رواية النصاب الفصل الأول بقلم جمانه السعيدي
اني بان بنيه عاديه وااقل من عاديه مواليد ٩١
حتى لا ابالغ بلوصف اني موحلوه وسمينه وسمره
من زغير واني اعاني من التنمر
اكثر شي من اقاربي وصديقاتي والجيران
اني اشبه امي امي سمره وسمينه
بس دمها حلووو ومحبوبه
بعد زواج امي من بابا بسنه وحده انفصلت عنه
ماكانت عاجبته من البدايه
شلون ازوجها مااعرف
بابا يكول ما خلوني اشوفها زين قبل الزواج
امي تكول جان طمعان بلفلوس
اهل امي حالتهم الماديه زينه ابوها عمده املاك وبيوت
متوقع اهل امي يشتروله بيت وسياره بعد الزواج
بس شاف نفسه كلشي ما حصل منهم
بدا يحارب امي حتى تكره العيشه وياا وتنهزم
المهم هاي السنه خلصت عذاب بلنسبه الامي
منا لمن انفصلت عنه
سنه زواج وحده ونتهى كلشي
بوقتها كان عمري شهرين
ابوي بعد انفصاله عن امي بشهر واحد ازوج وحده ثانيه وصار عنده اطفال
عايش حياته وابد مايذكرني والا يحن كلبه عليه
حتى اني ما شايفته ابد
رجعت امي بيت جدي اهل امي حالتهم الماديه كلش زينه
وماعدهم بس امي و خالي عماد
تربيت بيت جدي
وكبرت ويا بنات خالي
حتى بنات خالي يتنمرن عليه
بس اكعد ااكل وياهن يكولن راح تخلص الاكل كله
مايردني ااكل وياهن لو اللعب وياهن
مايحبني لان امهن ما تحبني وتحجي عليه
عوضني ربي بصديقه وحيده ساره هاي صديقتي من اني زغيره
اهل ساره جيرانه الحايط على الحايط
الوحيده الي ما تتنمر عليه
وتحبني واحبها
ساره حلوه بشكل حلوه جدا جمالها غير معقول
من هيه زغيره وهيه حلوه
بحيث من دخلنا مدرسه البنات جانن يحرضنها عليه
لان اني وياها ما نتفارك من ندخل للمدرسه لمن نطلع
شلون تمشين وياا هاي الدبه
شلون تلعبين وياها
الحسناء والوحش
بس ساره مجانت تسكت ابد الي يحجي عليه كلمه
ترجعها علي عشره
حتى تتعارك علمودي
ما تقبل اي احد يحجي عليه
اني وياها نلعب سوه وناكل سوه ونشرب سوه
حتى من نرجع للبيت نحل الدروس سوه
اذا امي اشترتلي نفنوف اله تشتري الساره مثله
بس طبعا قياس ازغر
لان هيه ضعيفه واني سمينه
اذا اشتريت قراصه لو طوك لو حذاء لازم نشتري اني وياها سوه
ساره بعمرها ما طلبت مني اي شي
ولا تمشي وياي على طمع
بس هيج محبه من الله
يمكن لو عندي اخت مااحبها واعزها مثل ساره
ساره وضع اهلها المادي ضعيف مايكدرون يشترولها
الأشياء الي تحبها وتريدها
بس اني احاول انطيها من مصرفي
واخليها تشاركني بكل الأشياء الي اشتريها
لان احبها
جمانه السعيدي
ساره بلنسبه اليه الانسانه الي جاي تخليني اعوض النقص الي عايشته
من حرمان من ابوي وتنمر الناس على شكلي
الوحيده الي من امشي وياها مااحس بااي نقص
حتى من وصلنا المتوسطه ساره وياي
والبنات عيني عينك يحرضنها عليه
يكولن شنو هاي وتمشين وياها انتي حلوه ليش تمشين ويا هاي السمينه
ااكو بنات يكولن ساره تمشي وي بان حتى
تبين شكد حلوه
كلامهن ماغير شي ابد ساره تحبني واحبها
بلعكس ساره اذا شافت وحده تعيب عليه لو تحاول تنتقص مني تتعارك وياها توصل للضرب
اي مستعده تضرب اي وحده علمودي
بان....ساره ليش انتي الوحيده الي تحبيني
وباقي البنات وحتى بنات خالي مايردني
ساره...لان البنات ياخذن بلمظهر رغم انتي حلوه
جمال كلبج الطيب واخلاقج الحلوه تخليني اشوفج احلى وحده بهاي الدنيا
ماتعرفين اني شكد احبج
بان...حسيت كلام ساره طالع من كلبها
فعلا صديقه ونعم الصديقه
بهاي الفتره بدا جدي يتمرض ويتعب صحته بلنازل
لان يعرف امي مالها احد بهاي الدنيا حتى خالي عماد مو سند الها لان يسمع كلام زوجته وزوجته ما تحب امي
جدي كتب نص املاكه باسم امي والنص الثاني الخالي العماد
ااكثر من سنه وجدي مريض وتعبان
من خلصت متوسطه مات جدي
ااكثر وحده انهارت علي وتعبت من بعده امي
حتى اكثر من بيبتي نفسها
جمانه السعيدي
الحياة صارت صعبه والكلوب تغيرت
خالي تغير حيل تغير من مات جدي وزوجته
بدت تخلق مشاكل مالها نهايه
نتيجه المشاكل خالي اخذ الطابق الثاني بلبيت
عزل هو وزوجته واطفاله
طلع درج خارجي وسكن وحده
وماله شغل بينا بين يوم ويوم يجي يشوف بيبي
يكعد نص ساعه ويروح البيته
جان حاقد على امي لان جدي كتب نص الأملاك باسمها
يريد ياخذ حصتين وامي حصه وحده
حسب الشرع
مسئلة امي تاخذ نص الأملاك بلنسبه اله مرفوضه
حتى زوجته انزعجت حيل من تصرف جدي
دائما تحجي وتدعي علينا
امي شالت مسؤلية كلشي بلبيت حتى المسواك
تطلع كل اربع او خمس ايام للسوك اجيبلنا الشغلات الي محتاجيهن وترجع للبيت
خالي جان يجمع الوارد من المحلات ويقسمه بلنص بينا وبينه هو هم موضف وعنده راتب خاص بي
يعني امورهم الماديه زينه
احنا هم نتسوق ونشتري اي شي يعجبنا
ما ناقصنا اي شي
الحد ما خلصت اعدادي يعني عمري صار ١٨ سنه
كل هذا الوقت واني ماشايفه ابوي
ولا اعرف شكله شلونه
المهم بهاي الفتره وكعت بيبي مريضه
وبدت رحلة العلاج والادويه
خالي يجي ياخذها للطبيب ويجيبلها علاج
بس ااكثر شي امي شايله مسؤليتها
كل هاي السنيين واني وساره ما تفاركنا ابد
بلعكس صداقتنا صارت أقوى من قبل
اشترا خالي قطعة ارض وبدا يبني بيها بيته
انشغل عنا يريد بيته يكمل
كلما تتصل علي امي يكول مشغول
كلما تطلب منه علاج يكول ماعندي منيين اجيب
كاعد ابني بيتي
انتي اشتريلها علاج
عندج فلوس واشتري منيين اجيبلج
هذا الكلام شكد يقهر بيبتي صح امي عدها فلوس
وما محتاجه فلوسه
بس يبقى هو السند والأخ الوحيد الها
كل هذا الحقد والجفاء بسبب جدي
لان كتب نص الأملاك الامي
جمانه السعيدي
خالي يعتقد كل العائله تكرها وماتريده
حتى بيبي يعتقد ماتريده
لان مجاي يصدك جدي كتب تنازل عن نص الاملاك
الامي بدون ماتدري بيبي
يحس اله حق وراح من عنده
مسكينه امي شايلت كل المسؤليه على جتافها
مصاريف البيت ومصاريف العلاج
طلعت النتائج ونجحت ولله الحمد
طلعت معدل بلسبعين انقبلت كلية حاسبات
اما ساره انقبلت تربيه
صح احنا بنفس الجامعه بس كل وحده كليه شكل
هذا الشي ما منعنا نبقى سوه
من دخلت جامعه تغيرت نفسيتي حيل
بديت اشوف البنات شلون يختلفن عني
بديت اغير من لبسي وشكلي واحاول استخدم كريمات
وشغلات للبشره والبس كورسيه حتى ابين اضعف
بس حتى لا احس بلنقص عن باقي البنات
بلنسبه الساره كل أسبوع يتقدملها وواحد
هلكد ما حلوه ومرتبه رغم ملابسها بسيطه
بس القالب غالب مثل مايكولون
اني كنت ادفع فلوس الخط بمكانها
واذا اشتري ملابس اشتريلها قطعه او ثنيين وياي
تستاهل ساره الانسانه الطيبه الي ما تغيرت ابد
كمل بيت خالي وانتقل وصار البيت فارغ
رغم جان خالي وعائلته عازلين نفسهم فوك
بس على الاقل نسمع اصواتهم
صارت البيت فارغ وموحوش حيل
