رواية جريمة في الكبارية الفصل الثالث والأخير بقلم ياسر عوده
-خلال سنتين بس قدر منصور بيه ومراته يجمعوا فلوس الكباريه، وبعد ما اشتروه فضلت مراته شغاله في الكباريه والسهرات الخاصه، لغايه لما قرر منصور بيه انه يتخلص من مراته علشان ياخد الكباريه لوحده.
وعلشان يتخلص منها كان محتاج يلبسها قضيه، والحقيقه هو ماكنش محتاج يلفقلها القضيه لان كل حاجه كانت جاهزه، وماكنتش قضيه وحده لا اتنين، اصل ليالي كانت بتشرب مخدرات، ومنصور كان بيشجعها على كده، واستغل مره وهي شاربه ومش في وعيها مضاها على عقد بيع نصيبها في الكباريه، وبعدها لما كانت رايحه سهره من السهرات الخاصه، منصور بيه بلغ الشرطه عن المكان اللى هي رايحاه، وطبعا الشرطه مسكتها متلبسه، ووقتها منصور بيه اتهما بالزنا، دا غير قضيه متاجره بالمخدرات اصل هي اتمسك ومعاها كميه كبيره من المخدرات، والشرطه اعتبرتها متاجه مش تعاطي، واتسجنت ليالي واتحكم عليها بـ 7 سنين سجن، وخد منصور بيه الكباريه لوحده.
-تمام ايه حكايه فريده وشوشو بـ منصور، وليه بيكرهوا نوران بسببه؟
-فريده دي تبقى اخت منصور بيه، وهو راح جابها من البلد بعد ما الامور استقرت معاه، وفي البدايه حاول ينزلها صاله الكباريه تشتغل ركلام، بس فريده كانت صعبه جدا، كانت بتتعامل مع الزباين بطريقه ماكنش ينفع ان منصور بيه يقبلها، اصل منصور بيه بيتعامل ان الزبون ديما على حق، وفريده كانت بتتعامل مع الزبون على انه شغال عندها، ووقتها حصلت مشاكل بين منصور بيه وفريه وطردها من الكباريه، بس بعد فتره قصيره اوي رجعت تاني فريده للكباريه، وكنا وقتها كلنا مستغربين، ازاي منصور بيه رجعها، وبعدها عرفنا كل حاجه، وعرفنا ان منصور بيه بيستغل اخته، اصله مابقاش مستكفي بشغل الكباريه بس، اصل الكباريه داب يدخله ناس اشكال واللوان، ومنهم ناس مهمين وعندهم فلوس كتير، وناس تانيه ممكن تعمل معاهم مصالح كتير اوي، وكان منصور بيه مركز مع رجال الاعمال اللى بيجوا وبيعاملهم معامله خاصه، وعرفنا انه كان بيجوز اخته فريده لـ أي راجل اعمال عاوز يدخل معاه في شغل، كان بيسلط اخته عليه علشان توقعه فيها، ولما يقع ويتجوزها عرفي طبعا وقتها بيبقى جاهز علشان يشارك منصور بيه في أي صفقه هو عاوزها، ولما المصلحه تخلص تتطلق فريده بكل هدوء وكل حاجه كانت بتخلص بالتراضي، واللى اعرفه حضرتك ان منصور بيه مقابل اللى فريده بتعمله علشانه كتبلها جزء من الكباريه، سمعنا ان صبها حوالى 20% من الكباريه باسمها، ودا السبب اللى مخليها تنفذ كل اللى بيطلبه منصور منها.
فريده بتعمل في الكباريه اللى هي عاوزاه، وقبل كده طردت اكتر من بنت من بنات الركلام من غير ما تقول لـ منصور بيه، وهو لما كان بيعرف كان بيعمل نفسه عارف وانه متفق مع فريده علشان شكله قدام العمال، بس الحقيقه انا سمعتهم اكتر من مره بيتخانقوا مع بعض في اوضه المكتب، وسمعت منصور بيه في مره بيقولها:
-انا مش عاوزك تنسي نفسك يا فريده، مافيش حد ليه كلمه في الكباريه ده غيري.
وردت عليه فريده وقالت:
-لا يا منصور، انا ليا في الكباريه زي ما ليك، واوعي تنسى اللى عملته علشانك، انا بعت نفسي لـ أي واحد انت كنت بتقولي عليه، علشان ابقى انا كمان من ملاك الكباريه، مش عاوزاك تنسى الكلام ده ابدا.
وقتها منصور بيه ماتكلمش معاها خالص، وكان بيوافق على كل اللى هي بتعمله، بس في مره منصور بيه عمل اللى مافيش حد اتوقعه، ودا حصل لما في يوم فريده اتخانقت مع نوران الرقاصه، ومش بس اتخنقت معاها فريده طردت نوران من الكباريه، ودا حصل قدام كل الشغالين في المكان، وكنت موجود وبشوف اللى بيحصل، ووصل منصور بيه وقتها، وكان متعصب اوي على فريده، ومش بس كده دا اتحايل على نوران علشان تقبل اعتذاره وتفضل موجود في الكباريه، كانت اول مره نشوف منصور بيه بالشكل ده، كان واضح عليه انه بيحب نوران اوي، لدجه ان نوران حطت شروط علشان تقعد، وكان اول شرط انه يضرب اخته قدمها وقدام كل اللى كان واقف وشافها وهي بتطردها، ومن غير تفكير نفذ شرطها، وبعدها طلبت ان فريده تعتذر منها وبردوا هو اجبر فريده تعمل كده، وحتي طلبت ان اجرها في الكباريه يتضاعف وبردوا نفذ شروطها كلها، ومن وقتها فريده فهمت ان منصور بيه ممكن يسامحها على أي حاجه الا حاجه وحده بس، انها تقرب من نوران الرقاصه.
ـــــــــــــــــــــــــــــــــــــــــ
-يعني دا السبب اللى مخلي فريده بتكره نوران؟
-طبعا يا فندم، اكيد هي مستحيل تنسي الاهانه اللى شافتها بسبب نوران.
-طيب بالنسبه للرقاصه اللى اسمها شوشو، ليه بتكرهها؟
-حضرتك اللى كان جايب الرقاصه شوشو هي فريده، كانت جيباها علشان تاخد مكان نوران في المكان، وفهمت نوران ده من اول يوم جت فيه شوشو، وعلشان كده نوران كانت بتتعمد تهين شوشو دي وكمان منعت ظهورها في الاوقات المناسبه علشان ترقص، واوقات كتير كانت بتلغي فقتها من الاساس، وشوشو كانت متأكده ان هي مش هتقدر تبقى رقاصه مشهوره الا لما نوران تختفي من قدمها نهائي، وعلشان كده كانت عندها استعداد تعمل أي حاجه، هي كانت بتعمل علاقه غير شرعيه مع منصور بيه علشان يديها فرصتها، بس رغم كل اللى كانت بتعمله، كان منصور بيه مش شايف غير نوران وبس.
ـــــــــــــــــــــــــــــــــــــــــــــــــــــــــ
ودي كانت الاقوال اللى قولتلها لـ وكيل النيابه، واللى طلب انه يحقق مع منصور بيه، ورغم اني عمري ما شكيت ان منصور بيه ممكن يكون ليه يد في قتل نوران لانه كان بيحبها، بس وكيل النيابه كان شاكك فيه، ودا كان واضح من طريقه التحقيق معاه، خصوصا لما سأله:
-انت كنت فين وقت وقوع الجريمه؟
-كنت في المكتب بتاعي يا فندم.
-في أي شاهد على كلامك ده؟
وقتها منصور بيه سكت شويه علشان يفكر، طبعا كان بيفكر يجاوب ويقول ان الرقاصه شوشو كانت معاه ولا لا، ووقتها قرر انه يقول:
-ايوه كانت في معايا الرقاصه شوشو، كنا بنتكلم بخصوص الشغل.
-قعدت معاك في المكتب قد ايه؟
-مش متذكر، بس تقريبا كده نصف ساعه.
-ايه اللى كنتم بتتكلموا فيه بالظبط؟
-هي كانت بتشتكي وعاوزه تغير معاد الفقره بتاعتها.
-المساعد بتاعك اللى اسممه مسعد قال انه لما دخل عليك المكتب علشان يبلغك بان نوران اتقتلت، شافك وقتها انت والرقاصه في وضع مخل بالاداب، ايه رأيك بالكلام ده.
-لا طبعا يا فندم، دا محصلش، واضح انه اتلغبط عليه الامر، وهو معذور اصله شاف جثه قدامه واكيد الموضوع ده خلاه يشوف حاجات محصلتش.
-انا ملاحظ ان انت مش متأثر اوي بالجريمه اللى حصلت، مع ان المعلومات اللى وصلتلي ان علاقتك بالمجني عليها كانت قويه اوي، وكمان كان في بنكم علاقه خاصه.
-لا طبعا يا فندم انا اكيد متأثر بموت نوران، خصوصا بالطريقه الفظيعه اللى ماتت بيها، بس انا مافيش في ايدي حاجه اعملها خالص، ومحتاج اركز علشان الجريمه اللى حصلت دي اكيد هتأثر على الشغل في المكان، ودي خساره كبيره وفي بيوت كتير مفتوحه بسبب المكان ده، واكيد الحزن في القلب طبعا، ربنا يرحمها كانت من اكتر الشخصيات المحترمه اللى عرفتها في حياتي.
-طبعا وكيل النيابه ماصدقش أي كلمه من اللى قالها منصور بيه، بس انهي معاه التحقيق ولو بشكل مؤقت، بس هو كان شاكك فيه زي ما قولتلكم قبل كده، وبعدها حقق وكيل النيابه مع فريده اخت منصور بيه، وسألها:
-ايه كانت طبيعه العلاقه بينك وبين المجني عليها؟
-زي علاقه أي وحده صحبه مكان بوحده تانيه شغاله في المكان ده، علاقه شغل وبس حضرتك.
-طيب بخصوص الحدثه اللى حصلت قبل كده لما طردتي المجني عليها من المكان، واخوكي اجبرك تعتذري دا غير انه ضربك وقتها، تفتكري ان ده مش دافع كافي يخليكي عاوزه تنتقمي من المجني عليها؟
-لا طبعا يا فندم، الموضوع مش زي ما حضرتك متخيله، الحكايه كلها كان فيها سوء تفاهم، انا كنت متجوزه وقتها من واحد اسمه حمدي غريب، واولاد الحرام حولوا يوقعوا بيني وبين المرحومه نوران، وقالولي ان في بين نوران وجوزي علاقه، وقتها زي أي وحده متجوزه حسيت بالغيره وروحت اتكلمت معاها، والحقيقه انا كنت قليله الذوق اوي معاها واتطاولت في الكلام عليها، وشهاده لله هي ماردتش عليا نهائي ولا حتى اتطاولت عليا، ولما اخويا شاف اني غلطانه اتدخل، وطلب مني اني اعتذرلها خصوصا لما فهمني ان اللى وصلي معلومه ان المرحومه كانت على علاقه بجوزي كدب، وقتها انا سمعت كلام اخويا واعتذرتلها فعلا، يا فندم اللى غلط يعتذر دا مايزعلش حد وانا غلطت وقتها واعتذرت، ومن بعدها علقتي بـ المرحومه كانت زي السمنه على العسل.
ـــــــــــــــــــــــــــــــــــــــــــــــــــــــ
وبرضوا وكيل النيابه ماكنش مقتنع نهائي بالرد بتاع فريده، كان عارف انها بتكدب عليه، بس للاسف ماكنش في أي دليل عليها، وبعدها طلب يحقق مع الرقاصه شوشو وسألها:
-انا عرفت ان العلاقه بينك وبين المجني عليها كانت علاقه سيئه، ودا بسبب ان المجني عليها كانت متحكمه في شغلك في المكان ومحدده الاوقات اللى بتشتغلي فيها، الكلام ده صح ولا لا؟
الوحيده اللى كان ظاهر عليها التوتر هي شوشو، ماكنتش زي منصور وفريده، اصل هما كانوا متمكنين من الكدب، اما شوشو فكان ردها بعد ما ظهر عليها التوتر وقالت:
-انا مش هخبي على حضرتك، طبعا مافيش وحده هتحب بنت قارها، وفعلا العلاقه بيني وبين نوران ماكنتش احسن حاجه، وكنت ديما بشتكي لـ منصور بيه ان نوران بتتعامل معايا بطريقه مش كويسه.
-وهو كان بيرد عليكي ويقولك ايه؟
-كان بيقول ان نوران اهم وحده في المكان، وان هيجي يوم وهاخد الفرصه اللى استحقها، وطلب مني اصبر لغايه لما اخد فرصتي.
-كنتي فين وقت وقوع الجريمه؟
-كنت عند منصور بيه، كنت بحاول اقنعه انه يغير معاد الفقره بتعتي، حتى حضرتك ممكن تسأل مسعد.
-ايه طبيعه العلاقه بنك وبين منصور؟
وقتها هي سكتت للحظات وبعدها قالت:
-زي أي علاقه أي وحده وصاحب المكان اللى شغاله فيه.
-مسعد قال في اقواله انه لما دخل مكتب منصور علشان يبلغه ان نوران اتقتلت، قال انه شافك انتي ومنصور في وضع مخل، ايه اقوالك؟
في اللحظه دي سكتت شوشو خالص ومردتش نهائي.
ــــــــــــــــــــــــــــــــــــــــــــــ
كلنا كنا مش عارفين ايه اللى هيحصل، بصراحه كل اللى كان شغال في الكباريه حاسس انه في وقت هيتهموه بالقتل، بس ماكناش نعرف ان في حاجات تانيه بتستخدمها الشرطه والنيابه بيعرفوا منها مين هو الجاني، ودا اللى حصل لما عرفنا ان الطب الشرعي لقى خصلات شعر في ايد المجني عليها، وعرفنا بعدها ان القاتل لما دخل اوضه المجني عليها وحاول يقتلها ساعتها هي قاومته ومسكت شعره في ايديها، والمعلومه الاهم ان الشعر اللى كان في ايد المجني عليها ماكنش شعر راجل، لا كان شعر وحده.
وقتها هما استبعدوا كل العاملين الرجاله اللى شغالين في الكباريه، وابتدوا يطلوبوا كل الستات اللى في الكباريه علشان يعملوا تحليل الحمض النووي، علشان يعرفوا الشعر اللى في ايد المجني عليها كان شعر مين بالظبط، وفعلا الحقيقه بانت، كان شعر شوشوا لرقاصه.
وقتها هما قبضوا على شوشو مره تانيه، والتحقيق معاها المرادي كان مختلف، ولما حست انها خلاص اتفضحت قالت:
-ايوه انا اللى قتلتها، بس انا ماكنتش لوحدي، منصور بيه وفريده هما اللى شجعوني اعمل كده، فريده كانت عاوزه تنتقم من نوران علشان بسببها منصور ضربها واهنها قدامنا كلنا، وانا كنت عاوز اخد فرصه وتبقى فقرتي هي اهم فقره، ومنصور بيه نفسه طلب اني اقتلها، اصله عرف انها اتفقت مع صاحب ملهي ليلي في دوله خليجه وانها هتروح تشتغل هناك وتسيبه، وقتها طلب مني اقتلها، وفعلا قتلتها وروحت على اوضه المكتب عنده ودخلنا في علاقه علشان نقدر نثبت اننا كنا مع بعض في علاقه.
اتقفلت القضيه وقتها، ومش بس القضيه هي اللى اتقفلت، لا كمان الكباريه كله اتقفل، ومن وقتها وانا قررت اني هدور على أي شغلانه محترمه، عارف اني مش هكسب زي اللى كنت بكسبه، بس اكيد هيبقى افضل بكتير من اللى حصل معايا.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
