقهر
صبيحه ـ ما كافي نوم بنتج تبچي ما تسمعين صوتها مو حتى ظهرج خاس من النوم مـا كافي شوگت تكعدين .
نور ـ گمت خليت لهايه بلحگها وسگتت وطلعت عليها شتردين خاله يعني شلون الواحد ما ينام وشگو شعدنا شو البيت نظيف غافر بالدوام أنتِ مريضه ما تأكلين دسومات المن أطبخ وخابصه نفسي شو بالحالتين أنتِ ما راضيه عليه .
صبيحه ـ بالجذب سويلي لگمه أكل ما تگولين هاي مره جبيره أريد أخذ علاج .
نور ـ مشيت غسلت وعفتها تحجي وتدردم ما تمل أبد من المشاكل .. طلعت الها بيض سلكت الها وخبز وثرمت طماطمه شو هاي عاطت بيه .
ـ هذا أكل يا بنتي بالسجن هم ما ينطونه لو ما بيج خير تطبخين طبخه وتخلينا نأكل لو مطاعم لو سلك
بس أصبريلي أذا ما زوجته وأجيبله وحده تترس عينه وأتباهى بيها مو مثلج كل خير ما منج وهالسم هم
ما أريده
ـ أنتِ شتردين لخاطر الله تردين تهجمين بيتي أهجمي هو أنتِ شخليتي كل مشاكلنا بسببج أنتِ مو أم فتنه والله
ـ أني هيج يولي أني فتنه ينور
ـ أي أنتِ ما عبالك خالتي أخت أمي لو عدوه مو هيج والله العظيم موهيج... ومن اليوم دخلت هالبيت أني ساكته ومتحمله بس گافي طگت روحي منج ومن مگرج
.. تسوين روحج الفقيره كدام غافر تعامليني شكل ووراه شكل شگد شفت نسوان مكارات وعدهن كيد مثلج
ما شفت أول مره أشوف وأعاشر وأخر نوياج وصلت بيج تردين تزوجينه عمي دروحي زوجي خلصيني منج ومنه ذبحتيني بي بس أنتِ مخلفه ولد شطلعت لعبتوها لنفسي طلعتوني من الأسلام كفرتوني بالنبي العربي قسم ىالله
1 تعليق
ـ شمسويلج أنتِ مو أدمي فوك ما نعلمج وأسويج أم بيت گلت بلگي تلحگين الأوادم .
ـ ألحك الأوادم ليش يمه شبيه شو جبتوني لحم وتردون تذبوني عظم أنتِ وأبنج أثنينكم كفرتوني عبالك بس أنتوا نظيفين العالم كلها وسخه نور ملابس بالغساله نور كوشه بالكاع نور ماعون عالسنك نور الحوش بي ورق شجر نور الحمام بي زفره نور نور نور من أنعل أهل نور لابو الساعه السوده الشفتكم بيها لابو حظي الصرت بيها بنت أختج وأخذت أبنج لو باقيه أغسل رجلين أمي وأخدم عمي أبو العرك والله أشرف من العيشه وياكم بالف قاط ..
ـ منو لازمج هذاك الدرب أمشي ولي على أمج طلعتي متحمله علينا بس حقج تحجين هالحجي شبعتي منه وسويتي مكفخه بيدج ولكيتي فقير وعلى كد أيدج تحجين بزود مسكين يا يمه يا غافر .
ـ أني متحمله عليكم لو أنتِ من يوم أخذتيني طلعتي عيوب الدنيا كلها بنور بس علمود تخربين حياتي ليش لان الزواج صار على رغبة أبنج وكل ظنج مخططات أمي ترى أني ما دزيت عليه مصخم ولا واعدته ولا ضاله بيت أبوي لو ما عدهم خبز يعيشوني أبنج هو رادني وأجاني برجليه لا مسكين ولا فقير ولا كد أيدي أبنج هم مو قصر شتحجين يرجع عليه لليوم ما أنطه بيج يزعلني بس علمود يرضيج راحت بنفسي يوم يوكفلي لا تسوينه فقير وتتبجين وتتشگين بحاله محد فقير وأنتِ هم جنتي فقيره وشحلاتج من أبنج أخذني طلع وجهج الثاني لو باقيه قبل لا أخذ أبنج خير وبركه بس ما عبالي البشر عنده الف وجه مثلچ .
ـ شمسويتلج ولج وأني خالتج هيج تحاجيني ينور الظاهر امج ما ربتج وعلمتح مالات ألأوادم وعبالجن الزواج دنبك وهاي هيه كل أحترامات ما عندج مع الأسف أني تالي وحده زعطوطه هي تحاجيني وتعلي صوتها عليه .
1 تعليق
ـ والله أهلي ربوني أحسن تربيه وما مقلله من أحترام أحد بس البشر اله طاقه تحمل وأني طگت روحي منج ومن العيشه بهل البيت
ـ وليش طگت روحج شتردين بعد دحمدي ربج على نعمتج وعليه غير عمات ما يتحملن الأنه متحملته بيت شگد شكبره قصر تحملين بي ورجلج ضابط بالدفاع والف من تتمناه والخير ما شاء الله تحيرين شتأگلين وشتطلبين من المطاعم ومخليج تدرسين ونومج للظهاري وبنتج عايفتها عليه وطلعاتج وصديقاتج هذا كله محد محاسبج عليه وكل هذا أنه أم رجلج وخالتج أحترام ما تحترميني .
ـ أكولج خاله شخبصتيني بإبنج بس هو ضابط بالدفاع ترى ضالين محد بحالهم خاف عبالج بس أبنج ضابط!
لو بس بيتج بيت ومحد عنده بيوت بس أنتِ عندج بيت ترى أني هم عندي بيت أبويه بگد بيتج وقصر ويطارد بي الخيال ما جايبتني من الشارع
علمود تعايريني بيتج ولا ميته من الجوع وتستحسنين عليه بالأكل وأذا على أكل مطاعم أبنج اليطلب قبل لايجيبني بيتج وكلها تطلب لاعبالج أكل مطاعم فدشيء .
ـ أي شمدريج شمعرفج حاسه بتعب بسهر تدرين الفلوس منين تجي على الحاضر تسلتين وتأكلين
ـ أكل وأصرف لان هذا حقي وواجبه يصرف عليه أني زوجته مو جاريه عنده ولا جايبتني خدامه أخدمج وأخدم أبنج وأني مو جوعانه وبطني فارغه جايه أشبعها عندج عيني مليانه الحمدلله
.. أني بنت صباح معلم كلها تحلف برأسه مات وما خلانا بعازة أحد عيشنا أحسن عيشه ولحد هسه أخواتي مدلالات براتبه لا بحالج ولا بحال بيتج وزنگتج التتباهيين بيها لرايح والچاي وبيتي وبيتي
ـ أي بيتي چا جاذبه بيتي وحر مالي وگلبي يوجعني عليه رجلي جابه بدمه وجان يلج لج من النظافه وأني مريضه ومفاصل ونظيف بس هسه خاس كل يومين يله تنظفي أنتِ جنه كاظم حرامات بس شسوي لگلب أبني گتل نفسه على خالته وبنت خالته أستلم يا يمه
ـ من خلاله خلت عيني وعينه من ساعه السوده الأمي صارت بيها خالته أي والله .. عليج الله أنتِ حاسبه روحج خالتي ما أشوفج خالتي أنتِ عدوتي والله عدوتي كفرتيتي بزعتيني أنتِ وبيتج وعيشتج ذليتوني وين ما تكعدين البيت تسولفين بيتي وبيتي ومن لفت عليه نور خاس شخاس شسويتله متكولليلي شسويله أنهاريت وأصيح عليها
والله بيتج لو الحسه لحس من فوك ليجوه أنتوا ما يعجبوكم باليوم أنظفه مرتين وأركض كدامكم ووراكم وبالعه موس وساكته على حجيج كله وأنظف أكرف كرف المطي والله ظهر وأيدين ما خليتوا عندي بس أنتوا بيكم مرض وسواس نظافه طلعتوني بزعتوني أنتِ وأبنج والله كرهت البيت وحتى أبنج كرهته وما أريده أخذي زوجي خلصيني منج ومنه ساعة المباركه بس فگيني منج كافي ما مليتي ما بزعتي شنو أنتِ لو عدوه لأمي هم مو هيج مهديه بسحورتها وكيدها ما تلحكچ وخرب بروح أهله اليتحملج ما تنحملين ما ينعاش وياج .
ـ أي أزوجه چا أبقي عليج أم لسانين أكلتيني وشربتيني
ـ زوجي بالمبارك بس أني عرف ليش هيج تسوين بيه وتردين تهجمين بيتي شفتي نفسج بطرك غافر وحيدج تردين تعيشني نفس الشعور العشتي وتخليني بطرك بنين لان تغارين مني ومن أبنج لو ما تغارين جان عفتي أبنج يعيش حياته براحته بدون هل المشاكل بس تغارين مو بأيدج عاذرتج .
صفنت بوجهي ونزلت دموعها وكالت
1 تعليق
صبيحه ـ رحمه الله والديج مشكوره .
ما جاوبتني عفتها ورحت لميت المطبخ وواهس ما عندي حتى طبخ ما طبخت وللظهر أذن وطلعت تتوضى بس ما تباوعلي تالي غلست بلكي تعرف نفسها غلطت وتفگ مني ياخه ..
للعصر بقيت بغرفتي وغافر أتصل ما جاوبته مالي خلك أحد حتى گلبي گام يوجعني والله مخنوگه خنك تالي گمت سويت العشه وعيني عالساعه لما سمعت صوت سيارته أجه ونزل المسواك عفت من أيدي وتلكيته الله يساعدك .
غافر ـ ويساعدج يابه أشو ماكو أتصلت عليج اسألج شنو محتاجين مسواك ما جاوبتي وين عايفه موبايلج
نور ـ بالغرفه وأني بالمطبخ جاي أسوي العشه
ـ ها شطابخه لان جوعان ما متغدي
ـ دجاج بالفرن
ـ أي والله أجه بوكته نفس التتبليه تسوينها كل مره مو
لان أعشقها
ـ أي عيني نفسها .. فات كدامي وفتح الفرن وأكل شوي وسوالي حركه بإصبعه توب التوب.. وتقرب شال بنين باسها وغمزلي وكرصني من خشمي
ـ لچ مشتاقلج خفت هالخشم اليابس ما حنيتي
ـ همزين تذكرت والله أذا أنت ما تحن أني هم ما أحن
ـ جلبه حقيره گلبج أسود أني أعلمج بالليل حسابج عندي غير شكل بس خل أدرب العشه وأتفرغلج .
ـ شنو
ـ سمعتي كلمتي مو! ماكو مشاكل بغيابي
ـ ها لا شگو قابل
ـ وأمي وينها طالعه لو بغرفتها
ـ لا بغرفتها ..بلعت ريگ وركز على وجهي كأنما يقرأ ملامحي ..تسبح لو أصب العشه
ـ خل أشوف أمي بلكي تجي تتعشى ويانا
ـ ماشي عيني ..راحلها وحاطه أيدي على گلبي وطول يمها وماكو صوت تالي رحت الغرفتي اريد شيء التهى بي ياربي ما تگوله ويعدي هاليوم على خير يارب .
ضليت كاعده وأجه وشايل موبايل! سويت روحي أهز بنين ومية الف دعاء بگلبي دعيته الا أن وصلني وحجه بعصبيه
ـ نور گومي خلي بنين بالسرير وتعالي يمي
ـ گمت خليتها وگبل سحبني من أيدي بقوه غافر على كيفك شبيك وجه الموبايل بوجهي
ـ شبيه مو .. هاج سمعي
ـ شغل فيديو ظلمه بس الصوت مسموع صوت عركتنا كلها مصوره ومسجله بفيديو! وكل كلامي ينسمع لنص وقطعه وذب الموبايل على الجربايه وأني مصدومه! لماضربني راجدي فر رأسي فر ولزمني من شعري بقوه وصاح بوجهي .
ـ هيج تحجين ويه أمي نور هاي تاليتها أنتِ تقللين من أحترام أمي وتعلين صوتج وتغلطين عليها وتعيرينها
ـ أني ما عيرتها بس حجيت من قهري أنت ما تدري شحجت عليه ما تدري بمعاملتها اليه لان أني ما أحجيلك
ـ وأذا حجت تنگلب الدنيا على حضره جنابج مو گتلج أحترمي وأسگتي گلت لو ما گلت مو أمشي وأوصي بيج بس لا أنتِ شيسكتج ما تسكتين أدري بيج لسانج طويل وعرمه تعلميني بيج .
ـ لساني وطويل وعرمه أني غافر
ـ أي حقيره وجلبه لو تحترميني جان أحترمي أمي مره جبيره بس أنتِ وحده ذرة أحترامات ما عندج ولج جان أستحيتي على نفسج جان وگف بعينج من أخذتج أنتِ گلشي ما تعرفين أجيتني مثل طالب الأميه وهي تخيط وراج فتوك علمود تطلعج بإحسن صوره كدامي وتنظف وراج وبيت شگد شكبره هاي تنظفه واني جنت أجيب الها خدم ينظفونه الها لان عدها مفاصل بس هي تنظف وراج وتگولي نور نظفت نور طبخت وأنتِ هيج تجازينها
ولج دراستج لما أمي أنتِ ما تدرسين وبنتج هي شايلتها وحافظات وحليب كله هي بس هل الأيام كمتي تودينها على أمج .
بس أنتِ وحده مو أدمي ودافره نعمتج بإيدج
ـ خلف الله عليك وعلى أمك بس ما أستغرب لان هذا أنتوا من يوم يومكم تستحقرون البشر وشايفين نفسكم عالعالم وأنتوا وبس وكل هذا ركضي كله وسگوتي بس علمود أرضيك وأرضي أمك ومتحمله لخاطرك وأكول مبخالف خالتي تمون عليه حسبة أمي والله ما أزعل منها وأجيتكم والله ما أعرف گلشي أني بنت دلال بيضه بيت أهلي ما أعرف اطك وأنت زين تدري ووعيت على طفولتي وأجيت هنا تعلمت وتجويت بس علمود أرضيكم
بالأخير بغلطة وحده طلعتوني صفر وهي لو صدك مظلومه جان حجتلك بلسانها ليش تسجل وتتمسكن عليك بس أمك مكاره ومفنده وتتبجج كدامك ورجليها واصلات الكبر قبل لا أكمل كلامي ضربني راجدي ثاني وعاط بيه
ـ كلمه ما أسمع منج تحجين على أمي هاي أمي تاج رأسج ورأس الخلفوج تكسر رأسج تجفص عليج يالقندره ما تتنفسين بحرف .
ـ لزمت خدي وسگتت مهضومه ما توقعتها منك ولاتوقعت يوصل بينا الحال لهل النقطه وگتلك والله گتلك طلعني بيت وحد أحسن ما تصير مشاكل بس أنت فضلت راحة أمك على حساب راحتنا أني وياك وبايعني من أولها
ـ تردين بيت لوحدج حضرة جنابج الكسيف ما تكعدين الا بيت لوحدج بعد عندج طلبات ثانيه ست وأكعدج بيت وأعوف أمي لوحدها وبيت أبويه السكنت وربيت بي كل طفولتي أعوفه وأعوف أمي من وراج وعلمودج أنتِ
.. هو أني شعندي من الدنيا ومن أهلي غير أمي باقيتلي تردين أعوف أمي علمود راحتج وراحتي من أنعل أبو الراحه الأعوف أمي علمودها
1 تعليق مع تفاعُل
شوفي وسمعي زين يا بنت الناس مستعد أعوفج أنتِ وبنتج وأمي ما أعوفها وأمي هي نفسي يصعد وينزل عاجبج عاجبج ما عاجبج هواي حياطين الكيكج حايط وطنحي رأسج بي بلكي يشتغل هالدماغ المتبن زين .
ـ عافني وطلع وكعدت بچيت الا طلعت روحي ما مقهوره غير ليش هيج سوت والله لو حاجبتله بلسانها ميخالف حتى لو تزود بس مو تسجل صوتي! مره جبيره شلون طلعت منج هالدروب والسوالف وعلى شنو علمود أبنج يسمع زين ويصدك ويصير ضدي وشحلصتي هسه وسمع وصدك وأجه حجه وضربني شحصلتي شتگولين لربج من هيج سويتي بينا وخربتي حياتنا أكيد هسه كرهني عباله أكرهه أمه أكيد .. أخ لو تدري بگلبي شبي أخ والله جان عذرتني ..
گمت طفيت الفرن ورجعت گلشي لمكانه والمسواك بعده على الكاونتر مشتري حلويات وكرزات وسوالف مال سهره خليتهن بالثلاجه وباوعت برا كاعد بالحديقه بس جمرة جگارته مبينه عليه! ردت أروح أعتذر منه بعدين تراجعت ورجعت الغرفتي حضنت مخدتي ونمت وأني مهضومه منه حيــل وما أجه للغرفه أبد ولا دخلها ولا أني غفيت ضليت كاعده بس أبجي طگيت صوتي طبگ وبلعومي تجرح من القهر ..
الصبح طلعت غسلت وشفته راحلها وشويه وسمعت عيطته وكع الخاولي من أيدي وركضت عليه
غافر ـ سويج السياره بسرعه ركضي بسرعه
نور ـ ركضت مثل المخبله وهو شالها وصعدها السياره وأخذ مني السويج أجي وياك ما رد عليه طلع بكل سرعته ضليت الوب من الخوف والقهر رجعت أفتر بالصاله ودخلت غرفتها جهاز الضغط وعلاجها ياربي أذا صارلها شيء مـا أسامح نفسي خرب بعقلي الله يأخذني أشسويت يارب تلطف بحالها وردها سالمه ياربي لخاطر غافر يارب لاتكسرلي گلبه لاتيتمه مره ثانيه والله يموت وراها يارب ..
ضليت الوم بنفسي ما خليت دعاء ما دعيته ومرت ساعتين وبنين گامت تبجي رحت رضعتها وضلت كاعده ونوب موبايله ناسي وسمعت صوت طبة الباب ودخل شمر السويج تقربت عليه بخوف بشر خاله شلونها
غافر ـ واضح هواي يهمج حال خالتج من لسانج بطول النعال تعلينه عليها أنتِ أحترام ما تحترمينها أدور تسألين على وضعها تردين تموتينها بقهرها علمود تخلصين منها وغافر يضل الچ .
بس وروح أبويه الماكو أغلى منه المات وأني بحسرة شوفته يا نور وروحه الأبويه أذا أمي صارلها شيء أنتِ تتنهيين من حياتي! ..
أروح المستشفى وأرجع ما الكاج بالبيت تلمين سلابتج وتنگلعين على بيت أبوج وتربي زين لان يحتاجلج تربيه
وأذا أمي منا الساعة صارلها شيء ثانيه ما تبقين على ذمتي لو روحي بيج أعوفج وفرده وأنزعها والبس غيرها
وفرتين هم مو فرده .
ـ فردتين مو!
ـ وبفردة بنعال ما أشتريچ
ـ ما جاوبته وخله وطلع بدون أي كلام لبست عبايتي ولميت شغلاتي الأحتاجهن بجنطتي وشلت بنتي وطلعت مشيت هو واكف بالطرمه عينه بالموبايل يحجي ويه الدكتور .
ـ أي دكتور وهسه شلون وضعها تمام هسه أجيبلك علاجها أن شاء الله
ـ سد الخط ومشى يريد يدخل البيت حاجيته توصلني لو أروح لوحدي
ـ روحي لوحدج ما فارغلج .
ـ ما جاوبت وحفظت الباقي من كرامتي أصلاً أنعدمت الكرامه ومشيت وقبل لا أوصل الباب باوعت جنت أتمنى يگولي أوگفي لاتروحين بس تخلى عني بإسهل ما عنده تالي كملت طريقي مشي لبيت أهلي وبيدي جنطتي وبحضني بنتي ومصيري معدوم ومجهول
_________________
لينا ـ الأيام كفيله تنسيك العشته بس الواقع يخليك تعيش أتعس من الأيام الراحت بالأخص أنت بيتك وما مأمن على نفسك هذا العشته بيت أبويه بوسط حكم عمي محمود وتسلط نورس هي ومهديه وبناتها ..
راجعه من المدرسه وطول الطريق صافنه أحاول ما أذكره بس من أنعزل لوحدي يخطر على بالي بالأخص من أرجع بطريق السياره وهدوء وأتذكر أخر مره من هو چابنه ما باوعلي نظره وأني منطيته من بالي وأفكر بي .
وصلت البيت ولبنى مخليه بناتها بالشمس تشمسهن الجو حلو ومشمس وحلو تقربت شلت رانيه وأبوس بيها لك شنو أنت دبدوبي شتأكلين ها .
لبنى ـ لينا أخاف سليمه تحجي وياج لاتحاجينها عوفيها وخالتي مو هنا مالي خلك مشاكلها .
لينا ـ شبيها ليش
ـ گابات عدها وأنوب سمعت خالتي تحجي عليج أنت ونافع بس تخلصين تعقدون تخبلت وكعدت والفشار الحجته تعاي وشوفي بت شوارع
1 تعليق
ـ وخالتي منو طلب منها تحجي بهل الموضوع يعني چلبت والرجال حجه حجايه ينقذني من السليمه عمي ليش تخلون الواحد يطلع من طوره بس تريد تلزگني لنافع عمي ما أريده أخويه أخويه جلبتوا النا بهل السالفه
يعني البنيه ما تعيش بيت ابوها ما تكمل دراستها گبل زواج ابتيلنا زوجنه لخالتي من خفت شكله
ـ وليش ما تردين نافع أحسن من غيره تخلصين على أقل يخليج تكملين دراسه وعمي منو يگول يخليج تدرسين حدج بس السادس هذا الفهمته من كلامه ويه خالتي .
ـ لا عمج ينراد اله واحد يضبه زين ويكعده وزن لو يشيل جولاته ويولي من هالبيت لان تمادى وشاف نفسه زايد كافي عاد طغى هواي .. عفتها ودخلت البيت وجانت تطبخ الغده ناكل السم من أيدها منبصه نفسها بمكان خالتي ووگت والله .
نورس ـ سبحي وتعالي ثرمي سلطه
ـ لا مو كاعدين خدم وحشم لحضرة جنابج
ـ كاعده عندي وبيت أبويه فه أحترمي نفسج زين وتردين شغله روحي على أخواتج أني محد يأمرني
ـ تعيريني لينا سهله وبسيطه يجي أبويه وأشوفج الحجي ؏ أصوله أذا ما ندمتج أني مو نورس
ـ لاتقصرين عفتها ودخلت غرفتي ورحت سبحت وطلعت أمشط شعري وروحي طالعه ورأسي مطبل من الدراسه وهي تريد واحد يعاركها مالي خلگها كلش ..
وناويه أحجي ويه خالتي بموضوع نافع أريدها تخلصني من هالسالفه ويخلوني التفت لدراستي .. للظهر صار الغده تغدينه ونورس وأخواتها عزلن أكلهن بغرفتهن كالعاده بعد أحسن مو بيت ميتم والله بس شسوي لأهلك ينافع من بلونه بخالك وبناته الواحد بيته ما
يگدر يأخذ راحته شوگت أخلص منجن ما أدري .
وشوي ودگت الباب شايله صدريتي وقميصي وبيدها المگص شتسوين .
ـ أسويلج فتحات بالصدريه وبالقميص
ـ نورس عوفي ملابسي لا أطيح حظج شگگتهن وأني أعيط عليها أحاول أسبحهن منها وأجتي لبنى شافتهن بيدي مشگگات وغضب الدنيا كله تگوم عليه
لبنى ـ نورس ليش هيج سويتي بملابسها أنتِ تتحارشين وتردين مشاكل گوه
نورس ـ تستاهل ومره ثانيه تعرفين أوادمج ويامن تحجين تعيريني بالبيت سهله اليوم لو أني لو أنتِ .
لينا ـ اليوم أشرب من دمج والله شلت المگص وهي ركضت وجلبت بشعرها وگعتها بالكاع موتتها من گتل بس هي أيدها ثكيله تضرب قوي نمت عليها وجريت خلصه من شعرها وكصيتها وشمرتها هاج مثل ما سويتي بيه سويت بيج أزود يا جلبه شافتها تخبلت ولبنى حارت بناتها ركضت جابتهن دخلتهن الغرفه ونورس گامت تعيط وتنفض بشعرها .
لينا ـ والله من أنعل أبوج لابو الجابج لابو الساعه السوده الفيتي علينا للبيت بيت أبونا وما خلصانين شطلعت.
ـ تغلطين عليه وعلى أبويه تاج رأسج يا بربوك ولج أدبسزز أم الولد أم درابين نسيتي روحج شسويتي نسيتي سوالفج ويه أبو مسار وصورج صارت فرچة وشلون نفضحتي لو أذكرج نسيتي وين أخذوج وخلصوج من الموت لما نافع يتستر على فضايحج وخيستج جان أنتِ هسه حتى گبر ما الج بين الگبور والج عين تحجين يالشريفه لو مني ومنج أطم روحي بحفره
لبنى ـ نــورس سكتي وجفينا شرج لا أشوفج شيء ما يعجبج وأذا جبتي طاري أختي وشرفها قسم بالله أكلج بسنوني كافي عاد تحملتج هوايه
ـ ومنو حجى الست لبنى! دخلينا ساكتين داده خلينا مخيطين حلوگنا ياعيني مو أنتن بدعتن بسوالفجن يالمستشرفه أم الحمامات الله يرحم الأيام الجنت متزوجه نافع كلما تشوفينه يدخل الحمام تتعمدين توگفيله يم الباب نسيتي لو أذكرجن دتخلينا ساكتين لما باقر ميت قبل لايكشف خيستج جان أنتِ هسه مطلگه وگابلتي أختج العار عملت العمايل هي وأبو مسار نسيتن تاريخجن. .
1 تعليق
لينا ـ تحجي ولبنى باوعتلي والبيت فارغ ماكو بس أحنه ووياها أشرتلها وهجمنا عليها ولبنى تعض بيها وأني أجر بشعرها وهي تعيط طلعت قهري گله بيها لبنى ما بردت گلبي تخاف الجبانه بس أني الا عمتي حربيه وأخواتها طبن علينا وجرني منها يله عفتها لو مخلياتني جنت لحگتها بصفا العار .
نورس ـ لحگيلي عمه لحگيلي موتوني الأدبسززيات .
حربيه ـ ولج من الله يأخذجن شمسويات بيها أنتن مجرمات أدبسززيات ليش تگتلنها من تكسرت أيدجن أن شاء الله .
لينا ـ والله الج غيرها مني والله وأنتِ وكل وحده تحجي بشرفي وبشرف أختي وشوفن وسمعن زين اليحجي على شرفنا أكب عليه بانزين وأحركه كافي ساكته ومتحمله وجارعه المر .
واليوم تأخذين أخواتج وتنگلعين من بيت أبويه اليوم ولا جلبه تبقى بيت أبويه كافي تحملنا حجي وأنطعن بشرفنا بس مال ترجعن تطعن بشرف لبنى وهي جرحها أخضر ومكسوره على رجلها أسوي ما أسوي قسم بذات الله التجيب طاري لبنى بحرف أحفر گبرها بإيدي .
أباوع على لبنى تبجي ما حجت شيء ودخلت الغرفتها وعمتي حربيه تحجي وتدعي علينا .
حربيه ـ الله يأخذج أنتِ وأختج ويخلصني منجن غضب على يومجن مو بنات صراكيع هجامه بيوت أم للسان أني الج لعمج بكيفج تطردين مو بيت الخلفوج أم فتوك
1 تعليق
لينا ـ أي بيت الخلفوني چا بيتج وياريت ما تتدخلين وخليني ساكته ومحترمتج بس لان أم نافع
حربيه ـ أني الج أذا ما خليت محمود يطيح حظج يا أدبسزز أصبريلي الا أخلي يكص لسانج هذا .
لينا ـ دخلت خالتي سميعه جايه متسوكه شمرت العلاگيك وركضت عليه وتسأل شگو وبهل الأثناء دخل نافع ونورس گبل رفعت شرعت أيديها
نورس ـ أجه الفارس المغوار أجه البطل مالتجن أهلاً وسهلاً بسيادة الضابط نافع شبسرعه دزن عليك لو أتصالات گبل صار عندك علم وأجيت ركض.
نافع ـ أنجبي وسدي حلگج وشعندج مشاكلج ما تخلص شگو مخليه عقلج وياها صغيره أنتِ ما تملين ما بزعتي وأنتِ يمه شو هنا شجابج هم حاضره ليكون أنتِ هم مشاركه بالمشكله!
حربيه ـ والله أجيت جبت بنات خالك جانن يمي وشفت بنات خالك لأدبسززيات نايمات على هالمسكينه ويگتلن بيها شوفها شمسويات بيها بس أني الها لعمها محمود أذا ما طيحت حظها
نافع ـ وأنتِ شعليج شدخلج يمــا منو رايد منج تجين ليش ما تحفظين بيتج يمه تردين تطلگين مره ثانيه مو تفلت المر يله قنعته يرجعج على ذمته ليش ما توبين وتعوفين هالسوالف وتكفين شرج عن عاليتامى وتلزمين بيتج .
حربيه ـ شحجي أذا أبني هيج يحاجيني ويعيرني .
نافع ـ يمــا للبيت كدامي وأذا أبويه سمع بيج حاجيه حجايه ما يصيرلج خير ستري على نفسج وستري علينا
لينا ـ نفضت عبايتها ومشت عصبيه ونورس لمت شعرها ورجع عاط بيها .
نافع ـ وأنتِ الثانيه أذا ما تبطلين مشاكل أطيح حظج وأنعل والديج وأربيج من جديد كافي مخليه عقلج وياها
شنو أنتن متگولليلي ما تملن من المشاكل من غضب الله على يومجن وقسم بالله أذا سمعت حجايه وحده ما تلومين الا نفسج نورس خلي شيطاني نايم .
نورس ـ أني مو صاحبة مشاكل روح اسأل بنات خالك مو بس تهوبز عليه ولا أنتِ ولي أمري تحاسبني وتربيني عندي أب هو مسؤول عني لاتشوف نفسك زايد مالك حكم عليه حكمك على نفسك وعلى حبابيك مو عليه
لينا ـ خلت ودخلت الغرفه وأخواتها لحگنها وباوع بالكاع شاف خصلة شعرها وباوعلي
نافع ـ منو كصها
لينا ـ أني كصيتها من شعر نورس
ـ ليش؟ مستجلبه أنتِ جلدج يحگج على المشاكل حياتج فرغت من الأكشن تردين تجددين
ـ لا والله بس نورس مو أدمي حجت عليه وعلى شرفي وصلت بيها تطعن بشرف لبنى!
ـ لبنى! وهي شعليها وشحجت عليها
ـ طعنت بيها بسوالف ما تنحجي ووياك! وأنت جنت سابقاً زوجها وأعرف بيها وبشگوگها وبعقلها الوسخ
ـ أحجي شحجت عليها
ـ كعدت تحجي وتعيرها وگالتلها لما باقر ميت جان كشف سوالفج وطلكج بصف أختج العار ... نورس ينافع تمادت هواي وأني أذا يضل الوضع هيج أكب بانزين وأحرك البيت هو والبي گلشي تحملت أنطعن بشرفي ونحجىٰ عليه بسوالف مالها صحى من الوجود وأنت زين تعرف أني شكثر نظلمت ولحد هسه بالعه موس وساكته أحتراماً الك ولخاطرك لان الماتت تكون أختك لازمه الك الخاطر بس مال تحجي وتطعن بشرف لبنى ما أضمنلك شُنو ممكن أسوي ... أخواتي خط أحمر أشرب من دمه اليجيب طاريهن وشرفهن .
ـ مو معناها يتامىٰ أهل وما عدنا أحد وسند يدافعلنا ويدافع عن شرفنا عند الصدك أصير رجال وأخذ حقي وحق أخواتي والله أسوي شيء أخليكم تبجون دم ستروا على نفسكم مني ..
خلي الشر نايم ينافع كف أمك ونورس عني وعن أخواتي سويلي حل واليوم أريد الحل
لان عمتك سميعه مكسوره جناح ومذلوله وما بيدها شيء وخالك مجرم ويهودي مالها حجايه وياه زوجتوها اله وكسرتوا عينها تحجي يضربها على حلگها ويدوس عليها بالقندره وكل هذا وأحنه ساكتين لان عمنا بس كافي لهنا وكافي ..
ـ لاتحجين حجايات أكبر من عمرج لينا
ـ لاتستصغر عقلي ينافع والشرف عزيز ما بالك هي أرملة أخوك حاطة بناتها وكاعده وبعدها جرحها أخضر والمات رجلها سندها عزوتها بالحياة ما كافي عليها يتيمه أهل ليش تهضمونها وتطعنون بشرفها ترى مصيبتها جبيره بس البشريه العايشين وياهم گواويد وناقصين وحشاك منهم طبعاً وأني ما أشملك وياهم لان بس أنت البقيت شريف وأبن شريف .
عافني وراح دگ عليها الباب وفتحته وصاح بإخواتها
لينا ـ ضربها راجدي وجرها من شعرها بحيث رگبتها التوت وخالتي ركضت عليه تمنعه دعوفي يحظي وأخواتها خايفات بس هو خله أيده ومنع أحد يتدخل وصاح بيها
نافع ـ لومو على ذمتي أطيح حظج أكسر رجليج أخليج تزحفين نورس أني نافع خافي مني وديري بالج تندگين بشيء يخصني ومن يوم يومج تعرفين بنات خالي أني المسؤول الوحيد عنهن واليندك بحاجتي أنعل والديه
.. شايفه هذا وجهج أشوهلج معالمه أذا تحجين حجايه تمس شرف وحده منهن نور لبنى لينا لسانج أكصه بسنوني والله أكصه وأذا لبنى جبتي طاريها وطعنتي بشرفها لو توصلني حجايه وحده عليها وگتها ما أضمن الج شسوي بيج أعمل بيج عمل شعبي والله لو مو أبوج يوكف بوحهي لو عشيرتج كلها فه أحترمي نفسج وعوفيهن بحالهن وبمصيبتهن وكافي مشاكل ستري على نفسج من شري .. ترى گلبي جزع أفرغ قهري كله بيج ومحمد ..
لينا ـ دفعها بثگل أيده وگعت على ظهرها وعاطت وأخواتها ركضن عليها وقفلن الباب وهو باوع على خالتي سميعه وهز رأسه ومشىٰ
سميعه ـ هم حجت على نور علمود أكظبها الباب
1 تعليق
لينا ـ لا ما جابت طاريها
سميعه ـ من أنعل أبوها لابو الجابها عليه مهديه الثانيه عوذه حتى عوذه ..
لينا ـ راحت ولبنى بغرفتها لگيتها تبجي على شنو تبجيين عشتوا أخذتلج حقج وأنتِ ما غلطانه
لبنى ـ ما سمعتيها شحجت وأجيتي أنتِ حجتيهن لنافع
لينا ـ تردين أسگتلها لا والله أكوله خل يعرف حقارتها الجلبه گومي نتغده وختولي طنشي هي تنبح تنبح وتسگت ..
ما حجت وتغدينا وخالتي توصي بيه ما أتحارش بيها ومرت الأيام عايفتها وأني هم ملتهيه بكتابي وهي أنطيها بس تلوف على بيت جدي ياسين وصايرات حبايب هي وعمتي حربيه وضجت لان عمي مشعان رجعها حرامات لو مبقيها مطلگه بس يمكن علمود ولدها والفهمته من خالتي سميعه هاجرها بس هيج كدام ولده وعيب الناس رجعها ذمته ..
تغدينا وناويه أحجي ويه خالتي بلكي تخلصني من هالموضوع العمي مجلبلي بي كملنا ولبنى غسلت المواعين وأني لحگت خالتي لغرفتها جان ميثم موجود هو كله ينام يمها حاجز الغرفه من يوم تزوجت عمي تنومه يمها ادري تحمي نفسها من عمي الساقط أبو العرگ .
خاله أريد أحجي وياج بموضوع
لينا ـ لا خاله باوعت على ميثم شمر عليه المخده وطلع خاله علمود موضوعي وسالفة الزواج من نافع فدوه شيلها من رأس عمي محمود لان أحسج أنتِ ولبنى وحتى نور مقتنعات بس والله أني ما أريد أتزوج لا نافع ولا غيره أريد أدرس وبالي كله يم دراستي الله يخليج خلصيني من هالسالفه كلها
ـ ليش يمه شبي نافع وأني عيني ومناي يوم يصير نسيبي لان بس هو سبع وأخو خيته ويدافعلنا وواكفلنا بكل سالفه ما شفتي شسوى بأمه ونورس شلون أخذلجن حقجن وسگتهن ..
وتتزوجينه وتخلصين من للسان نورس ومن عمج وخبالاته شاد وياج من سالفة المركز ومكرهج بعيشتج ونافع خوش ولد ويدرسج لان عمج بس تكملين الدراسه يكعدج وأني ما أكدرله شوفة عينج حاكمني وحاكم البيت كله وردت اطلك منه محد يقبل كلها واكفه وياه على صيت نسوان لوحدهن وهو والي من عمت عيني على هيج والي بس شسوي لحظي المصخم صارت بعد وبلوه وأبتليت بيها هاي هيه جيرة ولزكتها بكصتي ..
ـ بستها من أيديها وحضنتها أنتِ مثل أمي صح ما حنيتي علينا من جان أبوي عايش بس الشاهد الله من مات لليوم ما شفنا منج الا كل طيب شفت منج محنه وطيب مثل أمي وازود .. أبوس أيدج يمه خلصيني من سالفة الزواج من نافع أخاف أهله يقنعونه ويوافق وأني ما أريده أفهميني خاله .
ـ والله مـا أدري شگولج يا يمه أخابر نافع وأحاجي وأكوله لان عمج ما يتحاجى وقافل عليج يريد يزوجج بس يصير خير .. گومي نامي وأرتاحي الله گريم .
ـ مسحت دموعي وطلعت من يمها وشافتني لبنى
ـ شگو شبيج تبجين ليكون تعاركتي ويه نورس مو گتلج عوفيها مثل الجلبه تنبح وتسگت ختولي .
ـ لا ما تعاركت ختولي هاي شنو
ـ شبيج خوفتيني وجهج يلطم
ـ علمود سالفة الزواج من نافع حجيت ويه خالتي
ـ بعد تحجي ويه نافع وتفهم منه تالي السالفه
ـ بس أني أكول لــو توافقين وتتزوجينه أحسن الج والله
ـ ما تسكتين وتولين عني وتزوجي أنتِ .. ضربتني على رأسي أخ خرب أيدج شگد ثكيله شنو تلعبين حديد
ـ أكسر حلكج أدبسزز
ـ بدون قصد طلعت والله لاتزعلين أمانه أسفه
ـ عابت شكلج وعساج لاتزوجتي لا نافع ولا غيره
ـ بعد أحسن أني هم ما أريد أتزوج أريد أضل كاعده أدرس ومكابله نورس هيج أقهرها بالحياة أسممها بعيشتها أذا ما طلعتها من هالبيت بالدفرات والنعل مكطعه على رأسها وعلى رأس أبوها أني مو بنت صباح
ـ أحترمي عيب مهما يكون عمنا لاتتجاوزين وملاحظه عليج كم مره تغلطين عليه ما يصير أمي .
ـ أي فهمنا شو هو من يغلط وبفشر وساگمنا بعيشتنا محد يحاجي ويگوله
ـ هو رجال وأنتِ بنيه والأحترامات واجبه حتى لوخوش أدمي يضل عم وولسانج أكصه أذا أسمع بيج تغلطين عليه .
ـ ماشي تدللي أنتِ وعمج
ـ لينا
ـ خلص سگتت والله شبيچ .. لعصر أسمع خالتي تحجي ويه نافع وأريد اسألها بس گلت لابعدين ما أستعجل وهمزين عمي جان ما موجود بلكي الله تحلها قبل لايرجع علمود گبل هو بالدوام يخابرونه وهناك يفرغ خبالاته أهم شيء مو يمنا.
الثاني اليوم صادف عطله وبقيت نايمه ودخلت علينا خالتي ها خاله
سميعه ـ لبنى يمه حضري روحج أنتِ وبناتج أخذج وياي للقريه أمي دزت عليج أهلهن يردون يشوفهن وأني هم أريد أشوف أهلي وأبويه صحته تعبانه تحضري لما أشوف عمج .
لبنى ـ ماشي عيني خاله ومنو يودينا عمي محمود
سميعه ـ لا يمه .. نافع يجي يأخذنا هو يودينا بس أكوله أنطي خبر وأنتِ هم گومي تروحين ويانا ما أعوفج أدري بيج ما تكعدين راحه تتعاركين وراي مالي خلك طلايبج .
لينا ـ ها أي ماشي بس خاله نبات لو نرجع
سميعه ـ والله ما أدري أني أريد أبات بس من ورا نور وبنيتها صارلها فتره تعوفها يمي خل اتأكد منها أذا باجر ما عدها دوام نبات وأذا عدها نرجع شوف شلون ترهم بس جاي أتصل عليها ما أحصلها يمكن نايمه .
لينا ـ ماشي .. راحت بداخلي فرحت ما أعرف شعور حلو سكني وگمت تحضرت وأخذت وياي كلابيه حلوه مستره ولبنى لبست كله أسود وتحضرت هي وبناتها وأجتي خالتي ها خاله
لينا ـ أي خاله باوعت بالمرايا أخر مره ولبنى تصيح عليه علمود أشيل رفيف شلتها وهي شالت وحده وخالتي اخذتها مني تخاف أوكعها وطلعنا ونورس جانت تسوي الريوك الها ولابوها كاعد ويخابر وسد الخط وگال لخالتي
محمود ـ وهاي شگو مأخذتها وياج مو گلتي بس لبنى والبنات وتروحين تشوفين أبوج ليش تشغلين من ورا ظهري
سميعه ـ أخذها وياي أحسن ما تصير مشاكل وراي هي وبناتك ما يتعاشرن
ـ لا والله بناتي يتعاشرن بس بنتج بربوك يله بس أذا هي وياج ماكو مبيت للعصر وخل نافع يرجعجن
ـ أن شاء الله يله يمه أمشن .
لينا ـ من خفت كرشك .. طلعت وراهن ونافع جان ينتظرنا تلگاها أخذ مني الجنط خلاهن بالصندوك وصعدنا وتوكلنا للقريه .. طول الطريق نافع يحجي هو وخالتي وأني أصور ولبنى دمعتها على خدها وصافنه على شوراع وعلى رانيه بحضنها ورفيف بحضن خالتي وهاي أول مره تطلع من البيت وتروح القصر من بعد وفاة باقر الله يرحمه ..
ووصلنا القصر ودگ هورن وعمي جاسم فتحلنا الباب وطبگت السياره باب المضيف وطلعوا الشيخ حبيب وشيخ حربي نزلت وصرت ورا خالتي ولبنى تلمم بنفسها وتقرب نافع أخذ منها رانيه خلاها بحضن الشيخ حبيب باسها وگام يبجي وبچانا وياه .
الشيخ حبيب ـ يا هلا بيكم يا هلا بناتي .
سميعه ـ شلونك يابه شلون عايفتك
الشيخ حبيب ـ هلا بيج يابه الحمدلله على الله .
لينا ـ تقرب سلم على عمته سلام حار وبمحنه
الشيخ حبيب ـ يا هــلا بعمتي الغاليه .
لينا ـ باسها عيونه تباوعلي بلهفه هيج أحس يضحك بنظراته وعلى وجهه أبتسامه أني مو أبالي والله وكل الفترات المرت التهيت بدراستي وأمتحاناتي شبه تعودت وكل نظرات عابره ما خليت بالي بعد صح أذكره بس مو ما منطيته حيز قوي من أفكاري بس هسه هو نظراته لهفته مشيته التفاته .. عدلت شالي وبيدي جنطة البنات وأمشي ورى لبنى ودخلنا ..
جنت ورا لبنى ودخلن يسلمن وأني بعدني بالأخير وهو واكف ومن هل الهوسه توترت بهل القرب حسيت نظرة خفيفة نزلت على شالي على أطراف اصابعي اللي لازمه الجنطة بأيد ترجف .. تقربت باوست جديتي وكعدنا كلنا وكلهن كعدنا وأنحشگت بصف لبنى تلملم بروحها ..
كعده عائليه وعمتي وهبيه تبوس بيهن ودمعتها على خدها رانيه بحضنها ورفيف بحضن جديتي ونافع يكرص بخشمها جلب بيها وهي تصرخ .
نافع ـ خشمها جبير مو حبوبه علمود يصغر بعدين تكوم تدور من عدنا عمليات تجميل هاي مأخذه الخشم وراثه منك جدي .
الحجية عطايات ـ ولك عوفها هو هسه يكرصونه من بعدها أول يوم مو هسه شجلبت بالبنيه شيسگتها هسه .. هاج بنيتج يمه هذا عمها خبل الجلاب .
نافع ـ شو هيج حبوبه مو أزعل وأمشي والله
الحجيه عطايات ـ دكعد وين تزعل وتمشي وأحنه وين شايفينك أبو دروب سمعت قانع أبوك مرجع أمك أثاري هم عندك خوش سوالف تعجب
نافع ـ شعبالج چا أني مو تربيتج أوفا عليج حبوبه تراضاها شيخ .
الشيخ حربي ـ كفو منك زين ما سويت .
لينا ـ حجاها وعينه أنتقلت على رانيه بحضن عمتي وهبيه جانت لهايه نازله من حلكها خلاها بلحگاها وقبل لا يباوع بعدت نظري ولازمه سير الجنطة ومتوتره ..
وهبيه ـ عمت عيني عليجن يمه أنحرمتن من أبوجن وأنحرمت من شوفتحن والله بعيدات عليه هالبنيات وما جاي أشبع منهن يعمه .
لينا ـ حجت وباوعت على الحجيه وعلى لبنى وحربي! والحجيه حجت بحزم والكل سگت.
الحجيه عطايات ـ لا بعيدات ولا شيء والدرب ما تبعد عليه سياره كلما تشتاگيين روحليهن منو كاع عليج الدرب .
وهبيه ـ بس يعمه أني أريدهن يمي هذن بنيتات باقر ومن ريحته يعمه .
الحجيه عطايات ـ حجايه ما تحجين فوك حجايتي يوهبيه وهذا الموضوع ينسد وما ينحجي بي والبنيات عند أمهن وكاعدات عند بنتي ومأمنه عليهن لأن أعرفن سميعه صايرتلهن أم ونعم
الحجيه عطايات ـ حجايه ما تحجين فوك حجايتي يوهبيه وهذا الموضوع ينسد وما ينحجي بي والبنيات عند أمهن وكاعدات عند بنتي ومأمنه عليهن لأن أعرفن سميعه صايرتلهن أم ونعم الأم
لينا ـ لبنى منزله رأسها ونافع گح! شقصدها عمتي
وهبيه! الكل سگت وصار صمت ما أعرف أحس ضامين شيء لان عيونهم تحجي حتى خالتي سميعه!
.. عاد جدي حبيب ترخص وگام ونافع ساعده وطلع وياه والشيخ ضل كاعد يحجي ويه خالتي سميعه ويسألها على حالها وعلى نور وميثم وهي تسولفله وعمتي وهبيه صافنه على لبنى! صفنتها تحير ..
وأجه نافع وضربني بالشقه على كتفي والشيخ گبل باوع بنظره سريعه وخزر نافع خله نافع يفر بعيونه ويمسح بشواربه ورفعلي حواجبه وحجه بهمس خفيف
نافع ـ نعلست .
لينا ـ توه راد يگوم ونافع گال
الشيخ حربي ـ يله يابه أنه أترخص
نافع ـ شيخنا من رخصتك أخوك ضايچه بي الوسيعه وعندي سالفه دايخ ومتورط بيها ومحتار بأمرها
وحلها عندك ياريت ترجع تتفضل تكعد وأسولفها الك من ساسها لرأسها لان تحتاج حل سريع وأني تعرفني اذا أحلها أكوملي جم زلمه .
الشيخ حربي ـ سولف طلابتك والعين والكاع والوسيعة تگاعِد لشرواك واعتبر السالفة مكلوبة ومنتهية ما دامك يم اخوك سالفتك مكظيه بحيل الله .
نافع ـ ما تقصر يخوي والله يخليك ذخر لگلبي والسالفه وما بيها أنه تكفلت بهل اليتيمه وحليت سالفتها هي وخالي محمود صارت مشكله وعرگه ونگول فضت واني تكفلت بيها وكل ظني أحلها وطلبت أيدها من خالي وهو وافق بساعتها بس أنه هسه متورط لان لا أنه رايدها ولا هي رايدتني والكل مطربك علينا وهذا الشيء من سابع المستحيلات يصير لان شايفها
وحده من أخواتي وبعد السالفه صارت عندك .
الشيخ حربي ـ وهذا خالك من الأوادم تسمعون حجايته وتمشون بإمره ومسوينا والي عليها وعلى بناتها
واحد ما يعرف قبتله وين وأيده والبطل ترجعون تعيدون النسب وياه شلون وصارت وتزوجونه عمتي سميعه
ها حبوبه أشوفج دنگتي رأسج وسگتي من يمتى محمود كعد بمضيف وگابل الأوادم وينعد منهم تنطونه مره .. أنتوا ليش ما تتوبون من سوالفكم ها حاجوني مو لحدهسه خياط فتوكم مسرب.. أنه سالفه زواجها من صباح ما هاضمها أدور محمود لو نسيتوا الحجي والهوبزه من قويدر بهذاك اليوم من جابوها ويحجون ويطعنون بشرفها كدامكم وكدام كل عمامي
يابه ميخالف ونگول حليتوها وخيطتوا الفتك بزواج شون ماجان مهم ستر فضيحه لان السمعة أولى أشو رجعتوا عدتوا نفس الجرح ومكابليني تردون مني خياط ... حبوبه خياط جرح عمتي عروبه طاب لو بعده
الحجيه عطايات ـ لا يحبوبه جنها البارحة ماتت .
الشيخ حربي ـ چا جرحج ما طاب شلون صارت وتزوجينه عمتي سميعه ما كافي هضمتيها وكطعتي رجلها وسنين هي ما واصله هذا القصر ليش كسرتي ركبتها ويه هالعار مو هو الجان يگوم ويگعد يگتل بنتج مو الجان يعشيها گتله ويغديها گتله مو جنتي واكفه ضد جدي وعاديتي علمود عمتي عروبه ..
أنتوا شلون تلحون مشاكلكم بس أريد أفتهم حلولكم كلها مبنيه عالزواج هذا حل برأيكم وتجي أنت نافع أفندي الزين ما بيهم بعد عين أخوك تكمل مسيره أجدادك وتهوبز كدام خالك وتطلب أيد البنيه وبعدين تسحب نفسك لان مو گد هالحمل ودام مو گده شگو طلبت أيدها أخليها كاعده بيت أبوها وابن أمه وأبو اليحاجيها
نافع ـ هذا حجي شيخ أنت ما تدري بعمامها مخابيل
حربي ـ مخابيل على نفسهم مو عليه وهما ياهو البيهم صاحي طلعلي واحد من خوالك يكعد بديوان ويعرف يحجيله حجايه بيها حظ كلمتين ويگوم يمسلت
وتريد تزعل تريد ترضى بس خوالك خرية الأوادم وأنطيهم صوت عالي والهوبزه ودرب الحرام ونشر فضايح وما عدهم ستيره على حرايرهم هذا الأعرفه عنهم من يوم يومهم ناس گاوليه ويطربگون عالفضايح أدور يرجعون النسب العريق وينطون خيرة النسوان الواحد ما أسرحه بعشرة صخول .
الحجيه عطايات ـ صدگت والله يحبوبه صدگت وأحنه ساكتين لخاطر نافع وحرامات هالزلمه زين هما خواله
الشيخ حربي ـ وهو شلزومه من خواله تابع النا مو لخواله هسه ما علينا السالفه هالبنيه صارت عندي أني أتكفلها وأحلها ومحمود هم عندي وأنت طلع نفسك ومره ثانيه لاتدخل هيج دخلات مو گد حملها لو عرج خوالك ضارب عليك
نافع ـ لا شيخ بس ردت حل أخلصها منهم وعلى گولتك ناس كاوليه وهي يتيمه وبعدها جاهل مو مال زواج .
لينا ـ باوعلي بنظره عصبيه وعيونه تتجادح بلعت ريگ ناشف بلعومي يطگ أباوع على أيده طلع باكيت من جيب دشداشته وطلع جگارته ودخنها وسگت وبعد ما حجه لما كمل جگارته
وللاحظته نافع حيل يحترمه خرب نافع اليخوف الكل مصگور ولام نفسه وكاعد كعده عدله حتى جگاره يحوص عليها ما دخنها كدامه .
طفة جگارته بالنفاضه وكام بطوله بحيث ما أنحنى أبد وأشر لنافع
الشيخ حربي ـ گوم وياي أريدك بحجايه
نافع ـ أي شيخ .. بس أدخن جكاره مو گلبي فرگس .
لينا ـ حجه بهمس وشمر عليه الباكيت والجگاره ولحگه
وضلينا كاعدين والحجيه دگتها صفنه وباوعت عليه
1 تعليق
الحجيه عطايات ـ عبالي أخذج لنويفع بس ما صارت يله بعد أحسن نافع رزقه مضموم! ما جاي وگته ..
لينا ـ ما فهمت عليها بس عيونها على لبنى ما شالتهن منهن ولبنى تسولف ويه عمتي وهبيه ما تدري الحجيه صافنه عليها ومن بين نظراتي شفت جداحته بقت بمكانه بصف خالتي سميعه وضلينا كاعدين لما گامن ولبنى راحت الغرفتها تنوم بناتها والحجيه تسبح وگمت كعدت بمكانه وأخذتها قبل لاترفع رأسها ومشيت وسمعت صوته من دخل .
الشيخ حربي ـ جداحتي أحد شايفها .
لينا ـ غمضت عيوني وعصرتها بأيدي خرب شهل الموقف الخايس شبسرعه أجيت صارلك شگد ما تبعت وراها هسه يله بقيت متخشبه ومنطيته ظهري الا نافع گال
نافع ـ وين راحت يجوز نسيتها بالمضيف أنطيك جداحتي لحظه لينا بقيت يمج!
لينا ـ حجه وسگتت وأنداريت وبسرعه ضميتها بردن عبايتي فشله أكول عندي وهو يدور جوه كوشات التخم ونافع يفرك بوجهه باوعلي وغمزلي ها .
نافع ـ ها شيخ لگيتها
الشيخ حربي ـ لا تتلگي وين تروح أنه ما تضيعلي حاجه
1 تعليق
لينا ـ رفع رأسه وباوعلي ومشىٰ ونافع لحگه ويحجي بشفايفه گلشي ما أفهم منك شمدريني شتحجي أهوو
نافع ـ أني أعلمج بس أرجع .
لينا ـ طلعوا ورحت لبنى لگيتها فاتحه الكنتور وحاضنه ملابس باقر وتشم بيهن ما حبيت أزعجها عفتها على راحتها وضميت الجداحه بصدري من يجي نافع أكوله لكيتها وخل هو ينطيها اله
.. وطلعت بالحديقه وأستفقدت حمودي وينه هذا يمكن رايح لخواله الدايح.
بقيت واكفه ونافع طلع من المضيف وتوجه لسيارته نفس سياره أخوه بس لونها أسود طلع الرشاش مالت الصيد من سيارته ولبس حزام جلد وغير الحذاء مالته ولبس الشفقه وطلع من باب الحوش صحت وراه نافع وين رايح
نافع ـ لصيد
لينا ـ هم بعيد
ـ أي يعني ليش
ـ عادي أجي وياك
ـ لا يابه وين تجين ستري على نفسج وعليه وين أخذج كعدي عمي الصيد للزلم .
ـ الله عليك أخذني وياك
الشيخ حربي ـ ما عدنا نسوان تفتر بالبر كعدي وأستجني على عقلج بويه .
لينا ـ سگتت ونافع تبخر راح وما أخذني هذا منين طلعلي والله لما هو نافع يأخذني ما يگول بقيت واكفه تخشبت بمكاني ونفس الوقت ضجت من حجايته شنو أستجني على عقلج أحد گايله عقلي طگه ونص والله يالله .
مشيت مزعوجه وگال
الشيخ حربي ـ نسواننه ما يصيدن ينصادن أقصد أحنه نصيد الهن .
لينا ـ باوعتله وضليت فاتحه حلگي ما فهمت معنى كلامه ورجع غيره وتقرب وهو يباوع على باب القصر وگال
الشيخ حربي ـ عيونج ليش تواعد وهنا هيج نعسانات لو أنتِ منعسه .
لينا ـ ضليت أباوع بعيونه يأخذن العقل شگد حلوات
ورجع حجه بإبتسامة خفيفه
الشيخ حربي ـ مثل حمودي من يصفط سطل اللبن ويطفي .
لينا ـ ما كدرت أقاوم نظراته ونبرة صوته التخبل خشنه رجوليه حيل هيج تسرسح على گلب.
گبل مشيت سريع وأنهزمت منه أريد مكان يلمني على كلامه اليه ليش حجه ليش مركز بعيوني يعني شُــنو .. دخلت غرفة لبنى بس بناتها نايمات سديت الباب وحضنت گلبي يدگ بكل سرعته وأنفاسي عاليه وعلى وجهي ضحكه تارسه صدري .. نظراته أنطبعت أبالي شگد حلو يباوع شگلي حبيتك يشيخ ..
بقيت بالغرفه منهزمه منه وطلعت جداحته من صدري وشميتها بيها ريحه العود وعطر نفسه اليخلي منه ضليت أتلمس بيها وشغلتها ثگبت النار وفزيت منها ومكتوب عليها بخط حلو الشيخ حربي مشعان الحبيب
ال ... أسم عشيرته .
فزيت على الباب ينفتح گبل ضميتها ودخلت لبنى تباوع بشگ خرب نظراتها تخلي الواحد يشك بنفسه
لبنى ـ شعندج
لينا ـ شعندي قابل كاعده يم البنات
ـ ها وليش ما أجيتي للمطبخ كلهن كاعدات وين جنتي
ـ شبيــچ لبنى هو تحقيق لـو شُــنو
ـ لا مو تحقيق بس لاتضلين تفترين بالقصر ونسيتي محجي بأمرج
ـ على شنو مو الشيخ تكفل وراح يحاجي عمي ويسدها
ـ أي .. ديله أمشي وياي نساعد خالتي لميعه بالخبز
ـ أي أجيت .. طلعت وياها ورحنا على خالتي لميعه شاعله تنور الطين وكاعده هي وخالتي سميعه يشنكن العجين ولبنى گابلتهن وأني بالمحراث أحرك الجمر بالتنور .. خاله أخلي حطب بعد
لميعه ـ لا عوفي أني أريده تهفت ناره علمود أخبز .
لينا ـ عفتهن وگفت أباوع على الوز والبط والدجاج وأشكال الطيور گلشي مربيهن وعيني راحت عالزرع وصفنت على المكان الجنت أسرح بي الله شعندي ذكريات حلوه ..
الجو شته وحلو وشمس الربيع تخبل .. تمشيت على ساگية النهر وكفت غسلت ولمحت نافع من بعيد يصيد وأجه يتمشى صوبي ولبنى صاحتني
لبنى ـ وين رحتي هالبعد شو تعالي هنا .
لينا ـ أجيت شگو نكرصتي.. رجعت يمها وأجه نافع خلاهن بالكاع شنو هذا .
نافع ـ صيد بس مو لحلگج أدري بيج زفره مو مال هيج أكل .
لينا ـ خلف الله عليك بس ليش هلكد صايد موخطيه يعني وحده ما تشبع گرشك
ـ أكل الرجال على گد أفعالها .. شو دوخري لاتضلين تتنعوصين على رأسي .
ـ خله الشفقه مالته برأسي وجر گرصه خبز ونصها لغفها بلحگه نافع ترى أوفر
ـ نجبي أنتِ والأوفر مالتج . نافع ترى أوفر
ـ يعيب عليه وشگله يخرب ضحك
لميعه ـ زين خوش صيده هم رحت بعيد
نافع ـ أي والله وكظبت الدرب مشي ما أخذت سياره عاد خضير شافني وجابني بدربه
سميعه ـ تدلل هسه نكمل تريده شوي طبخ بالجدر
ـ لا شوي بالتنور من تكملن .
لينا ـ خلص الكرصه يلعس خبز هسه مو تشبع والصيد منو يأكله
نافع ـ أني .. ركضي جيبلي أنجانه وسجينه .
لينا ـ يمه والله ما عليه ما أشترك بخطيتهن ويدخلن كرشك تريد أنت روح
نافع ـ أمداج وأمده اليأخذج همزين ما تورطت بيج لبنى ما تجييلي أنجانه وسجينه
لينا ـ لبنى جابتله وكعد ينتف الريش ونظفهن وخلاهن بالشيش ومن كملهن خلاهن بالتنور وأباوع عليهن وگبت الريحه تجنن يعني طيب صدك
نافع ـ لا أبد موطيب مو أكلج مو لحلگج ليش گمتي تمطگين مثل البزونه من تشتم ريحة زفره
1 تعليق
لينا ـ يعني بزون أشكرك والله زعلت منك ضحك وضربني على رأسي وعاض لسانه خبيث
... أجه الشيخ باوع علينا من بعيد ونافع بسرعه جر كاسكيته من رأسي ولبسها برأسه خرب شبيك عبالك شايفلك عزارئيل .
نافع ـ أمشي منا ما يرضى
لينا ـ تمام عود بقيلي .. مشيت ولحگتهن بدون ما أباوع أني هم كمت أخاف مو بس نافع مو زلمه هلتر بعينه .
وصار الغده وصبوا للزلم وحد وشفت نافع أجه شايلهن وراح صوب المضيف ولحكته نافع نافع
نافع ـ ها بزون شحيمي شتردين ومن الأخير ما الج يمي شيء يله كظبي دربج وروحي أكلي هبيط .
لينا ـ بس خل أشوف طعمه كصلي شوي وأنطاني شو طيب الله عليك بقيلي هاي مكسبه
نافع ـ خاب دتطيري هاي كسبتها لشيخ هاج حصتج وفضيني وأمشي ولي تأخرت أنت ملهيه الرعيان عوذه منج .
ـ ليش والله طيب صفنت عليها شفت دمعه بعينها يمكن تذكرت باقر .
ـ بعد عيني جان يحب الشوي .. أفتقدته بهاي الأجواء من يصدك صارله أشهر من أستشهد وبناته گبرن وخالتي تعلمهن على الأكل مو عبالك البارحه .
ـ أختنگت وگامت المغاسل وعمتي وهبيه لحگتها الله
يرحمك يباقر .. وتغدينا والعصر هنا كاعدات والحجيه مخليه البنات وتباوع عليهن وتلعبهن ولبنى ضلت كاعده ولزمتني يمها ما خلتني أكوم وعاد بتنا وخلص هااليل ومن الصبح كاعدين نتريك وخالتي ما عرفت شبيها بس لازمه الموبايل وتخابر گلبي نغزني وخفت صاير شيء .. عاد أجتي والعرفته نرجع خاله شگوو
سميعه ـ صبيحه متخربطه بالمستشفى من البارحه ومحد گال هسه يله مشعان خابرني ونور بس قافله هالمهجوم لا حجت لا گالت.. گومن تحضرن نروح وأنتِ شوفيلي نافع وين خل يجي يودينا .
لينا ـ لبنى راحت تتحضر وأني طلعت أدور على نافع ماكو وين الگاه ووصلت المضيف مديت رأسي والشيخ جان متمدد گبل فز بوجهي وكع گلبي عبالي رجال غريب .
الشيخ حربي ـ شعدج شجابج
لينا ـ أجيت أدور على نافع خالتي گاللتي علمود يودينا للبيت
الشيخ حربي ـ ليش ترحون صاير شيء عبالك مستعجله
ـ أي خالتي گالت أم غافر متخربطه بالمستشفى وتريد هسه تروح
ـ عمتي صبيحه! شو محد گال أمشي بويه هسه أوصلكم ونافع نايم هسه أكعده أمشي تهيري بساع
ـ ماشي .. راح كعد نافع جان نايم وأني رجعت لبست هالسريع وخالتي الوجه أصفر وتصفك بإيديها
ـ يا يمه يخيتي يا أم غافر سوده عليه شجاج يله يمه كملتن .
ـ أي خاله وأنخبصنا والقصر كله أنخبص والحجيه هم لبست هي وعمتي وهبيه تحضرن وخالتي سميعه مشت وياهن ونافع وأكف على صفحه يخابر والنوم بعيونه والشيخ صاح عليه
الشيخ ـ وصلهن للبيت وأني كدامك رايح المستشفى
نافع ـ ديله صعدن .
لينا ـ طلعنا للبيت ونافع جان مزعوج ما عرفت شبي ويتصل على غافر ما يجاوب
نافع ـ وينك أنت متگولليلي ونور موبايلها مغلق المن شايلين موبايلات لخاطر الله
غافر ـ ومن أنعل أبوك لابو نور وياك متجوز مني .
نافع ـ وشگو تنعل أبوها غافر الوو.. من خرب بعقلك أي والله.. متگولليلي وين موليه المن شايلته واحد ****من الثاني .
لينا ـ طول الطريق يتصل عليها متجاوب ورجعت أني هم أتصلت مغلق! راسلتها ماكو يربي والله خفت لما وصلنا وراح المستشفى ونورس تلگتنا ..
نورس ـ همزين خواتين شرفتن متيهات البيت من البارحه .
لينا ـ أنتِ مو موجوده شنو شغلج .
لبنى ـ أمشي ورجعي دخلي الجنط .
لينا ـ دخلنا وأنصدمنا بوجود نور كاعده والوجه أصفر وطافي ميته من الدنيا وصافنه على بنتها تلعب يمها نور أنتِ هنا وأحنه نتصل عليج مغلق وينج
لبنى ـ صدك خالتج متخربطه وشبيها خطيه والله ما تستاهل هسه جنا يم خوالج وعمي مشعان خابر خالتي وگاللها وكلهم راحولها المستشفى .
نور ـ أي
لينا ـ راحت المستشفى وياهم
نور ـ ماشي ديري بالج عليها لما أسويلها ممه
لينا ـ ماشي عيني گامت وگوه تمشي باوعت على لبنى مو عبالك بيها شيء شفتي وجهه حتى مشيتها
لبنى ـ أي شفت سگتي بنتها هسه تجي ونفهم منها
لينا ـ شلت بنتها وشفت موبايلها قافلته وأجتي أخذتها مني وكعدت ترضعها وغيرت عبايتي وطلعت جبت الجنط ومر الوگت ما حجت شيء وأجو كلهم من المستشفى گعدوا بالأستقبال ونورس سوتلهم الچاي ودخلت سلمت عليهم للوگيه .. وطلعت نور تغسل الممه وأجه نافع من برا باوع شافها واكفه يم السنك
نافع ـ نــور أنتَ هنا! وينج يمعوده أتصل عليج ماكو موبايلج ليش مغلق
نور ـ موجوده .. مخلص شحن
ـ ها وشوگت أجيتي
ـ من البارحه الصبح
ـ ها... نور شبيج ووجهج ليش أصفر وطافي
ـ ما بيه شيء رحت المستشفى خالتي شلونها
ـ بعدني ما رايح گلت هسه أروح بس أحس صاير شيء لان أجو وگالوا غافر حيل مزعوج وما يحجي! أحجيلي نور
ـ لا ما صاير شيء من رخصتك نافع أريد أنوم بنتي
لينا ـ راحت ونافع صفن عليها وأجتي خالتي سميعه تعبانه كعدت تنزع جواريبها
نافع ـ شعرفتي عن عمتي صبيحه شبيها وليش متخربطه
سميعه ـ مـا فهمت گلشي غافر معصب وما يحجي شيء وهي نايمه .. روح أنت صاحبه بلكي تفهم منه شبيها.
نافع ـ ماشي رايح وأنتِ هم أفهميلي من نور شبيها
سميعه ـ ليش نور هنا شوكت أجتي
نافع ـ من البارحه الصبح
سميعه ـ أكوم أشوفها وأفهم منها شبيها
لينا ـ مـا حجه شيء بس باوع على غرفة خالتي نور موجوده بيها وصوت بنين تبچي وطلع ورجعت عليهن لكيتهن قافلات الباب ولبنى راحت كعدت يمهم عيب كاعدين لوحدهم وگفت يم الباب أسمع حجيهن
سميعه ـ أحجي شبيج صامه حلگج
نور ـ شحجي ماكو شيء داگولج
ـ لا أكو شيء ومتأكده صاير شيء لان اليشوف غافر ووجه غافر مو مال ماكو شيء لا أكو بس ضلي ضامه أول تالي تحجين بس قبل لا أمشي حاجيني وگوليلي خوما شاف قرأ شيء
ـ شيشوف شبيج ماما
ـ شمدريني ثولتيني وياج ما تحجين وأعرف شبيج
ـ بعدين موهسه
لينا ـ ما عرفنا شبيها وعافتها ورجعت كعدت يمهم وما طولوا رادت منهم خالتي يضلون عالغده ما ضلوا ومن طلعوا جنت واكفه يم السنك طلع وباوع سويت نفسي أغسل مواعين والتفت ماكو مشوا الله وياهم ..
ومر أسبوع والعرفته غافر وأمه راجعين من المستشفى وخالتي سميعه راحتلها ورجعت تصفك بأيدها وعمي محمود وراها يحوص صارلها يومين من نزل ويفتر وأيده ورى ظهره ورايح جاي عنده دوريه بالبيت وياهو اليحاجي يعيط بي ..
نورس ـ بابا هم رحت على خالتي صبيحه .
محمود ـ لا وشعندي رايح
ـ مو مريضه خطيه جانت بالمستشفى
ـ أي وشسويلها محد يتمرض بس هي
ـ عادي أروحلها أشوفها
ـ لا ما تروحين ورجلج أكسرها أذا شفتج رايحتلها
لينا ـ سگتت وما حجت وأني ولبنى وحده تباوع عالثانيه وطلعت خالتي من يم نور وعمي باوعلها
محمود ـ ما فهمتي من بنتج شبيها
سميعه ـ لا شبيها قابل جايه زياره
محمود ـ ماشي وخري أني اسألها
لينا ـ دخل عليها الغرفه
محمود ـ عمي نور شبيج بابا گوليلي شنهي سالفتج صاير شيء بينج وبين رجلج! زعلانه گولي بابا وسالفة جايتنا زياره هاي ما طبت برأسي أجيبها منا أوديها منا ما تنعقل والأعرفه أنتِ تجينا ساعه ساعتين وترجعين السليمه رجلج ما يقبل تباتين فه أحجيلي عمي أحجيلي
نور ـ ماكو شيء عمي والله بس صارت مشكله بيني وبين خالتي وتعاركنا وتعرف كلمه مني وكلمه منها وكبت بينا
سميعه ـ وعلى شُــنو تعارگتن
ـ والله ماما سبب تافهه مو حجيتلج
ـ أحجيلي أني لان أمج ما تحجي لان أختها ما تنطي بيها
ـ علمود شغل البيت وعلى أنتِ ما تشتغلين وخابصتني بهل البيت وبيتي وبيتي عبالك بس هي نظيفه وكلنا وسخين أنظف وأركض كدامها ووراها بس علمود أرضيها وأنتِ مو نسوان أبني والا أزوجه وأجيبله وحده تلم بيته وتطبخله وأنتِ بس مال دراسه كل خير ما منچ وبس تذم وتحجي عليه لعبت وياها كل لعبه ردت بس أرضيها ما رضيتها تحملت بما فيه الكفايه طلعت روحي گلبي جزع مليت حتى صبر طفح مني ومن سوالفها وأبنها يحاجيها وما يفيد زهك مني ومنها ومن البيت وحجينا وصار اللي صار لما كعدنا الصبح لكيناها متخربطه وصار اللي صار .
ـ وأبو الحلك الفاهي طردج من البيت من وره أمه
ـ سگتت وكعدت تحجي وتشگي وتبچي من خالتها
ـ هذا هو عمي كعدي بيت أبوج وحقج عندي وأنعل أبو لابو الأنطاهم مره وقدرهم مو أني منطيج خدامه الها ولأبنها العوجه قحط عليها وعلى أبنها وعلى بيتها وزنگتها من يوم يومها تتباهى وشايفه نفسها على كل أخواتها وبس هي تلبس وتتكشخ أني أنطي لهيج مله شايفين نفسهم على أهلهم
ولج من عمى العماج عجوز وحاطه عقلج وياها مو ب
نت أختج ويتيمه وجاهل چا لو غريبه شتعملين بيها هاي تصرفاتج وقلة تدابيرج وركضج لأختج شفتي شلون جازتج لاعبه لعب بنتج وتالي رجلها طاردها علمود أمه طبعاً العالم دگول أمه .
هاي الأوادم القدرتيها وأنطيتهم نسوان ولج طايحة الحظ من الله يطيح صبغج فوك ماهو طايح تفضلين غافر على نافع ولج رعنه تنطينها للغريب وأبن أخوج تفشلينه كدام الأوادم والله مستويات ونعل مكطعه ومن هالسوالف التعبانه .. بنيه مثل الورده دمرتيها والله أبوها موصي ما تأخذ نافع .
دستلمي شغلج هذا أذا ما طلگها أتفلي بمله وجهي
سميعه ـ على كيفك گبل شبجت الحجي ومشكله بين رجال ومره وتصير هالمشاكل بيت الجنه والعيال هسه يوم يومين يجي يأخذها .
محمود ـ لا ما ترجعله وبعد رجعه لهذاك البيت ماكو لو بيت لوحدها لو يجي يطلگها ويأخذ بنته وأولها أخير من تاليها وأني ما منطيها فصليه ولا ما وراها أهل وهو وأمه يهوبزن عليها والله عدها بيت من أنعل أبوها لابو بيتها العوجه .
لينا ـ عمي طلع مزعوج ومستغربين تصرفه ووگفته ويه نور وشلون دمه محترك عليها وخالتي گامت تلوم وتحجي عليها
سميعه ـ شگو حجيتي كدامه الرجال ما ينحجي كدامه شيء ومشاكل عيال وتصير بكل بيت وهو دمه محترك على أمه وحجه وأمه حقه شتردين يسويلج وأنت ما مخليه ما حاجيه مطلعه حشو بطنج لما متخربطه شتردين تردينه يصفگلج ..
أستلمي هسه عمج يلوصها بكراع جلب هو خبل شترجين منه كلها تكيف على هجمان بيتج ولج وراج شامت يا طايحة الحظ ما فكرتي ما حسبتي حساباتج من كلهن خليتهن بحلك عمج .
لينا ـ خالتي شبعت قهر ونور بس تبچي وشالت بنتها للظهر تغدينا وعمي ما أكل ودز عليها أجتي كعدت
محمود ـ شوفي عمي أني ما متعاجز منج بس صارلج أسبوع محد وصلج لا هو ولا أمه وهسه أخابره كدامج
لينا ـ ما حجت وحسيتها ما راضيه يخابره بس سگتت وتشوف تالي السالفه .. وطلعنا كلنا بقت بس هي وخالتي وگفت يم الباب أسمعهم وجان فاتح سماعه
محمود ـ ها غافر الله يساعدك
غافر ـ هلا عمي ويساعدك
محمود ـ شوف يا أبن الناس ما أريد أطولها عليك بس هنا حجايتين أكولهن الك والحل يمك
ـ گول عمي
ـ نور لو تطلعها بيت لوحدها لـو تجي تطلگها وتأخذ بنتك
ـ من عيني عمي تدلل .!
