رواية عروسة بيت عمران الفصل الثالث
في أوضة إسراء وهاجر. كانت عاديلة مسكة هاجر من شعرها وعمالة تضرب فيها وهي بتقول بغضب وغل.
عاديلة
بقى بت مكسوفة الرقبة زيك تقصري رقبتي قدام أهلي وترفضي ابن أخويا علشان ابن هيام الحشاش.
هاجر بدموع
جدي قالي أختار اللي يرتاح له قلبي. وأنا عمري ما ارتحت ولا حبيت مروان زي ما برتاح لزياد ابن عمي.
عاديلة بغضب
ربنا لا يريحك يا بعيدة ولا يهدي لك بال.
فضلت تضرب فيها. وإسراء بتحاول تبعدها عنها. في اللحظة دي كان عمران معدي بالصدفة وشاف اللي بيحصل. جري وبعد عاديلة عن هاجر وخد هاجر في حضنه. وهاجر عمالة تعيط.
عمران بقلق
مالك يا أمي. في إيه. بتضربي هاجر ليه كده.
عاديلة بغيظ
ما فيش حاجة. بت قليلة الأدب وبتتربى.
هاجر بدموع
قليلة الأدب علشان مش هتجوز اللي على هواكي. مش كده.
عاديلة بصت لها بغل وجت تضربها تاني. عمران منعها.
عمران بهدوء
اهدي يا أمي وفهميني حصل إيه. وإنتي يا هاجر عيب تتكلمي مع أمك بالشكل ده.
هاجر بدموع
أمك عاوزاني أرفض زياد ابن عمي علشان أتجوز مروان ابن خالي. وأنا لا بحبه ولا بطيقه. لا في سما ولا في أرض.
عاديلة بغل
والحشاش ابن هيام هو اللي العسل بيقطر منه مش كدا.
هاجر
على الأقل زياد غلبان وبيحبني. وأنا واثقة إنه هيتعالج وهيبقى زين الرجالة.
عمران فضل واقف باصص ناحية أمه وأخته بحيرة وهو بيفكر في ميرنا.
ـــــــــــــــــــــــــــــــــــــــــــــــــ
تاني يوم في أوضة حسن وعاديلة. عمران قاعد على السرير مع حسن وعاديلة واقفة قدامه بتقول بغضب.
عاديلة
نعم يا ضنايا. ميرنا مين اللي إنت عاوزها دي. ده على جثتي إنت فاهم.
عمران
ومالها ميرنا بس يا أمي. على الأقل بنت عمي ومتربية قدام عيني.
عاديلة بغل
قولت لا يعني لا. أنا مين داعي عليا في خلفتي بس يا ربي.
حسن بحنق
ما تقعدي وتهدي في حتة. هو إنتي كل حاجة عاملة عليها موال وخلاص. وعمران لو عاوزها أنا أول واحد هجوزهاله. ولو سمعتلك حس هطلقك وأرتاح من قرفك ده.
عمران بهدوء
الله في إيه يا بابا. ما حصلش حاجة لكل ده. وإنتي يا أمي ميرنا مننا وعلينا وهي أحسن من غيرها.
حسن
لو واثق من قرارك ده يا عمران يا ابني اتوكل على الله. ومالكش دعوة بحد. إنت اللي هتعيش. وعك النسوان ده سيبك منه خالص.
عاديلة بصت له بغل وهي بتتمتم.
عاديلة
ماشي يا بت هيام. بقى عاوزة إنتي وأمك تاخدوا مني الواد اللي حلتي. طيب الصبر طيب.
ــــــــــــــــــــــــــــــــــــــــــــــــــــــــ
في الدور اللي تحت كان قاعد عمران مع جده وحسن وحسين وهيام.
عمران الجد
إنت إيه رأيك في الكلام ده يا حسين.
حسين
والله يا با أنا مش هلاقي أعز من عمران. وحتى بنتي هتفضل قدام عيني أنام وأصحى وأنا مطمن عليها. بس إنتوا عارفين ميرنا وعمران عاملين زي ناقر ونقير في الرايحة والجاية ومش هيرتاحوا مع بعض.
عمران بهدوء
والله يا عمي أنا لا وحش ولا بكره ميرنا. بس أنا بصراحة بغير عليها زيادة. وده من خوفي عليها.
هيام بحنق
وخوفك برضو هو اللي يخليك ترفع إيدك عليها في الرايحة والجاية يا عمران.
عمران الجد
الله في إيه يا هيام. مش قولت مش عاوز أسمع سيرة للموضوع ده تاني.
هيام
معلش يا عمي. دي بنتي الوحيدة ومن حقي أطمن عليها. وده رفع إيده عليها وهي مش على ذمته. أمال لما تبقى على ذمته هيعمل فيها إيه.
عمران بهدوء
معلش يا مرات عمي. أنا بعترف إني غلط لما رفعت إيدي عليها. بس إنتي ما كنتيش حاضرة وسمعتي اللي بنتك قالته. وسواء كانت على ذمتي أو لا أنا عمري ما هاجي عليها من غير سبب. وصدقيني مش هتلاقي حد يحبها ويخاف عليها قدي.
حسين
وأنا واثق إنك راجل يا عمران يا بني. ما تاخدش على خاطرك من مرات عمك. وأنا عن نفسي موافق. شوف اليوم اللي جدك وأبوك يقولوا عليه ونعمل خطوبة زياد على هاجر وإنت على ميرنا. ولا إنت رأيك إيه يا با إنت وحسن.
حسن
لو عليا أنا موافق على اللي أبويا يقوله.
عمران بهدوء
من بعد إذنك يا جدي إنت وأبويا وعمي. إحنا طبعًا مش غُرب علشان نقول نتعرف. فكنت بقول يعني زي ما بيقولوا زيتنا في دقيقنا نعمل الشبكة والدخلة مع بعض وخلاص.
عمران الجد بفرحة
طيب والله فكرة حلوة. وحتى التكاليف تبقى مرة واحدة وخلاص. ولا أتي رأيك إيه يا هيام.
هيام بصت لعمران وبعدين قالت.
هيام
ماليش رأي بعد رأيك يا عمي. إنت وأبو عمران وأبو زياد. كل اللي يهمني إن عيالي يكونوا مرتاحين ومبسطين في حياتهم.
عمران الجد
يبقي نتوكل على بركة الله. الجمعة الجاية تكون الخطوبة والدخلة. وربنا يتممهالكم على خير يا رب العالمين.
ــــــــــــــــــــــــــــــــــــــــــــــــ
بالليل في أوضة حسين وهيام. كانت ميرنا واقفة وباين عليها الغضب. وكان قاعد زياد وهيام وحسين على السرير.
ميرنا
يعني إيه فرح وخطوبة الجمعة الجاية. وعلى مين. عمران ابن عمي. إنتوا أكيد بتهزروا معايا.
حسين
وإنتي في رأيك يا حضرة الدكتورة الكلام ده فيه هزار. أنا خلاص اديت عمك وجدك كلمة ومش هصغر رقبتي قدامهم علشان الدلع ده.
ميرنا
يا بابا أرجوك افهمني. أنا كليتي الشهر الجاي. هتجوز ولا هركز في دراستي. وكمان من مين. عمران ده لا هو ولا حتى أمه بيطيقوني لا في السما ولا في الأرض. وفجأة كده عاوز يتجوزني أنا.
هيام
والله يا بنتي ما مخوفني غير عاديلة. وسكاتها مع نفسها كده مش مطمني لها.
زياد كان قاعد وباين عليه التعب وعمال يحك في أنفه. قام وهو بيقول.
زياد
أنا هدخل أنام. تصبحوا على خير.
هيام بقلق
خير يا زياد. مالك يا بني. إنت كويس.
زياد
أيوه الحمد لله كويس. عن إذنكم.
زياد سابهم وخرج. وميرنا فضلت واقفة بتفكر في حيرة في السبب اللي خلا عمران عاوز يتجوزها. لأنها متأكدة إنه مش بيحبها. وأكيد في حاجة هو ناوي عليها.
ـــــــــــــــــــــــــــــــــــــــــــ
في أوضة زياد.
زياد دخل الأوضة وهو متعصب وباين عليه التعب. قعد على الأرض وهو بيشد في شعره.
زياد
لازم تستحمل يا زياد. لازم تخف من الإدمان علشان خاطر حبيبتك هاجر. لازم تخف.
فجأة دخلت عاديلة وهي بتبتسم بخبث وماسكة كباية شاي.
عاديلة
يا قلب أمك يا زياد. إنت حالتك نيلة خالص.
زياد بتعب
هستحمل يا مرات عمي. علشان خاطر هاجر هستحمل كل حاجة.
عاديلة لوت شفايفها بسخرية وهي بتقول.
عاديلة
طيب يا حبيبي ربنا يتم شفاك على خير. خد دي كباية شاي عملتهالك. اشربها هتريحك شوية.
ناولت زياد الشاي. زياد أخده وشربه من غير تفكير. عاديلة بصت له وهي بتبتسم بخبث.
ـــــــــــــــــــــــــــــــــــــــــــــــــ
فات أسبوع وطول الوقت ميرنا بتحاول تفهم عمران ناوي لها على إيه. بس كل مرة كان عمران أذكى منها وما ساب لهاش فرصة. وهاجر كانت زي أي بنت فرحانة بفرحها. وكل يوم تنزل تشتري وتجيب اللي نفسها فيه. وكان زياد حالته كل يوم بتسوء أكتر. والكل فاكر إنه تعبان بسبب تأثير الإدمان. وفي الحقيقة هو كان بيحارب نفسه وساب شرب المخدرات فعلًا. بس بقى مدمن على الشاي اللي عاديلة كانت بتعملهوله.
وأخيرًا جه اليوم المنتظر. يوم فرح زياد وهاجر وعمران وميرنا.. في أوضة الشباب كان عمران واقف قدام المراية بيظبط بدلته وهو بيتمتم بخبث.
عمران
وأخيرًا وقعتي تحت إيدي يا ميرنا. وما حدش سمي عليكي.
سكت فجأة لما لاحظ حالة زياد اللي كان قاعد على الكرسي لابس بدلته وعمال يتلوى من وجع واضح وهو ماسك دماغه.
عمران باستغراب
خير يا زياد. مالك. إنت كويس.
زياد بوجع
دماغي يا عمران. هتموتني. مش قادر.
عمران بزعل
طيب معلش استحمل يا زياد. إنت لازم تخف وتنسى القرف اللي كنت بتطفحه ده.
زياد
مستحيل والله يا عمران. بس معلش الله يكرمك روح لأمك وخليها تعملي كباية شاي من بتاعتها. حلو قوي وبيريحني على طول.
عمران بشك
شاي إيه ده يا زياد اللي أمي بتعملهولك.
زياد بوجع
معرفش يا عمران. الله يكرمك روح لها وخليها تعملي كوباية وتجبهالي بسرعة.
عمران بص له بشك وفضل واقف يفكر شوية وبعدين قال وهو خارج من الأوضة.
عمران
طيب هروح لها نشوف شاي إيه ده اللي أمي بتعمله ده
ـــــــــــــــــــــــــــــــــــــــــــــــــــــــــ
في أوضة البنات.
كانت هاجر قاعدة قدام التسريحة وهي في عز فرحتها. كانت لابسة فستانها وبترقص وتغني والكوافيرة بتجهزها. عكس ميرنا اللي كانت قاعدة لابسة فستانها وشها مخطوف من كتر الخوف ومش مركزة في حاجة. هاجر نغزتها وهي بتقول بضحك.
هاجر
مالك يا ميرنا. ده إنتي لو هتتجوزي أسد مش هتخافي كده. هو عمران أخويا هيكلك.
الكل ضحك على كلام هاجر. وميرنا بصت لها بغيظ.
ميرنا
يا تقيلة الدم يا خيتي. ما هو أخوكي ولازم تتحمي لخ.
هاجر بفرحة
كان نفسي والله يا ميرنا أرخم عليكم. بس حظك بقى أنا عروسة النهارده لحبيب قلبي زياد ومش عاوزة أحرمه من حاجة.
في اللحظة دي دخلت عاديلة وسمعت اللي هاجر قالته. لوت شفايفها بسخرية وهي بتقول.
عاديلة
طيب يا مناصيف إنتي وهي. يلا جدكم مستنيكم تحت.
بصت لميرنا بقرف وهي بتقول.
عاديلة
وإنتي إيه القرف اللي عملاه في نفسك ده. روحي اغسلي وشك. بلا قرف. مش لايقة عليكي الألوان دي.
ميرنا
وإنتي حد طلب رأيك يا مرات عمي. الألوان عاجباني وعاجبة عيوني. وياريت كل واحد يخليه في حاله أحسن.
دخل عمران مع زياد علشان كل واحد ياخد عروسته. عاديلة بصت لعمران وهي بتمثل العياط.
عاديلة
تعالى يا عمران شوف مراتك اللي لسه حتى ما اتكتبش كتابك عليها بتكلم أمك إزاي.
ميرنا بصت لها بغيظ وفضلت ساكتة علشان تشوف عمران هيعمل إيه وتكون حجة تخرب بيها الجوازة. عمران بص لها وبعدين بص لعاديلة.
عمران
معلش يا أمي امسحيها فيا. وخلي الليلة تعدي على خير.
عاديلة بغضب
ده اللي ربنا قدرك عليها. دي أخرتها يا عمران. بت مكسورة الرقبة زي دي تغلط في أمك وتقولي عادي علشان الليلة تعدي على خير. إنت من أولها بتحامي لشمندورة.
زياد بتعب
مش وقته الكلام ده يا مرات عمي. ولو ميرنا قالتلك حاجة زعلتك حقك عليا أنا. بس الناس مالية البيت تحت هيقولوا علينا إيه.
عمران بهدوء
معاك حق يا زياد. هنتحاسب بعدين يا أمي ما تقلقيش.
بص لميرنا ومد لها إيده وهو بيقول بغيظ.
عمران
اتفضلي. جدك مستني تحت.
ميرنا بصت له بغيظ وكبرياء وسبته ومشيت من غير ما تمسك إيده. عمران نفخ بزهق وطلع وراها.
عمران
الصبر من عندك يا رب. هات عروستك وتعالى يا زياد.
زياد بص لهاجر بحب وفرحة. قرب منها وباس راسها وهو بيقول بحب.
زياد
اللهم بارك. أجمل من القمر. مش مصدق إنك خلاص هتبقي مراتي. هنام وأصحى وإنتي في حضني.
هاجر ابتسمت بخجل. وعاديلة كانت واقفة بتغلي من غيظها وقالت بغل.
عاديلة
ما تيلا يا خويا منك لها. ومش حبكة يعني السهوكة دلوقتي. لما تتنيلوا تدخلوا أوضكم ازفتوا على عينكم براحتكم. بلا وكسة توكسكم.
زياد وهاجر بصوا لبعض بزعل. زياد مسك إيد هاجر وخدها وخرج. عاديلة نفخت بغيظ وطلعت وراهم.
