رواية موظف الأرشيف الفصل الرابع بقلم ياسر عوده
دخله عريس
انا لما لقيت حربايه ماتت مابقتش عارف اعمل ايه، دي مش بس مصيبه دي فضيحه ، هي ماتت واحنا في علاقه ، ياريتنا في علاقه دا انا يا دوب لسه هقول يا هادي ، ومابقتش عارف اعمل ايه ، انا لو لبستها لامؤخذه يعني وجت الشرطه ممكن يشكوا فيا ويفتكروني موتها ، ولو جت الشرطه وانا وهي بالمنظر ده ساعتها الفضيحه هتنزل اونلاين .
بعد تفكير قررت اني احط عليها ملايا، والف نفسي بملايا، وعاوز اقولكم ان دا اغبي تصرف ممكن واحد يعمله في نفسه ، المهم بعد كده اتصلت على الشرطه ولما رد عليا واحد من الشرطه قولتله:
-انا كنت عاوز ابلغ ان مراتي ماتت.
-ماتت ولا اتقتلت؟
-لا يا فندم ماتت.
-طيب لو ماتت هتبلغ الشرطه ليه ، ماكنت تجيب طبيب يكشف ولو قال انها ماتت بطريقه طبيعيه، وقتها هيكتبلك تقرير وتطلع تصريح بالدفن.
-انا فاهم كل اللى حضرتك بتقوله ، بس هي في حاجه كنت عاوز اوضحها.
-حاجه ايه؟
-مراتي ماتت بعد ما خدت منشطات.
-منشطات بتاعت ايه؟
سكت ومعرفتش اقوله ايه بصراحه، هو المفروض يفهم وخلاص، بس واضح كده انه كان مصمم يحرجني، ولقيته عاد السؤال مره تانيه، ووقتها انا قولتله:
-يا فندم مراتي كانت وخده منشطات علشان العلاقه اللى كانت هتحصل بنا.
-للدرجادي انت جامد اوي كده، على العموم عرفني عنوانك وهبعتلك الشرطه علشان تشوف حكايه المنشطات دي.
وخلال نص ساعه تقريبا جت الشرطه وخبطت على الباب، ولما فتحت الباب وكنت ملفوف بالملايه زي ما قولتلكم، لقيت الضابط بيبوص للناس اللى معاه وقال:
-هو البلاغ اللى جاي عن جريمه قتل ولا شبكه اداب؟
وقتها انا قولتله:
-جريمه قتل ايه يا باشا، وشبكه اداب ايه، انا كده لبست ولا ايه؟
-واضح كده انك مش لابس خالص، ايه اللى عمله في نفسك ده، لو البلاغ ماطلعش مظبوط هخلي الرجاله اللى معايا يعملوا معاك اجمل واجب.
بلعت ريقي وانا مش عارف اقوله ايه، المهم دخلوا رجال الشرطه، وكان معاهم دكتور الطب الشرعي، وانا حكيت للضابط كل اللى حصل بالتفصيل، وهو كان واقف وحاطت ايده على خده وهو بيحاول يستوعب اللى بحكيه، وبعد ما خلصت قالي:
-عاوز تعمل علاقه يا فاجر مع وحده عندها 62 سنه وانت عندك 25 سنه؟
-طيب اعمل ايه هي اللى صممت على كده.
-لا انت مش بس فاجر، انت كمان جاحد، تدي للوليه منشطات، انت متوقع منها لما تاخد المنشطات دي هتبقي عامله ازاي، انت خلصت على الوليه يا فاجر في علاقه، طيب اكتب ايه في المحضر الوليه ماقدرتش تستحملك.
-يا فندم ايه اللى انت بتقوله ده ، انا اصلا مالحقتش اعمل حاجه.
-دي مصيبه اكبر، خلصت على الوليه في ايدك وانت لسه ماعملتش حاجه، اومال لو كنت عملت كان هيحصلها ايه؟
-هيحصلها ايه يا فندم اكتر من انها ماتت.
-عاوز اقولك انك انت هتتنفخ، كويس انك لابس الملايا بس، علشان النفخ يبقى سهل.
-يانهار مدوحس، انا ماعملتش حاجه، صدقني يا فندم.
وشوفت كام يوم انما ايه سواد السواد، عرضوني على النيابه، وتقرير الطب الشرعي اكد اني مالمستهاش لسه، وان سبب الموت المنشطات، وكمان لقوا شرايط منشطات في هدوم حربايه واتضح انها بتاخد المنشطات دي من زمان وجسمها ماستحملهاش، وافرجوا عني اخيرا، وانا اللى ورثت حربايه اصلها ماكنش ليها حد، وافتكرت ان الدنيا خلاص هتضحكلي وكل حاجه تمام، بس ماكنتش اعرف المرار الطافح اللى مستنيني.
بعد حوالي 3 شهور من موت حربايه انا كنت بدور على بنت الحلال اللى هتعوضني بقي، ولقيتها فعلا بنت طيبه وجميله اسمها دعاء، كانت حلوه اوي اوي، بصراحه عمري ما حلمت اني ممكن اتجوز وحده بحلوتها، واتجوزتها بعد ما عملنا فرح كبير، ولما روحنا البيت ودخلنا اوضه النوم، والمفروض بقي نعمل زي الناس يعني، ويادوب لسه هقرب منها لقيت دعاء اتغيرت، شكلها اتغير خالص، لقيت قدامي حربايا ومعرف شدا حصل ازاي، ماتفهموش لبستها ولا سخطتها ولا عملت فيها ايه، ولقتها بتقولي:
-اه يا وســــ ــخ رايح تتجوز بفلوسي، وكمان قبل ما اكمل 3 شهور، حيحان اوي يا زبـــ ــاله، منا كنت معاك وماعرفتش تعمل حاجه.
انا اول لما شوفتها صرخت وقولت:
-الحقوني، الحقوني الحربايه رجعت تاني.
وقتها كنت لامؤخذه بالهدوم الداخليه، وطلعت من الاوضه وفتحت باب الشقه ونزلت في الشارع وانا بجري من حربايه اللى مش عاوزه تسبني، ولقيتها وقفت في البلكونه وبتنادي عليا وبتقولي:
-مالك يا عزيز ايه اللى حصلك، مالك بتهرب مني ليه.
صوتها كان متغير، كان شبه صوت دعاء، بس انا خوفت اقف او حتي ابوصلها وكنت بحاول اجري واهرب، وفضلت على الحال ده لغايه لما لقيت عربيه شرطه قدامي، ونزل منها نفس الضابط اللى كان جه وبيحقق في موت حربايه قبل كده، واول لما شافني قالي:
-يخربيتك، هو انا كل مره اشوفك فيها لازم تبقى عريان، مره بالملايا ومره بالهدوم الداخليه، انت ماتعرفش تستر نفسك.
-الحقيني يا باشا، حربايه لسه عايشه، جتلي يوم دخلتي ولبست دعاء مراتي، الوليه مش عاوزه تسبني.
-اهلا، انت وصلت لكده، طيب انت بقى تيجي معايا القسم، وهناك نشوف موضوع حربايه اللى رجعت من الموت.
وخدوني في العربيه، ولقيت الضابط بيقول للساق:
-اطلع على القسم ، انا مش عاوز حد تاني ، كفايه عليا الزبون ده ، انا هخده القسم واتسلي عليه.
ووصلنا للقسك وهناك حاولت احلفله واقوله على اللى حصل، بس هو ماصدقنيش خالص، وقالي:
-يعني انت عاوزني اصدقك ان الوليه اللى انت كنت السبب في موتها بعد ما خدت المنشطات علشانك، رجعت من الموت ولبست العروسه الجديده علشان انت واحشها، ايه يا عم هو مافيش رجاله غيرك.
-رجاله ايه ونيله ايه يا باشا، حضرتك واخد مقلب فيا، هي مش راجعه علشان بتحبني، هي راجعه علشان تجنني وترعبني وتنشف دمي.
وطبعا الضابط ماصدقنيش، وشكله كان متعمد انه مايصدقنش ومش فاهم ليه ، زي ما يكون بيني وبينه تار قديم ولقيته حطني في الحجز، واول لما دخلت الزنزانه عنيكم ماتشوف الا النور ، عاوزكم تتخيلوا المنظر ، انا عريس والمفروض الليله دي كانت دخلتي ، ودلوقتي انا في الزنزانه ، وكل دا عادي ممكن يحصل ، بس انا في الزنزانه بالهدوم الداخليه ، ومعايا محبوسين في الزنزانه ، منهم ناس محبوسين من شهور ، وداخل عليهم واحد حليوه وبالهدوم الداخليه ، وواضح كده انها هتبقي دخلتي فعلا بس مش هبقي العريس ، انا داخل على مرار طافح وايام ما يعلم بيها الا ربنا.....
شكرا لزيارتكم عالم روايات سكيرهوم
