رواية حين تتغير الاقدار الفصل العشرون بقلم سناء الهموندي
شايله موش اعيون والحاجب اهلال
والحلك شذره ماس حك الله ينكال .
حُبّكِ بّقًايَا ُُهمٌسِ
مٌا بّيَنَ الُقًمٌرَ وَالُشِمٌسِ
فَدِيَتْكِ بّلُ ُْξمٌرَ كِلُُه
الُيَوَوَوَمٌ وَبّكِرَُه وَأمٌسِ ♡
هناء : رحت حضرت الغده وصبينه انور كعد كبالي وكلساع يرفع عينه عليه يرفعلي حاجبه اني سويت روحي ممهتمه كملنه غده لمينه البيت وجينه كعدنه غلام طلع جنطته فرغهه ملابسه نغسلهه ومثل كل مره جايبلنه اشياء بسيطه قراصات محابس نوبات تراجي واحنه كلش نفرح بيهن .
غلام : يمه هالمره اجازتي قليله تلث ايام وارجع ياريت من هسه تغسلون اهدومي حتى ينشفن عبن الجو بارد ويتاخرن .
جوريه : اي بعد بيتي هسه اخلي سلطانه تغسلهن .
غلام : اندك الباب طلعت اشوف منو .
تمار : يا هلا توهه نورت ديرتنه والله مشتاقيلك .
غلام : بابتسامه منوره بوجودكم اله ماكتلي شني شميت ريحتي وجيت .
تمار : بضحكه لا هالمره جيت على خالتي ابوي وده يكول الحمله دار يطلعون الخميس للنجف وهيه موصيه اذا صارت روحه للنجف تروح .
غلام : يعني عكب باجر حرامات لو ما دوامي جان جيت صار هواي مزاير كبر ابوي .
تمار : جا مو تضل اسبوع .
غلام : لا والله كوه اخذت تلث ايام تعال فوت جوه الجو بارد .
تمار : طبينه جوه صاح غلام .
غلام :بضحكه يمه هذا تمار جايبلج خوش خبر.
جوريه : يا الله تعال خاله تمار .
تمار : فتت جوه صارت شمس مقابيلي من شافتني ارتبكت وكامت طلعت من الحجره استغربت شبيهه بس من طبيت وشفت انور عرفت شردت جي ملابسه حجاب ضحكت بداخلي سلمت على الولد وتفقت ويه خالتي على روحه الزياره كعدت ساعه ويه الولد وطلعت وكفت بلحديقه وكتله الغلام اذا مصير زحمه صيحلي خالتي .
غلام : جا مو هسه جنت يمهه شنو شتاقيتلهه .
تمار : دروح صيحهه هسه انت شخسران .
غلام : رايح رايح .
تمار : راح غلام وطلعت شمس من الحجره الثانيه اني واكف بضلمه مشافتني سالت احلام اختهه .
شمس : بهمس حلومه تمار راح .
احلام : اي ماكو راح .
تمار : اباوعلهه من بعيد واضحك بداخلي على سوالفهه طلعت تتمشه على كيفهه وانا رحت بتجاهه حجيت بصوت أشبه بعالي مادامج تخافين جا ماتلبسين حجاب دارت وجهه متفاجاءة ونفس الوقت مصدومه باوعتلي بنضرات بريئه أنا متحملت نضرتهه كتلهه بعصبيه ميفيد اله اكصن كصيبتج أنا مو كلت هيج عبالك كلتلهه راح اذبحج طارت وماضل غير غبارهه ضحكت من كل كلبي واجتي خالتي جوري .
غلام : شرف استاذ تمار هاي امي .
جوريه : خير انشالله يمه تموري .
تمار : خاله هاي الامانه ابوي دزهه .
جوريه : شني هاي يمه .
تمار : هاي فلوس الحصاد ابوي باعهن للتاجر ودز حصتكم .
جوريه : اخذتهن وعديتهن عرفت مثل كل مره ابو علي يحط زايد اخذت حكنه ورديت لتمار الزايد هاك يمه رجعهن لابوك وكله يرحم البطن الحملته ومانسه وكفته ويانه بس ماقبل أخذ شي مو حقي .
تمار : خاله اروحلج فدوه اخذيهن صدكي ذني حكج من البيعه غلام واكف متخوصر ويباوع يعرف أمه ماتاخذ وروحهه عزيزه فاتخذ الصمت ويراقب بهدوء رده فعل أمه .
جوريه : بابتسامه ولك يمه تمار انت ربيت على أيدي واعرفك من تكون صادك .
تمار : اوف يخاله ماعرف ليش حاسبتنه غربه واحنه أهل .
غلام : طبطبت على جتف تمار وكتله كفو والله انتو أكثر من أهل بس نحنه مانرضه فلس يطب البيتنه مو من تعبنه .
تمار : التفت الغلام وحجه والله يا غلام وربي يشهد انتو اهلنه والله موصي بصله الرحم .
غلام : راح تمار وانا ثاني يوم رحت للزرع واجه تمار ساعدني وسلطان وعلي اخو لتمار تعاونه وكلبنه الكاع حته نزرع من جديد وحنه نشتغل حجه علي .
علي : كاعكم صح نضيفه وتربتهه حلوه بس صغيره .
غلام : الحمدلله على كد الايد .
علي : ليش متاخذ حصت ابوك بدال ما عمك يريد يبيعهه أخذ حصتك وكبر كاعك .
تمار : مراد علي يكمل حتى لتكبر السالفه صاح علي مو وكتك .
غلام : ذبيت الكرك وتقربت لعلي اسكت تمار خل يكمل شمدريك عمامي يردون يبيعوهه .
علي : خالي راد يشتريهه وانا كتلهه هاي ورث عوفهه .
غلام : عفت كلشي ورحت لبيت عمي محمود لحكني تمار .
تمار : غلام غلاااام تعالي يمعود .
علي : عوفه تمار خل يأخذ حكهم ليش يروح .
غلام : ارجع تمار أنا احلهه رجع تمار بعد ما توسل بيه يجي يخاف عليه لا اتعارك حلفتله ماسوي شي بس احجي وصلت لبيت عمي محمود رحب بيه وطبيت للمضيف وانا افور جابلي ابنه الصغير ماي ماشربت عمي كال .
محمود : الله بلخير .
غلام : الله بلخير عمي اتحم حمت وحجيت اليوم جاييك بسالفه .
محمود : خير انشالله .
غلام : أنت تعرف صار سنين وانا مامطالب بشي بحكي بس انا اليوم سمعت حصه ابوي راح تنباع وانا اكول احنه أوله بيهه وانت اكثر واحد تعرف .
محمود : بستغراب منهو هذا اليريد يأخذ حقكم أنا اليوم اروح على عمامك وأشوف منهو يسترجي يمد أيده على حصتكم .
غلام : عمي انا باقي يومين وراد للدوام كون من اجي الكي حقي مأخوذ .
محمود : اعتبره تم .
غلام : رديت للبيت وانا افور من الاعصاب شون عمي هيج يسوي يعني لو ما داري من علي اليوم جان راح حقنه وانا ما يهمني شي بكد ما افكر بخواتي وأمن الهن مكان عبن بيتنه تعب ويخر من جميع الجهات ويوميه راكعلي صفحه منهه وصلت للبيت طبيت جوه البنات فارشات وكاعدات بلحديقه يسولفن ويضحكن وبنصهن عمران يكمز يلعب وجان الجح نوره بنصهن تضحك وتقلد على عمران موش ضحكه ياربي جنهه العافيه شايله شعرهه من فوك وعايفه الباقي يرفرف بلهوه والشمس عاكسه عليه بارزه الخصلات الذهبيه البي ويه لون البحر بعيونهه ضعت وحسيت العالم فرغ بس انا وياها بي ياربي سامحني والله نضراتي الهه نضرات بريئه وقصدي شريف بس انا متانيهه تكبر شويه حتى اخذهه اجت امي نزتني من جتفي .
جوريه : يمه غلام شمالك سرحان يمه احسن اكو سالفه بالك .
غلام : جريت حسره واشرت على نوره وحجيت جم ضيم احجيلج ييمه وهذا واحد من الهموم كاعد كبالي لو ضيم عمامي .
جوريه : لطمت على صدرهه وحجت بصوت عالي يمه اصخام ولك غلام حاط عينك على الفرخه .
غلام : يمه شبيج يمعوده على كيفج يا فرخه هاي أنا قصدي على الحايط مال البيت يريد يوكع وحاير شون اسوي .
جوريه : هااا اي والله يمه خايفه لا يوكع على واحد فلشه وسوي خوص احسن .
غلام : لا يمه خلي هسه على نزلتي انشالله يصير خير .
هناء : مرن يومين وأنور عيونه وين ما اروح يباوعلي لحد ما اليوم ضهريه عجنت وجاي اخبز بلترك وانا من النوع من اخبز ما احب احد يوكف يمي اخبز وحدي خبزت وجبه وسكفت السمجه حتى وره الخبز احطهه بلتنور للغده تصير شمالني اليوم بس اعطش عود جبتلي طاسه ماي خلصت وبعدني عطشانه صحت حلومه احلااام تعالي جيبيلي ماي ريجي نشف اجتي احلام .
احلام : ها هناء صحتيني .
هناء : اي حبيبه جيبيلي ماي .
احلام : اي هسه رحت اجيب ماي واجيت شايله الطاسه بيدي شافني انور صاحني .
انور : تعالي حلومه انطيني ماي الله جابج .
احلام : هسه اجيبلك غيره هذا الهناء .
انور : بتفكير وهيه وينهه هناء .
احلام : وره البيت تخبز .
انور : جيبي اشربه وانا اخذلهه غيره انطتنيا أخذته ورحت وره البيت هاي فرصه متتعوض لكيتهه واكفه تخبز وخدودهه صايره طماطه من التنور شافتني خزرتني ضحكت على تصرفاتهه وعلى عيونهه الوكحه .
هناء : خير انشالله شعندك هنا .
انور : جوعان وجيت اكل خبز حارر .
هناء :بعصبيه جان دزيت أحد يجي ياخذلك باله اذا شافك أحد هنا شيكول علينه .
انور : هناء الله يخليج لتصعبيهه علينه انتي تعرفين أنا شنو نيتي وياج والله يشهد تعنيت من بغداد بس حتى أخذ الجواب منج حجيت بعصبيه وبجديه صار سنه ياهناء سنه وانا رايدج ومارايد منج غير بس كلمه وحده تريحين كلبي بيهه .
هناء : هسه انت شتريد .
انور : بستغراب اريد جواب .
هناء : انطيني هذا الماي البيدك .
انور : هاي شبيج هناء شنو جاي تحركين اعصابي .
هناء : بس انطيني ماي اشرب كتلني العطش .
انور : ابضوجه هاج هذا الماي نطيتهه الماي ودرت وجهي ومشيت وما احس اله هناء تكول .
هناء : رايي من راي امي واخوتي .
انور : وكفت مصدوم معقوله لو جاي اتوهم درت وجهي عليهه وكتلهه بروح ابوج عيدي الكلتي خاف أنا متوهم .
هناء مامتوهم يا ابن خالتي حاجي امي ويصير خير .
انور : اوفففف اوفف يارب الحمدلله .
هناء : صبينه غده و انور يباوعلي ويبتسم من ورا عفت الغده وكمت وره الغده سمعته يسولف ويه امي وغلام أنا خجلت وبعد ماطلعت لليل صاحتني امي .
جوريه : بفرح تعالي كعدي اريد احاجيج بموضوع .
هناء : طبيت عبالي الكيهم كلهم بس همزين بس امي وخواتي كعدت يم امي وحجت .
جوريه : بدموع الفرح حجيت شوفي الأيام شون تركض ركض ذاك اليوم جنتن صغار كدامي تكمزن هسه كبرتن وصرتن عرايس ويطلبوجن مني .
شمس : شني يمه وانتي راح تنطينه للعالم والله انا ماعوفنج من هسه اكلج .
جوريه : بضحكه ولج سكتي يلفطيره شني انتي طاسه روبه وانطيج شوفي يمه هناء انور ابن خالتج طلبج مني ويريد جوابج خاطر اذا تقبلين شهر الجاي يجيب اهله ويجي يطلبج .
هناء : سكتت ودنجت راسي .
سلطانه : حجت من يمهه علامه السكوت الرضه يمه نقره الفاتحه .
هناء : ضربت سلطانه بيدهه على كيف الفاتحه على روحج .
جوريه : لا تسكتين يمه انتي شدكولين انا وياج .
هناء : بلكوه طلعت من حلكي يمه التشوفوا صح سوو وانا راضيه .
جوريه : والله يايمه أنا اتمناج لانور انور رجال مثل ابو كفو يصونج .
هناء : هاي هيه يمه أنا قابله ثاني يوم قبل ميرحون لبغداد امي بلغت انور بموافقتي وكال الهه على نزلت غلام يجيب اهله وصير رسمي .
شمس : مرت الايام ومثل كل يوم انضف البيت ويه خواتي ونكمل وصير بلتسعه الصبح اروح اودي السلالي والحصران الأمي بلسوك ( للعلم سوك قبل سوك يتكون من كم محل قماش ولحام ونداف والأواني النحاسيه فكانت جوريه تكعد على صفحه تبيع سلاتهه وحصرانهه التسويهه من الخوص تأخذ وجبه وجبه يوميه واحد يودي الهه واكثر شي شمس واحلام يودون باقي الغراض لجوريه ) ياله احلام امشي نروح نودي الغراض لامي تلكيهه متانيتنه طلعت أنا واحلام ومثل كل يوم اشوف تمار واكف بطريق السوك يمشي ورانه بس ابد ميحجي .
تمار : شمس .
شمس : التفتت عليه ها تمار صحتني .
تمار : اي هاج هذا الكلينس .
شمس : اخذت منه الكلنس بعصبيه ومسحت بي وجهي شبي هذا يوميه ينطيني اكلينس شنو قابل شايف خشمي وصخ حطيت الكلينس على خشمي اشتميت ريحته مثل كل يوم متروس عطر يصطر صطر بحيث ادمنت على هلعطر اضل الطريق كله لازمه الكلينس اشتمه وساعه اكول هالمره اذا نطاني ماخذ منه شنو شايفني حتى ينطيني كلينس ومرت الايام وكل يوم اروح اودي السلات الأمي تمار يمشي ورايه يوصلني يوكف من بعيد بحيث امي متشوفه وينطيني الكلينس بحيث بوفيتي مصفطه بيهه كومه كلنس وكله نفس العطر وانا نوبات أخذ نوبات لا اضوج شايفني وصخه يوميه منطيني كلينس لحد ما فديوم رحت هم أنا وحلومه وتمار ورانه وهم نطاني كلينس بس هالمره العطر يختلف واطيب ريحته بحيث وصلت لامي نطيتهه السلات وانا حاطه الكلينس على خشمي اشتم بي امي كالت .
جوريه : شنو هاي بيدج .
شمس : يمه كلينس تمار نطانيا شتمي ريحته تخبل .
جوريه : صرت نار ونطفيت يعني شنو تمار صار شكم مره أشوفه يمشي وره شمس أنا اليوم لازم احط حد اله أنا أعرف هوه قصده يوصلهن ويخاف عليهن بس اليشوفه ميكول هيج .
شمس : رجعنه للبيت وماعرف امي على شنو صارت عصبيه معقوله علمود الكلينس .
جوريه : رجعت من السوك والعصر طلعت أنا والبنات وسلطان للزرع واكيد راح يجي تمار يساعدنه وانا اعرف شغلي ويا وصدك وره نص ساعه اجه تمار وابتسامته تارسه وجهه سلم علينه .
تمار : سلام عليكم شونج خالتي .
جوريه : جاوبته بثكل هلا بيك خاله تعال شويه نحجي هناك عندي معاتب وياك .
تمار : بستغراب انتي تامرين امر خالتي رحت وراهه على صفحه وحجت .
جوريه : شوف ابني انت تعرف كلش زين انت بمعزت ولدي الله شاهد بس يا ابني التسوي غلط ويجيبلنه سمعه وانا كلشي ولا احد يجيب طاري بناتي .
تمار : بعصبيه اتخسا أكص السان اليحجي ويمسكم بحرف كليلي خاله منو حاجي وروح جدي هسه اروح احرك شيب اهله .
جوريه : يمه أنا ما أتاني ينحجي علينه أنا حاسه عليك يوميه توصل شمس وهل شي غلط يمه .
تمار : خاله ااا أنا رايد شمس على سنه الله ورسوله بس صدكي يا خاله منتضرهه تكبر واخذهه بس مادامج عرفتي نيتي أنا باجر داز امي وابوي يجون يخطبوهه منج عفتهم ورجعت حجيت لامي على كلشي .
ام علي : يوم عيد اشوف شموسه بيتي .
تمار : وره يومين امي حجت لابويه وابويه هم فرح ومعارض وبلغ عمامي على نزلت خوانهه يرحون يخطبوهه إليه كاعدين ضهريه امي كلتلي خبز بلدهن ونوره كلساع جايه ماخذخ وانا اضربهه على ايدهه بلشقه .
نوره : بس هاي حباب .
تمار : حلكي متروس اكل وكتلهه روحي مانطي شون البارحه ماكلته كله وماعايفتلي بعدنه نحجي وطب عمي حكمت يهوس .
حكمت : شنو هلخبر صدك تردون تأخذون من بيت ام فالح مره وجا شبيهن بناتنه عود ...
الى هنا ينتهي بارت اليوم انتضروني بلقادم
شكرا لزيارتكم عالم روايات سكيرهوم
