رواية خيط وابرة الفصل السابع والثلاثون 37 بقلم شمس العراقية

مساء الخير أحبتي ❤

نور ... 

ـ أحس أجتني ضربه على رأسي من كلام الرجال يحجي وأني كلشي ما فاهمه بس الفهمته أحنه عايشين بخدعه جبيره وملفين بيتنا حرامي أي عمي الحرامي الجان يأكل ويشرب ببلاش وكل هذا هو بايگينا وأحنه يا غافلين الكم الله .. 

طلع نافع من بيته وباوعلنا وأمي أشرتله 

سميعه ـ أمشي صيحه گوله أمي تگول خل يجي بساع وأنتِ لفي شالج فوتي جوه . 

نور ـ دفعتني من الباب وأجه نافع وگف ويه الرجال يحجي ونافع يهز بإيده ما فهمت شبي 

نافع ـ أستريح حجي أستريح راح نأخذ من وگتك عمه سوي درب . 

نور ـ مشيت سريع ودخلنا أني ولينا ودخل الحجي هو ونافع وميثم الأستقبال وأمي أجتي المطبخ نافع يطف بيها . 

نافع ـ سولنا چاي .. 

سميعه ـ ولك يمه ما تفهملي منه أشو يگول محلات أثنين! 

نافع ـ هسه عمه عمه صبرچ عليه .. 

نور ـ وگف يخابر 

نافع ـ شيخ الله يگوي حيلك .. موجود مو رأيدك بسالفه تچي تكظيها تخص بيت خالي صباح لا لا ماكو شيء بس سالفة محلات وورث وخالي محمود صايره شبيجه أي تعال وتعرف .. أي أجه حجي جايب الأيجارات گلت يصير الكلام كدامك علمود نحط خالي ونحل هالسالفه كلها .. منتظرين شيخ . 

وين صار الچاي 

نور ـ عالنار هسه 

نافع ـ بدون شگر .. عمه دزيت عالشيخ هسه نكعد ونحجي ويصير خير وخالي وين مولي 

سميعه ـ ملتحق مدري شال رأسه من سالفة نورس گام ما يلفي عالبيت وحتى موبايله كسره من الأتصالات التجي من خوالك علمود بناته . 

نافع ـ هسه تبين .. وين صار هالچاي باچه هو 

نور ـ أشو تصيح ترى عالنار گتلك 

نافع ـ ما مصيح 

ـ عود زعلان 

ـ أي لاتحجين وياي 

ـ رجع كعد يم الحجي أبو جهاد وشويه وأندك الباب طلعله نافع مستعجل والله هالشيخ خوش شيخ كلها تهابه ولج لينا شيخج أجه 

لينا ـ أي مية هلا وإذا . 

نور ـ دخل ونافع أشرلنا على الچاي صبيته وميثم أخذلهم وركضنا من باب الداخلي حتى أمي ما خلوها تطب وبلش الحجي يحجي ... 

أبو الجهاد ـ والله يا أبني أحنه كل ستة أشهر نجمع الأيجارات وننطيهن لصاحبهن والمحلات مالت أبو نور جماعتي من السوك مأجريهن ولان أني صديق أبو نور وأعرف أبو نورس گالوا ما نأمن غير بيك توديهن لأبو نورس وهم المأجر يريد يطلع من المحل وگال بلغ أبو نورس بهل الحجي لان نتصل عليه ما نحصله وگلت أمرله للبيت هم أسلم عليه وأهم أنطي الأيجارات ونحجي .. 

الشيخ ـ حجي هنا كم محل 

أبو جهاد ـ محلين واحد بصف الثاني وأثنيهن مأجرات 

الشيخ ـ خير .. أشرب چايك حجي 

سميعه ـ چا أذا محلين عمج محمود شبايع منهن!! وچا حصة جديتج وجدج مو أنطاهم حصصهن جدج حبيب شچاي يصير 

نور ـ هسه نفهم السالفه كلها وخلي ولد أخوج يتصرفون هما اعرف بهيج مواضيع . 

.. سمعنا صوتهم گاموا ونافع وصل الحجي للباب وگال لأمي 

نافع ـ عميمه تعالي الشيخ يريدج .. چاي چاي 

نور ـ عفيه ما تشبع من الچاي جابلي الصينيه ميثم وصبيت الهم وأمي دخلت كعدت وأني ولينا واكفين بالطرمه نسمع ردت أدخل بس أستحيت من الشيخ.. ما تدخلين 

لينا ـ لا يابه 

الشيخ ـ نافع أريد منك تحجيلي السالفه كلها وبوكتها شصار ما صار وشلون توزعت الحصص وخالك شباع ما باع . 

نافع ـ والله شيخ أنه الاعرفه خالي بوكته من صار الحجي گالوا البيت الجبير جدي وجديتي مهديه الهم حصة عاد كالوا بيعوا المحلات وأنطوه حصتهم لان البيت جبير ومساحته جبيره وتفض بييع للمحلات والبيت يضل للبنات وعمتي وميثم محد يطالبهم بي بعد وحتى الراتب هم محد اله حق ..

.. والأعرفه بوكته ومتأكد منه خالي جان عنده محلين مو ثلاثه! وواحد منهن مسوي مخزن واحد مفتحه 

خالي محمود باع واحد والثاني گال ابيعه ونفك بي ديون خالك صباح مال أنشائيه ومسواك مطلوب هواي دين گأل أسدد بي ديون ..

وبوكتها اني هم التهيت ما تبعت بعد وخالي قادر هم گالي شعندك تتدخل اني هم سحبت نفسي گلت هما بينهم يحلونها مهم البيت يضل لعمتي

.. عاد وراي باع ما باع ما أدري بس الادري باع واحد واخذ جدي وجديتي وقسام شرعي وفكوا سالفة الحصص والورث حتى جدي وجديتي كالوا البيت عوفوا الهن لسميعه والبنيات والسالفه فضت بوگتها بالتراضي شلون هسه طلعن محلات أثنين ومأجرات أذن خالي صباح جان عنده ثلات محلات وخالي محمود باع واحد وعايف أثنيهن حسب ما سمعنا من الرجال مأجرات وكل هالمده هو يقبض أيجارات ودگ فلوس! 

الشيخ ـ هيج الظاهر 

نافع ـ يعني خالي محمود جان يأكل بمال اليتيم شيخ وجنتي ملفيه حراميه بيتج عميمه متگولليلي حظج وين نايم .. 

الشيخ ـ يالله ... 

نور ـ طلعوا ولينا ضلت على وگتها ومن طلعوا الشيخ باوعلها وصفن عليها وهي حجت 

لينا ـ أذا عندي خاطر يمك خلصنا من عمي محمود وبناته .. 

نور ـ بعدها دخلت البيت وهو ضل ساكت وأمي هم حجت 

سميعه ـ أي يمه أريدها منكم السالفه بعد ما ينسكت عنها وأنه تحملت وجرى على گلبي جثير مصايب وسوالف ما تنحجي بلعتهن وعديتهن بس هاي لا لهنا وگافي يا عمه أني بذيال بدشداشتك يعمه فگني من محمود ومن بناته ما شفت منهم بس الأذيه حجوا عليه وعلى بناتي طعنوا بيهن الا گالوا بس وأنه بعد مو بحاجتهم بحاجة رب العالمين يستر عليه وعلى بناتي وأبني صلوات صار زلمة ومو بحاجة والي عمت عيني على هذاك الوالي أشو لا يحل ولا يربط ويجي بس شالشنه بمشاكله هو وبناته من لفوا على بيتي ما شفت منهم الا المصايب والمشاكل گافي طگت مرارتي يعمه أريدها منكم أنتم كظبه أيدي .. 

الشيخ ـ يجرالج ما طلبتي الا حگچ .. نافع أنه مأخذ عميمه وياي للقصر الكعدة تصير بديوانه وأنت عليك خوالك تجيبلي محمود وجدك ياسين غيرهم ما تلفيلي 

علمود تصير كعدة وكلمن يأخذ حگه وشكو فلس قبضه من الأيجارات أرجعه الچ وأطلگج منه .

نافع ـ أن شاء الله .. بس أجيب لبنى والبنات أبقيهن هنا والحگگم . 

الشيخ ـ ليش خوما يضلن لوحدهن 

نافع ـ ميثم موجود زلمة يعجبك گدها وگدود وأنه بس تفض السالفه أجيب عمتي سميعه وأرجع ما أبات.. 

نور ـ ميثم ضحك ونافع حضنه من كتفه والشيخ هز رأسه ومشىٰ بعد مسافه وطلع جگاره دخنها وعينه عالباب بين دقيقة ودقيقه يندار على أمل تطلع ويشوفها بس هي طبت الغرفة بعد ما طلعت 

.. وأمي راحت لبست عبايتها ونافع جاب لبنى والبنات دخلت هي وجنطتها ما فاهمه شگو 

لبنى ـ شگو جابني على عمى عيوني ولينا وين والشيخ هنا شصار خوما راح ترجع وياه 

نور ـ لاتخافين السالفه ما تخص لينا تخص أمي وراح تمشي ويه الشيخ للقصر . 

لبنى ـ خل يرحون وتعالي أحجيلي شگو . 

نور ـ تمام .. طلعوا ونافع صاحني رحت وراه ها 

نافع ـ قفلي الباب وما تفتحينه كأن من يگن وحتى طلعه للماركت ممنوع ديري بالج لما أجي 

نور ـ أن شاء الله عود من ترجع نحجي أمانه لاتزعل مني

نافع ـ لا والله ما أحجي وياج وزعلان أبداً لاتحاولين 

ـ صدك تحجي 

ـ حتى رقمي راح أغيره خاف ما تعرفيني أعرفج عليه منا وهيج 

ـ لا اعرفك أبو الوگفات متشوفنا کبل دزينا عليك وأني المن أروح وأنخى غيرك أنت 

ـ أي أبجي أبجي بالجذب ما اجيتي راضيتيني على أقل علبة جگليت نحلي 

ـ والله أخذلك عبله تدلل صدك جذب بس أنت ملتزم هالفتره 

ـ شعليج جيبي جيبي .. 

ـ تدلل .. راح ورجعت ولبنى لازمتلي الباب 

ـ شگالچ .. تعالي أحجيلي هاي لينا ما تحجي مزعوجه وگبت على بناتي بس تعيط 

ـ يبوه شافته ويجوز ضاجت خطيه طلعي البنات من يمها 

ـ طلعتهن .. نافع شگال 

ـ ما كال شيء وصاني عالباب يضل مقفول اي تعالي أحجيلج .. كعدنا وحجيتلها وگمنا سوينا عشه أني وياها ونسولف وميثم يلعب ويه البنات ولينا حتى عالعشه ما اجتي وتعشينا وهي حاسبه نفسها دخلت عليها لگيتها تبجي گبل مسحت دموعها عالسريع . 

لينا ـ ها خالتي رجعت 

نور ـ لا بعد ما تجين تتعشين 

ـ لا ما جوعانه من اجوع أكل راح أنام 

ـ وگت نوم هسه گومي ويانا كاعدين أني ولبنى 

ـ رأسي يوجعني لاتلحين نور 

ـ تمام .. عفتها وكعدت يم لبنى بالحديقه والبنات يم ميثم لما شفنا ضوء السيارة أجوو ودگ هورن لبنى گبل نهضت ضلي باتي يمنا اليوم ولينا مالها خلك 

بلكي تحاجينها خطيه 

ـ خل أشوف نافع منو يگول يقبل . 

ـ ميثم فتح الباب ودخلت أمي فرحانه ها ماما بشري 

سميعه ـ خلصت خلصت الف الحمدلله ربي محمود مشكور خلصتني منه ومن بناته . 

نافع ـ طلگناها وصارت عزباء 

سميعه ـ ولا تبطل سوالفك أمشن سوله عشه صبوا العشه وگام وعاف الزاد مصبوب زعلان منهم على گد ما خلصت مصلحته گظب السياره وخبصني يله ويله . 

نافع ـ أهلج مو أوادم خليهم هيج أحسن .. يله نسواني على السياره يابه وخوش دياحه اليوم هذن ليش لهسه كاعدات 

لبنى ـ نامن العصر .. هسه بس أجيب جنطتي . 

سميعه ـ ضل خل نور تسويلك عشه 

نافع ـ ما أريد ما أتعشى أني 

نور ـ لا ماما ترى نافع زعلان .. باوعتله وعگد حواجبه 

صد وجهه

سميعه ـ أدري بي صاير بس يتزعل . 

نافع ـ أنه منا وهيج خليت قانون الما يداري خاطري أزعل عليه وبعد هاي هي وياه 

نور ـ فرصه ثانيه ماكو 

نافع ـ لاتحاولين أنطيتج هواي فرص .. يله لبنى وينج يابه . 

نور ـ دخلت وضل واكف ويه أمي وطلعت لبنى والبنات وراحوا الله وياهم واجتي امي تحجيلي 

سميعه ـ أي يمه أبوج أثاري عنده ثلاث محلات وعمج الكاولي طالع بايع بس واحد ومنطي حصة جدج وجديتج وعلى أساس الثاني هم مبيوع طالع مأجر 

مثل ما كال نافع ياكل بإيجاراتهن واحنه ما ندري عاد حجوا وفضوا السالفه وطلبوا منه فلوس كام يتبجج ما عندي وانه بيت ما عندي وصاحب بنات ودك اليتيمه عاد تنازلت بس مقابل يطلكني لان عمج قافل ما يطلك 

ونفس السيد العقدلنا طلگنا وافتكيت منه . 

ـ ها الف الحمدلله خلصتي والمحلات هسه أثنين موجودات 

ـ أي يمه سلموا المهمه لنافع هو يتكفل ويتفاهم وياهم ويستلم الأيجارات خير وبركه جان متونس عمج حسبي الله عليهم شگد حراميه وما يخافون الله لو تشوفين جدج ياسين شعمل عمل خطيه ما رضى الواحد يحجي الحق .. 

ـ همزين طلعت منه

ـ هذا صاحبه يريد يطلع منه كال الصبح يروحله علمود يعرضه للأيجار أحسن ما يضل معزل والأيجارات نستلمها وأوزعها عليجن بالتساوي الج ولـ أخواتج هذا حك وتعب أبوجن اجمعن واشتري بي ذهب شتسون سون مهم 

ـ ماشي ماما .. گامت نامت ووصلتني رساله من نافع 

نافع ـ كاعده نايمه .. 

نور ـ لا كاعده گول 

ـ ضجتي منو مو ترى أتشاقه وياج جنت 

ـ لا عادي ولا يهمك أي الصراحه ضجت عبالي صدك زعلت مني وأني گلشي ولا أنتَ

ـ ليش 

ـ لأن ما مستعده أخسرك مره ثانيه كصديق كافي عليه خسرت قبل وأنت تعرف الباقي .. أريد أضل محافظه على هالصداقة بينا نافع . 

ـ ما زعلان منج والله جنت أحب أتشاقه وياج أني ضجت من نفسي لان حسيت ضوجتج وضل أبالي أجيت أنام وكلت ارأسلچ

ـ الحمدلله طمنتي .. شكراً على گلشي نافع على گلشي وأسفه على گلشي هم 

ـ فدوه الج وعلى شُــنو تتأسفين يمعوده 

ـ على گلشي سببته الك أعرف بنفسي أني هواي أذيتك وجرحتك وجرحي جان عميق أني قسيت عليك وما أنساها شلون وگفتلنا بعرسنا كلهن يدگن برأسي وأنهضم حـــيل من أشوف وگفاتك ويانا ما تنعد غيرك يدير ظهره وبعد ما يلتفت . 

ـ غصباً عليه .. هي مال جرحتيني أي وكسرتيني هم أي بس مال قسيتي عليه لا أني بهاي قسيت عليچ من رديتچ من أجيتني وقسيت بكلامي وياج بس هيج أحسن ألنا أثنينا الدنيا ما كاتبتلنا نصيب ننجمع نور 

ـ ضليت ساكته وأختنگت بغصتي مقهوره عليه مو على نفسي لأن أتمنى أشوفه ومرتاح ومستقر بحياته دزيتله بعدك ما ناسيني مو؟

ـ أي والله بعدني

ـ ليش نافع ليش بعدك 

ـ أنتِ صعب تنسين بس الشاهد الله ما أباوعلج غير صديقة طفولتي وغلات حبوبة بگلبي ينعدم نظري اذا أباوعلج بغير نظره صديقة أما مشاعري بداخلي ضامها ما أعرف گلبي مستعزز بيها 

ـ أنسى نافع أنسى كافي تعبت هواي بحياتك صار الوگت لازم تستقر وترتاح عوف الماضي صح جان حلو بس نفس الوقت مأذي وما حصلت منه شيء 

ـ الماضي العشته وياج حصلت منه صداقه ما تتثمن بميزان الحب مرات الحب مو گلشي بالحياة هاي تعلمتها منج 

ـ صح 

ـ ولا يضل بالج عليه مدبر نفسي وچاي أحاول وأكو مشاعر جاي تتكون لأختچ بس بعدني بدايتها . 

ـ تستاهل كل الخير ولبنى تستاهلك وتستاهلها أصلاً كلش لايگيين لبعض 

ـ أي والله تدرين أحسها لايگتلي صح عناد وعدها رفعة خشم بس خوش بنيه تعجبني وراضي عليها .. 

ـ أي دير بالك عليها أذا أنطيتها گلبك تنسى باقر وتحبك أضعافك حبك هي هم مكسوره وأنهضمت مثلك 

ـ أدري .. لا أن شاء الله ما أقصر .. تدرين چاي أحاول أحبها بطريقه تستاهلها حب جديد خاص حصراً لگلبها 

ـ الله يدوم الحب والمحبه بينكم .. بس نافع خلي يكون عندك علم من هسه 

ـ بشنو عيني 

ـ لبنى ما تدري أو ما مخليه بالها عن علاقتنا أني وياك سابقاً أقصد 

ـ شلون يعني 

ـ هي من زمان ما تخلي بالها يم هيج مواضيع يعني مو حشريه وما تتدخل ولينا قبل أيام هي ملاحظه على لبنى أكو مشاعر الك وگالتلي ترى لبنى ما تدري وبوكتها هي سأله أمي وأمي گايللتها لا هي تحب غافر وغافر يحبها وهي كل ظنها أخذنا عن حب ومراسلات هالأمور فهمتني . 

ـ أي فهمت .. لا لبنى أكبر من هالأمور يمي لايضل بالج . 

ـ تمام عيني .. أخذ راحتك 

ـ الله وياج يابه ونور أمانه لاتخلين ابالج كلامي أعتبريني ما حجيت 

ـ لا عادي ولا يهمك مرات الواحد يحتاج يفضفض كلنا تمر بهل الأحساس .. تصبح على خير 

ـ وأنتِ بالف خير .ونمت بس ما أجاني النوم ضليت أفكر بكلام أمي والأيجارات وسالفة المحلات هواي أفكار تربعت برأسي وطيرت النوم من عيوني وخطرت على بالي فكره .. الصبح أناقش أمي بيها كون توافق .. 

كعدت الصبح وماما بالمطبخ .. ماما أريد أحجي وياج باوعتلي وصغرت عيونها 

سميعه ـ خيرج حلمانه تحجين وياي وجهج ما غسلتي! أحجي شعندج من الصباحيات أشو ما مرتاحتلج 

ـ ماما 

ـ أحجي يله 

ـ شوفي ماما أنتِ البارحه مو گلتي أكو محل معزل ووصيتي نافع يأجره 

ـ أي وشعندي بي تسألين

ـ شوفي ماما حبيبتي بدال ما نأجرله خل نفتح بي مشروع 

ـ وشنسوي بالمشروع ما محتاجين الحمدلله والمشروع مو يريد أحد يگابله چا بالسوالف 

ـ أني موجوده 

ـ أنتِ 

ـ أي شبيه أعجبج ترى .. ها ماما شتگولين الله عليج أنتِ بس وافقي وشوفي

ـ شأوافق ماما لا لا عوفي هالسالفه أحنه بدون شيء الحجي علينا هبت والعين زارگتنا عوفينا من أفكارج وخل الله ساتر علينا 

ـ أهوو ماما وشعلينا أحنه ما صدگنا خلصنا منهم ترجعين تهتمين لكلامهم الله عليج ماما حبابه لاتكسرين خاطري 

ـ ورجلج منو يكول يقبل لا ماما عوفي عوفي 

ـ رجلي شگو وبعدين أني مو أنفصلت عنه هم رجعنا 

لهل الموضوع تالي يعني 

ـ أنتِ أنفصلتي عنه بس بعدج على ذمته ما مطلگج ترضين تزعلين بعدج على ذمته وأذا أجه ورجعج ترجعين وياه 

ـ ما أرجع والله تردين بهل السهوله أنسى سوايته بيه والله وهذا الموضوع قافلته مستحيل أرجعله 

ـ مو كطعتي نفسج عليه حقيره روحج بي أضمن بس تشوفينه تكومين تموتين أنتِ بنتي محد يعرفج بگدي 

ـ هسه أجيتج بفكرتي عفتيها جبلبتي بغافر عوفي منا لوگته وبعدين هو من يكول يرجع 

ـ أسم الله بيش طالبتهم لايرجعون أن شاء الله 

ـ أن شاء الله وهسه شگلتي وافقي علمود أناقش أفكاري 

ـ تناقش أفكارها بطرانه يا ماما 

ـ أهوو ماما دگولي أي 

ـ ديله بله وعمامج وخوالج منو يرضى ماما مره تفتح مشروع سكتي ماما سكتي 

ـ أنتِ ميأوس منج .. عفتها ورحت دزيت رساله لنافع 

أكولك المحلات مو واحد تردون تأجرونه أني أريده افتح بي مشروع بس تعال أقنع أمي الله عليك نافع أريدها منك .. باليل فكرت واجت أبالي أفتحلي مشروع لنفسي أحسن ما كاعده وأريدك تساعدني ... رسلتها وبقيت انتظره يفتح ويرد عليه .. 

مرت ساعتين وصلتني منه رساله 

نافع ـ حلمانه بالمشاريع أنتِ وشنو المشروع أبالج 

ـ يعني موافق 

ـ أي 

ـ هواي شكراً 

ـ العفو .. گولي شنو أبالج وسهله 

ـ ما أعرف بعدني ما مفكره بس أبالي كوزمتك أو محل عطور شتگول 

ـ يريد منج طن فلوس هيج مشاريع مكلفه بس أذا ناويه تجييبن كوبي وشغلات تعبانه بي 

ـ لا شسالفه مو تعرفني كله ماركات وأصلي 

ـ أذا حضري جنطة فلوس 

ـ ها عزه منين أجيب 

ـ من ورث جدج بوگي 

ـ يا ورث هههه عزه لا 

ـ شوفي أكو غير مشاريع مو مكلفه توالمج وأبتعدي عن العطور والكوزمتك لان هاي شخصياً ما توالمج ومتعبه ورجال ونساء يشترون الافضل مشروع يكون بس نسائي! 

ـ ملابس ماركات 

ـ مثل شُــــنوْ عبايات قصدج 

ـ صفنت جبتها جبتها أي عبايات عبايات

ـ أي على كيفج بس عبايات شُـــنوْ

ـ عبايات خليجيه أني أشوف ومتابعه بيجات عبايات خليجيه تخبل وعليها ودائما أوصي لماما منهم

ـ أنتِ ينراد وياج كعده ونحجي وعلى موبايل ما ترهم سويلنا غده نجي نتغدا يمكم ونحجي بمشروعج هذا الي تفتحين علينا باب . 

ـ تدلل على احلى غده بس اقنعلي أمي وعوفلي الباب التفكرون بي . 

ـ سهله والله بس من هسه المشروع شنو تفتحي أخذ منه بلاش بدون نقاش هيج ما أقبل

ـ خرب يومك من هسه عقلك تجاري 

ـ أذا عبايات أدزلج لبنى شكو عبايه طاگه تكشخينها بيها أكون حصراً هي تلبسها محد لابسها قبل 

ـ أويلي من هسه يفكر بالمدام خل ينجح المشروع بالأول 

ـ ينحح أذا لبنى تلبس منه ينجح تصبلج العبايه صب شيخه بالباكيت 

ـ شلون رهمتها شيخه بالباكيت هههههه 

ـ شيختجن والله .. يله روحي جهزي غداج لما أكعدهن 

ـ تمام .. رحت بلغت أمي وغسلت وتحضرت وكعدت أكلب بالبيجات وأشوف بهل العبايات وحبيت المشروع كلش وأقتنعت بي واجوو وجر الكرسي وكابلهن شوف هذا البيج باوعله عباياته شگد حلوه . 

ـ حلوات لبنى تعاي شوفي هاي أوصيلج منها 

لبنى ـ اي حيل حلوه والله 

نور ـ هسه عوفلي لبنى أني انطيتك البيج توصي لو تناقشني بمشروعي أقصد هيج موديلات أريد 

نافع ـ ها 

نور ـ أي نافع شبيك 

ـ خل اسألج واروح أشوف المحل بعدها يصير خير سهله 

وعمتي بعدني ما قانعها 

ـ سگتت وتغدينا وكعد يقنع أمي جان عارضها غافر عاد نافع تكفل بالموضوع نكول قنعها وصدك بيومها راح شاف المحل ورجع كال محل مرتب كلش وديكور وكذا سابقاً جان محل عطورات وكعدنا نفكر ضليت أسبوع دايخه الا ان اتفقنا نروح الشورجه ونشوف الشوك

شبي .. 

وبيومها أخذت أمي ونافع وياي وأفترينا ما لكيت شيء عجبني ورجعت ضايجه وقررت أشتري من البيجات وأبيع ما جان عندي فكرة والمشروع يريد فلوس عاد أمي انطتني كم فلس كالت مشي بيهن حالج بالاول .. 

وفعلاً گمت أشتري من البيجات وفلوسي كلها طارت بالتوصيل نكول اشتريت وخليتهن بالمحل ضاعن بس توقفت وعلى كولت أمي العافيه درجات شوي شوي 

والعصريات أخذ ميثم وياي نافع يوصلنا وفتحت وكعدت ونافع حاصر ضحكته البضاعه ضايعه نافع لاتقهرني 

نافع ـ شبي العراقي والمصري ما عجبج 

نور ـ ما أحب تصاميمه 

ـ يله شوفي هسه واني جاي اسألج والله 

ـ دومك ما تقصر .. واجتي زبونه واني وياه واحد يباوع لثاني نريد نبوسها مو نبيعها وهي شبه خافت من نظراتنا وخلت وطلعت ونافع گبل صفك أيده 

ـ خرب بحظ الكواد شگو تباوعين الها تحركي احجي وياهل رحبي بيها المن مخليج بالمحل 

ـ أنت صفنت عليها بالأول شمدريني أرتبگت 

ميثم ـ والله أنتوا تباعون الها عبالك تردون تخطفونها اني خفت منكم الله شاهد حقها تنهزم حتى هذا الفرع بعد ما تطبله . 

نور ـ لا مو لهل الدرجه .. كعدنا ونافع وگف باب المحل يجر جكاير وبنات أثنين سافرات دخلن ويباعن على نافع ويضحكن 

ـ العفو منو صاحب المحل 

نافع ـ أني أتفضلي يابه 

ـ تسلم كلك ذوق 

ـ تدللي يابه بشنو أكدر اسأعدج 

نور ـ أكلهن بلسانه ومشن يباعن وهذا للسان قنعهن وحده منهن تسرتسحت خرب بيومك نافع واشترن كل وحده عبايه واصلا شكلهن مو مال عبايات وفوك هذا كله باعلهن بالسعر أعلى من اللي مشترينه وطگه وحده العبايه ٧٥ أنخوك ومشن وهاي تتفلت تريد ترقمه وهو على گد ما قبض الفلوس عينه نزرعت بالموبايل طنشها . 

نافع ـ خوش صيده أقصد خوش زبونات 

نور ـ ضحكت عليه وكعدنا وگلشي ما بعنا بطرك هالعبايتين ومن كعدنا نسولف وحجيت الهن شلون بعناهن ولبنى طگگت عيونها علينا ونافع ساكت يمسح شواربه ويباوعلي ولاحظت لبنى تغار خرب هاي ما حسبت الها حساب 

لبنى ـ بعد ما تروح 

نافع ـ أي هذا هو ما أروح والله 

نور ـ ومشروعي 

نافع ـ مو كدامج أني ما عليه منچ لأختج 

نور ـ أنهزم وعافني وضليت فتره عصرت روحي عصر يله نعباهن وبنص قيمتهن وقررت لان أتعب على مشروع هيج من بدايتها أفشل وگمت سويت حساب بإسمي وگمت أنشر عباياتي بالاستقبال ومليكانه ونافع يصورلي وبناته لعبن بينا فلك ولبنى حارت بيهن ملاحكات نافع وصفن على لبنى شگو 

ـ لا هيج .. أنتِ يحتاجلج مودل مو مليكانه! 

ـ قصدك لبنى 

ـ نجبي مخبل عاقل اسويها مودل لازم تخبلت بس المقصد من كلامي هيج يله يمشي شغلج يله 

ـ چا شلون 

ـ ما أدري خل نشوف تالي هالتصوير عالجايات من يتطور شغلج نفكرلج بيها 

ـ ورجعنا نصور وننشر وسويت دعم يم بيجات والحمدلله صعد حسابي وبلش الشغل يابه فرحت فرحه ما تنوصف وبسرعه خلصن عباياتي والشغل على الحساب أكثر من البيع والحمدلله .. ونافع ضل يسألي على بيجات تبيعلي بسعر أرخص وأنتظره يجي واجه ها بشر 

نافع ـ عيني سالفة تشترين من بيحات وتبيعين تعبانه وواكفه وخسارة فلوس كل أرباح ماكو ومشروعج يفشل

ـ چا شلون 

ـ صاحبي أبن خالته عنده محل عبايات قنعته والتقيت وياه وكال مو منا يشترون بضاعتهم من الكويت والأمارات عدهم معامل ومصانع وبرندات سالفة طويله عريضه هسه هاي مو مالتنا بس نريد مكان نشتري منه 

والمهم وهو صاحب مصلحة خوما يدليني بس قنعته وجبته لطريق وانتظره يردلي خبر والله كريم

ـ تحمست وبقيت أنتظره وأسبوع وردلنا خبر 

ـ يابه لازم نسافر! 

سميعه ـ تسافرون منين طلعتوا بالسفر خاب ما تعوفون هالشغل مبين ما وراه فايده بس تعب صارلها فتره صارت هيكل عظمي منا دوامها الصبح منا بنتها منا شغلها العصر عوفي يا ماما شلج بهل الشغل محتاجه فلوس أنتِ . 

نافع ـ شلون عمه غير تتبضع هذا الشغل عمه وهنا هي ما يعجبها شيء وهذا الولد مبين الله هادي علينا وگال اوديكم على المصنع الي يشتغلون اله عبايات يعني خاص بي 

ونشوف ونسأل خوما من أولها تمشي عدله الواحد إذا ما يتعب ما يلعب . 

نور ـ وفعلاً قنعت ماما وقررنا نسافر الكويت وأخذت ميثم وياي ونافع والولد رحنا بسيارته ونافع ليگدام وياه وأني وميثم ليورا يارب أفتحها بوجهي وسهل لي أمري 

_______________

لبنى ـ وعيت على روحي وكفت كبال المرايه وصفنت على نفسي فتحت شعري أمسح كحلتي الساحت 

بشرتي الصافيه افتر واشوف جسمي صفنت على عمري أرمله وعندي بنتين ماتهنيت بزواجي ورجعت اتزوجت حمايه لا خيار لا قرار لا دراسه لا هدف بالحياه مجرد عايشع تحت ضل 

سنه عشتها ومن بعده من أصعب السنين الي مرت بحياتي واطلع صوره وارجع أحفظ تفاصيله نغمات صوته 

محادثاتنا صوتيات واركز بالبنات اشوف رموشه وعيونه الحادات بيهن 

تمددت عالتخم دموعي تجري لا أرادياً الغصه ذبحتني 

احارب مشاعري بكل ما اكدر 

حرام ما يصير عار الله ياخذج شون الج نفس شون نسيتي 

اني ما نسيت وعقلي يكلي جذابه نسيتي دليل شون نسيتي نفسج بيد زوجج حركتني حرك هالكلمه

أضرب راسي بإيدي وضليت نايمه من كد ما بجيت غفيت واسي شكبره صار 

كعدت على صوت البنات يلعبن بالنفاضه أخذتهن رضعتهن سبحتهن وحده تمشي وحده بعدها تحاول تأخرت بس سنونها طلعن من وكت اذا راح تتأخر بالمشي 

فقره مالهن صوت اشتغل وهنا ورايه من مكان لمكان 

العابهن واضحكً وياهن وأعوف كلشي واحضنهن وابوس بيهن يابه يا ريحتجن شكد طيبه وماعدها حظ الماعدها بنيه 

ما سويت غده غير شوربه الهن واني سويت زلاطه لان أخر فتره من استقريت بهالبيت رجع وزني يصعد 

بعد ما نزلت لل٥٥ بعد وفاه المرحوم والولاده 

قسته البارحه صاير ٧٤ وبسرعه يبين وعيوني تغوص جوه جني عميل صيني .. 

افتر بالبيت روحي ما أعرف شسوي وتذكرت كلامه يعني لازم يتمم زواجنا ياربي أني إشسويت بروحي وگفت عالمرايا وجهي ما حافته من وفاة باقر وحواجبي صايرات غابه أمازون .. لازم أروح على نور تساعدني أني متوتره ما اعرف شأسوي . 

گبل أخذت موبايلي ودزيتله رساله رغم متردده بس يله 

كتبت اله نافع عادي أروح لبيت أهلي گبل جاوب 

نافع ـ أي عيني روحي بس لاتتأخرين أرجع الكاج بالبيت 

لبنى ـ ساعه وأرجع أريد أشوف لينا 

ـ روحي عيني خل ميثم يجيج مو تروحين لوحدج 

ـ تمام .. دزيت على ميثم وأجاني لكيت نور مسبحه بنتها هلاو شلونكم لينا وين 

نور ـ هلا عيني فاتت تسبح .. 

لبنى ـ أكولج نور أجيتج مستعجله أريد منج شغله وأكون ممنونه منج

ـ گولي يمعوده عيوني الج 

ـ شوفي ما أعرف شگولج أحجي ومتوتره ولزمتني الرجفه وبالگوه أبلع ريگي نوب شكله ونظراته وهذيج اللحظه خلتني أدوخ كمت أغمض وأفتح نحولت 

ـ لبنى شبيچ صاير وياج شيء متزاعله أنتِ ونافع أحجيلي ليش ترجفين ومتوتره وخايفه 

ـ أنتِ أختي وأمون عليج هذا مدري شگولج أريدج ترتبيني من أيدج على حفافه تنظيف بشره سنفره وهالأمور أني أكدر بس أشو أيدي متأخذ وأنتِ شغلج يخبل شفتج من سويتي لينا هيج أريد أطلع عروس گلتها ونزلت رأسب وخجلت منها وأدردم أمداني شبيه أستخفيت . 

ـ أي من عيوني ولا يهمج هاي شغلتي أموت واعشق سوالف العنايه أصلاً أنتِ عروس ما تحتاجين وعادي لاتخجلين مقدره وضعج ومن حقج تعيشين حياتج وتستقرين شنو قابل الحياة تتوقف علمود فلان وعلان يدقق وراي .. طنشي وعيشي هو العمر مره وحده

ـ هيج تگولين 

ـ أي لاتستحين من نفسج أبداً أنتِ ما مسويه شيء عيب متزوجه ورجلج شاب وحلو والعين عليه أحتوي وخلي الج لاتجي وحده تهفه منج . 

ـ هزيت رأسي وكملت بنتها وأستلمتني شغل ساعه يله كملتني وبناتي عفتهن على لينا وكملت يله أني اروح تأخرت . 

ـ الله وياج عيني أكولج عندي مسك أخذته ريحته تخبل بعدني ما مستخدمه ريحته شوي قويه خل اجيبه الج 

ـ عندي كومه والله 

ـ لا هذا ريحته تجنن تستفادين منه . 

ـ مشكوره عيني أخذته ورجعت البيت عالسريع همزين ما راجع دخلت سبحت وعفت الباب مفتوح علمود أباوعلهم سويت تقشير وهالأمور 

گملت وطلعت ولكيت نفسي أسشور شعري وسرحته وخليت بس كحل ومرطب شفايف وريشت عطورات وخليت من المسك وأباوع لنفسي والعب بشعري النسيان نعمه للبشر .. 

عندي دشداشه لون جوزي بيها ورده صغيره برتقاليه حلوه مرتبه باوعت عالسواد الي خنكني خنك لبستها وباوعت عليها حيل لأكتلي هيج ويرجع يحتيي كلبي 

ما شفت شيء من حياتي وفقيره إحساس الحب 

فقيره مشاعر إنطفى كلشي بعينيأفتقد الاهتمام 

حبيته لا هذه البدايات حبيت الأحساس خليني قاسيه وياه ارجع اعيش لنفسي .. 

صار العصر هو ما بين ردت أخابره لا ما أريده يگول خفيفه وملهوفه شسالفه ..صفنت شسوي عشا 

رن التلفون شفته مكتوب نافع جاوبته هلا نافع

نافع ـ هلا عيني شلونچ

ـ زينه تمام 

ـ شتسوين مسوين 

ـ كاعده دأفكر اسوي عشه أنت تتأخر مو

ـ أگلچ لا تسوين عشه ما أريد حتعشى ويه جماعتي 

لأ تعبيلي روحج

ـ تمام أساساً أني مراح أتعشىٰ

ـ ليش يابه شنو تموتين روحج

ـ لا سمنانه أخر فتره من الضوجه اكل فسمنت شويه

ـ ما بيج شيء اسم الله على جمالج لا سمنانه ولا شيء أساساً جسمج يشك ويملخ 

ـ جاوبته تمام كصتي عركت توترت 

ـ خنستي شبيج 

ـ ما بيه شي اروح البنات يتحركن هواي خاف يطلعن للطرمه 

ـ الله وياج يابه 

ـ أهفي على روحي أحس روحي اختنكت كلبي يرجف 

رحت عشيتهن وكملت گلشي ضليت متمدده اتابع مسلسلاتوالبنات رجعت سبحتهن ونومتهن صارت ب٨ونص دخلت للغرفه الجرجف بدلته عطرتها حضرت ملابسه مسحت المرايه الغرفه بارده طفيت الاضويه خليت شيء خفيف 

رحت للمطبخ طلعت ركي ثرمته طلعت عصير برتقال وكسرت ثلج خليت بي ودك هورن فزيت وعدلت روحي فتحت باب المطبخ رحت فتحت باب الحوش 

هو يتلفت يخاف لا احد يشوفني 

دخل السياره رجعت سديته ساعدني بالباب لان ثكيل بالسحب 

نافع ـ ها شلونج . 

لبنى ـ بخير رجعت من وكت 

ـ أحسن مو بله عاجبني الاستقرار 

ـ أبتسمت بوجهه شايل بيده علاكه بيها كاسه أيس كريم ملون خله ايده على كتفي ونمشي سوا 

استغربت حركته بس مشيت والله اني بربوك عاجبني 

دخلت قبله انطيته المي والعصير كعد عالتخم 

رفع رجليه وباوعلي . 

جواريبي واحميلي الجاي 

ـ هذا شمتخيل روحه انزع جواريبه عييع باوعلي رافع تك حاجب واني مستقرفه نزعهن رحت أذتهن للغساله 

نافع الحمام جاهز تكدر تسبح . 

رحت حميت الجاي هو راح يسبح طلع تمدد عالتخم 

انطيته الجاي ورحت غسلت البدله وشريتها اليوم دوامه عسكي بالعادة خفاره .. 

جبتله ركي والجاي شيعجبه يأكل يشرب 

ـ هاي البنات ليش تنوميهن من وكت خطيه

ـ لا شمعرفهن هو نظامي الاطفال بهيج عمر عدهم هرمون النمو يشتغل بعد ١٢بليل لازم همه بعمق النوم أقل شي لازم ينامو بالتسعه بليل او أقل متعلمات وأصلاّ يحبن النوم مثل ابوهن 

ـ الله يرحمه برحمته يارب 

ـ ضليت ساكته محجيت شيء

ـ الثوب طالع انفلاقي عليج 

ـ شكراً 

ـ تعاي يمي ليش منهزمه ما أكل بشر 

ـ لا مرتاحه 

ـ بس أني ما مرتاح تعاي يمي 

ـ رحت يمه كأني منومه مغناطيسياً جذب اصلاً مكيفه 

خلاني جوه جناحه على صدره اشتميت ريحه عطره طيبه بس قويه 

يتصفح بالموبايل يلعب بشعري 

ـ شعرج ريحته طيبه شنو مسرحته اليوم

ـ أي سرحته سويت تعديلات خفيفه احس روحي جنت مخنوگه 

ـ خوش أحسن معليج بحجي أحد من حقج تعيشين بالتالي أنتِ بشر من دم ولحم لو كانت المعادله معاكسه مكان أنتظر بگدج حتى لو كان الوفاء ماخذ حيز بحياته هم عنده صبر ويخلص 

اكو أصغر منج وعاشن نفس التجربه وبقن بلا زواج

المسببات اهواي للزواج بالتالي النفس تريد ومن حقج تعيشينها لان بذرتج طيبه والنسيان اكبر نعمه للبشر 

لو ما النسيان احنه كان ضلينا بدائره وحده نفتر مثل الناعور بحياته ما وكف أو مثل ميل الساعه يعيد كلشي بكل يوم 

استعدادج حتى تبنين حياه مستقره مو شيء سهل 

لازم تنهين كل الأفكار السابقه وتبطلين مقارنه حتى تنجحين وتخلين هدف بحياتج .. 

مو صح يا لبنى

ـ يحجي واني دموعي تجري يمسح وجهي بخفه ايده باس رأسي وصفن بعيوني بحر بيني وبينه شيء يريد ومتمسك وشيء رافض ومتخلي . 

ـ فرشي ونامي يابه والله ولا اريد شيء منج 

ـ صفنت عليه مثل الجاهل الي تصفعه أمه حتى يتربى واني بهل اللحظه دموعي ما وكفت حظني بكل هدوء

ـ ما قصدت أحجي هالكلام حتى ابجيج بس ماعندج ام ولا اب ولا احد يريد مصلحتج وينصحج مثلي وأنتِ مو بس أمانه خالي أنتِ امانه اخويه أنتِ وبناته 

بيوم من الايام جنتي زوجة مرت اخويه وشوفي تغيير الحال وهسه أنتِ زوجتي وحلالي وبحضني والدنيا تدور مو لان عكست ويانه بس يمكن تريد مصلحتنا يمكن اني لو ما منفصل جان انطوچ لناجح وتدمر شبابج وشبابه 

ولا تهتمين خلي كلشي يمشي بمرساه والمشاعر تتكون بالموده بالرحمه بالأحترام مو صح يا لبنى وهسه مثل الشاطره 

روحي نامي لان هالعقل الناصح الي صار ساعه يثرد حجي ممكن هسه ينكلب عتوي عليچ وأسوي شيء أنتِ رافضته وخايفه مني وأني ما أريد أخوفج .

ـ ضحكت كمت رحت جبت فراش وفرشت . 

ـ جيبلي فراش فرشيلي أنام هنا 

ـ تمام فرشتله بصففنا تمدد وأني تمددت بصفه بس بعد مسافه وسحبني على أيده وشعور غريب أني بحضنه وبين أيديه شغل موبايله ويباوع فلم لحد ما نعس وغفيت اني بإمان بدون تفكير .. 

كعدت الصبح لكيت نفسي غرگانه بحضنه حاضني من ظهري تملمت أريد أتحرك متقيده برجلينه بقيت نايمه على أيده وصافنه على روحي ومبتسمه سحبت نفسي وگمت غسلت وفتحت ريگي بخاشوگه مربى وكلاص ماي متوتره وريحة عطره بملابسي .. فات من يمي للحمام وطلع ويباوعلي بنظرات توعد ما مرتاحتله گلبي دگ بكل سرعته . 

نافع ـ سويلي چاي 

لبنى ـ سويتله وكعد يشرب ويدخن وأني طلعت اللحم نكعته أريد أطبخ الغده ونوب هو كاعد عالميز مقيد حركتي .. گام صب كوب ثاني وبلش جگاره ثانيه أحس جاي يحارب روحه بالجگاره

وگفت أگطع اللحم وأجه خله الكوب عالسنك باوعتله بلعت ريگي .. سحب السجينه ذبها بالسنك وقربني اله وأخذ شفايفي ولمني لصدره أكثر ونفس شعور هذيج البارحه بس هالمره أحلى ... وأندك الباب بكل قوته وأثنينا فزينا . 

نافع ـ يا گواد أبن گواد أجه هسه 

لبنى ـ طلع وأني عدلت نفسي ولازمه گلبي وأسمع صوت الحجيه بالحوش تصيح عليه 

الحجيه عطايات ـ ولك تريدني أنه أجي أرضيك ولك أنت جلب مگصصات أذنه چا هيج تسوي بيه تعلعل گليبي وتلوعني عليك . 

لبنى ـ نثولت شلت الفراش عالسريع ودخلوا باوعت عليه شاليه الفراش عاد ذبيته عالتخم وتقربت سلمت عليها هلا بيج حجيه . 

الحجيه عطايات ـ شنهي كطعت عليكم العافيه شبي وجهج مخطوف لونه . 

لبنى ـ ما جاوبتها ودخلت ونافع يعض بشفته ويهز بإيده يكزكز عليها يريد يأكلها وأني لازمتني الضحكه على حركاته 

نافع ـ وگتج عرسچ ويه عرسي وگتج . 

لبنى ـ شلت الفراش وهي كعدت يم البنات تباوسهن وتشمهن وتحاجيهن ونافع صافن عليها ولاحظت بأيده جنطة ملابس 

الحجيه عطايات ـ يابه عيني وماي عيني يابه بنياته يابه ريحته يمه بنياته هذن يمه عزيزات گلبي شگول على عمج خذاجن وما عاد جابجن ليا .. يمه جني أبوسن باقر عمت عيني عليك حبوبه . 

نافع ـ حبوبه جايبه ملابسج شنهي زعلانه 

الحجيه عطايات ـ إنطي عليجتي لحرمتك تظمها وجايه أنامن على گلبك وعفتلهم القصر وزعلت ما ينعاش بي هضموا هواي حراير وأنه هذا العمل ما أرضى بي لا ما أرضى بس شسوي لجدك حبيب مشىٰ على شوره وعلمود وهبيه أم خشم وما يريدن يزعل أهلها كسر رگبة هاليتيمه بهل الزواج الأكشر . 

نافع ـ صدك جذب حبوبه ما يشيلج بيتي تشيلج عيوني بس ها بعدني زعلان منج گلبي ملجوم منج حيل 

ـ خاب ما تسگت لاتخليني أغلط عليك وأنعل والديك هو أنه گلبي ملجوم منك لو أنتِ وواكف وتعايرني بحجيات زرفن گلبي كلما تصير مشاكل تچي تگالبني وتواسيني ويه مهديه چا هيج ينافع تعاير حبوبتك وأنه أباوع على طولك وناذره عمري لشوفة وجهك وأنت تجافيني وكالب وجهك عليه ومن تجي ما تسلم ولا تحاجيني

ـ گامت تبچي وتمسح بشيلتها ودنگ نافع حضنها ويبوس بيها وهي تبچي خطيه كسرت گلبي ضل حاضنها ويبوس بيها . 

نافع ـ حگج عليه حبوبه 

لبنى ـ باسها من رجليها وضربته وحضنته وتراضوا ورحت خليت الچاي وسويتلها ريوك وهو چاب صناديك وعلب دهن وروبه وحليب خلاهن عالكاونتر ويتلفت تتريك وياها 

نافع ـ لا أريد أتريك بيچ . 

لبنى ـ تقرب ودفعته نافع حبوبتك لاتچي ما گدرتله باسني بحدود دقيقه وراح كعد يمها وكعدنا تريگنا وشحلو سوالفها ولاحظت علاقتها حيل قويه وحلوه بنافع لهل السبب حيل يحبها وتحبه .. 

نافع ـ وجدي شيگول ما ناوي يحلها لو عاجبه وضع حربي عايف القصر وكاعد هنا ترى الله ما يراضاها على هالعمل هذا زوجتوا وشلتو خطايا بنات العالم وهسه مرته زعلانه وهذيج عايفها .. چا الزواج لعبه عدكم . 

ـ أنه ما أرضى على هالعمل يحبوبه بس كله من وهبيه الخانسه چن عدها شغلة ثأر رادت بس كظيها شون ماجاظ گبت علينا فرد گبه خلت جدك يفتل فتالته يأخذ حربي ويگبع للغريبه ويجون ووياهم بنت أخوها وهذيج وينها عافها بغرفة باقر ما أعترف بيها لان حرمته مشت بس خلي خلها تعرف بروحها شسوت بظناها أمتعينج من كثر خلفتج هو هالواحد داري نعمتج . 

ومتحمزتلي بالحزام وشادتلي العصابه ومتككمه بالأسود والوجه بكل عزه لطام وتفتؤ بهل القصر مثل محراث الشر تفتل عجاحتها تريد تصير شيخه من تالي وگت عليّ

حتى للفلاحه والگاع گامت ما تطلع ولا عليها أدز صالحه ولميعه وهي متشيخه وتأمر وتنهي چا أنه شنهي خراعة خضره تردين تمشين كلمتج وتوگفين خشمج عليَّ يإم خشم مثل ما مشيتي وكبعتي حربي ببنت أخوج 

بس خلها وخل القصر يفيدها هو والبي شضل بي هالمهجوم هو أبنج عافه ومشى من مشت حرمته رجله ما خطت عبته حجىٰ أبوك راد ما فعل وزين يسوي هذا دواهم هذا دواهم . 

نافع ـ ماكو وحده تصير شيخه وتكظب القصر عگبج يحبوبه أنتِ شيختهن وأنه بالقصر ما عندي بس أنتِ وإذا زعلت منج لأن خليتي خالتي تمشي كلمتها عليچ بس صارت بعد والقصر ما تعوفينه تعبتي وكظيتي عمرج بي تعوفينه لنسوان ما مرجيه منج حبوبه 

ـ شسوي بي چا هو شضل بي إذا الله يهداك وتأخذ الشيخه من أخوك وتجيب حرمتك وتكظبه يمه عندي عيد أكون ممنونه منك يحبوبه يحيلي وبعد حيلي شتگول يمه والله الشيخه والمشيخه مهدامك تلوگلك أنت سبع وأبو الگلفات ما ترضى بالعوجه وهاي من شيم الشيوخ . 

نافع ـ لا حبوبه دخيل بختج عوفيلي هالسالفه وخلي الله ساتر عليه وكاعد بيتي وحدي ومرتاح ولا هالطلابه عمي المشيخه تريد أهلها أني حتى رأسي مصفح ما يكعد عليه العگال لو بلاش ما أخذها هي لايگه لشيخ بس حظه عكس وياه وسبحان الله الشيخه هم تريد حظ وبخت . 

ـ دتفكر يحبوبه أنت حتى مريتك شيخه والله تلوگلك دانش فگرك بيها 

ـ هي مال شيخه شيخه بس مال رجلها يصير شيخ لا هاي واكفه ودي الفصل ويجيب الفصل ويوميه عمامك خوالك ولبنى شاده حزامها وطايره نومتها وسالب راحتها ودك عزايم وغسل جدوره شسالفه يابه لا حبوبه لا خلي الله ساتر علينا فدوه لمصنمچ .. 

ـ يعني مامش منك 

ـ مامش مني گلشي ولاتحاولين وياي قافل أبداً والله أني بغير بيت ما أحب أبات مو عاد أصير شيخ .. حبوبه سگتي عني لاتشيلين خطيتي بهل السالفه لا أكوم أحطج بالسياره وأوديج للقصر أنتِ طلعتي ما زعلانه طلعتي تردين تقنعيني أصير شيخ كشفتج مو أعرف دروبج جيتج هاي من الصباحيات هاده عليه مو خاليه . 

ـ چا الشيخ واكع بيدك هو أنتَ شيخ من كاعك بس لو الله يهداك وأنه من زمان مخيله عيني عليك بس جدك يريد حربي شيخ وحربي دومه يگولي حبوبه أنه ما أريدنها شتگول حبوبه 

ـ هاي شلون بيها جلبت يالحمزه جيب اليفگها حبوبه شگول بس گومي اوديج بالسياره ما عدنا نسوان يزعلن 

ـ لا أريدها ابقى جم يوم أني ما عاجبني حالك أريدن أضل يمك 

ـ شبي حالي شاگيلج أني 

ـ ما سر خاطري 

ـ ما سر خاطرج ترة حبوبه حالي كلش زين شبيج وياي بس أنتِ البرأسج أعرفه شنو بس ما أصير شيخ والله 

ـ لاتصير شنهي غصب هاي هي سد السالفه 

ـ أي سديناها .. أني رايح أنام وراي طلعه 

ـ وين تروح للقصر 

ـ لا حبوبه شغل شغل .. 

ـ طلع وگمت طبخت الغده وولوگت الغده يله أجه وتغدينا وهو يحوص وأغسل مواعين يفتر وراي نافع حبوبتك لاتشوفنا 

ـ هي أصلاً شاكه بينا وحاسه ماكو شيء بينا هاي ما يفوتها شيء . 

ـ أي وشنو 

ـ بس حضنه بوسه لاتسوينها عليه فدمره ومخليه بينا ساتر ما صدگت الله هداج عليه 

ـ وحبوبتك شبيك نافع 

ـ أهووو دروحي 

ـ زعل ودخل الغرفة وبعد ما طلع وضليت كاعده يم الحجيه وتسولف عن عمتي وهبيه وشغلها محد راضي على تصرفتها تخلبت من تالي عمرها .. 

ضلت يمنا أسبوع ونافع هم هالفتره ملتهي ويه نور والمحل مالتها والعرفته باعوا واحد من المحلات وفتحوا واحد وجاي يساعدها والحجيه ما راضيه على هالشغل وكلما يطلع تهز برأسها وتحجي 

الحجيه عطايات ـ منين طلع هالشغل هذا ما تكعد وتگابل بنتها وأمها شلون وافقت بنتها تشتغل بالسوك لو هاي دروبك أنت قنعتها چا تعلمني بيك أبو الفواين 

نافع ـ حبوبه شسالفه غير شغل وما مسويه شيء حالها حال هالعالم ومكان المحلات مو داخل السوك منطقه حلوه وأحسن ما كاعده وبعد هي خلتها برأسها 

ـ أها چا هيج لـو لبنى بمكانها توافق عليها تشتغل 

ـ لا ما أوافق 

ـ شمعنى على نور توافق 

ـ هاي زوجتي وأريدها بالبيت وبعدين حبوبه تردين تسوين مشكله بيني وبينها تحرشينها وتفتحين عليّ باب خل الله ساتر عليه وتفتر على بناتها مثل الحمامه

ـ لا حبوبه شعليه .. توكل حبوبه توكل بعدين من ترد نحجي 

ـ خير أن شاء الله .. 

لبنى ـ طلع وأشرتلي كعدت يمها ها حجيه 

الحجيه عطايات ـ أنه وليدي وأعرفنه وأعرفن ريحته مامش بي ريحه منج وليدي لحد هسه ما محصل شيء مو يا يمه 

ـ نزلت رأسي وسگتت 

ـ ليش يمه عايفته هيج 

ـ الحجي سهل حجيه 

ـ أدري صعبه عليج بس الحي أبگى من الميت يا بنتي وباقر عزيز علينا گُلنا وأستشهد الله يرحمه ونافع صار زلمتج وابو بيتج وجهالج أن شاء الله هو سندج وعزوتج چا أنتِ عليمن تباوعين بعد مو عليه ما يصير يا بنتي وهذا حقه وهو صابر عليج وأنتِ هم ليني وأنطي من نفسج وداري عشچ ولمي زلمتج ترى نويفع خوش نويفع هذا تربيتي مربيته عالغالي وعقله بي وزنة ذهب رجال ثگيل ورزن . 

ـ أن شاء الله حجيه 

ـ أنه أدريج تدرين بالچ عليه أنتِ تعجبيني من يوم شفتج گلت هاي من نسوان گبل تحمل الرجال ومره وتذكريني بنتي المرحومه عريب هم جانت هيج تشبهج وحلوه شيخه كلما أتنوعلج أشوفن عريب بيج والله يحفظج ويترس حضنج من جهال نويفع وتفرحين گلبي گبل لا أموتن ما أشوفن خلفته منيتي أشوفن وليده الأ أسويله عرس أذا شفت أبنه يوم عيد .. 

ـ إبتسمت وحضنتني وباستني وكعدت تحجيلي وتنصحني بطريقه شگد حلوه وتعلمني شلون أتحمل وأصبر بهواي أمور حجينا وتمنيت اضل أسولف وياها بس أجانا نافع وشكله تعبان .. أشرتلي ولحكته الغرفه 

تسبح لو تتعشىٰ 

نافع ـ لا هاي ولا هاي گبل أنام وراي سفره الصبح 

لبنى ـ تسافر! ووين 

ـ ويه نور للكويت علمود البضاعه حضريلي جنطه صغيره أحتمال نبات وشريط باندول هم خليلي رأسي يصدع 

ـ تمام عبرته ومشيت وهو واكف يغير ملابسه 

ـ هم بعتوا اليوم هم اجني عليكم بنات مثل هذيج المره 

ـ أي خير من الله كلهن صاگات 

ـ أي زين أهم شيء صاگات 

ـ أي چا شلون

ـ نفضت الجنطه ومشيت ولزمني وخر نافع أنت متونس والله ما تبطل سوالفك وما رايح تشتغل وتساعدها رايح تشوف بنات 

ـ غير محروم 

ـ أروح أنوم البنات وخر عني 

ـ ما تبقين يمي 

ـ لا ما أبقىٰ 

ـ ليش شمسويلج يا ظالمه 

ـ وخر نافع حبوبتك كاعده أروح أنومهن 

ـ ونامي وياهن لاتچين بعد ديري بالچ بس تدخلين الغرفه بعد ما تطلعين من يمي سلامات 

ـ أصلاً ما ادخل بعد 

ـ أني أعلمج بس أرجع من السفر أصبريلي شايله خشمج عليه مو بسيطه 

ـ ما جاوبته مشيت وضل هو گبل نام حتى ما تعشى والصبح كعد من وگت جنت نايمه ويدفر بيه أي كعدت شبيك تدفر رجلك ثكيله 

ـ أنتِ ما تحسين لو أنام فواكاج شسويلچ

ـ أستغفر الله ..

ـ منج ششايفه گدامج كافر تستغفرين عابت هالوجه وبلت 

ـ أنت شبيك من الصباحيات گابه سوادينك 

ـ منج من تصرفاتج من وجهج اليبجي تعاركي سويلج مشكله .

ـ هسه شتريد... مد أيده راد يضربني بس رجعها وهو معصب 

ـ أكوم سنونج بحلگج من أحجي تلنطمين وتسمعيني گومي أنگبري سويلي سم أريد أولي . 

ـ نفضت الغطا بقلة صبر وگمت وضربني جلاق شاغت روحي ردت أعيط بس كتمتها وغسلت وسويتله الچاي وهو يدخن ويگلب بالموبايل خليته كدامه ومشيت توقعت منه يحاجيني ما حجه لحد ما شرب الچاي وطلع حتى ما وصاني مثل كلمره .

والظهر عمتي سميعه مسويه غده أجتي أخذت الحجيه ورادت مني گتلها بعدين الحكج وبقيت أنتظرت يتصل ماكو منه گلشي شطت من القهر تالي لحكتهن وتغديت وبقيت هناك بتت وتعللنا خوش تعلوله ورجعت البيت أني والحجيه وأجيت أنام لكيته دازلي رساله . 

نافع ـ مشتاقلچ 

لبنى ـ گمت أرمش كل قهري تبخر بدون تردد گتبتله وأني هم مشتاقتلك 

ـ هــا أنتِ مشتاقتلي! أخاف موبايلج مبيوك مهكر يابه 

ـ شدعوه نافع 

ـ چا راح أتصل وأريد أسمعها بصوتج علمود أخزنلج أشتياق أكثر 

ـ لا بقينا عالمراسلات أفضل 

ـ لا تعاي أتصال مراسلات ما تسويلي شيء 

ـ باوعت عالحجيه نايمه أوكف أروح الغرفه 

ـ أي روحي يابه روحي 

ـ أتصل وجاوبته وأني نايمه على مخدته ريحة عطره بخشمي نافع 

ـ ها حبيبي 

ـ مو بعد وگت على حبيبي 

ـ لا مو بعد وگت أصلاً تأخرنا كافي أريد أعيش أستقر گلشي أريد أعيشه حصراً وياج أني أنسان متعوب لبنى 

ـ تمام 

ـ وين نايمه 

ـ على مخدتك 

ـ شجيب باجر وأنام أني وياج على مخده وحده ورأسج يتوسد حضني من فدوه لصماخج هذا الشالع گلبي 

ـ خجلت منه أنت شمسويتلك أنت هم ما ينگدرلك 

ـ أني رجال

ـ بگلبي حجبت أروح فدوه .. أي عيني 

ـ چا مشتاقتلي ولچ 

ـ همست أي 

ـ من يمج ما تشتاقين تكظينها عليه تتننر وتختل من هنا تشتاقين وتشعلين أهلي شعل 

ـ حبوبتك جانت هنا ما يصير 

ـ وگبل حبوبتي وگبل وگبل بس تستاهلين الواحد يصبر على مرج 

ـ ها شمعنى 

ـ أحسج مختلفه بيج شيء يجذبني باجر من اجي أحجي الج من أكابل عيونج 

ـ ليش مو هسه 

ـ لا على أرض الواقع أفضل ووياها بوسه دسمه أروي بيها عطشي 

ـ على طاري العطش حبوبتك كاشفتنا وكالت وليدي بعده عطشان 

ـ أي مو گتلج ما تفوتها فايته 

ـ أي . 

ـ إشسويتوا اليوم وين طلعتوا 

ـ رحنا تغدينا بيت أهلي خالتي مسويه غده للحجيه وتعشينا وتعللنا ورجعنا 

ـ ها زين مطبقه قوانيني 

ـ ما تباتين 

ـ أي نعم بس بيتي عينچ تغفىٰ 

ـ عود ليش 

ـ شيء خاص بيه لاتبحرين زايد

ـ تخافين عليه نافع 

ـ أي شلون ما أخاف عليچ 

ـ من ورا التصوير مو 

ـ سدي الموضوع كافي

ـ لا خل نحجي 

ـ تصبحين على خير الواحد متصل يحجي تجيب الماضي وتنعلين أبو الأشتياق وساعته . 

ـ سد الخط ودزيتله نافع مو قصدي حتى الأنترنت فصله .. أشسويت أني يجوز يضوج من هالموضوع أو تجي أباله ... خرب بعقلي أذا اعرف أحجي .. 

ضليت مقهوره حتى نوم ما نمت للصبح گمت صليت ولكيت الحجيه كاعده تسبح أبتسمتلي تونست بيها هالأيام وجودها بالبيت بركه تمنيت تبقى يمي بالأخص حنيتها على البنات يخنسن يمها ويلعبن وأشتغل براحتي ولا أشيل الهن هم .. 

طبخت الغده وسبحت وعيوني عالموبايل لا هو أتصل ولا أني .. تغدينا هو ماكو والحجيه عينها عالباب بس ما سألتني عليه وسمعت طبة الباب فز گلبي ملتهفه لشوفته وأدري بي زعلان مني 

دخل سلم وينزل بحذائه والبنات راحن عليه أخذهن لحضنه يبوس بيهن.. 

نافع ـ الله يساعدكم 

الحجيه عطايات ـ هلا يمه ويساعدك كظيت شغلك 

ـ أي الحمدلله .. أكو غده 

لبنى ـ أي أصبلك لو تسبح 

ـ لا صبيلي جوعان 

ـ رحت صبيتله وأخذتله كعد يأكل والبنات يمه أخذتهن وما رضى 

ـ عوفيهن ما مسويات شيء 

ـ كعدت وأباوعله يأكل ويوگل البنات والحجيه تسأله ويجاوب ومن كلامه رفع عيونه صارت عليه دفر گلبي ونزلت رأسي أفرك بإيديه .. 

ـ حبوبه حضري نفسج جدي يريدج تردين القصر 

ـ أها أخاف أنتَ تريد تشلفني 

ـ لا حبوبه أحطج بعيوني لا والله خابرني أبويه كال جيبها وتعال جدي داز علينا علمود حربي 

ـ حطوا عقلهم برأسهم وتذكروا حربي شخلوا على حربي 

البنيه طافيه يا وليدي هي والميت سوه ما عجبني حالها أمس جنت عدهم وشفتها 

ـ حقها چا اللي صار هين عليها منهي الترضى تنزل عليها ضره وهي يله الها عشرين يوم متزوجه . 

ـ شغلج مرت أبوك .. گوم وديني بس أريدن منك تحاجيهن وتفضون سالفتهم گبل لايصير شيء ما محسبين حساباته 

ـ شنفض حبوبه نطلك ما ترهم هم عيب من أهلها شنهي چاي نلعب علىيهم ولينا ما ترجع بس نروح والله كريم . 

ـ لما ليونه وما عجبني حالها فلا أروحن ورجلي تعتب الباب بعد بس حالها كسر خاطري شدعي عليج يوهبيه على عمايلج السود مثل وجهج . 

ـ يصير خير حبوبه .. حضريلي ملابسي أسبح 

ـ گمت حضرتله ملابسه ورحت الحمام علكتهن وأجه توترت وأحس أختنگت هو واكف يم الباب مشيت من يمه وهو ما تحرك ولا حجه .. 

سبح والحجيه تحضرت ومشوا للقصر 

نافع ـ الباب ما ينفتح لما أچي 

لبنى ـ أن شاء الله .. طلعوا الله وياهم ورجعت غسلت ملابسه ونشرتهن وأخذت البنات ونمت 

كعدت المغرب من النوم رأسي مصطور من النوم ونافع راجع من القريه ومشغل الماطور ومحضر زاهي والأسفنجه يريد يخلي الفاره بالحنفيه حتى تغسل 

اخذتها منه وشكلتها هو عادي تركيزه مو وياي أو يتحاشى ينظرلي ..

رحت سويت عشه وسويت طماطه لاجعه بدون بصل وطلعت صدر دجاج متبله بس أحمسه اله وخدرت ﺟاي وأجه هو يتمندل بطوله كعد عالكرسي وكعدت كباله

ـ صبيلي چاي وعشه ما أريد تعشي أنتِ والبنات 

ـ صبيتله ويشرب الچاي وباله يم الموبايل 

تسوكتوا كملتوا شغلكم 

ـ أي 

ـ شصار على موضوع لينا وحربي جدك شيگول 

ـ بعد 

ـ يحجي بثكل وأني اخذت وجهه زياده الثكل زين 

وأحجي بيني وبين نفسي تغشم روحها هو انتي لازكلتله كوه مروه استغفر الله عفته رحت لكيت البنات لازمات المميات فارغات گمت أخذتهن عشيتهن وگملن 

فتت من يمه عالكاونتر خليت المميات وأريد اغسل ايدي سحبني من خصري بخفة ايده صار جسمي على رجليه . 

ـ شبيج شو احسج ضايجه 

ـ لا ما بيه شيء طنكوره النومه لا أكثر 

ـ من شفتج شلون نايمه عرفت البارحة بالليل ما نايمه 

ـ يحجي ويرفع بشعري يمسح على خدي اني سلهمت خررب مو وكتك غير لو يبطل حركاته طرزان زمانه

ـ گولي نافع بس صوت ناصي

ـ ليش يعني 

ـ هيج .. جاي على بالي اسمعه بصوتج 

ـ نافع بيك شيء 

ـ أستغفر الله كومي من يمي اني ما أكعد راحه 

ـ ليش شسويت اني 

ـ ما سويتي شيء بس 

ـ تقرب لزم راسي ويحجي بصوت ذايب 

ـ ما بيه ما أكدر أني بشر أعذريني أني أريدج لبنى 

ـ تقرب أكثر وباسني وتوقف العقل عن التفكير متناسين منو اني ولا هو حكمتنا مشاعر ورغبه وأحساسيس حلوه تنعاش بكل علاقه 

لحظات من العمق الروحي الي يتسلل بشكل خفيف مثل خيط خفيف لعتمه قاتمه ولزمت ايدي تخف وتثكل روحي تغيب بآحضانه وشفايفي صارت تتناغم بشكل مريح صوتي الناصي صار اشبه بالماكو .. 

لما تعيش مع إنسان يقدرك يحترمك يكن الك محبه مو شرط محبه عشاق بس المهم يفضلك بحياته تحس نفسك الك أهميه مو مجرد حياه زوجيه واجب يقيم بي حتى تعيش 

تلقائيا الأنسان يبدي يرسم ويتخيل ويعيش حياته 

والگلب يبدي يكون مشاعر اولها احساس خفيف وتتترجم بتصرفات تميل للأهتمام وراها رغبه ترجمتها حلوه على اساس أكمال الحياه الزوجيه .. 

وتم زواجنا ومتمدد ومخليني بحظنه جاعصني جعص 

ـ ليش تسكرين بسرعه ما أحس بيج مثل الريشه

ـ ضليت ساكته

ـ گتلج من أرجع أحجيلج 

ـ أي 

ـ بس ما راح أحجيلج علمود لاتغيرينها مستمع بهل الصفه بيج 

ـ براحتك 

ـ أنتِ صرتي راحتي 

ـ حضن وجهي بأيديه الأثنين وصفن بعيوني وباسني 

ـ خل ننام ورانا كعده من الصبح نمشي للقصر أبويه دز على البنات وخالتي تريد تشوفهن وهم علمود لينا 

ـ ليش شقررتوا .. 

ـ باجر شوف شلون ترهم بس أني خايف من الشيخ هذا سگوته ما يعجبني وعايف القصر ومگابلها وهي كل يوم تقسى أكثر من القبله وحقها . 

ـ وضعها صعب .. طيب ما عرفت أخوك شناوي لازم 

ـ ما أدري والله بس لو يطلگ بنت خاله لـو لينا لو يجمعهن وهذا الشيء عند لينا ما يصير بس يجون عليها ويحجون وياها والله كريم ..