رواية الدنيا دوارة الفصل التاسع بقلم ناريمان
.
عماد
تلفتت كانت نفس البنت بس اليوم غير اول مرة نشوفها بنضرة ثانية كانت لابسة عباية شرعية ووجها منور وخالي من اي ذرة مكياج ومبتسمة ابتسامة ساحرة
عماد😍
البنت.. معليشي عماد جهازي جاهز
عماد.. اي اي.... احم اا احم كيف حالك
البنت💃.. كويسة وانت
عماد.. الحمدلله
ومشيت جبتلها جهازها ومش قادر انزل عيوني من عليها كان اللبس المستور طالع عليها خياااال محلاها البنت المحتشمة
خذت البنت لابها وطلعت بعد ماحلف عماد ان ماتخلصش حتى ربع
.
انا كان وزني يزيد بس مع هذا كنت نقاوم في وضعي ونحاول نهتم ومانهملش روحي طيبت غداي مبكبكة لان ماعنديش وقت طالعة من عرس خوتي ضميت حوشي وبنجهزوا لعرس عمورة
اتصلت بمنى نسألها على جو العرس ونباركلها بس الاخت تجاهلت اتصالاتي يلا قلت اكيد مشغولة
روح سي السيد وانا قعدة في حوايج التنظيف
عماد😐😏
انا.. هلا حبيبي
عماد.. بالله جيبيلي غداء جعان موت
واتكى عالصالون من غير مايشوفلي استغربت بس قلت يلا يمكن انا نتحسس بزيادة جبت الغدا ولقاه مكرونة حدف الكاشيك في الصفرة ونزل مو غير اي كلام
قعدت نبكي اول مرة يديرها ماعمره قبل دار لقطات هكي لميت حوستي وبعثتلي عمي ان ننزل بش نديروا حلويات وكعك للعرس نزلت لقيت جاراتنا الكبار يعجنوا هما وعمتي ويشكلوا وجايبين فرن كبير في الجنان سلمت عليهم ومشيت الداخل لقيت منيوة اديرلهم في شاهي
انا.. هلو
امنية.. هلوات
انا.. بالله عليك من مزال يدير في سبر للعرس حلويات وكعك كان وصينا عليهم اريح
امنية.. ماهو تعرفي امي لازم العادات والتقاليد في كل شي حتى الكسكسي بيبرموه غدوا
انا.. تبي الحق من يوم معش يديروا في الأسبار الدنيا بسالت
زعما بيتعشوا هنا
امنية.. طبعا امي مش حاتخليهم يروحوا من غير عشاء
انا.. عماد نزل عندكم
امنية.. لالا ركب سيارته وطلع مادخلش
هالراجل وين مشى وشن صايرله مع ان قلبي مليان عليه
انا.. هاتي نجهزولهم ظيافة وانت بري اقري امتحانات
امنية.. مزالي 3 مواد نمتحن فيهم واناقش مشروعي وتم
انا.. ربي يسهلك ياااارب
امنية.. ان شاء الله
مشت تقرا وانا قعدت شاهي وقهوة وقهوة وشاهي لدرجة حسيت برزن على حزامي وظهري وجعني من الوقوف
.
يوسف وامل
العرسان مشو لتركيا 10 بيقعدوا ويوسف كان فرحان بأمل
امل بنت مستهترة تحب الاختلاط والأصدقاء الشباب واي ميعاد فيه الجنس الخشن تتعب معاه مش انها تخون بس تحب الانفتاح وماعندهاش حدود في شي وتفكيرها سطحي يعني ماينعباش عليها في شي وطبعا لما كان بوسف يجي لكليتها عجبها وقصقصت عليه لين عرفت انه يحب البنت المحافظة مشت تظاهرت قدامه انها قمة في الاحترام لدرجة لما يكلمها واحد بيتزوج ماتوقفش عليه
بس يوسف ذكي قدر يعرف جزء بسيط من طبعها
في الليل
امل كانت في البلكونة وهو كيف طالع من الحمام شافها واستغرب وجاء وراها بشوي لقاها تشوف لشابين واقفين تحت وتوزع في الابتسامات
يوسف.. امل
امل نخلعت.. بسم الله خيرك
يوسف.. 😠 شن اديري هنا
امل.. نشوف في المراة هديكا ساكنة جنبنا قلت بالك ننزل نهدرز شوي عليها
قدم يوسف شاف لقى المراة جارتهم في الفندق فعلا كانت مع راجلها ورا الشباب شافلها بشك.. خشي داخل
امل.. حاضر ياروحب انت
.
عماد وما ادراك ماعماد كان سهران مع صحابه عالبحر بس مش صحابه قبل سهران مع عثمان وبشير قاريين معاه قبل وطريقهم مشبوه
والسيد عماد نسى روحه معاهم كانوا يشربوا بس هو رفض وقعد يهدرز ويضحك ويلعب في كارطة وبس
.
انا تعبت هلبا وزاد الوجع بس قعدت نقاوم اقل شي لين نكمل العشاء بديت نطيب في البصلة والمرقة خشت عمتي
عمتي.. البلا فيك هذا شن
انا😓 شن في
عمتي.. ياخامره هكي الحوسة في المطبخ وانت اطيبي ليش ماغسلتيش الطواسي قبل
انا.. ماعليشي ياعمتي تعبانة شوي نحط العشاء ونظم كل شي
عمتي.. نلقى حاجة ماتعجبش ليلتك يودا حظي اسود في الكناين
انا😭
طلعت امنية لقتني نبكي
امنية.. غزووولة خيرك
انا.. تعبانة معش قادرة نوقف
امنية.. سامحيني غزل نسيتك مرة وحدة قعدت نقرا نحي من ايدك والله ماعاد ماسة حاجة توا نكمل انا
انا.. لا توا عميمة تزعل
امنية.. سكري فمك وبري لداري او اركبي شقتك ارتاحي تعبتي هلبا
انا من الوجع ركبت شقتي ورقدت رغم الوجع ظهري كان مقسوم نصين
امنية قعدت اطيب في العشاء ولمت المطبخ وخشت امها
عمتي.. حييييي نهارك العطيبة هكي وينها
امنية.. تعبت ياماما حرام ماشفتيهاش قريب اجهضت
عمتي.. دلع نسون حسابها عندي غير يروح عماد والجارات
امنية.. ربي يستر
.
عند عيلة منى ورحمة العرس رابخ والتبتيت والتغليف واسهريات والطرحات والجو فايح بادي
.
عامر
الشقة دارها قصر صغيرون من ديكور واثاث وذوووق في كل شي
.
روح عماد وامه كانت تستنى فيه هو خش وهي ناداته وباقي العيلة راقدة طبعا
عمتي.. عماد تعالى
عماد.. خير يام شن في
عمتي.. تعرف مادير حد للغزالة اللي فوق لا ولدي لا نعرفك
عماد.. شن فيه
عمتي.. ااااااخ ياوليدي اليوم حشمتني قدام الجارات لاعوالة مقومة لاشي وفي الاخير العشاء قريب بلبزاته غير جت اختك في اللحظة الأخيرة ساواته وطولة اللسان انا راه مايمشيش معاي الوضع هذا ياربيها ياتقلب وجهها لأهلها ريت هالصبي اللي بتجيبه
عماد😳.. كيف عرفتي
عمتي.. عارفته حامل ببنت طيح سعدها ياتسقم ياحوش اهلها
.
ولع عماد وهو كان على سبلة ركب والنار اطير من عيونه قربع الباب.. غززززززززل
نضت مخلوعة شو في
عماد.. شن ملبزة تحت اليوم
انا.. غيرك عماد شن صاير بشوي فهمني
عماد.. امي خط احمر ياغزل واهلي يسوووك ويسوو راسك ماتخلينيش نقلب عليك جو حامل ومانقدرش والتبلبيز نحيه من راسك حتى الكلاب تحمل
انا💔😭
معش قدرت نرد عليه لان مش حيفهمني
(نقوللكم عماد علاش دار هكي لان كان حاسس بالذنب انه بدا يفكر ويشوف في غيرها فقرر يقلب الطاولة عليها حتى يبرئ نفسه ويطلعها هي غالطة)
.
وجعني كلامه معقولة عماد حبيبي هكي يقولي قعدت ت نبكي وقلبي يوجع فيا هلبا للصبح وحسيت بروحي تعبت ووضعي مش كويي بس قعدت نكابر
.
عماد مشى رقد في الصالة وهلبا مشاعر عنده بين حبه لغزل وبين رغبته في غيرها
.
الصبح درتله فطوره وضميت شقتي وغسلت الدبش ونزلت قررت مش حانحكي كلمة ولا نفتح فمي وعمتي قريب انتقمت مني بين جري وغسل ورفع ثقل ايام العرس كلها هكي حتى لبس زي الناس ماخلتنيش القفة لبست عادي جدا لان عماد كان يتهرب مني ومن الحوش ونتصل مايردش نبي نمشي للمزين نقص شعري ونلف على روحي بس اتصلت اتصلت بلا فايدة😔
واهل العروس كانوا عارضات ازياء لبس وجو مليح قعدت متنكدة وبان عليا هلبا والخميس نفس الشي بعثت مسجات لعماد وهو مايردش قعدت نجري انا وامنية ومش ملحقين
امنية.. غزل حبي خيرك وضعك مش كويس بكل شاحبة
انا.. عماد 😭
امنية.. خيره
انا.. مايكلمش فيا بكل ومايردش عليا
امنية.. امسحي دموعك ماتخلي حد يشوفك وتعالي معاي ومانسمعش منك حرف
مشيت معاها لدارها ودارتلي وجهي كامل وقصتلي شعري وسشورتهولي
انا😍 منوووووش الله يهبل
امنية.. مواهب مدفونة 😂 بري جيبي قفطانك وهاتي نمكيجك
ركبت جبت قفطاني شريته في عرس خوتي ومالبستاش ونزلت لأمنية مكيجتني وحطتها في المكياج كانت حلوة ونظيفة عالموضة وتغيرت خاصة ان المدة الاخيرة هملت روحي
امنية.. غززل بنسألك
انا.. شنو
امنية.. لالا شي
انا.. قولي شن فيه
امنية.. شي شي وطلعت
عرفتها بتسأل على مرت يوسف بتجي او لا
.
يوسف ومحمد وعرايسهم روحوا الأربعاء من تركيا لان صارت دوشة ومحاولات انقلاب في اسطنبول
امل.. يوسف حياتي بتمشي للعرس
يوسف.. اي اكيد
امل.. اممم به بنستاحشك
يوسف.. انا اكثر😍😍
.
مشيت نستقبل في الناس وعمتي مصدومة فيا امتا لحقت
امنية لبست قفطان حوتة اسود ودارت شعرها فلو وحطت مكياج بسيط وطلعت تحفة كأنها وحدة من الفنانات وانا قفطلني كان متاع حوامل لونة عنابي كتافه طايحة ومنفوخ من تحت قصير من قدام وطويل من الخلف َطلعنا نستقبلوا في الناس
جو امي واختي وصاحبات امنية وززححححمة العرس وعمتي لبست رداء حرير وطلعت كداس الذهب ولبستها تقول مرت ملياردير هذا كله فرحانة برحمة كنتها الجديدة
ووقت العشاء كانت امنية ادور على عماد بش يجوا يرفعوه بس مايردش وقفت على تركينة وقعدت تستنى لقت ولد صغير قالتله نادي على عماد ومشاء الولد لقى عماد ويوسف والشباب
الولد.. عمو عماد مراة تبيك غادي
عماد يحسابه انا
عماد.. يوسف اكيد اختك برا شوفها خللي نسلم على جماعتي كيف جو مشى يوسف وفي باله غزل فتح الباب شاف امنية
بكامل اناقتها ونصدم بكمية الانوثة والجمال اللي عندها شافها من تحت لفوق 😍😍😍😍😍😍♥️❤️❤️❤️
امنية ماتت بالحشمة وفاقت من اثر الصدمة وخشت ورا الحيط وطلعت عينها بس تكلم فيه
يوسف😂😍
امنية.. وين عماد
يوسف.. مش فاضي ونحسابوك غزل
امنية... ااااااا باهي تعالو ارفعوا العشاء
يوسف.. حاضر 😍
ومشت امنية ووجها احمر بينفجر
يوسف.. وووه قداش مايتغيروا النسون محلاها 😍 عيب يايوسف انت متزوج خلاص
وهكككككي لين مشينا بنجيبوا العروسة مشيت انا وامنية مع عماد وعامر قدامنا هو اصحابة دايرينله موكب فضييييييع عامر طبعا تجاهلني تجاهل تام ولا كأن يشوف فيا قدامه وواضح ان هو يحاول ان يتجاهلني وجعني في وسط قلبي بس خلي يفوت العرس عالخير دخلنا ودخل عماد رحمة طالعة تهبل حلوة وعامر واضح الحب في عيونه دخلنا وعماد كان برا منى لابسة قفطان حلو لونه ملكي حوتة ومن فوق دانتيل
روحنا بالعروسة وعمتي قريب تنقز على رجل وحدة بالفرحة وصدمتني بعد ماروحوا العرسان لشقتهم وفضت الدنيا من الناس جت جنبي لعماد وقالتله.. عقبال وليدي عماد يارب نجيبله مراة مسقمة وسمحة
عماد.. ضحك
انا💔
معش قدرت نتحمل معناها يبي يتزوج عليا وراضي وركبت جري عالدروج ونسيت اني حامل لين حسيت بنخصة
ركبت شقتي وقعدت نبكي والوجع زاد بشكل رهيب
