رواية المربية التخينة والمليونير الفصل الاول
سوزي كانت قاعده على السرير بتلعب في شعرها وبهمس قالت
سوزي
لا بقا المره دى انا مش همشي من هنا كل مره ياخد اللى عاوزة ترميني المره دى لازم ليه وقفه انا مش هسيب العز ده كله وارجع للفقر تاني حتى لو مطلق وعنده عيل مش مهم
ادم من وراها قال
ادم
انت لسه قاعده ليه هو انت مش خدتي حسابك غوري من هنا
سوزي
برده مش هتفكر في موضوعي انا راضيه انك تكتب عليا حتى لو عرفي مش نفسك تخاوي ابنك ويكونوا سند لبعض
ادم
وانا لما افكر اخاوي ابني هيكون من واحده بتلف على كل واحد شويه واللي يدفع اكتر تكمل معاه بص يا سوزي انا عارف كويس قوي أنتي معايا عشان ايه فالمسلسل الحمضان اللي انتي بتعمليه ده ولا هياكل معايا انا هدخل اخد دش سريع اطلع الاقيكى مشيتي وسابها ودخل
سوزي حطت ايديها على قلبها وقالت
سوزي
مز ابن الايه انا مش عارفه هي كانت عاميه ولا ايه علشان تخونه ده يتخان ده دا مال و جمال وأملاك يااااانيي انا مستحيل اسيبك يا ادم و بمكر قالت هو انا لو دخلت شاركته واخذت معاه دش مش يمكن ألين قلبه شويه من ناحيتي
ولسه هتدخل سمعت جرس الباب فتحته وبصت للست اللي قدامها وقالت
سوزى
انا عارفه ان هو نسوانجي وبيحب يغير كل يوم بنت بس ما اعرفش ان هو ليه في الست الكركوبه
سعاد
انتى مين بقا يا قطه ولابسه قميص ادم ليه و ايه المنظر اللي انت طالعه بيه ده
سوزى
معلش اصل هدومي اتوسخت في ادم حب يديني هدوم من عنده وبسخريه قالت يعني واحده شعرها منكوش والميك اب بتاعها بايظ ولابسه هدوم كده كانت بتعمل ايه يعني اكيد كنا بنلعب بعروسه وعريس
وغمزت بعينيها
سعاد زقتها ودخلت وقالت
سعاد
لا بقى كده كتير هو عمال يرمرم كده ليه ده انا لازم اقفله ادم انت فين اطلعلي هنا
سوزى شدتها دراعها ووقفت قدامها وقالت
سوزي
خدي هنا انتي رايحه فين هو انتي فاكراها وكاله من غير بواب وبعدين يا اختي ادم ده مش في سنك عشان تحطي عينك عليه روحي شوفي لك راجل كبير والعبوا مع بعض
ادم طلع على الصوت واتفاجأ ب سوزى موجوده وبغيظ قال
انتي لسه هنا بتعملي ايه وصوتك عالى كده ليه هو انا مش قولتلك اطلعي بره واقفه عندك ليه
سوزي قربت منه وبدلع قالت
سوزي
على فكره انا اقدر ابسطك اكتر منها دي مفيهاش نفس اصلا لكن انا رهن اشارتك وكمان هرقص لك على هيفاء وهبي وهي بتغني بوس الواوا بس طرقها بره
سعاد
بوس الواوا يا فرحه امك بيك ده انت ما عندكش دم قسما بالله يا ادم لما طلعت بره حالا لأكن جيباها من شعرها
سوزى
ما تهدي يا وليه انت في ايه مالك داخله حاميه كده ليه تعبانه يا اختي روحي شوفي لك واحد غيره شطبنا يلا اتكلي اصل انا مشغوله مع دومي
وبصت على ادم بغيظ وقالت
إنت ايه اللي عاجبك فيها دي يعني دي واحده رجلها والقبر وطالما بتحب الكيرفي كده اتخنلك يا اخويا ما عنديش مانع هو انت كنت بتطردني علشانها
ادم
اخرسي يا حيوانه وبطلى تهلفطى بالكلام انتى عارفة مين دى أصلا اللى انتى عماله تغلطى فيها
سعاد
والله ما تتعب نفسك ووقفت قدام سوزي وقالت انت فاكراني زيك بتسكع مع الرجاله واغيرهم زي ما بغير الجزمه لا يا حبيبتي انا أمه يعني ادم بيكون ابني غوري بقى من هنا عشان عايزه اتكلم مع ابني لوحدنا على انفراد
سوزي
هو انت مش قايلي ان امك تعبانه في المستشفى وهتموت ومحتاج حد يداوي جروحك
ادم شدها على برا وقفل الباب في وشها وبغيظ قال
ادم
غوري بقى الله يخربيتك هو ناقص وجع دماغ
سعاد
مش عيب على سنك يا راجل تعمل الحركات القرعه دى انت ياض طالع زفر لمين بقالك اسبوع مش دخلت الفيلا ولا أتصلت حتى تطمن على ابنك
ادم
يووووه يا ماما هو انتى مش بتزهقي نفس الاسطوانه كل ما تشوفي خلقتي وبعدين ابني ماله ده عايش في مستوى غيره يحلم بيه
سعاد
ابنك بقاله اسبوع مش بياكل وبيسال عليك وتعب والدكتور قال انه محتاج رعايه واهتمام هتنضج امتى وتربي ابنك بدل ما يطلع فلاتي زيك
ادم
يعني انت جيتي في جمل يعني هشوف مربيه للبيه يمكن تحلوا عن سمايا وتسيبوني اعيش بالطريقه اللي تعجبني
سعاد
هو انت يا ابني مش خايف على سمعتك هتضيع تعب وشقى ابوك الله يرحمه عشان خاطر نزواتك مش كفايه اللي منها لله سابت ابنها ومشيت قسما بالله يا ادم لو ما اتظبطت واهتميت بابنك لاسحب منك الشركه ومش هدخلك الفيلا تاني ابقى وريني هتصرف على القطط اللي انت بتجيبهم كل شويه البيت منين
ادم
فيلا ايه اللي انا مش هدخلها ده بيتي وبتاعتي وشغل لوي الدراع ده مش معايا وان كان على الشركه فانا مهتم بها كويس جدا ومسمعه في السوق كله فيها ايه لما انبسط شويه واقفالي على الواحده ليه انا مش بنت
سعاد
الفيلا باسمي عين امك ومش تنسى ان انا معايا توكيل اعلى منك في امور الشركه ممكن اسلمها لغيرك بسهوله يديرها انا مش هسمح ان حفيدي يطلع زيك ولا انه ياخذ طباعه من امه الخاينه فاكر ولا افكرك
ادم قعد على الكرسي وحط ايده على راسه وبغيظ قال
ادم
طب هى واحده زباله قفشتها مع صاحبي في اوضه نومي واتطلقنا وانتهينا ليه على طول ربطانى بيها وبدا يفتكر اللي حصل
فلااااش بااااك
فى فيلا الجارحي نغم كانت فى الاوضه وسرحانه فى عمر اللى بيلبس قميصه وقالت
نغم
تعرف انك الوحيد اللى بحس معاه انى دخلت الجنه خلاص على الرغم من أنك باد بوي بس ذوقى وضحكت بدلع
عمر
تعرفي ان ايه الحاجه الوحيده اللي انا بحسد ادم عليها هي انت يعني واحده نغشه وجميله وعندك امكانيات تحل من على حبل المشنقه ومع ذلك حاسس ان هو بيهملك
نغم بتلعب في الكرفته بتاعته وبغل قالت
نغم
كله من امه العقربه كل اللي عايزاه ولي العهد عشان يورث المولد دا لكن مشاعري واحتياجاتي لازم تكون على مزاجهم مش على مزاجي انا
عمر
ولا يهمك يا جميل وقت ما تطلبيني هتلاقيني شبيك لبيك عمر بين ايديكي هو حد يدوق الملبن ويصوم عنه
بس انا خايف ادم يعرف بعلاقتي معاكي ما تطلقي منه ونتجوز انا وانت وطز في الفلوس
نغم
لا طبعا ادم موجود علشان احتياجاتى الماديه وحاطط ايديها حوالين رقبته وقالت اما انت موجود علشان احتياجاتى العاطفيه ما انا قلت لك انا عاشقه للباد بوي
في الوقت ده ادم وصل الفيلا ودخل اوضته واتفاجئ بيها مع صاحبه وبسخريه قال
ادم
هو انا جيت على عنوان غلط ولا ايه يكونش دخلت شقه في الهرم وانا ما اعرفش
عمر
استنى بس ادم اوعى تفهم غلط مدام نغم بس كانت
ادم
انا شايف المدام كانت بتلعب في الكرفته بتاعتك ايه هي بتخيطلك الزرار وقرب منها وضربها بالقلم وقال بقى بتخونيني يا زباله وانتي على ذمتي وقرب من عمر وضربه بالبوكس في وشه وقال برا بيتى يا كلب
نغم
مش انت اللي عاملي فيها رجل اعمال وعينك على شاديه وناديه وهنا وسما هو حلال ليك وحرام عليا
عمر سابهم بيتخانقوا وطلع يجري على بره وبغل قال
عمر
منك لله يا شيخه مش قولتى أنه مسافر يومين اديني خسرته هصرف منين انا دلوقتى
عند أدم كان بيتخانق مع نغم اللى بغيظ قالت
نغم
حتى لو طلقتني فانا ليا حضانه الولد وهرفع عليك قضيه تمكين وهاخد الفيلا منك وهشردك في المحاكم يا ادم
ادم شدها من شعرها وزقها برا الفيلا وبغيظ قال
ادم
اعلى ما فى خيلك اركبيه واياكي رجليكي تعتب هنا تاني غوري من وشي انتي طالق بالتلاته
بااااك
سعاد
الولد ملوش ذنب ان ابوه وامه مش مسؤولين هتيجي معايا دلوقتي وتشوف ابنك وتعمل دورك كاب ولا اتصرف معك تصرف مش يعجبك
ادم
ايه يا ماما الاسلوب ده هو انا هرضعه يعني ما قولتلك هشوف ليه مربيه انت مش اهم حاجه عندك يكون كويس خلاص سبيني اتصرف
سعاد
هو انت فاكرني علشان كبرت في السن ابقى خرفت هو انا اجيب مربيه وانت تلعب معاها في بيتك في الفيلا قدام ابنك اعمل حسابك ان المربيه اللي ابنك هيختارها مش هتدخل البيت غير وانت كاتب كتابك عليها
ادم
هو حكم قرقوش وخلاص ما تيجي معايا سكه ودوغري وقولي ان انتي عايزه تدبسيني في جوازه وخلاص
سعاد
افهم زى ما تفهم بس بكرا الصبح تكون في الفيلا وسابته ومشيت
ادم
اهو ده اللي كان ناقص ماشي يا ماما انت اللي بدات اللعبه هعمل لك اللي انت عايزاه بس هلعبها بشروطي
وتاني يوم كان واقف معاه عماد زميله وقال
ادم
نزل اعلان عن مربيات مش تحط شروط تعجيزيه انا عاوز كذا واحده معاذ يختار منهم
عماد
حد قالك انى الفلبنيه اللى الست الوالده جابتهالك مش عاوزنى احضن معاذ قبل النوم بالمره عشان مش يخاف
ادم
ما تنجز يا بارد هو انا كل اما اطلب منك حاجه تنقطني بكلامك
عماد
ماشي يا آدم لما نشوف اخرتها معاك
وبعدها سابه ومشي وعند نور كانت فى المطبخ بتعمل قهوه وبتوتر قالت
نور
وبعدين النهارده 10 في الشهر وانا لسه مش دفعت الايجار والراجل المعفن ابو عيون زايغه دا مش هيصبر اكتر من كدا ولسه مش كملت كلامها سمعت جرس الباب بيرن راحت فتحت لقيته واقف قدامها وقال
عبده
انا مش عارف انا ايه اللي مصبرني على واحده بلدوزر زيك فين الايجار مسكن ديناصور عندي ده انا خايف السقف يقع على راسي من الحموله الزايده
نور
محسسني ان انا باكل من ثلاجتك يا ريت كل واحد يخليه في حاله وان كان على الايجار هتلاقيه عندك انا مش هاكل عليك حاجه
عبده
وليكي عين تتكلمي هو انتي مش بتبصي على نفسك في المرايه ده انتي محتاجه نوسع الباب ده شويه عشان تعرفي تطلعي وتدخلي اسمعي اما اقولك هو معاكي يومين بالظبط لو الايجار مش اتدفع تطلعي بره الشقه وتفضيها وبراحه على السلم وانتى نازله ليقع بيكي وساعتها هنحتاج بلدوزر عشان يشدك وسابها ومشي
نور قفلت الباب وبغيظ قالت
نور
ده انت راجل بارد مالك انت ومال وزني هو انا اشتكيتلك
ومسكت موبايلها تدور على وظيفة ووقع قدامها منشور بيطلب مربيه وبفرحه قالت
نور
مربيه مربيه مش مهم خليني اغور من هنا شكلها باضت فى القفص ولا ايه دول حاطين راتب خيالى الوظيفه دي لازم محدش ياخدها غيري
وتانى يوم ادم كان قاعد فى الصالون ومعاه سعاد اللى قالت
سعاد
والله عيب أقولك إبنك عنده كام سنه وانت مش تعرف كتك وكسه
ادم
معلش اصل الامتحان جاى من برا المنهج فمش عرفت احل وبغيظ قال انتى اللى بتطفشيني أهو محسساني أنه فرحه بكرا دا لسه عيل بشخه ولو فتحتي موضوع الفيلا تاني وان هي بتاعتك فانتي عارفه كويس قوي انا سجلتها باسمك مين
سعاد
فين ابنك معقول مش وحشك يا ادم انت معندكش مشاعر لابنك
ادم
عندى طبعا بس سامحيني مش قادر اتقبله بشكل طبيعي مهما كان هو بيجرى فى عروقه دم الخاينه أمه انا مش مقصر معاك حاجه وكل اللي عايزه هجيبهوله ما تتوقعيش مني اكتر من كده عاوزه مربيه هو يختارها واتجوزها كمان وافقت طالما فى مصلحته عاوزه ايه تانى
سعاد
منها لله إلى وصلتك للحاله دى ربنا يهديك يبني وتيجي إلى تطلك من قوقعتك دى
وفى الجنينه معاذ كان قاعد بيلعب فى طبق الخضار بتاعه سمع صوت من وراه بيقول
نور
انت عارف ان كل الابطال اللي بتوع الكرتون اللي احنا بنحبهم كانوا بياكلوا خضار علشان يطلعلهم عضلات وربعت جنبه على الارض وقالت انا نور انت اسمك ايه
معاذ
انت قاعده جنبي ليه انا ما حدش بيحبني ولا حد عايزني حتي بابا على طول برا البيت بقيت بحس ان انا منبوذ من الكل ما عنديش صحاب ما عنديش ماما زي بقيت صحابي وبابا كمان مش مهتم بيا
نور
ايه يا ابني الدراما اللي انت قلتها دي هو انت ابن محمد سامي وامك مي عمر ده انا شويه وهعيط على كلامك وشديته على حضنها وقالت اتلم المنحوس على خايب الرجا تعالى يا حبيبي فضفض زي ما انت عايز هى الدنيا هم على كله
معاذ
انت جيتي هنا ازاي انا اول مره اشوفك انا اسمي معاذ وعندي سبع سنين هو انت كبيره قوي كده ليه
نور
طب يا حبيبي نتعلم نتكلم مع اللي اكبر منك انا مش كبيره ولا حاجه ده انا حيالله 30 سنه ايه رايك تاكل الخضار اللي قدامك ده وانا اوعدك ان انا هلعب معاك اللعبه اللي انت عايزها
معاذ
لو عرفتي انتى تاكليه شوفي همابياكلوني ايه هنا انا مش ارنب انا عايز اكل همبرجر واشرب بيبسي ولا اني اكل الاكل ده هو اصلا ريحته وحشه وطعمه وحش
نور مسكت الشوكه واخذت حته من الطبق قالت
نور
ده ترجيع ده مش اكل ده ايه القرف ده ده الكلب يقرف ياكل منه استغفر الله العظيم يا رب الله يعز النعمه هو انتم مش عندكم هنا حد بيطبخ حلو تعالى يا ابني ادخلك عند اهلك بدل ما يفتكروا ان انا خطفاك انا جايه اقدم على وظيفه مش جايه اخطف حد
معاذ جري على جوا اول ما سمع صوت جدته وقال
معاذ
تعالى اعرفك على تيتا دى صاحبتي الوحيده وشكلك هتنضمي للفريق
نور دخلت وراه واتصدمت لما شافت البنات اللي واقفه جنبها وبذهول قالت
نور
هم دول مربيات ولا عارضات ازياء ده مقارنه بيا فانا مجتش واتفاجئت بمعاذ قاعد قدامها وبهمس قالت
طب الحمد لله كده ضمنا الطرد من اول يوم من قبل حتى ما يقبلوني طلع هو الولد اللي انا هبقا المربيه بتاعته انا مش عارفه انا حاطه مخي فين
ادم مسك ايد معاذ واقف قدام البنات اللي كانوا واقفين وقال
ادم
انا عاوزك تختار واحده من دول هتكون المربيه بتاعتك يعني هتكون صاحبتك ومعاك في كل الاوقات واللي هتشاور عليها هي اللى هتفضل معاك
معاذ
اى واحده اختارها ومحدش هيتدخل في الاختيار بتاعي ولا يقولي اغيره
سعاد
طالع زي ابوك لمض أختار يا حبيبي هو احنا بنقولك اختار عروسه هتبقي شريكة حياتك
معاذ شاور على نور وقال
معاذ
انا عاوز دي ومش هاخد حد غيرها هي دي اللي هلعب معاها وهتعملي الاكل اللي انا بحبه
ادم بص على نور وبصدمه قال
ادم
نعم يا قلب ابوك هو انا بقول لك اختار عجل نضحي بيه في العيد ده انا بقولك هات بني ادم عادي يقعد معانا في البيت
سعاد
اللي حفيدي اختارها هى اللى هتتوظف هنا مربيه ليه وبصت على ادم بشماته وقالت متنساش الماذون يا حبيب امك
نور اتصدمت لما اختارها هى وبذهول همست قالت
نور
والله لولا ان انت طفل كنت قولت ان انت شارب حاجه ده انت كان قدامك شويه مزز انا نفسي حبيتهم
ادم
فرحانه فيا طبعا كنتى عاوزه مربيه ادي حفيدك الحيله جابلك عرض من كارفور هو انتم متسلطين عليا انتوا الاتنين
سعاد
اصل انا شايفاك ما شاء الله عليك نفسك مفتوحه على النسوان كل يوم مع واحده شكله عملت غير الوان واشكال ولا كانك بتقلع الجزمه فمعاذ حبيبك حب يجيب لك المصنع كامل عشان ما تلحقش تغير وتدوق بمزاج
نور
هو انا ممكن افهم طبيعه شغلي ايه انا حاسه ان الموضوع اكبر من مجرد مربيه
ادم
انا لحد هذه اللحظه مش مستوعبه ان في بنت بالحجم ده هو انت بجد ولا Ai
نور
نظراتك ليا بتحسسني ان انا جايه من المريخ اما بالنسبه لوزني فمش تخاف انا مباكلش لحوم البشر اقدر اعرف التفاصيل ولا لسه في اهانه كمان حابب توجهها ليا
سعاد
طب انا هاخد معاذ عشان ميعاد الدوا بتاعه انت عارف انه لو مش خده كليته هتتعب اكتر واحنا مش لاقيين متبرع عاوزه اسمع الخبر السعيد والقسيمه تكون عندى الليله يا ادم يا اما تنسى الشركه والفيلا وروح اتسرمح براحتك بره وسابتهم وطلعت
ادم
الشرط الوحيد علشان تشتغلي مربيه لمعاذ ان انت تتجوزيني وبنفور قال مش تخافي ده هيبقى جواز على ورق مجرد بس عقد بيني وبينك علشان نسكت ماما وفي نفس الوقت انت تهتمي بمعاذ انا شايف ان هو ارتاح معاكي
نور
ولو رفضت هتعمل ايه انا هنا كمربيه وبس مكنتش أعرف أن فى عرض اربي الولد واهتم بيه واتجوز أبوه هديه
ادم
هو انتى تطولى أصلا انتى مش بتبصي فى المرايه ده المفروض ياخدوكى عشان يخوفو بيكي العيال رافعه مناخيرك على إيه
نور كانت هتطلع من الفيلا وترفض الشغل بس افتكرت انها هتتطرد من الشقه لو مش دفعت الايجار وبعد تفكير ثواني قالت
نور
موافقه طالما هيكون مجرد جواز على ورق لا انت ليك حقوق ولا انا ليا حقوق انا موجوده هنا مربيه لمعاذ وبس
ادم
انت ليه محسساني ان انت انجلينا جولي وانا هموت عليكى هو مين اصلا ليه نفس يبصلك
نور
على سيره الجواز بقى انا مش انسه انا كنت متجوزه قبل كده واتطلقت اعتقد ان دا مش هيفرق معاك بس انا حبيت اعرفك وانا على البر علشان مش تقول ان انا خاينه لما اكون على ذمتك ما يحصلش مشاكل
ادم
نمتي مع انهي كلب بقى اصل الجسم ده والحجم ده مستحيل تكونى اتجوزت في الحلال قوليلي بعتى نفسك بكام
نور
بقولك انا كنت متجوزه واتطلقت ايه في كلامي مش مفهوم وبدات تفتكر اللي حصل
فلااااش بااااك
نور كانت لسه راجعه من الشغل دخلت البيت واتصدمت لما سمعت صوت ضحك فى اوضة النوم دخلت بسرعه وسمعت على وهو بيقول
على
انا مش عارف انا كنت اعمى ومش شوفتك ازاي بدل البلدوزر اللي انا متجوزها دي
ريم
انت ممكن تصلح غلطك عادي يا علي نور مش هتقدر تعمل حاجه لو طلقتها وطردتها من البيت وقعدت انا وانت هنا واتجوزنا
نور من وراهم قالت
نور
مش كنت تقولي لي انك جايه هنا يا انتيمتي كنت حتى جهزت ليكم الغداء وخليتلكم السهره صباحي
وباهانه قالت طول عمرك باصه للي في ايدي انا مشفتش واحده بالبجاحه دي
ريم
انت هتسكتلها يا على ولا ايه يكون فى علمك انا لو خرجت من هنا مش هتشوف وشي وبما أن الهانم موجوده شيل دا من دا يرتاح دا عن دا
نور
ثلاث سنين وانا متجوزاك وانا اللي بصرف على البيت وابوها باقي اديتك ورثي كله علشان تحطه في مشروع وفي الاخر ضيعت الفلوس كلها وانت اللي قاعد في البيت وانا اللي بنزل اصرف عليك وعلى البيت وده جزائي
علي ضربها على وشها وقال
هو انتى بتجبي عليا ما انا مستحمل خلقتك وشكلك اللي يقطع الخميره من البيت الفتره دي كلها انا راجل وعايز واحده تدلعني مش واحده شبه الفيل زيك
ريم
سوري يانور وعلى رأي المثل تبقى في ايدك وتتقسم لغيرك كملي اكل بقى انا عارفه ان انت لما بتكوني مكتئبه نفسك بتتفتح أوي على الاكل علي عايز واحده عودها فرنساوي وانتى ابعد ما يكون عن المواصفات دى
على شد نور وطردها برا البيت وبغيظ قال
انا استحملتك كتير بس انا راجل وعايز اعيش حياتي وبصراحه مش شايف حياتي معاكي خالص واعتبري الفلوس اخذتها منك رد جميل ان انا اتجوزت واحده زيك بره حياتي يا نور انت طالق بالتلاته وقفل ده في وشها
بااااك
نور
الماضي بتاعى مش يخصك ابنك عايز مربيه وانت عايز زوجه على ورق علشان تسكت مامتك بس انا كدا هطلب اجر زيادة وأعتقد دا من حقى
ادم بغيظ قال
العيب مش عليك العيب على إلى لبستنى فيكي قدامي على الماذون وبالفعل نور راحت معاه وادم كتب عليها
عند سعاد كانت بتتكلم مع عماد فى التليفون ومره واحده زغرطت وقالت
سعاد
قول والله اتجوزها فعلا انا كنت فاكره أنه هيعند وهيقاوح معايا انت مش بتكدب عليا يا واد
عماد
والله انا اللى روحت طلعت القسيمه مش حاسه ان احنا تسرعنا في الخطوه دي ادم لو عرف ان انا بوصلك اخباره اول باول هيوأدني
سعاد
ده احنا كنا متاخرين قوي يا ريتني شفتها من بدري اهي هي دي مربط الفرس هي اللي هتجمع ادم ومعاذ انا بقى ادم هيحبها او لا فده انا هسيبه الايام كفايه عندي اني معاذ حاببها اقفل انت ادم شكله وصل انا لازم أرحب بالعريس وقفلت المكالمه وبمكر قالت يا عروسه يا عروسه انا العريس ولسه يا ادم لما ربيتك من أول وجديد
