رواية لماذا انا الفصل الرابع بقلم عبير السراي
واجه يوم العرس .. كعدنه الصبح. واني مالي خلك ارفع راسي .. اجتي عمتي ..
العمة :: يلة كومي يمه.. وراج يوم طويل ..
اية :: غطيت راسي . ومحجيت وياهة .. اجتي رفعت الغطة ...
:: اني مو احجي وياج .. يله كومي ...
اية :: يعني اني اكوم شسوي ... لخاطر الله عوفيني بهمي ..غطيت راسي وابجي ...
صارت الساعه ب10 حضروا الريوك مقبلت اكل ..
عمتي كامت تحجي عليه ..
:: يمه لازم تاكلين .. وراج تعب لليل .. لا تتخربطين علينه ...
اية:: مااشتهي .. اريد اسبح ... كمت سبحت .. ونشفت شعري ...ضليت كاعدة بمكاني..
اووف يربي المن اشكي .. ياارب شسوي مااريد اروح لبيته .. مااريد اتزوج هذا القذر ..
دخلت عليه عمتي .. حضنتني .. ..
:: باعيلي انتي بنيتي .. وقطعه من روحي لاتتصورين اني ظلمتج..لان قبلت تزوجين بهيج طريقة لكن ماعدنه حل
لو نحجي وتصير فضيحه وانتي تنفضحين ترى مجتمعنا مايرحم .. مراح يكولون هاي البنية ضحية رجل فاسد
وسكير لا .. راح يكولون هي مو خوش بنية .. هي
مو راحة .. وحجي الناس مايرحم يبنيتي وياذونج ..
والاذى مو بس الج وسمعتج لا حتة بنات عمج بعد منو يتزوجهن هاا .
.انتي بعدج صغيرة ومتعرفين شي بالحياة ولا هالناس ..
اريدج سباعية .. وقوية ومحد يهزك .. انتي رايحه مرفوع الراس .. انتي ماغلطانه ..الغلط راكبة هو من راسه لرجليه ...
اية :: يمه اني خايفه ...
العمه:: لا تبجين يعمري انتي ... من شنو خايفه .
.اية:: اخاف يتقربلي.. هالمرة ومحد يكدر يبعدة عني شسوي ...والله احرك روحي ولا يلمسني مرى ثانيه .
. لو اقتله واقتل روحي واخلص
العمه:: الله كريم اني احجي ويه امه .افهمها ومااعوفج وحدج حتى ابات يمج ... لا تخافين
اية:: صدك والله يمه ... حضنتهة .. وابجي ...
⚘⚘⚘
صارت الساعة ب11 رحنه للصالون ... اشوف العرايس
كلهن فرحانات .. ويضحكن .. الا اني احس جبل على صدري .. هم مااضن بيوم ينزاح ...
وصل السرى الي بالمكياج ... لابسه البدلة .. كعدت على الكرسي .. واجتي البنية دتمكيجني ... باوعت عليه ... بتعجب .. وكالت..
:: اول مرى اشوف عروس هيج معبسة ..
اية :: لا ممعبسة ... اصلا طايرة من الفرحة ..
:: ان شاء الله دوم الفرح ..ربي يتمملج على خير ...
دمعت عيوني ...
... كالت :: حبيبتي لا تخافين .. كولشي بالدنيا يهون ..
اية:: الا همي .. وذبيت حسرة... اووف
:: اكولج شي واعتبريني مثل اختج الجبيرة ..
اية:: اتشرف بيج .. كولي ..
:: الحياة علمتني ... اذا نجبرت على شي مااريدة تدرين شسوي ...
ااحبه ..
اية::تحبينه؟؟ .. واذا اساسا متطيقينه.. ؟؟
::اي احاول احبه.اشوف شنو الايجابيات البي .. اكيد بي ايجابيات..
اية:: واذا مبي ايجابيات...؟؟
:: ماكو انسان مبي ايجابيات.. حاولي تتقبلين الموضوع.. باي صورة لان انتي مضطرة تتعايشين وياه.... فخليهة برضاتي احسن من غصبا عليه ... وانتي بكيفج بعد.
اني مااعرف شنو الظروف الدتعيشيهة ... .مااكدر احكم
.بكيفي ...
وانتي هم اكولج لا تحكمين على الشي قبل لا تجربينه.. واتمنالج حياة سعيدة ... من كل قلبي .. وهسة امسحي دموعج .. وخلي امكيجج.. ولو انتي ممحتاجه مكياج..
اية :: تسلمين حبيبتي.. هذا من ذوقج ..
كملنه مكياج والتسريحه ..
واجتي عمتي ام عمار وياهة بنتهة سلمت علينه .
.
ام عمار:: صلاوات على محمد وال محمد .. ربي يحرسج .. من كل عين .. طالعه تخبلين ...
ابتسمت .. بس كوة مردت افشلهة ..
.. يله السيارة منتظرة خلي نوصلكم للبيت ..
طلعنه وركبنه السيارة جان ابنهة الجبير عمار هو السايق .. شكد فشلت وخجلت .. لان هو شافني بيوم الحادث ..
اووي يربي ياريت الكاع انشكت و بلعتني ولا يشوفني هيج ..
شلون حااخلي عيني بعينه ماادري... .. نزلنه .وطبينه
للبيت مقبلت ام عمار تدخل كالت ساعه ونجيكم ناخذ بنيتنه.. قصدهة عليه
. اني غصه صارت بقلبي .. يربي شيخلصها ...دخلت لبيتنه هلاهل وجوكليت كرايبنه كلهم تقريبا جايين لان مسوينة حنه.. فصارت هي حنه وهي عرس .. ..
اني كاعدة على ناار.. من الخوف والقلق ... مرر الوقت تقريبا ساعتين ...انطني قران اقرأ بس اني لازمته بس بالي مو يم القران .. كل همي الراح يصير بيه بعد الزفه ... !!!
اجني البنات يركضن ... اجتي الزفه ..اجتي الزفه.
حسيت روحي ذابت .. قلبي انعصر عصر.. ..
جسمي كله يرتعش...
دقايق ودخلوا النسوان كامن يهلهلن ويركصن ويهووسن .. شوية ودخل علي .. وكعد بصفي.. ..
اريد اتماسك مااكدر جسمي مدااسيطر عليه..
عمي لزم ايدي وخله ايده فوكاهة وكال...
العم:: امنتك هااي الامانة ...تحافظ عليهة .. وتصونهة.. مثل متحافظ على روحك ... ترى انته اخذت شمعة البيت... ودمعت عينه...
اني ملزمت نفسي كمت ابجي وحضنته... شبعت بجي ... عمي يبجي واني ابجي .. ..
مسح دموعي وكلي:: ارفعي راسي مااريد احد يكول قصرت بيوم ...
حضنته . باسني من راسي ...
عمي :: توكلوا .على الله ...
طلعنه وجان يلزم ايدي... اني مثل التكهربت سحبت ا
يدي وطلع كدامي..
صاحن عليه البنات الزم ايده شو طلعت قبل ..
رجع لزم ايدي سحبتهة .. جرني ولزمني بقوة حاولت
اسحبها مكدرت..
قلت لعد رحت بيهة ..اليوم.. اذا هاي اولها..
وصلنه للباب ودكت المزيكة .معرف اسمهة المزاهر المهم
احس راسي صار طبل ودوخة مفاركتني..
صار اطلاق ناررر ... اني هبط قلبي ودخت حسيت روحي راح اتخربط تماسكت كوة عليه .... بس جسمي كله يرجف
...
..الطريق كله اني دايخة .. اريد اثبت راسي مكدرت لحد ما وصلنه نزلوني عمتي وبنت عمي وصلنه للباب ...
جان يجيبون دجاجة وديذبحوها جوة رجلي
اني شفت منظر الدم بعد محسيت على روحي ..
. اغمى عليه ...
كعدوني عمتي والبنات .. اني فتحت عيوني مغوشات لكيت الكل حوالي .. لكيت وحدة تقيس بضغطي ... جوارينهم مضمدة واجتي ... كالت هابط ضغطهة .. مماكلة...
عمتي كلتلهة لا مماكلة .. ضربتني ابرة .. وكالت لازم تاكلين ..لان ضغطج حيل هابط .... انطني لفة ومقبلت اكولهة .. .اجتي عمتي ام عمار
ام عمار:: هاا يمه .. حمد الله على سلامتج ...
اية :: الله يسلمج..
ام عمار :: شلون صرتي هسة.. ؟؟
اية:: لا احسن شوية..
ام عمار:: هسة تصعدين لغرفتج وتاكلين .. انتي ورجلج
.. وان شاء الله تصيرين زينه ...
ايه:: اووف ..حتى انسدت نفسي خاف جنت رايدة اكول .. .. شسوي .. لزمت عمتي وبهمس ..
يمه فددوة حجيتي وياهة ..
:: اصبري شوية الناس كاعدة ... ..
ام عمار:: كومي بغرفتج ارتاحي احسن ...
بعد شويه صعدوني فوك . واني ارجف كوة امشي احس ماخذيني للاعدام...
دخلت للغرفة ... انبهرت بيهة .. رووعه الاخشاب.. الترتيب.. الديكور .. الورد.. كولشي حلو ...
نزعتني عمتي البدلة .. .. وطلعن البنات كولهن لان صبوا العشة .. ضليت بس اني وعمتي ...
اية :: فدوة عمه شسوي ..والله خايفة..
العمه:: لا تخافين يمه بردا وسلاما.ان شاء الله . هسة احجي ويه ام عمار ... دخلت علينه عمتي ام عمار.. جايبه عشة لعمتي... عمتي اخذتهة على جنب وكعدت تحجي وياهة ..ضلن يتناقشن ...و اجتني .. وكالت...
ام عمار:: يمه لا تخافين .. اني حجيت وياه .. ميتقربلج ..لا تخافين ...
صدكيني بنيتي هسة تعاشرينه وتشوفينه ماكو اطيب من قلبه بس الصار كله ساعة شيطان. وان شاء الله متنعاد...
سكتت....
اترخصت .. وراحت ..
. ورى ربع ساعه اجتي اخته تركض ...
لمياء (اخت علي):: حضروا نفسكم اجه العريس ...
اني عبالك تكلي اجاج الموت...
عمتي لزمتني من ايدي ..
:: صيري سباعية بنيتي اني برة بس تردين شي...
اية ::هاا ..انتي مو كلتي ابات يمج .. ليش راح تعوفيني
...
العمه :: ايي ابات يمج بس مو بالغرفة ...
دخلت ..ام عمار..:: هااا يمه استري نفسج راح يدخلون ...
اني لابسة نفنوف اوف وايت ردان وحجاب .. دخلوا ... ضليت مدنكة ... بس احس كوة اتنفس وقلبي راح
يطلع من مكانه ...
دخل ابو عمار وعلي وبناتهم ...ومنتبهت عل بقية ..
.ابو عمار كلي اعطيني ايدج
لزم ايدي وجاب ايد علي ويه ايدي .. وكام يقرأ دعاء للعرسان لليله الزفاف.. والنسوان يرددن امين ... بس اني من التوتر والخوف كولشي مفتهمت من الدعاء بس اسمع اامين ..
المهم خلص .. باسني من راسي .. وكلي الله يسعدكم.بنيتي .. بس اني فشلانه منه حتى مخليت عيني بعينه .. طلعوا .وعمتي ام عمار ضلت اخر وحدة .. باوعت عليه وتبسمت. اني تبسمت.... بس بداخلي. اصرخ و اكول .. الله يخليج لا تعوفيني...
وطلعت ... وسدت الباب .. واني قلبي معصور عصرر...
ضليت متبسمرة بمكاني من الخوف معرفت اكعد اضل واكفه .. ضليت مرتبكه...
باوعتله بطرف عيني كعد على كرويته.صغيرة .. بطرف الغرفة
رحت كعدت على الجانب الثاني من الجرباية .. حاولت ابتعد عنه ابعد مسافة ... ..بس عيني كل شوية اباوع عليه .. واراقب تحركاته ... خاف يجيني حتى اعرف شلون اتصرف ...
نزع سترته وخلاهة عل المسكه مال كرويته ... .
حتى مباوع عليه ولا التفت عليه...هدوء تام ...
باوعت عليه ...مدنك واديه على راسه.. شويه وكام
..طلع علاج من المجر ... ..وشربه ...
(طبعا اني الى هاللحظة مااعرف ايي شي عنه وعن عائلته كل الااعرفة انو اسمه علي وبسس ..) ..
.
مرت نص ساعه على نفس الهدوء بس جنت ميته خوف.... اخاف هذا الهدوء اليسبق العاصفة .
. اندك الباب كام فتحه . طلعت عمتي ام عمار ..
دخلت انطته القطعه ..البيضه .. اخذهة ودخل للحمام البالغرفة.... دقائق وطلع انطاهة ..باوعت عليهة بيهة دم.. وطلعت تهلهل..
اني كولشي مفتهمت...معقولة جرح نفسة..
وحتى لو... عساه بالموت شعليه بيه .. ..
دخل للحمام ...شوية وطلع لابس دشداشة ... وطلع من الغرفة ... اني جريت نفس حسيته جان خانكني...
.. شوية ودخلت عمتي وعمتي ام عمار واخواته ونسوان اخوته كامن يهلهلن ... اجتي عمتي حضنتني .وكامت تبجي ....
بقن يباركلي ...شويه وطلعن... بقت بس عمتي...
عمتي:: هسة يله ارتاحيت ... هم وانزاح عن صدري...
اية:: يمه كون راح ترحين ...
عمتي:: لا يمه ابات اليوم هنا ... وباجر الصبح تجي مرت
عمج تجيبلكم الريوك .. ونطلع اني وياهة...
حضنتهة ... وكمنه نبجي اني وياهة .. ...
طلعت.. وسدت الباب..كعدت عل جرباية .... ضليت افكر كلت خاف يجي ينام يمي عل جرباية .. شسوي
.. لكيت نضدة الفراشات ... طلعت منهة فراش ابو النفر فرشته وخليت مخدة وكعدت عليه .. شويه اندك الباب. .وانفتح .. دخل علي ... اتفاجأت
ظل واكف قبالي ...
علي:: كومي اصعدي على الجرباية....
اية..:: قلبي انقبض ... مجاوبته ...
علي:: مو احجي وياج ..كومي عل جرباية .
..
درت وجهي عنه... ...جرني من ايدي .. ودفعني عل جرباية ... وراح لم الفراش.. وخلاه على صفحه ... اني من الخوف حتى مكدرت احجي .. كلت راح يتهجم عليه ... لازمه دموعي كووة .. كلت بس يطخني اكلبهة صريخ .والم البيت كله عليه..
شويه واندك الباب.. فتحة اجتي مها ..زوجة اخوة.. جايبه صينية العشة...
مها:: تفضل .عيوني.العشى.. خلت الصينية عل طبله ... وترخصت وراحت...
اني ضليت كاعدة بمكاني شال الصينية وخلاهة عل جربايه بصفي ..وراح كعد عل كرويته .....
اني دفعت الصينيه ودرت وجهي...
اجه :: دفع الصينية عليه واشر بأيدة عل صينية وكلي
.. اكلي
مباوعت عليه... . هم دفعت الصينيه ... ودرت وجهي ... حسيته تنرفز... رجع دناهة عليه .. رجعت هم دفعتهة
.. صار عصبي صاح بصوت عالي .ياااالللللله
ضرب الكنتور بأيده بوكس... ونكسر شوية من الباب...
وصاح بعصبية ... كتلج اكلي .
حسيت دمي نشف.. من الرعبة..قلبي راح يطلع من مكانه .. كمت اكل بدون وعي من الخوف خفت لا يضربني ..
اكل ودموعي تجري ....وهو كعد ويباوع عليه لحد ماحسيت بعد مااكدر اكمل نزلت من الجرباية عل كاع ..وانهاريت كمت ابجي بحركة وجسمي كوله يرجف ... شويه وسمعت الباب انسد بقوة. باوعت لكيته ماكوو ...
ضليت ابجي واندب حظي.... شوية وانفتح الباب دخلت عمتي ام عمار ...
ام عمار:: هاا يمه سلامتج ...
حضنتهة وابجي ....معرفت شكول ... ضليت ابجي وهي حاضنتني بكل قوة... حسيت بالامان بحضنهة . ظليت
ابجي لحد ماارتاحيت ..رفعت راسي... باستني من راسي
وكالت
؛:: لا تخافين ... اني يمج..كومي ادخلي للحمام ... بردي نفسج .. ..
ردت احجي سكتتني... كالت ...اعرف كلشي بس اني
اكولج لاتخافين .....
دخلت للحمام ...صاحت عليه انطتني ملابس ... حسيت براحة شوي ...وخصوصا لان شفتهة وياي ومتخلت عني ...
طلعت .. لكيتهة منتظرتني ضحكت بوجهة ...
كتلهة عمة مشكورة ...
ام عمار:: اولا ميحتاج تشكريني ..انتي مثل بنتي ... ثانيا اريدج تصيحيلي ماما حالج حال بناتي ... تمام ...
اية :: تمام ... كعدت امشط شعري .. ونشفته ..
ضلت شويه يمي وكالت يله اخذي راحتج .. نامي ارتاحي ... تشكرتهة مرة لخ .. . طلعت وسدت الباب ..
رحت تمددت عل جرباية ... كلت يجوز راح ينام برى...بعد احسن .. هالمغرور.. شكد شايف نفسة .. فوكاهة هو يصيح عليه ... باوعت الساعه ب9:30 تقريبا عززة شيخلص هالليلة يربي.... تمددت حاولت انام بس مكدرت خاف يدخل عليه بالليل ومااحس بي...
تقريبا صارت11:00 دك الباب ودخل اني طفرت عدلت كعدتي ... دخل سحب الفراش الركنة قبل شوي وخلة المخدة وتمدد... لاحظت ايدة مشدودة بشاش .
بس مهتميت اله .
.مكدرت انام .. ضليت اليل كله خايفه .. مااعرف شنو يريد يسوي ... لهذا عيني عليه .. كل شوي مااحس بروحي واغفة نوب اكمز... والضوء ضل مشتغل واني مااعرف انام الا.والضوة خفيف ..
صارت الليلة شطولهة اريد يطلع الصبح ... مليت احس
راسي حينفجر ...
... اذن الفجر اسمعه بس مااكدر اكوم لان هو نايم بالطريق ..
كوة غفيت شويه وطفرت على دكة الباب تقريبا ب7:00 الصبح كام لم الفراش وضماه على صفحة .. فتح الباب
سمعت صوت عمتي ومرت عمي يصبحن علي ومرت عمي تباركله ... ودخلن علية ... واني ركضت حضنت عمتي .. وباوستهة.. حضنت مرت عمي عبالك مفاركتهم شهر .
.. ضلينه نسولف تقريبا ربع ساعه .....
. كامن عمتي ومرت عمي كالن لازم نروح.. ترجيتها تبقى بس مقبلت طلعت مرت عمي من الغرفة. .. وعمتي سحبتني على جنب
عمتي:: هاا بشري شصار..؟؟
اية:: مصار شي ..!!
عمتي:: يعني متقربلج... ولا وصل يمج ؟؟
اية:: ابد حتى مباوع عليه ... ضحكت عمتي ..ليش تضحكين..
عمتي :: ردت اشوف كلام امه صحيح لو لا
اية:: اي كلام فهميني... ؟؟
عمتي:: مو كالت ابني مو هيج .. وميدري بروحه من سوة فعلته ..
اية:: اي وشنو التغير..؟؟
عمتي:: لو متقربلج واخذ اليريدة.حتى لو غصبا ماعليج .. معنى كلام امه كذب... بس ماتقربلج وانتي مرتة وحلالة بمعنى صدك مو بوعيه و حاس بغلطته ...
اية :: تحجين صدك عمتي .. شنو القصه .. ليكون تكليلي
حبي واتصرفي وياه طبيعي.. . يمه لا تنسين السواه بيه ..
عمتي:: باعي الفات مات يمه علينه باليوم البارحه انتي
نايمه بصفه وموصلج شنو معناها
...
اية :: اساسا منام بصفي ..نام بالكاع...
رفعت حاجبهة بتعجب ...
عمتي:: الله كريم الله يقدم البي خير!! يله...
اية :: وين ترحين وتعوفيني ؟؟
عمتي :: وين عايفتج يمه .. صار بيتج وام عمار مثل امج
بعد اني اطمنت عليج هسة ... رتبي روحج وتمكيجي لا تنسين انتي عروس بهذا البيت .. ماشي
اية:: حاضر ...
عمتي :: يله تعالي انزلي وياي ..
اية:: وين.؟؟
عمتي:: تنزلين تسلمين على عمج .. تتعرفين على اهل البيت لو تردين تظلين كاعدة هنا..
اية:: لا ..لا.. ماانزل ... استحي والله .. مااكدر..
مرت عمي(سمية):: لا حبيبتي ميصير هيج لازم تنزلين تتعرفين على اهل رجلج والزلمه عمج كاعدة لازم ترحين تصبحين عليه وتبوسين ايده ...
اية.:: اوك.. ماشي..
نزلت وياهن.. ومرتبكة وخايفة ...تلكتنة عمتي ام عمار وبناتهم وكامن يهلهلن لان اول نزلة الي بالبيت.. الصراحه خجلت.. بوقتهة اول مرى اضحك شوية من بعد الحادث الصار... مكنت متصورتهم هيج حيسوون .. تصورت راح انهان وانذل ... راحت عمتي ومرت عمي كالن كم يوم ونجيج .. ودعتهن...
وتعرفت علبنات ... خواته ثنين وحدة متزوجه اسمهة لمياء والثانية اسمهة منى. تقريبا بعمري ممتزوجه وزوجات
اخوه مها ام مصطفى كلش حبابة. والثانية ريهام ام رسل .. سلمت بس من ورى خشمهة .. ...
اجتي عمتي ام عمار لزمتني من ايدي .
يله تعالي سلمي على عمج ....
لزمتهة.. لا الله يخليج والله استحي ...
.
ام عمار:: لا يمه صار بمقام ابوج من شنو تستحين
..سحبتني من ايدي ... دخلت كلت
:: صباح الخير ..
رد عمي والكاعدين .معرفتهم منو بالتحديد ..
كالت عمتي :: تعالي بوسي ايد عمج .. دنكت مخلاني ابوس ايده باسني من راسي .وكلي بارك الله بيج بنتي
.. . ردت اطلع عمتي كالت وين خلي اعرفج ...
ام عمار :: اول شي عمج عرفتي .(ضحكت) اعرفج على حموينج..
عمار ابو مصطفى.. هي كالت عمار واني نقبض قلبي
كلي هلا خيتي ..
اتبسمت .. هلا بيك ..
وحماج الثاني .. كيان ابو رسل..:: اهلا وسهلا..
اية:: تسلم ...
والثالث احمد ... :: اهلا.. نورتي...
اية :: ... شكرا
واخيرااا.. محمد .:: واني يحظي كله ضال بالاخير... ياوالحظ... اهلا وسهلا بيج خيتي..
اظن حتى بالزواج اضل بالاخير...
ضحكنه...
عمتي كلتله متجوز من سوالفك ... .
لمحت علي كاعد وابد محجه..
عمي كال :: يله عيوني ام عمار جهزتي ريوك العرسان ..
عمتي؛:: ايي جاهز وصعدنا فوك بغرفتهم...
عمي:: يله بوية علي اخذ مريتك وروح تريكوا خاف البنية تستحي من عدنه.. ..
اكتفيت بالسكوت ... معرفت شكول ..
وعلي هم سكتت ... .. عاد عليه عمي ... .
:: علي مو احجي وياك بوية...
علي:: ايي بوية وياك .. بس خليهة ويه البنات ترتاح اكثر... تتعود عليهن .. اني هم اريد اتريك وياك لوانته متريدني يمك ..
عمي:: لا بوية شلون مااريدك ... على راحتكم
.
... اووف شكد كرهته... عود يبين هو ميريدني وممهتم .. اشتعلت بنار ...
طلعت اني وعمتي رحت .وكفت يم البنات...
اية:: محتاجين مساعدة.؟؟
مها :: سلامتج حبيبتي روحي اكعدي.. هسة نجهزة ونصيحلج...
ضليت واكفة لان مااعرف وين اروح ..خلصن الريوك وكعدنه بس اني استحي اكول.... شربت بس شاي .. لان اساسا مااحب اتريك اول مااكعد...
كملنه الريوك... اجتني مها
مها:: حبيبتي ايوو كومي جهزي نفسج .. راح يجون الناس
بعد شوية..
اية:: يعني شجهز؟؟،
مها::ههههه غير تتمكيجين .. تغيرين لبسج غير انتي عروس... !!!
اية:: اهاا ... ايي اكيد ...
مها:: محتاجة اساعدج بشي.. ؟؟
اية:: لا مشكورة...
صعدت ... اباوع عل غرف 3غرف عل جهة اليمين و2 على اليسار .... خررب حظي تيهت الغرفة مالتي بس اني متاكدة هي بالجهة اليسرى.. بس اي وحدة ممتاكدة لان من طلعت وية عمه منتبهت .. زين كولهن مسدودة بيبانهن... ضليت حايرة استحي افتح باب ... يربي شسوي... ضليت اضحك على نفسي نزلت من الدرج كلت اسال وحدة من البنات.. كم بايه شفت علي بوجهي طلع من الاستقبال... صارت عيني بعينه صعدت بسرعه.. ضليت خايفة خاف يصعد وراي ....
كلت ماكو غير اني افتح الباب والله كريم
فتحت اول باب على كيف .. طلعت مو غرفتي . نايمين اطفال بيهة . سديتهة هم على كيف
فتحت الثانية طلعت غرفتي ... ذبيت حسرة شكبرهة..ههههففف. ..
كعدت بيني وبين نفسي ... كلت ليش هو مرتاح وعايش حياته واني وحدي متعذبة ... لا وفوكاهة هو الميريدني .. شلون اغثة مثل مغثني ... لازم اندمه على كولشي سواه بيه .. لازم اخلي يشوف كرهي اله ...
غيرت ملابسي لبست نفنوف بيجي وبيي خطوط ذهبي كوولش حلوو ولفيت الشال .. مااعرف اخلي مكياج بس خليت فاونديشن وماسكارة وحمرة سحريه .. لان بس هذا الي اعرفة بالمكياج... كعدت اعزل بالغرفة شفت ملابسي شلون مرتبيهن ... ضليت تقريبا ساعه
اندك.الباب
اية:: تفضل.؟؟
منى:: هلاوو .. شهالجمال عيني .. على كيفج ويانه
اية:: هلا بيج .. يعمري تسلمين... تفضلي...
منى:: لا عيوني .انتي تفضلي اجو بيت عمامي وخالتي ... تعالي سلمي ..
اية:: عفية والله استحي .. مااكدر..
منى:: من شنو تستحين يولو .. كومي راويهم جمالج ...
اية:: لا صدوك والله استحي ..
منى :: دكوومي اني وياج .. لا تستحين ..
اية:: اوك انتضري شويه ... ..
نزلنه اني ومنى.. اني صرت وراهة ولازمه ايدهة ..
جان علي واخو .. واكفين بالصاله اليم الدرج صار قبالي .. شافني راسا دار وجهة ..
اني صح اكرهة ومااطيقة بس مااحب هيج معاملة ضليت افور ...حسيت جسمي صار نار ... المفروض اني هيج
اعامله مو هو المفروض يبرر موقفه كدامي او يعتذر ... اني مدايرتله بال .. ولا معبرته ... بس ميكفي اريد اهينه بس مدااعرف شلون ...
دخلنه عل النسوان سلمت عليهن ..باركلي.. كعدت ومدنكه
بس اكل بروحي اكل ... صاحتلي منى ...
منى:: اية تعالي شوية ....
اية :: حاضر...
منى :: تعالي اعرفج على بنات عمي وبنات خالتي ..
دخلت للغرفة.. .لكيت خمس بنات.. عرفتني عليهن
... كعدنه نسولف . بس وحدة ضلت تباوع عليه وتخزر ... حسيتهة تريد تحجي .. بس ملكت فرصة
(طبعا الناس او بالأخص اقربائه كل ضنهم انو علي دعمني بالسيارة وصارت بينه قصة حب وتزوجنه)
.. صار وقت الغدة .. طلعن البنات ..يحضرن الغدة اني ضليت كاعدة ... وضلت بت عمه(ريم) التخزر بيه كاعدة انتظرتهن يروحن وجان تقربت عليه ....
ريم :: ارتاحيتي من فرقتينه الله لا يوفقج ....
ضليت متفاجأة... كتلهة ..شنو
ريم::عساهة بحضج وبختج ..اخذتي مني وحرمتيني
منه..؟؟
حسيت جسمي كام يغلي ... وكتلهة
اية::حبيبتي روحي اعتبي ع الي وعدج مو علية اني
، اعتبي ع الي يحبج وتحبي مو علية غريبة اول مرة يشوفيني ف عتبج مو علية بيبي مااشي .. واكولج شي.. تردينه ... ذاك هو واشرت بصبعي ... عليه ... اخذي حبي ومجانا ... تشااااوووو... ...
صح عصبت وفار دمي ... ومااعرف جبت هذي القوة والرد شلون...لكن حسيت رديتها الرد المناسب ... ..
