رواية جثة داخل الدولاب الفصل الثالث بقلم محمود الأمين
الشقة جوه كانت عبارة عن مزبلة، حاجات كتير مرمية في الأرض، ومش أي حاجات يا حقن مكس ومواد مخدرة.. بس كان في ريحة عفن كانت جاية من جوه، ريحة مش طبيعية أبدًا.. هي آه، الكتمة تعمل ريحة وحشة، والزبالة اللي هو عايش فيها دي تخلي الدنيا مكمكمة، ولكن الريحة دي ريحة صعبة جاية من جوه.
مشيت ناحية مصدر الريحة، اللي كانت بتزيد كل ما بنقرب من الأوضة اللي جوه... الأوضة المقفولة.
وأول ما فتحناها، لقينا في جثة متعفنة جوه.. الريحة كانت بشعة، مكنتش عارف أتحملها، بس واضح إن الجثة دي تبقى جثة ست.
طلعت بره، والجيران كانت واقفة، وسألتهم:
_ مين صاحب الشقة دي؟!
رد عليا واحد من الناس اللي واقفة وقال:
= اللي ساكن فيها واحد مسجل ولسه خارج من السجن قريب، اسمه شحته، وكان معاه مراته اللي كانت ساكنة فيها طول ما شحته في السجن ولحد ما خرج.
_ مراته مقتولة جوه.. ألاقيه فين اللي اسمه شحته ده؟!
= لا يا باشا، ده محدش يعرف طريقه، ملوش مكان بيقعد فيه.
....
بعد نص ساعة، كان الشارع اتقلب شرطة وطب شرعي ومعمل جنائي، واتحط الشريط الأصفر التحذيري عشان محدش يقرب، وبدأ فحص الجثة ومسرح الجريمة، لحد ما وصل وكيل النيابة، اللي اطلع على الجثة اللي كانت في الأوضة، ورجع وقف معايا وأنا ببص على الكاب اللي متعلق، واتكلم وقال:
_ مش ده الكاب اللي كان لابسه المجرم في الفيديو؟!
= بالضبط يا فندم، هو.. اسمه شحته، مسجل بلطجة، وكان محبوس وخرج قريب من السجن.. والجثة اللي جوه دي تقريبًا هي جثة مراته، وده على حسب شهادة الجيران. واضح إنه إنسان مش طبيعي، مجنون أو عنده مرض نفسي.
_ مش مهم كل ده.. المهم نعرف هو قتل ملك ليه؟!
= مش جايز يا فندم يكون شاف الحلق الدهب والسلسلة، وعشان كده خطفها وقتلها؟!
_ الكلام ده لو كنا لقينا الجثة في الشارع في طريق مهجور، لكن الصدفة تخليه يقتلها في نفس البيت اللي كان مأجره والدها، لا، بعيدة.. دي في حد طلب من الواد ده يعمل كده.
= طيب، إحنا هنعمل إيه دلوقتي يا فندم؟!
_ هو مش كان في السجن؟ هنجيب كل المعلومات عنه من مصلحة السجون، وصورته، وهنوزعها على جميع الأكمنة والأقسام.. الواد ده لازم يتجاب في أقرب وقت.
= تمام يا فندم، أنا تحت أمرك، هننفذ كل ده.
...
بعد شوية، نادى علينا دكتور الطب الشرعي واتكلم وقال:
_ أنا خلصت الفحص المبدئي... السبب الظاهري للوفاة كسور في الجمجمة ونزيف حاد بالدماغ.. وده بعد ما استخدم الجاني أداة حادة وهشم بيها راس المجني عليها. دي مش ضربة واحدة، ده ضربها كذا ضربة.
= لا حول ولا قوة إلا بالله.. مش قولت لسيادتك ده مش إنسان طبيعي أبدًا؟
_ فعلًا، واضح إنه شخص مجنون.
....
خلصت كلام مع دكتور الطب الشرعي أنا ووكيل النيابة، واتنقلت جثة مرات شحته على المشرحة... واترفعت البصمات، واتجمعت الأحراز.
وجبنا كل المعلومات اللي تخص شحته من مصلحة السجون.. اسمه شحته ناصر علي.
كان مسجون في سرقة بالإكراه وإحداث عاهة مستديمة لشخص، وقدرنا نجيب صورته، وتوزعت على جميع الأكمنة والأقسام.
وبعدها بدأت النيابة في التحقيق مع المشتبه فيهم عشان نعرف مين اللي عمل كده، ولكن الموضوع مكنش سهل.
******
استدعينا كل المشتبه فيهم للنيابة عشان نبدأ التحقيقات.. والبداية كانت مع عايدة، مرات عادل، اللي يبقى أخو الأستاذ وجيه، والد الطفلة.
_ مدام عايدة.. إحنا عارفين إن في خلافات ما بينك وما بين مدام صفاء، والدة ملك.
= خلافات إيه يا باشا؟!.. دي مشاكل عادية بتحصل ما بين القرايب، وأنا كنت بعتبر ملك بنتي اللي أنا ما خلفتهاش، ومستحيل أفكر آذيها.
_ أيوه، بس إنتِ في مشكلة من المشاكل، طلع منك كلام بيبين إنك غيرانة منها، زي: هي تخلف وأنا لا؟ ليه هي أحسن مني في إيه؟ وده بيبين إن العلاقات ما بينكم ما كانتش أحسن حاجة.
= ده كلام في لحظة عصبية.. بس والله أنا ما أعرف حاجة عن موضوع ملك ده.
_ طيب، ممكن أعرف يوم 27 من الشهر اللي فات، اليوم اللي اختفت فيه ملك، كنتي فين؟!
= كنت عند بيت أهلي يا باشا، وتقدر حضرتك تتأكد بنفسك، ده أنا حتى اتفاجئت بالموضوع لما رجعت وكنت بدور معاهم.
_ ماشي يا مدام عايدة، بعد إذنك انتظري بره شوية.
...
وبدأت التحقيق مع عادل، جوزها، واللي كان باين عليه إنه ضعيف الشخصية.
_ أستاذ عادل، ممكن أعرف حجم الخلافات ما بينك وما بين أخوك وجيه؟!.. يعني الخلافات وصلت لحد فين؟!
= كلها خناقات عادية يا باشا... أصلي أنا ووجيه خريجين تجارة زي بعض، بس هو جاي بتقدير أعلى وقدر يتعين في البنك، وأنا كنت بطلب منه يشوف واسطة تعينني، بس معرفش هو كان مش عاوز يعينني عشان مبقاش زيه.
_ مراتك طبعًا هي اللي فهمتك كده، صح؟ هي اللي فهمتك إن أخوك في إيده يعينك، ولكن هو اللي مش عاوز.
= بصراحة أيوه يا باشا، وعندها حق.. هو عنده علاقات كتير، إيه المشكلة إنه يعين أخوه في البنك، بدل ما أنا شغال في فندق في القاهرة وباخد مرتب يا دوب مكفيني أنا ومراتي.
_ طيب، ويوم 27 اللي فات، يوم اختفاء البنت، كنت فين؟!
= كنت في الشغل يا باشا، وتقدر حضرتك تتأكد منهم بنفسك.
_ طيب يا أستاذ عادل، انتظرني بره شوية.
....
واضح من كلام الاتنين إنهم كانوا حاقدين على وجيه ومراته.. وعايدة دي شيطان عايش في صورة بني آدم، وقدرت تفتن الإخوات على بعض، ولكن مفيش دليل يقول إن هي اللي ورا قتل البنت.
وفي الوقت ده، وصل النيابة عزت عبد العال، واحد من المشتبه فيهم، واللي فيه بينه وبين الأستاذ وجيه مشاكل بسبب موضوع القرض.. وبدأت التحقيق معاه.
_ أستاذ عزت، حضرتك أكتر واحد عندك دافع للانتقام من الأستاذ وجيه.. اللي رفض إنه يديك القرض اللي كنت هتعالج بيه بنتك.
= أنا شايف إن اللي حصل ده انتقام إلهي.. أنا ماليش دعوة بقتل بنته. جايز أنا روحت البنك وكنت عاوز أقتله في اليوم اللي سمعت فيه خبر موت بنتي، يومها آه، ما كنتش شايف قدامي وروحت البنك وكنت هقتله، بس والله العظيم ما ليا دعوة باللي حصل في بنته.. وبعدين مشكلتي معاه هو، مش مع بنته، يعني لو عاوز أنتقم هنتقم منه هو.
_ طب ما جايز حضرتك تكون قررت تحسره على بنته زي ما حسرك على بنتك؟
= اللي حصل ده قدر.. وأنا بنتي عند اللي خلقها دلوقتي.
_ طيب يوم 27 من الشهر اللي فات.. تفتكر إنت كنت فين؟!
= الكذب خيبة يا باشا، وربنا ما فاكر.. بس أنا طول الفترة اللي فاتت كنت حابس نفسي ومبخرجش من البيت.. فأكيد كنت في البيت.
_ طيب يا أستاذ عزت، ممكن تستنى بره شوية.
.....
في الوقت ده، وصلني تليفون من المباحث.. وأول ما فتحت لقيت رئيس المباحث بيقول:
خلاص يا باشا، عرفنا مين اللي عمل كده وطلب من شحته يقتل ملك.. وأنا براجع المعلومات والورق اللي حصلنا عليه من مصلحة السجون، لقينا واحد من المشتبه فيهم زار شحته وهو في الحبس، وأظن إن الموضوع ده مش صدفة، وأنا بعت لحضرتك كشف الزيارات على الواتساب عشان تشوف بنفسك.
قفلت مع رئيس المباحث، وفتحت الواتساب عشان أشوف مين الشخص ده.
وأول ما شوفت الاسم، اتصدمت..
عشان الشخص ده يبقى...
