رواية من قلب العتيك الفصل الثالث بقلم جمانه السعيدي
علي...ثاني يوم طلع عمي من الصبح
راح الاهلي حتى يطمن على ابوي ويشوف الوضع شنو
بقيت بيومها بلبيت ماطلعت
افكر شلون الوضع وحالة ابوي الصحيه شنو
ياترى مات لو عايش
اريد هذا النهار يخلص ماكووو
مجان الفون منتشر وحتى تليفون ارضي اهلي ماعدهم
ولا بيت عمي سلمان
اطلع للشارع وارجع للبيت رحت يم الحصان
انطيته علف وماي
نجيه...خاله علي تعال اتغدا
علي...اي اجيت
كعدت اتغدا ونمت ساعه ونص تقريبا وكعدت
تفكيري كله يم اهلي
للمغرب دخل عمي سلمان للبيت
علي...هله عمي الله يساعدك
سلمان....هله بيك بويه اطيني ماي
راحت نجيه اجيب ماي
سلمان...نزعني جواريبي بروح اهلك
علي...مو تدلل
نزعته الجواريب ورحت جبت ماي بلطشت غسلت رجلي
سلمان.. الله يرضا عليك
علي...هاا عمي طمني
سلمان....ابوك بعده بلمستشفى مخيطين راسه خمس خياطات
ياخذ مسكن يله ينام اخوانك واكفين يمه
والأقارب والجوارين
كلها متحلفه بيك ويدورون عليك
من شافوني كالو شلون عرفت ابو كرار بلمستشفى
كتلهم مااعرف بي بلمستشفى بس من زمان ماجايهم للبيت ولا اعرف اخباركم
واحيت تطمن عليكم
سويت روحي كلشي ماادري
سئلتهم على حالته
كالو علي ضربه على راسه ابوك كلما يكعد ويوجعه راسه يكول اخذوني اشتكي علي
اذا مااخلي يخيس بلسجن
عمامك متحلفين بيك
اخوانك واخواتك خايفين عليك أكثر ما خايفين على ابوهم
أهلك يدورون عليك ما مخلين مكان ما مدورين بي
يردون يجون هنا يدورون بيتي
كتلهم لا اجاني ولا شفته ولا ادري بي وين
سويت نفسي كلشي مااعرف عنك
جمانه السعيدي
بس من طلعت ااشرت الامك اجتني
ام كرار...هااا خويه
سلمان....خويه علي عدي بلأمان والحفظ لا تخافين علي
اخلي بعيوني محد يكدر يقرب علي
ام كرار...الف رحمه على والديك لا تخلي يرجع
ابد خلي يمك
ابو ظالم اذا رجع مايرحم حاله ابد
سلمان...لا تخافين علي اخلي بعيوني
انا ونجيه فرحانيين بي مو نسنا رد الوحشه عنه
ام كرار...الله يرضا عليك ياخويه
علي...وبعدين
سلمان...شنو بعدين صعدت بلسياره ورديت الهلي
علي...يعني وضع ابوي بخوف
سلمان...لا تخاف على ابوك كلشي مابي
يومين اتلاثه ويصحه مثل الحصان
علي...طمنتني جنت خايف
سلمان...منيين تخاف اني عمك دوم لا تخاف محد يقرب عليك
علي....الله يسلمك عمي
بديت اشتغل ويا عمي اطلع ويا نشتري العتيك
صرت اعرف أقيم الغراض الي نشتريهن
واعرف ابيعها بعد ما نجمعهن صرت محترف بهاي الشغله
عمي سلمان كان كريم وياي جدا
فوك الاكل الشرب والمبيت بيته
كان ينطيني يوميه ويكلي جمعهن حتى ازوجك ببهن
انتبهو يكول ازوجك يريدني ابقى ويا العمر كله
بعد ما تعود عليه هو وخاله نجيه
بعد شهر من هذا الوضع رجع عمي البيت اهلي
حتى يشوف الوضع شنووو
بس هامره اني طلعت للشغل ماكعدت بلبيت لان صرت اعرف
تفاصيل الشغل شنووو
بليل رجع عمي
علي...هااا عمي شنو الاخبار
سلمان....ابوك كاعد بلبيت بس بعده يشكي من دوخه براسه
وماخذ اجازه مرضيه من الدوام
ومقدم بيك بلاغ بمركز الشرطه
ما مبقي مكان ماسئل عنك يكول وين يروح مني
لو يطير هم اطير ورا حلفني بكل الائمه اذا كنت عندي
اضطريت اجذب
حتى أحميك منه
امك تسلم عليك وتخصك بلسلام
وتكول خلي يبقى يمكم لا يرجع
تكول قبل ابو جان ما ينجرع وهسه صار اكثر من قبل
طول النهار يحجي على علي
كلما يوجعه راسه ينزل علي غلط وسب
خلي يمك مااريده يرجع
ابوك يكول هلمره بس يرجع للبيت اكتله خلاص بمسدس
الشرطه
اكتله واخلص منه واكلهم يسب بلريس صدام
حتى محد يحاسبني على قتله
جمانه السعيدي
علي....اني ما مستغرب يسويها ابوي
ابوي واعرفه يسويها ويسوي الأكبر منها ماكو بكلبه
ذرة رحمه
اني اصلا ما ناوي ارجع للبيت
اهم شي اطمنت على امي ليش ارجع للبيت
علي....عشت بيت عمي وسكتت
اتعودت على الوضع وصرت اعرف اشتغل مثل شغل
عمي واحسن منه
حتى اعرف كلشي عن الحصان اعلفه وادخله بلسكيفه بلحر وانطي مي
واتسوكلهم واذا واحد يتمرض اخذه للطبيب
عمي ابد ما يستغني عني يكول وينك من زمان
جان ضارب ابوك وجاي
حتى ما يقبل يسئل عن اهلي
ويضوج اذا سمع خبر عنهم
بس عمي عرف بعدين ابوي متحسنه حالته
وارجع للدوام بس ماكلي يخاف اعوفه وارجع البيت اهلي
حتى خالة نجيه فرحانه بيه
بس ارجع تاخذ ملابسي وتغسلهن
وتفرش فراشي اني هم اساعدها اذا تحتاج شي
مثلا اشتريلها لو اطلع الزباله
كنت مرتاح بيتهم مهتمين بيه أكثر من اهلي
بعد ست اشهر طك كلبي على امي
علي....عمي اريد اروح اشوف امي كلبي طك عليها
اريد اشوف خواني وخواتي
من سمعني اكول اشوف اهلي كلش ضاج
سلمان....اخاف عليك من ابوك
علي....مااخلي يشوفني
سلمان...واذا شافك وسلمك للشرطه
علي....لا راح اكون حذر ومااخلي يشوفني
سلمان...ليش مااروح اني اطمن عليهم وارجع عليك
علي...اريد اشوف امي
سلمان....روح بس لا تتاخر احلف ترجع هنا
وما تعوفني ابد
علي...بدون حلفان راح ارجع هنا مو بس انتم اتعودتو عليه
اني هم تعودت عليكم
سلمان...احلف حتى اصدك
علي....وداعتك ومااحلف بيك جذب راح ارجع
بلكوه طلعت من البيت حتى خاله نجية واكفه وعينها وراي منا لمن وصلت راس الشارع
جمانه السعيدي
صعدت بلكوستر ساعتين الطريق لمن وصلت
للبيت
لفيت جفيه على وجهي خاف يشوفني ابوي
وبقيت واكف بعيد
شفت ابوي طلع للدوام
بس طلع من شارعنا دخلت للبيت
امي جانت واكفه برا
علي....يمه شلونج فتحت الجفيه
بس شافتني نشغت بصوت عالي
امي...يمه علي بعد روحي
اخواتي سمعن اسمي وطلعن حضنني
امي...يمه شلونك حبيبي مشتاقتلك
علي...اخذت ايدها بسته يمه اني مشتاقلج اكثر
امي...مرتاح يمه
علي...اي مرتاح وما ناقصني شي غير اشوفج
امي....كلبي عليك
علي....رجع يضربج ابوي وياكل تعبج
امي.... ابوك ما يتغير ابد هذا طبعه ما يغيره
علي...طاب راسه
امي ..... اي من زمان وصلت خبر العمك ماكالك
علي...لا ماكال
امي... بس بعده ما ساحب الدعوه عليك
يكول لويبقى يوم واحد بعمري لازم اسجنه
علي....الله ياخذه ويخلصنا منه
امي....لاتدعي علي خاف الدعوه ترجع عليك
علي...مرات اتمنى الموت ليش شاب بعمري
عايش بعيد عن اهله ومايكدر يشوف امه وخواته
امي...اسم الله عليك حبيبي
علي....يمه جاي اشتاقلكم
امي....لاترجع هسه خلي هاي السالفه تبرد وابوك ينساها
ونشوف ناس تقنعه حتى ترجع للبيت
جمانه السعيدي
علي....مااشوفه راح يقتنع ابد
امي،،..ربك كريم تعال اتريك وسولفلي شلون عايش هناك
تشتغل كاعد
عندك مصرف لا شنو شغلك
علي...اشتغل عتاك ويا عمي سلمان
وينطيني اجري كل يوم ويكول لا تصرفه جمع العرسك
امي...العرسك صدك
علي...اي صدكي يكول جمع العرسك
يمه طايرين بيه هو وخاله نجيه شايليني شيل
ماقبل عمي سلمان اجي اليوم
يكول خاف ماترجع بعد اله حلفتله يله
امي....لاترجع يمه دامك مرتاح لا ترجع هنا بس ترجع ترجع
المشاكل بينك وبين ابوك
اذا مرتاح هناك لا ترجع
كون صدك عمك يزوجك ازوج بيتهم
واستقر عدهم
علي.....يمه افكر بيج ليل نهار يمه عوفي الخياط واني ادزلج مصرف
امي...لا شغلتي متعوده عليها باب رزقي شلون اعوفه
علي...تمام براحتج
علي ...قبل لا يرجع ابوي من الدوام طلعت من بيتنا
رحت للكراج وصعدت راجع البيت عمي
لكيت عمي واكف بلباب وبيده سبحته ونجيه واكفه بصفه
يباوعون الراس الشارع
يمتى ارجع يخافون بعد ماارجع عليهم
بس شافوني فرحو بيه
عمي حضني حيل
سلمان...همزين رجعت يابعد عمك خفت ماترجع علينا
نجيه...اليوم لا اكلنا ولا نمنا البيت يريد ياكلنا
همزبن رجعت
علي...دخلت للبيت ولكيتهم شاوين دجاجه بلتنور
كعدنا ناكل اني وياهم
شكرا لزيارتكم عالم روايات سكيرهوم
