رواية في عشقها هلاكي الفصل الثاني والثلاثون والاخير
لا متقلقيش عمك لاقرع ده انا كلمته وهو موافق وفضل يتحايل عليا نقرى الفاتحه وانا قولتله مش وقتها ....ايه رايك نقراها دلوقت واهو تبقى على روح جمال بالمره
روعه اتغاظت من غبائه ولفته مقابل عمها وهيه بتقول....هنقراها على روحك الاول
مختار اتفزع لما شاف عمها في وشه بلع ريقه وبص لروعه وقال...عمك
عدلي بصله بتوعد وقال....الاقرع
مختار ابتسم بارتباك وقال بسرعه....الاقرب.....قصدي الاقرب لقلبي يعني... انت سمعتها ايه....لازم تشوف دكتور لودانك مش عجباني الفتره دي
عدلي ابتسم بسخريه وقال.....امم هشوفها وهتعجبك ...بس استنى عليا
يلا ياروعه تعالي معايا
واخد روعه والضباط وراحوا يشوفو شغلهم ومختار جري وراه وهو بيقول ...منورنا والله البيت نور من كل حته
جوه كان غانم واقف متوتر وقال..انا...انا قولت كده برضه....قولت لمنى حمزه مش هيسبنا
حمزه ابتسم بسخريه وقال...لا مش هسيبك....وهحميك بنفسي من مختار....لاني مستحيل اسيبه يقتلك
غانم ابتسم بسعاده بس اختفت ابتسامته فورا لما حمزه قال...مستحيل اسيبه يقتلك ويخلصك بسهوله....انت لازم تعفن في السجون وكل يوم يعدي عليك تفتكر انت هناك ليه....وتتحسر على الباقي من عمرك ...زي ما حسرتني على امي
غانم اترعب من طريقته وقال بتوتر...حمزه انا....
بس حمزه زعق فيه بصوت يرعب وقال.... انت تخرس...سامع ولا نفس
هنا دخل مختار وقال بتوتر..حمزه فيه ايه....مش وقته دلوقت
وبص لغانم بشر وقال...سيبه....كل حاجه لها وقتها
غانم بلع ريقه بخوف وحمزه سكت
مختار دخل الضباط وبداو يشوفوا شغلهم
روعه كانت مع الضباط وبتتكلم مع معارفها منهم بس عمها شدها وقال بغيظ .....تعالي هنا انتي مالك ومالهم وجيباني على مالا وشي ليه...انتي مكافحة مخدرات ودي قضية جنائيه حاشره مناخيرك ليه
روعه قالت بهمس....عمي انا بساعد بس
عمها قال بغضب.... متساعديش.... ده مش سوق علشان تساعدي ...وبعدين ما تيجي دغري وتفهميني ايه حكاية الولد ده معاكي...اوعي تقوليلي ان انتي كمان...
روعه هزت راسها بالموافقه وابتسمت بكسوف
عمها قال بزعيق...يا نهار ابوكي اسود ....العربجي ده ...عاجبك في ايه
حمزه لما سمع زعيقه قلق وقال..... هو فيه ايه
مختار مسح على رقبته بحرج وقال...متقلقش بيتكلمو عليا ...سيرتي سبقاني
اما روعه فقالت بضيق....يا عمي هو ده وقته ...خلينا نخلص الاول وبعدين نتكلم
عدلي قال بنفاذ صبر.... انا مش هتكلم ولا هتنيل خلاص انا تعبت اتمرمطت واتخطفت والمهمه كانت على المحك بسببه ومبقاش فيا طاقه تاني اولعو ببعض المهم تسيبوني ارتاح
قال كده ومشي راح للظباط وهيه ضحكت وشاورت لمختار بايدها كانها سلاح وبتضربه بالنار
مختار ابتسم ابتسامه تجنن وحط ايده على قلبه كانها صابته برصاصه في مقتل
حمزه بصله ورفع شفته وقال..ايه حركات الثناويه دي
مختار كانت عيونه على روعه مش قادر يشيلها وقاله...اششش خليك في حالك متركذش
بعد وقت من المعاينه الضباط قربه من حمزه وقالوا اتفضل معانا
مختار ارتبك وبص لروعه وقال...يروح فين
روعه قالت بسرعه..... متقلقش هو حاليا متهم ولازم يجي ده طبيعي ...اصلا كلنا هتتاخد اقوالنا... اهدى انا هفضل معاكم
حمزه ابتسم وقال...متقلقش يا مختار ...وارجوك لو حصل حاجه خلي بالك من نسيم
نسيم كانت واقفه بتبصله بخوف ومختار قال بسرعه...انت هتخرج تحت اي ضغط متشلش هم اي حاجه
حمزه ابتسمله بامتنان ورجع بص لغانم وقال بغل..انا عايز ابلغ ...عن قضيه كمان ....امي مماتتش امي اتقتلت ومعايا الدليل... التسجيلات مع حضرة الرائد روعه الجندي
مختار غمض عنيه بغضب كان نفسه يعاقب غانم بنفسه ...بس حمزه مرضيش يورطه اكتر وفضل يسيب الموضوع للقانون
الضباط اخدو حمزه في البوكس تحت انظار الجميع اللي كانو زعلانين وقلقانين جدا
اما غانم فكان لابد من امر بضبطه واحضاره
ففضل في البيت ومختار كلم الحرس بتوعه جم فضلو متحفظين عليه لحد ما يتم ضبطه علشان ميهربش
وهو راح ورا حمزه وكل اللي كانو في البيت راحو معاه
ومرت التحريات يوم بعد يوم واخدو اقوال الجميع اللي كانت اقوالهم موحده ومقالوش غير اللي شافوه بعينهم... ان جمال هجم على البيت بسلاحه وكان عايز يقتل حمزه واشتبكوا سوا فخرجت الرصاصه وصابت جمال
ومرت الايام وكانو الجميع على اعصابهم وفعلا حمزه اتبرأ من اول جلسه لانه اثبت انه كان في حالة دفاع عن النفس
واول حاجه عملها لما طلع انه حل مشكلة والد نسيم ومختار وقف معاه و كان الوسيط اللي راح عرض التصالح على اهل جمال
في البدايه اهله كانوا رافضين جدا بس المبلغ اغراهم ومختار بطريفته قدر يقنعهم وقالهم هيدفعلهم ٣ مليون ياده وبالفعل وافقوا وتم التصالح والتنازل في المحكه وخرج والد نسيم بالسلامه
في الوقت ده ابطالنا كانو بيعيشو اسعد ايام حياتهم وكل مشاكلهم بتتزاح واحده ورا التانيه
خصوصا ان غانم ورامي اتحكم عليهم الاتنين واترمو في السجن
ومنى بنت غانم سافرت عند خالتها بعد سجن ابوها
وحتى نجوى وشاكر بعدو عن حياتهم ومفكروش يرجعو ولو مره خصوصا بعد ما نجوى نقلت شغلها ومبقتش تشتغل مع حمزه تاني
اما روعه وعمها الاتنين اتكرموا من الوزاره على مجهودهم واثنوا بشكر خاص على مساعدة مختار ليهم واتصرف له مكافئه ماليه كمان
مختار بقى رجع يشغل الشركه زي ما كان بيتمنى وبدا الشغل بتاعة يقوى ويرجع اسم الديب للسوق من تاني
وبعد مرور ٧ شهور
في قاعة فخمه وتحضيرات تجنن
دخلت روعه في ايد عمها ودخلت نسيم قصادها في ايد اخوها وكانو لابسين فساتين زفاف قمه في الاناقه وطالعين فيها احلى من القمر
مختار وحمزه كانو واقفين باصين لهم باعجاب شديد
وحمزه اول ما شاف نسيم بفستان الفرح نزلت دموعه من شدة السعاده
مختار بصله بدهشه وقال...هو مين اللي يعيط انهارده انت ولا هيه ...ما تنشف يالا فيه ايه
حمزه مسح دموعه وقال بسعاده...مش مصدق يا مختار مش مصدق والله
مختار ضحك بخفه وقال....انا هخليك تصدق تعالى
ومسكه من ايده واتقدم على روعه ونسيم واول ما وصلو عندهم قال لاخو نسيم ....بس تسلم انت يا باشا سلمت الامانه ودفع حمزه ناحية نسيم وقال...اهو يا خويا صدقت كده
حمزه ضحك بخفه ومسك ايد نسيم باسها وقال ....الف مبروك ليا يا قمري
نسيم نزلت دموعها وحضنته قدام الكل وهيه مش مصدقه انها بقت ليه اخيرا
مختار بصلهم شويه وقرب من روعه وقال بهمس...المشكله لازم نجاريهم والا شكلنا هيبقى وحش ....مع ان محن الكلاب ده بيجزع نفسي ....كان لازم يعني نتجوز في يوم واحده
روعه حاولت تكتم ضحكتها وقالت ...اتستر الليله دي علشان عمي عازم كل معارفه وبقاله شهر بيحذرني اي غلطه هياخدني ويمشي
مختار قال بغيظ...ياخدك مين احنا كتبنا امبارح وبقيتي مراتي ...يعني ممكن اشيلك على كتفي دلوقت وامشي واسيبله القاعه ليه ولمعارفه
روعه مسكت ايده وقالت بدلع...بس انت مش هتعمل كده علشان متزعلش روعتك مش كده
مختار داس على شفته بوقاحه وقال....يخربيت جمال ام روعتي ...طب هو ينفع نبوس هنا..من باب الرومانسيه يعني
روعه داست على شفتها بغيظ وقالت...عدي الليله يا مختار متخلنيش انكد عليك من اولها
مختار اتنهد وقال ..وعلى ايه.... لسه قدامنا وقت كتير تنكدي فيه
هنا فايز قرب من مختار وقال...ماتاخد مراتك يا ابني وتروح تقعد جمب اخوك على الكوشه واقفين كده ليه
مختار ابتسم وقال....سمعتي قال خد مراتك ...قولهالها تاني علشان تصدق
فايز ضحك وقال..حقها....كلنا مش مصدقين ...مستغربين زوقها الصراحه
روعه ضحكت ومختار قال بغيظ....نقول ايه حظ بقى ...وهيه حظها منيل في اللي اختارته يبقى جوزها وفي اللي فتحت عيونها لقته اخوها
فايز لسه هيرد عمه ناداله قال ....طب انا هشوف عمي ومسيرنا هتجمعنا قعده يا ابو نسب
روعه ضحكت وقالت ...هنفضل واقفين كده كتير
مختار بص لقى اخوه قاعد مع نسيم على الكوشه قال .... لا يلا تعلي هنروح نتبروز جنبهم هناك والناس تيجي تتفرج علينا قصدي تباركلنا
روعه ضحكت ومسكت في دراعه وراحو قعدو جنبهم
وبداو الناس تيجي تبارك قرايب ومعارف روعه واصحاب وزملاء حمزه وصحبات نسيم وجيرانها
الا مختار مكانش فيه حد جاي الفرح علشانه كان كل حد من معارف اخوه او روعه او نسيم بيسلمو عليه من باب الزوق من غير معرفه ويمشو
وقتها حس بغربه وان طول الوقت ده معاشش لنفسه ولا كون صداقه ولا معرفه حتى
بص لقى روعه بتبص على ام نسيم اللي كانت ماسكه ايدها وبتذغرد بسعاده متتوصفش لان بنتها ارتاحت اخيرا
روعه افتكرت امها وقد ايه اتمنت تكون جنبها انهارده
مختار ابتسم بحزن لان كل واحد فيهم ناقصه حاجه مسك ايدها بقوه وقال....انتي كل اهلي واصحابي ...وجودك معايا يغنيني عن الدنيا كلها...وانا هكون كل اهلك وابوكي وامك حتى
روعه ابتسمت ومسحت دموعها وقالت....وانا مش عايزه غيرك يا مختار
مختار ابتسم وقال...يبقى نقوم نرقص... واهو على الاقل نحضن شويه
روعه ضحكت وقالت..مفيش فايده فيك قوم ربنا يسترها انهارده
وراحو يرقصو سوا بسعاده وحب
اما حمزه فكان في قمة سعادته هو ونسيم
نسيم بقت تضحك وهيه شايفه ابوها وامها بيرقصو سوا واخوها بيصفرلهم
قالت بضحك وسعاده شديده...اول مره اشوف بابا وماما فرحانين كده
حمزه ابتسم وقال....علشان هما من الاول بيحبوني زي ما بنتهم بتحبني
نسيم ابتسمت بكسوف وقالت...هما بيحبوك اه...بس مفيش حد هيحبك قد ما بنتهم بتحبك
حمزه ابتسم بسعاده و وقال....طب تحبي نرقص احنا كمان
نسيم قالت بسعاده شديده...رجليا مش شيلاني يا حمزه...حاسه هيغمى عليا او قلبي هيقف...مش قادر اصدق اللي انا فيه...تعرف ..امبارح لما كتبنا الكتاب مقدرتش اقف اسلم على الناس ...مش عارفه ازاي وصلنا لهنا الحمد لله يارب
حمزه ابتسم على سعادتها وقال...من انهارده مش هتشوفي غير السعاده وبس باذن الله وهعوضك عن كل اللي فات...اوعدك
نسيم ابتسمت بسعاده وقالت....يارب يا حمزه ...ده انا كنت نسيت شكل ضحكتي
حمزه قال بعشق واضح في عيونه...بس انا عمري ما نسيتها وهعمل كل اللي اقدر عليها علشان تنور حياتي دايما ...بحبك يا حب العمر كله ومفيش دقه واحده من قلبي كانت لغيرك
نسيم ابتسمت بحب وقالت....وانا عمري ما عشقت ولا اتمنيت غيرك ربنا ما يحرمني منك ابدا ويكمل فرحتنا على خير
اما مختار فكان رايح يرقص مع روعه وجاتله رساله فتحها لقاها من شاكر بيباركله بس محبش يحضر لان مختار مش حابب وجوده جمب روعه
وبرغم عدم وجوده وانها مجرد رساله لكن مختار ابتسم وحس بدعم لمجرد ان فيه حد افتكره بعتله وكتب ...الله يبارك فيك يا حبيب اخوك ...قريب هزورك ياشاكر وحشني كلامنا سوى
شاكر بعت فورا...تنورني انا كمان اتمنى تشوفك يا صاحبي
روعه بصتله وقالت...مين ده اللي بيراسلك...هو انت هتلعب بدلك من يوم الفرح
مختار ضحك وقال ...وانتي هتبتدي تغيري من يوم الفرح
روعه قالت بسرعه .....ومن قبل الفرح كمان ....وبعدين انت ملكش امان
مختار ضحك وقال..لا خلاص كان زمان دلوقت بقى الامان كله في وجودك وبس
روعه ابتسمت بحب وقالت...يعني عمرك ما هتخوني
مختار قال بتاكيد....ابقى بخون روحي ...هحتاج ايه تاني في حياتي انتي في عيوني كل الستات
روعه ابتسمت ومختار بقى يقربها ليه جامد وهو بيبص على فايز ويغمزله قال يعني خلاص متقدرش تقول حاجه
فايز نفخ بغيظ من حركاته
وروعه شافت عمها وفايز بيبصولهم قالت بتوتر...احم مختار خف ايدك يا حبيبي.... احنا مش في اوضة النوم
مختار قرب من ودنها وقال بهمس...انا هموت واروح اوضة النوم....ياويلك مني انهارده
روعه حمحمت بكسوف وقالت ....مختار
مختار بص لعيونها وقال...عيونه وقلبه وكليته وكل اعضائه
روعه ضحكت بخفه وقالت ...صحيح هو انا قولتلك اني بحبك
مختار رفع شفته بغيظ وقال...لا محصلش..... بس مش مشكله لسه العمر طويل قدامنا ممكن تقوليها يوم سبوع ابننا الاول ولا التاني او لما اطلع على المعاش تكوني فكرتي كويس يعني بلاش تتسرعي وتندمي
روعه ضحكت من قلبها وقالت...ما انت عارف يا مختار المشاكل والشغل كان فوق دماغي وملحقتش اقولهالك
مختار قال بغيظ ...بت متعصبنيش عليكي هو مشوار ملحقتيش تروحيه...دي كلها كلمه من اربع حروف....انا عارف من يوم ما رائد لبسك وانتي مغيره معايا و قاصده تلعبي بيا وكل مره اقولك قوليها تقولي بعدين .....عموما حتى لو قولتيها ولا مقولتيهاش انا قاريها في عيونك من زمان اصلا مين ميحبش مختار
روعه قالت والحب بيلمع في عيونها...يا سلام على التواضع ...طب وقريت ايه كمان
مختار سند جبينه على جبينها وقال ....قريت انك عشقاني وعيزاني وهتموتي عليا ...وكمان قريت انك زهقتي من الفرح ومن عمك وعايزه نطير على بيتنا
روعه ضحكت وقالت....بحبك يا مجنون...بحب كل حاجه فيك جنانك وحنيتك وعيونك وضحكتك.... كلك على بعضك وقعت قلبي اللي عمري ما اتخيلت حد يوقعه
مختار لمعت عيونه بسعاده متتوصفش وقربها لحضنه اكتر وقال....وانا بعشقك يا اغلى واحلى هديه جاتني وغسلتني من جوايا وخلت كل حياتي نضيفه زي قلبك ....بحبك ياروعه يا عشق افتكرته هلاكي وطلع هو بداية حياتي ❤️❤️❤️
تمت بحمد الله
