رواية غيرة اختي الفصل الخامس بقلم جمانه السعيدي
غاده....كل عائلتي يلحون عليه حتى اوافق
بس اني اريد اتأكد من هذا القرار لازم اكون متاكده
من نفسي قبل لا ابدي ويا مرتضى بدايه جديده
بلنسبه الزيد اني نسيته مو بس نسيته كرهته كره العمى مااتحمل حتى اسمع صوته
اتصل مرتضى بليل على حسين يريد يشوف شنو رائينا
موافقين لو رافضين
حسين....ولله ياخويه كلنا موافقين بس غاده طلبت وقت تفكر انطيها مجال كم يوم بلكت اكو نصيب
مرتضى...انشاء الله خير
غاده.... هبه ابد ماشاركت ولا انطت رائيها
اصلا ما تحجي وياي عبالك مو اختها ايكول عدوتها
بس ميخالف
اني مااريدها تدخل باي شي يخص حياتي
كل وقتها سوالف ويا زيد لو يجينا للبيت تكعد ويا
لو يطلعون بس قليل كلش يطلعون
بهذا الوقت زيد لكه شغل والتهى عنها
قليل يتصل عليها
لو يحجي وياها بس اول شهرين بعد الخطوبه
انخبص بيها وكل شويه جاي يشوفها لو يتصل عليها
من حصل شغل انشغل عنها
اسمعها تكول بعصبيه كلما اتصل عليك مشغول
يمتى تفرغلي
من شافتني سمعتها غيرت كلامها
هبه...اي حبيبي اني هم مشتاقتلك
ماتريدني اعرف اي شي عن علاقتهم
اصلا اني مايهمني اعرف اي شي عنهم
بعد يومين من طلب ايدي مرتضى اليوم الثالث
طلعت من المحاضره
الساعه ١١ جان اشوف مرتضى واكف بوجهي
لابس قاط رمادي وقميص اسود
حالق شعره ومحدد اللحيه والشوارب الساعه شلون
العطر شلون بس شافني
ااشرلي حتى انتبه علي
قربت علي
غاده...صباح الخير
مرتضى...صباح الخير شلونج
غاده...تمام الحمد لله
مرتضى....ممكن نحجي اذا عندج وقت
غاده...تمام
مرتضى...تعالي نكعد شويه بعيد عن الهوسه
غاده....تمام
طلعنا للحديقه ااكو مسطبه صايره بلاخير جوه الشجره
كعدنا اني ويااا
مرتضى....اني احب الصراحه ومااحب اللف والدوران
اني سمعت من حسين انتي طالبه وقت تفكرين
وهذا الشي من حقج فكري براحتج
بس عندي سوال اريد اعرف اجابته قبل كلشي
اكو شخص بحياتج
غاده.....لا ماكو اي شخص بحياتي
مرتضى...تمام اذا تردين تعرفين اي شي عني اني مستعد
اجاوبج على اي سوال
يمكن اذا حجينا سوه وتبادلنا المعلومات يصير قبول بينا
جمانه السعيدي
مبدئيا اني كنت ماأجل فكرة الزواج اله اكون نفسي
ويصير عندي بيت مستقل
واكدر ارتبط واكون مسؤل عن الانسانه الي راح ارتبط بيها
حاليا اني مستعد للزواج
اذا عندج سؤال تفضلي اعتبري هاي كعدت تعارف
ومن حقج تقبلين او ترفضين
بلاخير الزواج توافق بين ثنيين
غاده...باوعت علي شكله حلو وشخصيه طويل وضخم
وانيق اسلوبه بلكلام حلو
مرتضى....ليش صفنتي بوجهي ااكو شي
غاده...ابتسمت
مرتضى...ااكو شي يضحك
غاده....جاي اكول سبحان مغير الاحوال مرتضى الوكح
الي ما ينجرع
الي جان مااذي جهال الشارع ومحد يخلص منه
شلون كبر وصار هيج شخصيه ومثقف وعاقل
انسان مسؤل محترم ويعرف شلون يختار
رزن وعاقل ومهذب
مرتضى....ههههه ههههه انتي بعدج تذكرين
غاده....انت تذكر شجنت تسوي بلجهال ولا واحد
يخلص منك
مرتضى....افتهم من هذا الكلام انتي راح ترفضين
لان مجاي تذكرين مني بس الوكاحه
وضرب الجهال قبل
غاده....ولله من يوم شفتك لليوم اقارن بين شخصيتك القديمه والشخصيه الجديده
سبحان مغير الاحوال
مرتضى...جنت زغير وما افتهم هسه كبرت وعقلت
انتي تعرفين اني شكم شغله اشتغلت حتى اصرف على نفسي واني ادرس
اشتغلت بمطعم اغسل مواعين
استغلت حمال
اشتغلت حارس على مجمع
اشتغلت بكال اجيب زرع وابيع
حتى اصرف على نفسي منا لمن اتخرجت
جمانه السعيدي
غاده...اهلك وين
مرتضى....ابوي توفا خواتي ازوجن
اخوي الجبير طلع للخارج مزوج وعايش حياته هناك
اخوي الزغير بقا بيت اهلي مزوج وعنده اطفال ثنيبن
امي عايشه ويااا
غاده...اخوك الزغير ازوج وانت بعدك
مرتضى....اي اني ماقبلت ازوج اله اكون نفسي
قابل ابهذل بنت الناس وياي
لازم واحد يكون كد المسؤليه يله يزوج
غاده....ولله صاير عاقل
مرتضى....هههه شنو جنت مخبل قبل
غاده....لا مو مخبل حشاك بس وكح تذكر شلون جنت
تكتل الجهال
اليوم الي انتقلتو من الشارع
يوم عيد عدنا خلصنا منك ارتحينا نلعب بكيفنا
مرتضى...هيج اني جنت مغثه
غاده....اي ليش اني مستغربه من الشخصيه ااجديده
مرتضى...على اساس انتي حبابه ترا ماناسي العضه
غاده....غمضت عيوني وخليت اديه على وجهي وكمت اضحك
مرتضى....اي اضحكي عبالج نسيت
غاده....نزلت ايديه وكمت اضحك
مرتضى....لو توافقين لو اجي احشمكم لان العضه ليهسه توجعني
غاده...هههه وا خزياه عبالي نسيت
مرتضى.....شلون انسى اني جنت مااخاف من اي احد
واكبر واحد اموته ضرب
بس انتي غدرتيني غدر لو ما جاي اضرب حسين
مجان كدرتي عليه
غاده....انت وكح تريدني اشوفك تضرب اخوي واسكت
لا ولله مااسكت
لو ينعاد الموقف من جديد هم اعضك اني مااقبل اي واحد يقرب على اخوي
مرتضى....مو سنون عبالك بلايس طلع من عندي دم
بوقتها
غاده.....حيل حتى تبطل تضرب الجهال
مرتضى.....سويت تطعيم بعد هاي العضه
غاده....شنو قصدك اني جلب
مرتضى.....منو يعض غير الجلب
يله ميخالف اني مسامح
غاده.....اسفه
مرتضى.....على شنو
غاده...على العضه مبين مأثره عليك حيل لان ما ناسيها
مرتضى... فرحت من شفتكم مره ثانيه .من شفت حسين بلمستشفى عرفته
بس هو ما عرفتي اول ما تعرف عليه
فرحت حيل بعدين من اجيت أشد الكانونه
حسين كال غاده تعبانه
مااعرف ليش فرحت من سمعت اسمج
جنت متلهف اشوف شلون شكلج من كبرتي
اتفاجئت لان صايره حلوه هواي عن قبل
غاده....اني حلوه من زمان
مرتضى....قبل اسميج الدبه حتى اقهرج
غاده...واني اسميك ابو صماخ لان اذا ضربت واحد براسك
يفقد الذاكره
مو راس كره حديدية
مرتضى...تعادلنا كل واحد طلع للثاني اسم
غاده....انت هسه جاي شتريد بلضبط
مرتضى....اكو احساس بداخلي يكول انتي مناسبه اليه
انتي الي جنت ادور عليها من زمان
مااعرف هذا الاحساس حقيقي لو لا
اتمنى توافقين وناخذ وقت نتعرف على بعض
اذا شفنا نفسنا مناسبين واحد للثاني
تمام ونكول على الخير والبركه
واذا ماكو توافق اتمنالج السعاده من كل كلبي
غاده....لا لا انت مو مرتضى على كيفك شنو
هلرومانسيه شنو هلرقي
االي يشوفك قبل يكول يطلع رئيس عصابه
محد يتوقع تطلع هيج
مرتضى.....اني اريد اعرف ليش عجبتيني السانج شطوله
ونازله عليه حجي من كعدنا الهسه
وافقي لا اغير رائي
غاده....لا ولله اريد وقت افكر
مرتضى....مراح انطيج وقت كل شويه اطلعلج من مكان
منا لمن توافقين
وافقي عيني وين تلكين واحد هيج متمسك بيج
غاده....اذا وافقت مااريد نزوج كبل
اريد ناخذ وقت واحد يعرف الثاني ايجوز مااعجبك
وتغير رائيك
مرتضى....مستحيل اغير رائي اني متأكد من حبي
غاده....رفعت حواجبي وابتسمت كتله بتعجب ((تحبني ))
مرتضى...اي احبج شنو الإعجاب شنو التعلق
نوع من انواع الحب
جمانه السعيدي
اريد ابدي كلشي وياج باسم الحب هاا شكلتي
غاده....موافقه
مرتضى....هذا احلى خبر سمعته اليوم
باجر اجيب امي واجي حتى نتفق على كلشي
غاده....تمام
مرتضى...عندج محاضره لو اوصلج للبيت
غاده...لا عندي محاضره شكرا
مرتضى....شكرا لان انطيتيني من وقتج
غاده....الكلام وياك ممتع
مرتضى....انت الي حلوه والكلام وياج مثل العسل
راح مرتضى بقت عيني ورا
اول مره التقي واحد شخصيه مميزه مثل مرتضى
سعيده جدا بلحديث الي دار بينا
غير هواي من نفسيتي
رجعت للبيت وحجيت الامي على الشي الي صار بينا
ثاني يوم مارحت للكليه
نظفت البيت وحضرت نفسي
العصر اجا هو اوامه
كعدنا اني ويا وامي وأمه وابوي وحسين
كلما يرفع عينه ويشوفني اباوع علي يبتسم
قبل لا يطلع كال اي طلب تطلبو ماعندي مانع
باجر انروح نشتري ذهب العروسه
ثاني يوم اجا بالسياره اخذني اني وامي نشتري ذهب
كلما اشوف شي ناعم يكول لا اخذي شي ثكيل
اشترالي ذهب يخبل كلاده طويله ومحبس وتراجي
طوال وبتوت اتلاثه وحلقه رجع اختار تراجي ناعمات كال ذني هم اخذيهن
امي....الله يرزقك ويكثر خيرك ويفرح كلبك
مرتضى....بعد المهر أخذها تشتري ملابس ومكياج واي شي ناقصها
غاده.... تسلم شكرا جزيلا
حددنا المهر بيوم الجمعه بعد اربع ايام
من رجعنا للبيت ولبست الذهب وشافته هبه
طكت من القهر وين الذهب الي اشترا زيد ووين هذا الذهب
امي...يخبل بلعافيه
هبه....طلع ابو صماخ بي سبعين حظ
غاده....مااسمحلج تكولين علي هيج فهمتي لو لا
هبه...اني مجذبه مو جنتي تسمي ابو صماخ هسه صار حلو
غاده....على كلبي مثل العسل
على الاقل طلع رجال كد كلمته وما قصر وياي
مو مثل أشباه الزلم الي يلعب على الحبلين
هبه...احترمي نفسج
امي...اس عيب هذا الحجي هبه روحي الغرفتج
انتن خوات لو عدوات عيب مايصير هذا الحجي
بعدين منو الي يلعب على الحبلين
غاده....اسئلي هبه تعرفه كلش زين
اخذ الذهب اضمه لا ينفس ومااتهنى بي
