رواية جريمة بني مزار الفصل الأول 1 بقلم ملك ابراهيم

_إنهارده الساعة إتنين بالليل حصلت جـ.ـريمة بشـ.ـعة أوي! عشر ضحـ.ـايا مقتـ.ـولين، والمرعب إن أجساد بعض الضحـ.ـايا اتعرضت لتشـ.ـويه بعد الوفـ.ـاة!..

البداية كانت لما وصل بـ.ـلاغ لمركز شرطة بني مزار، بيقول إن فيه 3 عائلات كاملين اتقـ.ـتلوا!.. 

التوقيت واحد، 3 بيوت، 10 ضحـ.ـايا... والجانـ.ـي مجهول.

_الحـ.ـادثة دي غريبة جدًا يا مراد!.. يعني يوم ما أقرر أمسك أول قضية ليا تكون دي القضية؟!.. 

_إهدى يا كريم باشا... إنت لسه في أول الطريق.

_أه أه نسيت أعرفكم بنفسي! أنا النقيب كريم سيد... ابن سيد الله يجحمـ.ـه، أيوه، نورسين باشا بعد ما بقت حامل شرفت في البيت ودبستني أكون مكانها!.. 

بيبص ليه مُراد وهو بيقول:-

_والله أنا مش عارف أقولك مبروك ولا ربنا يعينك.

_قول ربنا يعيني أحسن.

ركب كريم العربية واتجه ناحية مكان الجـ.ـريمة، وهو طول الطريق ساكت، كان فيه حاجة واحدة بتلف في دماغه:-

_عشر ضحـ.ـايا، مش واحد، مش أسرة واحدة، دول تلاتة، ولما وصلوا القرية، كان الهدوء غريب بشكل يخلي الواحد مش مرتاح.

البيوت كانت واقفة جنب بعض، والناس متجمعة بعيد عن مكان الجـ.ـريمة، وكل واحد فيهم بيتكلم بصوت واطي وكأنه خايف حتىٰ من الكلام.

نزل كريم من العربية وقال:-

_فين أول بيت؟!. 

بيشاور مُراد ناحية بيت صغير في آخر الشارع وهو بيقول:-

_هناك.

دخل كريم البيت ومعاه مراد ورجال المعمل الجنائي. 

أول حاجة لاحظها إن الباب مفيهوش آثار كسر، وقف كريم قدامه كام ثانية وهو بيقول:-

_الباب سليم.

_أيوه.

_يعني مفيش حد اقتـ.ـحم البيت بالقوة.

_ممكن يكون الباب كان مفتوح.

_وممكن الضحـ.ـايا يعرفوا اللي دخل.

سكت مراد، دخلوا الصالة، البيت كان شكله عادي جدًا.

ترابيزة عليها كوباية، كرسي متحرك من مكانه، حاجات بسيطة في البيت متلمستش، مفيش سـ.ـرقة واضحة، مفيش بعثرة بالشكل اللي كريم كان متوقعه. 

لكن أول ما دخلوا الغرفة، اتغير كل شيء، وقف كريم مكانه.

قدامه كانت الجثـ.ـامين موجودة في أماكن مختلفة داخل البيت، والطب الشـ.ـرعي بدأ يوثق كل حاجة قبل نقلها، كريم قرب خطوة، وبعدها وقف.

بيبص ليه مُراد وهو بيقول:-

_أول مرة تشوف حاجة زي دي؟!. 

كريم بلع ريقه وهو بيقول:-

_أول مرة أشوف عشر ضحـ.ـايا في قضية واحدة.

قرب أكتر، لكن من غير ما يلمس أي حاجة، بدأ يلاحظ الإصـ.ـابات وبيقول:-

_الإصـ.ـابات مش كلها بنفس الشكل.

رد أحد أفراد المعمل:-

_ودا اللي لسه مش مفهوم.

_يعني إيه؟!. 

_يعني التقرير المبدئي بيقول إن سبب الوفـ.ـاة مرتبط بإصـ.ـابات عنـ.ـيفة... لكن اللي حصل بعد الوفـ.ـاة هو اللي مخلي القضية أغرب!. 

_بعد الوفـ.ـاة؟!. 

_فيه إصـ.ـابات وتغييرات حصلت في أجساد بعض الضحـ.ـايا بعد الوفـ.ـاة.

كريم سكت، وبص للجثـ.ـامين مرة تانية وبيقول:-

_يعني القـ.ـتل حاجة... واللي حصل بعد القـ.ـتل حاجة تانية؟!. 

_بالظبط.

فضل كريم ساكت ثواني، وبعدين قال:-

_صوروا كل حاجة... ومحدش يلمس أي تفصيلة قبل ما تتوثق. 

وبيبص كريم لأكرم وهو بيقوله:-

_وانت يا أكرم نورسين طالعه بيك السما معرفش علىٰ ايه عاوز تقرير مُفصل أكتر من القميص إللي انت لابسه!. 

خرج من البيت واتجه للبيت التاني، وبعده التالت.

نفس المشهد تقريبًا، تلت بيوت، عشر ضحـ.ـايا، والأغرب...

مفيش تفسير واضح للرابط بينهم، وقف كريم في نص الشارع وبص للبيوت التلاتة.

_مراد...

_أيوه؟!. 

_اللي عمل كدا كان داخل عارف هو رايح فين.

_تقصد إيه؟!. 

_مفيش اقتحـ.ـام واضح... مفيش سرقـ.ـة... ومفيش خناقـ.ـة كبيرة حصلت جوا البيوت.

بيبص للبيوت وبيقول:-

_يبقى السؤال مش "مين قـ.ـتلهم". 

سكت لحظة ولكن كان فيه سؤال بيدور جوا راسه.. 

_السؤال الأول هو مي كان عارفهم!. 

___________________

وبعد ساعات... رجع كريم القسم، دخل مكتبه وقفل الباب وراه.

حط قدامه أول ملف، فتح الصفحة الأولىٰ.

الضـ.ـحية الأولى، شاف المعلومات، كل حاجة كانت واضحه قصاده، قلب الصفحة. 

الضـ.ـحية الثانية، وبعدها الثالثة، وبعدها الرابعة، كل ما يقلب صفحة، كان بيحس إن القضـ.ـية بتكبر بدل ما تصغر.

وفي النهاية حط الملفات العشرة قدامه.

_تلات أسر... مفيش بينهم عداوة واضحة، دخل مراد:-

_وصلت لـ حاجة؟!. 

كريم رد من غير ما يرفع عينه:-

_وصلت لحاجة أسوأ.

_إيه؟!؟ 

_إن مفيش حاجة.

_مش فاهم.

_مفيش دافع واضح... مفيش سـ.ـرقة... مفيش عداوة مشتركة... ومفيش حد شاف القـ.ـاتل.

مراد قرب من المكتب:-

_يعني؟!. 

كريم رفع عينه:-

_يعني القـ.ـاتل اختار عشر أشخاص... وإحنا مش عارفين ليه.

سكت شوية، وبعدها قال:-

_هاتلي ملفات كل اللي ليهم سوابق في المنطقة.

_كلهم؟!. 

_كلهم.

بعد نص ساعة، المكتب كان مليان ملفات.

_سرقـ.ـة، مشـ.ـاجرات، مخـ.ـدرات، اعتـ.ـداء، قضايا قديمة، كريم بدأ يفتح ملف ورا التاني، وفضل علىٰ الحال دا لحد ما خلص آخر ملف.

بيبص كريم لـ كومة الورق قدامه، وبعدين سند ضهره على الكرسي وهو بيتنهد وبيقول:-

_مفيش حد.

_يمكن القـ.ـاتل مش مُسجل.

كريم ابتسم ابتسامة بسيطة:-

_أهو دا أول كلام منطقي سمعته منك ساعة ما وصلنا المخـ.ـروبه دي.. 

بص في الساعة، كانت قرب الفجر، ورجع يبص لـ مُراد تاني وبيقول:-

_روح إنتَ يا مراد.

_وإنت؟!. 

_هقعد شوية أراجع الملفات.

_إنت لسه صاحي من امبارح.

_أنا لو نمت دلوقتي هصحى ألاقي عشر جـ.ـرايم جداد فوق دماغي.

_نام يا باشا.

_روح إنت.

خرج مراد وقفل الباب، فضل كريم لوحده، قعد على الكنبة الموجودة في آخر المكتب، حط إيده على عينه.

_عشر ضحـ.ـايا...

همس لنفسه:-

_والقـ.ـاتل لسه حر.

قفل عينه، ثواني... دقايق... كريم غمض عينيه ونام!. 

___________________

الساعة كانت قرب أربعة ونص بالليل.. كريم فتح عينه فجأة، صوت خربشة، سكت.

بص ناحية الباب، مفيش حد، رجع قفل عينه، خربشة تانية، فتح عينه بسرعة، المرة دي الصوت كان أوضح.

وكأنه جاي من ناحية المكتب، قام كريم ببطء وهو بيقول بصوت عالي نسبيًا:-

_مين هناك؟!. 

مفيش رد، اتقدم خطوة، وبعدين خطوة تانية، الصوت وقف، وقف كريم مكانه، وبص ناحية الكرسي اللي قدام مكتبه، كان فاضي، اتنفس وهو بيقول:-

_شكلي تعبان وبدأت أسمع حاجات مش موجودة.. 

ولف تاني علشان يرجع لـ الكنبة، وفجأة... صوت الخربشة.. لف تاني بسُرعة ولكن المرة دي الكُرسي مكَنش فاضي... كان فيه شخص قاعد عليه.

بيتجمد كريم مكانه وهو بيبص لـ الشخص دا، وبعدين بص لـ الملف المفتوح علىٰ مكتبه.. الصورة الموجودة في الملف، نفس الشكل، نفس الملامح.. نفس الملابس اللي متصورة بيها الضـ.ـحية.

رجع كريم خطوة لورا وهو بيقول بصـ.ـدمة:-

_إنت جثــ.ـة!... أنا عندي جثـ.ـة في المكتب!... 

الشخص رفع رأسه ببطء، كريم قرب إيده من سلاحه وهو بيقول:-

_إنت دخلت هنا إزاي؟!

الشخص فضل ساكت، كريم بص ناحية الباب، الباب كان مقفول، رجع يبص ليه من تاني، بيلاقيه بيتكلم وبيقول:-

_إنت بتدور على القـ.ـاتل في ملفات المشتبـ.ـه فيهم... بالمُناسبة أنا واحد من العشرة.

كريم بص لـ الملف اللي قدامه، وبعدين رجع بص لـ الشخص وهو بيقول:-

_مستحيل...

بيبتسم الشخص إبتسامة مُريبه وهو بيقول:-

_إنت لسه مصدق إن اللي حصل كان زي ما قالولك؟!. 

وفجأة... الملف اللي قدام كريم وقع على الأرض لوحده، اتفتحت صفحاته.

لحد ما وقفت عند صفحة واحدة، صفحة كان مكتوب فيها:-

_"التحقيقات الأولية:- لا يوجد تفسير منطقي لكيفية تنفيذ الجـ.ـريمة بالكامل بواسطة شخص واحد". 

كريم قرب من الورقة، وقلب الصفحة، ولكن الصفحة اللي بعدها... كانت فاضية، إلا من جملة واحدة مكتوبة بخط إيد:-

_"لو عايز تعرف مين قـ.ـتلنا... اسأل مين كان آخر واحد شافنا عايشين".. 

بيحط كريم إيده علىٰ راسه وهو بيقول بصدمة:-

_لا أحيه بقى!.