رواية جريمة قتل الاب وزوجتة الفصل الأول بقلم ياسر عوده
السلام عليكم، عاملين ايه انا مقدم برنامج جرائم حقيقيه اسامه ابراهيم، طبعا انتم متعودين اني اجيب ضيف للبرنامج بتاعي يحكلكم عن جرائم غريبه حصلت، بس زي ما انتم عارفين ان اوقات الدنيا مابتمشيش زي ما الواحد مخطط، ودا اللى حصل معايا بالظبط في حلقه النهارده، انا كنت نامي استضيف واحد من الاشخاص اللى شغلهم مرتبط بالجرائم، كان واحد من اللى شغالين في هيئه المعمل الجنائي، ودا من الاماكن المهمه اللى بتساعد على اكتشاف اللغاز الجريمه، بس اللى حصل وكان غير المتوقع، ان النهارده الصبح لما كنت لسه نايم سمعت صوت التليفون.
-ايوه مين معايا؟
-ايوه يا استاذ اسامه، انا محسن اللى شغال معاك في اعداد البرنامج.
-ايوه يا محسن، بتتصل بيا بدري كده ليه؟
-انا عرفت خبر كنت محتاج اقولهولك يا استاذ اسامه.
-خبر ايه، اتكلم على طول انا مش فاضي للالغاز بتعتك دي، حصل ايه؟
-الضيف بتاع النهارده مش هيجي البرنامج.
وقتها قومت مفزوع من مكاني وانا متعصب وقولتله:
-ايه الكلام الفارغ اللى انت بتقوله ده، مافيش حاجه اسمها مش هيجي، احنا خلاص اعلنا عن الحلقه، انا لما صدقت البرنامج بقى ليه جمهور ومتابعين بيستنوه، كلمه وقوله انه لازم يجي، انت فاهم.
-ماينفعش يا استاذ.
رديت عليه بعصبيه اكتر وقولتله:
-ماينفعش ليه، مافيش حاجه تمنعه انه يجي غير الموت، انت فاهم.
-هو دا اللى حصل يا استاذ، الضيف مات فعلا.
صدمه الرد كانت كبيره اوي عليا، سكت لحظات بحاول استوعب الكلام اللى سمعته.
-مات، ازاي؟، وامتي؟
-النهارده الفجر تقريبا، مات بالسكته القلبيه.
-انا لله وانا اليه راجعون، وايه العمل دلوقتي؟
-تحب حضرتك ننزل بيان نعتذر فيه عن حلقه النهارده؟
-الرتش هيقع وانا ماعنديش استعداد اخسر كل الانجاز اللى حصل انت فاهم.
-وايه الحل يا استاذ اسامه، الضيف مش جاي.
-اقفل انا هتصرف، بس كل حاجه تفضل زي ماهي، البرنامج هيتذاع في معاده، بلغ كل التيم بالكلام ده فاهم.
-حاضر يا استاذ.
وفعلا قفلت الاتصال مع محسن وكنت بفكر اتصرف ازاي، انا محتاج ضيف مكان اللى مات، بس انا ماينفعش اجيب أي حد وخلاص، انا عاوز حد يعمل حلقه قويه.
وبعد تفكير طويل قررت اتصل على العقيد فريد عز الدين، ودا صديق قديم ليا، واتكلمت معاه:
-ايوه يا سياده العقيد، انا واقع في مشكله ومافيش حد هيحلها غيرك.
-خير يا اسامه، حصل ايه؟
-ضيف الحلقه بتاعت النهارده مات، ومش عارف اعمل ايه، محتاج بديل ليه بأسرع وقت.
وقتها هو سكت ثواني يفكر، وبعدها لقيته بيقولي:
-ماتقلقش انا عندي حل او بديل للضيف بتاعك.
-الحقني يا باشا مين هو؟
-الدكتوره هاله سراج.
-مين الدكتوره هاله؟
-دي وحده من اشطر العاملين في هيئه المعمل الجنائي والادله الجنائيه، واكيد هتقدر تحل الازمه اللى انت فيها.
-الله ينور يا باشا، بس انا معرفش لو هتقبل انها تكون ضيفه لحلقه النهارده ولا لا؟
-ماتشغلش بالك، انا هتكلم معاها وهخليها تجيلك استديو الاذاعه.
-انا عاجز عن الشكر يا فندم.
-لا ابدا يا اسامه مافيش حاجه، وهبقى من ضمن المستمعين لـ حلقه النهارده.
-شكرا يا فندم.
وقفلت الاتصال مع سياده العقيد، وبعدها اتصلت بالاعداد بتاع البرنامج بتاعي وعرفتهم ان في ضيفه هتيجي للحلقه بتاعت النهارده، وابتديت اجهز نفسي للحلقه الجديده من البرنامج.
وقبل اذاعه الحلق هجت الدكتوره هاله، واستقبلتها بنفسي وشكرتها على انقاذها للبرنامج، وردت وقالت:
-انا اول لما كلمني العقيد فريد وافقت على طول، الحقيقه انا من متابعين البرنامج بتاعك يا استاذ اسامه.
-دي حاجه تشرفني يا دكتوره، وباذن الله هتكون حلقه ممتاذخ.
وجه وقت التسجيل، وكالعاده قولت الدباجه بتعتي:
-السلام عليكم ورحمه الله وبركاتهخ، الساده المستمعين الاعزاء، اهلا بيكم في حلقه جديده من برنامجكم جرائم حقيقيه، الحقيقه انكم وحشتوني من اخر مره كنت معاكم فيها، والنهارده حلقه مميزه، علشان معانا ضيفه مميزه، ودي اول مره نستضيف ضيفه من الجنس الناعم، احب بأسمي واسمكم ارحب بالدكتوره هاله سراج، دكتوره المعمل الجنائي والادله الجنائيه.
-اهلا بيكي يا دكتوره، منوره البرنامج.
-اهلا بيك يا استاذ اسامه، البرنامج منور بحضرتك وبكل المستمعين.
-مش عاوز اطول على المستمعين اللى قاعدين دلوقتي، وسامع واحد فيهم بيقول اخلص خلينا نسمع جريمه النهارده، وعلشان كده ممكن تتفضلي حضرتك وتقولنا ايه الجريمه اللى هتتكلمي عليها النهارده.
-اوي اوي طبعا، النهارده هحكي عن جريمه انا كنت من ضمن الفريق اللى اشتغل عليها، والحقيقه هي كانت جريمه محيره شويه.
-كلنا مستمعين ليكي يا دكتوره.
-البدايه لما جه اتصال لـ قسم الشرطه، الاتصال كان من شخص بيقول فيه:
-الحقوني، في اكياس عندي في المزرعه فيها لحم بشري.
كان الاتصال غريب ومش مفهوم، والمشكله ان اللى متصل ماكنش بيتكلم بصوره صحيحه، كان واضح انه في حاله رعب او فزع شديد وماكنش قادر يتمالك نفسه، وبالعفيه الشرطي اللى رد عليه عرف عنوان المزرعه فين.
بعدها الشرطي بلغ القسم علشان تخرج قوه من الشرطه وعلى رأسهم رئيس المباحث، وبمجرد انهم وصلوا للعنوان اللى فيه البلاغ، لقوا الراجل اللى مبلغ قاعد قدام باب المزرعه وفي حاله غريبه، كان زي اللى شاف هلاوس مرعبه.
قرب منه رئيس المباحث وسأله:
-انت اللى بلغت؟
رد عليه وكان لسانه تقيل ومش بيتكلم كويس وقاله:
-ايوه.
-اسمك ايه؟
-صادق عزوز.
-طيب فين الاكياس يا صادق؟
-جوه في المزرعه.
وقتها رئيس المباحث طلب من واحد من رجال الشرطه يفضل مع صادق لغايه لما توصل الاسعاف، وطلب من باقي القوه انهم يدخلوا.
ودخلت الشرطه المزرعه ولقوا الاكياس اللى اتبلغ عنها، كانت عباره عن شنط سوده حوالي 25 شنطه تقريبا، وكانت ريحه طالعه منهم صعبه اوي، ولما قرب رئيس المباحث وفتح الشنطه اتأكد من كلام صادق، وقتها قال للمساعد بتاعه:
-استعجلنا المعمل الجنائي والطب الشرعي بسرعه.
-حاضر يا فندم.
وفعلا وقتها جالنا اتصال بمكان البلاغ، ووقتها رئيسي طلب مني اروح مع باقي فريق المعمل الجنائي، ولما وصلت للمكان ابتديت انا وباقي الفريق نفحص المكان كويس.
اول حاجه احنا بنعملها رفع البصمات لو موجوده، وكمان بنفحص كل حاجه موجوده في المكان، وحتى الموقع نفسه بنفحصه.
بعد مرور ساعه على وجودنا لقيت رئيس المباحث جيلي واتكلم معايا وقالي:
-ممكن تعرفيني يا دكتوره ايه المعلومات اللى وصلتولها عن الجريمه.
-احنا رفعنا البصمات من على الشنط، وكمان حاولنا نوصل لبصمات الجثث.
-انتي بتقولي جثث، يعني مش جثه وحده؟
-لا طبعا، من عدد الشنط دوول اقل حاجه جثتين.
-يمكن جثه وحده بس المجني عليه كان ضخم وثمين؟
-لا انا متأكده من اللى بقولهولك، اولا دوول تقريبا 25 شنطه، وكل شنطه حوالي 6 كيلو او ازيد بحاجه بسيطه، ومن شكل صوابع اليد اللى لقتها واضح ان اصحاب الجثث اجسامهم ماكنتش ضخمه ولا حاجه، وكمان عدد الصوابع اللى لقناها بتدول انهم جثتين على اقل تقدير.
-تمام يا دكتوره، يعني احنا قدام جريمتين قتل.
-فعلا، وكمان جريمتين كلهم بشاعه، الجثتين دوول اتقطعوا لقطع صغيره جدا بشكل محترف زي شغل الجزارين تقريبا، كل قطعه اقل من كيلو وازيد من نصف كيلو، وعلشان يقدر يقطع الجسدين بالشكل ده محتاج مهاره وكمان ادوات محدده زي ادوات الجزاره.
-من شكل صاحب المزرعه والحاله اللى هو فيها اعتقد انه مالهوش دعوه بالجريمه دي، انتي ايه رأيك؟
-اولا الجريمه تمت في مكان تاني، واتوقع كده انه تمت في مكان بعيد عن هنا لان مافيش أي بقع دم على الارض خالص، والاهم من كده ان عمليه التقطيع اللى حصلت بتاخد وقت، وماينفعش تتعمل في مكان مكشوف زي ده ممكن يتكشف.
-تمام شكرا يا دكتوره.
