رواية جريمة تبادل الزوجات الفصل الأول بقلم ياسر عوده
.
دي اسوء نوع من الجرائم اللى ممكن تحقق فيها، والحقيقه انا كان نفسي ماتكلمش ابدا عن النوعيه دي من الجريمه، بس دا نوع موجود وقررت اتكلم عنها من باب التوعيه، وكمان علشان تعرفوا احنا وصلنا لفين، وياريت ننتبه على الاجيال اللى طالعه ونعرفهم الحلال والحرام.
وقبل ما اتكلم عن الجريمه حابب اعرفكم بنفسي، انا الضابط طارق محمد، شغال في المباحث وبدايه الجريمه دي لما ظهرت ريحه غريبه اوي في احد العمارات السكنيه الموجوده في المناطق الراقيه، ووقتها اشتكوا الجيران من الريحه وطلبوا من بواب العماره انه يشوف الريحه دي مصدرها ايه باالظبط، وفعلا ابتدي يدور البواب ويلف على كل شقق العماره وبيخبط على البيبان لشان يعرف مصدر الريحه، واتأكد بواب العماره واللى كان اسمه محروس ان كل الشقق كانت مافيهاش حاجه الا شقه وحده بس، كانت في الدور السادس، شقه واحد ومراته، ولما طلع وخبط على باب الشقه اكتر من مره مافيش حد فتحله الباب، ولما اتصل على رقم الزوج ماردش عليه، وحتى لما اتصل على رقم الزوجه هي كمان ماردتش عليه، وقتها قرر انه لازم يبلغ الشرطه، وفعلا دا اللى عمله محروس واتصل بالشرطه، وبعد وصول الشرطه بـ ربع ساعه لقيتهم بيكلموني، واللى كان بيكلمني ضابط مساعد شغال معايا اسمه سامح ولقيته بيقولي:
-ايوه يا طارق باشا، عاوز ابلغك بوجود جثتين لقناهم في شقه بعماره سكنيه، والجثتين دوول لزوجين راجل اسمه هيثم، ومراته اسمها غاده.
-ابعتلي العنوان وانا هجيلك على طول، واتصل بفريق المعمل الجنائي والطب الشرعي.
-اتصلت بيهم يا فندم وهما على وصول.
-تمام، انا جاي.
بعد ما قفلت الاتصال مع سامح، روحت على العنوان اللى بعتلي موقعه، ولما وصلت للمكان لقيت رجال الشرطه قدام العماره، وطلعت للشقه اللى كانت في الدور السادس، واول لما طلعت استقبلني سامح ولقيته بيقولي:
-احنا جمعنا بعض المعلومات المبدئيه عن المجني عليهم، الزوج اسمه هيثم، شغال محاسب في بنك، مستواه المادي ممتاز جدا، من عائله معروفه وغنيه، وهو ابنهم الوحيد، ومافيش أي طلب هو بيطلبه ومابيتنفذش.
اما بالنسبه للزوجه واللى اسمها غاده، فهي من عائله ميسوره الحال، مستواها المادي كويس اوي، وشغاله هي كمان في البنك مع جوزها هيثم، والاتنين ماخلفوش اطفال رغم انهم متجوزين من حوالي 3 سنين.
-طيب حققت مع الجيران وشوفت لو حد فيهم لاحظ حاجه غريبه؟
-لسه يا فندم.
-شهل شويه يا سامح، احنا عاوزين نعرف اللى حصل بالظبط.
-حاضر يا فندم.
وبعد ما اتحرك سامح انا روحت ابوص على الجثتين، واضح كده ان القاتل كان في حاله انتقام، دي حاجه ممكن أي ضاط شرطه يلاحظها، الجثتين كانوا غرقنين في دمهم، بس كنت ملاحظ ان الطعنات في الزوج اكبر بكتير من الطعنات اللى كانت في الزوجه، ويمكن مافيش طعنات نهائي لاني مش شايف بعيني غير اثر الدبح على رقبه الزوجه.
ابتديت كلامي مع دكتور الطب الشرعي، وسألته:
-قولي يا دكتور، ايه المعلومات اللى وصلتلها من فحص الجثتين؟
-اولا اظن اللى ارتكب الجريمه دي شخصين.
-استنتجت دا ازاي يا دكتور؟
-لاني مالقتش أي علامات للمقاومه على الجثتين، وواضح ان اللى اتقتل الاول كان الزوج، واللى اتطن اكتر من طعنه في اماكن كتير زي الصدر والرقبه والبطن، وكل ده ومافيش أي دليل على المقاومه نهائيا.
وكمان اتجاه الطعنات بتأكد ان الجاني والمجني عليه كانوا قعدين، ويمكن كان هجوم الجاني على المجني عليه مفاجيء، وعلشان كده مالحقش المجني عليه يدافع عن نفسه.
بس الحاجه اللى كنت مستغربلها هي الزوجه، واضح ان هي شافت الزوج وهو بيتقتل، لانها كانت في نفس المكان، وملامح وشها اللى ماتت عليها كانت بتأكد الموضوع ده، الزوجه كان واضح علي وشها الفزع والرعب، وعلشان كده انا مقتنع ان اللى ارتكب جريمتين القتل دوول شخصين، واحد فيهم قتل الزوج والتاني قتل الزوجه واللى ماكنتش قادره تقاوم بسبب الصدمه والخوف اللى كانت حاسه بيهم.
-فرق الوقت بين الجريمتين قد ايه يا دكتور؟
-وقت بسيط جدا ممكن دقيقه او اتنين بالكتير.
-طيب في أي حاجه مميزه ممكن تساعدنا في اكتشاف الجناه؟
-هي في حاجه ممكن نقول عليها انها صدفه غريبه، الجناه كانوا الاتنين بيستخدموا ايديهم الشمال في ارتكابهم للجريمه.
-طيب دي حاجه غريبه جدا وصعب تتكرر فعلا.
-عندك حق طبعا.
وبعد ما شكرت دكتور الطب الشرعي، روحت واتكلمت مع مسئول المعمل الجائي وسألته عن المعلومات اللى وصلها وقالي وقتها:
-الجاني دخل الشقه بشكل شرعي، يعني اما كان معاه مفتاح باب الشقه، او خبط والمجني عليهم فتحوله واستقبلوه بشكل عادي جدا.
-دكتور الطب الشرعي قال ان الجاني اكتر من شخص، انت ايه رأيك في المعلزمه دي؟
-الحقيقه هي حاجه مش مستبعده طبعا، خصوصا ان احنا لقينا اكتر من بصمه موجوده في الشقه مختلفين عن بصمات المجني عليهم، والحاجه الغريبه واللى ماكنتش مفهومه ان احنا لقينا بصمات في غرف النوم غريبه، ورغم كده الغرف كانت منظمه جدا ومافش أي اثر للعنف او أي محاوله من محاولات التفتيش.
-طيب في أي دليل ان الغرض من القتل هو السرقه، انا المعلومات اللى عندي بتأكد ان المجني عليهم شغالين في مكان كويس اوي، وكمان مستواهم المادي ممتاز، انت ايه رأيك في الموضوع ده، ممكن يكون الغرض هو السرقه فعلا؟
-دي حاجه مستبعده لاننا لما فتشنا الشقه لقينا في فلوس في الدولاب، وماكنتش محطوطه بمكان يصعب الوصول ايه، بالعكس كان يقدر أي شخص بيدور على الفلوس يلاقيها، ودي ماكنتش الحاجه الوحيده اللى كانت موجوده في الدولاب، لا كان في حاجه تانيه وهي المصوغات الدهبيه، كان في علبه فيها مصوغات دهبيه، وكانت موجوده بمكان ملحوظ يعني الجاني يقدر يوصلها بسهوله شديده.
وكمان في حاجه اخيره لازم تعرفها يا فندم.
-اتفضل قول انا سمعك.
-المجني عليها كان معاها مصوغات دهبيه في ايديها وكان عباره عن خاتمين وكمان كانت لابسه حلق، وطبعا لو الجناه عاوزين يسرقوا فاكيد مش هيسيبوا حاجه زي كده، وكمان احنا لقينا تليفونات المجني عليهم موجوده جنب جثث المجني عليهم، ومش بس كده احنا لقينا محفظه المجني عليه الزوج موجوده وفيها اكتر من فيزا لحسابات بالبنك وكمان فلوس كاش، ودا بيأكد ان مافيش أي نيه للسرقه، واضح ان الجريمه تمت بسبب من الاتنين، اما بغرض الانتقام او ان الجناه اختلفوا مع المجني عليهم في أمر معين وكان دا السبب اللى خلى الجناه يرتكبوا الجريمه دي.
-تمام وجهت نظرك وصلتلي، وفعلا كلامك هو الاقرب للصواب، وكن عاوز اسأل لو لقيتم أي كاميرات مراقبه في الشقه او حتي في العماره؟
-للاسف يا فندم مالقناش أي كاميرات مراقبه في الشقه، وكمان العماره نفسها مافيهاش أي كاميرات مراقبه، مع ان دي حاجه غريبه بالنسبه لـ عماره موجوده في حي مرموق زي ده.
-عندك حق، وهنحاول نعرف ايه السبب، وليه في بواب للعماره ومافيش كاميرات مراقبه في العماره، وبشكرك على المجهود الكبير اللى بتعملوه، وياريت تفرغولي تليفونات المجني عليه وتعرفني بالنتيجه بتاعت التفريغ في اقرب وقت.
-تمام يا فندم.
ــــــــــــــــــــــــــــــــــــــــــــــــــــــــــــــــــــــــــ
وبعد ما خلصت مع المعمل الجنائي والطب الشرعي، طلبت من سامح تحريات مفصله عن المجني عليهم يمكن نلاقي بنهم وبين أي اشخاص عداوه وتكون السبب في اللى حصل، وبعد كده انا روحت المكتب بتاعي علشان اتابع تطورات التحقيقات.
وتاني يوم كان سامح عندي علشان يقولي:
-عملنا تحريات مفصله يا فندم عن المجني عليهم، وطبعا خدنا اقوال الجيران، وقالولنا بعض المعلومات بس كان في معلومه غريبه كنت حابب اقولها لسيادتك.
-قول يا سامح انا سمعك.
-واحد من جيران المجني عليهم قال انه كان بيلاحظ تصرف غريب شويه، والتصرف ده ان المجني عليهم بيجلهم ناس كتير البيت، زيارات من اشخاص كتير، واللى فهمته منه ان ديما الاشخاص اللى بيجوا ليهم ديما بيبقوا راجل وست، وبيترددوا علىهم فتره وبعدها بيختفوا، ولما سألت البواب عن الموضوع ده هو قال نفس الكلام، وسألته لو كان اتكلم مع الاشخاص اللى بيجوا زياره للمجني عليهم او لا، وقتها قال:
-حصلت قبل كده مره وحده بس، وقفت اتنين كانوا داخلين للعماره، كان راجل ومعاه الست بتعته.
-وعرفت منين انها الست بتعته يا محروس؟
-منا لما سألتهم هما مين ورايحين على فين، الراجل اللى كان مع الست قالي:
-انا ومراتي طالعين لشقه الاستاذ هيثم، مش هو والمدام بتعته ساكنين في الدور السادس؟
-ايوه يا فندم، بس انتم تقربلهم ايه؟
-احنا زمايلهم في الشغل.
ولما كنت بتكلم معاهم جه اتصال على تليفون الراجل اللى كنت بتكلم معاه، وقتها كان المتصل الاستاذ هيثم، وقاله الراجل انه طالع مع المدام بس حارس العماره وقفهم، ووقتها اداني التليفون وسمعت الاستاذ هيثم وقتها بيقولي:
-انت موقفهم عندك ليه يا محروس، مش قالولك انهم تبعنا.
-انا بشوف شغلي يا هيثم بيه، ناس غريبه وأول مره اشوفهم وكنت لازم اسألهم رايحين فين.
-وخلاص عرفت، سبهم يطلعوا ولينا كلام مع بعض بعدين.
وفعلا سبتهم يطلعوا لشقه الاستاذ هيثم، وبعد لما نزلوا بحوالي 3 ساعات لقيت الاستاذ هيثم جالي بنفسه، واتكلم معايا ان انا ماينفعش اوقف الناس في مدخل العماره بالشكل ده، وان الناس اللى بتجيله دوول زملاءه في الشغل وناس مهمه اوي، وطلب مني اني ماعترضش حد فيهم خالص، ولقيه وقتها بيديني 500 جنيه وبيقولي:
-انا مبسوط منك يا محروس، بس انا مش عاوزك تضايق الناس اللى بيجولي تاني.
بصراحه انا لما لقيته بيديني مبلغ زي ده وافقت على كل الكلام اللى كان بيقوله، ومن وقتها أي حد داخل للاستاذ هيثم انا مابتكلمش معاه خالص.
ــــــــــــــــــــــــــــــــــــــــــــــــــــــــــ
ودي كانت اقوال البواب محروس، وبالنسبه لـ اقوال اهل الزوج، فكلهم اكدوا ان هيثم من وقت طويل وكان شخص انطوائي جدا، ويمكن دا كان بسبب انه كان ديما بيعزل نفسه في اوضته لمده ساعات واوقات لـ ايام ماكنش بيخرج منها غير لما بيروح الحمام، وحتى اكله كان بيطلبه في الاوضه بتعته، وماكنش بيحب يخطلت مع اهله خالص.
اما بالنسبه لـ اقوال المجني عليها الزوجه، فقالوا ان غاده طول عمرها شخصيه منفتحه على الجميع، كانت اجتماعيه جدا، ورغم ان ليها بعد الافكار الغريبه زي ايه لزمه الجواز، بس هي كانت شخصيه محبوبه من الجميع.
