رواية الحب التاني الفصل الأول بقلم ايمان احمد
بقووولك ممكن تحضنى؟؟
أفندم؟
_ طب مش لازم حضن امسك ايدى اعمل اى حاجة تدل اننا بنحب بعض
_ انتى بتقولى ايه هو انا اعرفك؟
_ نتعرف بعدين مفيش وقت ارجوك انقذنى
_ أنقذك؟؟
_ جايين عليينا...بسرعه امسك ايدى
بص قدامه وقال... هما مين دول؟
_ صحابى.. بسرعه ارجوك مثل اننا بنحب بعض وهديلك ال انت عايزه
ابتسم ابتسامة صغيرة وقال: هتدينى ايه؟
= كان معايا 500 جنيه شايلاهم للعوزة هديلك نصهم...
ضحك الشاب ضحكة جميلة
فقولت بتذمر.. ايه مش عاجبك نصهم! خلاص خدهم كلهم بس ساعدنى
جم صحابى اقصد ال كنت فاكراهم صحابى قبل مايبانوا على حقيقتهم
_ ايه ياحورية مش قولتى انك ارتبطتى وهتورينا حبيبك هو فين بقى حبيبك؟؟
واحدة تانية قالت بسخرية: اكيد مش الشاب ال واقف معاكى ده
قولت بكل ثقة... لا هو حبيبى مش بس كدة ناويين ان شاءلله عل الخطوبة قريب
آمال بسخرية: الشاب نفسه مش بيأيد كلامك لتكونى وقفتى اى شاب قدامك وبتمثلى؟؟
بصتله برجاء انه يأيد كلامى يقول اى حاجة بس كان ساكت مبيتكلمش الظاهر انى هنكشف وهبقى تريند الجامعه لاخر السنة طبعا بعد ماصحابى يسيحولى
بس فجأة لقيته مسك ايدى ابتسم نفس الإبتسامة الجميلة ال اظهرت غمازاته وقال
_ انا فعلا حبيبها وزى ماحورية قالت ناوى اتقدملها ان شاءلله وكلكم معزومين
مكنتش مصدقة نفسى من الفرحة
واحدة منهم قالت بغيرة: انا ليه حاسة انكم بتكدبوا طب بما انكم حبايب فعلا قوليلى اسمه
انا فعلا معرفش اسمه ونسيت اسأله لكنى جاوبت بسرعه بالاسم ال خطر فى بالى: يامن
ضحكت البنت بصوت عالى وقالتلى: مش قولتلكم انها بتكدب اما هو اسمه يامن لابس سلسة باسم عمر ليه؟؟
بصيت على السلسة ال كان لابسها وانصدمت معرفتش اقول ايه
التانية ردت بشماته: بقى بتكد-بى علينا ياحورية وفاكرانا مش هنعرف بس كشفناكى بكل سهولة لا ده زياد كان لازم يبقى حاضر معانا هو وريم
مجرد ذكر اسم زياد وريم الدم غلى فى عروقى اصلا كل ده بسببهم ريم دى كان انتيمتى و زياد حبيبى بس الاتنين خدعونى ودلوقتى مخطوبين من وقتها وكل زمايلى فى الجامعه بيتمسخروا عليا
سكت بحزن انا انكشفت خلاص طب كنت سألته على اسمه لكن فجاة الشاب قال بهدوء
= شرط يكون اسمى مايمكن اسم اخويا مثلا!؟
آمال بسخرية: وهتلبس سلسة عليها اسم اخوك ليه!؟
رد الشاب بنفس هدوءه ال هيجننى: انا حر.. بس بما انك حشر-ية وعندك فضول تعرفى فعمر ده اخويا المتوفى اى اسأله تانى؟؟
آمال كان باين عليها الغضب هيا وصحابها اما انا فكنت فى قمة انبساطى اخيرا لقيت حد وقف جمبى وجابلى حقى منهم ده احرج آمال ال محدش بيقدر على لسانها
البنت ال اسمها نور صديقة آمال المقربة كانت شاردة فى شئ قالت
= بس الوش ده مش غريب عليا حاسة انى شوفتك قبل كدة.. لا انا متأكدة شوفتك فين... شوفتك فين
ومرة واحدة قالت: اه مش انت هو الشاب ال شغال فى كافتريا الجامعه.. اقسم بالله انت افتكرت
وشى جاب الوان الطيف معقول هو فعلا انا افتكرت من هيئته انه شاب غنى فهقدر اغيظ بيه صحابى واحرق دم زياد ال خدعنى وسابنى ومفكر نفسه مفيش منه ده كله عشان هو اغنى واحد فى الجامعه
آمال ضحكت بصوت عالى وقالت: ياعينى عليكى ياحورية حظك فى الحب يوكس تعجبى بابن عمك ويروح يخطب غيرك تحبى زياد بجنون وبعدها بردوا يسيبك ويخطب صاحبتك الانتيم ودلوقتى اما لقيتى ولحد يبادلك الحب يطلع فقير ومش لاقى ياكل زيك بالظبط
نور: عندك ريم اتخطبت لزياد ال ابوه رجل اعمال كبير وآمال مرتبطة بواحد غنى بيغير عربيته كل يومين وانا بيحبنى دكتور فى الجامعه ويتمنالى الرضا.. وباقى صحابنا على نفس الوتيرة عرفتى بقى انتى ليه مش صاحبتنا! لانك مش شبهنا شوفى اختيارك للبسك وشكلك عامل ازاى حتى اخيتارك لحبيبك يقر-ف
قولت بحدة والدموع مالية عينى: انتم ال تقر-فوا بتفكيركم المقر-ف ده مش عارفة ازاى صاحبت ناس زيك وحكيت اسرارى لواحدة زى ريم مانتم اصلا شبه بعض وانا ال ميشرفنيش انكم صحابى.. وحتى لو هو بيشتغل فى كافتريا الجامعه ايه مشكلتم يعنى على الاقل فلوسه حلال وبعدين انا ارتبط بال يعجبنى ومحدش ليه دعوة
معرفش ليه قولت جملتى الاخيرة يمكن حبيت ادافع عنه زى ماهو وقف جمبى ودافع عنى!! يمكن
آمال بتوعد: انتظرينا بكرا فى الجامعه عشان نعرف الكل بحبيبك الفقير
كنت هتكلم لكن الشاب الغريب قال بهدوء: هو معنى انى شغال فى كافتريا الجامعه يبقى انا فقير؟؟
نور بسخرية: اومال هتبقى بتسلى وقتك مثلاااا ههههه
همست بالقرب منه: خلينا ننسحب وبعتذرلك انى حطيتك فى موقف محرج
لكنه طنش كلامى وكمل كلامه معاهم: وانا قادر اثبتلكم انى غنى واغنى من زياد ال انتم بتتكلموا عنه
آمال بسخرية: نعتبره تحدى؟؟
جاوب بكل بساطة: اه تحدى
وهتثبتلنا ازاى؟
قالتها الخبيثة نور
رد الشاب وقال.....
