رواية صرخة مؤجلة الفصل الثامن عشر 18 بقلم ود الزهراء

نَهرهم مـوُ عَذب بس الضمْا يوُازيك 

•••••••••••••••••••••••••••••••

سَدف

سَدف:: اتسودن و انتحر

فك عينه على وسعهن مصدوم من كلامي نتر 

غَطرَف:: شلچ بهذا الحچي سَدف!! اذا متفكرين بنفسچ فكري بأخوانچ 

دنگت عيني الايدي العب بأصابعي الهي روحي بيهن حتى لا ابچي، أخذ نفس طويل و رد گال

غَطرَف:: شنو التردينه؟ 

رفعت اكتافي ما ادري گال 

غَطرَف:: ما ادري شنو التردينه ولا انتِ تدرين شلون بهاي الحالة؟ تضلين هيچ! 

همست بصوت حيل ناصي

سَدف:: احس روحي ضايعة و ما اندل الدرب الصحيح منين

غَطرَف:: اني ادليچ 

شلت عيني العينه اللي واضحة عليهن الحيرة بس مو بگد حيرتي ما ادري شنو مشاعري تجاهه، اللي اعرفه ما عندي أي مشاعر تجاهه بس تصرفاته جاي تقلقني حيل، ضليت مطوله النظر العينه و هو اصلًا ما زاح عينه مني لحد ما حسيت على روحي و درت عيني عنه منزلتهن الحضني، و حچيت بحيرة متنهدة

سَدف:: واللّٰه ما ادري شحچي

سكت هوَ مرجع ظهره على الحايط و انا همين سكتت. طول هدوئنا فترة اثنينا صافنين كل واحد من عدنا يفكر بشي، 

نسمات الهوا عالية تكفخ بوجوهنا و تداعب طرف شالي و السماء مغيمة تريد تمطر و اصوات العصافير ودتني الغير عالم، عالم بعيد عن واقعي بهواي ، اتخيلت لو عايشة ويَّ عائلة كلهم گلب على گلب و عايشة حالي حال البنات بين اهلي و اكمل دراستي و اصير انسانة ناجحة الكُل يقدروني و يحترموني و يحسبولي الف حساب و اتزوج من شخص احبه و يحبني مو بهاي الطريقة، و لو عندي اخ اكبر مني ما چنت راح افكر بشي و ممكن وجوده يهون علينا واقعنة شوي يوگف بوجه اليأذيني بوجه عمامي تحديدًا لأن ما اجتني الأذية بس منهم و من ابوي

و تكون امي قريبة مني و انا وياها مثل الصديقات و يكون اكبر همي دراستي ما عندي مسؤوليات غير دراستي، 

يا أيّها العمرُ السريعُ خذلتني

‏ووضعتَ أحمالًا على أحمالي

‏خذني إلى عمر الصغار لأنني

‏لم أنتهِ من ضحكةِ الأطفالِ

فزيت من احلام اليقظة على صوت غَطرَف و هوَ يحاچيني

غَطرَف:: سَدف انطي فرصة النفسچ 

غلطتي صحيح و دفعتي ثمن هذا الغلط، هاي هيَّ بعد كافي من تسوين هيچ بروحچ ترا محد يتأذة غيرچ و غير اخوانچ اللي حيتأذون على أذيتچ من تسوين هيچ مراح ترجعين بالزمن 

سَدف:: إن شاء اللّٰه احاول

غَطرَف:: عفية اتعدي إن شاء اللّٰه و تصير سوالف تنذكر و ما تنعاد 

هزيت راسي و گمت من مكاني ويَّ گومته انا دخلت للبيت و هوَ ضل واگف برا 

طبيت للغرفة لگيت رواء مبدلة هدوم المدرسة و واگفه على المرآية و گدامها كتاب

سَدف:: صباح الخير

ابتسمت ابتسامة چبيرة لدرجة طلعت اسنانها ردت عليَّ بضحكة

رواء:: صباح النور

ابتسمت على ابتسامتها مستغربة

سَدف:: شبيچ؟ 

رواء:: ما بية 

سَدف:: چذابة ليش تضحكين

رواء:: اتذكرت سالفة ضحكتني 

هزيت راسي و رحت للفراش مديت طولي عليه 

متكسرة تكسر و راسي ضل يوجعني حسيت بيه نبض

و انا مغمضة عيوني گلت الرواء

سَدف:: اگلچ كل مرة يمتى تگعدون كلكم؟ 

رواء:: مرات بالتسعة و مرات ثمانية ونص بهالحدود، ليش؟ 

سَدف:: گلت علمود انا اسوي الريوگ

رواء:: لا يمعودة گعدي و استچني انتِ تعبانة

سَدف:: تؤ عادي هوَ شينرادله

رواء:: بكيفچ

كملت تبديل و صاح عليها غَطرَف بس كلعادة لازم شي يأخرها ما لگت جواريبها ضايعات گمت لميت الجنطة مالتها و خليتها يم الباب و هي انخبصت طشرت الملابس تدور بيهن گلتلها عادي الوان؟ گالت ميخالف طلعتلها زوج جديد من عندي الوان شمرته عليها بسرعة لبسته و طلعت لميت ملابسها و عدلت الغرفة هيچ شلون ما چان شلت بس الطايح و رجعت على الفراش جسمي متكسر تكسيرة ما حرارة يمكني صخنت 

ضليت متمددة و الافكار تروح و تجي براسي ضليت قلقة و افكر بعشوائية و قررت اطبق نصيحة غَطرَف بس المشكلة الحچي سهل بس من نجي للحقيقة ما اگدر راسي ما جاي يهود و ما يرتاح بالي اذا احاول اراضي عمامي 

بس هسه هُمَ الحقد و الغضب عامي عيونهم ما اگدر اتصرف وياهم أي تصرف لأن ما راح يتقبلونه 

هسه هاي وحدة ثاني شي هسه اهل غَطرَف ما اعرف شلون اتصرف وياهم و ويَّ غَطرَف حتى بالحچي اخربط وياهم و ما اعرف اطلعلي جملة مفيدة يمكن لأن ما متعودة عليهم لو انا ما اعرف احچي واللّٰه ما ادري 

عدى الوكت و صار وكت كعدتهم طلعت من الغرفة من سمعت صوت مواعين بالمطبخ باوعت لگيتها ام ذَوّاد صبحت عليها و ردت سألتني عن صحتي گلتلها زينة 

ساعدتها بالريوگ و المواعين و هي ما علقت ظلت ساكته شوي و وگفت گبالي گالت

ام ذَوّاد:: اني ما عندي شي وياچ بالعكس حالچ حال رواء بس اني مقهورة على ابني مردت يتزوج بهالشكل

سَدف:: اللّٰه شاهد عليَّ ما ردتها توصل الهالمواصيل بس انحطيت بين نارين 

طبطبت على چتفي ناهية الحديث، كملنه الريوگ و خليناه بصينية و گعدنا انا و ام ذَوّاد و ام اسماعيل و ذَوّاد اخواني همين التمينه على الصينية نتريگ

~~~~~~~~~~~~~~~

رواء

وصلني غَطرَف للمدرسة كملت الدروس الاولى بخير و امتحنت امتحاني الشهري يعني زين اجيب اكثر من خمسين دخلت للصف من دگ الجرس لگيت وعد تبچي

رواء:: هاا وعد شكو

وعد:: المُدرسة سحبت من عندي الورقة و اني بعدني ممكملة

رواء:: خية لعد انتِ تفقدين ما تدرين بروحچ تنامين على الورقة، يلا عادي حبيبتي تعوضينها بعدين

وعد:: اهوو لا تمسلتين انتِ شفتي شلون الاسئلة طويلة 

رواء:: اي واللّٰه حيل طويلة بس انتِ خفي إيدچ ترا هوَ بس درس و فرصة 

ما لحگت اواسيها لأن دخلت علينا مُدرسة العربي استلمتنا دگ كتابة بحيث احس اصبعي السبابة انعوج

لـحد ما دگ الجرس اتشاهدنا، طلعنة برا بالساحة و گعدنا يم شلة سوالفهن يخربن. من الضحك و چان اكو مسافة عنا بنات دوم يتعاركن سوا وي هاي الشلة 

و صارت مناوشات بيناتهن، نمارق مترأسة الشلة و حيل شرسة محد يخلص من لسانها لا مُدرسات ولا طالبات بس هي لطيفة وي اللطيف و بوكتها من صارت المناوشات وياهن هي چانت نفسيتها تعبانة و ضايجة بسبب ظروفها وي اهلها بس تسويلها بز تگمز بوجهچ و هذني اجن بوكت غلط، و هيَّ گاعدة أشرت على رجب 

نمارق:: تعاي لچ هاي عليمن؟ 

رجب:: احچي وي روحي منو ذابلچ عظم؟ 

نمارق:: استري على روحچ و اتدعبلي منا يلااا

رجب:: يمة يمة لا عليچ اللّٰه رجفتيني 

ضيگت عيونها نمارق تريد تشوفها وين تريد توصل گلت لا تسويلنة مشكلة من يمي صحت على رجب

رواء:: رجوبة عمري كافي مالنة خلگ مشاكل 

رجب:: اوو چلابها ظلن ينبحن 

رواء:: ماكو چلب هنا غيرچ، روحي منا لا اگوملچ امسح بيچ الساحة مسح احترمي نفسچ و احتفظي بآخر كم ذرة من كرامتچ و ولي منا يلا ماما يلا گلبي

نمارق:: رجيبة الظاهر بعدچ ما تعرفيني شنو، اني نماارق 

رجب:: و النعل

نمارق اتخبلت من گلتلها هيچ گامت من مكانها و راحت على رجب گطعتها تگطع نامت على خوانيگها غسلتها غسل، و شلة رجب التمن على نمارق و صار العياط ماله والي البنات كلهن راحن فزعن النمارق ردت اروح بس كضتني وعد

وعد:: عوفيهن يمعودة لا يروحن للأدارة يشتكن

رواء:: خايبة اني تگلي چلبة بس شوي خلي ابرد گلبي و اجي

وعد:: اهووو رواء كااافي

عتيت ايدي من ايدها و رحت ردت اكتل رجب بس لگيت نمارق گاضيتها گضيان لزمت وحدة من شلتها البنية ضخمة و اني هالگدوتني يمها دودفتني اتدودف بس ما احس بالضربات لأن لابسة هواي ملابس و اني وين ما تجي إيدي اضرب اندفعت عني و اباوعلها مُدرسة الاحياء و المعاونة واگفات فوگ روسنة يعيطن علينا و ام الحانوت لازمة صوندتها طشرتنة اخذونا للادارة بينه 12 بنية حتى وعد اخذوها ويانة دخلونه للمديرة مسحت كرامتنه بالگاع و وحدة منهن فهمتها الصار، اخذت ارقام اهالينه وعد ضلت تبچي تگللها

وعد:: ست اني مالي علاقة واللّٰه

- اششش

صاحت بيها سكتتها همستلي وعد بيني و بينها

وعد:: ابوي يبطلني رواااء

باوعتلها بخوف ضليت ساكته هسه بالله اني شلون بية يطيح حظي غَطرَف و هوَ راح يجيني گلت راح انطيها رقم ذَوّاد خابرت على اهالي البنات وحده وحده متحلفه بينا هالمرة كلش وصلت النا اني و وعد اللي كلش اتخربطت احوالها 

-تعاي سجلي رقم ابوچ 

رواء:: ست اني ابوي ميت

-الله يرحمه امچ عمچ خالچ أي واحد

رواء:: ما عندي عمام و خوالي بعيدين و امي مريضة

عاطت بية عيطة شلعتني شلع من مكاني 

- هااي سواالفچن ما يمشن عليَّ 

من الخوف رحتلها گبل سجلت رقم ذَوّاد گلتلها 

رواء:: هذا رقم اخوي الچبير

اخذت الموبايل مني و اتصلت جاوبها ظلت تحچي وياه و گلتله هيچ و هيچ السالفة و سدته منه ما دريت شنو ردة فعله يا رب استر علي يا ربي دخيلك وصلت الوعد 

وعد:: ما حافظة رقم بابا

رواء:: ست هي جيرانة اخوي هوَ يگول الابوها 

سكتت ممقتنعة بس لأن شافت وضع وعد و مبين عليها فقيرة و مو مال هيچ سوالف، اجو اهالي البنات و كل وحده انطتها فصل ثلاث ايام مع رزالة و من غير رزايل ابائهن صفينه بس اني و وعد و رجب شوي و دخل ذَوّاد سودة عليَّ مسومر و تعبان سلم على المديرة و هيَّ حچتله السالفة و هوَ كالساعة و يرفع عينه يباوعلي و يباوع الحالي الصدريتي المشگوگة من جهة الصدر و متربة و حجابي الاعوج و انطتنه فصل ثلاث ايام اني و وعد اني عود لازمه نفسي ما ابچي بس وعد گلبتها مناحة و تحلف هيَّ مالها علاقة 

گام ذَوّاد بدون لا يحچي أي شي أشرلنه نطلع من الأدارة حتى ما دافع عني لأن يعرفني 

طلعنه و اني عفت وعد و رحت للصف دگيت الباب لأن عدنا مدرسة خذيت الجنط و طلعت و البنات كلهن يباوعلي ردت اطم روحي الثولة لا انتِ الكتلتيها و خذيتي حقچ ولا انتِ الگاعدة و مستچنة 

انطيت جنطتها الها و مشينة ورا ذَوّاد بالممر نريد نطلع و الممر هدوء لأن هسه الكل بالصفوف و بس صوت بچي وعد ينسمع مشيت بصفها اواسيها هوَ اني اريد واحد يواسيني

رواء:: وعودة لتبچين عادي هنه بس ثلاث ايام مو هواي

وعد:: رواء اني بطلاع الروح يلا رجعت ادرس شتحچين انتِ واللّٰه من يدري يجنزني، گتلچ رواء كافي يولن عوفيهن بس انتِ مطي احسن النا هيچ؟؟ 

رواء:: اهو لا تلوميني البية مكفيني هسه امي بس تعرف تدفني بصف ابوي

سكتت عني مكملة العزا مالتها لحد ما صعدنا بالسيارة اني بكل عين صلفة صعدت بصفه و وعد ورا و هوَ ساكت بس حرك السيارة استلمني رزايل و عتاب 

ذَوّاد:: يعني انتِ رايحة تعاركين لو تدرسين؟؟ تعبتيني والله تعبتيني يومية شكوى جايتني على ست روااء بشنوو مقصر وياچچ شو شنو تريدينه يجيچ حتى بس تسلكين ما تملين من الطلايب انتِ؟؟ 

ضليت ابچي ممتعودة يصيح عليَّ ضليت حتى اني اصيح و ابچي محترگ گلبي 

رواء:: انتَ تدري بية ما اسوي مشكلة من فراغ هنه تحارشن بينة اني ساكته مو يمهنن ظلت تشمر تگلي چلبة و اسكتلها؟؟!! يمةةة غير انجلط و امووت

ذَوّاد:: سكتي عنها غلسي يعني هسه شتسوالچ گدام البنات مفصولة حتى المُدرسات راح ياخذن عليچ نظرة مو حلوة، امي تگلي بطلها و گعدها شلها بالدراسة و اني اگللها لا ادري بيها سباعية و ترفع راسسي، باچر عگبه اني مدايملچ اللّٰه ياخذ امانته محد يضل الچ غير شهادتچ 

رواء:: اهووو لا تحچي هيچ اسم اللّٰه عليك و العباس بعد ما اعيدها 

ذبيت روحي عليه ابوس بچتفه و راسه و هوَ يدفع بية 

ذَوّاد:: هااا هاا راح اادعم هسه و صدگ اموت 

ميلت عنه راجعه المكاني مغطية وجهي

و ابچي ما ابچي لأن مفصولة لا ابچي لأن خيبت ظنه، ذَوّاد كلشي صار الي و عوضني عن كلشي بدون مبالغة بحيث بابا مات و اني حيل صغيرة بس ما حسيت بهالشي لأن ذَوّاد سد مكانه ضحّى بكلشي علمودنا اني و امي و غَطرَف همين حتى هوَ يشتغل، ضحّى بدراسته ضحّى بشبابه اللي گضاه بيننا و بين الشغل اشتغل انواع الشغل في سبيل يعيشنة و ميخلي امي بعازة أحد 

و بالنسبة الي واللّٰه عبالك بنته بدون مبالغة دللني دلال ممكن الاب البنته ممدللها بگده 

بحيث امي ظلت تاخذ رأيه بكلشي يخصنة و هوَ اتعود بحيث حتى شكله مبين اكبر من عمره، رجّع غَطرَف غصبًا عليه للدراسة لأن حيل يحبها بس ما كمل بسببنا فَـ لذلك دائمًا يحرص على نجاحنا، اما غَطرَف مگدر يترك ذَوّاد وحده يشتغل ظل يشتغل و يدرس 

من حسيت السيارة وگفت يلا رفعت وجهي اباوع واگف گدام بيت وعد گتلها

رواء:: وعد تعالي يمنة و بوكت الحلة نرجعچ للبيت

هزت راسها تاكل بأظافرها رجع السيارة ذَوّاد البيتنا و نزلنة و هوَ نزل ويانة حتى يفهم امي لأن يدري مترحمني و تطيح حظي

دخل گدامنه سلم على خالتي و على امي و همين سَدف و اخوانها گاعدين و اني بكل عين صلفة همين سلمت و هلن بوعد مستغربات شعجب جاية امي ما انتبهت بس خالتي انتبهت

ام اسماعيل:: يا يا ليش باچية ولچ

باوعت الذَوّاد و هوَ هم باوعلي نظراتي تستنجد بيه

ام ذَوّاد:: ياا رواء ياهو وياچ؟؟ 

ذَوّاد:: ممجاوبة بالامتحان

ام ذَوّاد:: عزا شعجب انتِ البارحة درستي شبيچ لعد

رواء:: يمة صعبة شوفي حتى وعد الشاطرة ممجاوبة

وعد عبالك لگتلها سبب حتى تكمل بچيها نحبت تشرح الامي و تبچي

وعد:: اي واللّٰه خالة صعبة و طويلة حليتها على النص و سحبت الورقة مني المُدرسة ما خلتني اكمل

ام ذَوّاد:: عادي خالة هوَ امتحان شهري اتعوضنها بالشهر الجاي مو مشكلة لتبچين خالة ميخالف، اليوم چنكم من وكت شو بالله بيش الساعة

باوعت للساعة و اني خرطت ام العافية باوعت الذَوّاد بس هوَ عبالك يگلي طلعيني منها بسرعة فكرتلي بچذبة

رواء:: اي حلونه من وكت لأن اكو اجتماع و اجه المشرف اليوم

سكتت هيَّ و اني گعدت بالگاع مايعة روحي راحت سَدف جابتلنة مي من الهبطة شربته كله و اني اصلًا معطشانة

راح ذَوّاد الشغله يشتغل هوَ و غَطرَف بورشة يعني فيترچيين 

ضلت وعد گاعدة يمنا لحد وكت الحلة و امي وصلتها و رجعت و خطية سَدف هيَّ سوت الغدا و البيت يلمع مسويته اجه وكت الغدا و اخواني اجوا من الشغل صبينة الاكل و كلنة التمينة على السفرة، گعد ذَوّاد گبالي ظليت محنطة ما ارفع عيني من الصحن بس علقت على الاكل مستلذة

رواء:: عاشت إيدچ سدوفة تخبل المرگة

سَدف:: بالعافية

رواء:: اللّٰه يعافيچ و يخليچ و يديمچ و يطول بعمررچ آمين يا رب العالمين

لبگتهن لبگ و عيني على غَطرَف و هوَ ظل يخوزر بية لأن يدري داسمع بيه 

كملنه الغدا و غسلنة مواعين و عدا اليوم هادئ لليل ما اتحملت انام و ذَوّاد ميحاچيني طلعت من غرفتي الغرفته اريد اصالحه، دگيت بابه و هوَ چن عرفني

ذَوّاد:: اريد انام

رواء:: امي تصيحلك

ذَوّاد:: جاي

اتدنيت من يم الباب صرت ورا الحايط

و

هوَ بس فتح الباب گمزته 

ذَوّاد:: اشتعل عدوچ

رفعت أيدي للدعاء

رواء:: اللهي اشعلها بالدنيا و بالآخرة

ذَوّاد:: شتردين

رواء:: اجيت حتى نتصاحب اني وياك

ذَوّاد:: بعد مالي علاقة بيچ ولا اتدخل بيچ هاي هيَّ بعد اتصرفي باللي يعجبچ

رواء:: يااا مو هيَّ بكيفك

ذَوّاد:: لعد بكيفچ!

رواء:: خلي ادخل حتى نتصافى اني وياك 

ميل جسمة عن الباب مسويلي مجال ادخل دخلت و گعدت بالگاع و هوَ وگف فوگ راسي

رواء:: اگعد حتى اعرف شلون احچي 

راح گعد على الچرباية، بديت افهمه السالفة من البداية كلش حتى الملاسن الصار بيناتهن و اني اتدخلت لحد ما كتلت زهراء اللي بشلة رجب، گال

ذَوّاد:: يعني شلچن بهاي السوالف مال شلة و ما اعرف شنو وين گاعدين؟؟ و انتِ ليش تصاحبين مشكلچيات بابا أدي واجبچ و ارجعي بدون مشاكل اللّٰه يرضى عليچ حتى المديرة حفظت شكلي من گد ما اجي هوايَّ للمدرسة

رواء:: صدگني ما اگدر يعني يعيلن بية و اسكت؟ و القران انجلط 

ذَوّاد:: لتسكتين اللي تعيل بيچ اشتكي عليها يم المدرسات 

رواء:: لا حبوبي متفيد هاي السالفة اصلًا تقهرني اكثر يعني شبية مثلًا ما عندي لسان لو. ما عندي إيد اني آخذ حقي بيدي

ذَوّاد:: اوف روااء الحچي وياچ ميثمر

رواء:: يلا هاي الخاطرك بس بعد ما اعارك بس بأوقات الضرورة خوش؟ 

باوعلي بطرف عينه متنهد گتله

رواء:: يلا هسه متصاحبين؟؟ 

ذَوّاد:: إي 

رواء:: شو هاي من ورا خشمك چنك بعدك مراضي

ذَوّاد:: اي شوي و ارضى وحدي

رحت عليه بست راسه و گتله

رواء:: لو غيرك زعلان عليَّ ما اهتم بس لأن الزعلان ذَوّااد

ابتسم و گال

ذَوّاد:: اني احچي المصلحتچ حبيبتي 

رواء:: ادري واللّٰه، هسه اروح لو بعدك زعلان؟ 

ذَوّاد:: روحي

هزيت راسي راضية و رحت الغرفتي لگيتهم نايمين سَدف و اخوانها و اني همين لفيت راسي و نمت 

عدن الايام و ايامنه هادئة الحمدلله و امي و سَدف كلش احسن من قبل يسولفن طبيعي، و اجه يوم العاشر و رحنه اني و وعد للقرايات و اتوسلت توسل بسَدف يلا قبلت تجي ويانة و رضا بقى يم غَطرَف و ذَوّاد راحوا للموكب اخذنه ويانة مينا بس، و امي و خالتي راحن كم مجلس و رجعن للبيت 

بقينة للثلاثة بالليل نفتر و الناس عبالك الدنيا نهار تروش كلها گاعدة مواكب و مجالس اجواء عظيمة بمعنى الكلمة، رجعنة للبيت صلينة و سوينة الاعمال الخاصة بهذا اليوم سَدف ضلت تلوب كالساعة تگلي خابري غَطرَف قلقانة على رضاوي لحد ما گلتلها امي يضلوون للصبح هستوني خابرت غَطرَف يلا هادت و نامت و اني همين شوي وراها و نمت 

گعدت الصبح لگيت المطبخ مليان ثوابات و رحة الاكل تخبل موزعين انواع و اشكال 

عدت العشرة الثانية و الثالثة نصها و بدت العالم تروح مشاية و الدنيا بارردة ثلج 

ذَوّاد كل سنة يمشي بس يطلع من النجف الى كربلاء مو محافظات بقى يمنة غَطرَف و الاخبار كلش مو زينة كل يوم داعش ضاربين منطقة و امي طاير گلبها على ذَوّاد لا يصير بيه شي و بصراحة كل احنه قلقنه عليه بس ما نبين گدام امي لأن البيها مكفيها ماما علوية گللها غَطرَف

غَطرَف:: ادعيله علوية من بختچ إن شاء الله يرجع بخير و سلامة ما دام بطريق الحُسَين

و هي لسانها ممبطل من الدعاء منا لحد ما رجع ذَوّاد و يا فرحتنا برجعته لأن بصراحة أيسنا من شفنا الاخبار و همين ميجاوب على الموبايل طلع محترگ، 

نجحت اني بالشافعات و كل درجاتي على الحافة و وعد همين نجحت امي ما خلت چكليت يعتب عليها و اجت فرحة الزهراء و مضى شهر محرم بغمضة عين 

و مرات بالغلط افز الفجرية الگه باب الهول مفتوح و يعبر برودة الگه الهول يثلج اعرفهم هذول سَدف و غَطرَف كل فجرية الگاهم گاعدين يسولفون و ناسيين الباب مفتوح 

بدت سَدف تتعود علينه و حتى اخوانها حيل يحبوني و يحبون امي لأن دوم تشتريلهم و تلعب وياهم و تسولف و غَطرَف شايلهم بالصلاوات شنو يريدون يصير،بس يا فرحتها مكملت لأن ابن عمها غسان كل فترة يسويله طلابه و صارت عشاير لأن ما اله أي حق يطالب بيها لأن على ذمة رجال و هُمَ اصلًا متبرين منها بأي حق يجيها؟حلوها ذَوّاد و غَطرَف و شيوخنه گاوموهم ما گلنه السَدف ولا جبنه طاري و من يروحون امي تگللها عندهم شغل بس بشكل من الاشكال عرفت و نفسيتها سائت و رجعت مثل قبل منعزلة على نفسها و متحاچي احد من نهوا الموضوع وي عمامها بعد منها و ما وصل غسان ولا سمعناله خبر و غَطرَف طمن سَدف و گلالها بعد ميجي ولا يطب البغداد لأن بس يطب نكتله هو راد يهديها و يطمنها بس شو هيَّ اتخبلت 

سَدف:: لا تكتله

غَطرَف:: شلچ علاقة بيه؟ اكتله اعوفه اعذبه مالچ علاقة

سَدف:: مو بكيفك ياخذونك الحكومة

غَطرَف:: خلي ياخذوني ميهمني اهم شي كتلته

خبلها ظلت تعيط امي صاحت بـ غَطرَف و هوَ طلع مختاض عقله وداه الغير مكان عباله لأن سَدف تحبه، امي حبت سَدف تگول مو من هذني المحيلات فقيرة و حبابة و بيوم گاعدين اني و خالتي و امي نسولف لحد ما جبنه طاريهم 

ام اسماعيل:: سويله عرس خايبة عندچ العشرة هوَ بس غَطرَف و ذَوّاد بالله هذا قافل ميتزوج هسه بس اخلصي من هذول الطيور وراها فكرري بذَوّاد

ام ذَوّاد:: اي والله علواه بس كون يرضون سَدف همين خطية بعدها صغيرة اسويلهم حنة و عرس بس لازم ننطيهم وقتهم حتى يعرفون بعض اكثر

رواء:: ياا باع امي يا يتقبلون بعض بالنسبة الابنچ طايح على وجهة باقي بس سديفة كون تقتنع بيه بس انطوها وقت 

سدينه الموضوع من طلعت من الغرفة اجت يمنه گعدت خليت راسي على رجليها و ظلينة كلنه نسولف و هي مندمجة همين من ارتاحت النه بدأت تظهر شخصيتها الحقيقية تخبل و فرفوشة وي الناس اللي ترتاح الهم و حيل خجولة بنفس الوكت بس ما لحگنه نعرف شخصيتها اكثر بسبب هذاك عديم الرجولة طفاها اللّٰه ياخذه، دخل غَطرَف للبيت چان طالع سلم و دخل بدل و رجع گعد بالهول خالتي ظلت تسولف وياه و اني ردت اغورة جريت خد سَدف و بست اصابعي

رواء:: فدوة لله صاير عندچ خدود سديفة 

ام ذَوّاد:: ايـي سمنانة شحلاته السمن عليها 

امي حچتها على لاهيتها ما تدري اني متقصدة احچي هيچ حتى يسمعني هوَ يباوعلي بطرف عينه يدري بسوالفي ضحكت بصوت عالي هوَ ظل يهز بأيده، صارت الدنيا مغرب و رحنه صلينة وراها بدينا نسوي بالعشا و نسولف اني و سَدف و اسمع اصواتهم بالهول سَدف تسمع السوالفهم ما حاسه على روحها تتبسم 

هوَ عرف نقطة ضعفها شنو نقطة ضعفها اخوانها من احتواهم و حبهم كسبها هيَّ و كسبهم بنفس الوقت..