رواية صرخة مؤجلة الفصل السادس عشر بقلم ود الزهراء
﴿بِسْمِ ٱللّٰهِ ٱلرَّحْمَٰنِ ٱلرَّحِيمِ﴾
صـرخة مؤجَلـة 🍃.
لـطفًا التصويت و التعليقات بين الفقرات✨
الـبارت السادس عشر
بـقلمي ود الزهـراء✍🏻🤎.
انكسر مجذاف عمري بزحمه الروج
و وگف بيه الزمن يم اليكرهون
وخفت همي تكشفه اسرار العيون
وخطيت النظر عن لا يشوفون ... 🥀
•••••••••••••••••••••••••••••••
سَدف
طبينة المنطقتهم تقريبًا ورا المغرب
وصلنة ذَوّاد يم باب البيت و نزلنة انا و الجهال و غَطرَف، و ذَوّاد راح يوصل الشيخ البيتهم ، ما ادري ليش استحيت ادخل دخلوا هُمَ و انا ضليت واگفه بالباب مترددة ادخل باوعلي غَطرَف مستغرب
غَطرَف:: ما تدخلين؟!
سَدف:: باوع احس استحي
غَطرَف:: ليش تستحين؟
سَدف:: عيب من امك هسه شتگول عليَّ و شتگول عليك من تعرف بينة عقدنة
مسح على شواربة بأيدة عينة بالگاع صافن همين يفكر انوب رفع راسة و گال
غَطرَف:: يمعوودة عادي شوي تحچي و بعدين تسكت لأن حتعرف بينة ما نريد
سَدف:: چا انتَ ياهو مالتك تتزوجني حتى تحميني منهم؟ هم ما راح تقبلها عليك لأن بس انتَ عندها و تتزوج بهالطريقة هم راح تنقهر
غَطرَف:: لا مو بس اني عندها ذَوّاد همين ابنها
سَدف:: چا ما ادري انا بس قصدي يعني بس انتم عندها هم تريد تفرح بيكم، باوع گللها عادي ما عندها مشكلة تتزوج عليَّ انا قابلة ولا تدنالي ولا اتدنالك، هاي هي متفقين؟
ضحك و گال
غَطرَف:: شبية مخبل اتزوج ثانية هوَ اني خلي اعيش روحي مو انوب اثنين نسوان
سَدف:: بكيفك لا تتزوج بس گللها هيچ حتى شوي يهدا بالها بالنسبة الي لا اواجه ولا اسولف لأن بس اسولف وياها اضل ابچي يالله بعد مالي غرض انتَ وياها
غَطرَف:: هاي شنو تريدين تطلعيني اني بالوجه و انتِ تفلتين؟
سَدف:: لا مو هي امك و تعرفك اكيد اتصدگك انا وين تعرفني و تصدگني
غَطرَف:: ترا هي تدري
سَدف:: عليك اللّٰه؟
غَطرَف:: اي واللّٰه و زعلانة حيل مني بس اني اراضيها بطريقتي معليچ، يلا هسه شيسمونها وگفتنه هنا يلا دخلوا دخلوا
ما عندي غير حل يعني شسوي و اذا سمعت حچي انا جبتها الروحي استاهل كلشي يصير بية، مشى غَطرَف گدامنه و انا لازمة اخواني كل واحد من جهة فتح الباب هوَ و دخل اتلگته اخته سلم عليها و سألها على امه گلتله بالغرفة گاعدة، بهاي الأثناء اخواني جاي يذبون احذيتهم و انا همين يم الباب بس كملنة دخلنة ورا غَطرَف بس شافتني رواء اجت سلمت علي
رواء:: يمعودة شسويتي بينة گلنه رحتي بيها الحمدللّٰه من رجعتي سالمة
ابتسمتلها كالعادة ما عندي رد يمتى تبطل هاي الحالة مني ما ادري، دخلنة و گعدنا و غَطرَف راح الغرفة امه اجت رواء يمي
رواء:: هذاك الحمام اذا تريدين تسبحين و الجهال همين و ملابسكم جبتهن اليوم من بيت خالتي و تعالوا بالغرفة يمي حتى تنامون و ترتاحون
سَدف:: يا بعد گلبي مشكورة حبيبتي خلي نسبح بالبداية خلي اسبح الجهال
رواء:: اي احسن و انتِ وراهم و همين اكو شامبوات و كلشي يمچ
ابتسمتلها ابتسامة امتنان و رحنة للغرفة طلعتلي جنطتنة ذبيت عبايتي و طلعت ملابس الاخواني و ملابسي الي خليتهن على صفحة و خذيت بالبداية علاوي سبحته و مشطتة و وراها مينا همين سبحت و رواء رادت هي تمشطها گعدتها گبالها و سوتلها اثنين ضفاير، صاروا حلوين و نظاف مو مثل مساع بالضيم حالهم خذيت هدومي و انا همين سبحت جفلت روحي جلف لأن الچلاب ما خلوا گاع ما سحلوني بيها
بدلت و اباوع الشعري شلون خفييف كلش خفيف صاير و انترس الحمام بشعري يتساقط بشكل فضيع، كلش انقهرت عليه اكثر شي احبه بية هوَ شعري
لفيت شعري خليت فوگاه الحجاب غسلت عبايتي
شريتها و هدومنا همين
المهم كملتهن و دخلت للغرفة رواء رادت تمشطني و انا ما گلت لا كيفت لأن ما بية حيل، گعدت گبالها و سوتلي ضفيرة و همين ضلينة نحچي على تساقط الشعر لأن شافت شعري بالضيم
و اخواني ضلوا يغفون ردت انومهم
رواء:: لا يمعودين لا تنامون اكلوا يلا، محضرة عشاكم من مساع بس انتظرتكم تكملون
عافتنه و راحت تجيب الاكل و اسمعها دگت الباب على غَطرَف گلتله تريد عشا؟ گللها اي كلش جوعان
ورا شوي جابتلنة الصينية اتشكرتها و گعدنا اكلنه و هي راحت ما ادري وين، كملنة و گمت اريد اشيل الصينية شو بس شلتها حسيت بوجع دمرني بمكان العملية نططني حطيتها بالگاع و احس شطت من الوجع
گعدت على حيلي روحي راحت اتمددت يالله شوي خف بس اتحرك يلچمني ضليت محنطة و مددة بدون مخدة ولا شي مخلية ايدي على راسي و علاوي و مينا گعدوا گبالي گلتلهم
سَدف:: يلا حطوا فراشاتكم و ناموا
گام علاوي فرش الروحه و بصفه فرش المينا و راحوا ناموا لأن سودة علي تعبانين و شوي غفوا بالسيارة مو هواي
ضليت على وضعي شوي من حسيت الالم خف ردت اگوم بس شاغت روحي من گعدت
رجعت على نفس وضعيتي شوي شوي و غفيت ما حاسه على روحي من التعب
فزيت على صوت حركة باوعت لگيت رواء مطلعة كتبها و جاي تدرس على ضوة خفيف حسيت بتأنيب الضمير هسه رايحة عيونها و ما تشوف عدل من ورانة، و لگيت نفسي جواي مخدة و مغطاية
گلتلها بصوت ناصي
س
َدف:: ليش تدرسين بالظلمة عادي فتحي الضوة
فززتها ابتسمت و گالت
رواء:: لا كملت ما عندي شي شوي و اگوم ابدل
سَدف:: چا هسه بيش الساعة؟
رواء:: بالاربعة و نص
سَدف:: ياا چا فاتت الصلاة يمكن؟
رواء:: اي قبل شوي ما صارلها هواي
گمت من مكاني ماكو الم الحمدلله راح بس شوي خفيف يعني يخليني اتحرك، لبست حجابي و طلعت من الغرفة علمود اتوضىٰ، رحت للمغسلة البرا علمود الجو
اول ما طلعت كفختني نسمة هوا تخبل و الدنيا صافية و اصوات زقزقة العصافير و الدنيا مغيمة شوي، منظر شاعري و مريح للنظر بحيث ضليت لازمة الباب بأيدي و اتأمل السماء و الجو متناسية على شنو اجيت
فرق بين آخر مرة اتأملتها و انا ببيت جدي و هسه ببيت شخص ما اعرفه ولا يقربلي بشي بس ما اعرف شلون و يمتى صار زوجي احس عقلي ما جاي يستوعب، گلبي ضل يوجعني من اتذكرت الانا بيه هسه احس روحي بمتاهة متاهة ما اتوقع بيوم اطلع منها دخلت روحي بيها عبالي اگدر اعبرها، كلشي ممكن يصير بية حاليًا و حتى لو ما راضية بيه هوَ خير الي
لأن رب العالمين ما يختارلنة الا الشي الزين و اللي بيه خير النه كلشي صار و راح يصير كله بيه حكمة و عبرة، ما ادري بس اكو شعور بداخلي زاعجني حيل يگلي سَدف انتِ طول حياتچ لحد ما تموتين ما تشمين ريحة الامان و الراحة
احاول اتجاهل هيچ مشاعر و افكار بس مو بأيدي هنه يداهمني
و ما اعرف مصيري وي غَطرَف و اهله ولا اعرف مصير اخواني شنو ما ادري ليش احس مصيري مثل مصير امي اتسودن و تالي انتحر، اتنهدت و وكلت امري لرب العالمين و هو خير من توكلت عليه، فزيت من صفنتي على صوت
غَطرَف:: تينة ما ناوية توخرين منانة؟
فزيت مباوعتله ميلت من الباب ماشية للمغسلة اتوضيت و هوَ ضال واگف مچتف ايديه يباوعلي وترني
سَدف:: شبيك تباوع؟
غَطرَف:: هيچ شلون يعني بعد ما اصفن
سَدف:: يعني عفت كل الاماكن و تصفن بوجهي واللّٰه يا اللّٰه
هزيت ايدي و هوَ ابتسم سألته مغيرة الموضوع
سَدف:: حاچيت امك؟
غَطرَف:: ايـي فهمتها گلتلها هيچ و هيچ السالفة شوي اقتنعت بس باقي زعلانة البارحة كله احچي وياها حتى ذَوّاد حاچاها
سَدف:: حقها واللّٰه يعني اخلي روحي بمكانها لو ابني مسوي هيچ كارثة الا ارفس ببطنة و ببطن مرتة
غَطرَف:: لا صدگ!
هزيت راسي بـ اي و نزلت ارداناتي كاشة من البرد عبرت من يمه ردت ادخل گال
غَطرَف:: تجين ويانة بعدين؟
سَدف:: وين؟
غَطرَف:: انوصل رواء المدرستها
سَدف:: لا شكرًا ما اريد
هز راسه و كمل طريقة لـ برا و انا دخلت للغرفة اخذت سجادة و احرام من رواء و صليت و هي بدت تبدل ضلت تخلي كريمات الوجهة گلتلها
سَدف:: مو ممنوع المكياج؟
رواء:: اي ممنوع اني اخلي شي بسيط بس يعدل وجهي و ما يبين
سَدف:: انتبهي لا يلگفنچ و يسونچ فرجة الأمة لا اله الا اللّٰه
رواء:: يمعودة
شگد لاگفاتني و مرة دزن على امي و امي كسرتني تكسر بس من رجعنة للبيت مو بالمدرسة الحمدلله
سَدف:: عدي هالسنين شلون ما چان بس كون تطلعين عوفيهن لا تندگين بيهن يضلن يحقرن وياچ
رواء:: إن شاء اللّٰه والله دااحاول ما احچي وياهن و اراددهن لأن سودة علي ذَوّاد مل من گد مَيجي للمدرسة و هذيچ المرة طيح حظي بالرزايل الخاطرة ضليت ما اراددهن
سكتت و هيَّ بدت تلف بحجابها و صاح عليها غَطرَف ضلت توصيني على السريع تگلي هذاك الريوگ على الكاونتر و بعد توصيني على امها و انا ضليت بس اهز براسي
باوعت الغراضها مطشرة لميتهن بسرعة بالجنطة و خليتها يم باب الغرفة و هي محتارة بحجابها ما جاي ينلف عدل
لفته شلون ما چان و طلعت تركض لأن غَطرَف حرگها حرگ و همين اتأخر الوكت
طلعوا و ضليت وحدي اصفن كلها نايمة من الملل غفيت مرة ثانية بس ما طولت غفوتي شوي و گمت من ضليت اسمع اصوات مواعين بالمطبخ طلعت من الغرفة و رحت للمطبخ مديت بس راسي شفتها ام غَطرَف دخلت مترددة و گلت
سَدف:: صباح الخير
رمقتني بنظرة و نزلت عينها للي بأيدها جاوبتني بدون خلگ
ام ذَوّاد:: صباح النور
سَدف:: خالة تريدين اساعدچ؟
ام ذَوّاد:: لا تحاولين لو هسه مدري شتسوين ما اتقبلچ
دنگت عيوني الأيدي الشابگتهن ببعض گلتلها
سَدف:: خالة واللّٰه ما چانت نيتي هيچ يصير بس اضطرينا و روح امي
ام ذَوّاد:: هسه انتِ شردتي من يم عمامچ منو يگول متشردين من يمنة؟ ما اأمن اني واللّٰه
سَدف:: بلحظة غباء و روح امي بلحظة غباء انا مو من هذني المو زينات والعباس بس بلحظة غباء و ما فكرت عدل بوكتها فكرت هيچ تفكير و طلعت و هسه واللّٰه تعلمت من غلطي مستحيل اعيدنها
ام ذَوّاد:: هذا حچي يفيدچ حبيبتي اني ما اصدگ الا لما اشوف بعيني شلون هاي باچر عگبه يصير عندكم جهال على شنو تربينهم؟ مرات الطفل يجيه فضول اهله شلون اتعرفوا على بعض شتگليلهم انتِ؟ ستر علي و حماني من عمامي؟ لو شتگليلهم يلا بالله فهميني
نزلن دموعي محترگه حرگ اول تالي يجيني هيچ حچي سَدف انا تالي ما تالي هيچ انذل؟!
سَدف:: واللّٰه لو تشوفين المريت بيه تگولين حگچ شردتي بس والله انا مو من المو زينات و شردت في سبيل احمي اخواني من البيئة الچنا عايشين بيها، بس ما الومچ كل الحگ وياچ ياهيَ تقبلها على ابنها يتزوج بهالطريقة؟ كل الحگ الچ واللّٰه
كضيت و طلعت من المطبخ رحت للغرفة و ضليت انحب مخلية وجهي بالمخدة حتى لا يبين صوتي و شبعت بچي
سمعت انفتح الباب ما رفعت راسي بس انگطع صوتي شوي شوي بديت اسمع خطوات الدخل بديت اتوتر چان عبالي رواء بس لو رواء تحچي اسمع صوتها من التوتر ما رفعت راسي ضليت مخليته بالمخدة گعد يمي و حسيت بأيده على راسي خفق گلبي من سمعت صوته
غَطرَف:: اوف سَدف اوف
گمت من مكاني دافعه ايده عني
سَدف:: ميل عني شو كلش ماخذ راحتك
غَطرَف:: لعد غير مرتي؟
سَدف:: گدام الناس هذا الحچي
غَطرَف:: تمام هاي هيَّ هسه تعالي گعدي عندي حچي وياچ
سَدف:: ما اريدن اگعد، سولف اسمعك
غَطرَف:: تينة قوي گلبچ مو على كلشي و تبچين هيچ متعيشين
سَدف:: اسمي سَدف، يعني هسه انتَ مقتنع بوضعنة؟
غَطرَف:: ما مقتنع بس شنسوي؟ لازم نتكيف وي الوضع اذا انخلصها عرك و بچي ما تمشي الأمور
حچيت غاصة من البچي
سَدف:: ما اگدر ما جاي تدخل بعقلي السالفة والعباس ما جاي تدخل بعقلي انا شردت لأن ما اريدن اتزوج هسه شنو الاختلف بس گلي شنو الاختلف؟!!
غَطرَف:: و الحل؟
سَدف:: رجعني يم عمامي
غَطرَف:: لعد ليش شردتي من يمهم و هسه تريدين ترجعيلهم؟
سَدف:: لأن غبية و مطية همين هذا چان نايم بوكت الطلعت من البيت چنت اريدن بس اخلص منهم بدون تفكير خذيت اخواني و هجيت لييش؟ لأن سودنوني و عقل ما خلوا براسي يتحكمون بية مثل ما يريدون و محد اهتم الرأيي ولا سمعوني من ابوي و شيل إيدك هجييت لأن اريدد ارتااح اريد ارتاح گضيت عمري كله بالخوف و شفت العجاايب بس محد حس بية هذوولي هذولي تشوفهم انا ربيتهم و اهتميت بيهم و بعدني هالگدوتني المفروض انا اللي احتاج احد يهتم بية لا أب فكر ولاا ام و حتى العمام محد فكر يسأل من ماتت امي و علمود حچي العالم ياللّٰه خذوونة يمهم و هيچ بين ليلة و يوم سمعتهم بالصدفة يريدون يزوجوني الشايب و يخططون وين يخلون اخواني حتى يصيرون خدم الهم و يريدون ياخذون جهالي مني جهاالي هذولة جهالي مو اخواني جهاااالي، و كل هذا و صمييت حلگي ما حچيت بس من شفتت السالفة صارت صدگ و هذا الكلب النذل غسان يگللهم رايد سَدف و هوَ عندهم طلباته اوامر و انا عقل ما ضل براسي، هسسه عرفت لييش شردت؟؟!!!
واگفة على حيلي و فاقدة فاقدة طلعت البگلبي كله و من ورا صوتي فزوا اخواني من النوم خايفين، گعدت على حيلي بالگاع ابچي هوَ كض و طلع من الغرفة راگع الباب وراه، اخواني ضلوا يباوعولي من بعيد يخافون يتدنون يمي من فتحتلهم إيدي يلا اجوا حضنوني، مسحت دموعي ما اريدن ابچي گدامهم، شوي و دخلت ام ذَوّاد للغرفة بيدها صينية بيها حليب و بسكت حطتها بالگاع و صاحت الاخواني راحوا هُمَ گعدوا يم الصينية ياكلون و هيَّ اجت گعدت يمي تحاچيني
ام ذَوّاد:: يمة البيت بيتچ و اني مو قصدي اضرچ بحچيي لا شاهد اللّٰه بس احترگ گلبي لأن ابني بعده شاب و يتزوج بهالطريقة احترگ گلبي عليه و دست بالحچي إعذريني بس همين ما اگدر اتقبلچ كـ چنة الي بس الخاطر وليدي و هسه شفته مهموم گلت ما ازيدها عليه بس بعد منا و هيچ لا تدنيلي ولا ادنالچ لأن اصلًا انا ممتقبلتچ و يمكن كلامي يأذيچ فَـ كفيني شرچ و كفي مني و اجيت الخاطر ابني لأن شفته مقهور بس هاا اگلچ مو بعدين تگولين ما گلتولي ورا فرحة الزهراء اخطبله و هوَ قابل هاي هيَّ؟
هزيت راسي بـ إي گامت من يمي و طلعت من الغرفة وراها بشوي دخلت رواء طالعة روحها و مبهذلة و حجابها اعوج باوعتلي بأستغراب
رواء:: شبيچ؟
سَدف:: ما بية شي انتِ شصاير بيچ؟
رواء:: واللّٰه اليوم امتحنه و اتعاركنا اني و الاسئلة بس خالة مگدرتلها هي ملختني و هسه انسحلت و اجيت
ضحكت اهز بأيدي و هي تضحك وياي اخذت ملابسها و طلعت تريد اتبدل و انا كلش انحرجت هسه خطية ما ماخذة راحتها بغرفتها كله من ورانة و المصيبة استحي اطلع، دخلت مرة ثانية لابسة تراك اسود اخذت قراصة صغيرة لمت شعرها منا و منا طلعت تموت رغم شكلها التعبان گلتلها
سَدف:: اگلچ اريدن اطلع اتوضى
رواء:: ياا لعد متطلعين منو لازمچ؟
سَدف:: استحي
رواء:: منين تستحين ترا برا بس امي و غَطرَف ذَوّاد مو هنا بالشغل، اليوم مدري شعجب غَطرَف جاي من وكت
هزيت راسي و گمت طلعت من الغرفة اتوضيت و رجعت اصلي صلاة الظهر، و رواء همين صلت بس كملت قبلي و طلعت يم امها و انا ضليت گاعدة على السجادة صافنة فزيت على صوت دگة الباب و صوت غَطرَف
غَطرَف:: يلا تعالوا اتغدوا
ذبيت الاحرام و سفطتهن على صفحة گاموا اخواني و طلعنة لگينه ام ذَوّاد گاعدة و غَطرَف و رواء تنقل بباقي الاكل اخواني گعدوا و انا رحت للمطبخ اريد اشوفن رواء خاف محتاجة شي لگيت باقي كم ماعون شلتهن و طلعت من المطبخ و هي وياي حطيتهن على السفرة و گعدت و صارت رواء بصفي بدينا ناكل و رواء تدني بالمواعين گدامنا و استحي اردهن المكانهن كليت شوي لأن استحي رغم هُمَ خطية مسوين الوضع طبيعي و يسولفون بس انا ما مرتاحة، و اهم شي اخواني شبعوا هاي هي
كملوا اكل و بدت رواء تشيل بالمواعين و انا همين شلتهن و رديتهن للمطبخ و ردت اغسلهن بس رواء ما قبلت ضليت واگفة يمها اعزللها و هي تجلف انوب شوي ضليت واگفة يمها تسولفلي على المدرسة و مغامراتها و انا اسمعلها اتونس اثناء سوالفنة دخل غَطرَف يريد يصب الروحه چاي مرة ثانية
انا اسوي روحي ما مهتمة الوجوده حتى لا انحرج لأن مساع طلعت القضا و المضى بوجهة صارت و ضليت اصيح، بالغلط باوعتلة لگيتة يباوعلي و يباوع للشباك من طول نظره هزيت راسي بـ شكو ابتسم و گال الرواء أشر على الشباك و عليَّ
غَطرَف:: هذا سَدف و هاي سَدف
درت عيني للشباك مغطى بالبردة بس باقي فتحة صغيرة منه متسلل منها ضوة الشمس و صاير سَدف من خلال هاي الفتحة مضوية المطبخ
ابتسمت مدنگة و رواء
رواء:: عززاا هههههههه هاي شلون صدفة
معنى اسم سَدف: الظلام المختلط بالضوء☀
شكرا لزيارتكم عالم روايات سكيرهوم
