رواية صرخة مؤجلة الفصل الثاني عشر بقلم ود الزهراء
صدفه شفناك
ونسيّنه شلون چِنا
كثر مابيها أمان النَظرة مَنك
چِنا نتمنى مثل عِينك وطنّة
••••••••••••••••••••••••••••••
سَدف
فزيت نص الليل على صوت بچي علاوي و هوَ نايم لزمتة لگيت الحرارة زايدة ما ناقصة ضليت احاچيه اريد ينتبه وياي
سَدف:: ها حبيبي
گعدته من الفراش مستمر يبچي و يگح صوت گحته عالية ضليت احچي وياه ما فاد شربته العلاج اللي جاباه الولد اله و ضل مستمر يون و يبچي
سَدف:: لا تخوفني عليك حبيبي ، اسويلك كمادات؟؟ اي اي اسويلك كمادات
باوعت بالغرفة اريد قطعة قماش نظيفة ما لگيت او بالأحرى ما دورت عدل لأن مستعجلة علمود علاوي فزت مينا من صوت علاوي، اخير شي نزعت حجابي و ذبيت ماي عليه و مسحت بيه وجه علاوي سكت من البچي بس ضل يون و انا گعدت فوگ راسه حسبة تجيبني و حسبة توديني رجعت مينا لفراشها غطيتها و رجعت نامت، ضليت صافنة خانگتني العبرة ليش هيچ؟ ما ببالي غير هذا السؤال و اسأله الامي و الابوي ليش وصلتونة الهاي المرحلة؟ بعدنا صغار كلنا و كلنا بأمس الحاجة الهم ليش سوو هيچ؟؟ و الكثير من الليش بعقلي و ولا ليش لگيتلها جواب خليت راسي على رجلية و بچيت بچي سنيين كله طلعته بهاللحظة تعبتت تعببت انتِ مو گد المسؤولية ليش تشردييين بيهم؟؟؟! گطعت نفسي تگطع ملخت شعري و خانگة صوت بچيي خاف يگعدون كلاني الندم اكل لو متزوجة غسان و راضية بالعيشة وياه ولا هاي سوايتي اللّٰه لا يوفقني و لا ينطيني الحقييرة الانانيةة ما فكرت بس برووحي ما فكرتت ما فكرت ضليت ادگ على راسي هيچ احس اريد اطلع عقلي من مكانة و اگطعه لأن ما فكر عدل بذيچ الساعة القررت بيها هذا الهلاك الغبيةة عبالها من تشرد الحياة تصير وردية طلعت انگس من الچنت عايشته و لو يرجع بية الزمن اتزوج غسان الهمجي ولا هذا الضياع و التشرد و هسه لو اضل ساكنة الشوارع لو ارجع و يذبحوني ما عندي غير هالاثنين لو اعيش بالذلة لو انذبح و هذا اخوي المريض اللي حتى ما عنديي فلوس اخذة للطبيب،الغبية هذا كله ما فكرت بيه اكبر غلطة غلطتها طلعت من بيت عمامي امدانيي عمت عيني
و اثناء هذا الانهيار اندگ باب الغرفة بسرعة مسحت عيوني و عدلت شعري و باوعت للشال على وجه علاوي و مبلل ما اگدر البسه جريت عباتي و خليتها على راسي غطيت بيها حتى حواجبي ياللّٰه رحت فتحت الباب على النص طلع الولد نفسه تحمحم گبل لا يحچي
غَطرَف:: صباح الخير
سَدف:: صباح النور
غَطرَف:: ااء وكت صلاة هسه بس نصلي نطلع
سَدف:: وين نروح؟
غَطرَف:: للبيت
سَدف:: لا باوع ما اريد
غَطرَف:: شنوه الما تردينة؟
سَدف:: ما اريد اروح البيتكم بس آخذ غراضنه و هاي هي مشكور و رحم الله البطن النگلتك و ما راح انسى ليوم الدين فضلكم و وگفتكم ويانه
غَطرَف:: وين ترحين؟
سكتت مبحلقة عيوني عليه ما اعرف وين اروح گتله
سَدف:: ارض اللّٰه وآسعة وين ما نروح نروح مالك غرض بينه
صفن عليَّ مثل التايه و محتار شيحچي
غَطرَف:: لـ حد الآن اني ما اعرف شنو اللي خلاچ تجين النه و هذا الحچي انتِ و هذول الاطفال صارلكم اكثر من يوم بالشارع
دنگت ساكتة من طول الهدوء بيناتنة اتنهد و گال
غَطرَف:: على كُلٍ راح تجين ويانة للبيت عود ساعة الگيتي مكان تروحين بيه روحي وين متردين محد راح يلزمچ
راد يروح بس استوقفة سؤالي
سَدف:: وين اتوضىٰ؟
اشرلي لـ برا هزيت راسي و طلعت برا شكل السماء كلش حلو هستوه يريد يطلع الفجر و اصوات زقزقة العصافير ترد الروح ما گدرت استمتع و اتأمل السماء اكثر عيب اطول وگفتي هنا، بسرعة رحت توضيت و دخلت ركاض جوة ميتة من البرد لگيته يصلي و صديقة اللي وصلنا بسيارته نايم على صفحة دخلت للغرفة بعيوني النعاس چيكت على حرارة علاوي و خذيت شالي المبلل فتحتة و خليته ينشف على الميز ردت اصلي بس اتذكرت ما عندي تربه اول ما فتحت الباب لگيته بوجهي من شافني مدلي التربه خذيتها منه گتله
سَدف:: شسمك؟
-غَطرَف
سَدف:: شكرًا غَطرَف
هز راسة راد عليَّ بأبتسامة كلش واضحة مجاملة، سديت الباب صليت و دعيت و كملت ياللّٰه گعدت اخواني و بالگوة گاموا كلش تعبانين گلتلهم اطلعوا غسلوا برا سمعوا الحچي و طلعوا، و اثناء ما هُمَ برا انا لبست حجابي و لبست عبايتي و ضليت منتظرتهم كلهم حتى غَطرَف و هذاك الولد شو سكتة طبوا اخواني گالت مينا
مينا:: هذا الرجال يگول ياللّٰه خل نطلع
گمت من مكاني عدلت عباتي و طلعنا لگيتهم واگفين بالباب مال الشارع و ركاض لبسنة احذيتنة و طلعنة وراهم صعدنا كلنة بالسيارة و حرك الولد
~~~~~~~~~~~~
رواء
مجرد ما غَطرَف خذه البنية و طلعوا دخل ذَوّاد مستعجل
ذَوّاد:: گومن بسرعة
ام ذَوّاد:: وين نروح يمة
ذَوّاد:: ارجعن كلچن البيتنا خاف هنا يجوون الشرطة
ام اسماعيل:: صدگ الشرطة تفتش البيت؟؟
ذَوّاد:: لا علوية منو گلچ؟
ام اسماعيل:: غَطرَف گال
ذَوّاد:: لا غَطرَف ما لحگ يفتهم الموضوع اني استعجلته علمود ياخذ البنية و اطفالها و يروح بيهم لأن بس يضلوون هنا الشرطة ترجعهم وي عمهم و ابنه و هيَّ البت دخيلة يمنه ما يصير بهالسهولة نسلمها، ابو عباس اشتكى مو علمود ننطي البنية گللهم اكو ناس غربة دخلوا الفرعنة و سووا مشكلة وي ولدنه و الشرطة اجوا حاى يحلوون المشكلة الصارت و شالوا عم البنية و ابنه
گعد يقنع بأمي و خالتي السالفة بسيطة و أنحلت بس احتياطًا نروح البيتنا كلشي يصير يمكن هنا كلها تتجمع و بعد ما اعرف شنو لأن ما افتهم بهاي السوالف و بالشافعات يلا اقتنعن و اكثر شي تعبته خالتي ام اسماعيل ما تقبل تگول شلون الشرطة تدوس بيتي و گوة قنعها، رحنه لبسنة عبينة و ذَوّاد چان متفق وي صديقه يوصلنه بسيارته طلعنه لگيناه واگف بالباب. صعدنا وياه اني خلني اصير بأكثر مكان مزعج خلني اگعد بنصهن ما گدرت اعارض لو احچي استحيت يعني احنه بيا حال و اتعارك على المكان
گعدت ساكتة باوعت على المراية البنص چان الگاه يباوع عليَّ و بس التقت نظراتنة وي بعض دار عينه للطريق، احتاريت وين انطي وجهي اتوترت كلش شنو هالصلافة ضليت اغلط عليه بگلبي ما خليت غلطة ما غلطتها عليه نزلته الاسفل السافلين منا لـ حد ما وصلنه للبيت اني مشبعته مسبه احترگ گلبي يعني اخوي مأمنّة يمه تالي هيچ يباوعلي انعمت عينك يا چلب
نزلنه من السيارة و هوَ باقي واگف امي طلعت المفتاح و فتحت الباب و دخلنه و هوَ باقي بمكانه اشرتله شكوو و هوَ هم رجعلي نفس الحركة احترگ گلبي بس ما اگدر اسوي شي لا يروح يگول الذَوّاد عليَّ و يزعل مني من ورا هذا ابو راس رگعت الباب حيل و دخلت للبيت عفت خالتي و امي و رحت للغرفة اول ما ذبيت عبايتي نمت نومة عميقة لأن كلش تعبانة و فزيت على صوت طفل يبچي باوعت لگيتهم البنية و جهالها گالت بخجل
سَدف:: آسفين گعدناچ من النوم بس علي كلش مصخن
~~~~~~~~~~~
سَدف
اول ما وصلنة گال غَطرَف ادخلوا الهذيچ الغرفة لأن كلها نايمة سويت مثل ما گال و دخلت لگينة بنية نايمة حطيت اصبعي على حلگي و باوعت لأخواني بمعنى اششش مشينة گعدنة بنهاية الغرفة على الحايط هُمَ جابوا مخدة و ناموا و انا استحيت انام ضليت منتچية على الحايط و اغفي لأن ميتة تعب، ضليت تقريبًا ساعة على هذا الوضع و اخواني نايمين شوي و گعد علاوي يبچي و يگحگح حاولت اسكتة ماكو هوَ منتهي و على أثر صوته فزت البت اعتذرت منها گامت من مكانها و اجت يمنه
- ما گلتي للولد يجيبوله علاج
سَدف:: جابوله بس ما فاد
-خلي اگول الواحد من الولد ياخذه للمستشفى حتى يضربونه ابرة
سَدف:: لا خية هسه يصير زين ترا هسه الدنيا فجر
-اي عادي هسه اگوللهم
سَدف:: لا لا حبيبتي مشكورة ما تقصرين بس اريد ماي و خاولي حتى اسويله كمادات ما عليه شي
- خاف تزيد حالته سوء و يشمر
سَدف:: لا خية إن شاء اللّٰه ماكو شي عود اذا ساءت حالته ناخذه هسه بس اريد خاولي و ماي
هزت راسها و گامت على السريع طلعت من الغرفة و رجعت جايبة ماي بطاسة و خاولي صغير خليت علاوي يمدد و نگعت الخاولي و خليته على گصته و هوَ سودة بوجهي رايحة روحه هيچ اريد املخ روحي تملخ المن طلعت من البيت الممنن طبعًا هذا صوتي الداخلي ما حچيت شي گدام البنية الضلت گاعدة يمي ما عافتني گلتلي
-بعد وكت راح اجيبلكم فراشات تنامون عليهن
سَدف:: لا خية جيبي بس الاخواني انا ما اريد
- لا شلون متردين واضح عليچ تعبانة حجيبلكم كلكم
گامت و ما گدرت اعارض لأن كلش خاوية و اريد بس شوي انام حتى شوي اصحصح، طيحت فراشات من النضدة و فرشتهن ناموا اخواني عليهن و انا همين گلتلها
سَدف:: باعي ساعة و گعديني لا تخليني نايمة
- شعندچ ضلي نايمة
سَدف:: لا ما اگدر اضل اكثر
هزت راسها و رادت تروح بس رجعت سألتني
-شنو اسمچ؟
سَدف:: سَدف
-كلش حلو اسمچ انا اسمي رواء
ابتسمتلها ما عرفت شنو ارد و هيَّ طلعت و انا نمت
~~~~~~~~~
رواء
طلعت من الغرفة ما اعرف مشاعري متلخبطة ما اعرف اذا حبيتها لو ما مرتاحتلها بس هيَّ شكلها تعبت و حزين كلش و احس كسرت خاطري رغم ما اعرف شنو وضعها ولا اعرف شنو قصتها و ليش هسه هي عدنا، شمرت كل التساؤولات بالگاع و كملت طريقي للمطبخ خليت مي بالقوري و خليتة عالنار و رحت للثلاجة طلعت بيض و طماطة قبل لا اسويهن رحت للهول لگيت ذَوّاد ما ادري شعجب نايم بالهول اخذت موبايله من يم راسه و دخلت على اليوتيوب طلعت قرأن و نصيته على گدي يلا اشتغلت
گليت الطماطة بطاوة وحدها و البيض بطاوة وحده لأن ما يحبوهن سويه استوه البيض بقت بس الطماطة غطيتها و رحت حضرت الچاي و الستكاين و الشكردان بصينية و كملت كلشي و وديته للهول رحت الامي و خالتي گعدتهن حتى ياكلن و گعدت غَطرَف و ذَوّاد اجوا كلهم گعدوا و غَطرَف سألني
غَطرَف:: وين البنية؟
رواء:: نامت خطية كلش تعبانة
ام ذَوّاد:: خليها نايمة بعدين نعرف سالفتها
غَطرَف:: يمة ما ادري ليش احس وراها سالفة چبيرة
ام ذَوّاد:: اللّٰه اعلم ماما خلي نتانيها تگعد و تسولفلنة يلا نحكم
هز راسة و دنگ ياكل گلتلهم
رواء:: خطية الولد الوياها كلش مريض
غَطرَف:: اي ذكرتيني خل يجوون آخذهم للمستشفى و انتِ تعالي وياهم
رواء:: تمام
كملنه اكل و شلت الصينية و غسلت المواعين و نظفت المطبخ و البيت نظيف ما نظفته صاح غَطرَف عليَّ رحتله گال گليلهم يلا رحت للغرفة گعدت سَدف
رواء:: اخوي يگول خلي تجي هيَّ و الولد حتى تروحون للمستشفى علمود ينطونه ابره
گعدت گعود على فراشها تتلمس بوجه الولد گالت
سَدف:: زينة حرارته ما يحتاج
رواء:: لا خية خلي ياخذة خطية تمرمر و اني راح اجي وياكم يلا گومي عالسريع
گعدت الولد و البنية و گاموا دليتهم على المغسلة راحوا اخوانها يلا هي راحت وراهم بدلت و هُمَ هم بدلوا و طلعنة الغَطرَف گلتلها
رواء:: خلي البنية يم امي ما نتأخر
سَدف:: لا لا وياي
گال غَطرَف هاي هي خليهم وياچ صعدنة كلنه بالسيارة مشت بينة للمستشفى گال غَطرَف
- اني راح آخذ رضاوي و انتن ضلن هنا شوي و نجي
سَدف:: لا اريد اروحن وياه
غَطرَف:: بسرعة ما نطول هسه نجي
سكتت سَدف ما حچت بس شوي مترددة لأن خلت رضا وي غَطرَف وحدة راحوا هُمَ و بقينه اني و سَدف و البنية الصغيرة تباوعلي مستغربتني ابتسمتلها
رواء:: شنو اسمچ يا حلوة؟
- مينا
رواء:: اللله شلون اسم يخبل هذا
استحت هي مدنگة درت على سَدف اسأل
رواء:: جهالچ؟
~~~~~~~~~~
سَدف
قررت هالمرة ما اچذب لأن هُمَ ساعدوني
سَدف:: لا اخواني
رواء:: لعد مو گلتي الامي من ضاعوا الجهال منچ هذول جهالي؟
دنگت خجلانة من الموقف المحرج الخلتني بيه رواء
سَدف:: مو چنت خايفة على روحي و عليهم گلت جهالي حتى الاگله هيچ يعرف عندي رَجل و ما يدنولي
رواء:: يعني انتِ ممتزوجة!
سَدف:: اي ما متزوجة
هزت راسها ساكته و مبين على وجهة تريد تسأل بعد بس مترددة و انا هم ما فكيت حلگي لـ حد ما اجوا علاوي و غَطرَف سودة علي اجه يناشغ گعدته بحضني شابگته و اشاقيه
سَدف:: هاي انتَ السبع تبچيك ابرة وسفةة
ضحكت رواء هم تحاچي بيه و غَطرَف ما حچه ولا كلمة يسوق ساكت طبگ يم محل و نزل شوي و اجه جايب علاگتين انطه وحدة الاختة و وحدة العلاوي و مينا
سَدف:: ماكو داعي تعبناك ويانة
غَطرَف:: ماكو أي تعب، بس اريد اعرف شوصلچ الهذا الحال هذا الشي الوحيد المتعبني
هسه لو ساكته مو احسنلي بس اول و تالي لازم اگول بس من احچي تحصرني البچية الهيچ مترددة ما اريدن ابچي بس سلمت امري لله و حچيت
سَدف:: انا امي ميتة ماتت منتحرة بعد ما ماتت عمامي خذوني انا و اخواني هذولي يمهم و من اول ليلة يمهم ما خلونة بحالنا مرمروني انا يعني بعدني مصدومة و ما متخطية موتت امي و منظرها و هي ملطخة بالدم و هُمَ تلگوني بمصايبهم لا هُمَ رحموني ولا ابوي رحمني
سكتت شوي من بده صوتي يتغير من ورا الغصة يلا كملت
سَدف:: ورا اربعين امي اجه عمي گلالي غسان نفسه المسودن الاجة وراي هوَ و ابوه البارحة گال غسان رايدچ و يريد يتزوج و هوَ منتظرچ و من هذا الحچي گتلة عمي ما اريدن اتزوج بعدني صغيرة و اخواني بعدهم صغار اريد اگعد يمهم اعلمهم و اكبرهم يلا عود هذيچ الساعة افكر بموضوع الزواج شو هذا انگلب عليَّ ضل يصيح و يگلي انا ما اجيت اطلب رأيچ اجيت انطيچ خبر و انا تخبلت رادوا يسوون حفلة المهر قبل محرم بيوم و انا چنت مضغوطة و حتى ما عرفت حتى شلون افكر عدل اتوصلت لاسوأ حل اللي هوَ آخذ اخواني و اشرد بيهم چان عبالي ارتاح و اعيش حياة حلوة بس ما چنت ادري راح تواجهني هواي مشاكل و اعترف كلش متندمة على فعلتي هاي و هذا كله نقطة ببحر من العشناه يمهم
سكت هوَ شوي انوب گال
غَطرَف:: بعد صرتي إن شاء الله بأمانتنه و نشوف وين توصل وياهم
سكتت و درت عيني للجامة اتأمل الشوارع و الجو المغيم، وصلنه للبيت
دخلنه مو ام غَطرَف المرة الوياها گالت
- الليلة القراية كلچن تعالن ببيتي اليوم و ما اأجلها
رواء:: هسه حتروحين؟
-اي هم يلا اروح يمة تعالي وياي انتِ و اخيوانچ ليش متقيدة هنا
هزيت راسي و گمنة وياها و وصلنة اخو غَطرَف للبيت و گال ساعة و اودي يمكم غَطرَف دخلنة للبيت المرة بدت تسوي الغدا و انا رحت يمها اساعدها و ضلينة نسولف سولفتلها قصة حياتي كلها و ضلت تگلي على اغلاطي و تعلمني شلون احمس المرگة عدل بدون ما تضل زفرة كلش اتونست وياها و عدا الوكت صار العصر و قبلها اجه غَطرَف و رجع البيتهم حتى يسبح و يبدل هيچ گال الخالتة و عرفت يسمونها ام اسماعيل و ابنها اسماعيل عدموه بزمن صدام بغير ذنب كلش انقهرت عليه و عليها
ردت اسبح اخواني بس گبل لا يدخلون للحمام اسمع صوت باب الشارع انربد و خلف وراه صوت كلش عالي و اسمع عمي فلاح يصيح
فلاح:: وينهااااا
طلعت ام اسماعيل من المطبخ مخروعة من الصوت بس مو اكثر من خرعتي من شفته هوَ و غسان ليث دخلوا للهول غسان كاض بيدة تفگة و اول ما شافوني ركض فلاح عليَّ جر شعري من فوگ الحجاب ضليت ابچي و اصرخ احاول افلت روحي منه بس ما گدرت كاضني بأثنين ايديه و كاض التفگة وياي و اسمع صوت صريخ ام اسماعيل و بچي و صريخ اخواني سحلني للسيارة دخلني بيها ضليت احاول اقاومة اريد يعوفني ما اگدررلة سطرني على وجهي و دخلني للسيارة عدل و سد باب السيارة علي وراها صعدوا اخواني اليتباچون و قفلوا البيبان علينة ضليت اعت باليدة مال الباب ما ينفتح قافلينة حتى من جهة اخواني حاولت بس كل محاولاتي فشلت و شفت شريط حياتي من صعدوا كلهم و ليث حرك السيارة...
شكرا لزيارتكم عالم روايات سكيرهوم
