رواية حرم الاسود الفصل الثاني والاربعون والاخير بقلم بتول ابو الليل
رهف : كاعده بالبيت وحدي اخوي واليان راحو سفره يشوفون صبيحه بالاهوار ابوي راح للمحل مالته اني ملتهيه بتجهيزات العرس.
حايره اكثر منهم شلون اغير ديكور البيت والاصباغ اندك باب البيت عفت الجهاز علئ القنفه وكمت خليت شالي علئ راسي فتحت الباب.
انصدمت من شفت جون كدامي بلعت ريكي بتوتر وبقيت صافنه بوجهه
هذا شجابه مرت سنه واكثرر وهوه من يوم الحادثه اختفه وماسمعت أي خبر عنه بعدد شرجعه هسه وليش جاي علينه بس الله اليستر.
جون : شلونج رهف
_زينه شعندك جاي ؟
جون : عادي نحجي شويه
_لاا موو عادي رجاء روح مناا ماريد مشاكل
جون : أيسر هنا
_ليش تسأل رجاء رووح مناا شرجعك ماكفاك الصاار حل عنه وعن حياتنه خلينه مرتاحين وفرحانين لاتخرب كلشي بجيتك هستونه گلنه يالله اخوي فكرر يعيش حياتنه من جديد شمرجعك هسه فهمني شتريدد.
جون : رهف عليج العباس بس اسمعيني شنوو اريد اكول تعبت والله طول هل فترا اني ماعايش مثل البشر لاكدر انام ولاكدر ارتاح بحياتي أيسر موو بس صديق هذا اخوي والله معتبره واحد من عائلتي ثقي بالله وبيته ماعندي شيء ويه مرته ابدد مجان بينه شيء هيه الي شمرت روحهاا عليه صدكيني اني ممسوي شيء ع اقل بس انتِ صدكيني ماتعرفن جون وياكم من الصغر انيي ربينه سويه احنه اكلنه وشربنه سويه عشنه بيت واحد
_صح احنه عشنه مثل الاخوه اعتبرناك واحد من عدنه خليناك تكعد ويانه وتاكل وتشرب بس انتَ شنوو سويت فهمني شسويت رحت غدرت صديقك واخوك ويه مرته ماعرف شنوو احجي عليك وشكوول عمري كله ماتخيلتك توصل لهيج مرحله مع الاسف عليك بيا عين جاي هسه وشنوو عذرك شمرت روحهاا عليك جنت تكدر تبتعد عنهاا تحجي الأيسر قبل لايدخل عليكم انتَ شتحس فهمني عبالك نصدك بجذبك هذا ونرجع نصدكك مستحيل ابتعد عن حياتنه كلش ولاترجع لهنا مره ثانيه ابدد.
جون : حقج تحجين هيج ومالومج بس اني هل مره اجيت وعندي اثبات علئ كلامي اني احبج انتِ رهف من زمان اريدج والله العظيم مافكرت يوم بوحده غيرج.
_ياحب هذا انتَ تعرف الحب اصلاً؟ عيب عليك استحي علئ نفسك روح منااا لاتخليني اصرخ والم الجوارين كلهاا عليك يلا روووح منااا.
جون : بس اهدي شويه وخلينه نحجي خليني افهمج.
_شتفهم جووون شتفهم شبقه ينحجييي بيه ماكوو شيء نحجي بعد ليش تجبرني اتصرف وياك بصرفات اندم عليها بعدين روح عفيه لايجي ابوي ويشوفك وتصير مشكله روح.
جون : اني ..
بعده ممكمل كلامه وصلت سيارة اخوي أيسر وياه اليان بلعت ريكي بخوف باوعلنه أيسر بصدمه وكف السياره ونزل وهوه عيونه بكصته اجه بسرعه لزم جوون من ياخت قميصه وصاح عليه.
آرون : انتَ شعندددددك هناااا يم بيتي شتسووووي جااااي.
_أيسر عوفه
آرون : ادخلن جوووه يلا
اليان : حبيبي آرون عوفه خلينه نفهم شيريد.
جون يباوع الاخوي بتركيز دمعن عيونه حضن اخوي بقوه انصدمه ثنينه من الي سواه حاول يدفعه اخوي بس جون حيل لازمه
جون : ايسر بداعت الاخوه لاتسوي هيج ولك ماتعرفني انييي جوووون صديق دربك احنه ربييييينه سووووويه شلون تشك بيه اخونك وروح امي وانتَ تعرفني ماحلف جذب بيهااا مامسوي شيء.
آرون : وخررر لك وخرر.
جون : بس اسمعني خليني اشرحلك كلشي خليني افهمك والله راح اموت لا اكدر انام ولا اعيش حياتي مرتاح يوم عن يوم اني اتعذب وافكر شلوون اخليك تصدكني.
آرون : ماكوو شيء نحجي بيه بعد روح منا لاتخليني ارجعك الاهلك مكسر ساكت عنك لهل لحظه لخاطر العشره ولخاطر عمي هوه الي كاسر خاطري عليك.
ابتعد عنه جون وهوه يباوعله سحب نفس قووي وكال.
جون : وياك اني غلطت بشي واحد انوو دخلت للبيت وانتَ ماموجود خليني احجيلك كل السالفه وامد ايدي ع قرآن ماجذب بحرف واحد الناس تتكاتل ويبريها القرآن موو اني هسه اريد ابري نفسي وضميري واحلفلك بالقرآن حته تصدكوني وتفهمون اني ممسوي أي شي.
آرون : رهف جيبي القرآن وتعاي.
احس كلبي صااار يدك بسرعه خفت حيل من صاار بيها حلفان القران موو شويه هزيت راسي بأي ورحت دخلت للبيت شلت القرآن من ع المكتبه وطلعت جانو واكفين داخل البيت بالحديقه باوعلي جون هوه نظراته كلهن حزن وقهر.
تقربت وكفت يمه مديت القرآن كدامه خله ايده فوكه وكال.
جون : وحق هذا القرآن الكريم اني ماعندي أي شيء ويه أليڤ لاحبها ولامراسلها ولاعندي أي تواصل وياها ابددد كلشي ماكوو بينه.
آرون : تحلف مابينكم علاقه حب؟
جون : والقران مابينه شيء انشالله يموتني بهل لحظه او يسوي شيء بيه اذا جذبت بحرف واحد.
آرون : ليش تقربتلك اذا انتَ مامنطيها مجال لوو مهتم بيهاا.
جون : بيومها محد جان موجود بالبيت الكل طالع واني وحق هذا القرآن جنت اريد اروح بس هيه كالتلي انتَ هسه راح ترجع ودخلت
ومن دخلنه الاستقبال اني جنت كاعد جابتلي الكهوه كعدت كلش يمي اشرب ورجع شويه منهاا كل ما ارجع هيه تتقرب
كتلها شبيج كالت حيل تعبانه وصارت تحجيلي عنك وعن المشاكل الي بينكم وتبجي واني وحق القرآن اكلهاا انتم زوج وزوجه كلشي يصير بينكم تكدرون تحلونه بالتفاهم جنت اهدي بيهاا واخليها تفهم انوو الزعل والعصبيه ماوارهم نتيجه اشو هيه فجأه تقربت يمي و ..
مسح وجهه اخوي بتوتر صااار وجهه احمرر تحسه يكتم غضبه مجنت اريد اليان تسمع الصار حته متتغير نظرتها اتجاهه اخوي دنكت راسي بزعل.
كلشي من ورا راس أليڤ الله لايوفقها شسوت بينه.
آرون : هاهيه مصدكك تكدر تروح
جون : ماروح والله ادري بيك بعدك شايل بگلبك عليه اضربني احجي عليه سوي اي شيء بس لادير وجهك عن اخوك احنه اخوه أيسر ربينه سويه شلون تكدر تكون هيج قاسي وياي.
آرون : حته لوو انتَ مالك ذنب بشي بس بعد ماشفتكم سويه مستحيل اكدر ارجعك مثل ماجنت جزت روحي منكم ثنينكم كرهتكم وكرهتوني بروحي حيل روح منا وخلينه هيج افضل لاتدخل بحياتي ولاني ادخل بيك بعدد خربت صحبتنه.
جون : ماخرب شيء احنه بعدنه نفسنه جون وايسر الي جانو سند لبعض الاصدقاء الاخوه ماخربت صحبتنه ابدد.
آرون : ماكوو شيء يجمعنه بعد
جون : لأ اكوو تطور علاقتنه وتثخن اكثرر لأن اني ماجايك بس ابري نفسي من السالفه لاا جاي حته اطلب ايد رهف للزواج.
فتحت عيوني بصدمه هذا شلون يحجي هيج بكل هل جراءة نزلت راسي بتوتر وخوف عقد حواجبه أيسر وكال
آرون : انتَ شااارب شيء شنوو تطلب ايد رهف
جون : طالب ايدها علئ سنه الله ورسوله مابيها شيء.
آرون : مالك مره يمي روح شوفلك وحده ثانيه اختي مانطيهاا.
جون : ليش ولك بذات نسيت وكفاتي وياك هسه من طلبت ايد اختك صرت تتمنمن عليه.
اليان : هاي غير خطوبه عمري ماشفت هيج
جون : صدك سمعت خطبتو الف مبروك
اليان : يبارك بيك
جون : حاجي زوجج كوليله ينطيني رهف ادللهاا وعلي ماخليها تزعل بيوم احطها برمش عيني.
اليان : والله اني ماكدر اكول شيء هل موضوع راجع لرهف واهلهاا همه الي يقررون ينطونها أو لٱ.
جون : زين اسألوها اذا قبلت هيه مالكم حق تمنعونها شتكولين رهف
آرون : انتَ مشتهي سحله شنووو.
جون : يابه بس اسكت انتَ شعليييك خليها تحجي
آرون : لٱ ظاهر انتَ جلدك يحكك يلا اطلع براا يلا
جون : لاحول الله يابه بس خلينه نسمع شتكول هيه.
آرون : رهف احجي شبيج سكتي ترضين بيه؟
بطني صارت توجعني وحيل توترت وخفت باوعت الهم واني ماعرف شنوو احجي والله حيل حيل متوتره.
_هوه آءء اني.
اليان : احسها موافقه بس متردده تكول
_لا.
جان مبتسم جون اختفت ابتسامته باوعلي بنظرات تكسر الخاطر بلع ريكه وباوع الاخوي.
آرون : سمعت ماترضه تكدر تتوكل.
جون : براحتها ماجبرها ع شيء هيه حره بقراراتها تختار الي يناسبها.
آرون : انشالله الف شخص موجود
جون : اني رايح عذروني خاف ضوجت واحد منكم.
سكتو ماحجو شيء حيل ضجت من راح ماعرفت شنوو احجي احسه صدك يحبني ويريدني بحياته اوافق لوو ابقه ع قاراري وماتنازل اله.
اليان : لحظه جون
دار وجهه جون يباوع بستغراب ابتسمت اليان وكالت.
اليان : راح اسالك سؤال وجاوبني عليه.
جون : كولي
اليان : تحب رهف؟
باوعلي بنظرات هادئه ابتسم بهدوء ورجع باوع اليان وكال.
جون : من زمان.
آرون : لك حيووووان تبااااوع لعرضيييي هستوك تحلف بالقران كلب
اجاه اخوي تهجم عليه ضربه بوكسي علئ وجهه وكعه علئ الحايط خليت ايدي علئ حلكي خايفه وابجي.
جون : الحب موو حرام أيسر عمري ماباوعت لعرضك بغير نظره جنت رايدها من زمان وحته هيه تدري بيه احبهاا وتكدر تسألهاا هسه.
دار وجهه عليه اخوي يباوعلي بغضب بلعت ريكي بخوف ودنكت راسي اجاني بسرعه لزمني من اييدي بقوه وكال.
آرون : ولججج رهف هذاااا شيحجيييي
_هوه انيي ..اني.
آرون : شنووو. انتِ شنووووو ماتحجيييين
اليان : وخرر شبيك انتَ تخبلت شمسويه هسه هيه مايصير تحب وتفكر بحياتها شنوو حلال علينه وحرام عليهم خليك شويه واقعي يعني جون لوو يحب أليڤ جان اخذها مجان انتظر اختك لحدد هذا اليوم مرت سنه ونص علئ الحادثه جان يكدر يتزوج ينساها بس يحبهاا وهيه تحبه ليش نوكف بقسمتهم حرام نسوي هيج احنه هوواي تعذبنه يلا صرنه سويه خليهم همه هم يعيشون حياتهم مثل مايردون.
آرون : ليششش ماحجتلي ليش ضمت الموضوع عليه اذا جانت تدري بيه يحبهاا ليش ماكالتلي ماكوو شيء بينه وبين أليڤ.
جون : هيه هم صدكت الصارر يعني ماجنه نتواصل اوو بينه شيء ابدد لاتضلمها بتفكيرك.
آرون : انتَ بالاخص اسكت ماسمعلك صوووت خليني افهم من اختي العزيزه شنوو السالفه وشنوو هل خرط الي ديصير.
اليان : اهوو شكد مكبر الموضوع ترا مابيها شيء واذا حبوو يعني.
آرون : اليااان خليج برا الموضوع رجاء
اليان : لا عيني ماسكت والله مثل ماهيه اختك هم تصير اختي واريدها تشوف حياتها وتفرح وتحب مايكفي شلون جانت مظلومه تريد تظلمها اكثرر حرام عليكم شويه فكرو بالبنات لشوكت يبقه هل مجتمع ذكوري عدكم عادي اذا حب الولد بس موو عادي اذا حبت البنيه شهل منطق! "
آرون : لج بابا اني ماوكف بطريقها اذا حبت وجانت ناويه تزوج وتفرح اني اكيف تكون مرتاحه ومستقره بحياتها بس هيه ليش ماحجتلي ليش مافهمتني من الاول ليش سكتت.
_مجنت ادري والله ماعرف بيه يحبني من صارر الحادث يلا هوه اعترفلي صدكني ممسويه شيء حته ماتواصل وياه.
آرون : هسه تردينه لوو لأ تقبلين بالزواج منه.
دنكت راسي واني ابجي ماعرف شنوو اكول حيل متردده وخايفه.
آرون : ارفعي راسج باوعيلي حبيبتي لاتبجين رهوفه باوعيلي اني ماضايج منج والله ماضوج ابدد اذا تردينه بس كولي ايي واني ماوكف بطريقكم اخليكم تزوجون عادي اخذي الي ترتاحين وياه بس اذا ماعاجبج وبس هوه يريدج لاتجبرين روحج عليه ابددد انتِ حره بقرارج وحياتج هذا زواج موو لعب موو يوم ويومين راح تبقون عمرر سويه.
_ماعرف والله
جون : اشش رهف كولي اي ماتتندمين والله تعرفيني شكد سبورتي اخذج ونسافر وطز بالكل اخليج تتونسين ولعباس ابو فاضل.
ضحكت علئ كلامه دنكت راسي هوه هم ابتسم اخوي بس ساكت منتظر اجاوبه علئ كلامه
اليان : هسه شنوو نهلهل نكول مبروك لااا
جون : رضت رضت هلهلي
اليان : ماعرف والله ههههه
آرون : رهف جاوبي.
_موافقه.
جون : كلوووووووووش اخذها الجان رايدها.
ضحكت علئ هلهولت جون ترن رن عبالك مال مره مسح وجهه اخوي بتوتر وابتسملي وكال.
آرون : انشالله يكون قرارج صح وماتتندمين عليه بعدين
اليان : اهوو آرون شكدد تجيب طاقه سلبيه انتَ شبيك تبارك الهم لاتبقه هيج كالب وجهك حباب فدووه.
آرون : تجيب اهلك وتجي باجر تخطبها من ابوي.
جون : حاضر.
آرون : اذا ماكصبك كصب بالمهر اصبرلي
جون : بالعباس مانطيك دروح طلع حركتك بالمهر شنهي هيه راضيه بيه شكد مانطي موو رهوفه موو.
_معليه اني ورا اخوي هوه الي يقرر .
جون : هاا هيج ولج مو راح اصير زوجج غير تحترميني.
آرون : هاا بدينه من هسه
جون : شلوون بلا نبقه ساكتين غير نسوالف
آرون : بعدها ماصارت مرتك عود من تصير الك حق تتحكم بيهاا.
جون : باجر ريوكنه يمكم
آرون : ادري شنوو خطابه جايين تضيفون.
جون : خالي احنه جايين نخطب ماجايين ع اكل
اليان : ههههه نريد نشوفكم.
آرون : راح نبتلي تصير روحتكم ورجعتكم علينه عمي احنه عرسان جدد مانريد دوخه
جون : لا يابه شكد قديم انتِ اخذ رهف ونسافر
آرون : واني وياج هم اليان نروح.
اليان : انشالله
جون : يلا رايح حبيبي ابو حسين بعد كلبي موو باجر طنكر علينه ليووم يلا كدرت ارتاح باجر اذا طلعلك سالفه اخذ رهف وشرد كدامك هل حجي.
آرون : دروح وخلي النفس راضيه عنك يلا دعبل.
ضحك جون باوعلي هوه عيونه تلمع من الفرح مجنت متاكده من مشاعري بس احس جون خوش ولد واني واخوي نعرفه من زمان رابين سويه قبل لا تطلك امي وابوي هوه ويانه
بعده اخوي بالاعداديه وخلصو الكليه سويه وهوه ويانه يعني عمرر.
ماعرف شنوو منتظرني ويه جون وياترئ راح اكون مرتاحه وياه او لأ.
اليان : حبيبتي مبروك تستاهلين كل الخيرر
_بعد كلبي الج فضل بهل شيء الصاار.
اليان : مانسه وكفتج وياي اعتبرج اختي موو بس صديقه
_حبيبتي هنيال اخوي عليج
آرون : يلا تعالو ندخل.
دخلنه سويه للبيت رحت سويت الهم كهوه ومعجنات عندي واهس افتر واضحك وياهم ضيفتهم وكعدت وياهم شويه واجه ابوي حجوله كل السالفه.
رحيم : والله يابويه اني هم ماصدكت جون يسويها گلت خوش ولد وعمره ماطلعت منه سالفه موزينه.
آرون : أي واكو موضوع ثاني
رحيم : شنوو؟
آرون : جون طلب ايد رهف للزواج
رحيم : شنوو
آرون : وباجر يجيب اهله واعمامه ويجون علينه.
رحيم : خليهم يجون هلا بيهم بس رهف ماضن مقتنعه شتكولين بويه.
دنكت راسي وسكتت ضحكت اليان وكالت الابوي.
اليان : لأ عموو راضيه السكوت علامه الرضا.
رحيم : هاهيه بويه اذا راضيه بيها الخيرر جا احنه شنريد نريدها تزوج وتستقر بحياتها هم كبرت ولازم تشوف حياتها ومستقبلها.
اليان : ايي والله صح تستاهل رهوفه كل الخيرر.
رحيم : تروح بنيتي وتجيني بنيه ثانيه.
اليان : اني بنتك الاصليه ترا هااا هيه تقليد
_لاا حبيبتي اني الاصليه
اليان : يومين 3 وتروحين واني ابقه وياه علئ عنادج
كامت اليان حضنت بابا تعاند بيها وهوه يضحك غلست عيوني مراضيه.
_راح ابطل والله لاتعانديني
رحيم : هههه ثنينكم بناتي.
آرون : واني؟
_هههههه حته أيسر غاار من عدنه
آرون : اني الاساس انتم كلكم مزيفين
اليان : هههه فدووة للثقه.
بقينه نسوالف ونضحك شويه وكامت اليان وكالت.
اليان : يلا حبيبي لازم اروح توصلني.
آرون : أي يلا
اليان : يلا مع السلامه.
سلمت علينه وطلعت رجعت لبيتهم كلش مرتاحه وفرحانه اكثرر شيء يفرحك من تختار شخص ويكونون اهلك راضين عليه وماشخص معارض.
....
اليان : كلش فرحت من تصالحو آرون وجون صداقتهم جانت كلش ،كلش حلووه
بسبب تصرف خطاء خربت كل علاقتهم وهمه جانو من الطفوله سويه
طلبت من آرون يرجعني لبيتنه لأن كلش تأخرت طلعت من لبارحه الظهر ورجعت هسه بـ 2 الظهر.
بالطريق واحنه دنمشي اباوع علئ آرون صافن ويدخن خليت ايدي فوك ايده.
_شبيك
آرون : خايف علئ رهف
_ليش
آرون : اخاف جون ميسعدها هوه صح خوش ولد وشاغول وحباب بس متردد منه خايف عليها ماترتاح وهيه حيل حساسه.
_لاتخاف ابدد انشالله تكون حياتهم كلهاا سعاده وفرح لاتفاول عليهم بهل افكار السلبيه ماطول هوه يحبها وهيه تحبه راح يكونون متفاهمين صدكني.
آرون : انشالله اني هذا الي اريده تكون مرتاحه بحياتها وسعيده اختي الوحيده ماريدها تتعذب اكثرر مما جانت متعذبه ومتكدر تتحرك سويت كلشي علمود ارجعلها صحتها وحيلها.
_تستاهل كل خير رهف كلش حبابه ومؤدبه وانتَ اخوها شما تسويلها ربك راح يجازيك بالاحسن صدكني الاخت نعمه بالحياة اني ماصارت عندي اخت بس اريانا عوضتني ورهف هم صارتلي اخت شكدد مادور ماتلكه مثل حنان الاخت الاخوه بيهم حنان وبيهم لاا والله ميهتمون ابدد ولاحته يفكرون باختهم كلشي يهمهم هوه نفسهم مثل العندي اكبرر مثال هسه يلا تغيرو وصارو حبابين.
آرون : انتم بعض الامور عكسنه عدكم حريه مطلقه واحد مايدخل بحياة الثاني احنه لا يدخلون بس الخوه البينه قويه وحلووه واحد يحب الثاني جانو ابوي واعمامي علاقتهم كلش حلووه بس بسبب عمي الصغير خرب كلشي.
_الحمدالله ع كل حال.
رفع ايدي لحلكه باسها بهدوء باوعلي بحب وكال.
آرون : شكد تعذبك الحياة وتخليك تذوگ المر بس بالاخير لازم تعوضك وترجعلك الامل والحياة وانتِ احلا عوض بحياتي كلهاا.
_انتَ عوضي الحلوو ربي لايحرمني منك.
آرون : احبج هواي اليان
_واني هم احبك
باس ايدي بهدوء وكمل سياقه وصلني للبيت قبل لا انزل باوعتله بحب تقربت بسته من خده وهمست.
_خليك دائماً هيج عمرك لاتتغير.
آرون : ولايوم تغيرت حته اتغير هسه
_عفيه شاطر
آرون : بوسه وداعيه راح انحرم يومين.
_ليش يومين
آرون : اليوم راح يخلص وباجر كله ماجيج لأن اهل جون يجون علينه والبعدها يلا اكدر اشوفج يعني يومين
_يوم واحد ماتعرف تحسب
آرون : يومين
_لٱ يوم
آرون : هسه تنطيني بوسه وعوفي العناد.
تقربت يمه مشيت ايدي علئ لحيته بسته بطرف شفته جنت اريد ابتعد سحبني من ظهري عليه يقربني التهم شفتي بقوه غمضت عيوني واني حيل متوتره.
بادلته بحب ابتعد عني مسحت حلكي واني خجلانه.
آرون : طيب
_هههه شنوو الطيب
آرون ; البوسه منهن طيبه حيل
_اروون
آرون : روح ارون
_يلا كافي باي رايحه تاخرت
طلعت بسرعه من السياره ضحك هوه عليه لوحتله بايدي معنئ باي شغل السياره وراح دخلت للبيت جان الكل موجود كاعدين بالصاله يشربون كهوه ويسوالفون.
_سلام عليكم
الكل : وعليكم السلام
آيلا : شلون جانت السفره
_كلش حلووه تونست
تيمور : مانطيتني علم بيها؟
_هوه اني حجيت لجنان.
جنان : ع اساس اجيتي تاخذين رأي هوه مجهزه روحج بس كلتيلنه رايحه
اريانا : عوفوها تتونس غير زوجها صاار عادي شبيها اذا طلعو سويه.
جنان : كلشي عادي عدجن.
قصي : تعاي يمي تعاي.
استغربت موو من عوايده قصي يصيحلي اكعد يمه رحت كعدت يمه باوعلي ابتسم وكال.
قصي : عندي موضوع وياج
_ي كول
قصي : رهف
_شبيها؟
قصي : اريد اخطبها.
صفنت هاي ليوم رهف بيوم واحد ثنين خطابه اجوها ههههه خطيه قصي ميدري راح تنخطب راح تتحطم احلامه.
_بس رهف راح تنخطب
قصي : شنوو ليش لمنوو
_صديق آرون خطبها واتفقو علئ كلشي وهيه راضيه يعني راح تصير خطبه رسميه
ساهر : تبخرت مشاعرك قصي
قصي : عادي اكوو بنات هواي عوفها الله يسعدها كل شخص وقسمته.
_حبيبي الف بنيه تتمناك والله اني اختارلك بنيه تكون حلووه وع ذوقك اعرفك شنوو تحب.
قصي : انشالله اشوف
تيمور : اني اجيبلك نسوان وتختار بكيفك
اريانا : أي موو هنه بضاعه وتخلي يختار بيهن. مسطراتلك النسوان. ؟
_ههههههه بدت الغيره.
تيمور : انتِ شعليج اخوي واختارله.
اريانا : ومنين تجيبله هل بنات بلا تعرفهن منين تسوالف وياهم شايفهم.
تيمور : بنات الحلال هواي.
اريانا : اي واضح هوواي وهل تحجي هييج
تيمور : وحلوات انوب كلهن.
اريانا : اخذلك وحده منهم ليش باقي هيج
تيمور : احس هل فكره حلووه شتكول قصي ادورلنه نسوان اني وياك نتزوج بيوم واحد الله.
اريانا : الله؟ يعني اني موو بعينك ابد هيج تفكر تاخذ عادي.
تيمور : جا شنوو ماصايره الشرع محلل النه 4 نسوان.
اريانا : وتريد طبق الشرع براسي اني؟
تيمور : اي
هزت راسها بـاي دمعن عيونها كلش راح تبجي اني مخليه ايدي ع حلكي واضحك وآيلا كذالك شافتنه نضحك كامت تريد تصعد ركض تيمور لزمها حضنهاا علئ صدره يبوس بيها
تيمور : اتشاقه والله اتشاقه شبيج ع كل سالفه تبجين.
اريانا : وخر عني ماريد وخرر
تيمور : تعاي بابا شبيج صدك تحجين.
سحبها كعدها علئ القنفه كعد يمهاا سحب راسها لحضنه باس راسها وبقه لاف ايده عليها.
تيمور : اني مابدلج ابدد ولا اتزوج ماطول انتِ عندي لاتفكرين بيوم اخذ وحده عليج مكفيه وموفيه تارسه عيني وزياده.
اريانا : أي واضح كلش تارسه عينك ليش تحجي هيج لعد وتحرك گلبي
تيمور : احبج اكثر من تغارين هيج ثلج ينزل ع كلبي
اريانا : بسيطه اني اعوف شلون اخليك تحترك مثلي.
صارو واحد يباوع للثاني تحسهم يسولفون بالنظرات احنه بس نباوع قصي باقي يصفن خطيه كل واحد هوه ومرته وهوه باقي هيج.
عفتهم وصعدت لغرفتي اخذت ملابس ودخلت سبحت وطلعت.
شسورت شعري ومشطته كعدت علئ السرير مالتي بقيت اكلب بجهازي اباوع للصور الي اخذتهن صورة الي اني وصبيحه وارون بالبلم من صعدنه هوه بقه يصور لأن اني اخاف باقيه بس مجلبه بيه ماكدر حته اتحرك.
هواي صور حلوات احب كلش الاجواء هناك تفتح النفس تخليك ترتاح وتنسه كل الهموم العشتها بحياتك.
مر 10 ايام انخطبت رهف وصارت مرت جون رسمياً وليوم عرسي جهزت كلشي
طول الفترا الفاتت اني واريانا ورهف بالسوك مرات ناخذ ويانه آيلا ومرات لا تبقه لأن حامل تلعب نفسها من الفره والسيارات.
كملت النيشان مالتي ورهف هم تاخذ الهاا اشياء لأنو مقررين اول مايخلص عرسنه همه يعرسون ورانه باسبوع اذا هوايه.
اني وارون ماطولنه بس 15 يوم ورا خطوبتنه وقررنه نتزوج.
تيمور تغير هواي بهل فترا الي مرت صاار يصلي ويقرا قرآن اريانا اشوفها دائماً كاعده يمه تعلم بيه علئ الصلاه وهوه مخلي ايده علئ خده ويباوعلها مثل الطفل المطيع ههه
احس صارت علاقتهم كلش كلش حلووه لأن ثنينهم صارو يخافون الله يحبون بعض بطريقه كلش نظيفه وحلووه.
رغم تيمور أذاني هواي بس من اشوفه يحب اريانا ويخاف عليها هواي افرح اكول تستاهل هيه حيل وكفتلي بهذيج الايام تستاهل شخص يداريها ويحبها.
خسرت ابوها مثلي وجانت ضحيه مثلي ثنينه تعذبنه وثنينه اجانه عوض يعوضنه عن كل الايام السوده الي مرت.
بالصالون خلصت المكياج مالتي والتسريحه اريانا هم يمي يسرحون بشعرها.
_ها شرأيج.
اريانا : الهم صلي علئ محمد تجننين طالعه عين الحاره بارده عليج
آيلا : شدعوه شدعوه هسه بس اكمل مكياجي اطلع احلا
_منوو يكول؟
آيلا : اني اكول هههههه
اريانا : عفيه استعجلي هسه يجونه نروح للقاعه واني حته التسريحه مكامله
:: مابقه شيء
اني كملت كمت اباوع لنفسي بالمرايه بالبدله البيضه طالعه كلش حلووه بيها اختاريتها مابيها هواي شغل كلش كلش نازكه.
من كدام الاكمام نازله علئ كتافي وحوالين الصدر فيكه تجنن ومخليه ورا شعري تور علئ طول البدله من ورا والمسكه اختاريتها ورد طبيعي واسمي عليها.
سويت كل تفاصيل عرسي مثل ما احب واكثرر هم.
بقيت اصور علئ المرايه اكو مصوره داخل الصالون اخذت لقطات اجتي آيلا هم صورت وياي بعدين اريانا خلصت هم صورنه كولنه سويه.
خلصنه اجه تيمور ياخذنه من الصالون قررنه تكون الزفه من بيتنه بعدين للقاعه موو من الصالون وكبل للقاعه تيمور ماقبل.
المهم اجانه تيمور يرجعنه للبيت اتصل علئ اريانا باوعتلي وكالت
اريانا : يلا حبيبتي وصل تيمور خليني اغطي وجهج.
شالت البرنص خلته فوك راسي لزمت بدلتي اريانا من ورا وآيلا لازمه ايدي تمشي بيه جان تيمور واكف بالباب مدلي ايده لفيت ايدي علئ ذراعه باس راسي وهمس.
تيمور : الباري يحرسج.
_حبيبي.
تيمور : مو توكعين وتفضحينه ترا اني اعوفج واطفر ماتحمل فشله
_هههه لا ماوكع بس ابقه هيج واكف وياي.
تيمور : للموت بظهرج.
ابتسمت بفرح وصلني للسياره فتحلي الباب دخلت بيها
اريانا كعدت بالصدر وآيلا اجت كعدت يمي
شغل السياره تيمور وشغل اغنييه الف الصلاه والسلام عليك يا حبيب الله محمد وراها ردح هههه.
اريانا تركص وتفرفر باديها كدام تيمور وهوه يباوعلها بطرف عين.
اريانا : كلوووووش.
تيمور : حرامات ماسوينه عرس شنوو رأيج نعيدها ليوم والبسج بدله؟
اريانا : هههههه اي حلوه
تيمور : صدك احجي جديات اجيبلج بدله واصعدج بالقاعه نعيد عرسنه شتكولين؟
اريانا : يااا تيمور شنوو نسوي عرس صرنه شياب بعد قديمين مايصير خلينه فرحانين باليان.
تيمور : ماتخلين واهس.
آيلا : اني مكانج اسويها الله تخبل اجواء العرس.
تيمور : اي خويه بيها طعم
حجه هيج تيمور ايلا وجهه صار ينطي الوان اريانا انشحطت من الضحك.
وصلنه للبيت جايات عماتي كلهن وبنات خالتي اديان وسهر و اريام كلهن جايات.
تلكوني هلاهل وجكليت ورد يشمرن سون الحفله حفلتين صارت الاجواء تخبل فرحت اكثر من العرس من شفتهن جايات.
اديان : الف الصلاه والسلام عليك ياحبيب الله محمد كلووووش
سهر : الف مبرووك حبيبتي
_حبيبتي سهر كلش فرحت بجيتكم.
اريام : صارلنه اسبوع نخطط للجيه واخيراً اجينه وحضرنه عرسج.
اريانا : اشو بس اليان اني ممشتاقاتلي ؟
راحن كلهن حضننها وهيه تضحك جعصنها جعص دخلوني للبيت كعدت بالصاله شغلو اغاني وبقو يركصون البنات ذبن لحم بالركص
كوموني وياهم بقيت اركص واتفتل وياهم افتر بالبدله مالتي مثل الاميرات ههه صارو دائره عليه يفترون واني اركص وافتر بالبدله.
شويه وصلت الزفه رجعت كعدت خلوو علئ راسي البرنص شمرن البنات ورد من بداية الباب لحد القنفه الكاعده عليها.
دخلت رهف هيه وعمت ارون وياهم بنات ماعرفهن من اقاربهن يهلهلن.
مدنكه راسي وحيل متوتره شويه ودخل ارون وياه شيخ اجه يمي تيمور مدلي ايده لزمت ايده وكمت اريانا ترتب بالبدله ورايه.
لفيت ايدي علئ ذراع تيمور اخذني لارون ينطيني اله.
حيل حبيت هل لحظه ارون واكف يباوعلنه سلمني اله تيمور سلم عليه ارون وتشكر من اعمامي الموجودين
طلعنه من البيت امشي والبناات تهلهل وتشمر ورد علينه ارون يضحك ويشمر من راسه انترست التسريحه مالته ورد.
جان مدخل السياره للبيت بالحديقه فتحلي باب الصدر دخلت بالسياره شويه وجماعة ارون طلعو سلاحات تيمور طلع مسدس وصار يرمي وياهم اخذه الواهس خطيه هههههه.
حركو الجو بالرمي اني من نوع ابد ماخاف من الرمي بالعكس كلش احب اجوائه.
دخل ارون للسياره وهوه يضحك شغل السياره وطلعنه من البيت اريانا وعماتي وبناات عماتي وخالتي هيه وبناتها كلهن يجن وياي للقاعه بس اخواني بقو بالبيت.
بالطريق شغل ارون اغاني وصارر يركص يلزم ايدي يركصني وياه فرحتي متنوصف بهل لحظه.
بقينه ثنينه نصفك ونركص داخل السياره شخط السياره وخلاهاا دخانه ورانه.
جماعته طول الطريق يدكون هورنات ويشمرون كلنكس ورد بالشارع.
فترينه هواي يلا اخذونه للقاعه علمود التصوير مال الزفه.
وصلنه للقاعه نزل ارون واجه فتحلي الباب اخر سياره احنه وصلنه كلهاا قبلنه وصلت لزم ايدي نزلت وياه.
دخلنه للقاعه اول مادخلنه شغلو دخان و العاب الناريه
شغلوو ديجي علئ الاغاني تمشينه بهدوء لنهاية القاعه كعدنه بالمقعد مالتنه وبدت الحفله.
القاعه مختلطه كل جماعة ارون جايين واحنه بناتنه وبنات عمنه كل لبسهم مستور يعني فساتين وهاي بس موو مشلتح كلش شغلولنه اغنيه هادئه اليسا.
ارسمني بـ ليلك نجمه "
ضيع الماي في العين "
اكتمني بعمرك كلمه يحكوها الناس بعدين .."
محاوطه ركبه ارون باديه وهوه لازم خصري من الجهتين ونركص علئ كلمات الاغنيه بهدوء قلوو من اضاءة القاعه نزل راسه ارون علئ راسي غمضت عيوني
ارون : اميرتي راح تكونين اميره ارون موو بس مرته وحبيبته.
_حبيبي
شالني من خصري وفرني لزمته بقوه واني اضحك الشباب صارت تصوفر وتصيح.
نزلني رجع يركصني بقينه هوواي نركص ونتفتل اخر شيء رجعنه كعدنه باماكلنه جماعة ارون بقو يركصون شغلو جوبي صارت مجموعه ويركصون.
بعدين اجو يتباركون النه ويسلمونه الهدايه خالتي هيه والبنات جابولي طقم كامل ذهب.
واخوي تيمور هوه وارياتا مشتريلي سياره اريانا انطتني المفتاح كهديه منها هيه واخوي.
البقيه كلهم سلموني هدايه خلصت الحفله وصار وقت نطلع من القاعه ونرجع للبيت اريانا اجت يمي دنكت وهمست.
اريانا : حضري نفسج بعد كم دقيقه تروحين بيهاا.
_اريانا عفيه اسكتي من غير شيء متوتره وخايفه حيل.
آيلا : ياا شبيج اصلاً السالفه حلووه تعيشين احلا لحظات ويه حبيبج بس خليج مسترخيه ومرتاحه ومتحسن بشي شبيج اريانا ليش تخوفينها ترا الموضوع كلش حلوو وسهل.
_هههه عزا ولج فضحتينه.
اريانا : اي اي صح الموضوع سهل حيل
عود ميردون يخوفوني شويه واجه ارون مبتسم ابتعدو عني شويه رفع البرنص خلاه علئ راسي وكومني طلعنه من القاعه سويه.
اخذني لبيتهم طول الطريق ساكته واباوع للورده الي بايدي مد ايده لزم ايدي فزيت وخفت باوعتله ابتسم وكال.
آرون : لاتخافين شبيج ترجفين.
_مابيه شيء.
آرون : ندخل للغرفه اخليج ع. راحتج اذا اشوفج ممستعده ماسويلج شيء والله ابد لاتخافين اوك.
هزيت راسي بأي باس يدي بهدوء وكمل سياقه وصلنه للبيت فتحلي الباب دخلنه سويه ابوه واخته بقو بالقاعه محتفلين بس اني وياه رجعنه للبيت.
البيت كله ورد مزينينه واجواء رومانسيه شموع وكذا.
شلت البدله ودخلت للغرفه حيل تصميمها حلوو مثل ماجنت اريدها لزمني من ايدي دخلني للغرفه سد الباب بقيت واكفه واباوع حواليه متوتره كلش وخجلانه.
سحبني عليه خليت ايدي علئ صدره متوتره وخجلانه نزلت راسي عنه رفع وجهي بايده يباوعلي بحب طبع بوسه دافيه علئ جبيني وكال.
آرون : تحقق كلشي جنه متمنينه يصيرر.
_الحمدالله.
آرون : هههه شبيج عيونج مدمعه
_حيل فرحانه
آرون : ماريد اشوف دموعج حته لوو بفرح اريدج تكونين دائماً مرتاحه.
_وجودك بحياتي هذا الفرح والراحه بحد ذاتها.
آرون : اكيد هواي نخليج ترتاحين
_آرون
آرون : هههه نيتي نظيفه لاتمشين صفح
_هسه اني شكلت انتَ اخذتها بغير نظره لأن بالك هل شيء.
آرون : شلون موو بالي لعد
دنك راسه يشم ركبتي بهدوء كلبي صاار يدك بسرعه يبوسني بهدوء ويفتح الاكسسوارات عني ماحس غير نزع كلشي عني.
شالني بين اديه واخذني علئ السرير يقبلني ويتقرب مني بهدوء فقدت وصرت وياه بغير عالم
عالم مليء بالحب والفرح والسعاده احس ربي عوضني بعوض كلش حلوو وهوه آرون
حبيبته وانتظرت وصبرت واخر هل تعب صاار الي وصرت مرته وعلئ اسمه هواي خسرت اشياء بحياتي
وتعذبت وبجيت وانقهرت بس الحمدالله اخر هل تعب والتجربه الصعبه فرح وسعاده.
كل انسان ياخذ نصيبه من الحياه ان كانت صعبه او سهله لازم يعيش تجربه.
...
اريانا : خلص العرس مال اليان رجعنه للبيت اني مكسره من الكعب وطول الوقت شايله تيم من يشوف عالم هواي يستغرب يبقه يبجي.
رغم هوه موو صغير بس ممتعود علئ هيج مناسبات وطلعات وكذا كل وقته جان بالبيت مانطلعه ابدد.
رجعنه اني وآيلا وام تيمور للبيت خالتي اخذت بناتها وراحت علئ بيت اهلي حته ماما اجت لعرس اليان بس ماجت لا عفاف ولا وحده من اخواتي الكبار.
دخلنه للبيت بوجهي لغرفتي شايله تيم اخذته خليته بكاروكه نزعت الكعب ورحت للكنتور طلعت بجامه للنوم ودخلت للحمام غسلت وبدلت ملابسي
احس المكياج ثكيل علئ بشرتي بليل حيل اني موو كلش احب اخلي مكياج اوفر بس لأن عرس دخلنه صالون ويه اليان كلنه.
مشطت شعري خليت سبلاش لجسمي وعطر رطبت وجهي واديني خليت الهم ورحت لتيمور اشوفه شنوو يسوي.
جان الضوئ مال غرفته مشتغل فتحت الباب بهدوء جان كاعد علئ الارض فارش كدامه سجاده ويقرا قرآن.
حبيت كلش هل تغير الصار بيه باخر فترا كلش التزم بصلاته ودينه واجباته صاار انسان ثاني مختلف جذرياً عن تيمور القديم الي ميخاف من ربه ويسوي اشياء حرام.
يقرا بصوت كلش حلوو ويردد الايات بشكل صح علمته علئ الصلاه شلون يصليها جان ميعرف يصلي ابد وتعجبت من هل شي اني لأن هوه موو صغير جبير وممصلي.!
دخلت للغرفه كعدت مقابيله علئ القنفه خلص من القراءة سد القرآن باسه وخلاه ع سجاده باوعلي بهدوء احس وجهه منور مدري اني اشوفه حلوو حيل صاير.
_تقبل الله حبيبي
تيمور : منا ومنكم هاا شلون جانت الاجواء
_كلش كلش حلوو العرس صاار تمنيتك تكون وياي نركص سويه.
تيمور : كتلج نسوي عرس ماقبلتي.
_تعال هنا نركص.
تيمور : حته تتبخر حسناتي لا يابه ماريد مشكوره هستوني بديت اتعلم واخلي ربي يسجلني يمه تردينه يطردني حته من ادينه
_ههههههه
تيمور : يكول الي يصلي لازم مرته تجي كل يوم وتبوسه حته تكمل صلاته.
_هذا منوو الي كال هيج مقوله
تيمور : تيمور
_هههه وانتَ شنوو نبي
تيمور : هسه مايصير البشر يطلعون امثال ومقولات.
_لا حبيبي يصير كلشي يصير عندك انتَ
تيمور : ديلا تعاي طبقي الشرع والمقوله.
_ههههه انتَ تعال
كام سد السجاده ورجع القرآن لمكانه واجه كعد يمي ع قنفه سحبني لحضنه لفيت ايدي حوالين بطنه ضميت نفسي حيل عليه باس راسي بهدوء رفعت راسي اباوعله واني بحضنه.
تيمور : احبج
_شكد؟
تيمور : بكد رحمة الله.
_اني هم احبك هوواي اكثر من حبك الي
تيمور : بوسه صغيرونه
قربت وجهي عليه باس شفتي بخفه ابتعد عني رفعت حاجب بستغراب وكلت
_بس هيج
تيمور : لعد
_خفيفه مابيها طعم
تيمور : تحبين الدسم انتِ
_ههههههه ايي تعلمنه ع دسم
ضمني عليه يبوس وجهي رفع راسي عن صدره باس شفتي بادلته بكل حبب.
تيمور : تدرين شنوو جنت ادعي؟
_شنوو
تيمور : انو رَبي يوفقني ويثبتني علئ هذا الدين وميخليني يوم يومين وابتعد اريد ابقه هيج شكد احس بالراحه صرت من اصلي صرت ادعي من كل كلبي واسوي صلاتي مثل ماعندي شيء كلشش مهم بحياتي صرت اضوج اذا ماصلي بنفس الدقيقه تتخيلين !!
_هوه هذا الصح جان لازم تكون هيج من زمان بس هسه الحمدالله انتَ تغيرت وعرفت الحلال والحرام التجأت لربك بعد ماعصيته ربنه غفور رحيم شما يسوي العبد ويرجع يتوب ويستغفر ربه ع كلشي سواه صدك ربنه راح يغفرله.
تيمور : الحمدالله احلا شيء صار بحياتي انو ربي رزقني بيج وخلاج تكونين وياي لوو ما انتِ هسه اني مجنت راح اتعلم شيء واصلاً استحي اكول لشخص تعال علمني الصلاه اكول هسه يسألني يكولي وين جنت شراح اجاوبه.
_اني وياك بكل خطوه راح تخطيها للطريق الصح راح اكون سند الك وانتَ سند الي نكون ايد وحده منعوف بعض للموت.
تيمور : تعاي بوسه ع هذا الكلام العسل يكول الشيخ تيمور جاسر المراه اذا تكلمت كلام حلوو وينكط عسل لازم تاخذلك منهاا بوسه من نفس الحلك
_ههههههه يمه ولاتكعد انتَ
تيمور : اني لازم اصير اكتب مقولات عن الحب والغرام
_يلوگلك حبيبي.
تيمور : وهذا كلمه جميله ثانيه لازم يصيرن بوستين. !
_هههههه يلا ابوسك شكوو بيها.
تيمور : 3 صارن
_اهوو بطلت
تيمور : تتعايييي
سحبني عليه يبوسني ويضحك بيه قضينه احلا ليله واحلا لحظات سويه
تغير تيمور واحس هل تغير كلش مخلي محبوب وحلوو شكد جنت انغث منه وانقهر واضوج هسه كلش صرت اتقرب منه واكون وياه
لأن م̷ـــِْن صدك تغير جذرياً خليته يرجع للدين يصلي يقراء قرآن يكون هادئ ميتحكم بأي شخص ولايفرض كلامه علئ احد.
يهتم بينه اني وتيم اكثر مما يهتم بنفسه احب كلش حنانه عليه وخوفه وحرصه بكل لحظه صارت تمر صرت احبه اكثر واكثرر.
مرت ايام وليالي واليان مرت فترا علئ زواجها من ارون سمعت بيهم راجعين من السفر اول ماتزوجو سافرو لروسيا.
بقو هناك فترا ورجعو طلبت من تيمور نعزمهم ونطلع سفره كولنه سويه وتيمور وافق كال نسوي كعده علئ الشط وناخذ ويانه سمج ومشاوي نشوي هناك.
خابرت اليان وكلت الهاا تجيب وياها رهف لان هم تزوجت وبعدها عروسه كلت الهاا تخليها تطلع ويانه حته تكون لمتنه حلووه وكامله.
جهزنه الفراشات والاكل الي راح ناخذه ويانه اشيل وانطي لتيمور وهوه يخلي بالصندوق حته ساهر وآيلا اجو ويانه.
بس قصي ماقبل يجي راح للشركه يشتغل احسه ميريد يشوف رهف او يضوج من هيج جمعات ماعرف.
لبست تيم طاقيه وبرموده لان الجو صار حارر صرنه نلبس صيفي.
وتيمور لبس مثل تيم بالضبط هم طاقيه وبرموده و تيشرت.
صعدنه اني وتيمور وتيم بسياره وآيلا هيه وساهر بسياره آيلا صاير الهاا بطن خطيه متكدر تتحرك هوايه طلع بيها بنيه خطبتها لتيم قبل لاتنولد هههه.
رحنه علئ شط دجله نسوي كعدنه هناك لگينه اليان ورهف وجون وارون كلهم واصلين قبلنه نزلنه سلمنه علئ الكل.
فرشنه احنه البنات الفراشات تيمور نزل النركيله بقه يعمر بيها وجون وارون شغلو نار للمشاوي وساهر يجهز بالاكل.
رحت يم تيمور واني اريد اجرب النركيله كلش احب ريحت دخانها يخلوو نكهات تجنن كعدت يمه اباوعله برائه.
تيمور : ها بويه ؟
_اممم عادي اجربها شويه
تيمور : لاتخليني افرك حلكج مو عيب شنوو دخنين
_حباب محد يشوف كلهم ملتهين مصه وحده
تيمور : انجبي بابا تختنكين منهاا تضرج بعدين شنوو مصه موو عيب صايره ماتعرفين تحجين.
_لعد ليش تشربها انتَ اذا تضر هاا ؟
تيمور : اني رجال اتحمل انتَ لاا ماتكدرين يلا روحي جهزي الزلاطه والمقبلات موو مخليه الشغل بس عليهن.
_مزاعلتك والله بعد ماحجي وياك ابدد
تيمور : اي خوش خوش
_راح اروح بعد ماحاجيك
تيمور : روحي
_تيمور شبيك بس مره عليك الله فدووه بداعتي حبيبي احبك والله عمري انتَ تعال ابوسك .
تيمور : اريانااا.
_تمام
عرفني ضجت هل مره درت وجهي اريد اروح لزم ايدي درت وجهي اباوعله بزعل
تيمور : هاج خبله.
اخذتها واني فرحانه اخذت نفس قوووي من النركيله وزفرته اخذني الواهس اخذت بعد نفس جنت اريد ازفره انشحطت بقيت اكح عيوني دمعن اخذها من ايدي بسرعه تيمور وبقه يدك علئ ظهري حته اتنفس.
تيمور : عفييه هسه رتاحيتي ديلا بلا هسه احسلج هاج اشربي مي.
انطاني مي شربته بلعت ريكي باوعتله بفرح وكلت
_اووي تخبل والله
تيمور : كومي لاركعج بالنركيله كووومي
_اعصابك يحلوو
تيمور : كومي ياحلوه لاطلعين روحي كومي حبيبتي.
_كول احبج
تيمور : احبج
_حبيبتي ام جهالي
تيمور : وبعدين وياج انتِ تكومين لوو لااا.
ساهر : خير شباب
تيمور : ها خلصتو شوي بعدكم
ساهر : بلا تعال شوف شكد اخلي
تيمور : ماشي
كام تيمور وراح ويه ساهر علمود الشوي بقيت اباوع للنركيله ابتسمت بفرح عبالك حصلتلي علئ جائزه كعدت مكان تيمور وبقيت ادخن ورجع ليورا منا لحد مادخت صرت كوه مركزه عبالك سكرانه.
صبو الاكل اجت عليه اليان بقت صافنه اني بس متمدده واباوع للسماء دايخه حيييل
اليان : اريانا شبيج ولج
_هههه تعاي اشربي وياي
اليان : عزا العزاج تشربين نركيله؟
_طيبه حيل
اليان : هسه اصيح عليج تيمور
عافتني وراحت صاحت تيمور اجاني بسرعه شافني دايخه جاب البطل مال المي وشمره علئ وجهي شهكت بسرعه وباوعلتله بخوف
تيمور : اني شگتلج؟
_طيبه
تيمور : حسابج بالبيت كومي تيم نام عد رهف كومي اخذي منهاا ملتهيه دخن وعايفه ابنهاا خوش ام
_اهوو
تيمور : كومي ولج
كمت واني امسح بوجهي من المي وكفت كدامه جان مخلي خاولي علئ كتفه اخذت طرفه مسحت وجهي منه بسته بخده وهمستله
_حبيبي متلوكلك العصبيه
تيمور : ماتعبرينهن عليه ليوم حسابج عسير.
_ليش
تيمور : ماتكعدين راحه
_احبك
تيمور : امشي يلا
_تحبني؟
تيمور : اريانا شبيج متخبله امشي
_متحبني
تيمور : احبج خبله احبج تعاي يلا
سحبني علئ حضنه لفيت ايدي علئ خصره رحنه عليهم جانو مجهزين السفره كلشي ماسويت خلصتها اشرب نركيله ههه
كعدنه كولنه سويه اكلنه صارت لمه تجنن كامت اليان اخذت النه صوره جماعيه خلصنه اكل شلنه السفره احنه البنات وشمرنه السفريات رجعنه كلشي للسياره بقينه بس الفراشات
صار اليل كل واحد مخلي مرته بحضنه والنار بالنص يمنه
تيمور مخلي علينه اني وتيم جرجف ولافنه بيه ومخلينه بحضنه مثل الاطفال واليان مخليه راسها علئ كتف ارون وهوه لاف ايده عليها من ورا.
بقينه هواي كاعدين سويه ونسوالف تاخر الوقت كل واحد ركب سيارته واخذ مرته ورجع لبيته ..
وهيج تكون خلصت قصتنه وياكم القصه الي تعذبنه بيها هواي وشفنه امور بحياتنه ممتخيلينها.
لاتغركم الفلوس ولاتهتمون للمنصب وابد لا تمشون للطريق الحرام ابد مهما قست وياكم الايام لاتمشون بهل طريق
دائماً خلو رب العالمين هوه ملجأكم الوحيد خلي عدكم ثقه انو كل تجربة صعبه تمر عليكم بحيااتكم وراها فرج وفرح خصوصاً اذا جنت مأمن وعندك امل جبير بربك قال الله
تعالئ. يَا أَيُّهَا الَّذِينَ آمَنُوا اصْبِرُوا وَصَابِرُوا وَرَابِطُوا وَاتَّقُوا اللَّهَ لَعَلَّكُمْ تُفْلِحُونَ ﴾
اتمنئ تكون عجبتكم القصه تحياتي لكم اريانا
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
