رواية حب من اول غرزة الفصل الرابع 4 بقلم عمرو خالد ليث

: الحق سارة بسرعة 

• مالها سارة حصلها أي! 

: كانت بتجيب حاجة من قدام المستشفى وعربية خبطتها ومشيت

• وهي فين دلوقتي؟ 

: في المستشفىٰ 

نزلت معاها بسرعة كانت جاية بعربية سارة، دماغي وقفت خالص مكنتش بفكر في أي حاجة غير أني أشوف سارة، مجاش في بالي أن يحصلها أي حاجة، وصلنا المستشفى وفضلت ماشي ورا فاتن لحد ما وصلنا قسم العناية المركزة ووقفنا قدام أوضة، ببص من الازاز بتاعها شفت سارة كانت نايمة ومركبينلها اجهزة كتير في جسمها، فضلت واقف مكاني مش قادر اتحرك ولا استوعب إللي شايفه .. 

: هينفع ادخلها ؟ 

• مش هينفع لأن الدكتور مانع أي حد يدخل بس أنا هحاول ادخلك

: ياريت بجد

راحت فاتن عشان تكلم حد من التمريض يحاول يدخلني أشوف سارة، ومفيش ثواني ولقيتها راجعة ومعاها واحدة باين عليها زميلتهم .. 

• فاتن بسرعة عشان محدش يلاحظ حاجة

: متقلقيش يا أحلام كلها ثواني وهيخرج

دخلت فاتن وأنا دخلت وراها، سامع صوت أنين الاجهزة إللي محطوطة لـ سارة، وسامع صوت ضربات قلبي معاهم، كأن روحي بتتسحب مع صوت كل نبضة، خرجت فاتن وفضلت قاعد لوحدي في الغرفة، قربت منها وكانت مش فايقة خالص، رجلها وايديها الشمال متجبسين، متعلقلها محاليل كتير، قعدت جمبها مش عارف انطق ولا أقول أي حاجة .. 

: الف سلامة عليكي، ليه مسمعتيش كلامي قولتلك خليكي متمشيش هتبقي في أمان معانا، ليه اصريتي تروحي لـ التعب والبهدلة بنفسك، غاوية تعاندي الدنيا وخلاص، لو كنت عارف أنه هيحصلك حاجة مكنتش هخليكي تمشي حتىٰ لو اضطريت احبسك في اوضتي، بس محدش عارف نصيبه فين ولا أي إللي مستنيه يا سارة، وأنتي نصيبك من الدنيا كان شقى ماخدتيش أي حاجة حلوة تتهني بيها، كفاية تعب وشقى مش هتاخدي حاجة غير نصيبك، اختاري مصلحتك وراحتك ولو مرة عشان متتعبيش أكتر مأنتي تعبانة، بلاش تبقى الناس وراحتهم قبل راحتك، بلاش تبقى أهم حاجة عندك راحة إللي حواليكي، طب وأنتي مين أختار راحتك قبل راحته، مين ريحك أصلًا يا سارة وأنتي عايشة طول الوقت في خوف وقلق واضطراب . 

حاولت اقولها الكلام إللي كان نفسي اقولهولها، بس جه في وقت متأخر ومتاخر جدًا كمان، جه في الوقت إللي مش هنقدر نرجع فيه أي حاجة زي الأول، كنت حاسس أن دموعي هتنزل جمبها بس فجأة لقيت فاتن دخلت علينا .. 

: معلش يا زين كفاية لحد كده ابقى تعالى بكره 

• حاضر ثانية وخارج 

قمت وأنا مش هاين عليا اسيبها لوحدها تاني، كفاية عليها إللي شافته واللي هي فيه، خرجت ولقيت فاتن بتتلفت حواليها خايفة حد يشوفني .. 

: أنتي عرفتي البيت إزاي؟ 

• سارة لما كانت عندي الصبح قالتلي لو حصلي حاجة ابقي كلمي زين وادتني عنوان بيتك

: يعني هي كانت عارفة أنها هيحصل معاها كده 

• لا الموضوع كان هزار وأنا اخدت رقمك وعنوانك وأنا مش في دماغي حاجة أو ممكن حاجة تحصل يعني، أقصى حاجة كانت في دماغي أن حد من اهلها يجيلها المستشفى يتخانقوا مع بعض ويمشي

: هما بيروحولها المستشفى! 

• كلهم تقريبا بيجولها عشان ياخدوا منها فلوس او بيتخانقوا مع بعض

: وسارة كانت بتعمل أي؟ 

• سارة علىٰ نياتها أول ما الواحد فيهم بيديها ضهره وبيمشي بتنسى إللي حصل

: طيب يا فاتن شكرًا ليكي وانا بكره هحاول اجيلها 

• متقلقش عليها انا نقلت من قسم الطوارئ وجيت العناية هنا عشانها

: كتر خيرك 

• كتر خيري أي دي الدكتورة سارة يعني غلاوتها من غلاوة أختي 

: وهي تستاهل كل خير 

• عندك حق 

سلمت عليها ومشيت بعد ما اتطمنت أنها هتراعيها وتخلي بالها من سارة، مشيت وانا بجر رجلي بالعافية، بقدم خطوة وبأخر خطوة، عايز أمشي بس مش عايز اسيبها لوحدها، بقول في نفسي كفاية عليها كل ده خليها تعيش مرة في أمان من غير دوشة ولا حوارات ولا قلق، لقيت سما بترن عليا بتسألني فين قولتلها في الطريق، وقفت تاكسي ومشيت وأنا وبتلفت علىٰ المستشفىٰ إللي دخلتها مرة وأنا كل شوية برجعلها برجلي تاني .

: أي مالك سهران لحد دلوقتي ليه

• مفيش يا سما زهقان شوية

: لسه سارة بردو في العناية

• اه كلمت فاتن وطمنتني عليها

: حبيتها مش كده؟ 

• فاتن! 

: فاتن مين لا قصدي سارة

• بصي أنا لحد دلوقتي مش فاهم هل ده فعلاً حب ولا إعجاب ولا جدعنة مني 

: جدعنة منك إزاي! 

• يعني ساعات بتصعب عليا بسبب الظروف إللي هي فيها، واهلها إللي جايين كلهم عليها، وخطيبها إللي معيشها في رعب وخوف زيه زي أهلها بالظبط، وساعات بحس أني مشدود لها بسبب دماغها الكبيرة وبحس أنها ناضجة ووصلت لأحسن نسخة ليها بس هي لسه مش عارفة تلاقي نفسها

: فأنت شايف أنك تقدر تعوضها عن كل ده؟ 

• شايف أنها أغلب طموحها حد يبقى فاهمها وتطمن معاه

: وهي بتحس بده معاك

• مش عارف لسه

: طب وأنت؟ 

• أنا أي! 

: بتطمن وأنت معاها؟ 

• في الغالب ببقىٰ مبسوط، ساعات ببقىٰ حابب ابقى معاها وساعات ببقى مش طايقها

: لي؟ 

• لسانها طويل 

: أنت شايف أنها أحسن من شهد؟ 

• شهد دي بتستغل أي بني ادم في حياتها عاطفيًا، بتلعب علىٰ مشاعر إللي حواليها وبتستدرج تعاطفهم ليها، بتعيش دور الضحية أكتر من الضحية نفسها، إنما سارة دي لا مهما شافت ومهما قابلت ميبنش عليها نهائي

: أنت مش ملاحظ أن أمك متكلمتش معاها حتىٰ لما سابت الدهب ومشيت أمك مفكرتش تفتح الموضوع معاها عشان معملتهاش تقدير وسابتها ومشيت

• وشهد من أمته وهي بتقدر حد

: الحركة دي زعلت أمك جامد وليها يومين بتعاتب خالتك عليها 

• ناوية ترجعها ؟ 

: لا أمك خلاص قفلت الموضوع 

• كويس عشان أنا أصلًا مكنتش مستوعب أني خاطب أصلًا 

: امال وافقت ليه من الأول؟ 

• كنت شايف كله بيخطب وبيتجوز وكأنها موضة جديدة 

: فأنت قولت أي أنثى تقضي الغرض

• خلاص يا سما مش وقته 

: لا بجد أنت أهبل الجواز عمره ما كان موضه 

• امال أي! 

: الجواز عمر بعد عمر هتعيشه مع حد لازم تكون عارفه كويس، عارف تصرفاته وشخصيته وطباعه، حابب تبقى معاه، ده إللي هيشارك يومك واكلك وشربك وحياتك، فاللي هيشاركك كل ده لازم تختاره كويس، تختار حد يكون شبهك حد تقدر تبقى على راحتك معاه مش تخاف وتهرب منه 

بدأت افهم كلامها وعندها حق فعلاً، لما تيجي تدور علىٰ حد شبهك متبصش هو بيحب أي وبيكره أي، شوف هو بيفكر إزاي وبيشوف كل حاجة حواليه إزاي، التشابه مش في الحاجة إللي بتحبوها، التشابه بيكون في تفكيركم ونظرتكم لكل حاجة بتشوفوها، يعني إللي بيحب الاندومي مش شبهك، ولا إللي بيحب الكتب والقراءة زيك يبقىٰ شبهك، ولا إللي بيتفرج علىٰ نفس الحاجة إللي بتتفرج عليها تبقوا شبه بعض، الحب والكره اذواق، إنما التشابه بيكون في الطِباع والصفات، إحنا الإتنين عندنا مبدأ ماشيين عليه، واللي هو أننا مبنعترفش بالكلام، دايمًا المواقف بتثبتلنا الحقيقة، كده إحنا شبه بعض، ولكن ساعات هتقابل ناس مش بتفكر زيك، وده مش معناه أنك تتجنبهم، ساعات الشخص بيبقى حابب أنك أنه يكون موجود مع الشخص بيكمله، متطمن مع الشخص إللي بيوعيه، يمكن أنا معنديش الفِكر الكافي، ولكن يمكن يقابلني شخص يكملني، وعشان ابقىٰ متقبل فكرة وجود شخص في حياتي أحسن مني لازم أشوفه بنظرة عادية مش نظرة غِل، ولازم تبقىٰ فاهم أن الوعي درجات، طبيعي هتقابل ناس وعيهم أكبر منك، وناس وعيهم أقل منك، ولكن أختار الناس اللي بيوعوك مش بيبعوك، لأن مش كلهم هيشوفوك بنفس النظرة . 

عدى تلات ايام معرفتش أروح فيهم لـ سارة بس كانت فاتن بتطمني عليها، فـ خلال التلات أيام دول كنت ساحل نفسي في الشغل عشان مفكرش كتير، صحيت الخميس الصبح بعد ما فطرت وكنت واخد أجازة يومين بعد ما طحنت نفسي تلات أيام ورا بعض من غير راحة، البيت كان هادي لحد ما أمي صحيت وشافتني .. 

: اي اللي مصحيك بدري كده 

• صاحي عادي مفيش حاجة اعملها 

: يعني أيام الشغل تصحى بطلوع الروح ولما ميكونش وراك حاجة تصحى من الفجر 

• الشعب المصري كله فيه العادة الغريبة دي

: فطرت ولا لسه؟ 

• فطرت 

: شربت شاي؟ 

• شربت

: استحميت؟ 

• من بدري

: هو أنا كل ما أقولك حاجة تقولي عملتها ده ناقص أقولك اتجوزت تقولي وخلفت كمان 

• لا دي لسه بس قريب

: لقيت عروسة .. هتقول لقيت أن شاء الله 

• ايوة لقيت 

: البت الدكتورة 

• بت ودكتورة إزاي مع بعض 

: ماهي صغيرة

• بس دكتورة

: بس صغيرة

• أنتي عايزة أي علىٰ الصبح بجد قايمة ترازي في اي حد وخلاص 

: بتطمن عليك يبني انا غلطانة يعني مبقتش مستحمل كلامي خلاص كبرت وبقالك صوت وبتجعر وبتقول رأيكم كمان ده ناقص تشرب سجاير عشان تبقى كبرت 

• طب مأنا بشرب

: أي! 

• قصدي بفكر بفكر أشرب 

: طب اخفى من وشي شوف نفسك رايح فين 

• مش رايح شوفي أنتي رايحة فين 

: رايحة اهو متستعجلش

• طبعا رايحة المكان إللي مش هنعرفلك له طريق 

: ايوة عند خالتك هقعد نصاية وهاجي

• طيب طريق السلامة أنتي 

دي ام مصرية اصيلة متوزعة علينا كلنا، كل واحد فينا عنده نفس الأم بنفس الكلام بنفس الأسلوب، حتىٰ نفس المكان إللي بتروحه إللي فاكرة أننا مش هنعرفلها طريق فيه، شربت الشاي ولسه هولع سجارة لقيت التليفون بيرن وكانت فاتن .. 

: مفيش أخبار جديدة يا ست فاتن

• في أخبار محصلتش 

: هينفع اجيلها ؟ 

• ينفع جدًا وهي بتسأل عليك

: طيب انا جاي حالا

• لا حالا أي معاد الزيارة الساعة 1 ودلوقتي لسه 9

: هستنى قدام باب المستشفى 

• براحتك 

لبست ونزلت بسرعة روحت المستشفى عشان اشوف سارة، كنت مبسوط وحاسس أني مشفتهاش من زمان، مش عارف جبت اللهفة دي منين وكأني اعرفها من سنين، وصلت المستشفى وروحت علىٰ قسم العناية علىٰ طول لقيت فاتن في وشي ..

: حيلك حيلك لسه باقي ساعتين ونص

• خليكي جدعة ودخليني

: مفيش دخول

• انجزي

: بقولك مفيش دخول مش هينفع 

• طب في طريقة تخليه ينفع؟ 

: اه في

• قولي

: تشوفلي عريس

• اجيبلك طابور وتختاري

: مبهزرش 

• يعم ولا أنا انجزي

: طب مش تعرف سألت عليك قالت أي؟ 

• مأنا هدخل وهي هتقول

: بس مش هتقولك كل حاجة

• فأنتي إللي هتقوليلي إللي ينفع يتقال واللي مينفعش 

: مانت بتفهم اهو

• قولي

: عمومًا هي سألت عليك أول واحد مسألتش علىٰ حد من اهلها 

• حد جالها منهم؟ 

: كلمتهم وقولتلهم قالولي الف سلامة عليها 

• عايز أقول كلمة عيب

: لا مأنا سمعتهم الكلام العيب كله متقلقش قومت بالواجب وزيادة سمعتهم من كل زاوية ركن

• يعني اي؟ 

: لا دي لغة شوارع مش هتفهم أنت راجل متربي

• وبعدين؟ 

: ولا قبلين قولتلها مفيش غيره بيسأل عليكي وبطمنه كل شوية وعايز يجيلك 

• وهي قالت أي؟ 

: لا هي سكتت

• يخربيت الفضول إللي زرعتيه جوايا علىٰ الفاضي 

: ماهو لازم شوية الصاصبينس دول

• أمشي يا فاتن أمشي

دخلت الغرفة إللي كانت فيها سارة وأول ما شافتني اتعدلت من مكانها وابتسمت تلقائي وحطت ايديها قدامها .. 

: إزيك 

• كويسة أو بقيت كويسة

: اي بتضحكي ليه مالك كده 

• مبسوطة أنك جيت 

: فاتن كلمتني وقالتلي تقدر تيجي عشان كانوا مانعين الزيارات 

• ايوة فاتن قالتلي وكمان بتكلمها عشان تطمن عليا 

: المهم أنك بخير 

• الحمدلله بخير

أول ما شافتني إبتسمت إبتسامة مريحة مفارقتش وشها طول القعدة، حسيت أنها كان عندها أمل في حاجة وحصلت، فاهم أنت شعور أنك مستني حاجة تحصل وملهوف عليها ولما تحصل تستقبلها بإبتسامة عريضة ومريحة ومش عارف تعبر عن فرحتك؟ 

ده كان شعور سارة، ومتسألوش عرفت إزاي عشان ملامحها كانت بتحكي كل حاجة .. 

: هتخرجي أمته علىٰ كده 

• يومين بالكتير أن شاء الله 

: فكيتي الجبس بتاعك

• كانت كلها كدمات الحمدلله مفيش أي كسور

: طب كويس ده أنا افتكرتك روحتي مننا

• لسه قاعدة علىٰ قلبكم حبة كمان

: وماله براحتك 

• محدش من أهلي كلمك؟ 

: لا لي؟ 

• اصل فاتن بتقولي كلمتهم ومحدش جه افتكرت أنك شفتهم واتخانقتوا

: لا مشفتهمش خالص 

وفجأة الإبتسامة إللي كانت علىٰ وشها اختفت بعد ما جابت سيرة أهلها بعد ما عرفوا أنها عاملة حادثة ومحدش جالها .. 

: متزعليش نفسك 

• مزعلش نفسي إزاي المفروض أمته هحس أن عندي أهل 

: أعتبريني أنا أهلك يا سارة أنا أهلك وهعوضك عن كل إللي بيحصل ده

• مش هينفع يا زين مش هينفع مش هتقدر تقف قصادهم

: ومقفش قصادهم لي دول آخرهم معروف

• اهلي ملهمش آخر أسمع كلامي

: ما تسيبنا من أهلك دلوقتي علىٰ فكرة شكلك حلو خالص

• اي ده بجد خدت بالك؟ 

: ده مرطب صح؟ 

• ايوة البت فاتن حطتهولي

وأول ما قالت فاتن لقيت الباب بيتفتح وبتدخل فاتن علينا .. 

: مالها بقا البت فاتن عملت ليكم أي! 

• ولا حاجة يبسبوسة في حاجة ولا أي؟ 

: اه أنا الشيفت بتاعي خلص وهسلم وامشي عايزة حاجة؟ 

• لا ياحبيبتي خلاص مع السلامة

: اه طبعا مع السلامة ماهو إللي جاله احبابه بينسى أصحابه 

• بت أمشي 

: همشي اهو وأنت خلي بالك منها 

وخرجت فاتن وقفلت الباب وراها وأحنا ميتين ضحك عليها .. 

: متاخدش عليها فاتن دماغها ضاربة لوحدها 

• لا مأنا لاحظت من ساعة ما شفتها في الطوارئ 

: بس طيبة والله

• ايوة حصل أنا كنت قارفها كل شوية اسئلة عليكي وهي مقصرتش حقيقي

: وكنت كل شوية بتسأل عليا ليه؟ 

• كنت بتطمن عليكي 

: وده عشان أي؟ 

• عشان قلقت عليكي 

: وقلقت ليه؟ 

• يكون حصلك حاجة 

: ليه؟ 

• سارة أنتي هتعملي زي أمي بتسألي كتير ليه ما تسيبي الدنيا ماشية 

: بتزعق ولا أنا ودناني تِقلت

• لا أنتي إللي سمعك بقي تقيل

: أتمنى 

قعدنا نضحك مع بعض والكلام اخدنا لحد ما الوقت سرقنا والساعة وصلت 4 العصر ومعاد الزيارة خلص، سلمت عليها ومشيت علىٰ طول وقولتلها هجيلك بكره الصبح، بس قبل ما اروحلها في مشوار مهم لازم اعمله .

: أي إللي جابك تاني! 

• مش جايلك أنت انا جاي لأهلك

: عشان سارة طبعا 

• كويس أنك عارف أن عندك اخت إسمها سارة

: وياريت ليها لازمة 

• يسطا مين دي إللي ملهاش لازمة دي بتصرف عليكم 

: أي المشكلة

• هو انا عايز أفهم بس هو عادي أن واحدة تصرف عليك وشايف أن مفيهاش مشكلة أنت كويس؟ 

: متدخلش في إللي ملكش فيه عايز أي! 

• اشكالك معندهاش حاجة عشان تديها لحد

لقيت أبوه خارج من جوا بيتعكز على عصاية .. 

: خير في أي يابني

• كل خير يا حج بنتك بس او بنت مراتك معلش عاملة حادثة ليها أسبوع ومرمية في المستشفى ومحدش فيكم سأل عليها

: وأنت عايز أي؟ 

• مش عايز حاجة أنا كنت عايز أمها بس

: عايز أي من أمها 

• عايز اقولها تتقي ربنا في بنتها إللي طردتها من البيت عشان مرضيتش تدي اخوها فلوس أو تعمله مصروف وهي تاعبة نفسها عشانكم

: وأنت أي إللي مدخلك وسطنا أنت مين! 

• عندك حق فعلاً أنا مين

روحتلهم البيت يمكن الاقي صرفه معاهم ويعرفوا أن ليهم بنت، بس للأسف سبته ومشيت وأنا مفيش حاجة في دماغي غير أعرفه أنا مين، مشيت روحت علىٰ البيت علىٰ طول عشان في حوار محتاج يخلص . 

على رغم من أني مبسوطة عشان شفت زين علىٰ قد زعلي أن محدش من أهلي جالي، ساعات بفكر هو أنا عملت أي عشان يعملوا معايا كل ده ويوصلوا للمرحلة دي من القساوة، بس كل شوية بصبر نفسي بإن ده إبتلاء ولازم أصبر عليه، هو حد فينا ممكن ربنا يبتليه في أهله؟، اه هتلاقي ناس ربنا مبتليها في أهلها، أو في ولادها، ربنا قال ﴿إِنَّمَا أَمْوَالُكُمْ وَأَوْلَادُكُمْ فِتْنَةٌ ۚ وَاللَّهُ عِنْدَهُ أَجْرٌ عَظِيمٌ﴾، حتىٰ سيدنا يوسف ربنا ابتلاءه في اخواته وكان ابتلاءه سبب في أنه يوصل لمكانة كبيرة . 

: أي يا دووك جاهزة ؟ 

• جاهزة يبنتي 

: الحتة واقف بره

• مين! 

: سيادة المحامي زين باشا

• فاتن مش ناقصة استظراف تعالي ساعديني

: يعني مش عينك منه

• عيني منه يا فاتن بس عمري ما أروح أقول 

: طب أقول أنا ؟ 

• عشان اكسرلك عضمك

: لا خلاص الطيب أحسن تعالي

كنت خلاص خارجة من المستشفى بعد معاناة مع الدكتور عشان يسمحلي أخرج، وفعلا وافق وهاخد راحة في البيت، دخل زين اخد الشنط وشالهم ونزل بيهم، كنت مبسوطة وهو شايلهم وماشي جمبي، كنت حاسة أني والعياذ بالله مطمنة، شعور أول مرة يقتحمني، بس كنت مبسوطة ومنشكحة كده .. 

: هنرتاح وكفاية مرقعة

• لا خلاص بطلنا مرقعة نهتم بنفسنا شوية

: ياريت والله

• مأنا هسمع كلامك خلاص

: كلام أي! 

• إللي قولتهولي وأنا نايمة أول يوم

: أنتي سمعتيني! 

• ايوة كنت سامعاك

: خليه سر بقا 

• هخليه سر حاضر هو مش أول سر عموما يعني

: هو في أسرار تاني شيلاها ؟ 

• اه يعني حاجة زي كدا 

: حاجة زي اي! 

• السجاير

: ينهار أبيض شفتيني فين! 

• لما كنت عندكم

: طب أوعي تقولي لحد 

• متقلقش قولتلك سر وبعدين مأنا عارفة أن محدش ينفع يعرف عشان كنت مستخبي 

: هي تفاريح كده بس

• تفاريح اه قولتلي وبتشرب أي تاني تفاريح

: لا والله دي بس لما بكون مخنوق

• ماشي ماشي

عملت نفسي مصدقة لأنه فعلاً باين عليه أنه مبيشربش غير تفاريح بس، اخد الشنط وشايلها لحد العربية، في اللحظة دي كنت مبسوطة بشكل غريب، وكل شوية ببصله وابتسم تلقائي، ولكن فجأة لمحت سعيد وسيف قاعدين في عربية بعيد عن المستشفى بشوية، وفجأة العربية اتحركت نحيتنا، جسمي بدأ ينتفض بحاول انادي على زين حسيت لساني مربوط مش قادرة، بحاول اصرخ بردو مش قادرة، العربية جاية نحيتنا وبتقرب وفجأة دخلت في زين خبطته وجريت علىٰ طول، فضلت واقفة مكاني مش قادرة اتحرك ولا استوعب إللي شيفاه، فاتن جريت علىٰ زين إللي واقع علىٰ الأرض والدم مغرق جسمه، مش حاسة بنفسي، مش سامعة أي اصوات كأن الدنيا كلها سكتت حواليا، دموعي بتنزل ومش عارفة اعمل أي واقفة بس، لقيت فاتن بتبصلي وبتقول ..  

: مفيش نبض مفيش نبض

نزلت على ركبتي علىٰ الأرض وأنا بصرخ بس مش سامعة صوتي، مش سامعة أي حاجة كأن الدنيا وقفت كلها، مش شايفة غير زين إللي واقع علىٰ الارض وباصص عليا ووشه غرقان دم، فضلت انادي عليه ..

: زين أنت شايفني يا زين قوم تعالى متهزرش أنا ما صدقت اتطمن قوم يا زين نمشي مش قادرة اقف علي رجلي يا زيين

كنت بصرخ بأسمه وجسمي كله بيترعش، فجأة لقيت حد بيمسكني وبيهزني جامد .. 

: سارة في أي مالك؟ 

ببص عليها لقيتها فاتن إللي مسكاني، بصيت حواليا لقيتني لسه في المستشفى مخرجتش، يعني كل ده كان حلم! 

: فين زين؟ 

• قاعد بره 

: خليه يدخل 

حاولت اخد نفسي بالعافية مش قادرة، دخل لقيني مش عارفة اتنفس جابلي ماية وقعد جمبي .. 

: مالك أنتي كويسة؟ 

• خليك متمشيش 

: مش همشي أنا موجود معاكي 

قعد جمبي لحد ما هديت واتطمنت واستوعبت أن كل ده كان حلم، كنت كل شوية ببصله واتطمن عليه عشان اتأكد أنه فعلا هو إللي قاعد جمبي .. 

: الماية خلصت هنزل أجيب ماية وأرجع بسرعة عايزة حاجة اجيبهالك؟ 

• عايزة قهوة

: حاضر 

لقيت الماية خلصت ونزلت أجيب من السوبر ماركت وجبتلها قهوة معايا بالمرة، روحتلها انهاردة بعد ما عرفت أنها خارجة، انبسطت أنها خلاص هتخرج وإني هعرف اتكلم معاها واقولها أني عايز اتقدملها، بس كانت في مشكلة واحدة، أني هروح لمين اطلبها منه، ضحكت نفسي ورجعت المستشفى تاني بعد ما جبت الحاجة، خبطت علىٰ الباب قبل ما ادخل، دخلت على طول ولسه هنادي عليها ملقيتهاش علىٰ السرير، ولسه هلف ارجع لقيت حد بيخبطني علىٰ دماغي وقعت علىٰ الأرض .