رواية زملاء السكن الفصل الأول بقلم أميرة عادل
خلصت جامعة ورجعت البيت، بعد ما غيرت لبسي روحت المطبخ اجيب مياه.
لقيت البنت اللي معايا في السكن بتغسل هدومها...
ــــ إيه اخبارك يا مي؟!
بصت ليا كام ثانية كدا وبعدها قالت:
ــــ الحمدلله، وأنتِ؟
ــــ الحمدلله كويسة، متنسيش بقا انهاردة يومك في التنضيف.
ــــ وضبت المكان متقلقيش.
بصيت على المطبخ لقيته فعلاً نضيف بس معرفش ليه أول ما دخلت مش شوفته كدا !!
بس تجاهلت الشعور ده واخدت المياه وروحت لأوضتي.
ولما جيه الليل روحت احضر أكل مع واحدة صحبتي، ولما خلصنا روحنا قعدنا في البلكونة وقعدنا نتكلم شوية عن بنات السكن...
ــــ بس الصراحة البنات اللي هنا محترمين وهاديين اوي، خصوصاً مي ولمياء محدش بيسمع صوتهم.
رديت عليها بسخرية:
ــــ مي وليماء تقريباً مش عايشين معانا بالشقة اصلا، مش بشوفهم وهما خارجين للجامعة وبشوفهم بالصدفة في الشقة
وباقي اليوم قافلين على نفسهم الأوضة.
ـــ عادي يمكن بيحبوا الخصوصية اكتر
ـــ ماشي مقولتش حاجة بس أنا تقريباً مش بشوفهم.
ـــ حتى أنا والله، وكمان ملاحظة حاجة كلنا يعني بناكل سوا إلا هما، والمفاجأة ولا مرة شوفتهم دخلوا المطبخ.
ــــ كأنهم مش بياكلوا خالص!!
ــــ معرفش بقا.
وبعدها صحبتي راحت الأوضة تنام شوية، وأنا قعدت افكر مع نفسي.
مي ولمياء اتنين أخوات ومن وقت ما سكنوا معانا ومحدش بيشوفهم خالص وطول اليوم بيقفلوا اوضتهم.
بعد شوية روحت أنام عشان الكلية..
صحيت الصبح على صوت صحبتي وروحنا الكلية...
ولما رجعت أنا وصحبتي من الكلية قالتلي هتروح تجيب أكل وأنا هروح قبلها..
وصلت السكن ، وأنا على سلم العمارة شوفت بنت جمبي بس مش اهتميت ، الغريبة أنها كانت بتمشي ورايا وكأنها بتلازمني!!
بس فجأة لقيتها رمتني من السلم وطلعت حاجة شكلها غريب كدا ودخلـتها بين عينـي!!
صرخت من الصدمة بس هي كانت ملامحها جامدة، شوفتها بالعافية بس مكنتش اعرفها!!
فوقت على صوت صحبتي وهي بتقولي:
ــــ يلا انزلي يا أميرة وصلنا.
بصيت لقيت نفسي لسه في الميكروباص، يعني إللي حصل كان مجرد خيال.
ولما وصلنا عند سوبر ماركت لقيت صحبتي وقفت وبتقولي:
ـــ اسبقيني أنتِ، هجيب الأكل وهاجي..
نفس الحوار اللي حصل ولما روحت البنت قــتــلــتــنــي بس بعدها افتكرت أنه مجرد خيال وروحت السكن قبل صحبي.
طلعت السلم وأنا جسمي بيرتعش وفجأة ظهرت بنت كانت ماشية ورايا!!
وقتها الرعب جرى في قلبي، وسرعت خطواتي بس هي كانت ورايا، بس الحمدلله وصلت الشقة بسلام والغريبة لقيتها دخلت معايا نفس الشقة!!
أنا اعرف كل بنات الشقة ودي أول مرة اشوفها بس يمكن صحبت واحدة من البنات بس المفاجأة لقيتها دخلت أوضة مي ولمياء!!
أنا شوفت مي قبل كدا مكنتش سمرا، ولمياء كانت قصيرة شوية والبنت دي طويلة، ورجحت أنها ممكن تكون صحبتهم!!
و بالليل دخلت المطبخ لقيت البنت اللي شوفتها على السلم بتغسل طبق.
ولما شافتني ابتسمت وقالت:
ـــ ازيك يا أميرة
استغربت أنها عارفة اسمي واعتقد هي لاحظت ده وقالت:
ــــ أنتِ نسيتيني أنا لمياء!!
بصيت ليها بصدمة، ازاي لمياء، أنا شوفت لمياء قبل كدا ومكنتش سمرا ولا طويلة كدا !!
مردتش عليها وروحت اوضتي.
مسكت الموبايل وبعت لصحبتي مريم :
ـــ مريم، عاوزة أقولك حاجة غريبة!!
دقايق ولقيت مريم ردت عليا:
ـــ احكي فيه ايه؟!
ـــ في بنتين معايا في السكن مش بحسهم بني آدمين!!
ـــ إزاي؟!
وحكيت ليها كل حاجة بالتفاصيل...
بعدها ردت عليا بحاجة خلتني اشك في نفسي:
ـــ أنتِ متأكدة في بنتين عندك اسمهم مي ولمياء؟
بصيت لسؤالها بتردد وأنا بعيد الأحداث كلها وجاوبت:
ـــ اكيد طبعا، وفي بنت معايا في السكن تعرفهم.
ـــ مين البنت دي؟!
ـــ تصدقي نسيت اسمها!!
ـــ أميرة روحي نامي شوية يمكن الإرهاق مأثر عليكِ
فهمت أنها قالت ده لما معرفتش اسم البنت اللي معايا وحللت البنتين من خيالي..
قفلت مع صحبتي بعد مناهدة طويلة وروحت نمت.
صحيت على آخر الليل ودخلت المطبخ اشرب ميا
شوفت لمياء واقفة عند البوتجاز وصوت نفسها عالي، قربت منها وشوفت أبشــع مـنـــظـــر فـي حـيـاتــي...
