رواية جثة سالي الفصل الرابع بقلم محمود الأمين
مش بس سالي اتعرضت لاعتداء، لا.. ده التقرير بيثبت إن مفيش ما يثبت إن سالي أخدت كمية سكريات كبيرة، وعشان ما عرفتش تاخد حقنة الأنسولين أو اتكسرت منها فماتت.. يعني التقرير الأول كان مزور 100%، حتى في موضوع السكريات، وإن السبب الأساسي في الوفاة هو نزيف داخلي نتيجة للاعتداء.
بصيت للدكتور هشام وقولتله:
_ كده إيه اللي ناقص يا دكتور؟! كده هنعرف مين اللي عمل كده في سالي، صح؟!
= أكيد.. بس محتاجين إننا نجيب المتهمين وناخد منهم عينة، عشان نطابقها بالسائل الذكوري اللي قدرت أوصله في الجهاز التناسلي، واللي عينته هتطابق السائل يبقى هو اللي عمل كده.
_ أنا لازم أخلي العميد حازم يشوف التقرير ده في البداية، وبعد كده هشوف رده إيه.
....
خرجت من مكتبي وروحت على مكتب العميد حازم، وأول ما دخلت اتكلم وقال:
_ طالما جاي بنفسك يبقى تقرير الطب الشرعي طلع، مش كده؟
= أيوه يا فندم، التقرير طلع فعلًا، وبيثبت حالة الاعتداء اللي تمت، وإن الوفاة نتجت عن نزيف داخلي تم بسبب الاعتداء ده، غير إن مفيش سكريات في جسم المجني عليها، زي ما ذكر الدكتور سعد وقال إن الوفاة طبيعية بسبب السكريات.
_ طيب هايل جدًا.. بس رغم التقرير ده مفيش ما يثبت إن الدكتور سالم عبد العزيز هو اللي عمل كده.. لازم في البداية تشوف الشخص اللي كان معاها قبل ما يحصل اللي حصل.. اسمه خالد، أعتقد صح؟
= أيوه يا فندم، اسمه خالد كريم رسلان.. ابن رجل الأعمال المعروف.
_ ماليش دعوة ابن مين.. دي جريمة قتل مكتملة الأركان. تجيبه، وتتاخد منه العينة، ولو طلعت سلبية هسيبك تجيب الدكتور سالم وتاخد منه العينة، عشان ده اللي إنت عاوزه وأنا عارف.
= يا فندم، أنا ما عنديش مشكلة مع الدكتور سالم.. بس تصرفاته مريبة، بجانب اتهام الأب ليه إنه هو اللي عمل كده في بنته.
_ اتهام الأب للدكتور سالم نابع من المشكلة اللي ما بينهم، وهي إن الدكتور سالم السبب في طلاق مراته منه، وبعد كده اتجوزها، فتقدر تقول إن الأب بيعمل كده بغرض الانتقام من الدكتور سالم، ولكن إحنا هنكمل تحقيقاتنا، وهنشوف مين اللي عمل كده.
....
في الوقت ده النيابة كانت بتحقق مع صحاب سالي.. خالد وولاء.
********
_ خالد كريم رسلان.. على حسب التحريات اللي وصلتني يا خالد، إنت كنت مع المجني عليها قبل ما تتقتل.. تقدر تقولي إيه اللي حصل من ساعة ما ولاء كانت معاكم لحد ما روحت؟
= مفيش حاجة حصلت.. إحنا لفينا بالعربية كالعادة، واتبسطنا زي ما بنعمل كل يوم، وعلى الساعة 2 ولاء استأذنت عشان تروح، وأنا كمان كنت عاوز أروح وقتها. وبعد ما ولاء مشيت، سالي وصلتني بالعربية لحد البيت، وبعدين قالت إنها هتمشي، واتحركت بالعربية فعلًا.. وأنا طلعت البيت ونمت على طول، وعشان أنا متعود أصمت التليفون قبل ما أنام، مسمعتش صوت رنة التليفون. هي كانت بترن عليا وبعتتلي على الواتساب إن عربيتها عطلت، وكانت عاوزاني أنزل أشوفها، بس زي ما قولت لحضرتك، أنا كنت نايم.
_ طيب، إحنا مضطرين بس ناخد عينة منك، عشان أكيد عرفت إن سالي ماتت بسبب الاعتداء عليها، وعشان إنت كنت معاها، فإنت مشتبه فيك.
= أنا مش فاهم حاجة، بس اللي حضرتك تشوفه.. بس والله العظيم أنا كنت نايم.
_ هنعرف يا خالد إذا كنت نايم، ولا إنت اللي كنت معاها.
.....
_ إنتِ ولاء حسين، مش كده؟
= أيوه.. أنا ولاء.
_ طيب يا ولاء، إنتِ كنتِ حكيتي قبل كده لرئيس المباحث الموضوع بصفة ودية، وأنا اتبلغت بالكلام اللي قولتيه.. يا ترى لسه عندي نفس كلامك، ولا هتغيريه؟
= لا يا فندم، مش هغير حاجة.. أنا مشيت وسبتهم، ومعرفش إيه اللي حصل بعد كده. وزي ما قولت للظابط اللي جالي، إن سالي كانت بتشتكي من تصرفات الدكتور سالم، جوز أمها، بس كان بيعمل إيه بالظبط، مش عارفة.. هي قالت إنها كانت بتصحى تلاقيه في أوضة نومها.
_ تمام يا ولاء، في حاجة تانية عاوزة تقوليها؟
= لا يا فندم، مفيش.
***********
العينة اتاخدت من خالد، وثقته بنفسه بتقول إنه معملش حاجة، ولكن النتيجة هي اللي هتبين إذا كان عمل حاجة ولا لا.
وبعد حوالي 48 ساعة ظهرت نتيجة العينة.. وزي ما توقعت، النتيجة كانت سلبية، يعني خالد مش هو اللي اعتدى على سالي، وبكده بنسبة كبيرة الدكتور سالم هو المتهم الرئيسي في القضية، ومش فاضل غير إننا ناخد منه عينة، ولو طلعت إيجابية يبقى خلاص.
ولكن وقتها حصلت حاجة غريبة.. بلاغات كتير بدأت تتقدم ضد الدكتور سالم عبد العزيز.. كل البلاغات كانت بتقول إن الدكتور سالم حاول التحرش بعيالهم.
مكنتش مصدق عدد البلاغات اللي متقدمة.. وليه متقدمة دلوقتي بالذات؟!
وده اللي خلاني أكلم النيابة، اللي طلعت إذن بالقبض على الدكتور سالم عبد العزيز، مش عشان بس موضوع العينة، عشان عدد المحاضر اللي معمول ضده.
وطبعًا، كالعادة، كان بينفي كل التهم، وبيقول إنه معملش أي حاجة، ولكن وقتها أنا رديت عليه:
_ حضرتك اشتكيتني إني برمي عليك تهم بالباطل، ولكن في الحقيقة إنت دلوقتي جاي ومتهم في قضايا كتير.. عدد المحاضر اللي قدامي مش قليل يا دكتور سالم، ده غير إننا هناخد منك عينة.. آه أصل نسيت أقولك، تقرير الطب الشرعي الأولاني بتاع جثة سالي طلع مضروب، وإنت دلوقتي هيتاخد منك عينة، بعد ما التقرير ثبت إن سالي تعرضت لاعتداء، وساعتها هنشوف إذا كنت ظالم ولا مظلوم.
= أنا برفض التشكيك فيا.. وكل البلاغات دي هتطلع بلاغات كيدية، وأنا مش هيتاخد مني عينات.
_ مش بمزاجك خلاص.. وبعدين إنت لو واثق من نفسك، إيه اللي هيخوفك من موضوع العينة؟ إلا لو كنت إنت اللي عملت كده فعلًا، زي ما كنت بتدخل أوضتها بالليل وتتفرج عليها وهي نايمة.
....
كان مصدوم من الجملة الأخيرة، وبعدها قدرنا ناخد منه العينة فعلًا.. وبعد 24 ساعة بس ظهرت النتيجة، وكانت إيجابية، وعلى قد ما كنت فرحان إني عرفت أثبت على الحيوان ده التهمة، على قد ما كنت زعلان على سالي، البنت اللي عندها 16 سنة، اللي وقعت تحت رحمة خنزير زي ده.
ورغم ثبوت إيجابية العينة، إلا إن سالم كان رافض يعترف هو عمل كده إزاي وليه؟!
ولكن اعترافه مش مهم خلاص.. إحنا هنسلمه للمحكمة، وهي اللي هتقول كلمتها.
....
اترحل على النيابة، ومن النيابة للمحكمة، ويوم الحكم القاضي سأله:
_ عملت كده ليه يا سالم؟!
= مكنتش في وعيي.. كنت شارب، وهي طلبت مني أروحلها عشان عربيتها عطلانة. مكنتش عارف أنا بعمل إيه، ولما فوقت ندمت على اللي عملته.
_ كل البلاغات اللي ضدك دي، وجاي تقول إنه كان غصب عنك؟! للأسف، إنت عار على مهنة الطب.. إزاي إنت تبقى دكتور حالف قسم، والمفروض إنك تحافظ على أعراضهم وشرفهم، تكون إنت أول واحد بتنهش فيهم؟
صدقني، اللي زيك لازم يتعدم، وفي ميدان عام.. وما يتعدمش بالمشنقة، إنت يتولع فيك وإنت صاحي.
...
المحكمة حكمت على سالم بالإعدام.. ولكن زي ما المحكمة ليها حكم، الأهالي كان ليهم حكم، والحكم ده اتنفذ، وسالم خارج من المحكمة عشان يركب عربية الترحيلات.
ورغم إني ظابط، والمفروض أتدخل، ولكن أنا سبت الناس تهجم عليه.. كان مشهد أول مرة أشوفه قدام المحكمة.. الأهالي قتلوا سالم قدام المحكمة، لدرجة إن مفيش حتة في جسمه بقت سليمة.
كنت شايف حق سالي وحق كل بنت قرب منها الحيوان ده بيجي قدام عيني.. وهي دي النهاية العادلة بالنسبالي.. اللي زي ده حرام يعيش وسط الناس... كان نفسي والد سالي يطلع براءة ولكن لسه حتي الان متحكمش في القضية ولكن اعتقد هياخد حكم مخفف
حافظوا على عيالكم، وربوهم تربية سوية، وبلاش تثقوا في حد.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
