رواية الجثة الحامل الفصل الأول بقلم ياسر عوده
السلام عليكم، عاملين ايه انا مقدم برنامج جرائم حقيقيه اسامه ابراهيم، اتقبلت معاكم قبل كده لما قدمت اول حلقه من البرنامج بتاعي اللى اتذاع على الراديوا، وزي ما قولتلكم قبل كده الحلقه الاولي بتعتي كانت ترند، ودا كان بسبب اني اخترت وقتها ضيف البرنامج دكتور التنويم المغناطيسي نبيل رفعت، واوعدكم اني هبقى استضيفه تاني بعد كده، بس النهارده انا مستضيف شخص تاني خالص، والشخص دا يبقى الدكتور فايز محمد دكتور التشريح.
بعد ما معد البرنامج اتواصل مع الدكتور فايز، والحقيقه هو رحب بالفكره خصوصا ان الحلقه الاولي حققت نجاح كبير اوي، وحضر الدكتور فايز للاستديو الاذاعي، وقبل الحلقه ما تتذاع قعدت معاه وفي البدايه رحبت بيه:
-اهلا بحضرتك يا دكتور فايز، وجود حضرتك معانا النهارده شرف ليا وللبرنامج.
-اهلا بيك يا استاذ اسامه، الشرف ليا وحابب اهني حضرتك بالحلقه الاولي للبرنامج وبعودتك مره تانيه للشغل.
-الف شكر يا دكتور فايز، واللى بتمناه من حضرتك ان الحلقه التانيه ماتكونش اقل من الحلقه الاولى، وعلشان كده انا قعدت معاك قبل الحلقه، علشان نتكلم في بعض التفاصيل.
-اوي اوي، انا سمعك.
-اهم حاجه في البرنامج بتاعنا التفاصيل يا دكتور، يعني حضرتك هتتكلم عن حالات قابلتها في شغلك، انا مش عاوز الجزء اللى يخص شغلك بس، لا انا عاوز حضرتك تحكي كل التفاصيل اللى عرفتها عن الحاله او عن الجريمه كلها اللى اشتغلت عليها.
-طبعا طبعا مفهوم الجزئيه دي.
-حضرت ليك حريه اختيار الجريمه اللى هتتكلم عنها، بس كل اللى بترجاه منك انك تختار حاجه تخلي الناس عاوزه تكمل الحلقه، يعني اتمني ان حضرتك تختار جرايم قويه وفيها احداث تشد المستمع.
-تمام اكيد ماتقلقش يا استاذ اسامه.
-على البركه وباذن الله هنعمل حلقه تكسر الدنيا.
وبعد ما خلصت كلام مع الدكتور فايز جهزت نفسي للحلقه، وفعلا جه وقت الحلقه، ولما بداءت قولت:
-اعزائي المستمعين، اهل بيكم بالحلقه التانيه من برنامج جرائم حقيقيه، والاول قبل كل حاجه، حابب اشكركم على تفاعلكم مع الحلقه الاولى، حقيقي انا ماكنتش متوقع كل الكرم اللى انتم قابلتوني بيه، وبتمنى ان حضراتكم تسعدوني وتسندوني دايما، واوعدكم ان الحلقه التانيه مش هتبقى اقل من الحلقه الاولى، وعلشان كده حابب ان حضراتكم ترحبوا معايا بضيف الحلقه، الدكتور فايز محمد دكتور التشريح، واللى معروف على المستوي الدولي مش المستوي المحلي بس، اهلا بيك يا دكتور فايز.
وقتها رد عليا الدكتور فايز وقالي:
-اهلا بيك يا استاذ اسامه وبكل متابعين البرنامج الكرام.
-عالم التشريح عالم غريب ومرتبط بالموت وبالجثث، ودي حاجه مخيفه ومش أي حد يقدر يشتغل في المجال ده.
ابتسم الدكتور فايز وقال:
-عندك حق، بس لو كلنا خفنا ساعتها مين اللى هيساعد العداله وهيقدم الادله اللى تساعد الشرطه والنيابه على اظهار الحقيقه؟، دا دوري في الحياه اني اساعد على اظهار الحقيقه وارجع الحق لـ اصحابه.
-كلامك جميل يا دكتور، ودا يشجعني اني اسألك ايه افضل قضيه او جريمه حضرتك اشتغلت عليها وكان ليك فيها دور كبير اوي ومميز؟
-الحمد لله انا معظم الجرايم اللى اشتغلت عليها كان ليا فيها بصمه، بس انا هحكي دلوقتي لحضرتك وللساده المستمعين عن قضيه انا اشتغلت عليها، وكانت فيها مفاجأت كتير غيرت من مجري القضيه.
-انا والساده المستمعين متشوقين نسمع حضرتك يا دكتور.
-بدايه الحكايه لما اهالي منطقه صحيوا على صوت صريخ، كانت اصوات مرعبه جدا والكل قام وهو خايف، كانت الساعه وقتها 6 الصبح، ولما الناس خرجت من بيوتها علشان تعرف ايه اللى حصل، وقتها لقوا ان في حريق كبير جدا ماسك في مطعم من المطاعم الشعبيه، والمطعم دا كان معروف في المنطقه، رغم انه ماكنش مطعم كبير بس معظم سكان المنطقه بيشتروا منه الفطار كل يوم، كان مطعم للفول والطعميه، بتاع وحده اسمها هانم.
الست هانم دي كانت معروفه في المنطقه، وكان منظر الحريق يخوف، حاول اكتر من شخص يتدخل ويطفي الحريق، بس الموضوع كان شبه مستحيل، النار كانت كبيره وشديده جدا وكانت ممكن تاكل أي حد يقرب منها، وكان اول تصرف سليم يعملوه انهم اتصلوا بالمطافي، بس لما وصلت عربيه المطافي كان مر على اشتعال الحريق وقت مش قليل، واخيرا وصلت عربيه المطافي وبداءت تطفي الحريق، وزي ما الاهالي اتصلوا بالمطافي، اتصلوا كمان بـ الشرطه علشان يبلغوهم باللى حصل، وحضرت الشرطه وكمان سياره اسعاف علشان لو حصلت أي اصابات، وبعد حوالي 20 دقيقه قدرت عربيه المطافي تطفي الحريق، بس لما دا حصل والنار انطفت، كان المحل كله اتدمر، مابقاش في حاجه باينه من ملامح المطعم نهائيا، كل حاجه كانت في خبر كان.
ابتدي رجال المطافي يفحصوا المطعم بعد ما النار انخمدت خالص، وطبعا ستر ربنا ان الحريق مامسكتش في البيت كله اللى فيه المطعم، او حتي اتنقلت النار لـ البيوت المجاوره، وبعد ما فحصوا رجال المطافي المكان، سمع ضابط الشرطه اللى كان موجود صوت راجل المطافي وها وبيطلب منه يدخل المطعم، ولما دخل وسأله:
-خير حصل ايه؟
وقتها شاور راجل المطافي على حاجه على الارض وقاله:
-في جثه على الارض.
وقتها قرب ضابط الشرطه من الجثه واللى كانت متفحمه نهائيا، ومش باين منها أي ملامح نهائيا من شده الحريق، وبعدها طلب الضابط من المساعد بتاعه بانه يتصل بفريق المعمل الجنائي بسرعه، وكمان بدكتور الطب الشرعي علشان يجوا يفحصوا المكان وكمان يفحصوا الجثه.
فعلا المساعد نفذ التعليمات وبعد وقت قليل حضر فريق المعمل الجنائي وكمان الطب الشرعي، وبداءوا بفحص المكان وكمان الجثه علشان يعرفوا لو الحريق اللى حصل دا حصل بفعل فاعل ولا كان مجرد حادث مش اكتر، وفي الوقت ده ابتدوا رجال الشرطه يسمعوا اقوال الجيران وشهود العيان، وعرفوا وقتها بان صاحبه المطعم سيده اسمها هانم وهي اللى شغاله وحدها في المطعم ده، وكان من الطبيعي ان الشرطه تتوقع ان الجثه اللى لقوها في المطعم متفحمه هي جثه هانم نفسها، بس علشان يتأكدوا من الموضوع ده كان لازم يستنوا كلام المعمل الجنائي والطب الشرعي.
كان اول حد فيهم خلص شغله كان دكتور الطب الشرعي اللى اتكلم وقتها مع الضابط وقاله:
-احنا اتأكدنا ان الجثه اللى في المطعم هي جثه وحده ست، وعلى الارجح هتكون هي جثه صاحبه المطعم اللى اسمها هانم.
-قدرتم تحددوا سبب الوفاه يا دكتور ان كان بسبب الحريق ولا بسبب حاجه تانيه؟
-لا الموت كان بسبب الحريق، المجني عليها اتعرضت لحروق شديده جدا وكل معالم وشها اتشوهت تماما، ومافيش في جسمها مكان سليم، الجثه كلها متفحمه تماما، وللاسف جلد المجني عليها كله محروق يعني هيبقى صعب نحدد لو في أي اثر للعنف مثلا او أي حاجه من الحاجات دي، بس يمكن مع التشريح يقدر دكتور التشريح يوصل لمعلومات تفيدك اكتر.
-شكرا يا دكتور.
وبعد ما خلص الضابط كلامه مع دكتور الطب الشرعي، راح واتكلم مع رئيس فريق المعمل الجنائي، واللى كان في حيره وسأله الضابط:
-ايه المعلومات اللى قدرتم توصللها من فحص المكان؟
-الاول احنا فحصنا كل المكان، سبب الحريق كان انابيب الغاز، حصل تسريب من انبوبه من الانابيب، والتسريب دا هو السبب في اللى حصل، واضح ان التسريب كان من فتره طويله ويمكن من الليله اللى قبلها، ولما حاولت المجني عليها تشعل النار علشان تشوف شغلها، وقتها النار انتشرت في المكان بالشكل اللى حصل، واتحرقت المجني عليها بالطريقه اللى احنا شوفناها.
-يعني حضرتك شايف ان مافيش أي شبه جنائيه في الموضوع؟
-الحقيقي انا مش قادر احدد لغايه دلوقتي، تصوري انا والرجاله اللى معايا ان مجرد حادث، وبسبب النار الشديده اللى حرقت كل حاجه هي دمرت أي اثار للجريم هدا لو اللى حصل كان جريمه من الاساس، يعني مافيش أي بصمات في المكان، وحتى جثه المجني عليها مستحيل نقدر نلاقي عليها أي بصمات، اصلا جثتها متفحمه يعني مستحيل لمس الجثه من الاساس.
ودي كانت كل المعلومات اللى سمعها الضابط وقتها، وطلب من فريق التحقيق انهم يحاولوا يشوفوا أي كاميرات مراقبه قريبه من المكان يمكن يلاقي فيها أي داليل يساعدهم يفهموا اللى حصل، وبداءتا لشرطه في عمليه تحريات مفصله عن المجني عليها واستجواب الجيران.
المعلومات اللى وصلتلها الشرطه في البدايه ان المجني عليها عايشه لوحدها، ومصدر دخلها المطعم اللى اتحرق، وكمان عرفوا انها مطلقه من حوالي سنه ونصف تقريبا، وكانت متجوزه شخص اسمه عصام، وطبعا ضابط الشرطه طلب عصام علشان يحقق معاه ويعرف منه أي معلومه عن المجني عليها، وفي الوقت اللى كانت الشرطه بتحقق في الحادث اللى حصل اتحولت الجثه عندي في المشرحه، علشان ابداء شغلي عليها.
وبمجرد اني شوفت الجثه جالي احساس انها مجرد حادث، الحروق الشديده اللى كانت موجوده كانت واضحه جدا انها بفعل الغاز، وطبعا دا كان بيتفق مع المعلومات اللى كانت موجوده في محاضر الشرطه، ودرجه الحروق دي كانت كفيله انها تقضي على المجني عليها تماما.
