رواية لماذا انا الفصل الثالث 3 بقلم عبير السراي

كعدتني رهف ... وج ايوو الحكي اهل الولد الدعمج اجوي وكاعدين يم ابويه

اية: شنو.. شجابهم.. كمت مفزوعة لكيت عمتي تتنصت

على باب الاستقبال وتفرك باديهة

وكفت مرعوبة شراح يصير يربي ..

مرت اكثر من ساعة وهمة جوة واني كاعدة على نار .. سديت باب الغرفة وتمددت وغطيت راسي ..

كلت بلكي اصحى من هالكابوس .. غمضت عيني ... واني ادعي والدموع تجري ياااارب استر عليه بسترك ...ياارب اني ممسوية شي غلط ..

ورى ساعتين تقريبا طلعوا .. اني سويت نفسي نايمه حتى محد يحجي وياي.. محد

يسالني ..اجتي عمتي وكعدتني:

كومي عمج يريدج..

اية : يمه فدووة شيريد مني ..

عمتي : لا تخافين ماكو شي .. اجو اعتذروا من عمج على الحادث .. وكالوا اي تكاليف علاج او شي احنه جاهزين ..

اية : اي .. وعمو صدك ..

عمتي :؛ ليش ميصدك.. دروحي لعمج يريدج يحجي وياج ..

اية : حاضر كايمه .

دخلت لعمو ..الله يساعدك عمي..

العم: هلا بيج بوية .. تعالي اكعدي .. اي سولفيلي شصار ...

اني هنا من التوتر جسمي كام.يرجف اريد اسيطر على روحي ..متت من الخوف .. يربي شحجي ..

اية : عمو مثل مكتلك انضربت .. واخذوني للمستشفى .. وكذا

العم: يعني بوية محد سوالج شي ..

اتفاجأت : مثل شنو عمو ..

العم :: اي شي بوية محد تجاوز عليج او قل ادبه كولي لا تخافين ..

لا عمو سلامتك مثل مكتلك ..

العم :: على راحتج بويه هسة شتحسين ..

بداخلي اكول .: (ميته) ّ... زينه عمو .. بس اريد انام ...

هذا هو روحي ارتاحي بوية ...

مر يوم ..والثاني.. والثالث واسبوع ...

الدوام تركته .. حتى الصلاة تركتهة حسيت نفسي ضايعه ..مااريد الاكل مااريد احجي ويه احد ... لو نايمه بفراشي لو كاعدة بنفس المكان واباوع من الشباك .. شكد حاولوا يغيرون من نفسيتي لكن جنت احس روحي

ميته من الداخل ...

الدموع نشفت من عيوني ... اريد ابجي بس ماكو دمع ... ..

تكائبت .. .. حسيت نفسي بعالم ثاني مبي ناس اني

وحدي .

حسيت فعلا اني يتيمه اريد امي .. الاشكيلها وتسمعني .. اريد ابوية اليحميني .

..وبيوم دخلت الحمام كلت ماكو غير اموت روحي واخلص من هالعذاب جبت موس حلاقة وحاولت اقطع شرياني واخلص من هالعذاب لكن...من خليت الموس على ايدي ..

انهاريت من البجي يااااربي شديصير بيه .

. مستحيل امووت كافرة .. يارب صبرني .. هذا ابتلاء منك .. يارب صبرني وقويني .....

⚘⚘⚘

ورى كم يوم اجتني عمتي.. .

حضري روحج راح يجون يخطبونج اليوم .. كانما سجينه وضربتني بصدري ..محجيت شي ...

اية احجي وياج .. كومي حضري روحج ..

اية:: يعني انتي جاية تبشريني .. ؟؟

العمة :: وليش ماابشرج .. لعد احسن تصير فضيحة والي ميشتري يتفرج علينه .. ارضي بالمقسوم .. ووكلي امرج

لرب العالمين ..

..اني اكتفيت بالسكوت ... عافتني وراحت ..

صرت انسانة بلا مشاعر .. الكلمه التفرح بيها كل بنت من يكولون اجوج خطابه اني هاي الكلمه تذبحني ..

بس مابيدي شي ... غير استسلم للامر الواقع ...

ضليت وحدي لحد المغرب اجت عمتي جايبه ملابس جديدة واجتني وكومتني

:: يله يمه كومي اغسلي .. والبسي هذا البس راح يجون

العالم بعد شوية ..

جريته من ايده وطلعت وصلت للباب وصاحتلي ... تعالي اكعدي يمي ...

:: وصلت يمهة ..... حضنتني وكامت تبجي... اني هم

ملزمت روحي كمت ابجي وياهة ..

لان جنت مشتاقة لحنانه مشتاقه لحضنهة ادري بيهة تحبني ولو جانت امي عايشة متحبني مثلهة .. لكن اكيد جانت مضغوطة وخايفة لهذا تصرفت هيج وياي ...

كعدت تمسح بدموعي .. وكالت اني ادري بيج مظلومه .. وضحية لكن مابيدي شي اسوي غير هالحل .. عمج اذا

عرف لو شك بالموضوع يروح بيها انتي ترضين هيج

تاليته ..

اية:: لا اسم الله عليه بيه ولا بي

:العمة :: لعد يايمه هذا هوة ..ارضي بالمقسوم لخاطر عمج الرباج ومافديوم قصر وياج ..

اية:: واني ابجي.. يمه والله مااكدر . الله يخليج . ترضينه الي.. بعد السواه هالقذر اصير اله .. ادفن روحي ولا اسويهة ..

العمة :: لا تدفنين روحج ولا شي ..يمه الله انطانه نعمة النسيان .. .. باجر عقبة تصير كولهة سوالف يايمه ...

اية:: مستحيل ..مستحيل بيوم انسى الصار ...

العمة :: الله كريم . ربج متدرين شضاملنه . وعسى ان

تكرهوا شيئا وهو خيرا لكم ..

هسة كومي حضري روحج لان الناس من البارحه خابرو على عمج كالو ورى صلاة المغرب جايينكم ...

اية:: وليكون لازم اطلعلهم ..

العمة :: لا يمه وين تطلعين .. كلهة زلم .. بس اكيد يجن وياهم نسوان يطبن هنا قابل تطلعيلهم هيج .. مااريد احد يشك بشي يابعد عمري انتي فدوة اروح الهالوجه الحلو ... ترى همة محد يدري بس امهم ومرت ابنهم الجبير يعني لا تخافين ..

اية:: الله كريم .. ..

دخلت للحمام .. ولبست النفنوف الجابته عمتي بس حتى مباوعت على روحي بالمراية .اجتي مرت عمي (سمية )هم كولش حبابة وتحبني كعدت تعدلني لفتلي الشال ..رادت تخليلي مكياج بس اني مقبلت وكووه خلتلي. حمرة وردي فاتح لان وجهي صار باهت كوولش وشفايفي بيض لان مااكل ..بس بجي وانقهر .. ورى شوي دخلوا الزلم وعمتي ومرت عمي اتلكن النسوان ودخلنهن جوة اني بهالاثناء بالمطبخ ... مقبلت اطلع ويه عمة .. جنت متوترة ومرعوبة .. لان كلت اكيد هذا الحيوان جاي وياهم .. جانن بنات عمي (رهف~سالي) يباوعن عليهم من الشباك من فوك ... حتى يشوفن عشتوا العريس ...

اجني يركضن ... وج ايوو الحكي ..

اية:: ها شكو ...

رهف.::وج العريس صاك يجنن ...عزة .. عضلات وحركات

وج بس اللحية فدددشي خرافي ...

اية:: من الله ياخذة..

رهف :: وج ليش هيج ... يربي كون يدعمني هيج واحد عسمى يكسر عظامي قابله والله ... ههههه وج شبيج معبسة اكو وحدة خطابتهة برى ومعبسة مثلج ..

اية:: اسم الله عليج .. عاب حلكج شبيج انتي تحجين صدك ... شسوي اني بخلقته من عساه بالحرك .. وثانيا شمدريج هو نفسه العريس يجوز اخو يجوز ابن عمه

سالي :: حبي مو هو اصغر واحد بيهم فاكيد هو العريس . وثانيا بعد شويه نتاكد هو لو مو هو . بس تدرين سوة شي غريب ..

اية:: شنو... شسوة ...

سالي :: بالبداية مقبل يدخل .. دخلوا الزلم كلهم وضل هوة برى رجع عليه ولد اكبر منه تقريبا .. ضلوا يحجون شوية بعدين دفعه كوة ودخلواا. ... يجوز جان يستحي يدخل . لو راد يشرد ههههه . لهذا فاكيد هو العريس ..هههه هاا شلوني

اية :: بطرانة ...

دخلت مرت عمي ...

سمية :: ولجن كاعدات تسولفن بدال متحضرن العصاير وتحضرن الحلويات شكول عليجن ..

رهف..انتي حضري المشروبات وخلي اية توديهة للنسوان ..

اية :: لا ..لا لا لا ..مااطلع ..

سميه :: ياا وج شنو متطلعين لعد من يوديلهن العصاير ..

اية:: معليه خايفه ... مااوديهن ...

سميه ::خوش اصيح عمتج وهي تصرف ..

اية : لا يمعودة .. امري لله .. بس انتي تدخلين ويايه

مو وحدي

:: تدللين ياعروستنه الحلوة ..

بس خلي نقدم للزلم بالاول .. وراهة ندخللهن اني وياج ...

اية:: شلت الصينية .. وهي تتخضخض بيدي مااسيطر

عليهة اديه ترجف ... كوة وصلت دخلت بس متوترة وخايفه ..

اية:: السلام عليكم ...

وعليكم السلام ... يمه هلا .. تفضلي ..

ام عمار :: هلا بعروستنه الحلوة ... باستني ..نظرتلي نظرة .. حسيتهة تكولي لا تخافين اني وياج معايفتج ..

ابتسمت بوجهه ..

اني مجنت ادري انو همة خاطبيني قبل اربع ايام وعمتي انطتهم موافقتي . وعمي سائل عليهم . واجو حتى يقرون الفاتحه .. تفاجات .. حسيت نفسي مثل الاطرش بالزفة ..

ورة نص ساعه من السوالف بينهن .. عمي صاح على عمتي وكعد يحجي وياهة .. صاحتلي وهي متلبكه رحت عليهة

هاا يمه شكو...

العمة بتردد :: عمج يكول لازم تكعدين ويه الولد يشوفج وتشوفينه (النظرة الشرعية) حتى اذا صارت الموافقة يقرون الفاتحة ...

اية :: شنوو .. والنبي احرك روحي ومااكعد ويااه تحجين صدك يمه .... والنبي اخربهة ومااكعد وياه دقيقة ... سدت حلكي وجرتني للغرفة .

.

:: وج استرينه .. .وج تردين تفضحينه بعد ماكلشي تم

وبستر تردين تخربين .. وج اذا خربت الخطبة ترى انتي تصيرين جوة الرجلين لا عم يفيد ولا خال .. وج الولد

لو ما حس بغلطته مااجاج ويريدج بالحلال ويريد يستر عليج ..

::: يستر عليه خلي يستر روحه بالاول..

مااطلعله وشيصير خلي يصير ...

وجان تضربني كف ..سطرتني سطر .. ضليت لازمه خدي واباوع عليهة مصدومه ...

اول مرى تمد ايدهة عليه...

سكتت وهي هم سكتت ..

كالت عمج راح يدخل الولد وتكعدين يمه لا تحجين ولا تكولين والولد هم مراح يحجي وياج ... بس نسكت عمج ... فهمتي ...

اية (بآنكسار):: فهمت ..

دكت عمتي الباب على عمي حتى يجيبه ويجي ..

اني مكدرت الزم دموعي ..ركضت للمطبخ.. تلكني بنات عمي .. هاا بشري ... من شافني ابجي سكتن ..

بس ضلن يباوعن بالختله كالن هذا بابا هو والعريس دخلو للغرفة

سالي:: مو كتلج هذا العريس ... يعني تخميني صحيح ..

اجتي عمتي وامه (ام عمار) حتى يدخلني للغرفة .. توسلت بامه .:: الله يخليج خالة والله مااكدر اروح

. لزمتني وسحبتني على صفحة...

ام عمار:: باعي بنيتي .لا تبجين .. وميحتاج للخوف هذا كوله تدخلين تكعدين بعيدة عنه حتى مو يمه ولا حتى تباوعين عليه .. واني وعمتج وياج منعوفج .. لا تخافين ..

وكامت تمسح بدموعي .. سحبتني ورحنه وصلت لباب الغرفة وقفت كلتلي لا تخافين اني وياج . ضليت مترددة احس دمي نشف .. دخلت للغرفة ..

عمي صاحلي تعالي بنيتي ..اجتي عيني عليه كاعد بس مدنك راسه .. واني محبيت اشوفه اساسا....

عمي جاب كرسي وخلاه مقابيله ...وكلي تعالي اكعدي

بابا...

مقبلت ... هزيت براسي بمعنى لا...

اجه لزمني من ايدي وجرني وكعدني على الكرسي ...

العم:: بابا لا تستحين لازم تشوفينه ويشوفج اهم شي قبول الشكل اولا .. هذا زواج مو لعبة بنيتي ... صح وليدي علي..

علي .:: اي اكيد ....

اية:: سمعت صوته وحسيت جسمي كام ينتفض اريد اشرد اريد اصرخ .. بيني وبينه متر تقريبا .. بس مرفعت عيني وشفته .. لان كلمه كره قليله بحق مشاعري تجاهة ...

العم ،:: ابني علي ...ارفع راسك وشوف البنية يجوز متعجبك ...

علي :: لا عمي... شفتهة .. هذا هو موافق ...

العم:: هاا بنيتي ..

اية :: اشرت براسي بمعنى ايي ...

طلعوا .. واني ضليت متبسمرة بمكاني ... اجتني عمتي .. هاا يمه..

اية ::هااا..شنو متنظرة موافقتي ... .

ام عمار كامت تهلهل ... دخل عمو كال هااا بويه يعني موافقه ..

عمتي:: ايي خوية موافقة..

عمي:: لا اريد اسمعهة منها ... ايوو بابا.. موافقه ..

هزيت راسي بمعنى موافقه ..

كال بيهة البركة ان شاء الله ..

.

كامن يهلهلن .. واني احس هلاهلهن سجاجين تزرف بقلبي ... يربي تعبت ارريد بس ارتاح ...

قروا الفاتحه وحددو موعد الخطبة الرسمية والعقد بعد

3 ايام ... .

البيت كله مخبوص على الخطبة والبنات يجهزن واني احس الدنيا طالعه من عيني ... حتى للصالون والبدلات مقبلت اروح ... عمتي كملت كولشي وحدها ...

مرت 3ايام ... واجه يوم العقد ... مقبلت اروح للصالون .. بس عمه بعد محاضرة ورزالة اخذتني ورحنه.كملنا كولشي مكياج وتسريحه بس طلبت من ام الصالون اريد شي خفيف وهادئ مااريد هوسة .. وجان مكياجي كلش خفيف ..والبدلةلونها ماروني كولش حلوة .

ورجعنا للبيت تقريبا ساعتين واجوي .الخطابة... وناس

كولش هواي جايين .

كعدن. النسوان واني حتى راسي مرفعته ... ولا باوعت على وحدة ... اجتي مها زوجه عمار باوستني .. سلمت عليه

اني هم ارتاحيت من شفتهة لان تدري بالقصة فميحتاج

امثل كدامها.

مها:: ماشاء الله طالعة تجننين ...

دنكت راسي وذبيت حسرة ... والدمعة وكفت بطرف

عيني ...

مها(بهمس):: صيري سباعية. لا تبينين انج مكسورة ..

ابتسمت .. واجني خواته سلمن عليه .. وباوسني حاولت

اكون طبيعية واتبسم كوة عليه .. لحد مااجتي عمتي كالت كومي .جوة حتى الشيخ يعقد الكم... حسيت بغصة

بصدري .. بس مجبورة اتضاهر اني طبيعية دخلت للغرفة .. ودقايق .دخل السيد ووياه عمي ...

اني مغطاية حتى وجهي مغطيته بحيث كولشي ممبين مني .. بس سمعت عمي يكول يله وليدي اكعد...

حسيته كعد يمي ... اني تلبكت .. ضليت افرك بأديه متوترة ماادري شسوي ... واني احسة قريب مني ..... بدأ السيد يقرأ .. بس اني ممنتبه عليه شنو يحجي .. لحد ماعمو لزمني من جتفي كلي ..

:: بابا كولي .. نعم وانته وكيلي..

:: هاا ... ن..نعم .. واانته وكيلي ...

ورددت ورى ..بعدين كام يسأله ... ويجاوبه ..اني من اسمع صوته قلبي ينقبض احس روحي تريد تطلع

..كمل االشيخ... بدت الهلاهل .. والجوكليت طلع الشيخ

وخرن عني الطرحه والبرنص المغطي جتافي وكشفني .. ماادري بي بعده كاعد .. شفته .. راسا رجعت البرنص

اجتي اخته...:: حبيبتي صار رجلج حلالج بعد منين مستحية.ونزعتني

التمن النسوان يمنه.. بالغرفة العقدنه بيهة .. طلعت اخته الذهب الجايبينه .. تخم كامل .. .. بدت تلبسني بالذهب .. وصلت للحلقات .. كالت كلمن يلبس الثاني الحلقة .

. اني رفضت مقبلت البسه ولا اريدة يلبسني

..اخته. انطتنياهة مقبلت .. عمتي تهمس بأذني

::.. وج فضيها لا تسوين هيج ...

:: كولتلهة مااريد ...

تدخلت مرت اخو مها .. كالت

:: شو .. دجيبوا الحلقات ..هااج اية حلقتج البسيهة

..وهاك علي انته البس حلقتك وفضوها ... وكامت تضحك ...

تحول الموقف الضحك.. بس المهم اني ماالبسه ..

.وراهة هو كام ... صاحن عليه البنات بقة العصير والكيك .. مقبل كللهن عل حنه ...

.

.واني بقلبي:: الله لا يشوفك هذا اليوم . الله لو ياخذ عمرك

لو عمري ...

راحت الناس وفرغ البيت ..،

رحت لغرفتي .. نزعت البدلة .. ونزعت الذهب .. والحلقة ضليت اباوع عليهن وابجي .. هاي الحلقة الي كل بنت

تتمناها ما اريدها ومااريد الي ربطتني بيه

.. مجرد افكر اني صرت مرته يرعبني ويوترني .. .. دخلت عليه عمتي .. باستني وحضنتني ...

وكالت : لا تخافين يمه مضل شي ونخلص من هالهم ..

اني فرحت عبالي تقصد تفصلني عنه ..

اية :: صدك يمه يعني راح ننفصل ...

العمة :: ياا... وج شتنفصلين .. قصدي راح يسوون العرس .. ونخلص ... تصيرين مرته وترحين يمه ...

اية:: تحجين صدك عمة ... انتي مكيفتلي .. راح اصير يمه ...اني جنت مو مرته وشسوة بيه لو اصير مرته وحلالة وينسد علينه باب شيسوي بيه ..

هاا.. كولي .. شراح يسوي بيه ...

العمة.:: اسمعيني يمه... امه تحلف وتتكفر تكول هاي اول مرى يشرب وجان مو بوعيه .. اصدقاءة ضغطوا عليه

.. وصار الي صار. ..

اية:: هاا صدك تحجي .. شوف واني ظلمته .. خطية

تصدكين كسرتي قلبي عليه ...

يمه شتكولين انتي؟؟؟...انتي مفتهمة هذا الحيوان

شسوة بيه يمه هذا اغتصبني . تعرفين شنو اغتصبني ..هذااا. المكيفة بي.. وتردين اصير مرته .. اني جنت مو مرته وهيج سوة بيه من اصير مرته شيسوي بيه .. هاا .. جاوبيني ..

ضلت تباوع بوجهي ..حسيت ماعدهة جوااب .. سكتت .. هي هم بعد محجت .. بعدين كامت ووصلت للباب ...

العمة:: احسبي حسابج باجر الصبح نروح للسوق نبدي نجهزج ... لان الناس مستعجلين ... وطلعت

.

... اني متت .. لزمت المخدة وخليتهة على حلكي وكمت اصرخ بكل قوتي ...

لحد ماحسيت طلعت كل الغضب البكلبي..

اجني بنات عمي .. ومرت عمي رادن يراوني التصوير مال خطبة .. اني محبيت اشوفهن .. ولا باوعت ..

مرت عمي (سميه) :: بس صدك خطيبج يخبل ماشاء الله طول بعرض وسييييمم .. ..ربي يهنيكم سوة ..

ابتسمت بوجهة ..

)سمية) ::حبيبتي ليش احسج.مفرحانه

اية :: لا ليش مفرحانه .. عادي اصلا ...

(سمية) ::موو لان دتصرفين عادي اني متعجبه .. صايرة باردة .. وساكته .. وين ضحكتج الجانت راجه البيت ليش هيج من يوم الحادث وانتي على هالحال ...

اية :: لا عمة ماكو شي سلامتج بس صدكي تعبانه وجسمي يوجعني والعلاجة الاشربه بي منوم فأحس روحي خامله ...

(سميه) الله يشافيج حبيبتي .. بس شدي حيلج احتمال لو هذا الاسبوع لو الوراه العرس .

.

::: ليش؟؟

(سمية) :: هم اتفقوا ويه عمج .. كلوله الولد كولشي جاهز عندة ..ويردون يزوجونه لان ماخذ اجازة شهر وبعد مينطونه اجازة .. هالفترة ..

هزيت براسي بمعنى موافقة ..

ثاني يوم الصبح اجتي عمتي ام عمار ..حتى نروح للسوق .. رحنه اني وياهة وعمتي ...

قهرتني (ام عمار) .. تحاول ترضيني باي طريقة كل شويه تكولي بس كولي شتردين .. اني اكوللهة كولشي مااريد ...

المهم اشترن هوااي شغلات وملابس للبيت وللطلعه ومكياج ... وصلنه لملابس النوم .. واني عنفصت كلتلهة ماشتري... المن مشتريتهن .. عمتي تخزر بيه.. مدرت بال ...

كلتلهن اذا اشتريناهن احركهن والله ...

ام عمار،::: خية عوفيهة على راحتها

..

.عمتي:: خية شلون غير نكمل الجهاز... الناس من تشوفه شتكول علينه .. .

كامن يتبسبسن بيناتهن.. الفتهمته .. انو ام عمار راح تجيب

كم قطعه وتخليهة ويه الجهاز ..بدون علمي ... سكتت...

رجعنه للبيت .. وعمتي ام عمار .. رجعت ويانه حتى تاخذ المستمسكات كالت باجر نسوي العقد .. وراحت..

بنات عمي يكلبن بالغراض واني حتى مااباوع عليهن ..

. اول مرة اجي من السوق ومشتريه غراض ومفرحانه بيهن ...

بنات عمي فرحن بيهة اكثر مني ...

صار يوم العقد .. ورحنه اني وعمي لكيناهم بالمحكمه .. منتظرينه ..

اول مرة اشوفة .. اول موصلنه صارت عيني بعينه ...

راسا دنكت.. وحسيت جسمي صار نار وبنفس الوقت

خجلانه ومتوترة وخايفة مووت بس المطمني انو عمي

وياي ...

سلمت عليهم ..ووكفت يم عمتي ام عمار ..

.ضل شكله ابالي .. بس حتى محبيت اعترف بيني وبين نفسي كان حلو. ووسيم .. بس هم اكرهة ...

خلصنة عقد.. ورجعنه للبيت .. كان مهربي الوحيد . من هالحياة هو النوم .

خلصنه اجرءات الزواج وتجهيزاته .. ومشت اسبوعين مليانه .. خوف وقلق ... وتفكير .... كان.. كل تفكيري اني راح اتزوج وحش ..راح اشبع ضرب واهانات..اووف ياربي تعبت من التفكير ...

... الى ان اجه يوم العرس ... ..