رواية حين تتغير الاقدار الفصل الرابع والعشرون بقلم سناء الهموندي
فبڪت عيناها وهي تقول لنفسها لا تبڪي انتيہ قويه💔.."
"من يمتلك صديق عظيم لا تهزمه الحياة."🙂💔
*هــــآدئ وبـــــدآخــــلَــــي حــــرب عــــآلــــَمــيــة꧁❥❥꧂↑*❥❃ِ💔☻
غلام : مرت يومين وقررت افاتح امي بموضوع البيت رجعت من السوك بعد ما بعت كل المخضر أنا وسلطان لكيت امي والبنات محضرين الغده صليت وكعدنه تغدينه
وراهه كعدت يم امي وحاير شلون افاتحهه اخاف اكلهه ومتقبل .
جوريه : شمالك ييمه صافن احسن ضام عني شي .
غلام : جريت حسره وكلت يمه راح اكلج شي بس بروح ابوي لتعارضين عبن كافي تعب وبهذله .
جوريه : بترجي يمه بس لا تكلي تكل لعمامك على حصتكم .
غلام : يمه هذا حقنه وانا رحت حاجيت عمي محمود وطلعت حكنه .
جوريه : شنو قصدك يمه احجي لا تضوجني .
غلام : وعليش تضوجين يا ام فالح جا موش انتي تكولين الحك حك يرجع الصحابه ولو بعد حين وهذا حكنه هل رجع كمت بست راسهه يم اغديلج سبع فدوات خل خواتي يرتاحون من رطوبه الحيطان الكلتهن يمه لا تشوفيني عايش وامشي على طولي بس كفيلج الله من اشوفكم شون تتراجفون بليل من البرد وشون تمطر والبيت يتحول من مكان معيشه إلى خراب بسبب السكف الي مسويه من خوص وطين يمه أنا خايف لا يجي يوم والسكف يوكع عليكم والله ساعتهه ماعرف شنو راح يصير لي لان ماتخيل حياتي بدونكم .
جوريه : بجي وغصه عمت عيني عليك يمه كل هذا الضيم شايله بكلبك وانا مادري .
غلام : بحسره وافقي نعيش بحلال ابوي يمه همه كلمن أخذ حكه واحنه اخذنه البيت .
جوريه : هاي هيه سوي الترتاحله يبعد شيبي .
غلام : بفرح جا حضري روحج يمه هل يومين نحول البيت الجديد .
شمس : اجتي امي بلغتنه بقرار غلام واحنه طرنه من الفرح ورحنه حضرنه غراضنه وقررنه ننتقل لبيت جدي الي راح يصير بيتنه .
هناء : مر كم يوم وأنور بعده مجافيني حاولت اتقرب منه صدني اعتذرت مقبل حتى يستمعلي بس كدام اهله يتصرف عادي بس بيناتنه لا بعده كلمه ميحجي ...كعدت الصبح مثل كل يوم حضرتله ملابس الدوام وريوك غسل وبدل واجه كعد تريك أنا كمت الملم بهدوء حتى ليضوج شلت الملابس الاغسلهه وهوه رفع رأسه بس عينه بلكاع وكال .
انور : بحده عوفي البيدج وتعالي تريكي .
هناء : باوعت عليه وكتله بهدوء ما اشتهي بعدين اكل .
انور : اباوعلهه شلون تتحرك بهدوء وانا كلبي يخفق عكس هدوئهه شكد ما أحاول أنسا الصار اول يوم النه سوه ما اكدر طفت فرحتي ولهفتي بيهه .
هناء : طلعت اغسل الهدوم لاكتني تهاني توهه فاتحه الباب البينهه وبين بيت اهلهه وفاتت باوعتلي وعقجت وجهه طبت جوه يم خالتي أنا غسلت الهدوم وعصرتهن رحت لكيت انور مكمل واكف يمشط شعره شلت الصينيه .
انور : فاتت هناء ضليت اباوع الهه بلمرايه شون هادئه جدا يحضي شمالج يوم العرس نكلبتي عليه شلت غراضي ومشيت لباب الغرفه وكتلهه محتاجه شي اجيبلج وياي .
هناء : لا سلامتك ..راح انور للكليه سنه ثالثه اله وانا رحت نضفت و خالتي ساعدني تهاني اختصاصهه تكعد تباوع على هذا الاسمه تلفزيون وتضحك كملت اجتي وكفت بلحوش وتحجي بصوت عالي.
تهاني : يمه أنا حبله .
ضويه : بلمبارك يمه عاد كعدي لا ضلين تحوصين لحد ما طيحي مثل ذاك .
تهاني : لا يمه أنا كلت انام على ضهري واجيب شمس لو سلطانه داريني لحد ما شويه يثبت بطني .
هناء : صرت نار شنو خواتي خدم عدهه جاي احجي وخالتي حجت .
ضويه : شنو هل حجي يمه هاي اخيتج نهله يمج داريج .
تهاني : مو نهله عدهه امتحانات .
ضويه : بسج عاد تعالي يمي وانا اداريج لتسويلج بلبله .
هناء : خالتي يوم بعد يوم تكبر بعيني عبنهه حكانيه وماتقبل بالغلط مرت الايام وعلاقتي بانور شويه تحسنت بليل احس عليه يجي يحضني بعد ما يتأكد اني نمت بس انا نومي خفيف لهذا احس عليه بيوم نايمه بالليل وحسيته بداء يتقربلي سلمت روحي اله لحد ما تم زواجنه بيومهه كضينهه للصبح ساعه معاتب وساعه مغازل وحتى كليه مراح .
شمس : صارلنه سبوع انتقلنه بالبيت الجديد كلش فرحنه وكضيناهه لعب وفرحانين تمار وشمس وكميل ( اخو تمار ) نلعب سوه ونتشاقه ناس طيبه وعلى نياتهم ماكو شي اسمه عيب وصرتي مره لا عادي نلعب نسوه حتى المتزوجات بيت جدي صاير بنص البستان كله خضار وأشجار وبي نهر يخبل اجه غلام وصاح .
غلام : سلطانه شمس احلام وينجن جيبن عمران وتعالن سوينالكم مفاجاه أنا وتمار .
شمس ومثل العاده بما انو أنا أخف وحده بيهم فيلكوني اول وحده محضره روحي واكفه كبالهم اجيت شفت تمار يباوعلي بنضرات كلهه فرح واكفه يمه نور ركضت حضنتني وانا حصنتهه عبالك صار سنه ممتشاوفين مو البارحه العصر جنه سوه اخذونه ورحنه مسافه عن البيت داخل البستان لكينه جهال عمامي واخوان تمار وشمس البقيه زمن المخطوبه ومباقي غير سبوعين العرسهه ومعصومه و نرجس ونوره وتمار وكميل وبعد عنده ثنين خوان توأم ماجوي وعلي هم مااجه لكينه مسوين مرجوحه بلنخلات كلش طوال والجهال صايره مكاتل عليهه بالسره صعدوا الجهال والكبار كلهه بألسره اجالي الدور غلام دفعني شويه هنوب صاح عليه ابن عمي راح هوه ويا كال شويه واجي تقرب ابن عمي حسن راد يدفعني اجه تمار كله .
تمار : بأعصاب حسن أضن غلام صاحك .
حسن : ها صدك رايحله .
شمس : تقرب ولزم المرجوحه منا ومنا وهمسلي .
تمار : الزمي قوي يا وسكتتت وكملتهه بكلبي يعافيتي .
شمس : لزمت بقوه ودفعني حساس مينوصف يربي شعور حلو وجديد من كثر ما متحمسه كمت اضحك بقوه واصيح أعلى اعلى وهوه يزيد وفرحان أكثر مني اسمع البنات والولد الواكفين يكلوله تره خلص دورهه وهوه يجاوبهم .
تمار : تره انا سويتهه اخصوص الهه يعني اليحب يجرب لازم ينتضر ....ادفع بيهه وهيه تضحك وانا فرحان لضحكتهه بس ماريد احد يسمع صوتهه همستلهه نصي صوتج عاد تره انزلج .
شمس : مستمره بفرحتي وضحك تمار يهدد بيه بسبب صوتي وانا مو بيدي فرحانه لحد ما دفعني كل قوته وانا هديت ايدي وصفكت اشجعه وماحس اله وانا واكعه ومتكسره التمو عليه وهوه اجه بنصهم يصير .
تمار : ياله منا كلمن لبيته باجر تعالو ياله متشوفوهه مفرفحه ... احجي بحركه تخبلت من شفت كصتهه تجري دم من صفحه وايدهه مجلغه .
شمس : فرحتي نكلبت بجي بحركه ما اكدر اسكت وجع بكل مكان .
تمار : بس عيني انتي بسج يروحي شنو اليوجعج كليلي أنا انا كله صوجي جان المفروض ما ادفعج هيج قوي تاذيتي بسببي .
شمس : ابجي وانا امسح وجهي لا انا كله مني عفت المرجوحه .
تمار : ختولي هسه اكصهه واشمرهه شون تاذيج .
شمس : بجيت قوي . لا حباب لتكطعهه والله بعد أجلب قوي .
تمار : جا مسحي دموعج عبن ما تعرفين غلاوتهن عندي .
شمس : كومتني سلطانه ونوره من الكاع من كمت عطت من اركباتي كلش ماذياتني من صحت اتقرب تمار راد يشوف مكان الجرح بس ما خليته لزمني من صفحه ومن صفحه سلطانه ومشيت على كيف رجعت للبيت امي تلكتنه من الباب .
جوريه : يمه سوده بوجهي شجاريلج يمه شموسه طلعتي جنج العافيه .
شمس : وكعت يمه ...جابتلي اني وصله وماي حار مسحت جروحي وشدتهن راح تمار ونوره بقت يمي وضلت يوميه تروح وتجي نسولف سوه و تلهيني لحد ما طبت تماما تمار على طول يمنه بس من غلام بلدوام ميجي وهيج مرت الايام والأشهر وصار أكثر من 10اشهر من زوجت هناء تهاني جابت بنيه هناء اجتنه مره وحده واحد الان ماعدهه شي .
غلام : دخلنه بسنه ال 1973 نقلوني بمطار بغداد على سكك الحديد داخل القطار شغلي الحمدلله اجيبه كله بيد امي نحاول تلم حتى نرمم البيت بعد يرادله شغل لان هم شويه قديم وتعبان اليوم موعد نزولي للبيت وجنت مقرر أمر على هناء حتى تجي ويايه وصدك رحت لبيت خالتي ولكيت هناء محضره اخذتهه ورحنه للسلف وصلت لكيت امي محضره كلشي الي احبه ما عدهم علم بجيت هناء شافوهه تفاجاو بيهه وفرحوا .
هناء : صار اشهر متزوجه ومرايحه لبيت اهلي علاقتي ويه انور احسن ما يكون يحبني بجنون بحيث طلبت اروح لاهلي كوه قبل ولأن هوه عنده امتحانات اجيت ويه غلام وبعد سلام حار وتغدينه كعدنه نسولف .
جوريه : شونج يبعد امج مرتاحه .
هناء : الحمدلله يمه بخير .
شمس : حلوه بغداد هم طلعج انور تشوفيهه .
هناء : بفرح اي أخذني هواي مكانات حلوه وتمنيتكم وياي .
جوريه : شونه اخوج يمه ما سأل عني شو صار له هواي مجايني .
هناء : متريد تجرح كلب امهه فكلتلهه اي اي يمه دوم يسأل عنج وجان نيته يجي بس عنده شغل .
شمس : اندك الباب وطبت عمه فضه وبتهه كلش حبابه مخطوبه لابن عمهه .
فضه : ولج شونج عمه هناء .
هناء : الحمدلله عمه حبيبتي مشتاقتلج .
فضه : تشتاقلج العافيه حبيبه البيت هدوء بلياج .
هناء : بضحك قصدج جنت خابصتكم مو .
سلطانه : والله عاد أكثر ثنين وكحين عدنه انتي وفالح .
هناء : أنا مو مثل فالح أنا بس ويه اليندك بيه اله فالح ما تذكرين شسوه بينه من مصايب .
شمس : اي والله ما انسه سالفه الروث .
فضه : شني هاي سالفه الروث ولجن شو أنا ما ادري بيهه .
هناء : بضحك عمه السالفه قديمه عوفيهه لا حتى اكل متاكلين بعد .
سلطانه : لا خل نحجي عليج الله .
جوريه : بسجن عاد .
فضه : خيه دخل يحجن شمالج لو هذا عزيز الكلب ما تردين احد يجيب طاريه .
شمس : هذا يا عمه فد يوم من الايام جنه صغار موسم تمر الرطب كلنه الفالح اصعد نخل وجيبلنه مقبل ضلينه نلح نريد تمر غلام جان بلسوك هوه وسلطان امي كلت الفالح روح جيبلنه عاد هوه كال بشرط يجن وياي .
هناء : اي واحنه مصدكنه كلناله ميخالف نجي كال نتضروني ربع ساعه واجي بذاك الوكت جانت امي ما بايعه الهايشه .
سلطانه : اتذكر اجانه وره نص ساعه أقل وكال ياله امشن جان مدري شنو شايل ابايده ولافه بخركه .
شمس : اي صدك ومن رحنه صاح بينه كال كعدن جوه النخله تلاثتجن والتتحرك اموتهه أحنه من الخوف متحركنه كعدنه ....متحملت أكمل الموقف وضحكت وخواتي ضحكن امي عاطت بينه .
جوريه : بسجن راح اكوملجن .
فضه : كملي عمه شمس بروح ابوج معليج بامج .
شمس : اي عاد من كعدنه صعد هوه وصاح راح اشمرلجن الرطب واحنه متلهفات للرطب وصدك ما نحس اله وشمر علينه الروث مال هايشه ثأري رايح موعه ومخلي بقوطيه ومن صعد شمر علينه ويصبح ياله لكطن تمر واحنه تلاثتنه على فد عيطه يمممممههه وللبيت رحنه ركض الأمي ....ورجعت ضحكت .
فضه : بضحك قوي سود الله وجهك يا فالح على عملتك اكيد جوريه ما حاجته .
هناء : بضحك لا بكتهه لاول مره امي تحلفت بي لان جنه تونه غاسلات ومبدلات .
جوريه : بابتسامه الله يسامحه هوه الوحيد الشالع كلبي من زغره ومفرفحني .
فضه : اي والله ما انسه بيوم طبلنه غلام دمه بطوله من ورا.
فرحه بنت فضه : ليش شسوه لغلام .
شمس : هنه سوالف فالح هوايه بس بيوم جان يلعب بلعبته المفضله تعرفيهه عمه فضه يلم الشيش مال الدوه ويكسرهن ويخلي الجهال يمشون عليه واليتحمل يفوز وينطي شيشتين دوه فارغه احنه واكفين نباوعله وجان هوه يشمر الشيشه واجتي براس غلام وخلت دمه بطوله خله غلام يفرفح بدمه وميخلي يروح لامي حتى لتشوفه يكله اسكت وانطيك شيشتين دوه وغلام سوده عليه مفرفح .
فرحه : بضحك والله هل فالح مسوي مصايب .
هناء : يوووو لو تسمعين السوالف شكد منا الباجر ميخلصن .
انور : رجعت للبيت أحسه فارغ طبيت الغرفتنه استوحشتحهه يربي شيصبرني اسبوع رحت الصفحه الاتنام بيهه ذبيت روحي على مكانهه واستنشقت عطرهه المتبقي على مخدتهه وما حسيت بنفسي اله وانا غافي ماعرف شكد نمت وحسيت امي تكعدني .
ضويه : يمه انور حبيبي كوم تغده كافي نوم .
انور : فركت عيني وسألت امي ليش ساعه بيش .
ضويه : يا يمه سوده عليه حتى ما يدري ساعه بيش ساعه ب3ونص كوم يمه هم ياله تروح لابوك تكعد بداله بلمحل .
انور : كايم يمه كايم ...كمت تغديت وسبحت وطلعت للمحل وانا مقرر ما ابقيهه سبوع ما اكدر بدونهه .
شمس : من اخر مره وكعت من المرجوحه غلام سوالنه وحده بلبيت ونلعب بيهه عدنه نخلتين داخل بيت جدي الكعدنه بي وحده قريبه على الثانيه سوالنه بيهن مرجوحه وتجي نوره قلت جياتهه لان شويه صار بعيد بيتهم علينه همه صارو بعرب ال مطر واحنه بعرب ال حمدان يعني السلف مقسم عربين عرب ال حمدان وعرب ال مطر اجتي نوره وهناء يمنه وفرحه وبنات عمتي فتنه ونلعب مكيفين على المرجوحه المتزوجات والممتزوجان ضلن يمنه للضهر بعدين طشن بقت بس نوره واحنه تغدينه وصلينه .
نوره : شمس خل نروح نلعب بلمرجوحه عبن بنات عمتج ماخلني .
شمس : كومي حبيبه كعدت نوره وانا ادفعهه بعدين اجت هناء وسلطانه واحلام اجتي امي صاحت بهناء .
جوريه : ولج يمه هاي انتي الجبيره عود وتلعبين .
هناء : يمه بروح جدي خليني شويه ضايجه .
جوريه : ولج يمه اخافن شايله جاهل ويروح يطيح .
هناء : لا يمه ما شايله عبن من جيتكم توني نضفانه من شهريه .
نوره : ضلينه نلعب ونكمز حتريت نزعت الستره مالتي وخليتهه على شجره التكي ناصيه ورجعت العب .
غلام : رجعت تعبان من شغل الكاع تمار خطيه معافني ويايه كملنه وكتله ياله ابو الشباب نروح نتغده .
تمار : لا غلام ارجع للبيت أنا اسبح والعصر اجيكم .
غلام : جا خوش أنا هم اروح اغسل واتغده واخذلي غفه .
تمار : ياله في امان الله .
غلام : الله وياك ...رجعت للبيت لكيت البنات يلعبن وصوت ضحكتهه بارزه من بيناتهن عرفتهه جايه يمنه فتت جوه صارت عيني عليهه شمس تدفعهه وهيه ميته من الضحك وكفت متصنم لضحكتهه وابتسم اخذتني روحي لشعرهه شون يطير وياهه ولعيونهه الشالعات كلبي بلونهن الصار سنين اريد احزر شنو السر بيهن ليش كلساع يتغيرن اتمنا اتقرب أكثر واصفن عليهن نعلت الشيطان وفتت جوه بست راس امي كاعده اصلي اجتي سلطانه صبتلي تغديت وكمت سبحت طلعت من الحمام ملكيتهه سالت شمس جا وين نوره منو اخذهه شون تروح وحيدهه .
شمس : لا اجه كميل اخذهه .
غلام : جريت نفس خوش اذا تكدرين صبيلي جاي بعد اخوج .
شمس : يدلل غلام علينه .
غلام : بابتسامه دروحي صبيلي وجيبيليا بلحديقه .
شمس : خوش .
غلام : كعدت بلحديقه واستنشق بهواهه اليرد الروح شويه وجابتلي شمس الجاي وراحت صفنت على المرجوحه وأتذكر ضحكاتهه وابتسم درت وجهي وأشوف الستره مالتهه اي والله هاي سترتهه اتذكر تمار فصلهه يم عمي صادق كمت عليهه حاطتهه على الشجره شلتهه لتفتت محد اكو قربتهه على وجهي وشتميت عطرهه تارس الستره جنت اخذتهه حتى انطيهه لشمس حتى من تجي تنطيها الهه بس ماعرف شنو الي خلاني اخذهه واضمهه بوفيتي واقفل عليهه واخلي المفتاح بجيبي .
نوره : بلطريق تذكرت الستره كتله لكميل عفيه كميل الستره خل ارجع اجيبهه حباب .
كميل : دمشي يأبه شيرجعنه عود أنا اجيبهه بليل .
نوره : عليك الله لتنسه تعرف شكد احبهه لهاي الستره .
كميل : لج بس امشي والله انا اجيبهه .
انور : مرت يومين وانا مثل الكوه يصبر نفسه بعد متحملت خليت ورحت اجيبهه .......
شكرا لزيارتكم عالم روايات سكيرهوم
