رواية جريمة في الصبحية الفصل الثالث والأخير بقلم ياسر عوده
للاسف حتى المخبرين السريين ماقدروش يجبولنا معلومه واحده تساعدنا في حل اللغز، ورغم اني كن مقتنع ان في حاجه غلط في حالات الموت اللى حصلت، بس ماقدرتش اثبت حاجه نهائي، والنتيجه اللى مقدرتش اغيرها اني حفظت المحضر، واتقيدت الحاله بانها موت قضاء وقدر.
انا ماكنتش مقتنع زي ما انتم كمان مش مقتنعين ان الحالتين دوول كانوا قضاء وقدر، بس مافيش أي دليل، والموضوع دا لما اتنشر في الاعلام الكل كان خايف، وفي اللى حاول يبرر الموضوع وقال مجرد صدفه، وفي اللى قال دي علامه من علمات الساعه، وكلام تاني كتير، دا حتي في اللى برر اللى حصل على انه سحر واعمال والكلام ده، وعلى فكره في افراد من الشرطه كانوا مقتنعين ان دا شغل جن وعفاريت، وطبعا انا لما سمعت الكلام دا زعقت معاهم، بس الحقيقه انا ماكنش عندي تفسير او رد مقنع عن اللى بيحصل، وبعد مرور حوالي 3 شهور حصل اللى عمري ما كنت اتمناه، لما جالنا بلاغ ان في شقه طالعه منها ريحه وحشه اوي، وان سكان الشقه دوول عرايس اتجوزوا من 3 ايام بس، ووقتها روحت مع الفريق بتاعي نفحص البلاغ، ولما خبطنا على باب الشقه مافيش حد رد علينا، ووقتها طلبت من فريقي فتح الباب بالعافيه، لاننا كنا شامين الريحه اللى طالعه من الشقه، وطبعا كنا عارفين ان الريحه دي معناها ان في جوه جثه.
فتحنا الباب ووقتها الريحه زادت جدا، لدرجه اننا ماكناش قادرين ندخل من باب الشقه اصلا، وكل واحد كتم نفسه بمنديل علشان ندخل ونشوف شغلنا ونعرف ايه اللى حصل جوه الشقه.
ولما دورنا عن مصدر الريحه لقناها طالعه من اوضه النوم، ولما دخلنا اوضه النوم لقينا جثتين في حاله تحفن ووقتها انا ماستحملتش الريحه وخرجت وسبت المعمل الجنائي والطب الشرعي يشوفوا شغلهم.
خرجت بره الشقه كلها وابتديت اتابع استجواب الجيران، والمعلومه اللى شدتني لما عرفت ان الجثتين دوول لعريس وعروسه اتجوزوا من 3 ايام بالظبط، ومن خبرتي ونظرتي لمنظر الجثث اللى شوفتها انهم تقريبا من نفس المده او اقل بوقت قليل جدا، بس سمعت معلومه غريبه تانيه ان العريس والعروسه لما جم الشقه يوم فرحهم ماكن شمعاهم حد خالص، هما الاتنين بس وان مافيش حد من اهلهم كان معاهم، ودي حاجه غريبه ومش مفهومه، بس انا قولت اني اكيد هعرف الحقيقه دي بعدين واكيد دي مش هتكون اغرب حاجه في القضيه دي، انا اللى شوفته الفتره اللى فاتت اكبر بكتير من اللى بيحصل دلوقتي.
طبعا طلبت تحريات مفصله عن الجثتين من فريق البحث، وكمان تفريغ الكاميرات، وانتظرت لما فريق المعمل الجنائي والطب الشرعي يخلصوا شغلهم علشان اتكلم معاهم، ولما دا حصل وقتها اللى كنت خايف منه حصل، اللى حصل هو نفسه اللى حصل مرتين قبل كده، الموت كان في يوم الصبحيه تقريبا، مافيش أي بصمات غريبه، ولا أي دليل على العنف موجود في الشقه، ولا في أي عنف على الجثتين، وكمان اكد الطب الشرعي ان الموت بسبب سكته قلبيه وان الموت بصوره طبيعيه.
الحقيقه انا كنت حاسس باليأس والاحباط، مش عارف احل لغز حالات الموت الغريبه اللى بتحصل، بس مافيش بأيدي حاجه اعملها غير اني اتابع التحقيق بطريقه تقليديه.
بالنسبه لتفريغ الكاميرات اللى كانت موجوده ماظهرتش ان في أي حاجه غريبه حصلت، كل حاجه كانت طبيعيه، بس احنا اتأكدنا من المعلومه الغريبه اللى سمعناها ان العريس والعروسه لما وصلوا للشقه بتاعتهم ماكنش في أي شخص معاهم، ودي حاجه مش مفهومه ابدا، بس الحقيقه اللى سمعتها من التحريات فسرتلي الموضوع ده.
الاول العريس اسمه شهاب، اما العروسه فكان اسمها نهال، والعريس والعروسه قرايب العروسه تبقى بنت خاله، بس القصه اللى عرفتها عن شهاب ونهال ينفع تبقى فيلم عربي حقيقي.
البدايه لما كان شهاب في المرحله الثانويه، واللى كان متعلق ببنت خاله نهال، كان بيحبها من وقت الطفوله، وهي كمان كانت بتحبه اوي، والعيله كلها كانت كانت عارفه قصه الحب اللى بين الاتنين وموافقين عليها كمان.
بس المشكله الحقيقه ظهرت لما مات جد شهاب من ناحيه الام، وكان عنده املاك كتير جدا، اراضي واملاك عقاريه، وطبعا المفروض بعد ما يموت يتوزع الميراث على كل الابناء، وكان عنده ابن واحد و3 بنات، وطلبوا ال 3 بنات توزيع الميراث، بس الام والابن رفضوا طلبهم، وقالوا ان مافيش تقسيم للميراث، وحدد الابن مبلغ لكل بنت تاخده كل شهر، وحقيقي المبلغ دا كان صغير جدا بالنسبه للميراث اللى سايبه الاب.
وحصل مشاكل بين الاخ واخواته البنات، والخلاف كان بيزيد باستمرار، وحتى الام كانت واقفه في صف ابنها، ورفضوا يوزعوا أي ميراث، والمشاكل بنهم وصلت للمحاكم، ورفعوا قضايا على اخوهم، بس هو كان موكل اكبر محامي واللى قدر يخلي القضيه في المحاكم لسنين من غير أي حكم يفصل في المنازعات اللى بنهم، وطبعا نتيجه اللى حصل العلاقه بين ام شهاب واخوها ابو نهال اتقطعت تقريبا، بس شهاب ونهال كانوا رافضين كل اللى بيحصل، وهو ماكنش يفرق معاه الميراث، كل اللى كان عاوزه انه يتجوز بنت خاله اللى بيحبها من ايام الطفوله.
حاول شهاب اكتر من مره يروح يتقدم لـ نهال، بس خاله كان بيرفضه رغم ان شهاب كان عنده استعداد انه يقاطع ابوه وامه علشان خاله يوافق، بس خاله كان شايف الموضوع بطريقه مختلفه خالص، كان واثق ان شيهاب بيعمل كل ده علشان ياخد ميراث بنته بعد كده، اصل هو ماخلفش غير 3 بنات وطبعا كل حاجه هتروح للبنات دي، ودي من الحاجات الغريبه واللى مش مفهومه، هو كان مانع اخواته انهم يورثوا في ابوهم وواخد ميرثهم، وفي نفس الوقت هيورث بناته كل اللى هيسيبه.
وفي نفس الوقت كان اهل شهاب رافضين جوازه من نهال، لدرجه ان ابو شهاب هدده انه لو اتجوز من بنت خاله ساعتها هو مش عاوز يشوفه او يعتبر نفسه انه مالهوش اب، ورغم كل ده شهاب كان عنده استعداد انه يخسر أي حد في مقابل انه يتجوز نهال.
بس رغم حب شهاب هو اتصدم بحاجه حصلت، نهال ضعفت قدام ضغوط ابوها عليها خصوصا لما ابوها اتعرض لـ ازمه قلبيه، ونصحه الطبيب انه ماينفعلش ابدا او يتعرض لـ أي زعل، وقتها نهال خافت على ابوها وعلشان كده قررت انها تسمع كلامه، وعلشان كده وافقت على العريس اللى كان ابوها جايبه وكان ابن واحد صحبه، واتخطبت نهال ليه ولما عرف شهاب باللي حصل كانت صدمه ليه، ودخل في حاله اكتئاب شديده، لدرجه انه حبس نفسه في اوضته لمده شهر وخسر وزنه وحالته كانت شبه الاموات تقريبا، ووقتها اهله عرضوا عليه انه يتجوز علشان ينسي بنت خاله، وهو ماكنش فارق معاه حاجه، وعلشان كده وافق على كل حاجه هما قالوها، ووقتها خطب شهاب بنت عمه واللى كان اسمها هاجر، واستمرت الخطوبه وقت قصير اوي واتحدد معاد الفرح، وبعد كتب الكتاب حصلت حاجه مش متوقعه، هاجر جالها اعراض خفيفه زي سخنيه بسيطه وكمان صداع ودوخه، ولما قالت الموضوع دا لـ امها كان رد امها عليها ان دا اكيد نتيجه التوتر علشان الفرح فاضل عليه يومين بس، وسمعت هاجر كلام امها وحاولت توهم نفسها ان كل اللى حسه بيه مجرد توتر مش اكتر، ويوم الفرح لما دخلت امها تصحيها ورغم ان هاجر ماكنتش متعوده تنام لـ وقت متأخر، بس اهلها سابوها علشان تبقى مرتاحه في فرحها، ولما دخلت تصحيها اتصدمت ان بنتها ماكنتش بترد عليها نهائيا، وقتها امها خافت واستنجدت بجوزها اللى جري على بنته وشالها ووداها للمستشفى، بس لما وصلت المستشفى وكشفوا عليها بلغوهم ان بنتهم ماتت.
الاب والام ماكنوش مصدقين اللى حصل، ومش فاهمين دا حصل ازاي، والاتنين دخلوا في حال انهيار شديده اوي.
وفي الوقت دا كانت خطوبه نهال اتفسخت، الحقيقه هي اتفسخت في الوقت اللى كان شهاب بيكتب كتابه فيها، ولما عرف بخبر فسخ خطوبتها كان مصدوم انه حصل بعد كتب الكتاب، ولما ماتت هاجر شهاب حس ان قدره انه يكون مع حببته نهال، واللى رجع اتواصل معاها في السر وفضلوا الاتنين على تواصل، وقرر شهاب انه يتجوز من نهال غصب عن اهله وعن اهلها، وهي وافقت لانها اتأكدت انها مش قادره تنسى شهاب ابدا، بس الموضوع كان محتاج وقت لغايه لما شهاب يدبر كل حاجه، وفعلا ابتدي شهاب يرجع لشغله وخلال سنه تقريبا كانت احواله ممتازه، وقرر انه يعمل فرح لـ نهال وعزم كل زملاءه في الشغل، ولما حدد يوم هربت نهال وكتب كتابه عليها وبعدها عملوا الفرح علشان يحطوا اهليهم قدام الامر الواقع.
بس مافيش حد من اهليهم قبل انه يروح الفرح دا غير شخص واحد بس، ومش بس حضر الفرح هو اللى كان مسئول عن البوفيه كمان لان دا شغله، والشخص دا كان عم شهاب واللى كان ابو هاجر عروسه شهاب الاولي.
ـــــــــــــــــــــــــــــــــــــــ
كل المعلومات اللى قراءتها في التحريات بالنسبه ليا كانت طبيعيه جدا الا معلومه وحده بس، ازاي ابو هاجر حضر فرح شهاب، مستحيل ان اب يقدر يعمل التصرف دا مع شخص اتجوز بنته فعلا، لان كتب الكتاب يعتبر نصف الجواز، وكنت محتاج اتحري عن المعلومه دي.
وفي الوقت دا تحصل الصدفه لما بلغني عسكري الحراسه اللى واقف على باب مكتبي ان في 3 ستات عاوزين يقبلوني، وبيقولوا انهم عندهم معلومات تخص قضيه الحاج فواز وعروسته جميله، ووقتها انا طلبت من العسكري يدخلهم بسرعه، ولما دخلهم عرفتهم كانوا زوجات الحاج فواز الثلاثه، ولما قعدتهم علشان اسمعهم وقتها قالولي انهم شاكين ان جوزهم الحاج فواز مات هو وعروسته مسمومين، وطبعا سألتهم عن سبب شكهم فردت وحده منهم وقالت:
-الحاج فواز كانت صحته كويسه اوي، والحقيقه انا زوجته الاولي، ولما اتجوز مرتين عليا كنت انا اللى بعمله اكل ليله الدخله بنفسي وكنت متعوده على الموضوع ده، بس في جوازته الاخيره وقبل الفرح بيومين قولتله اني هعمله الاكل زي كل مره، لقيته بيقولي لا علشان متعهد البوفيه قاله انه بيجهز اكل ليله الدخله للعروسين، ولما قولتله اني مابكلش من بره قالي ان اكله ممتاز وكمان هو داخل ضمن تكلفه الفرح ووعده انه عمره ما هينسي الاكل بتاعه ومش بعيد يطلب منه يعمله الاكل دا بشكل مخصوص، وقالي بلاش اتعب نفسي واحضر أي اكل.
-يعني انتي شاكه ان الاكل هو سبب اللى حصل؟
-ايوه يا فندم، احنا من ساعه اللى حصل واحنا بنفكر اللى حصل دا حصل ازاي، وعندنا احساس قوي ان اكل ليله الدخله اللى عمله متعهد البوفيه اللى اسمه صلاح ده هو السبب.
في اللحظه دي انا انتبهت للاسم اللى قلته وسألتها:
-هو اسم متعهد البوفيه صلاح؟
-ايوه يا فندم، انا قابلته لما كلمني قبل ما الفرح يخلص بنص ساعه وقالي ان الاكل جاهز بتاع العرايس وعاوزني اوديه الشقه للعرايس، ودا اللى انا عملته فعلا خدت الاكل ووديته للشقه اللى هيتجوز فيها الحاج فواز، وعرفت من متعهد البوفيه ان اسمه صلاح، هو عرفني على نفسه اول لما اتكلم معايا.
في اللحظه دي انا قلبت في اوراق المحاضر اللى كانت قدامي وبشتغل عليها، انا فاكر ان اسم صلاح اتذكر قدامي، واخيرا وصلتله اسم صلاح دا يبقى اسم ابو هاجر، واللى شغال متعهد بوفيه، وكنت محتاج وقتها اتحقق من حاجه، لو صلاح دا يبقى اسم متعهد بوفيه بتاع العريس مروان، والمعلومه جتلي في 10 دقايق بس والاجابه كانت ايوه، كان اسمه صلاح.
وقتها كل اللى كنت محتاجه مواجهه صلاح بزوجه فواز الاولي، واصدرت تعليمات بضبط واحضار صلاح، حتي قبل استخراج تصريح النيابه، كنت هستخرجه بعدين علشان الاجراءات تبقى مظبوطه، ودا اللى حصل فعلا ولما جبت صلاح ابو هاجه وعرضته على مرات فواز الاولى قالت انه هو نفس الشخص، وقتها الشك اتحول لـ يقين وابتديت في استجواب صلاح، بس هو انكر أي معرفه ليه بالامر، وكان مصمم على اقواله، وقتها كنت محتاج اجيب دليل قوي بس ماكنتش عارف اجيبه منين، وبعدها فكرت لو فتشنا شقته يمكن نلاقي أي دليل ينفعنا، وبعت فريق من الشرطه ومعاهم فريق المعمل الجنائي لتفتيش شقته، وبعدها جالي تقرير من المعمل الجنائي اللى لقوا ماده غريبه محفوظه في مكان سري بشقه صلاح ومحطوطه بعنايه، ولما استجوبوا مرات صلاح عنها قالت انها ماتعرفش بتاعت ايه ولا كانت تعرف بوجودها من الاساس، وبتقرير المعمل الجنائي ذكر ان الماده دي عباره عن سم نباتي، ودا نوع من السموم الخطيره جدا، وانه من النوع اللى بيموت بشكل فعال بعد ساعتين من تناوله، والخبر السيء ان اعراضه خفيفه سخنيه بسيطه وصدع ودوخه، واسوء حاجه فيه انه صعب وممكن يكون مستحيل انه يظهر في التشريح بعد مرور خمس ساعات من موت الشخص اللى اتسمم بيه.
وقتها انا جبت صلاح قدامي وواجهته بالدليل ده، وقتها صلاح قرر انه يعترف وقال اغرب اعتراف ممكن نسمعه، لان الخطه اللى نفذها صلاح خطه شيطانيه.
-ايوه انا اللى قتلت شهاب ونهال، ومش بس كده انا قتلت قبليهم حالتين.
-وليه عملت كده وازاي؟
-علشان بنتي لما ماتت انا ماصدقتش انها ماتت بشكل طبيعي، ازاي يعني تموت كده في يوم فرحها، وسمعت معلومه ان نهال اتفسخت خطوبتها بعد كتب كتاب بنتي، وانا كنت عارف ازاي شهاب كان عاوزها، واصلا ماكنتش عاوز اجوزه بنتي بس هي اللى كانت عاوزاه ووافقت.
لما قعدت وفكرت فهمت ان شهاب هو اللى اتخلص من بنتي بطريقه معينه، ودورت على الاعراض اللى جت لبنتي وعرفت ان في سم نباتي بيسبب الاعراض دي، دوخه وصداع وسخونيه، واتـأكدت وقتها من شكوكي وقررت اني لازم اقتله.
انا كنت عارف انه اكيد هيتجوز نهال، وعلشان كده بداءت بخطتي ان لو حصلت حالات موت لعرايس يوم فرهم بطريقه مفاجأه وقتها لما اموت شهاب وعروسته الموضوع هيبقى حاجه عاديه او ظاهر بتحصل ومافيش حد هيكشف الحقيقه.
ـــــــــــــــــــــــــــــــــــــــــــــــــــ
دي كانت اقوال صلاح واللى عرفنا ازاي كان بيقتل ضحياه، الحقيقه بنته هاجر ماتت بصوره طبيعيه، ويمكن هي الوحيده اللى ماتت قضاء وقدر، اتحكم على صلاح بالاعدام بعد ما اتعرض على مستشفى للامراض النفسيه واقرت انه مسئول عن افعاله.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
