رواية فراشة في جحر الافاعي الفصل الأول بقلم تراتيل
تعـال اتمرجح بروحي
اجـيبن خلگ مامتعوب اناغيك بطواريـه
واصوغـن من ثكـل آهـي
ضحكة تعانـد آه النـاي تكتل كـل نواعيـه
وملحـة حچايـة البطران
والـمالاح عـبرة ضيج وحـده بكـل ليـاليـه
وأمد شعري على اجتافك واطـرز اسوالفي بعينـك
واحچيـهاا بدفـو النـيه
تعـال وگلي ألك محتـام
اغنـيلك دفـو النواب مـن تصيـده ترچـيه
وأغفي مسودنات الـظـن
اگـابل وجهك المتعوب وألـّولي بمستحـه بنـيه
وأتيهك بين الحچايات
واسمـّعلك المامسمـوع بـس بنـيـّتك جيه
اكـسر خاطر الوهواس واموت
بيـهَ چلمة ليش!
بس ماكو أثـر نيـه تعال المايلوحك شـوف
ماوچـد حلاتـه الضيـم
يتـيهَ بـ آه يعثـر بيك تاليـه.
••••••••••••••••••••••••••••••••••
فقد الام صعب حيل وانه طفلة ما تعرف كل شيء
ابوي ما اتذكر منو شيء بقيت تحت جناح اخوي
بس يا اخو مابقت براس الاخوان محنة من ورى النسوان
كلشي صار قصرا عليه ومالي كلمة زمناتنه تختلف حيل البنية الي ترفض شيء هاي مو زينة
شحال لو رفضت عريس هو جايبو ومن طرف زوجتو
مرت اخوية زوجتني بعمر صغير وبين ناس
ما جنت اعرف بحياتهم شي فجأة لكيتني بوسط
ناس عرب حياتهم تختلف عن حياتي ماعندهم
شي اسمة مرأة ما يفهمون بلحب والتفاهم
المرأة عبارة عن آلة للعمل والأنجاب
عندهم الظلم سيد الساحة ناس تحقد على ناس
ناس تحچي على ناس، ناس تاكل بلحم ناس
اني جنت حيل ضعيفة شخصية ومااكدر ابد
افرض نفسي دوم حقي ضايع بينهم
الضعيف ينوكل واني انأكلت بنصهم
ام زوجي جانت تريد تطلعلي گلب بس الي صار
دمرتني ودفنتني بهل حياة خلتني مثل الروبوت
بس اشتغل مالحك النفسي ولا الحياتي ولا حتى
الزوجي...
زوجي!!!!؟
هذا عوضني بس بطريقة مختلفة عوضني عن
الظلم ببيت اهلي خلاني اشوفة شي مخيف
اشرد من عندو بكل الطرق اسوي كلشي يطلبو
وقبل ما يطلبو حتى اتجنب الغلط والأهانه
لو گالي ذبي روحج بلشط رحت وذبيتها حتى
ما انضرب وانهان نفسي عزيزة بس تجردت مني
حتى عزة نفسي...
بداية زواجي مااعرف اي شي بس يعلموني
بطريقتهم الخاصة الي مليانه ضرب اهاين
من خوات زوجي ومن امه علموني احش الكاع
احلب غنم نسرح بلحلال مالهم وماكو شي
اسمه تعبت لو مليت وهما يعرفون ظلم مرة
اخوية الي واخاف ارجع الها لان هم رجعت وهم مطلقة هيه بدون كلشي تكرهني بقيت اطيعهم
واسمع الحجيهم بلحرف الواحد واتحمل كلشي
مرة من المرات خلصت كنس مكان الدواب مالهم
واجتني الأوامر حتى اروح احلب الغنم
واني اسبوع ما مر على زواجي كعدت احلب بيها
وكل شوي دايسه على ايدي لو زاكطتني
روحي تشوغ بس مااكدر احجي شي ابقى
بس ابچي وحدي
بس خلصت حطيت السطل على الميز بلمطبخ
طلعت انجانة الطحين
صگبة: عجني وروحي شغلي تنور الطين
تا تخبزين
تركيه: بس عمه تعبت
الغلط الي صرت اسمعه اسوء من غلط مرة
اخوي ودتني دفرات للتنور وغصبا ما عليه
عجنت وخبزت وبس اجه زوجي خلته يسوي
الليل الأكشر عليه
مشت حياتي على هيج منوال من يوم
ما صرت چنة ببيتهم ليوم ما حبلت فرحت
گلت وهاي اني راح اتعزز عدهم بس
ياريتني ما حسبت هيج حساب.
صگبة: تركيه تركيه ثول ما تسمعين؟
تركيه: هلا عمة لا والله بس هينه جنت
كاعدة بلحوش روحي لايعة ودايخة
بلكن اروح للحبوبة تشوفني شبية
صگبة: عوووع شنهي چنچ على حبوبة
عمه حتى عمه شمالج چنچ صلّ ما بيج شي
تتعايرين كومي يلا كومي حشي البستان
تا نشوف شنسوي غدة راح تجي زلامنه
كاتلهم الجوع شننطيهم حوّ؟
تركيه: بس عمه يا حش يا بستان
اني مااكدر اكوم قبل شوية حلبت الهايشة
وظهري نكسر من علفها وحلبها
صگبة: خااايبة وترادديني همينه ولجج
كومي لا اكسر ظهرج هسه كومي
تركيه
وكفت لفيت وجهي بلشال مطلعة بس عيوني
وشديت على خصري العباية چبدي تلوع
التنسا حيل ماذيتني والجو حار برا وحتلو
ماكو شي ينحش تطلعني المهم تكرب عليه
رحت للبستان وبطني مغصتني عليَّ كم شهر من
الحمل ونساتي مارايحة وما ترضى اروح حبوبة
لو تجيني للبيت ومتحلفين بيه اذا ما جبت ولد
يزوجون زوجي ماعندي حموين كبار بعدهم صغار
ويدكون وينوحون على الولد
لميت هل موجود من البستان وحشيت علف
من الحشيش الموجود حتى بيها وبلياها مااضل
اروح وارد كل شويه
لحد يوم ولادتي جبت وطلعت بنية لو هيه
قامت القيامة صرت اسمع الحجي اشكال الوان
عليه وعلى اهلي واني روحي تحترك ودوم تردد
جملة
صكبة: مكروها وجابت بنية كملت والله كملت
مااريد اشوفج ولا اشوفها اصلا
حجيها يحرك بگلبي بس مجبروة اسكت واتحمل كلشي جنت بس الخاطر نفسي هسه الخاطر
بنتي همينه
عمري ما كضبت فلوس بايدي شكد اشتغل ويبيعون ويشترون وكلشي يسون بس ميتحيل اكضب
فلس بايدي كلشي بايدهم ويكصولنه اللبس
كل موسم مرة وحدة الي والبنتي هو صار
يضوج من العيشة مال الريف اخذنه وعزل بلمدينة
وهم فرحت گلت اجة الفرج يتركيه طلعتي
بس يا فرحة ما دامت زاد ما نقص عليه
صار مثل الشيطان الرجيم عليه وعلى بنته
وعبالي اخلص من الكراب لا صارو كل صيف
يصير وكت حصادهم يدزون عليَّ اروح ورجلي
فوك ركبتي احش واحلب وينعاد كلشي ولا
من يحمد ولا من يشكر، الى ان بيوم اجه اخو
الزوجي وكاله يريد يتزوج زوجي فتحله الباب وكاله تعال اگعد وياي اخذ بنت مدينة ومثقفة ودارسة
ما تتقارن بيه ابد شايفة روحها وتتآمر وتنهي
ورجلها يباوع الحلگها جابها يمنه حتى امه ما تشوفها الضيم الشفته اني وصار يدللها واني ساكته
ومشاكل 24 ساعة جنت احاول ماانطي مجال لان
بس اسكت كلهم يدورون عليه وياكلوني اكل
وهو شد وياها بحيث كل يوم عركه ويا رجلي بس رجلها يسكتها ويصبرها ويرجع زوجي يدور عليه
ينگ ويضغط بحيث روحي راحت من الضغط
الي صرت اشوفه من كل الجهات
كلما افكر افكار سوداويه اشوف بنتي گدامي تمشي وطفر وتلعب ابطل احضنها وابچي مابيدي شي
وحدي احارب حتى اعيش لا ام، لا اب، لا اخ كفو
كل يوم مشكلة بين رجلي واخو صارو
يتعاركون من ورى مرة حماي وابقى افاكك بيهم
وكل يوم جايتني ضربة شكل الى ان بطلت ادخل
واعوفهم يتمالخون بس اشوفهم تعاركو اخذ جيهان
وادخل للغرفة لحد ما يجي يطلع عصبيتة بينه
بقينة على هل حال ثلاث سنين وبس صار عمر
جيهان 6 سنوات سجلتها بلمدرسة بلمدينة
جنت حيل فرحانة بيها اكعد الصبح امشطلها
والبسها واوديها للمدرسة قريبة على بيتنه بيت
حماي عزلو خفت المشاكل بقينه بس اني ويا
وهذا شي روتيني وعادي صار بلنسبة الي اتحمل
كملت اول سنتين واجاني بسالفة جديدة
محمود: اكلج باجر راح ابيع البيت ونرد
للقرية
تركيه: شلون شلون ليش؟؟
محمود: شو تجادلين؟ نسيتي روحج چنچ؟
بلعت ريگي من شفته گام هاجم عليه
والغصة ببلعومي والنار الحركت روحي صارت تطلع
من عيوني راح ارجع للكراب المستمر راح ارجع
النفس النقطة الي بلكوة خلصت منها
فعلا خلال اسبوع صفة كلشي وردينه للقرية
عزلنه بيت صغير وجاب حيوانات ومواشي
وجبرني ارجع اربي واحلب واحش بحيث انهلكت من الشغل والمكان مگطوع حتى مابي خدمات نفس
مكان اهله شوي عنهم بس مو نفس مكانهم
بيت حماي قريب شوي علينه
حتى جيهان بطلها من المدرسة
المدة سنتين وكل يوم بهل سنتين
تجي تسألني
جيهان: ماما شوكت ارجع للمدرسة؟
تركيه: يماما هو لو بايدي اليوم اوديج
قبل باجر بس شبيدي
جيهان: ليش ابوي هيج يسوي ليش هو هيج؟
تركيه: لا تحچين هيج لا يسمعج يمة
لا تجيبين الروحج الحچاية خاف بعدين يضربج
جيهان: بس اني مااخاف منه
تحچي وياي ودخل من الباب معصب لزمت
گلبي خاف سمعها جريتها بصفي حتى خاف يضربها
احاميلها
شمر الغراض الي باديه وحجة بدون ما يباوع
الوجهي
محمود: اني باجر راح اخطب اريد اتزوج
اريد جهال انتِ ما چنچ راح تخلفين بعد
حچاها بس نامت سهم كلماته بگلبي بعد كل
هل تعب والصبر ويا هيج تعبي يهون بهل سهولة
ومالي حق اعترض لو ازعل لان بلحالتين وين اروح
هزيت راسي وگمت وبيومها نمت وروحي
محترگة بس بقيت وهم دست على روحي الخاطر بنتي للصبح ما شافن عيوني النوم كعد للشغل
اول شي كلتلهيا
تركيه: بتك راح هواي من عمرها راح
ارجعها للمدرسة صار عمرها 10 سنين وهيه
مكملة بس ثاني ابتدائي
هز راسة بـ اي وطلع
كمل معاملة نقلها للقرية والتهيت وياها
وهو ملتهي يجهز بعرسة امه تسوي بعنادي وعود
تحرك بگلبي تجيب وتجهز ومكيفة وتتامر
عليه سوي هاي وردي ذيج وتجيب بگج
ملابس العروس وتفردشهن كدامي وتكلي عزلي
ملابسها بكنتورة، واني اسوي روحي مامهتمه
صدگ راح وتزوج عليه وبلعتها وسكتت
امه طبعا فرحانه راحت اخذت بت اخوها
وجابها وكعدها يمي عمتي صارت كل يوم تجي
ويسممون بدني هيه وياها بس هم مشيتها
رغم شكد اتأذيني بلأخص من تجي عمتي
بس ما حقدت عليها لان من تروح شوي تصير اهون
صكبة: بت اخوي المعدلة بت المعدل
بعد روحي شلونج شخبارج خو ما تعبين
هاي بت الفكور ما تتعبج
سهام: لا لا عمة حمودي هم مداريني
ما يخليني اكوم وتردين الصدك يمكن
اني حامل اريد اروح للجدة تفحصني
لان نفسي لايعه
ماتحملت عمتي تبقة بشخصية الحبابة ونبزت
وحچت بسرعة
صگبة: عمت دارج كون شلحكتي هاي
تحبلين بعدج اسبوعين ماصارلج
وجه سهام كام ينطي اللوان واني ضحكت
وضميت الضحكة وماشوف غير الدولكة ستيل
نشمرت صوبي شوي وتلوحني كمت رايحه
للمطبخ وبعدني اضحك واسمعها دردم عليه
وسهام كلبت خلقتها لان تفشلت
صگبة: باجر انه اخذج وانشوف كون صدك وحامل
حتى ادوس بكلب ذولاك الناس الي يضحكون
تركيه: عليمن يا عمة بلعكس راح افرح
لان هذا بزر رجلي يعني بزري
صگبة: برررد اي والله بزرها منين اجه بزرج
شكول شكول وتحچي بصدر رحب لون بيج حظ
جان خلفتي بس هم فكر وهم عاله وهم عاگر
انهضمت عفتهن ورحت كملت شغلي
وصدك ثاني يوم خذتها وطلعت حامل
وتسع شهور هيه گاضيتها تدلل عليه واني اكول
بسيطة تهون مابيها شي في سبيل الله خلي اطول بالي ومابقة شي وتجيب
اخر ايام حملها دخلت شهرها وما ترضى تسوي سونار حتى تتفاجاة وهيه تمشي وتصيح ولد
اني احس بيه ولد رجلي طاير ومحضر
الچكليت ويفكر شلون يذبح ويصلخ
ويوزع اذا اجا ولد
بليل كملت كل شغلي وصاحتني
سهام: عفية تركية بطني تمغصني ما تسويلي
زهورات داغنبات شو شني خلشرب خاف
مستبردة
تركيه: خاف عندج ولادة؟
سهام: ها ماادري بس كلش بطني توجعني
ورجلية يمكن صخونة وبرد لان سبحت
والجو بارد
تركيه: اي يا عيني شني متوازية تسبحين
بهل برد يگص گص هسه اگوم اسويلج
شغلت الچولة بلحمام ورحت سويتلها
داغنبات وهيل حتى تشرب ويروح البرد
انطيتهيا تشرب ورحت طببت جيهان للحمام وبلشت
القوانة مال كل مره اسبحها بيها
جيهان: يمة ترا صرت چبيرة شنو تسبحيني
تركيه: يمه ادري بيج چبيرة بس بعدج
بنتي وتبقين بعيني صغيرة
كملت مشطتلها ونيمتها محضرة غراض
الدوام يم راسها ملابسها وجنطتها
گعدت الفجر للكاع حشيت منها ووكلت الرعيان
رجعت لكيت سهام كاعده تلوب سويتلهة ريوگ
والجيهان هم بس وجها ملبوگ اصفر اخضر
وديتها للمدرسة رجعت لكيتها تلوج لازمة بطنها وتفتر گعدت محمود راح جاب امه واجه شافت
وضعها هيج كالت هاي عدها ولادة
صدك خذناها ورحنه للمستشفى البت بس
تطلگ تعسرت ولادتها من ال7 الصبح
لل4 العصر هيه بس تطلگ ما جابت لمن
طلعت رواحتنه
كلها فرحت بس ما دامت فرحتهم من شافوها
بنية الوجوه كلها تكلبت محد بعد كدر يحجي
اله اني طرت من الفرح الطفلة قطعة قمر
سمينه وبيضة اريد بس الزمها واشيلها
محرومة وامنيتي الطفل وشفتها بعد
جبناها ورجعنه للبيت شايلتها بادية يرجفن
خاف أأذيها خاف توكع وكل شوي الزم ايدها
عمتي صدت وجها عن سهام ماعاجبها
ومحمود شال چكليتاتة ضمهن حتى ما طشهن
محد فرحان غيري بيناتهم
سهام: ام جيهان فدوة فرشيلي يم الشباك خطبلي
شمس بردانه كلش
تركيه: خاف يطبلج هوى بارد هاي الچولة يمج
وراح اطلعلج بطانيتين
سهام: لا لا وياهن خليني يم الشباك
اريد ادفى بعد بردانه حيل بردانه
كمت اغطي بيها وادثرها ورحت اسويلها
شوربة اجتي مرت حماي وعمتي يمها
جيهان تكمز تريد تشيل الطفلة اجة محمود
محمود: تعالي صبيلي غدة خلطلع للشغل
بسرعة
تركيه: كول الحمدلله شبيك كالب وجهك
حرام عليكم المكرودة حتى متخربطة
وبعدهي نفاس
خزرني ونتر بيه حتىاستعجل اصبله رحت وديت
الشوربة وكلتها شوية وهيه كل شوية تكول
سهام: عمة خو ما ضجتي لان جبت بنية
والله اجيب بعد ولد محمود وين خو ما ضاج
سكتتها شوية وبقت ترجف ربع ساعه و البت صار وجها ابيض شاحب وتصيح بردانه غطوني
عفت يمها عمتي ومرت حماي ورحت صحت
المحمود اجه شافها صفن عليها شوية واخذ
سويچه وطلع اختفه
گلبي خمشني بقت تصيح فركولي
انفرك بجسمها اديها ورجليها اجتي جهال
تريد تفرك برجلها داست على الدوشگ نباوع رجلها
حمرة غركانه دم
لطمت وجهي ومرت حماي صرخت هيه
وعمتي كامن وحده تنردم بوحدة ركض دزيت
جيهان تروح تصيح الحماي عنده سيارة بدي
اجه حتارينه شلون ناخذها سهام فاقدة
طلعت بطانيه وشلناها اني ويا بلبطانيه
حطيناها بلبدي واخذناها للمستشفى بقت مرة حماي بلبيت يم جيهان واني وعمتي رحنه وياها كعدت يمها خليت راسها بحضني
الطريق كله هيه تشهگ وتعصر بايدي....
