رواية حين تتغير الاقدار الفصل الرابع عشر بقلم سناء الهموندي
يا عِشگهُم هيّل ما عُبرت سنينَة
شمّا يمُر بينا العُمر يكَثر حَنينة .
نولد جميعاً نجوماً حتى يُطفئنا احدهم.🖤🥀
مــــَن لا يشــــعُر بــــصــــمتِك لــــن يَفــــهم حــــديثــــَك💔
جوريه : بعد ولاده غلام بأيام قليلة كمت على حيلي وشلت بيتي خطيه ام علي وفضه معافني محمد لزم شغل الكاع مالتنه وانا كمت اطلع ويا اعينه بلزرع كل موسم نزرع بموسمه زرعنه أنواع الخضره هوه يحرث وانا ويا والجهال وياي ضويه ضلت يمي تلث ايام وردت لبغداد .
محمد : جوريه عيني انتي عوفي شغل الكاع ورجعي خطيه الجهال وهذا الصغير حتى شهر مصاير يتبهذل .
جورية : لا يتعلمون مابيهم شي دشوف ريحه الخضار ترد الروح كلهه صحه وعافيه الهم .
محمد : بابتسامه جوريه انتي انسانه نقيه من نقاوت هل خضار الله لا يحرمني منج ومن الجهال .
ضويه : ردينه لبغداد ومرت ايام واجت أيام فرقد انتقل لكركوك كال هناك شغله احسن قبل يومين اجوي ودعونه ونتقلوا توسل بعمتي تروح ويا مارضت ضلت عدنه صادق اشتره محل واجره وبقى هوه بمحل الخياطه لان صار مشوهر باسم ابو انور الخياط بسوك الامام الكاظم عليه السلام .
صادق : يوم ليش متمشين وياي اخذنج للامام تغيرين شويه من نفسيتج .
ام صادق : لا يمه العده مال ابوك بعدهه مخلصانه خليني .
صادق : براحتج يمه جا اكليلي شتردين اسويلج .
ام صادق : ردتك سالم يوم عينك على اخيتك لا تنساهه .
صادق : لا يمه شون اعوفنهه انشالله كل فتره امرلهه .
ضويه : صادق هذا انور منطي واجب وتعرف أنا ماعرف لا أقره ولا اكتب ياريت تقري .
صادق : وينه صيحي خلي اقري قبل لا اطلع عندي شغل .
ضويه : اجه انور ماشالله شاطر بسرعه يحفض قرا صادق و راهه كعد يلعب هوه وإخوانه عمتي مقهوره على بيت فرقد جي شالوا. مرت الايام والأشهر صادق كل فتره يروح يودي مصرف لملكه مرت عمي ولفضه وانا ادز شغلات الجهال جوري اخر مره راح كال مرت ابوي جايبه ولد مسميته حبيب رايحين عمامي رايدين يأخذون الولد وصايره مشاكل بين عمامي واهل ملكه عمامي رايحين يأخذون الولد ومرت عمي مقابله راح صادق لعمامي أنا ماكدرت عبن أنا بشهري وخفت يصير عندي ولاده .
راح صادق ومرت عمي للسلف يشوفون شنو السالفه .
صادق : رحنه أنا وأمي للسلف وصلنه لبيت جدي دزيت على عمامي جمعتهم كلهم حجيت بموضوع مرت ابوي ...
عدنان عم صادق : شوف صادق الولد ابنه ولازم يتربه بيناتنه .
صادق : عمي انا مامتبري من اخوي بس اكولن هسه حرمت ابوي حلفت وكالت ما اتزوج .
عدنان : ميخالف بس الولد مايتربه هناك وين صايره هاي بويه شون ترضاهه على نفسك اخوك يتربه عد الغرب .
صادق : أنا اليوم اروحن واحل السالفه .
ام صادق : أنا اجي وياك يمه .
صادق : اخذت امي ورحنه لبيت حجي كاطع وصلنه استقبلونه اخوانهه لمرت ابوي ذاك الاستقبال حتى استحيت احجي شي امي راحت يم النسوان كعدت بلمضيف قدمولي كهوه .
حسنين اخو ملكه : الله بلخير ابو انور .
صادق : الله بلخير يلربع .
حسنين : اعتقد عمامك حجولك بلسالفه .
صادق : اي خويه وانا صراحه جيت بخصوص هلموضوع .
حسنين : شوف خويه ابو انور جيتك على راسي والجاي لأجله يجرالك عبن هذا اخوك وانتو أحق بي .
صادق : والله يخوي ماعرف شكلك أنا ماريد أحرم اخوي من أمه وهوه بعده محتاج حضنهه وحنانهه فاني عندي اقتراح وان رضيتوا بي على عيني وراسي وان ما عجبكم فالنه حجي ثاني .
حسنين : يجرالك ابو انور .
صادق : انا اكولن كريمتكم بعدهه شابه وكدامهه طريق طويل اذا حابه تكمل طريقه وتشوف قسمتهه هذا حقهه بس اخوي اخذنه وان رادت تكعد على بزرتهه فأنا كل زايد وناقصه اتكفل بيهه عايل وياكم بويه .
حسنين : ونعم منك ومن اصلك ابو انور .
ام صادق : رحت ويه انور وصلنه استقبلونه العالم فتت لحجره لكيت ملكه كاعده دمعتهه بعينهه وابنهه بحضنهه وحاضنته حيل أنقهرت عليهه كتلهه حمدلله على السلامه حبيبه .
ملكه : بخوف ااا االله يسلمج ام صادق اا تفضلي خيه.
ام صادق : كعدت يمهه ومديت ايدي على الولد امسح برأسه حجت مرت اخوهه كلتلهه انطي حبيب لام صادق تشوفه انطتنيا بتردد وخوف داخلي انكسرت عليهه عبن هيه مالهه ذنب بشي اخذت الولد بسته وخليت فلوس بكماطه وكتلهه طول ما انا عايشه ابنج يبقى بحضنج واحسبنه بحسبت ولدي .
ملكه : بفرح يعني يعني متاخذي مني .
ام صادق : أنا ام واعرف الضنه شكد غالي مستحيل احرمنج منه بس تعرفين اهلنه مراح يسكتون .
ملكه :جا أنا شسوي ويخلوا يمي .
ام صادق : تعالي عيشي ويانه بغداد حالج حال وحده من خواتي وابنج بحضنج معززه مكرمه .
ملكه : ااااا أنا هسه ماكدر اعوفن مكاني أنا كلت ارجع اعيشن بيت المرحوم وابني وياي وهناك عمامه كلهم حوالين البيت اكيد مايقصرون .
ام صادق : براحتج حبيبه ارجعي للبيت ومصرفج كل شهر يوصلج ومانخليج بعازه .
ملكه : أنا ماعرف شون اشكرنج وانا وعد مني اضلن على ابني اربي احسن تربيه .
ام صادق : انشالله اكومن أنا هم ياله وانتي شوكت متحبين تردين للبيت ردي .
ملكه : انشا الله اول ميخلص أربعين حبيب اردن للبيت .
ام صادق : ودعتهم وطلعنه أنا وصادق وحجيت الصادق عل حجينا أنا ومرت ابو .
صادق : خير ما سويتي يمه خلي ترد وانا اتكفل بكلشي وهيج اخوي ماينحرم من أمه اله صدك يمه هوه حلو يشبهمن .
ام صادق: بحزن والله يمه هواي بي من ابوك الله يرحمه .
صادق : الله يرحمه ...ثاني يوم ردينه البغداد مرت الايام ولدت ضويه ولادتهه جانت صعبه مثل انور بيومهه جانت كلش تعبانه بس الحمدلله عدت على خير وجابت ولد مثل الكمر صليت ركعتين شكر وسميته معتز .
ضويه : اليوم السبعه مال معتز سبحته عمتي وخوانه كاعدين يضحكون انور يكلي.
انور : يمه شوكت يكبر شو بعده صغير .
ضويه : بضحكه يلحك يكبر ويشبع كتل منكم .
انزهر : اني ما اكتله هاي تهاني ضربه .
تهاني : لا مامه اني مايويله اوا بعده نونو خطيه .
ضويه : اي عفيه سباعيه شوفي شكد حلو ويحبكك
انور : لعد ليش ميحجي .
ام صادق : ولك بيبي بسكم شيحجي المسكين هوه دخلي ينفذ بريشاته منكم .
ضويه : طب صادق يضحك صاحت عمتي .
ام صادق : سد الباب ليتمرض يمه .
صادق : يمه الجو زين .
ام صادق : ميخالف بعده لحمه حمره ميتحمل .
صادق : يمه أنا بعد سبوعين اروحن للسلف انشالله .
ام صادق : خوش أنا اجي وياك عبن اختك هاي أيامهه ومحد يمهه .
صادق : جا خوش انشالله اخذج ونروح .
جوريه : مرت الايام والأشهر غلام نشنش فدوه لعمره واخوانه مكيفين بي محمد طلع ويا فلاح بلكاع وصار هوه والفلاح يشتغلون بيهه وانا صرت اشتغل بلبيت بلخوص اسوي حصير ومكانيس و سلات و طبك مال خبز شويه شويه شغلي طور وصرت ابيع للقريه وانا بيتي محمد يتعب بشغل الكاع بس دخلهه محدود بس على كد الناكل ونعيش منه غير شي منكدر الحولي ( بقره صغيره )كبرت سويتلهه مكان بضهر البيت خاص بيهه صرت اهتم بيهه نطيهه علف ونضف مكانهه فضه اغلب وكتهه تكضي يمي لو نوبات تروح لبيت ابوهه يم ملكه نوبات اروحن وياهه خوش بت حبابه صادق يمر ينطيهم مصرف ويروح ابنهه نشنش اليوم من الصبح جتني فضه كالت .
فضه : بضحكه حضري روحج جوري عندي وجع لليل انا جايبه كولي انشالله .
جوريه : انشالله بس شنهي ولج عندج علم الغيب .
فضه لا هيج حساس .
جوريه : الله يسهلج ....وصدك تغدينه أنا وياهه والجهال نيمت الجهال الضهر بس غلام توه كعد رضعته وحليت كماطه خليته كبالي يناغي وفضه كاعده تضحكله كتلهه خايبه صوتج لا يكعدون الجهال .
فضه : فدوه لله هذا ابنج مال اكل دشوفي شون حتى بضحكته يخزرني متكليلي عليمن طالع .
جوريه : بضحكه على امه غير .
فضه : عاد بهاي صدك وفالح طالع على جديته خشمهه يابس عكس غلام وهناء .
جوريه :خايبه لا تحجين عليه هذا العزيز صدك فضه دمشينه نسير على أم علي نشوفهه شو طولت بولادتهه وصارلهه تلث ايام ماجايتني خافن صاير شي .
فضه : اي والله صدك انا كلش فاكدتهه بس يجوري ماكدر اجي وياج عبن ماحبن حماتهه .
جوريه : وانتي شلج دخل بحماتهه دكومي عيب المره كليوم تمر اسال علينه واحنه منسال .
فضه : وجهالج محمد اجه ونايم بلحجره الثانيه لا تخافين عليهم .
فضه : دكومي ياله تدري بيج أن ماجيت وياج ماتهديني .
جوريه :كعدت محمد وكتله اسير لام علي اشوفنهه كلي روحي و رحنه أنا وفضه بيت ام علي قريب علينه دكينه الباب طلعت مرت حماهه استقبلتنه طبينه جوه وأشوفن ام علي : كاعده بلحوش حاطه حضاين بطشت وتغسل بيهن أنا بداخلي كلت ايجوز جاي تحضر خاف جيب شافتنه ابتسمت بتعب وكامت علينه سلمنه عليهه عاد أنا حجيت شنهي خيه صارلج تلث ايام لا تمرين لا تسالين مو من عوايدج .
ام علي : بابتسامه ياااا جا انتي ماتدرين .
جوريه : لا وروح ابوي مادري شصاير .
فضه : خير ام علي بيج شي .
ام علي : جا غير جبت واليوم الثالث .
جورية : يمه صلوات على محمد وال محمد خيه صدك جذب غير تحجين دكولين .
ام علي : ماتقصرين خيه كافي عليج جهالج بعدين هاي أنا كدامج واكفه والحمدلله .
جوريه وفضه : الحمدلله .
جوريه : طبينه بحجرت ام علي جهالهه يلعبون بلحوش ملفلفه الطفل ومخليته بطبك ( مثل الصينيه من خوص ) وجوا فراش شلته صليت على نبي وبسته خيه ام علي هاذ عليج ابيضاني وعيونه ملونه فده الله .
ام علي : اي لا تنسين ابو هم اشكراني بس عيونه فتره وتتغير مثل زمن ماتذكريهه من صغيره شحلات عيونهه .
جوريه : اي صدك يتربه بعزكم خيه ديربالج عليه .
فضه : يتربه بعزكم انشالله اله ماكلتيلي سميتو .
ام علي : ابو راد اسم غريب .
جوريه : سميتو .
ام علي : سمينا تمار..
جوريه : عاشت الاسامي ...كعدنه شويه يم ام علي وطلعنه عبن بيتهه ويه عيالهه هسه ابو علي جاي يبنيلهم بيت قريب علينه بطرف البستان بس هم مسافه أقل مو مثلنه احنه كلش بطرف البستان صايرين رجعنه منه وعدت يومين فضه ماجتني لان مهدي جاي صارله شهرين ماجاي البارحه اجه يشوفهه أنا حجيت عليهه كتلهه لا تسكتين بهل وضع تكول خلي شريدن منه أنا مرتاحه هيج عدت يومين نايمين بليل بيومهه محمد بايت يمنه عبن البارحه جان يم بيت اهله صفيه لسه ما ولدت اندك الباب قوي كعدت محمد كوم محمد الباب مدري منهو يدكه .
محمد : يا الله خير انشالله الساعه فوك الوحده منو يجينه بهليل .
جورية : شمدريني كوم شوف ياهو راح محمد وره شويه اجه كال .
محمد :هذا اخوج مهدي يكول حرمته عدهه ولاده .
جورية : يا سوده عليه هاي فضه مالهه أحد محمد أنا اروحن ويه مهدي .
محمد : روحي أنا اضل يم الجهال .
جوريه : رحت ويه مهدي طبيت بيتهم وهوه وراي لتفتت عليه كتله شنهي جاي وراي شسوي روح صيح الجده .
مهدي : بارتباك اااا مازدلهه وين بيتهم .
جوريه : يم بيت عمي عدنان روح اسال مرت عمي دليك .
مهدي : ليش ماتجين وياي انجيبهه .
جوريه : ماوعتله صفح جا وحرمتك ياهو الهه .
مهدي : اي صح ابقي يمهه أنا رايح .
جوريه : راح مهدي وهزيت ايدي وفتت لكيت فضه طاكه من البجي .
فضه : الحكيلي جوري راح اموتن .
جوريه : مابيج شي شمالج تبجين هيه عطسه ويرحمكم الله .
فضه : ادري بيج انتي تحجين هيج حتى ما خافن .
جوريه : بمزاح وانا ماعندي شغل وعمل اكعد اجذب عليج والله يالله اروحن احمي الماي حار .
فضه : بخوف شسوين بي .
جوريه : بجديه فتحت عيني وكتلهه اصلخج بي واطبخج ثواب بروح الموتى .
فضه : بصوت ولججججج يمه لحكيليييييييي.
جورية : ضحكت ورحت حميت الماي وفرشتلهه وجهزت المكان عبن مبينه اليوم ولاده اجه مهدي وره ساعه أكثر وفضه من الوجع شيل روحهه ودكهه بلكاع تالي متحملت طلع راس الطفل ويه جيه الجده انخبصنه بيهه والحمدلله جابت بنيه بخير وسلامه .
فضه : اخخخخ يمه متتت ولج يمه بطني ولج يمه ضهري ولج يمه لحكيلي .
جوريه : حمدالله على السلامه حبيبه .
فضه : الله يسلمج بشري جوري شونهه حلوه لاله .
جوريه : والله ياخيه متسوه التسعه اشهر بطنج طلعت نسخه من ابوهه .
فضه : والله معليه حتى لو مو حلوه انتي تحيرين بيهه انتي عمتهه وعندج ثنين ولد .
جوريه : وانا مارايده ولدي اخذلهم بت مهدي المعبس .
فضه : هاي مشكلتكم بعد .
جورية : ضليت للصبح يم فضه غلستلهه هيه والبنيه ماشالله حليوه بس انا اداهر بامهه محمد بليل جابلي غلام مفرفح بلبجي عبن هوه يرضع على صدري صبح الصبح سويتلهم ريوك وحصرتلهم كلشي ورجعت لبيتي وهيج استمرت ايامي يوميه أمر لفضه خطيه هيه هم كامت على حيلهه وشالت روحهه ...
ضويه : اليوم عمتي وصادق راحو للسلف دزيت وياهم غراض لجوري وجهالهه عبن احسن بنفسي مقصره وياهه صار شكد مرايحه بس الضروف تحكمني عمتي هم اخذت غراض لفضه وأخذت لا حبيب عم جهالي الصغير هههه .
صادق : وصلنه للسلف الضهر تقريبا بلدعش بعد طريق طويل دكينه الباب طلعت مرت ابوي لابسه كله اسود باسود وحتى شكلهه كبرانه فرحت بجيتنه ورحبت بينه امي اخذتهه السوالف وانا ارتاحيت وصليت صبتلنه غده تغدينه وطلعت رحت لبيت جدي وهيه وأمي ضلن يسولفن .
ام صادق : شونه حبيب .
ملكه : فقير وميتعب .
ام صادق : الله يحفظه الج كون مرتاحه هنا .
ملكه : الحمدلله متقصرون ام صادق وفضه هم خطيه على طول يمي ماحس بضوجه .
ام صادق : شخبار فضه .
قبل جم يوم هيه يمي واجه عليهه رجلهه كالت ماجي لحد ما يروح .
ام صادق : انشالله اروحلهه العصر .
ملكه : انشالله .
فضه : حاطه بني زهور بحضني وكاعده اكل خبز وجوري واكفه تخبزلي خطيه اندك الباب صاحت جوريه .
جوريه : ولك فالح يمه افتح الباب من يمك .
فضه : تعبتج جوري .
جوريه : تعبج راحه حبيبه بس ماتكليلي شسوين بخبز العباس دخيله .
فضه : مو كتلج ناذره بس اجيبن بسلامه اوزع .
جوريه : ميخالف جان انتضرتي جم يوم لو جان دزيتي عليه اجي أنا اعجن الج واخبزه .
فضه : عجنته على كيفي وكلت اخبزنه وانتي جيتي .
جوريه : ها ولد فويلح منو بلباب .
فالح : مره ريد عمه فضه .
فضه : توني اكوم وطبت امي تفاجات بجيتهه من لهفتي عليهه ركضت وحضنتهه وابجي .
ام صادق : يمه سوده عليه لا تكولين جبتي وانا مو يمج .
فضه : اي يمه جبت وانا بعازتج بس جوريه يمه ماقصرت وياي عدال عشر نسوان .
ام صادق : الله يبارك بيج يمه جوري .
جورية : سلمت على ام صادق وكملت الخبز وكعدت شويه يمهم ورديت للبيت عبن عندي شغل يردون مني باجر عشر مكانيس ومخبازات اربعه رجعت للبيت سويت عشه أنا والجهال محمد اليوم ميجي يبقى عد اهله ناموا جهال وكعدت اشتغل بيهن ذكرت الحولي محاطتلهه مي رحت وديت الهه ورديت كملت شغلي وصليت صلاة اليل وصليت لامي وأبوي ونمت كعدت الصبح على دكت الباب عبن أنا من انامن اقفلهه....
الى هنا ونختم بارت اليوم حبايبي انتضروني بلاحداث القادمه تره القصه بعدهه باولهه بعدكم مشايفين شي من الاكشن والدراما والحب
شكرا لزيارتكم عالم روايات سكيرهوم
