رواية صرخة مؤجلة الفصل السابع عشر بقلم ود الزهراء
أمس بالليل طيفك مَر بالعيون
وَگعّدت وَيَّاكَ ساعة وعاتبيتَك
فجأة ورَاح طيفك و فرَتْ إلروحْ
گلَبت الليل كُلة ومالگيتَّك💔.
•••••••••••••••••••••••••••••••••
سَدف
بعد هذا الموقف هوَ أخذ گلاصه و طلع من المطبخ و انا بقيت يم رواء لحد ما كملنا المطبخ و اتونست شوي وياها بالسوالف اسوالفها حلوة
طلعت انا قبلها اريد اشوفن وين اخواني لگيتهم گاعدين بالهول عاقلين لأن يستحون يسوون وكاحة رحت گعدت يمهم و همين گاعدين ام ذَوّاد و غَطرَف شوي و اجت رواء يمنة خلت راسها بحضن امها و مددت تحچي وياها
رواء:: ماما اريد اروح يم وعد بيوم العاشر احج يمهم
ام ذَوّاد:: ماكو روحه
رواء:: ليش يمة
ام ذَوّاد:: و ليش مو هي تجينه؟ لأن اهلها ميقبلون.
رواء:: حبوبة ميقبلون لأن عندي اخوان و هي ما عندها يعني عادي و ابوها يروح الكربلا تبقى هيَّ و امها و راح تجيهم اختها زمن يمة صارلي هوايَ ما رايتحلهم ولا شايفتهم
ام ذَوّاد:: يااا شلون ما شايفتهم مو وياچ بالمدرسة!!
رواء:: يمة منلحگ حتى نلتقي واللّٰه الفرصة ما نفتهم منها شي و هم نخلصها مراجعة
ام ذَوّاد:: اللّٰه كريم منا للعاشر مية الف باب اشوف
رواء:: اهوو حبوبة واللّٰه تخربين واهس الواحد
ام ذَوّاد:: خاف قبل شوي چنت مقتنعة تروحين بس هسه بعد ماكو روحة
گامت من مكانها تگول اتشاقة و تحلف ان هي تتشاقة و ضلت تبوس بأيد امها و تشاقيها حتى تقتنع امها دفعتها عنها ضايجة منها تگللها هاي هي تروحين دارت على غَطرَف گالتله
ام ذَوّاد:: يمة هالأيام مجاي تداوم و كلش مقصر لييش؟
غَطرَف:: يمة اروح بس بالامتحانات و انتِ هالتشوفين ماكو وكت و همين الاوضاع كلش مو زينة هاي الايام و قليل جاي نداوم
ام ذَوّاد:: يمة هيَّ بس هالسنة خلصها على خير يا حبيبي و فك روحك
غَطرَف:: لا لتخافين ما ارسب امضبط اموري داادرس ترا
ام ذَوّاد:: ايـي هالشوفك سودة عليَّ ماكل الكتب أكل
ضل يضحك و يحلف و يتكفر هوَ جاي يدرس بس ما تشوفه هيَّ، و اثناء گعدتنه دخل ذَوّاد هستوه جاي من الشغل سلم و كلنه ردينة و رواء راحت اتلگته باسها براسها و هي اخذت علاليگ المسواگ گعد يم امه خطية واضح عليه التعب رفع راسه عاينلنه
ذ
ََوّاد:: شلونكم يابة إن شاء اللّٰه مرتاحين
سَدف:: الحمدللّٰه خوية بخير
اجت رواء يمنة سألته اذا يريد هسه يتغدا گللها بس خل ابدل و اغسل و هي راحت تحضر الاكل
بدل و كمل و هي خلتله اكل و اجت گعدت بصفي امها گالت الذَوّاد
ام ذَوّاد:: رواء تريد تروح يم صديقتها بيوم العاشر تبات يمها
باوع الرواء سألها
ذَوّاد:: بنت من؟
رواء:: وعد تعرفونها
ذَوّاد:: لا يابة اخاف عليچ
رواء:: ترا ما عندهم احد بس ابوها و گالت كل سنة يروح الكربلا يعني محد بس امها و اختها
ذَوّاد:: روحن للقرايات و يمتى ما تكملين فرة تعالي مالها داعي التبياته حبيبتي
رواء:: خوش
حچتها بضوجة ما قابله، كمل اكل و شال الصينية و رواء خوت گالت رايحة انام و اخواني همين ما ادري شجاهم بس ينامون بس سودة علي ما يحملون تعب و آخر ايام ما ارتاحوا ابد بقيت بس انا گاعدة يم ام ذَوّاد و غَطرَف طلع، ضليت گاعدة بمكاني و ام غَطرَف راحت للمطبخ انا خفت اروح و تضل تحچي علي، بس آخر شي من الملل ما عرفت شسوي رحت يمها تغسل بالمواعين الطايحة سويت روحي نادرة و رحت يمها گلتلها
سَدف:: عوفيهن خالة انا اسويهن روحي گعدي
باوعتلي من فوگ لـ جوة ما عاجبها گصتني گص بنظراتها و رجعت عينها للمواعين مستمرة تغسل فشلتني، ضليت واگفة على صفحة ما اسوي أي شي بس اباوعلها و افرك بچفوف ايدية كملتهن و مسحتهن و بدت ترجع كلشي المكانه و مسحت الكاونتر دارت عليَّ
ام ذَوّاد:: ليش واگفه صافنة ببدال هاي الصفنة روحي غسلي التمن و نگعيه اريد اسوي ثواب اليوم
انا ما صدگت خبر رحت جبت طاسة و خليت بيها تمن و غسلته و نظفته كلش و خليته منگوع انوب شوي شوي بدت تصخرني على شغلات اسويهن كيفت، تريد توزع تمن بحليب بدت تسوي بيه و انا نظفت الطايح لأن اتوصخ المطبخ اثناء ما تطبخ شوي و گعدت رواء اجت ساعدتنا بالصب صبيناهن بسفريات و رواء خابرت صديقتها وعد من موبايل امها گلتلها جيبي جدرچ و تعاي انخليلچ ثواب، و من گعد ذَوّاد حطته خالتي بصينية و ڰلتله روح وزعه على البيوت
~~~~~~~~~~~~~~
رواء
صفطت المواعين بالصينية و شالها ذَوّاد طلع بيها و اني وراه حتى افتحله الباب ما احسلك الا الباب اتفلش علينا تفلش استغربنا منو يدگ الباب بهالقوة عاف الصينية ذَوّاد على صفحة و راح حتى يفتحه و اني دخلت للهول مديت راسي شوي من الباب و چان اشوفها وعد طلعت بسرعة ورا ذَوّاد و هي وجهة صار طماطة دنگت منحرجة گلتله
وعد:: العفو خوية اعتذر اجيت علمود رواء
صحت من يمي لازمة الضحكة
رواء:: هلا هاي منو جاينة تعاي تفضلي تفضلي
دخلت بسرعة شبگتها ضمت وجهة بچتفي و الحجاب و نطيت من الضحك و هي تگرص بزندي و اني من الضحك دمعت باوعت الذَوّاد هز ايده و رجع على الصينية خذاها و طلع و هي من الفشلة انهضمت وجهة انحمس
وعد:: انچبي رواء ما يضحك
رواء:: شمالچ اتسودنتي فد نوب يعني متدرين اخواني هنا؟ هههههههههه
وعد:: اني شمدريني امداچ رواء امداچ
مسحت دموعها الطاحن ممكن تشوفون كبرت الموضوع بس هيَّ هاي وعد من تتفشل تبچي من تفرح تبچي من تحزن تبچي ( تعبر عن مشاعرها بالدموع) هوَ هذا طبعهايعني شگد حاولت اغيره بس ابو طبع ما يغير طبعه
دخلتها للبيت سلمت على امي و همين سلمت على سَدف تعرفها لأن سولفتلها عليها و گلتلها صار عندي مرة اخو و كتيت السالفة كلها يمها لأن ما اعرف اضم عليها شي ولا هيَّ كلشي يصير وياها تسولفه الي
امي تموت عليها گعدن يسولفن تسألها على امها و اختها و على الدراسة و نسن ارواحهن بالسوالف، سَدف گعدوا اخوانها من النوم و راحت يمهم و احنا ضلينة نسولف لحد ما صارت الدنيا مغربية گمزت وعد من مكانها
وعد:: عزا بعينچ وعد
رواء:: شكو
وعد:: لچ گلت الامي بس آخذ الثواب و اجي انوب ابوية ميدري حيلعب بية لعب بس يشوفني طالعه
ام ذَوّاد:: اني اجي وياچ اوصلچ و اذا ابوچ موجود احاچيه ميگول شي اگله چانت يمنه
سكتت محتارة انوب قلقتنه وياها گامت امي لبست عبايتها و تريد تاخذها
رواء:: يمة خلي اروح وياچن
ام ذَوّاد:: شعدنا سفررة هسه بس اودي البنية و امر على اختي اجيبها هنا خطية ضاله وحدها تبات يمنه اليوم انتِ ضلي هنا سويلنة عشا و خطية سَدف ضلي يمها يمكن تخاف وحدها
عبست وجهي و ودعتهن و سديت الباب وراهن، رحت للغرفة علمود اشوف سَدف بس اتقربت على الباب سمعتها تحچي وي أحد فضولي خلاني اتسمع عليها اريد افهم ويامن تحچي و شنو دتحچي
حچت كلام هواي بس ما فهمت من عنده ولا كلمة بس من شغلت كل حواسي و قربت اذني للباب رجف گلبي من سمعت حچيها
سَدف:: تعاي اخذيني وياچ... المن مخليتني هنا؟
حتى انتِ ما تفكرين بية انتِ هم دمرتيني.... لا تبررين الروحچ كرهتچ و كلام اللّٰه كرهتچ لا تحاولين.... لا تلوميني انتِ همين كلشي صار من وراچ و من ورا ضرغام انا ما باريتكم الذمة اثنينكم.... اللّٰه شاهد و جاي يشوف و يعرف منو الظالم و منو المضلوم روحي منا يلا ما اريدنچ ولا اريدن شوفتچ
نهت حديثها وي ما ادري بشهگة طلّعت روحها عبالي صار بيها شي دفعت الباب طاير گلبي و دخلت عليهم لگيت بالضيم حالها شعرها مگطع و مخربط و خدودها يجرن دم و ايدها مزلغة و الجهال الولد نايم و البنية گاعدة تبچي صحت على سَدف
رواء:: شنو هاي ولچ شنو هذا حالچ شبيچ!!
مجاوبتني على نفس وضعها، تبچي شكلها مال واحد ديصرخ بس هيَّ مكتوم صوتها شكلها يرعب يرعب يرعب ما عندي غير هاي الكلمة التوصف وضعها و شكلها، رحت گعدت گبالها اصيح بيها
رواء:: يمة خايبة شبيچچ منو وياچ؟!!!
ما تحاچيني بس مختنگة و عيونها يصبن من خنگتها احتارت وين تنطي وجهة فرفحت بس تشاهگ
ملخت روحها تملخ بس تريد تتنفس ما تگدر اخوانها من شافوها ضلوا يبچون مبتعدين عنها خايفين، و المشكلة اني وحدي اخوتي طالعين ضليت ابچي احتاريت شسويلها رحت للمطبخ جبت مي بگلاص شمرت على وجهة و غسلته بس ما فاد وياها شوي صرخّت صرخة دوّت بالبيت كله
شطت شوطة يتيم بمغربية... 🥀
دخل للبيت غَطرَف مخروع و وي صرختها طاحت بالگاع فاقدة الوعي و اني اتخبلت گلت هاهيَّ ماتت اتخبلت بالبچي و الصريخ و استنجد بغَطرَف الما گدر يوگف على حيله من الصدمة ضل بس يضرب على وجهة بدون ما يحچي انربط لسانه، سمعت صوت ذَوّاد وراي يحاچي بينه
ذَوّاد:: روااء انتبهيلي حطي شي على البت خلي ناخذها غَطرَف يلا گووم مبيها شي بس گوم ويايَ
گمت على حيلي ادور على صايتي حتى صايتي تيهتها فتحت الكنتور و طلعت وياه حجاب بسرعة رحت عليها و خليت شال على راسها و اني لبست الصاية و خليت حجاب على راسي غَطرَف راد يشيلها بس ايديه بايدات ضل يحاچيه ذَوّاد علمود يشد حيلة و بسرعة يشيلها و هوَ هز راسها و شالها بالگوة و صاح بعلوا صوته
غَطرَف:: ياا علي
طلع ذَوّاد علمود يشغل السيارة و اني رحت على الجهال اخذتهم ويايَ و طلعنة وراهم اني صرت گدام و الجهال بحضني لأن ورا سـدف ممددة و غَطرَف مخلي راسها بحضنه و يستعجل بذَوّاد اللي اتدوهن گلت الذَوّاد
رواء:: خل نخلي الجهال يم وعد
ذَوّاد:: بيتهم قريب؟؟
رواء:: ايـي بالركن امشي بعد شوي و اني ادليك
مشه لـ گدام طبگ گبال الباب و نزلنه اني و اخوان سَدف دگيت الباب حيل فتحلي ابوها گتله السالفة على السريع و امنتهم يم وعد اللي طلعت گالت مالچ علاقة يمي، رجعت للسيارة صعدت بيها و حركها ذَوّاد للمستشفى ودخلوها للطوارئ، وإحنه ضلّينا واگفين، آني وغَطرَف فوگ روسهم، بينما ذَوّاد طلع ينتظرنه برا. شرحت للممرضة شنو صار وياها، وبعد ما فحصوها واطمنوا عليها، ضلينة مراقبين وضعها وركبولها مغذي. وبعد فترة بدت تصحى شوي شوي.
ظلت الممرضة تحچي وياها و تسألها عن اللي صار وياها، ومن حچيها عرفت إن هالحالة سبق ومرّت بيها أكثر من مرة يعني هاي مو المرة الاولىٰ
~~~~~~~~~~~~~~~~~
سَدف
راحت الممرضة هيَّ و وياها غَطرَف و رواء ظلت يمي گاعدة تباوع الوجهي قبل لا تسألني على شي سألتها على اخواني و گالت يم صديقتي و احس ما اتطمنت بس سكتت، غَطرَف و الممرضة طولوا شوي يلا اجوا لأن تحاليل و من هاي التفاصيل تطول، الممرضة سألتني
-هسه أحسن؟
هزّيت راسي إي، وسألتني شوية أسئلة ثانية، وبعدين گالت إن حالتي مستقرة وأگدر أطلع، بس لازم أرتاح وما أتعرض لأي ضغط.
نزلت عيوني الحضني، وضلّيت ساكتة. ما أعرف شنو أگول، غير بس أريدن أطلع من هالمكان
رواء گالت تريد تروح يم ذَوّاد تريد تشوفه وداها غَطرَف و رجع مرة ثانية يمي باوعت الروحي بلا عباية شلون اطلع باللّٰه عدلت الحجاب العلى راسي و انتظرت يرجع غَطرَف حتى اگله من اجه لگيت بأيده صاية سندني و گومني فتح الصاية و بده يلبسنياها و همس بيني لبينه يعاتبني
غَطرَف:: ليش دتسوين بروحچ هيچ
رفعت عيوني المدمعة العينه
سَدف:: مو بيدي
غَطرَف:: لا بيدچ، شمري الماضي على صفحة و ابدي من جديد سَدف. اذا تظلين تاكلين بروحچ ما حتستفادين شي غير الاكتئاب و تخسرين صحتچ لا اكثر، من تسوين هيچ بروحچ راح يرجع بيچ الزمن مثلًا؟؟ هسه المهم بعدين نسولف عندي هواي حچي وياچ هسه مترهم نحچي هنا
عدل الصاية عليَّ و ضم شعري بالحجاب و لزمني من ايدي و مشينة السيارة ذَوّاد صعدني ياللّٰه صعد گدام و انا بصفي رواء بدون صاية لأن جابولي مالتها، تچيت راسي على الكشن اباوع من الجامة ما اتذكر بالضبط شنو صار وياي بس اللي اتذكرة من گمت من المطبخ و رحت على الغرفة سمعت صوت مينا تبچي گمت كل اللي ببالي گعدت و خافت لأن وحدها رحت يمها سكتتها و ضلت گاعدة يمي بس و انا گاعدة حسيت بوجع قوي اجاني براسي بحيث عيوني دمعن من گد ما الوجع قوي غمضت عيوني و فركتها بس فتحتها شفت امي گدامي گاعدة انا ما نايمة صاحية بس شفتها گدامي گاعدة طبيعي و متچية ظهرها على الحايط و تباوعلي ضلت تحچي وياي كلام ما اتذكره بس بوكتها فهمته و ضليت احاچيها و ما اتذكر شي غير بس شفتها گدامي و وراها اختنگت هذا كل اللي اتذكره
وصلنة الشارعهم وگف ذَوّاد السيارة گبال بيت صديقة رواء و طلعله الزلمة اتشكر منه و جاب الجهال صعدوا للسيارة يناشغون و العيون مورمة انعمت عيني كله من وراي شبگتهم حيل لحد ما نزلنه گبال البيت و دخلنة تلگتنه خالتي مهبوطة صاير وجهة اصفر هيَّ و ام اسماعيل اجت علي شبگتني و تبوس بية
ام ذَوّاد:: طيرتي گلبي ولچ شجاچ
رواء:: بعد حظها هذا يدولب بيها
سلمت على ام اسماعيل و دخلوني ودوني بوجهي للغرفة وجهي احسه گاب نار يوجعني فرشتلي فراش و مددت عليه كلهم يمي باستثناء ذَوّاد طبعًا
بس خليت راسي شوي و الغرفة صارت هدوء استسلمت للنوم و ما فزيت نص الليل قريب على الفجر لگيت اخواني نايمين بصفي بفراشاتهم باوعت للساعة مأذن طلعت من الغرفة طلعت برا و الجو بيه نسمة هوا تخبل ضليت صافنة متأملة السماء جهازي العصبي يهدأ من اتأمل السماء بالذات هيچ وكت
رحت للمغسلة اتوضيت و صفنت على وجهي بالمرآية شلون مخرمشته صاير يخزي خذيت صابون بأيدي و ضليت افرك حيل بيه و غسلته و همين ما استعدل عفته و فرشت اسناني نزلت ارداناتي و مشيت اريد ارجع طلع بوجهي غَطرَف مالي خلگه بس ما بينت گتله
سَدف:: صباح الخير
غَطرَف:: صباح العافية شلون صرتي؟
سَدف:: احسن الحمدللّٰه
غَطرَف:: صليتي؟
سَدف:: لا بعدني
غَطرَف:: روحي صلي و تعالي عندي حچي وياچ
هزيت راسي و دخلت للغرفة صليت و دعيت كملت و رجعت الغَطرَف لگيته گاعد على الدچة بالساحة من حس عليَّ دار وجهة الي و گال
غَطرَف:: نگعد هنا لو باردة؟
سَدف:: لا زين الجو
حط ايده على مكان بصفه على الدچة رحت گعدت بس مو على المكان الراده. خليت بيناتنا مسافة
غَطرَف:: سَدف سولفيلي شنو المضوجچ؟
سَدف:: انا ندمانة هواي مو شوية لأن عفت بيت جدي و طلعت كلش ندمانة و بسبب فعل خطأ بدر مني اتغيرت كل حياتي و طلعت و انا ما محسبة حساب الأي شي بس هيچ بس اريدن اشرد من يمهم
غَطرَف:: و بعدين؟ راح اتظلين هيچ؟
سَدف:: ما ادري بس الظاهر إي و احس نهايتي مثل نهاية امي
غَطرَف:: شلون يعني؟
سَدف:: اتسودن و انتحر
شكرا لزيارتكم عالم روايات سكيرهوم
