رواية نهر الحب الفصل الثالث
تدخل مني غرفتها تتجه الي دولابها لتفتحه وتحضر شيئا من ملابسها فتلمح شيئا اخر فتلمع عينيها عند رؤيته فتمد يدها لتخرجه فاذا به صندوق صغير تحمله مني بتردد وتجلس علي السرير وتفتحه وتخرج منه سلسلة من الفضة واخري من الذهب تمسكهم مني بيدها وبعدها ترتسم علي وجهها ابتسامة وتذهب بذاكرتها للوراء
******
مني ترتدي ثياب المدرسة وتدخل الي غرفة ممدوح أخيها لتحاول إيقاظة
مني:ممدوح اصحي بقى كل يوم تأخرني علي المدرسة
ممدوح في كسل: طيب خلاص هصحي كفاية دوشة
مني: لا انا هروح لماما تشوفلها حل معاك انا تعبت
تخرج مني من الغرفة بينما ممدوح يضع المخدة علي راسه ليكمل نومه
مني تنادي علي امها بصوت عالي : يا ماما تعالي شوفي حل ف ابنك ده
انتصار ( ام مني): ايه يا مني مين الي مزعلك يا بنتي
مني : المحروس ابنك البكري نايم ومش عايز يصحي وكل يوم يأخرني علي المدرسة انا مش عارفة هو لازم هو إللي يوصلني المدرسة كل يوم ما كل البنات بتروح المدرسة لوحدها اشمعني انا
انتصار : عيب يا بنتي اتكلمي عن اخوكي الكبير بأدب وبعدين انتي عارفة ابوكي يا مني هو الي حكم بكده خايف عليكي يا بنتي الدنيا مبقتش امان
مني: بس هو كل يوم يأخرني علي المدرسة وياريت بيأخرني لوحدي زمان خالد هيخبط دلوقتي ويلاقي البيه لسه نايم ويتأخر هو كمان
انتصار بخبث: اممم. طب خليكي في حالك انتي وملكيش دعوة هما صحاب مع بعض
مني: هو بابا فين يا ماما
يخرج محمد والد مني وفي يده سبحة
محمد : صباح الخير يا مني مالك يا بنتي مين مزعلك ع الصبح
مني:صباح الخير يا بابا يرضيك ممدوح كل يوم يأخرني ع المدرسة
محمد: لا يا بنتي ميرضنيش انا هتصرف معاه واملصلك ودانه
ممدوح مقاطعا: لا وعلي ايه يا حاج انا صحيت خلاص
مني: طب ممكن تلبس بقي عشان اتاخرنا وصاحبك زمانه هيخبط
ممدوح : طب اهمدي انا بلبس ف دقيقتين مش زيك بقعد بالساعة ادلع ادام المراية
مني: شايف يا بابا بقي انا بدلع ادام لمراية
محمد: خليك مؤدب بدل ما أقوملك
ممدوح : تؤمرني يا حاج
يدق الباب فتذهب مسرعة لتفتحه فتجد خالد. خالد هو صديق ممدوح والجار المقرب لعائلته وأكبر من منى بسنتين، والده متوفي ويعيش مع والدته.
خالد بابتسامة هادئة : صباح الخير يا مني
مني تستند برأسها علي الباب وتتحدث بهيام: صباح النور يا خالد
يتبادلا النظرات لفترة وجيزة ليقطع نظراتهم صوت يفزعهم
ممدوح: دلوقتي مش متأخرين ولا هو التأخير دلوقتي حلو
مني تخبطه في كتفه وتذهب لتحضر حقيبتها ووجها احمر من الخجل . وفي الشارع تسير مني بالقرب منهم ولكن تبعد عنهم بمسافة اما خالد يسير بجانب ممدوح يتحدثان حتي يصلوا لمدرسة مني فتتجه مني الي باب المدرسة لتجد من يوقفها بنداءه
خالد: مني
مني: نعم يا خالد في حاجة
خالد: خدي بالك من نفسك
مني بابتسامة : حاضر
ممدوح في خبث: والنبي حنين الي يشوف كده يقول انك انت اخوها مش انا
خالد: ما انا اكيد بخاف عليها اكتر منك طبعا،عالعموم هانت وتخلص السنة دي بس وننجح ف الثانوية العامة دي وادخل الجامعة وساعتها اجي اخطبها رسمي ادام الناس كلها وبعد ما اتخرج علطول اتجوزها وساعتها هخبيها عن الناس كلها وانت اولهم.
*****
حفلة عيد ميلاد مني يتجمع حولها الكثير من الاصدقاء والاقارب ليحتفلون بها ورغم ما حولها من زحام تبحث بعينها في جميع ارجاء المنزل وكأن شيئا ما ينقصها لتكتمل فرحتها واذا بالابتسامة ترتسم علي وجهها فقد وجدت ما ينقصها وجدت ما يكملها فهي لا تكتمل الا بوجوده بجانبها لقد حضر خالد وتبادلا النظرات فهما مختلفان عن باقي البشر يتحدثان بلغة عيونهم التي لا يفهمها سواهم فكان حديث اعيونهم اقوي وابلغ من حديث شفاهم وفهمت من نظرته انه يريد لقاءها ف البالكونة فاستجابت لنداء عينه وذهبت لهناك لتجده في انتظارها
مني: كنت خايفة متجيش
خالد:ينفع محضرش عيد ميلادي؟ مقدرش
مني: بس دا عيد ميلادي انا
خالد: وعيد ميلادي انا كمان اليوم الي اتولدتي فيه وبقي ليكي وجود انا كمان بقي ليا وجود وحياة
مني : بس انت كنت يا دوب سنتين
خالد: شفتي بقي يعني انا فتحت عيني علي حبك
مني بخجل: اتأخرت ليه
خالد : اتأخرت عشان كنت بجيبلك دي
واخرج خالد من جيبه سلسلة فضية بها قلب معلق
مني : الله يا خالد دى جميلة اوي
خالد كان نفسي اجبهالك ذهب يا مني
يتبادلا النظرات سويا قبل ان يقطعهما مفرق الجماعات ممدوح قائلا بصوته المرح: والله انا قلت كده قاعدالي مع سي خالد وسايبة الضيوف الي جينلك يتفلقوا برة .
تنسحب مني ف خجل بينما ينظر خالد لممدوح بضيق وغضب.
*****
مني تسير داخل شقتهم في قلق وتوتر
انتصار: يا بنتي كفاية قلق وتوتر.
مني: قلقانة علي النتيجة يا ماما بقالها اكتر من ساعة طالعة وابنك راح يجيبها لاحس ولا خبر
انتصار : الي يشوف كده يقول نتيجتك انتي مش نتيجة اخوكي
مني تدارى قلقها: ايه يا ماما مش اخويا وخايفة علي نتيجته ولا انتي مش قلقانة عليه
انتصار في خبث: قلقانة علي اخوكي برضه .
يحمر وجه منى خجلًا، ويقطع خجلها جرس الباب فتسرع لتفتحه، فتجد ممدوح بهدوءه المعتاد
مني: ايه عملت ايه
ممدوح : مش هقولك
مني: شايفة يا ماما
انتصار : يا ابني اختك قلقانة على نتيجتك من الصبح طمنها وطمني انا كمان
ممدوح هامسا لمني: قلقانه على نتيجتي أنا، عمومًا اطمنوا انا نجحت وجبت 75 في الميه.
منى: طيب و......
ممدوح ضاحكًا:متقلقيش جاب 89 فى المية
مني لم تستطع اخفاء فرحتها : بجد يا ممدوح
احست مني برد فعلها المبالغ فيه فانسحبت بهدوء بعد انا هنأت أخيها بنجاحه
*****
مني وخالد يسيران في حديقة عامة
مني : ياه يا خالد انا مش مصدقة اخيرا خلصت الثانوية العامة وهتدخل الجامعة.بس عايزة اعرف اشمعني كلية الحقوق الي دخلتها انت مجموعك كان يجيب كليات احسن بكتير تقوم تدخل حقوق زي ممدوح الي جايب 75 في المية
خالد: ممدوح اخوكي مصدق لقي كلية تاخده واتشعبط فيها لكن انا داخل حقوق بمزاجي متنسيش ان ابويا مات لما طردوه ف الشغل ومعرفش ياخد حقه ومكنش معاه فلوس يوكل محامي يرفعله قضية ع صاحب الشغل ويجيبله حقه انا نفسي اجيب حقوق الناس الغلابة الي زى ابويا الله يرحمه
مني: نفسي اشوفك اكبر محامي وساعتها ابقي حرم اكبر محامي فى مصر
خالد: وانتي فكراني هستني لما ابقي اكبر محامي ف مصر وبعدين اتجوزك انا هدور على شغل جنب الجامعة عشان احوشلي قرشين واقصر المسافة واول ما تدخلي انتي كمان الجامعة اخطبك رسمي وبعد التخرج اتجوزك علطول وتبقي معايا ف بيتي بقي لاحسن انا تعبت من البعد نفسي تبقي معايا بقي
مني في خجل : ما انا معاك اهو
خالد: لا يا حبيبتي معايا في بيتي حلالي مفارقكيش ولا تفارقيني دا انا لما بوصلك البيت واسيبك بحس ان روحي بتتسحب مني ومبترجعليش غيرلما اشوفك تاني
مني: يارب حقق كل احلامنا
خالد: طول ما انتي معايا هقدر اعمل المستحيل بس اوعديني هتفضلي جنبي ومتسبنيش مهما حصل
مني: اوعدك هتفضل في قلبي وفي عقلي حتي وانت بعيد عني لحد ما ربنا يجمعنا في بيت واحد
خالد يصل الي بيت مني وقبل ان تتركه وتدخل ينادي عليها
خالد : مني
مني: نعم يا خالد
خالد: بحبك
مني فى خجل: وانا كمان تصبح علي خير
*****
