رواية فصلية بديلة ( شموخ ) الجزء الثاني الفصل السادس والثلاثون 36 بقلم ام ملكوت

:-كمنه طلعنه بره بعدما سمعنه الاذان توضينه ورجعنه للغرفه وكفنه نصلي وريانه كل شوي ساجده كبال وحده وتنضم جوه المحرم لحدما

كملنه لفينه مصلاياتنه وطلعنه نساعد امي بصب العشه جانت مسويه كبه وتبسي وبيتنجان شوي وطماطه وخبز حار كلهن هذن جهزتهن من العصر

الهم خطيه صبينه الجاي والتمينه عل سفره بس افتقدت وجود احسان باوعت باستغراب وسالت امي وكالت بضوجه..

_اخوج شفته طلع قبل فتره يمكن عازمينه جماعته

_هاا اوكي..

استغربت لان مو من عادته يطلع هيج وقت وبدون مايكول لامي وين رايح ..المهم كملنه عشه وكمنه شموخ خطيه تغسل ماعين و تشطفهن وانه ارتبهه عل كاونتر

وتسولفلي عن راهب وحبهم يلي بده يظهر على تصرفاتهم واسلوبهم وشلون بعد رفضهه اله بقه طاكهه عل صامت وحتى مايباوع بعيونهه وكأني

حسيت بشعوره لاني مريت بنفس الموقف تقريبا ورغم كلشي صارت عيوني الماتباوعله تبجي وكلبي المايحس بي يتخربط كل نبضاته .. رحنه للغرفه

بعدما كملنه شغل وكعدنه نباوع فيلم انه وياهه ونوره وريانه تعشت ونامت بعد عيني .. سهرنه لل١ بليل افلام واكل واحس ترفهت عن نفسي شويه

بوجودهه يمي تمنيتهه لو هيه اختي الجبيره رغم ما بيناتنه غير ٤ اشهر الا اني احسهه اكبر مني بالقوه والفهم وتحمل المسؤؤليات .. نمت وانه

مبتسمه بعد ضحك وتحشيش عل فيلم دام ساعه بس سرعان ما اختفت ابتسامتي لمن كعدت الصبح على صوت يمي وشفتهه شموخ تبدل لريانه

ملابسهه حتى ترجع لبيتهم حسيت بضوجه وملل قبلما تروح حتى حاجيتهه وحاولت اقنعهه تبقى اليوم همين بس ماكدرت لان باجر عدهه دوام

وعلى كولتهه لازم تسترجع عقلهه وتكمل واجباتهه مالت التدريب ..عاد خليتهه براحتهه كملت لبس وكمت انه غسلت وجهي وسنوني وطلعت وراهم

لكينه امي مسويتلهم ريوك كعدنه كلنه سويه ناكل وضربتني شموخ خفيف بعكس ايدهه باوعتلهه باستغراب واشرت بعيونهه على سلام باوعتله

وشفته صافن بنوره ويتاملهه بشكله جدي فتحت عيوني بصدمه بعدما ادركت نوع هل نظرات ورجعت عيوني على شموخ وكالت بهمس..

_صار فتره ادور عل يحبهه اخوي وهسه شكلي طحت بيهه

_شنو يعني سلام حاب نوره 

_اي شكله هيج الوليد وهسه نكول مبروك لو ماتنطوهه

_خيه انه لاجمني كلبي من خوانج

_سلام تربايتي وشخص والنعم منه

_اذا على شهادتج اكلج اخذيهه

_هههه تمام خلي يتخرج واجي اخطبهه

_ودراستهه 

_بقالهه سنه هيه على مايتخرج وليدنه هيه مكمله 

_هاذهو جا خيه كبعيهه واخذيهه

_ههه تمام اتفقنا والمهر 

_بكيفكم شتفصلون احنه نلبس

_افصللهه عيوني بس كون ماتشيطهن الي اختج لسان وماينكدرلهه

_لا كلشي ماكو كلبهه فشوشي بس لسان

_هاذهو راح اخذ على شهادتج ونجي نتقدم بعد شكم سنه

_ههه والله لو يدرن بينه امهاتنه اتفقنا حتى عل مهر الا كتله معدله وعلي

_هنه امهاتنه يكيفن اشو لا فلحن بيه ولا بيج عل اقل يفلحن بيهم احنه طبينه لبيتكم ومانطلع خالين 

_هههه تاخذون عيوني 

_الله احس اني ام وكاعد اتخطب لابني انه الك سلام شيرجعني للبيت واحقق وياك

_عود انطيني خبر اذا فهمتي شي لان اختي هاي نذله ماتحجيلي حتى لو سالتهه

_هيه اختج ماتدري بي يحبهه من طرف واحد الافندي بس ميخالف اول باول توصلج السالفه من عيني

_هااا ههه تسلم عينج يله اكلي عبالك ثنين متزوجين وكاعدين ويه اهلهم يتهامسون

_ههه خرب شكلج على هل تشبيه

_هههه والله..

ضحكت ورجعت تباوعلهم كل شوي وهوه اكلهه لنوره بعيونه وهيه ام بطن ملتهيه تعلف وتحجي ويه امي عل فساتين والوانهه والتصاميم

التلوك على جسمهه لا تكول ابن عمي كبالي لا تستحي لا تخجل ماخذه ميانه زايد بت ال١٧ سنه

احسن مني انه العجوزه ويمكن لهل سبب جذبت نظر سلام الهه لان مبين يحب ام لسان والجريئه والكلبهه قوي مثل طبع اخته مايحب الكانصات بهدومهن... 

كملنه ريوك وودعناهم وراحوا رجعت انه لغرفتي تمددت ردت انام ودخلت نوره جفت علي توجهت للكنتور بدون سابق انذار تفتش بي وهيه تكول بضجر..

_راح اخذ منج فستان اطلع بي ملابسي كلهن ملبوسات 

_لا بطه

_اي يعني صارلهم شهرين ملتهين بيج وعايفيني لا ملابس ولا شي شافوني ساكته اكلوا حقي مالي شغل راح اخذ فستان منج واروح للسوك اشتريلي ملابس وذهب ماعندي شي

_اشو تتعايرين انتي مو هل كنتورج متروس ملابس جايه لاحكتني على هل كم قطعه الشتريتهه بخطوبتي 

_اي منو كلج تشترين لنفسج وماتشتريلي انتي هم اخت انتي

_يله بله وين اكو زعطوطه هيج تكول لاختهه الجبيره

_مو زعطوطه انه عفكره بعدلي سنه واصير بالكليه

_اووو بس يبقى عقلج مال زعاطيط 

_هففف هسه تنطيني فستان منج اولي بي لو لا

_لا ليش تسالين هوه انتي اقتحمتي كنتوري بعد بقت على الفستان لا تستحين سحبي وطلعي 

_لا تصيرين خبيثه باجر حماتج من تطلب منج فستان هم تكليلهه مانطي لو هذيج اخت الحبيب وانه اخت الزري* 

_عابتلج اي والله اخذي الفستان وولي الله يعينه على هل لسان كون

_ياهو هذا 

_الياخذج امه داعيه عليه

_اصلا يتونس البسله واكشخله وادلعه ماضل مكابله الحيطان وكاعده بالجذب ماتصل عليه واكله مشتاقتلك 

_هاي شقصدج ولج

_هيج سلامتج ست جننننه

_نووره ام راس الثور

_طالعه طالعه من خرب نوره عود مكيفه اليسالني اكله عندي اخت جبيره ومفتخره بيهه عندي اخت مثل خوات العالم انه حتى فستان ماتنطي..

بقت تدردم وتمشي بطيء للباب طكت روحي ودخت من لسانهه لزمت سلك الشاحنه اليمي شمرته عليهه وهيه طفره وهيه صارت بره جنهه

زيطه بطول ابوي .. تنهدت ورجعت راسي عل مخده صفنت بالسكف واخذتني افكاري لمحمد لحدما نمت .. للضهر كعدتني امي عل صلاة كمت

توضيت وصحصحت طلعت فرشت مصلايتي ووكفت اصلي كملت بعدما ختمتهه بجزء من سوره

_امي حبيبتي ليش هيج كاعد تصرفين وياي والله مالي بالدنيا غيركم والمصبرني عل عيشه هوه انتو اسفه اذا شلعت كلبكم وتعبتكم وياي بس شسوي

مو بيدي تحمليني بس هاي الفتره وادعي ربي يفرجهه وينحل كلشي بيني وبين محمد 

_ليش شنو صاير بينج وبينه

_هاا امي ماصاير هيج انسي 

_احجيلي جنان شصاير بيناتكم بهذيج الفتره جنتي تعبانه وعفيتج من السؤال هسه كعدي احجيلي شنو سبب طلبج لفسخ العقد

_ماعرف امي صار بكلبي تردد من خطوتي هاي وخفت اظلمه وياي بس تالي لمن افترقت عنه كم يوم ماتحملت وايقنت اني حبيته وصرت اشتاقله

بكل مره يجي ببالي وهوه هسه عايفني ماينطيني مجال احجي وياه لو احاول احل سوء الفهم يلي صار بيناتنه وبس هيج يا امي

_لا امي هاي الشغله بيني وبينه ولازم احنه نحلهه يكفيني دعائج الي ووكفتكم وياي

_انشاءالله يمه ربي يصلح بيناتكم ويهدي سركم 

_يعني هسه مازعلانه مني

_انه زعلانج عليج مو منج مايهون علي اشوفج هيج متعذبه وانه كتلج من قبل شيصير وياج احجيلي ولا تعذبيني بهل طريقه

_اسفه امي بس دورات اكو اشياء ماكدر ابوح بيهه لاحد منكم واكسر كلبه وياي 

_بس احنه اهلج يا يمه مو غرب اذا مانكسر كلبنه عليكم شلون نتسمى اهل

_ربي لا يحرمني منكم كولي امين

_امين يارب ويحفضلج حبيب الروح 

_ههه انشاءلله ..

ابتسمت وبستهه بخديداتهه وكملنه طبخ صبينه واجه بابا واحسان من المزرعه كعدنه سويه وتغدينه وحسيت عليه مو طبيعي يصفن ويتحسر

كل شويه قررت اساله شنو البي لمن نكمل غده عاد صدك كملنه غده غسلت ماعين وامي صبتلهم جاي شفته طلع بره يفتر بالساحه ويدخن استغربت من

منظره هذا هوه مايدخن بس مرات لمن يكون مقهور وطالعه الدنيا من عينه .. عفت الماعين

غسلت اديه وطلعت يمه تحمحمت انتبه علي وشمر جكارته وزيف الابتسامه وكفت كباله وكتله..

_لا تزيفهه لهل ابتسامه احجيلي شصاير وياج

_لا شصاير يعني نفس العلل مالتي

_شموخ مو

_لاا

_جا منو

_هيج حسبه ببالي اريد اسويهه لمن يخلص عرس محمد ابن عمي

_خو مابيهه شي يضرك لو يضر غيرك

_لا بالعكس سالفه تسعد الكل

_وانت 

_اي يعني 

_همم اشو مامرتاحتلك 

_اي مو سرسري انه 

_ههه لا جديات احسان شنو الشاغل بالك تره شغلت بالي

_لا عوفج مني وشغلي بالج ويه روحج وحياتج لا تضيعين الفرص والاشخاص الزينه من ايدج حافظي على كل شي حلو بحياتج تره الغفله والترخي حسابهه عسير

_ لااا انت اكيد صاير وياك شي بس ماكو شي ينضم تبين بعدين انشاءلله 

_انشاءالله يله خلينه ندخل جوه اريد انام

_صليت

_اوو استغفرالله راح من بالي الله يلعن الشيطان

_وين بالك بس لو اعرف 

_يله خلي ادخل اصلي وانتي فوتي همين

_ضايجه راح ابقى اتمشه بالحديقه شوي

_براحتج..

خله ايده على كتفي ومشه بتعب كلش ماعاجبني وضعه الله اليستر منه ومن اليريد يسوي .. تنهدت

بحيره ودخلت لغرفتي فتحت حاسوبي وخليت الملفات كبالي وبديت اشتغل لحدما صار العصر دخلت امي وهيه تلبس بحجابهه وكالت..

_يمه جنان راح نروح انه واختج للسوك ماترحين ويانه فرد مره تجهزين لعرس محمد بعد مابيه حيل يوميه ماخذه وحده منجن

_والله مادري يا امي 

_بنيتي بعد جم يوم عرس ابن عمج ليش تحصرين روحج باخر يوم وماتلكين البدله الترديهه وتضلين

_على كولتج وهم مادام ماعندي شي خلي اروح اطلع اشوف العالم

_يله جا يمه كومي بدلي بسرعه حتى نلحك عل مولات تره حدهم ب٨ بليل يعزلون

_اي امي كايمه بس انتظروني ٥ دقايق

_يله منتظرينج..

لبست عبايتهه وطلعت وانه سديت الحاسبه والملفات وكمت باوعت للكنتور بحيره شلبس سحبتلي فستان اسود وبي زيتوني نسقت الحجاب

وياه ونسقت الحذاء والجنطه اسود لبست وخليت كحل ومسكاره وحمره رشيت عطر خفيف واخذت نقالي وطلعت على صوت الهورن امشي كوه .. 

دخلت للسياره وحرك احسان وبابا سد الباب وطلع لجماعته لان مايكدر يضل بالبيت وحده خاف لا سمح الله يصير شي .. 

مسافه الطريق كلهه وانه بالي يم احسان واشوفه يصفن وعاكد حواجبه بانزعاج ومابانت على ملامحه حتى ابتسامه طفيفه .. درت وجهي على

نوره وشفتهه تصور بالسناب عاد سويتلهه ازعاج واخذت كم صوره وياهه ام حلك بقت مزعوجه وتباوعلي بغرور لمن اطلع احلى منهه عيبت عليهه

ودرت وجهي عل شارع وسرحت بافكاري اللامتناهيه لحدما وصلنه باب المول ..نزلنه وعدلت ملابسي توجهنه للباب فتحه احسان ودخلنه اجه

بوجهي فستان نيلي عارضينه واحس تصميمه عجبني ولايك علي كلش .. افترينه بالمول وشفنه كل الفساتين وماعجبني غيره بس نوره عجبهه

واحد واشترته اجيت انه يم الفستان العارضينه وتمعنت بي وبقماشه التفتت ولكيت العامل يباوعلي اشرتله عليه واجه يمي وهوه يكول..

_تردين هذا الفستان

_اريد نفس التصميم بس غير لون عدكم

_اي اكو منه لون حني وتركوازي وماروني وهذا اللون

_اكدر اشوفهن

_شكد قياسج

_48

_تمام هسه اشوفلجياهن..

هزيت راسي بايجابيه واخذنه انه وامي للفساتين المغلفه دور بيناتهن لحدما طاح بيهن طلعهن وشفت الالوان مثلما توقعت احلى من النيلي بهواي

بس الحني شفته مايبرز علي او ينطي لون للتركوازي وانه لبست تركوازي بالخطوبه مالت محمد فراحت عيني عل ماروني تمعنت بي وتخيلت لابسته وشفت راح يطلع يجنن علي عاد هزيت راسي بايجابيه وكتله اريد الماروني ابتسم هوه وطلعه من الجيس مالته وهوه يكول..

_ايجار لو مشتره تردي

_بيش المشتره مالته

_ب١٥٠

_هواي 

_تردين تاجرينه عادي

_همم تمام راح ااجره اساسا هوه يوم واحد شكد يصير

_٥٠ الف 

_اوك تمام

_يا يوم تجين تستلمي

_هوه العرس يوم الجمعه انه اجي عليه الخميس هيج وقت اخذه وارجعه السبت الصبح او الضهر 

_تمام بس انطوني رقم تلفونكم والعنوان واسمج حتى اثبت الاسم 

اشرت لامي وردتلهم رقم ابوي وانطته عنوانه واسمي كتبهن على ورقه ولزكهه بالفستان اجت امي يمي وكالت بهمس..

_اخذ اسمج والرقم والعنوان بس لا يريد يجيب اهله يخطب هذا

_هههه شسالفه امي هيه هيج اجراءات الحجز عدهم 

_والله مادري يايمه اشو مارتاحيتله يمكن يريد يخطبج انتي لو اختج 

_خلي جا اذا طالب الحلال شكو بيهه اذا اجه يخطب

_لا شلون غير مخطوبه انتي ونوره بعدهه تدرس ماليش يخطب

_وانتي صدكتي راح يجي 

_كلشي يصير يايمه 

_هههه كافي امي لا تخليني اضحك وينتبهون علي هسه يكولون مخبله هاي لو خفه

_لا سكتي شعدج ضاحكه يمهم خلي نرجع البيت وضحكي

_ههه تمام..

خليت ايدي على حلكي وانه حاصره الضحكه نوب كلساع اتذكرهه من اجت همست بجديه وكالت يريد يخطب والزم ضحكتي كوه اخذت نوره

الفستان مالتهه وطلعنه لبقيه المولات اشترتلنه امي ملابس بيت جديده رغم عندي انه بس خلتني اشتريلي كم قطعه ويه نوره .. كملنه ويه اذان

المغرب وطلعنه جابلنه احسان عشه ورجعنه للبيت اتصلنه على بابا واجه من بيت صديقه لان جوارينه همه مو بعاد ..فتح باب البيت ودخلنه سويه وهوه يكول..

_الله يساعدكم بويه

_ويساعدك حبيبي بابا 

_شنو اشتريتوا ماشتريتوا

_اجرت فستان ونوره اشترت واحد والبقيه ملابس بيت 

_عاد هذيج المره ذكرتنه بلباس بفانيله

_هههه جا شلون غير انت حبيب كلبهه شلون ماتجيبلك

_اي ادريهه حنينه بعد بيتي وسنيني..

خله ايده على كتفهه وهوه يحجي ويمشون ابتسمت على شكلهم ودعيت ربي بهل مغربيه يحفضهم ويديمهم سوه طول العمر .. دخلنه ذبينه

العلاليك بغرفتي وطلعنه وانه اسح بنوره كوه تريد تكعد تجرب الملابس وتعوف الصلاة قفلت الغرفه وطلعت اريد اشوف شلون تشوف شي وهيه مامصليه ..

عاد من شافت الباب مقفول ايست رحنه توضينه ووكفنه نصلي بالصاله كعدت قريت جزء من السوره وبابا بقه كاعد يقره قران على جهه لحدما سوينه

عشه وصبينه ياله سد الكتاب باسه وخله على جبينه وكام عل سفره وهاي كل مره هيج ومن اساله ليش يضل من المغرب للعشا يقره يكول انه

وخواني اخذنه هل عاده من ابونه ونستذكره كلما كعدنه هل كعده واندمجنه بالقرايه .. خطيه موت جدي وبيبي جان كلش صعب عليهم وشما يكون

الانسان جبير وواعي ومعتمد على نفسه الا ان فقدان الاهل يكسره ويهد حيله الله يرحمهم ويجعل مثواهم الجنه..

ومرت اليومين بلمح البصر وصارت الحنه مالت محمد كلش حلوه وكالعاده يتجمعن البنات عل شبابيك والاسطح ويضلن يباوعن عليهم شلون

يركصون ويهوسون بس انه وشموخ يلي داخلنه مليان تفكير وهم وحتى ماتهنينه .. بقينه بالمطبخ نصب جايات ومايات والبنات بره بالصاله يركصن

على صوت المطرب دخل سلام اخذ سيت اللبن الحضرناه واللفات الجاهزه وطلع تالي دخل بعده مرتضى رفعت راسي واجت عيني بعينه باوعتله

ببرود عكس الانزعاج الحاوط روحي وخلاني لا اراديا ادير ضهري اله سمعته تنهد واخذ الصينيه مالت اللفات من شموخ وطلع رجعت انه اجيس

باللفات واخلي بالصينيه كملت وصرت افرغ البقلاوه بصحون سفري صغيره كل ماعون اخلي بي ٣ قطع واحطه عل ميز مالت الاكل وشموخ

تخلي بصينيه جبيره وتنطيهم كملت اخر صينيه واحس ظهري تفلش من الوكفه كعدت عل كرسي وخليت ايدي على عيوني يحركني للحظه حسيت

بشخص كعد عل كرسي كبالي حسبتهه شموخ وحجيت بضجر وانه افرك بعيوني من الحساسيه..

_موتتني هل حساسيه هاي مادري منين طلعتلي من بده الربيع لهسه ..

فتحت عيوني مغوشات من كثرما عصرت بيهن وضحتلي الرؤيه واشوفه مرتضى كاعد كبالي ومرخي نفسه عل كرسي عكدت حواجبي

باستغراب ودرت عيوني ادور على شموخ ماكو بالمطبخ.. تحمحمت وكمت ردت اطلع وحجه مرتضى بجديه..

_تعالي جنان اريد احجي وياج

_العفو تحجي وياي

_اي وياج تعالي كعدي خلي نسولف

_ماعندي وقت اسمع تفاهات الناس عن اذنك..

التفتت وماحس الا لزم ايدي عاصرهه حيل ودارني عليه باوعتله ببرود وهوه معصب وحجه من بين سنونه..

_لا تختبرين صبري جنانه كتلج كعدي خل اتزقنب واحجي وياج

_اسمي جنان مو جنانه الجنت تضحك عليهه بكلمتين وتخليهه تمشي عيونهه وراك

_ماضاحك عليج بعمري 

_والمطلوب هسه شنو تريد تضحك علي 

_لا كعدي اريد اكلج شغله

_تكدر تكولهه واحنه واكفين مو الا نكعد 

_استغفرالله ربي كتلج كعدي خلي اتفاهم وياج لا تطلعيني عن طوري هسه واسحلج للغرفه 

_اشو شايف نفسك زايد انته ابتعد واترك ايدي احسن ماسوي شي يندمك على شوفه وجهي 

_لا تعانديني

_ابتعد مرتضى 

_واذا مابتعدت شتسوين..

ردت احجي وماحس الا انلزم من ياخته وانسحب مني فتحت عيوني بصدمه لمن شفته محمد لازمه من ياخته وصدره يصعد وينزل وعيونه ناطه بعصبيه وهوه يكول..

_تلزم حدك وايدك هاي اذا انمدت على جنه بعد اكسرهه فاهم 

_وانت شنو وتكسر ايدي فد مندله دوخر منا بابا روح مو هنا مكانك ولا يم جنانتي..

هوه حجه هيج لو محمد تخبل اول مره اشوفه هيج لزمت كلبي وجني حاسه راح تصير مشكله صرخت وخليت ايدي على حلكي لمن محمد جاب

مرتضى ببوكس على خشمه وانهال عليه بوكسات من كل جهه وهذاك مايعرف يحمي وجهه لو راسه لو بطنه بقيت اصرخ ودخلوا محمد ابن عمي وسلام واحسان

على صوتي فاككوهم كوه ومرتضى مدمه كعدت بالكاع ساده عيوني وارجف انرفعت من الكاع وحضني عبالي ابوي لان نفس حضنه ونفس

الموقف مره صار بين مرتضى وسراج وهم حضني هيج بس لمن فتحت عيوني شفته محمد اخذني

لصدره وهوه يمسد على راسي ويهدي بيه تالي وخرني عنه وحضن وجهي بثنين اديه وهوه يهدي بيه ويكول..

_اشش جنه باوعيلي انه هنا ماكو شي اهدي نبضات كلبي 

_محمد ليش سويت هيج ليش ضربته وسويت بي هيج وشلون اجيت لهنا

_ليش خفتي عليه..

رفعت راسي باوعتله باستنكار وهوه بهتت ملامحه هز راسه شكله فهم غلط وخله وطلع من المطبخ تبعته عيوني منا لسلم على محمد ابن عمو وطلع

من البيت كله ردت اروح وراه بس منعني وجود الزلم يلي بالساحه انشغل بالي وياه اكيد فهمني غلط لمن شافني قريبه من مرتضى ومن كلامي هسه وياه

ضربت ايدي بالميز واحسهه انفسخت بقيت لازمتهه وابجي متوجعه منهه ومقهوره من محمد اجت شموخ اخذتني لغرفتهه لمن شافتني هيج

ودخلت للحمام كعدت عل طبله وبالي يمه يعني انه ما عولت يحجي وياي يجي مرتضى يخرب كلشي علي ليش هيج كاعد يصير وياي ليش كلما

احاول اخطي خطوه اتجاه الاحبه يصير شي يبعدني عنه الف خطوه .. خليت ايدي على وجهي وانه روحي مخنوكه ودموعي تجري على خدي قهر

فتره ياله هدات شويه وخلصت دموعي وتعبت من الكعده كمت غسلت وجهي وطلعت تمدد عل جربايه وغطيت راسي ونمت مكتئبه مده قصيره

وكعدت على همسات يمي فتحت عيوني شفتهه خالتي وامي يحجن بالصار اليوم انتبهن علي واجت امي يمي وهيه تكول..

_سويتي المصيبه ونمتي مو كعدي سولفيلي شصار وليش محمد تعارك ويه مرتضى ومنين يعرفه هوه حتى يتعارك وياه وهيج يكسر خشمه

_كسر خشمه

_اي وقبل شوي رجع من الطوارئ مخيطينه

_يولي يستاه...

انتبهت على خالتي سماء كاعده يمنه وبلعت حجايتي هيه باوعتلي وكالت بترجي..

_احجيلي خاله جنان شصار وشسوه ابني ليش تعارك ويه خطيبج 

_لا يضل بالج خالتي سالفه راحت ومشت

_اي احجيلي يا خاله شسالفه حتى الزم ابني وادبه اذا تطاول عل ولد

_لا هوه جنه نحجي ومرتضى عصب ولزمني من ايدي يحجي وياي ومحمد من دخل وشافه هيج عباله يريد يضربني ماتحمل وتعارك وياه 

_تحجين صدك ولج جنانه مرتضى ابني راد يضربج

_لا بس محمد هيج عباله 

_شلون بله والله عيب وين ننطي وجهنه كدام الولد شيكول علينه همج ويضربون بناتهم لو شيكول وشيحجي علينه هسه

_لا خالتي محمد مو هيج ماراح يفهم غلط وانه باجر اخابره واحاجي افهمه ان الصار مو مثلما مفكر هوه

_اي خاله جنان بعد خالتج خابري وكليله تره ابني مرتضى مو هيج بعمره ما عصب على بنات عمامه ولا حاول يضرب وحده منهن 

_اي حبيبتي احاجي انتي لا يضل بالج

_اووف اووف منين هل مشاكل كاعد تجي فوك راسنه يوميه طالعتلنه سالفه 

_الله كريم خالتي الحمدلله على كل حال

_الحمدلله ..

صفنت بيه امي بشك وانه تشردت بنظراتي عنهه مالي خلك ادخل سين وجيم وبس تدري بيه حاجيه لمحمد عن حبي القديم لمرتضى تلعب بيه

لعب وتضل طول العمر تلوم بيه وتكلي الزلمه ماينطاله سر وخاصه هيج سر يمس غيرته .. كمت غسلت وجهي وطلعت يم نسوان عمامي وبناتهم

وكل شوي وحده سالتني شصار واكلهه مادري رحت للمطبخ يم شموخ واشوفهه مخبوصه خطيه تسوي عشه للزلم اجيت يمهه وحجيت باستغراب..

_هاي ليش وحدج خيه كاعد تسوين عشه

_ها شلون صرتي

_زينه الحمدلله بس ليش وحدج

_جانن امي وخالتي يشتغلن بحدهن خطيه عاد كتلهن يرحن يرتاحن واجيت استلمت عنهن الشغل

_جا وهذن نسوان عمامي وبناتهم صابهن الله مايجن يساعدنج

_وين ياخيه هيه بس مرت عمي هدى وجنتهه جمانه يعاينن وشوفه عينج مرت عمي جبيره ومابيهه حيل طلعتهه كوه مني وجمانه ماجايه عند اهلهه

_يله بله اشو انطيني عن ايدج وكعدي انتي شوفي بتج خطيه شلون مطفيه روحي نوميهه 

_اريد اوكلهه ياله من الظهر ماماكله شي هيه خطيه

_تمام راح احطلج تشريب دجاج وكعدي انتي وياهه تعشن وروحي للغرفه نوميهه 

_تمام هوه ماضل شي بس انتظري على مايستوي التمن ونصبلهم 

_اوكي..

رحت اخذت صحن ثردت بي خبزتين وخليتلهه سوب وفخذ دجاج عليه وخليته كبالهه عل ميز وجبتلهه خضره ولبن عاد خطيه كعدت هيه وبتهه

تاكل وانه اراقب بالتمن حتى لا يعجن .. فتره واخذت بخاشوكه منه نفخت عليه واكلته شفته مستوي طفيت النار منه وسطرت البلامه عل ميز

بعدما شموخ اخذت ريانه تنومهه بقيت اخذ تمن واصب بالبلامه وافرش عليه شعريه ولحم واخلي عل ميز كملت شكم بلم واجت شموخ ونوره وياي

نسفن رداناتهن ووكفن وياي سون التشريب ..دزت واحد من الجهال على سلام شويه واجه هوه

واحسان وسراج ترددت من ان اسأل احد عن محمد عاد كوه تجرات وسالت سراج عنه وكال..

_بعد من صارت المشكله تعذر من العريس وراح لبيته 

_ومارجع بعد ولا اتصل

_لا ليش مايرد عليج شنو

_لا بس ماعنده تغطيه نقاله طافي يمكن

_اي تلكينه طالع ويه جماعته بعدين يرجع ويخابرج هوه

_اي 

_جنان 

_هاا

_اكدر اعرف ليش صارت المشكله

_فاتت وراحت بعد تولي لا تسال عنهه

_مرتضى سوالج شي خله محمد يتحول من شخص هادئ لواحد متوحش ويضربه بهل طريقه

_لا مو هيج

_تردين الصدك

_اي

_شفه كلبي هل محمد يمكن راح يصير صاحبي 

_ههه ليش

_احس رجعلي حقي بهذاك اليوم 

_اوو بعدك تذكر هذاك اليوم

_اي والله كلما اشوف اثر الكله مالته الباقي على خشمي ادعي عليه وهسه استجاب ربي دعائي

_هههه يله ارتاح جا 

_ولو انه الله ردلي حقي من خلاج تصيرين لغيره بس ميخالف بهل وكت اخذ الحق يصير مربع 

_ليش هوه اصلا جان رايدني حتى ارتاحيت من صرت لغيره

_رايدج رايدج احنه زلم ونفهم نظراتنه شنو معناهه للبنيه

_بهذاك الوكت ممكن بس بهل وكت لا

_ اي صحيح الشفته بعيونه قبل يختلف عن هسه

_المهم الله يبعدنه عن اولاد الحرام ويجبر خاطرنه باحسن منهم

_امين بس حرامات لو صايره الي هسه 

_ليش حتى تكسر خشمه

_شمدريج

_هههه دروح منا لا اخابر رجلي يجي يكسر خشمك وراه

بانفاسه .. بهتت ملامحي بعدما جنت مبتسمه وضايعه بتفاصيله وهوه معصب وتذكرت كلامه وطلعته من يمي تافافت واجت نوره وهيه تلعلع وتكول..

_ادري متنه من جوع هذن ياكلن جنهن هوايش امد ايدي عل لحمه ارفعهه الكه ماخوذ نصهه شهل فلك 

_شمالج ويهد 

_دصبيلنه انه وياج خل نتزقنب مثل الاوادم رايحه هناك المن اول تالي انه اكعد ويه الجهال وبنات عمو شعلان واكل من امداني

_لا بطه تردين انه اصبلج ست نورسين

_لا تصيحيلي نورسين اكرهه لهل اسم كليلي نوره 

_لو اصيحلج بهلول هم يبقى اسمج بالجنسيه نورسين شتسوين مثلا

_استغفرالله احسن شي اكوم اصبلي انه تعب اجدامك ولا تعب السان...

كطعت الكلمه لمن اجه صوت حمحمه من ورانه التفتنه وشفته سلام وهوه منزل راسه هيه شهكت وطلعت بره تدردم عليه وتكول..

_تدك الباب سوي صوت جاي هيج جفت لا تكول خاف وحده مالابسه حجاب خاف وحده مصلخه يربي شهل يوم الفلكاني هذا ..

_ياا شوف حظي التهيت بالاكل ونسيت ماجددتلكم الماي انطيني من ايدك خويه انه اخلي ماي

_ هاج خويه هاج بس لو اعرف اختج شمالهه ماماخذه منج شويه هدوء تلعلع جنهه عجوز

_ههه بس احسللهه والله احس ماعدهه كلب ومايهمهه حزن ولا يهمهه كآبه تضل مفرفشه على طول

_ااحح وهوه هذا المحليهه

_هاا

_هاا شنو 

_شقصدك بالمحليهه

_لا هيج مو عليهه انطيني الماي الوادم غصت

_اي هاك تفضل ليش لا..

شفته انحرج وتوتر لمن سرح وتغزل بيهه اخذ صلاحيه الماي مني وطلع بسرعه ضحكت على

شكله واجيت صبيتلنه انه وياهه تمن ولحم وتشريب دجاج ورحت صحتلهه تجي تاكل اجت وراي تمشي وتحجي..

_ادري هذا ابن عمج شلون هيج يفوت وانه مالابسه حجاب ماعيب عليه

_دكافي شلطشتي ماشفتي منزل راسه عنج الولد ميت على شعفتج ويشوفهه

_لا خاف صارت زحمه من نزل راسه 

_منو يكول

_هيج سوالف كبار مو يمج

_ديله شعدهه ام سوالف الكبار 

_تزقنبي وسكتي تره دوختيني

_افتهمنه مو صوجج صوجي انه اكول خطيه خلي اونسهه

_مشكوره وماتقصرين

_نننن..

هزيت راسي وضحكت عليهه كعدنه ناكل وصارت حركه بالبيت عرفتهن خلصن وكامن يغسلن كلت هسه يجيبن الماعين للمطبخ يلمنهن اشو كملنه

عشانه وغسلنه واجي الكاهن كلمن متكتره على جهه شي تسولف وشي لازمه نقالاتهن والاكل بالوسطه تلعب بي الجهال فد غثني ووصلت كلمه

شكبرهه بطرف لساني وسديت حلكي هزينه بادينه انه وشموخ وكعدنه نلم بالاكل الوصخ على جهه والاكل النظيف على جهه شلنه الماعين والسفره

واجت نوره رشت ماي ومعطر بالكاع وصارت تشفط وكلساع اسمع واحد من الجهال مركوع على راسه وهيه تصيح شيلن جهالجن لا انتحر بيهم ضحكت شموخ وكالت..

_والعباس هاي اختج مخبله الله يعين سلام لو صارت نصيبه 

_هههه لو تدرين مساع شصار من موقف وياهم

_شصار ولج بله سولفي

_جانت نوره كاعده تدردم على نسوان عمامي ودخل هوه منزل راسه من شافهه بلا حجاب وهيه اكلته اكل بالحجي طلعت وهيه تدردم عليه وهو خطيه انحرج وضل يهز بيده بس تدرين شكال تالي

_اي

_كال هاي اختج ماتاخذ من هدوئج شويه كتله هيه بس لسان وماعدهه كلب يحزن ويكتئب تبقى مفرفشه جان يجر حسره و يكلي هوه هذا المحليهه

_لا بربج

_اي والله شكله سرح الولد حتى انه من صدمتي جفصت وكتله شنو قصدك وهوه انحرج كال هاا مو عليهه وشرد خطيه 

_هههه سلام يستحي تره نفس محمد يموتون ولا واحد يلزملهم هيج لزمه ويسالهم عن البكلبهم

_اويلي جا انه شايفه الخجول يحب وحده مثله اشو اخوج سرسح على ام لسان 

_احسن جا اذا هوه خجول وهيه خجوله يصير ملل هسه شوفي محمد مع ان خجول بس عبير جريئه وماكلته بكلامهه واسلوبهه ماتشوفين يموت عليهه

_هههه اي الله ياخيه كل جريء ياخذ خجوله وكل خجول ياخذ جريئه وتمشي الحياة

_وانتي ومحمد منو الخجول بيكم

_احنه وسط لا خجولين كلش ولا جريئين كلش كلشي بوقته المناسب

_اي اشوه ماكو مجال للملل بيناتكم

_ايييه ياخيه اييه 

_هاا كمنه نجر حسرات جنانو

_اي والله عذبني هل محمد عبالك كاعد يطلع حيف سنينه الحبني بيهه وركض وراي يريد يخليني اعيش نفس العاشه لمن حبني وانجبر يبتعد عني

_تره الحل بيدج بس انتي من التفكير صرتي ماتعرفين الوراج من كدامج

_شلون يعني شموخ انه لو بيدي الحل جان ماشفتي حالتي هسه وفوكاتهه موقف اليوم دمر كلشي 

_لا تبالغين واخذيهه ببساطه سهليهه تسهل صعبيهه تصعب

_شلون انطيني حل اذا عندج تره حاليا عقلي مقفل انه

_لا تضيعينه من ايدج جنان الحلو والزين مايبقى العمر كله منتظرج والف وحده تتمناه وتكدر تاخذه من عندج 

_ليش انه مضيعته مو هل ليل نهار افكر بي واشتاقله

_مو بس كلام خلي عندج رده فعل يعني استغلي ارتباطكم والعقد الشرعي يلي بيناتكم وفهمي ان هوه ملكج ومو مسموح وحده تاخذه غيرج 

_وشلون اسوي هيج

_لا تصيرين غشيمه يعني افرضي سيطرتج بصفتج خطيبته لان هيج الزلم يعجبهم لمن البنيه اليحبونهه تظهر غيرتهه وسيطرتهه عليه وتمسكهه

بي يحس نفسه عزيز وشخص محبوب على كلبهه لدرجه انهه ماتتحمل تشوفه ويه غيرهه وتحارب كل وحده تتقرب منه بشراسه

_هيج رايج

_طاوعيني وماراح تندمين

_انشاءالله وره العرس اداوم واحاول اسوي الكلتيلي عليه

_بالتوفيق انشاءلله 

_عمري انتي ويوفقج ويهدي بالج عل تحبينه..

بهتت ابتسامتهه واخذتلهه صفنه لمن كتلهه هيج جرت حسره بقهر وشغلت بالهه بالماعين هزيت راسي بحيره وكلت بس احنه هيج لو كلهه الناس

تمر بهل مراحل والتعب ويضطرون يسوون شي مايردونه ويضحون بأمانيهم وسعادتهم بسبيل ان يحافظون على عوائلهم ..

_ اريد انام هنا بعيد عن الوحوش وهوسه جهالهن فرجاءا بس هل ليله لا تجيبن مواضيع الكبار وخلني انام بسلام

_نامي منو لازمج هسه اليسمعج يكول الله اعلم بيا مواضيع نحجي

_العفو قصدي سوالف حياتجن وحبياتجن

_دنامي يله وعوفي النقال لا تكعدين الصبح وجهج متكع حبوب من السهر

_لا يولي خلي اشمره بس الليله وباجر ارجعله حبيبي يااا صدك 

_شكو 

_خرب شكلي نسيت ماكملت القصه واليوم نزل البارت الاخير خل اكوم اقره البارت وانام من وره هل هوسه حتى نسيته

_صجيجه كون على كوله امي

_صجتج كولي امين

_ايا ادبسزز

_ههه سوري 

_امداج..

عيبت بلسانهه ورجعت عيني على شموخ واشوفهه رايحه بسابع نومه خطيه هواي تعبت اليوم ووراهه تعب همين باجر بحسب انهه اخت العريس ابتلت

كلشي عليهه والبقيه جايين خطار محد تمد ايدهه على سلعه .. عدلت نومتي وطفيت ضوه التيبلام غطيت راسي ونمت للصبح .. كعدت على هرجه

النسوان بره وصوت الجهال والبنات كلمن تصيح وين المشط ووين ملابسي فتحت عيوني كوه واشوف شموخ كاعد تمشط لريانه والساعه ب ١١ ونص 

حيل شكد نايمه هاي انه صبحت عليهه وكمت للحمام غسلت وتوضيت وطلعت اكلب بنقالي لحدما اذن كمنه صلينه انه وياهه وطلعنه بره وكلهه

ملتهيه تمكيج وتبدل وتركص بنفس الوقت ومشغلين الدي جي على اغنيه جويسم ابو الغيره .. رحنه يم خالتي وهيه تصب بالغده وتحضر اخذت

عنهه صب التمن والحشو وهيه راحت تصب بالمركه وشموخ فرشت السفره ومن ايد لايد كملنه صب وكعدوا تغدوا وكملوا وكمنه شي تجهز نفسهه

وشي تنظف خليت شموخ تروح تمكيج ووكفت انه ونوره نغسل ماعين وطبعا سحل ياله اجت وياي انه اغسل وهيه تشطف وترتب بالكاونتر وخلصنه

بسرعه لان بس بلامه وكوس وخواشيك .. شطفنه المطبخ ورحنه لغرفه شموخ ب ١ الضهر كعدنه نمكيج وكل شوي نوره دافعتني عن المرايه وتصخم بهل

عيون اخر شي طكت روحي منهه اخذت جنطتي مالت المكياج ورحت لغرفه خالتي سماء ووكفت عل ميز امكيج براحتي كملت وطلعت فستاني من

الجنطه مالته اجيت اقفل الباب حتى ابدل وانفتح علي وصار مرتضى بوجهي لزمت كلبي خايفه وصار

الخفت منه دخل وقفل الباب بقت اطرافي ترجف وكوه طلع من لساني وحجيت وانه متصنعه العصبيه..

_خير شكو شعدك دخلت للغرفه اطلع بره مرتضى المن قفلت الباب وشتريد...