رواية بلاغ اختفاء الفصل الثالث والأخير بقلم محمود الأمين
واتكلمت سلمى وقالت
_ الراجل ده يا فندم يبقى اخو واحد معانا في الجامعه.. اخوه ده كان اسمه جمال فرغلي كان شاب غلبان وعلى قد حاله بس كانت تصرفاته مريبه شوية، يعني كان بيحاول يلفت نظر البنات ليه.. واحنا كنا فاهمين ده وكنا بناخد الموضوع بهزار ولكن الموضوع مكنش عاجب ايمان وكانت شايفه انه شاب مش كويس ويمكن عشان ايمان كانت متدينه اكتر من اي بنت في الجامعة فالتصرفات اللي كان بيتصرفها جمال كانت بالنسبالها تصرفات تافهه ولكن اللي كان مخلي جمال ماده للتنمر انه كان عنده تلعثم في الكلام.. ودي حاجه مش بايده ولكن في ناس كتير كانت بتتريق عليه
لحد ما في يوم حاول يتكلم مع ايمان.. ويمكن وصله احساس ان ايمان متعاطفه معاه بسبب حالته ولكن ايمان مكنتش متعاطفه معاه ولا حاجه.. ايمان كانت شايفه انه من الدين مينفعش حد يتريق عليه
بس واضح ان جمال فهم الموضوع غلط.. وده اللي خلاه يتجرا ويحاول يتكلم معاها وساعتها ايمان رفضت في البدايه باحترام وقالت انها مش بتتكلم مع ولاد
ولكنها اتفاجئت ان جمال بيمسك ايدها.. وساعتها ايمان ضربته بالقلم على وشه وهزقته قدام الجامعه كلها وقالت عليه انسان مش محترم
الموضوع وقتها وصل لاداره الجامعه اللي لما عرفت اللي حصل رفدت جمال من الكليه وده اللي خلى حالته النفسية تتأثر.. وبعد فتره ايمان كانت غايبه في الفتره دي عن الكليه بسبب ان والدتها كانت تعبانه ووقتها لقينا الشخص اللي في الصوره ده جاي وبيسال على ايمان وبيقول ان هو اخو جمال
وطبعا وقتها كنا عاوزين نعرف هو عاوز ايمان في ايه؟!
فقال انه مش هيسيبها في حالها وانه هينتقم منها.. كان بيتكلم وهو متعصب وفي ناس من زمايلنا نادت على امن الجامعه عشان يطلعوا بره
الكل كان مستغرب تصرف الشخص ده هو جاي ينتقم من ايمان ليه اخوه هو اللي غلطان وهو اللي مسك ايدها.. ولكن اللي عرفناه بعدها.. ان جمال في اليوم اللي اترفد فيه رجع البيت وهو بيعيط وزعلان ودخل عشان ينام، ولما اخوه جيه يصحيه تاني يوم لقيه ميت
وعرف من زمايله في الجامعه اللي حصل من ايمان وعشان كده جه وكان بيسال عليها في الجامعه
= وازاي حضراتكم متعرفونيش حاجه زي دي، هو انا مش سالتكم مين اللي بينه وبين ايمان مشاكل.. وانتوا قولتوا على خالد ومنتصر جوز امها.. ليه ما ذكرتوش موضوع جمال واخوه ده؟
_ عشان يا فندم الموضوع ده حصل في سنه اولى، وعدي عليه سنين ده حتى احنا نسينا الموضوع وافتكرناه لما حضرتك وريتنا الصوره
= تمام.. احنا هنعمل تحرياتنا وباذن الله هنوصله في اقرب وقت
....
وبعد ما خلصت كلام مع صحاب ايمان.. عرفنا المتهم واللي عمل كده في ايمان وعرفنا كمان ايه هو الدافع في الانتقام من ايمان
اخ بيتعرض للتنمر تصرفاته مريبه بيلاقي واحده بتدافع عنه ولكن في الحقيقه هي كانت ضد الفعل اللي بيحصل ضده ومش متعاطفه معاه.. ولكن هو حس انها متعاطفه فحب يقرب منها ويتكلم معاها ولما رفضت مسكها من ايدها فضربته بالقلم والحوار كبر لدرجه ان الشخص ده اترفد من الجامعه.. ومن كتر الزعل مات
بس السؤال هنا اشمعنا بعد السنين دي كلها.. ليه مش في نفس السنه او ليه مش في السنين اللي فاتت؟
وده اللي خلاني اطلب من فريق البحث الجنائي اعمل تحريات عن الشخص اللي اسمه سليم فرغلي عشان اعرف حكايته ايه بالظبط؟!
وبعد 48 ساعه ظهرت التحريات عن الشخص ده
وعرفت من خلال التحريات ان الشخص اللي اسمه سليم فرغلي ده كان عايش مع اخوه جمال ووالده ووالدته متوفيين.. سليم كان بيشتغل مدرس رياضيات في مدرسه اعدادي كان معروف عنه العصبيه وعدم الاتزان.. وده اللي خلى الطلبه تخاف منه واولياء الامور لما عرفوا ان المدرس اللي اسمه سليم ده بيضرب عيالهم راحوا واتخانقوا معاه عند المدرسه وعشان المشكله كانت كبيره وخلصت بالعافيه واتبهدل فيها سليم.. دخل الفصل وهو متعصب وللاسف عمل عاهه مستديمه لاحدى الطلبه في المدرسه وده اللي خلى الشرطه تقبض عليه واتحكم عليه ب3 سنين سجن قداهم وخرج.. ورغم ان قضيه زي دي فيها سبع سنين حبس ولكن شطاره المحامي قدر يجيب 3 سنين بس
....
قفلت ملف التحريات واتبعت للنيابه اللي طلعت اذن بالقبض على سليم فرغلي واتحركت انا ومعايا قوه من القسم على العنوان اللي كان موجود في ملف التحريات على امل اننا نلاقي سليم ده هناك وصلنا لحد البيت عنده وفضلنا نخبط على الباب ولكن ما حدش كان بيفتح.. بس في الوقت ده كنا شامين ريحه نفاذه ريحه معطر او بخور طالعه من الشقه... فاقتحمنا الشقه عشان نشوف ايه اللي بيحصل جوه
وفي الوقت ده كنا هنتخنق من ريحه البخور اللي كانت في البيت وطلبت من العساكر تفتح الشبابيك عشان نقدر ناخد نفسنا وبعد 10 دقايق ريحه البخور كانت هديت ولكن بدأت تظهر ريحه عفن.. ريحه كانت صعبه وبشعة لاقصي حد والريحه برده كانت جايه من تحت البلاط اللي لما فتشنا تحته اتفاجئنا ب3 جثث وكانوا وصلوا لمرحله التحلل وكل اللي كان باقي منهم العضم وبس
واضح ان ايمان ما كانتش اول ضحيه للمتهم بس كان السؤال هو بيقتل البنات دي ليه؟.. عرفنا انه قتل ايمان بسبب اخوه وفي الحقيقه هو ما قتلهاش على طول هو اعتدى عليها وماتت قبل ما يقتلها
وفجاه سمعنا صوت دوشه في الشارع ولما بصينا لقينا الناس بتحاول تمسك سليم عشان تسلمه للشرطه واضح انه كان مكروه في منطقته
وفعلا الناس قدرت تمسكه والجثث دي كان صعب تتفحص من الطب الشرعي وعشان كده اتدفنت باذن من النيابه في مدافن الصدقه
واخدنا سليم على القسم عشان نبدا تحقيق معاه
_ كنت فاكر انها جثه واحده.. بس ما شاء الله كده انت قاتل اربعه والله اعلم فيه تاني ولا لا
= يستاهلوا.. يستاهلوا كل اللي حصلهم
_ يستاهلوا ليه؟!.. هما اذوك في ايه؟
= بسببهم اخويا مات.. كل مكان بيحاول يقرب من واحده فيهم عشان عايز يحس انه زيه زي اي حد.. عاوز يحس انه بني ادم في مجتمع مليان تنمر
بس للاسف محصلش كانوا بيعاملوه معامله وحشه وبيحسسوه ان في مشكله عنده كل يوم كان بيجيني معيط من الكليه بسبب التنمر لدرجه انه فكر ينتحر وحاول فعلا ووقتها انا اللي لحقته
_ال3 جثث اللي كانوا في الشقه ومدفونين تحت البلاط بتوع مين؟!
= 3 بنات اتنمروا عليه واستهزاوا بيه قدام الناس.. وده اليوم اللي حاول ينتحر فيه وعشان هو كان غالي عليا ما حبتش ان حد يزعله فقتلتهم هما التلاتة
....
كنت حاسس اني قدام مريض نفسي مبرراته تافهه وتفكيره مجنون، معقول يكون قتلهم عشان كده بس.. فضل مصمم على اقواله وعشان كده حولته للنيابه. والنيابه امرت بحبسه 15 يوم على ذمه التحقيق
وقبل محاكمته بيوم واحد العسكري دخل عليه الحبس الانفرادي اللي كان دخله بسبب مشكله هو عملها... لقيه شانق نفسه وكان راسم على الحيطه صوره اخوه جمال قد ايه القضيه دي كانت صعبه وفيها تفاصيل بشعه.. بس انا مش متخيل ان في اخ بيحب اخوه بالشكل ده
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
