رواية حبيبي طلع عدوي الفصل الثاني
وفي الوقت ده فرحت امه اللي كان اسمها منيره وقالت
منيره
ايوه كده عفارم عليك يا رؤوف انا كنت فاكره انك بتحبها بجد وكنت مستغربه ازاي نسيت اللي حصل بين ابوها وابوك لكن دلوقتي فهمت كل حاجه وعرفت انك داخل الجوازه دي وعارف انت بتعمل ايه
رؤوف
انا عمري ما نسيت يا ماما ولا عمري هنسى اللي حصل لابويا وانا مستني اليوم اللي اخد فيه حقه واعرف هاله ان مش كل حاجه بتاخدها كده
منيرة
الله يرحمك يا فوزي ده انا مش قادرة انسي اليوم اللي دخل عليا فيه وهو مقهور من اخوه اللي مرضاش يرجع له حقه في بقيت الفلوس
رؤوف
انا كمان لسه فاكر اليوم ده كأنة حصل امبارح ومش قادر انسي ان عمي هو السبب في موت أبويا
وافتكر رؤوف اللي حصل زمان بين عمه وابوه
#فلاش بااااك
كان فوزي قاعد مع اخوه سيد في البيت وقاله
فوزي
بقول لك يا سيد انا محتاج قرشين عشان انا جاي لي سفريه بره ومحتاج اسافر عشان انت عارف العيشه هنا بقت صعبه والشغل مش مكفيني وانا عندي عيال ومحتاج اعمل لهم مستقبل
سيد
وانا ما عنديش مانع يا فوزي اني اساعدك بس انت عارف ان الفلوس اللي معايا على القد ومش هقدر اديك المبلغ اللي انت طالبه
فوزي
طيب متعرفش تتصرف لي من اي حد في فلوس لحد بس لما اسافر واقف علي رجلي وارجع لك الفلوس كلها
سيد
انا معرفش حد يا فوزي بس انا اقترح عليك حاجه ايه رايك لو تبيع لي نصيبك في العماره اللي ورثناها عن ابونا
فوزي
بجد يا سيد يعني ممكن تشتري مني نصيبي طيب انت عارف اني انا كنت جاي عشان تاخده وتديني فلوسه وخلاص وكل واحد يبقى عارف حقه
سيد
خلاص تمام يعني انت متأكد يا فوزي انك عايز تعمل كده اصل انا كنت بقترح عليك اقتراح وانا مش عايزك ترجع تندم بعدين
فوزي
انا معنديش مانع يا سيد لاني زي ما قولت لك انا محتاج الفلوس دلوقتي ومش عايز اسيب الفرصه تضيع من ايدي ولو انت موافق نعمل ورق رسمي وكل واحد ياخد حقه
سيد
خلاص يا فوزي طالما انت مصمم ودي رغبتك انا موافق وهديك المبلغ اللي اتفقنا عليه
وبعدها فعلا جابوا الورق وقعدوا مع بعض وكتبوا عقد البيع والشراء وفوزي اخد الفلوس وسافر وهو فاكر انه هيقدر يشتغل ويرجع ومعاه مبلغ كبير يعوض بيه كل اللي دفعه
والسنين عدت وفوزي ما قدرش يعمل اللي كان عايزة والشغل ما مشيش معاه زي ما كان متوقع وبعد كام سنه رجع بيته من غير ما يجمع الفلوس اللي كان بيحلم بيها
منيره
شوفت يا فوزي شوفت نتيجة اللي انت عملته لما رحت وبعت نصيبك في العماره لاخوك بشوية الملاليم اللي انت خدتها منه وانت كنت فاكر انك هتسافر وتعمل ملايين وترجع تشتري اكتر من العماره
فوزي
بقولك ايه يا منيرة انا عارف يا منيره ان اللي حصل ما كانش زي ما انا متوقع بس خلاص اللي حصل حصل ومش هقدر ارجع الزمن لورا وانا دلوقتي خسرت كل حاجه
منيره
لا تقدر يا فوزي روح لاخوك واتكلم معاه وقول له ان العماره دلوقتي بقت تساوي اضعاف المبلغ اللي انت اخدته منه ويمكن ربنا يهديه ويديك فرق الفلوس
فوزي
وتفتكري يعني هو هيوافق يا منيرة يديني فرق الفلوس دلوقتي
منيرة
وهو هيرفض ليه ان شاء الله ده هو كده ضحك عليك واخد نصيبك برخص التراب وانت لازم تتصرف معاه
فوزي
خلاص انا هروح له فعلا ومش هسكت عن حقي انا تعبت سنين وفي الاخر رجعت زي ما سافرت ولا جبت معايا حاجه لعيالي
وفعلا راح فوزي عند اخوه سيد وقعد قدامه
فوزي
انا جاي لك يا سيد عشان عايز فرق الفلوس اللي بين اللي دفعتهولي زمان وبين قيمة العماره دلوقتي انت عارف كويس ان المبلغ اللي اخدته منك كان قليل والعماره النهارده بقت تساوي ملايين
سيد
ايه الكلام اللي انت بتقولوا ده يا فوزي انت عايز تحاسبني على سعر العماره النهارده ليه وانت وقتها كنت محتاج الفلوس وكمان عرضت عليا نصيبك وانا وافقت واديتك اللي اتفقنا عليه جاي دلوقتي تعيط
فوزي
انا فعلا خدت منك المبلغ اللي خدته عشان انت عارف اني محتاج الفلوس واستغليت ظروفي واشتريت نصيبي بسعر قليل
سيد
انا ما استغلتكش ولا ضربتك علي ايدك ولا اجبرتك على حاجه وكله اتعمل بعقد رسمي
فوزي
يعني انت يا سيد شايف ان مافيش ليا حق عندك بعد كل السنين دي وانا كده خلاص مليش غير الملاليم اللي خدتها
سيد
ايوه يا فوزي ما لكش حاجه عندي واللي بينا انتهى من زمان وانت اخدت فلوسك ومضيت على الورق بنفسك
فوزي
ماشي يا سيد بس انا مش هسكت وهعرف اخد حقي منك
سيد
اعمل اللي انت عايزه يا فوزي بس انا مش هديك جنيه واحد فوق اللي انت اخدته مني زمان احنا دلوقتي في الزمن ده مش لسه ورا
وبعدها خرج فوزي من عند اخوه وهو مقهور وحاسس ان كل حاجه ضاعت منه ورجع البيت وهو مش قادر يتكلم
منيره
مالك يا فوزي انت راجع من اخوك شكلك عامل كده ليه حصل ايه احكي لي
فوزي
اخويا رفض يديني اي حاجه وقال لي اني انا اللي بعت له نصيبي وان الموضوع انتهى وخلاص متكلمش تاني يا منيرة
منيره
انا كنت عارفه ان ده اللي هيحصل وانت اللي ظلمت نفسك من الاول لما بعت حقك وسافرت بس خلاص مبقاش ينفع الندم دلوقتي
فوزي
خلاص يا منيرة انا مش مستحمل ولا كلمه زيادة ااه انا مش قادر أنا حاسس ان صدري وجعني ومش قادر اخد نفسي
منيره
مالك يا فوزي استنى بس اقعد هنا وانا هجيب لك الدكتور حالا
وبعدها فوزي واقع على الأرض ومش قادر يتكلم ومنيره اتصلت بالدكتور وجاله وبعد ما كشف عليه
الدكتور
هو حصل عنده جلطه في القلب نتيجة لزعل شديد او انفعال قوي ولازم يروح المستشفى عشان يتلحق بسرعة
ومنيره فضلت تعيط وهي مش عارفه تعمل ايه وفوزي اتنقل للمستشفى لكن حالته فضلت صعبه وبعد فتره اتوفى فوزي بسبب الجلطه
#بااااااك
وبعدها تاني يوم الصبح رؤوف راح الشركة
وأول ما دخل الشركة وطلع على مكتبه وبعد شويه دخلت له واحده كان يعرفها زمان وقالت له
أماني
صباح الخير ازيك يا رؤوف عامل ايه
رؤوف بصدمه
مين أماني اهلا وسهلا ازيك يا أماني انا مش مصدق اني شوفتك بعد السنين دي كلها والله
أماني
الحمد لله انا كويسة انت اللي عامل ايه بقى تصور ان شكلك ما اتغيرش خالص ولسه زي ما انت بالظبط
رؤوف
وانتي كمان والله حلوة زي ما انتي وما اتغيرتيش كتير عن زمان يا اماني اتفضلي اقعدي واقفه ليه
أماني
هو انت اتجوزت مش كده ولا انا معلوماتي قديمة ولا ايه
رؤوف
ايوه انا متجوز حاليا بنت عمي وعايشه في البيت معانا انا ووالدتي واختي ياسمين
أماني
اه طيب مبروك يا رؤوف ربنا يسعدكم مع بعض يارب
رؤوف
الله يبارك فيكي وانتي بقى ايه اخبارك اتجوزتي ولا لسه زي ما انتي اصلك كنتي بتقولي انك جاي لك عريس
أماني
ايوه انا اتجوزت من يومها يا رؤوف بس جوزي اتوفى من فترة في حادثه كده واهو وربنا يرحمه
رؤوف
البقاء لله ربنا يرحمه ويصبرك يا اماني طيب انتي جايه هنا الشركة ليه خير
أماني
انا جايه عشان اشتغل هنا انا قدمت على الوظيفة واتقبلت الحمد لله وقالوا لي اني هبدأ من النهارده
رؤوف
بجد يعني احنا هنبقى زملاء هنا في الشركة بقى مع بعض طيب والله دي حاجه كويسه اوي
أماني
ايوه اكيد يعني وهنشوف بعض على طول يا رؤوف وبصراحه ده مخليني مبسوطه اوي اني هشتغل معاك هنا
رؤوف
ده انا هبقى سعيد جدا اني اشوفك على طول يا أماني وبصراحة الدنيا ساعات بتجمعنا بناس ما كناش متوقعين نشوفهم تاني
أماني
فعلا عندك حق الدنيا غريبة قوي وممكن بعد سنين تلاقي نفسك واقف قدام شخص كنت فاكر انك مش هتشوفه تاني علي العموم انا هاروح اشوف الشغل بقا عن اذنك
وبعدها راحت أماني لمكتبها وبدأت شغلها ورؤوف فضل قاعد يفكر فيها وعند ندي هشام كان داخل خارج من البيت ومش بيتكلم معها ولا حتى بيسألها عن أي حاجة وهي كانت قاعدة مستغربة من معاملته
ندى
هو انت هتفضل مقاطعني كده وما بتكلمنيش هو في ايه يا هشام انا مش فاهمه انت زعلان مني ليه للدرجة دي ليه وايه اللي حصل لده كله
هشام
انا مافيش حاجة ويا ريت احنا الاتنين ما يبقاش بينا كلام الفترة دي عشان كل مرة بنتكلم الموضوع بيتحول لخناقة وانا بصراحة تعبت من كتر الخناق
ندى
ليه بقى ان شاء الله انت شايفني بعمل ايه لكل ده انا مراتك ومن حقي افهم انت متضايق من ايه ومل يوم داخل خارج ولا معبرني
هشام
عشان انا زهقت من اسلوبك معايا لأني كل ما اتكلم معاكي في حاجة تفضلي تزعقي وتعملي لي مشكلة وانا في اغلب الوقت ما بكونش قصدي حاجة تضايقك لكن انتي بتضايقيني
ندى
خلاص يا هشام اللي حصل حصل ومش معنى اننا اختلفنا يبقى هنفضل زعلانين من بعض كده واحنا عايشين في بيت واحد
هشام
انت كل مرة تقولي خلاص خلاص وبعد يومين ترجعي تاني لنفس الموال وكأنك ما اتعلمتيش من اللي حصل وانا مش عايز افضل عايش بالطريقة دي
ندى
بقى كده يا هشام انت بتتخانق معايا وبتزعق لي بدل ما تحاول تفهمني وتتكلم معايا براحة
هشام
انا مش عايز اتخانق معاكي بس نفسي مرة تحسي ان البيت ده محتاج راحه وان كل كلمة مش لازم تتحول لمشكلة كبيرة
ندى
طب انا مش هقعد لك في البيت تاني وهسيب لك البيت وامشي طالما وجودي بقى مضايقك كده
هشام
اعملي اللي انتي عايزاه يا ندى بس انا مش هفضل كل مرة اجري وراكي واصالحك
ندى
خلاص يا هشام انا همشي وانت اقعد لوحدك وفكر في كلامك كويس اوي واعرف مين فينا اللي غلطان
وسابت البيت وهي زعلانة وراحت عند بيت هاله وفي نفس الوقت كانت مرات عمها موجودة هناك وأول لما شافتها قالت لها باستغراب
منيره
هو انتي هو في ايه وايه اللي جابك هنا يا ست ندى وعايزة ايه بقا
ندى
هو ايه اللي عايزة ايه يا مرات عمي وبعدين انتي بتكلميني كده ليه انا جاية اشوف اختي هاله ولا هي مش اختي وساكنة في البيت ده برضو
منيره
ايوه اختك وساكنة هنا معانا بس مش عشان اختك ساكنة هنا تقومي كل شوية تيجي لها البيت ده ليه كبيرة وهي انا
ندى
امال يعني لما اعوز أشوف اختي اشوفها في الشارع ولا ايه وبعدين اختي طول ما هي قاعدة هنا انا هاجي لها وهاجي براحتي ومحدش هنا يقدر يمنعني ماشي يا مرات عمي
منيره
انتي بتتكلمي معايا كده علي فكرة بقا انا مش عاجبني اسلوبك ده يا ندى وانتي داخلة البيت كأن البيت بيتك
ندى
عن اذنك يا مرات عمي انا داخلة اشوف اختي واطمن عليها وبعد كده نشوف الموضوع ده
وسابتها ندى ودخلت اوضة هاله ومنيره فضلت قاعدة مكانها وهي متضايقة
منيره
ايه البنت ام لسان طويل دي انا مش عارفة ايه اللي جابها البيت عندي هنا
ودخلت ندى الاوضة ولقت هاله قاعدة لوحدها
ندى
ايه يا حبيبتي عاملة ايه يا هاله طمنيني عليكي
هاله
الحمد لله يا ندى انتي جيتي امتي
ندى
الحمد لله يا حبيبتي انا قولت اجي لك عشان أنتي وحشاني اوي
هاله
وانتي كمان وحشاني قوي يا ندى تعالي اقعدي جنبي وقولي لي ايه اللي حصل معاكي شكلك مضايقه
ندى
شوفتي يا هاله اللي حصل من هشام انا اتخانقت معاه جامد ومقدرتش اكمل قعده في البيت ومشيت وانا مخنوقة منه ومن كل اللي بيحصل
هاله
طيب ليه كده بس يا ندى انتي مشيتي ليه ده حتي هشام بيحبك ومش بيقدر يزعل منك ابدا وانا عارفاه كويس
ندى
انا عارفة انه بيحبني وعارفة انه بيخاف عليا بس انتي عارفة ان بابا كان مجوزني له عشان هو ابن صاحبه وانا اضطريت اوافق عشان خاطر بابا ومكنتش بحبه ومن وقتها وانا مش عارفة اعمل ايه معاه
هاله
يا ندى انتي عارفة ان جوزك كويس ومش بيكرهك بالعكس ده بيحاول يستحمل حاجات كتير عشان البيت يفضل واقف
ندى
بس انا اسلوبي كده ومش بعرف اسكت لما اتضايق وهو مش عايز يتعود على كده وانا مش عارفة اعمل ايه
هاله
معلش يا حبيبتي لازم تستحملي شوية وتحاولي تغيري طريقة كلامك معاه حتى لو انتي شايفة انك انتي عندك حق عشان ده جوزك وبيحبك ومش هيقدر يستغنى عنك كده
ندى
يمكن عندك حق يا هاله بس انا كنت مستنية منه يحاول يفهمني هو كمان بس مفيش خالص من اقل كلمه بقا يعملي حوار وخلاص
هاله
هو اكيد هيفهمك بس انتي كمان حاولي تفهميه وخلي بالك ان البيت مش بيتبني على ان واحد بس اللي يتنازل لازم الاتنين يحاولوا عشان ما يخسروش بعض
ندى
خلاص يا هاله هقعد معاكي شوية وبعدها هشوف هعمل ايه مع هشام يمكن يكون هو كمان هدي ومحتاج حد يكلمه
هاله
ربنا يصلح بينكم يا ندى انا مش عايزة اشوفك زعلانة ولا عايزة اشوف بيتك يتخرب بسبب خناقة ممكن تتحل بكلمتين
ندى
طيب وانتي طمنيني عليكي يا حبيبتي عاملة ايه في الحمل واخبارك ايه دلوقتي مع رؤوف
هاله
الحمد لله يا ندى انا كويسة بس حماتي برضو ممرمطاني هنا ومخلية كل شغل البيت عليا وانا اصلا بطلت اروح الشغل عشان الحمل ومش عايزة اعمل مشاكل معاهم
ندى
بس انتي ليه مستحملة كل ده يا هاله هي الناس دي محدش يقدر يستحملهم اصلا انا مش بقول لك الكلام ده عشان اخرب بيتك والله ولا عشان ازعلك بس احنا عارفينهم من زمان ومش فاهمة انتي مستحملة كل اللي بيحصل ليه
هاله
اعمل ايه بس يا ندى لازم استحمل طالما رؤوف بقى كويس معايا وبيحاول يقف جنبي انا مش عايزة ارجع اخسره تاني
ندى
طيب يا حبيبتي انا فاهمة انك عايزة تحافظي على بيتك بس انا مش عايزة حد يعاملك وحش ولا عايزاكي تسيبي كرامتك على جنب عشان الجواز لازم يبقى فيه احترام من الطرفين
هاله
انا عارفة يا ندى بس الفترة دي مش عايزة مشاكل وخصوصا اني حامل وكل اللي بفكر فيه دلوقتي ان البيبي ييجي الدنيا في هدوء
ندى
وانا كل اللي عايزاه انك تبقي قوية ويبقى ليكي شخصية ومحدش يقدر يكسر عينك ولا يخليكي تحسي انك قليلة في البيت ده وانتي مهما حصل مرات رؤوف وليكي حق زيك زي اي حد
هاله
ربنا يخليكي ليا يا ندى انا عارفة انك اكتر واحدة خايفة عليا
ندى
وانا مش هسيبك لوحدك ابدا ولو حصل اي حاجة كلميني على طول
وفي الوقت ده في الشركة كان رؤوف قاعد في مكتبه وهو سرحان وفجأة دخل عليه خالد صاحبه وهو بيضحك
خالد
ايه رأيك بقا يا عم في المفاجأة دي يا رؤوف
رؤوف
مفاجأة ايه يا خالد ايه ده هو انت كنت عارف ان اماني هتشتغل معانا هنا في الشركة ومقولتليش
خالد
ايوه كنت عارف بس انا ما رضيتش اقول لك وقولت اسيبها لك مفاجأة كده من غير ما تعرف عشان انا عارف انك ممكن تفرح
رؤوف
وما قولتليش ليه يا خالد هو انت كنت مستني تشوف رد فعلي يعني ولا ايه اما انك عيل رخم
خالد
يا عم انا قولت بقى اعملها لك مفاجأة وبصراحة كنت عايز اشوف وشك وانت بتشوفها بعد السنين دي كلها هتعمل ايه
رؤوف
هي فعلا احلى مفاجأة حصلت لي من زمان بس انا مش عارف ليه حاسس ان الدنيا رجعتني لورا فجأة كده بعد ما كنت نسيت
خالد
هو انت لسه بتحبها بعد اللي عملته فيك زمان يا رؤوف ولا ايه حكايتك
رؤوف
انا مش قادر انساها يا خالد مهما حاولت اقنع نفسي اني نسيتها بس شكلها وهي قدامي رجع لي حاجات كتير كنت فاكر انها انتهت
وبمجرد ما قال كده سرح رؤوف في الماضي ورجع بذاكرته لأيام الجامعة
#فلاش باك
كان رؤوف واقف مع اماني قدام الجامعة وكان باين عليه السعادة وهو بيتكلم معاها
رؤوف
يا اماني انا خلاص قررت اني اجي اتقدم لك رسمي وانا عايز نبدأ حياتنا مع بعض بس في الاول هنعيش في شقة امي وابويا لحد ما ربنا يكرمني واقف على رجلي ونقدر نجيب شقة لوحدنا
اماني
ايه الكلام اللي انت بتقوله ده يا رؤوف انت عايزني اروح اعيش في بيت واحد مع حماتي وحمايا واختك كمان لا طبعا انا مش هقدر اعيش مع حد انا عايزة شقه لوحدي
رؤوف
ماشي يا اماني بس أنا الفترة دي هنقعد معاهم وبعدها هتكون لينا شقتنا لوحدنا وانا مش هخليكي محتاجة حاجة أبدا
اماني
لا يا رؤوف وانا مش موافقة على الكلام ده خالص انا ما اقدرش اعيش في بيت عيلة وانت عارف كويس ان بيت العيلة بيحصل فيه مشاكل كتير وانا مش عايزة ابدأ حياتي بالطريقة دي
رؤوف
بس انتي عارفة ان ظروفي مش سامحة اني اجيب شقة دلوقتي وانا كنت فاكر انك هتستحملي معايا لحد ما ربنا يوسعها علينا
اماني
انا مقدرش اعمل كده يا رؤوف ومش عايزة اتجوز عشان افضل مستنية سنين لحد ما ظروفك تتحسن انا عايزة اعيش حياة مستقرة من اول يوم
رؤوف
يعني انتي بترفضيني يا اماني بعد كل الكلام اللي بينا وكل السنين اللي قضيناها مع بعض
اماني
ايوه يا رؤوف معلش بس انا شايفة ان ده القرار الصح وانا اصلا جاي لي واحد كويس ومعاه فلوس كتير وهيعيشني احسن عيشة عن اذنك
وسابته اماني ومشيت ورؤوف فضل واقف مكانه ومش قادر يستوعب انها اختارت الفلوس والحياة المريحة وسابته عشان ظروفه
#باااك
خالد
ايه يا ابني في ايه انت رحت فين وسرحت في ايه كده بقا ايه رجعت الماضي واللي حصل فيه ولا ايه
رؤوف
هااا لا لا مافيش ابدا انا تمام بس افتكرت حاجات قديمة كده وخلاص يا خالد مش لازم تقف لي علي الواحده كده
خالد
طيب انت لسه بتحبها فعلا يا رؤوف مش كده برضو ولا إيه
رؤوف
انا مش قادر انساها يا خالد وده يمكن اكتر حاجة مضايقاني بس هي قالت لي ان جوزها اتوفى يعني هي كده خلاص ما فيش حد في حياتها دلوقتي وبقت لوحدها
خالد
ايوه هي بقت لوحدها بس خليك فاكر انها زمان اختارت واحد غيرك عشان الفلوس وانت وقتها اتوجعت بسببها ماشي
رؤوف
انا فاكر كل حاجة يا خالد ومش ناسي اليوم ده بس مش عارف ليه اول ما شوفتها تاني حسيت ان كل اللي جوايا رجع من جديد
خالد
خلي بالك يا رؤوف انت دلوقتي متجوز وعندك بيت ومسؤوليات وما ينفعش الماضي يرجع يتحكم فيك كده
رؤوف
انا عارف يا خالد بس ساعات الماضي بيرجع لوحده من غير ما نستأذنه
وبعدها عدت الايام وفضل رؤوف متعلق بأماني زي زمان وبيهمل في هاله مراته وفي يوم اتصلت بيه وقالت
هاله
الوو ايوه يا رؤوف انت فين انا عماله برن عليك من بدرى وانت مش بترد عليا هو في ايه
رؤوف
معلش اصل التليفون كان صامت ومسمعتش في ايه انتي عايزة ايه يعني يا هاله
هاله.
عايزاك تيجي معايا عند الدكتور عشان اكشف في المتابعه بتاعت الحمل عند الدكتور قريبكم ده
رؤوف
طيب ما تروحي انتي هو انتي صغيرة بقولك ايه يا هاله انا مش فاضي لك يلا سلام انا لازم اقفل دلوقتي ورايا شغل كتير
وقفل في وشها الخط وهي فضلت تعيط وهو راح لاماني المكتب بتاعها وقالها
رؤوف
بصي بقا انا لازم اتكلم معاكي يا اماني في موضوع مهم جدا وياريت تديني من وقتك
اماني
في ايه يا رؤوف مالك كده جاي وشكلك وطمتزتر هو في حاجة حصلت معاك
رؤوف
بصراحة انا من وقت لما انتي جيتي هنا وأنا مش مبطل تفكير فيكي وعايز اقرب منك زي زمان ولا انتي لسه مش عايزاني
أماني
ومين قال كده يا رؤوف بالعكس انا كمان من وقت لما شوفت وانا حسيت اني مشاعري اتحركت ناحيتك اوي وبفكر فيك برضو
