رواية جثة داخل الدولاب الفصل الرابع والاخير بقلم محمود الأمين
#جثة_داخل_الدولاب
#الجزء_الرابع
الاسم اللي كان موجود في كشف الزيارات.. كان اسم عايدة عاصم محمود، دي مرات أخو الأستاذ وجيه.. معقول هي اللي ورا قتل البنت؟!
وده اللي خلاني رجعت كلمت المباحث وطلعت إذن بالقبض على عايدة عاصم، عشان نحقق معاها ونعرف إيه سبب زيارتها للشخص اللي قتل ملك وجيه.
وفي نفس الوقت كنا قلبين الدنيا على شحته عشان نوصله ونعرف الاتفاق اللي تم ما بينه وما بين عايدة.. وإيه كان الغرض، السرقة ولا القتل؟!
*******
وصلنا إذن للنيابة بالقبض على عايدة عاصم محمود، وده بعد ما ثبت تورطها في جريمة القتل مع البلطجي اللي اسمه شحته.. كانت بتزوره في السجن، وآخر زيارة كانت من شهر، يعني قبل خروجه على طول.. وفعلاً اتحركت ومعايا قوة من القسم على بيت عادل، أخو الأستاذ وجيه، وأول ما وصلنا هناك وخبطنا على الباب فتح الأستاذ عادل واتفاجئ بينا واتكلم وقال:
_ خير يا باشا، هو في حاجة ولا إيه؟!
= فين مراتك عايدة يا أستاذ عادل.. مطلوب القبض عليها.
_ ليه؟ عملت إيه مراتي؟!
= في القسم هتعرف كل حاجة إن شاء الله.
...
في الوقت ده هي خرجت من جوه وشافتنا، وطلبت من العساكر يمسكوها وياخدوها على البوكس، واتحرك وراها جوزها عشان يعرف مراته مقبوض عليها ليه، ولكن لما وصلنا القسم طلبت منه يستنى بره، ودخلت هي بس معايا المكتب.. وقلتلها:
_ أظن إنك عارفة سبب وجودك هنا.. وأنا عاوزك كده بهدوء تحكيلي إيه اللي دار ما بينك وما بين شحته في السجن، والاتفاق اللي ما بينكم كان على إيه بالظبط؟
= أنا مش فاهمة حضرتك بتتكلم عن إيه يا باشا؟!
_ هنبدا نستهبل.. اسمك موجود في كشف الزيارات، واسمك موجود قصاد اسم شحته، تعرفي مين شحته ولا تحبي أعرفهولك؟.. شحته البلطجي اللي قتل ملك.
= أنا معرفش حاجة.. ده أكيد تشابه أسماء، أنا معرفش حد اسمه شحته.
_ طيب تحبي تتحبسي وتشيلي الليلة كلها لوحدك؟ أنا معنديش مشكلة، أطلعك إنتِ اللي ورا قتل البنت، ويبقى شحته براءة من الموضوع كله، وتشيلي إنتِ الليلة.
....
فضلت ساكتة ومردتش، وعشان كده طلبت من العسكري يرميها في الحجز الخاص بالسيدات لحين عرضها على النيابة، وجوزها طلبت منه يروح وقريب هيعرف مراته عملت إيه.
وبعد 48 ساعة جالي تليفون إنهم مسكوا شحته في كمين على طريق السويس، وإنه حالياً في الطريق لينا.. مكنتش مصدق نفسي بالسرعة دي قدرنا نمسكه.
وبعد ساعات كان قدامي في المكتب.. عشان أبدأ تحقيق معاه، وقلتله:
_ إنت شحته مش كده؟!
= أيوه يا باشا، أنا.
_ طبعاً إنت عارف إنت هنا ليه؟!.. قتلت بنت صغيرة عندها سبع سنين، وسرقت الحلق والسلسلة بتاعتها.. ده غير إنك قتلت مراتك، وسِبت جثتها تعفن في البيت، فأنا عاوزك واحدة واحدة كده وتحكي اللي حصل، وتقول مين اللي طلب منك تعمل كده.. أنا عارف إن السجن مش فارق معاك، بس الموضوع المرة دي إعدام، فلو مش عاوز تحاسب لوحدك على المشاريب، تتكلم وتحكي اللي حصل.
= أنا في حد طلب مني أعمل كده.. طلب مني أقتل البنت الصغيرة وأسرق الدهب اللي لابساه، ده غير المبلغ اللي أخدته، والحد اللي طلب مني كده أنا أعرفه كويس، لدرجة إن أنا اللي شهدت على جوازه.
_ قصدك على جوازها.. ما هي مشرفة دلوقتي في الحجز، وأنا مستني أسمع منك الحكاية من أولها.. احكي يا شحته.
= حاضر يا باشا.
.....
كنت في السجن، وخلاص باقي على خروجي حاجة بسيطة.. ومكنتش متعود إن في حد بيجي يزورني، ولكن في اليوم ده اسمي اتنده في الزيارات، وكنت مستغرب: ده مين ده اللي لسه فاكرني وجاي يزورني؟!
ولما خرجت لقيت الست عايدة، اللي أنا شهدت على جوازتها زمان، قعدت قدامها وبعد ما سلمت عليا قالت:
_ أنا عارفة إنك خارج قريب، وعشان كده أنا جاية لك وعايزاك في مصلحة، نفذتها تاخد حسنتك، رفضت يبقى إنت مشوفتنيش.. تمام؟
= وماله يا ست عايدة.. إيه المصلحة؟!
_ واحدة قهراني ومخليني عاوزة أقتلها وأشرب من دمها، بتعايرني بموضوع الخلفة ومخليّة جوزها يرفض يساعد أخوه اللي هو جوزي.
= إنتِ قصدك على مرات الأستاذ وجيه.. مش كده؟
_ أيوه هي.. أنا بقى عاوزاها تموت بحسرتها على بنتها ملك، عاوزك تخلصني من البنت الصغيرة عشان تحس بواحدة زي ما معندهاش عيال، وتبطل شغل التلقيح وقلة الأدب اللي بتعمله.
= لا، كده الموضوع اختلف.. ده قتل مش سرقة ولا عاهة مستديمة زي اللي أنا محبوس فيها، يعني الموضوع هيكلفك.. هيكلفك كتير.
_ اللي إنت عاوزه.. ده غير إنك هتاخد الدهب اللي لابساه البنت وتصرفه بمعرفتك، المهم إنك تخلصني من البنت، وأول ما تخرج لينا قعدة.
....
وفعلاً بعد ما خرجت اتقابلنا أنا وهي، وقعدت فترة براقب بيت الأستاذ وجيه، وبشوف البنت الصغيرة بتنزل تلعب تحت البيت.. كان لازم لما أجي أخطفها مخليش حد ياخد باله، ولكن في الوقت ده لقيت مدام عايدة بتكلمني في التليفون وبتطلب تقابلني، وفعلاً اتقابلنا وقالت:
_ الموضوع خدمك خدمة العمر.. سمعت طراطيش كلام كده إن وجيه أخو جوزي أجر شقة في آخر الشارع اللي جنبنا، وسمعت إنه ناوي يفتح مطبعة تصوير ورق وطباعة، وأنا بقى عاوزاك تقتل البنت وتسيب جثتها في الشقة دي عشان يلبس هو الموضوع.. أهم حاجة متسيبش حاجة وراك تدينك، وامسح بصماتك كويس من المكان.
= تمام يا ست عايدة، تمام.
.....
ست دماغها دماغ إبليس.. ويوم الجريمة خطفتها من وسط العيال من غير ما حد يحس، وقدرت أطفش باب الشقة اللي قالت عليها الست، وخلصت على البنت جوه، وقلبت الحلق والسلسلة وهربت.
= طيب وقتلت مراتك ليه؟!
= يوم الجريمة هي شافتني وإيديا كان فيها آثار دم، ده غير هدومي، ولما سألتني قولتلها إني كنت في خناقة، بس هي ما صدقتش الكلام، عشان على الأقل كان هيبقى في جسمي خدش، بس لما عرفت إن البنت اتقتلت جت عشان تواجهني إن أنا اللي قتلتها، وبنت الكلب كانت عاوزة تبلغ عني، خلصت عليها من غير ما أحس.
_ طيب والأستاذ عادل كان شريك مع مراته في الاتفاق ولا لأ؟!
= حق ربنا، ولا مرة جه معاها، وأظن إن الراجل ما يعرفش، عشان الست دي كانت بتقابلني في أماكن بعيدة وبتقول إنها بتخاف جوزها يشوفها، فأكيد جوزها ميعرفش.
....
بعد اعتراف شحته جبت مدام عايدة من الحجز، ولما واجهتها بيه وبأقواله اعترفت أخيراً:
_ أيوه يا باشا، أنا اللي طلبت من شحته يقتل البنت، ما هي صفاء مش أحسن مني عشان تخلف، وجوزها مش أحسن من جوزي عشان يشتغل في بنك ويبقى معاه الفلوس دي كلها، وأنا وجوزي كنا هنشحت.. ده حتى كان رافض يساعد أخوك ويشغله معاه في البنك، كنت عاوزني أعمل إيه؟!.. أنا مش ندمانة على اللي عملته يا باشا، كفاية إني شفيت غليلي وشوفتهم وهما مقهورين على بنتهم، زي ما أنا ياما اتقهرت عشان مش عارفة أخلف حتة عيل.
= هل جوزك ليه علاقة باللي حصل.. ولا الموضوع تم من وراه؟
_ جوزي ميعرفش حاجة.. أنا اللي خططت لكل حاجة، وشحته هو اللي نفذ.
.....
بعد الاعتراف اتحولوا هما الاتنين للنيابة، ومن النيابة للمحكمة.. اللي حكمت عليهم بالإعدام ومن أول جلسة.. والأستاذ عادل طلقها قدام الناس كلها.
الغل والحقد ممكن يوصلوا البني آدم إنه يقتل ويعمل حاجات كتير مش كويسة، ربنا يبعد عننا كل حاقد ويحفظ أولادنا، وخليكم فاكرين إن الطعنة مش بتيجي غير من أقرب ناس.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
لجميع الفصول من هنا
