رواية قاتلة ابي الفصل الواحد والخمسون والاخير بقلم بنت الشيخ ترابية
مَر القليل من الوقت وايهم صافن بالكاع
رجع رفع عينه وكال ...
ايهم: يعني حنان قتلت مرتك وبناتك؟
بجه الرجال وكال بصوت مبحوح
: عفتها يم عائلتي يومين سافرت ورجعت ولكيتها قاتلتهم
ايهم: احد مساعدها؟
: ايي طبعا، بس ماعرفهم وتوسطت وسألت عنك والبنية السورية ريناد الي بتركيا ساعدتني هواي حتى اوصلك والحمدلله وصلت الك ...
ايهم: وانتي زهرة؟
زهرة: تمام خلي اكمل
ايهم: كملي بوية كملي
زهرة: بلشت اسرد الهم
يوم عن يوم كامت تزيد بالسحر
ومن تحس بالماي مو نفسه تعصب وتركع بالحايط ومرات الشرطية تدخل تأذيها وتبسطها وهي ولا يمها
مره طلبت طلب غريب مني
حنان: زهرة اريد شعراية منج وشويه دم
صفنت عليها صارلها فترة بعيده عني ليش تطلب هيج سألتها غلست عن الجواب
بقت تهمس بينها وبين نفسها
حنان: لازم يموتون هم لازم يموتون
لازم يموتون وهي لازم تموت
جانت تهمس هاي الكلمات اثناء العمل الشيطاني
وللاسف انا بوقتها كنت مبدله الماي الي تسوي بيه العمل بماي ثاني وماينجح
وكلما تحاول توصل لنتيجه اطفي الشمعه واكللها بدون قصد وتخزرني خزره تشيلني من الكاع
ومره حاولت تذبحني بسجينه عندها
والحمدلله من الشرطيه دخلت بسرعه وسحبتها وبسطتها وذبت عليها ماي ثلج
واخذت السجين
وبيوم محكمتي كلت للضابط عليها وانو عندها اعمال داخل السجن وصدك دخلو عليها وسحبو الغراض منها بعد التفتيش وهي مثل الام ماخذين طفلها منها
ايهم: وهسه هي وين؟
زهرة: غير غيبوبة
ايهم: شنو سببها؟
زهرة: السبب من الغيبوبة هو وكعة ع حافة الحايط بليلة خروجي وبقت تنزف واخذوها من شهرين وليهسه
قاطع الحديث صوت الحجيه نوفه
نوفه: ولچ هويند وينج يمممممه
هنادي: هلا يوم جااايه
كمت رحت الها
هلا يمه
نوفه: ولج تعاي هذا الخيط مايدخل بالابره دخلي
اخذت منها الابره والخيط سويتهن وانطيتها
نوفه: لو اعرف زينب شوكت تجي خنشوفها مشتاقتلها
هنادي: بالليل تجي كالت
نوفه: بت الزفرة ليش نازعه نظاراتج ولج لبسييهن
وكامت تصيح هرجتني هرج كمت اربد
رحت بسرعه لبستهن ورجعت الها
نوفه: ونبي محمد والكفل زيِنب اذا نزعتيهن اذبحج
هزيت راسي وضحكت وكعدت يمها تسولف عن ايام زمان وترجع تصيح وتهدد
.......................
شهل
تقدملي فاقد وابوي وافق وحددنا موعد
أجل سفرته وكال مو مهمه المهم نكمل
ومرت ثلاث اشهر علينا واحنا بعدلنا اسبوعين لزواجنا
ماصار حديث بيناتنا ابد مجرد شي قليل
وعلاقة طبيعية ولا تقربنا لبعض بحچه مخطوبين وحب هو التزم بالاحترام وانا كذلك
سدرة تقدملها مهندس وبنفس الشهر تزوجو
ولباب منتظره عريس الغفله بس تكول ماريد
اريد اكمل دراسه
واني مجهزة كلشي من فساتين وجهاز عروس كامل
الا نفسي ممجهزتها،، كلش خايفة وحيل هم
موضوع الصور بلغت فاقد ثاني يوم من الخطبه
وتفاهمنا وحلها بكل هدوء وسلاسه وانتهت القصة
وعرفني ع حجيه نوفه وهنادي وزوجها واختها
يعني عائلتة كلهم
...................
مشت الايام عادي وايهم ملتهي حيل
ما اشوفه بس بالليل ومرات هم ماشوفه
وهذا الشي بلش يزعجني بس مغلسه شسوي
وبيوم من الايام ايهم كال جهزو نفسكم اليوم عرس فاقد
انصدمنا شسالفة مستعجلين وحجيه نوفه مدت اللسان
واحنا ميتين ضحك عليها
احنا ببداية سنة 2018
الجو حلو والاجواء حلوه
استقرينا ببغداد وكلنا حولنا هناك بس رجعنا لبيتنا علمود عرس فاقد وراها نجيبهم لبغداد
بدينا نجهز ونبدل ونكشخ ع اخر حبايه
اسراء: الكاووووووووويه ياعفو الله
انطيتها الكاويه ونزلت تركض ونهبد شي جوه يمكن وكعت ..
خلصت وجهزت نفسي ونزلت
وسمعنا صوت اسراء صاحت
اسراء: ولك ماااااااااااااااااهر
اجه ماهر من بره يركض
ماهر: هاااه هاااااه شكووو شبيها
طلعت شعرها نصين
نص كاويته ونص كفشه وعصبيه وتخزره
اسراء: ليش ملابسك بالكاع بالحمام ومنكعات؟
راد يحجي عاطت
ونببببييييي محمد اذا مادخلت وشلتهن هسه تطلع بره
وكف تخوصر وباوعلها صفح هز ايده ودخل ودخلت وراه
ايهم: هاي شكو؟
هنادي: ماكو حبيبي
اشر عليه ٠:ليش مالابسة نظارات؟
هنادي:لبست عدسات عمري
اشرلي وراح رحت وراه للمطبخ
اول مادخلت سحبني وسد الباب ودفعني عليه
ايهم: احنا شلون بينا يا الله
هنادي: شبيك حبيبي
ايهم: الشفايف بُنية والكحل الاسود مزين العين
شلون بينا؟
نوفه: دبوسها وخلصني اريد اطلع
اندار ايهم جانت لازم العوچيه ( العكازه) و واكفه
ايهم: هاي شجابج؟
نوفه: حظك الاغبر دوخر وانتي لا تصيرين خفيفة ثگلي عليه
وطلعت
لزمني وسحبت ايدي
هنادي: كالت ثگلي عليه
وحكيت خشمي وطلعت
وسديت الباب وبقى واكف جوه
اسراء: هههفف خلصت
هلهل ماهر
ماهر: صلاواتك اللهي شني هاي گمر گمر
هي تفتر وهو يصوفر
نوفه هزت ايدها وطلعت قبلنا واحنا طلعنا نضحك
ايهم حاضني ويمشي ويهمس كلمات غزل
وماهر واسراء كذلك لكن يتعاركون
صعدنا بالسيارة وتوجهنا للقاعة
وكلمن راح لطريقة
الشباب راحو للعرس واحنا صعدنا للقاعة
وعرس مثل اي عرس عادي ( التفاصيل عند شهل)
................
شهل
اليوم عرسي الكل انصدم وانا منهم
مجنت مقررة بس فاقد مجهز كلشي
رحت للصالون وكملت تجهيز وخليت تجهيزي بالمكياج والتسريحه ع ام الصالون كلت الها ع اخر موديل جهزيني
والترتيب الي صار طلعت حلوه حيييل
اجو اهل الزفه واخذونا للقاعة
وسوينا دخولية تجنن وصورناها
واخذنا صور ورقصنا سويه وحتى دبكه سوينا
بس هو جان متوتر نوعا ماا يعني حتى ضحكته بتوتر جانت بس ماهتميت كلت احتمال لانو عريس عادي
طلعو الزلم واجو النسوان يسحلون بيه ويرقصن
اجوني البنات اسراء وزينب وهنادي
اخذنا صور ورقصنا لحد ماملينا وصار وقت الزفه وكالو راح يصعد العريس ياخذ عروسته وينزلون
صعد فاقد والكل لبس وانا لبست الطربوش او البشت حسب ممعروف هوَ
ونزلنا وتوزع الكل بالسيارات زفة تجنن وحلوة حيل
بس مارمو ايهم ماقبل كال زحمه من الناس خاف ناس عندهم حزن ويسمعون فرح او جهال بالشارع ميصير
ووصلنا للفندق وزاد توتر فاقد بحيث صعد ورجع نزل ونزلني والكل يضحك ويكولون خايف اكثر من العروس
بلشو يهوسوله
وصعدنا ودخلنا الغرفة
بس الي قلقني توتر فاقد القوي الي خلاني اشك اكو شي
شهل: شبيك حبيبي؟
فاقد: ءء ها ههههه مابيه ء شسمه بدلي حتى نتعشه
راح دخل للحمام ورجع طلع اخذ ملابسه ورجع
بقيت صافنه شبي؟
فتحت شعري ونزعت البدلة ولبست الروب طلع هو
ابتسمت وابتسملي
ودخلت للحمام غسلت جسمي وبدلت وطلعت
لكيته كاعد ع الجرباية ويهز رجله بتوتر
شهل: شبيك يقلبي؟
فاقد: مابيه حبيبي،، تتعشين؟
شهل: لا،، كعدت يمه ولزمت ايده
احجيلي ولا تتردد
صفن بوجهي شويه ودنك وكال: انه مو رجال
انصدمت بس مابينت اله
شهل: وشنو يعني؟
فاقد: يعني ماكدر اتقربلج،، حاولت شهل حاولت وماكدرت
هذا الشي من صدك يهز مقام الرجال وصعبه حيل
بس سويتها بضحك حتى اخفف اليأس شويه
شهل: وشنو يعني؟ امانه الله اخر همي ونتعالج سويه المهم انت يمي يول ميهمني!!!!
فاقد: بس انه احسب يوم يوم لهذا اليوم تالي اعجز؟
شهل: نجرب؟
بهتت ملامحه وهمس: ماكدر ابويه انتي
شهل: نجرب؟
هزلي راسه ب ايي وحضني شويه وبلشت حروب العشاق حسب ميكولون ولما وصل للمهم ابتعد
فاقد: مجاي اكدر دشوفي ماكدر عاجز انه
شهل: عندنا وقت للصبح نجرب
ضحكنا سويه وحاول عدّة مرات
وبالاخير اخذني وصرت زوجته فعليًا
بس بصعوبة حيل لكن رغم هذا فرح حيل لانو كدر بنسبة 50٪ يسويها
حضنته وابتسمت
شهل: طول ما اني وياك ماكو مستحيل،، والمستحيل نجرب لحد منسويه المو مستحيل
ضحك وباسني ونيمني ع صدره
جان يلهث بتعب
همسلي: احبچ
وغمض عينه بسته بوسه سطحيه وهمست: احبك
وغمضت ونمت
......................
هنادي: ونبي ماااااااا شنو وخررر
ايهم: لچ فتيتي گلبي دتعااااي
هنادي: مااااااااااا
ايهم: چا بس هم يعرسون؟
هنادي: امانه الله اكعد
ايهم: دتعالي ابويه انتي
هنادي: شتريد
سحبني لحضنه وباسني وصفن بملامحي
ايهم: والحُسين اريدچ
ضحكت وحضنته وانتهى يومنا بحضن دافي
...........................
ترقبوا النهاية للجزء الاول ...
يتبع ......
#قاتلة_ابي2014
الكاتبه الترابيه
النهاية الجزء الاول
في سنة 2020
هنادي: وووووووووولك فضل تعااااال نعنعلا امك
ايهم: دعوفي يلعب
ضربت رجلي وحجيت بعصبيه
: يا يلعب دشووووووف يلعب بالطييين خرب بيه
اجاني يمشي بمشيه غير متوازيه لانو هستوه بلش يمشي ويحجي كلمات مكسره حيل
ابو الفضل: ثوفي هذا حلو؟
ايده كلها طين والبنطرون ينگط
هنادي: ولك ابن الكلبببببببببب
انداريت لايهم صافن...: حشاك حبيبي
ورجعت لفضل
: رووووووح خلي خالتك تغسلك بسررررررعه
دخل يركض عثر ولزمته حجيه نوفه ورجع يركض
طلعت اسراء تركض وره ابنها
اسراء: ولك يمه تعال فتيت گلبي لخاطر الله
أديب: مااااااااا تعفيني
اسراء: ولك والله ما اعضك بس اللبسك الحذاء
رفض رفض قاطع لطمت ع راسها وانطت الحذاء لحجيه نوفه ولبسته ودخلت اسراء تصيح
اسراء: مااا خربه غير دلال ابوووووووه
ابني ابو الفضل عمره 3 سنوات
واسراء ابنها اديب عمره 4 سنوات
من زواج شهل وفاقد هي جانت حامل بالشهر الثاني ومتدري بنفسها وسبحان ربي الي خلاه يعيش وينولد بخير وسلامه ...
شهل وفاقد صار عندهم تؤم بنات عمرهم 3 سنوات
بسيل وليسا
يخبلون يشبهون شهل حييييل
وانا حامل هسه بالشهر الثاني وماعرف اذا ولد او بنت
بس اتمنى بنت لابو الفضل ورغم هذا اليجي من الله حيٓ الله
طلع جعفر ابن حنان يصيح
جعفر: منو اكل الموطه مالتي خلي يرفع ايده احسن
رقية: اني اكلتها شتسويلي؟
جعفر: اذبحج وعلي اليوم
رقية تضحك وتركض وهو هم
.....................................
سديت الدفتر وطكيت رگبتي ومطيت جسمي
حسيت بأيده التفت ع خصري
ايهم: كملتي كتابة؟
هنادي: كتبت كلشي بالتفاصيل تعبت
ايهم: ووين وصلتي؟
هنادي: النهاية
ايهم: شنو اسمها؟
هنادي: قاتِلة آبي 2014
ايهم: جاهزه نروح لامج؟
هزيت راسي وخليت الجهال يم الحجيه وطلعنا
وصلنا لمستشفى الامراض العقلية ونزلنا
جانت بغرفة صغيرة مابيها غير جرباية وتلفزيون وثلاجه وكنتور صغير وشباك عالي صغير
هنادي: شفتي وين وصلتي بحالج؟
شلونج يمه
اليومم ... اليوم نهيت روايتنا
نهيت عذابج وعذابنا... نهيت كل الي صار
دمعت عيوني وطلعت بسرعه طلع وراي ايهم وتوجهنا لمقبرة السلام
رحت وكعدت بيناتهم وحجيت وياهم
هنادي: شلونكم اخباركم؟
كوووم مهند وشوف اختك صار عندها ثنين جهال
وانت بابا؟ اخذت حقك
وهسه حنان تخبلت ودخلت مصح عقلي
انتقمت من كل الي دمرونا بيكم
انداريت ولزمت ايد ايهم وبستها
ساعدتني هواي،،
ايهم: خلقتي بداخلي الحب والامل بوجودج...
بقينا شويه يم ابويه واخويه ورجعنا لبغداد
ابو الفضل: ماما اددت ماما اددت
واجاني وحضن رجلي شلته بوسته ونزلته
نوفه: يمكن فاقد ومرته يجون لانو عزمتهم
ايهم: مو يمكن وانما تأكدي لانو يحب بطنه اكثر من امه
نوفه: چا هو هجي قابل جذب
.......................
شهل
مر ع زواجي 3 سنوات
عشت احلى ايامي مع فاقد
وانا عندي تؤم هسه ليسا وبسيل يشبهوني حيييل
وفاقد ميت ميت عليهم
كدر يعالج نفسه الحمدلله بعد اسبوع من زواجنا
سدرة حامل بولد
ابويه انطاكم عمره من سنه
وامي عايشه وي ترانيم
ونسيت اكللكم ترانيم هم حامل بس بولد
وعمي رجع من البصره واشترالهم بيت جبير بالمدينة
واشترى سيارة هم وسوالهم رواتب
والحمدلله الامور تغيرت وصارت فترة كورونا
بوقتها دخل فاقد وتلكو بسيل وليسا
بسيل: عمق عمق
باوعلي وكال: شنو عمق؟
شهل: عقم
ضحك واخذ المعقم منها وبوسهم
ودخل يبدل ، بداية كورونا اني وفاقد انصابينا
وبقو الجهال ببيت ايهم واحنا تعالجنا الحمدلله تمت
ورجعوهم واليوم نروح معزومين يمهم
هنادي واسراء اقرب ثنين الي وزينب كذلك
بدلنا وخلصنا وطلعنا
البنات صعدو وره كل وحده بكرسيها واحنا توجهنا لبيت ايهم ،،
شغل فاقد اغنيه بالمختصر
يموووت عليها من نزلت لحد الان صارلها شهرين
صارت مثل اغنيه موطني درخ درخناها
ليسا: صدكني لاح تثوف
ويدندن ... باوعلي فاقد ورجع يسوق علاها ودندن وياها
فاقد : وياك گلبي يطير بالفضاء العالي ،
احساس شي خيالي ، ماينوصف يغالي
وباس ايدي وصف السيارة وصلنا للبيت نزلنا وفاقد نزل البنات ولزم منا وحده ومنا وحده ودكينا الباب فتحها ماهر
ماهر: لكم هلا عاش من سمع شوفكم
فاقد: ادخل لا ارفسك
ماهر: نذل شحلاتك صاير
فاقد: هسه غير يدخل الڪـ**** الزلم بره ومرتي وبناتي بالشارع
ماهر: الرجال القيور بعد عيني
فاقد: شلونها مرتك
عفس وجهه وهمس: دكل خـر**
هلاااا عمووو
وركضن البنات لحضنه يموتن عليه
انتبهت ع اديب مكتف ايده وصافن ع بسيل
فاقد: هلا هلا ابنك مركز ع اهدافه
ماهر: تعال بوسها يبعد ابوك حلالك
ضحك اديب ودخل جوه ودخلن البنات ركض
دخلنا احنا هم وشفت البنات بحضن حجيه نوفه
من شافتني فتحت ايدها رحت حضنتها وبوستها
وسلمت ع هنادي واسراء وبوست الجهال
ومانسمع الا صياح بناتي
انداريت شفتهن ركضن للدرج رفعت عيني ايهم نزل
راحن علمود ايهم ركض
وهو شالهن ثنينهن سويه ونزل
ايهم: سلام عليكم شلونكم يابه
فاقد: مشتاقتلك والكفل زينب
راح بوسه ونزل البنات منه وحضنه
ايهم: شلونج يابه شهول؟
شهل: الحمدلله خويه انت شلونك شلون اخبارك؟
ايهم: الحمدلله بخير ،، تأخرتو كلت هذول مايجون
فاقد: ازدحام بالتقاطع صار
هز راسه وكعد
دخلت علينا وحده مثل الاعصار
هل الفترة فرحانه حيل
زينب: سلخييييييييييير يجماااااعه
البدو : صوتج وسم شبيج
سد اذنه وفركها حيل وسلم ع الجماعه وكعد يباوعلها صفح ... نموت عليهم من يجتمعون بس يتناكرون
فاقد: هلا فهيدان شلونك؟
البدو: الحمدلله انتوا شلونكم،، ها ولچ
راحن ركض يخافن منه لحد مايحجي وياهن ويروحن
شهل: يخافن من فهد
البدو ( اللقب مالته بدو الي هو فهد): ليش؟
شهل: ذاك اليوم حجيت وياهن وكلت الهن ليش تخافن
كالن لانو يدخل وبيده مسدس نخاف منه يكتلنا
زينب: اي يمه ليش تخافن بريعصي ميطير هذا
البدو: بتكم اليوم جلدها يحكها مو زازاتي؟
عوجت حلكها ودارت وجهها
نوفه: ولك فهيدان وعلي لو گربت صوب بنيتي اشگك
ايهم: ياتشكي يمه دخيلج مو كدام الجهال
نوفه: واشگك انت هم لا تشوفني ساكتتلك كتلك جيب الطحين
ماهر: اهووووووو يسالفة الطحين صارلها شهر تصيح
ياااابه معزل والحسين معزززززل والمصعب والملويه ومريم العذراء بعد؟؟؟
نوفه: عادي جيبو من غيره
صفك ايهم ايده واستغفر ودار وجهه ع فاقد
ايهم: شوكت تقدم ع سيارتك الجديده؟
فاقد: باجر يمكن لو عكبه بس اخلص شغلي
هنادي: كومن بنات خلي نجهز
كمنا وياها للمطبخ وبدينا نجهز
زينب فرشت السفرة هي وفهد
واسراء وهنادي ينكلن ويرتبن واني اصب
شهل: شكد عليج هنادي
هنادي: شهرين
شهل: يولو اتوقع بنيه واذا بنيه وتشبهج اويلي
هنادي: ههههههههه ياريت ايهم يريد بنيه
شهل: بنتي لابنج وبنتي الثانيه لابن ماهر
هنادي: وزعي خير من الله الولد عندنا
ضحكنا سويه وطلعت ورجعت للمطبخ وصاحت ع ابنها
هنادي: فضل امي ويييينك؟
اجاها يركض يلهث جان يلعب
ابو الفضل: دولي ماما
هنادي: هاك حبيبي انطيها لبابا
اخذ الساعة وراح جانت فالته
شويه ورجع انطاها الساعه وطلع يركض
لبستها وكملنا ورحنا كعدنا وايهم وكف وصفك بيده حيل وصاحلهم
ايهم: يلاااا للاكل بسسسرعه
كلهم اجو وتطشرو كل طفل يم امه وابوه
رفعت ايدها حجيه نوفه
نوفه: بحق مصاب الحسين ولا اله الا الله يديم علينا هاي اللمه بحق ضلع الزهرة واخو زينب
: اللهم آمين
كملنا اكل وكعدنا بالطارمه ضحك وسوالف
................
هنادي
رفت عيني ع الكل وابتسمت وتحمدت ربي
تجاوزنا كل الصعاب سويه
عشنا بسعادة وراحة
كل واحد بينا لم الشمل وكعد مع عائلتة
ولهنا اكدر انهي عليكم حياتي المختصرة الكم
فتحت الكم گلبي وحجيتلكم حياتي بحلوها ومرها
العبرة من روايتي وسردها
لا تقطعون الامل
تمر عليكم لحظات صعبة تقويكم وصدمات تقسيكم
بس استمروا وكافحوا لحد ماتوصلون للهدف وتاليها الراحه مثل الراحه الي بيها انا
عيشوا واستمتعوا
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
لجميع الفصول من هنا
