رواية خيط وابرة الفصل التاسع والثلاثون 39 بقلم شمس العراقية

نور ... 

ـ من سمعت بي راح يرجع حتى أمي ما بلغتها الا سمعت من نافع وأجتني گامت تحجي وأول الناس صارت ضدي طبعاً أبن أختها والدم يحن أني شُنـــنو

سميعه ـ ما تحجين تگولين رجلج وخالتج يرجعون خانسه صارلج أيام وكالبه الخلقه شگو شصايرلج 

ـ شصايرلي! ماما أشو أنتِ ما مهتمتلي ولا كأنما المهتمه لرجعته هو وأمه عافوني صارلهم سنه ونص ولا أهتموا لا اليه ولا لبنتي وهسه تذكروا بنتج وما أوصيج روحي أستقبليهم بالاحضان 

ـ أي چا مو أختي وخالتج مو مريضه 

ـ وأني ما مرضتها والمرض مو عيب شكو أنهزموا وضموا المرض لو خايفين نور تتشمت بيهم ودگول الهم هاي حوبتي .. 

ـ أنجبي ويله گومي لاتكومين تمسلتين بسوالفج 

ـ ما أكوم 

ـ مو وياج شو تحرگي خالاتج هسه يجن أنظف البيت ونطبخ غده 

ـ لا والله وأسبح وأتحضر وأتعطر بعد من كل عقلج ماما أحنه شگو بيهم وبرجعتهم وبخالاتي يردون يرحون هذاك الدرب ما كاعه أحد . 

ـ مو أحنه نمشي على كيف حضرة جنابج چا لا ينكسر خاطرج خايبه ما تسكتين أحنه بيا حال ولج خالتج راده من الموت شنهي من گلبج عدج شو گومي لبسي عبايتج خالاتج هسه يوصلن 

ـ ما حاجيتها وهي تروح للباب وترجع حتى لينا أخذتها وياها رغم مالها خلك بس تسحل بيها عناد بيه ولبنى هم أجتي كاشخه خير أشو كلها متحزمه لرجعته وأني ولا أحد أهتم لخاطري شدعوه عاد . 

لبنى ـ هلا شلونكم 

نور ـ هلاو شلونها شُنـــوْ أنتِ تروحين ويه أمي 

ـ أي كلهن راح يجن ليش ما تروحين 

ـ لا هاي العايزه فوك سوايته هو وأمه تردوني أروح شبيكم أنتوا كلكم راضين 

ـ ما راضين بس أمه مريضه وأكعدوا أحجوا شوفي كلامه يجوز عنده عذر مهما يكون أبو بنتج 

ـ عنده عذر يا عذر هذا تحجين عنه وأبو بنتي ليش هو تذكر بنته من الأساس ما تسكتين لبنى أنتِ هم مثل أمي كلجن نفس الشيء ولو أنتن مكاني جان كلبتن الدنيا على رأسه ورأس أمه ... 

وعليج الله لو أنتِ مكاني شتسوين نفرض نافع مسويها بيج لان هسه معزة عندج أغلى شتسوين ترجعيله مثلي هيج بهل السهوله . 

ـ أي 

ـ أي لا والله جذابه غير تأكلين نافع وتشربينه 

ـ هسه ما تجين كيفج ليش تكومين تلوصين بالحجي 

ـ منجن 

ـ علمودج أحنه .. كيفج لاتجين ما أجباري 

ـ سگتت وأجتي أمي تحجي وتدردم روحه ما أروح لو تضلين تحجين منا لسنه روحه ما أروح افهميها أني وياه منفصلين افهميها بيا لغه أحجيها الج 

ـ خايبه ما تنجبين وهاي الجريده التزامطين بيها منفصلين نعل مكطعه على حلكج خوش وغافر بعده رجلج ويوصل بسلامه وعكبها يصير خير ويحلها الف حلال . 

ـ أخذت عبايتها نفضتها بوجهي وطلعت وأسمع صوت بالبيت منو أجانا 

لبنى ـ خالتج نهاوند وبناتها كلهن وخوالچ الحجيه وخالتي لميعه والبنات زهور وزينب . 

ـ خير أن شاء الله .. لبست شالي وطلعت سلمت عليهن كلهن جايات خرب بيومهن شگد حلوات خالتي ما اعرف المن ضامتهن بس بالمناسبات نشوفهن ودخلت جديتي ونافع وياها باوعلي صديت وجهي يابه أذا گالي أمشي فلا أحجي وياه .. تقربت سلمت عليها وعلى بنات خالي وكعدوا بالأستقبال وتحضرن يردن يرحن ينظفن البيت ونافع مشى كدامهن . 

نهاوند ـ هو عايف نسخه من المفاتيح يمك 

نافع ـ لا ما عايف بس گالي عايف نسخه بالبيت كون الكاها من أخابرجن تعالن ولبنى أبقي يم البنات مو تچين وياهم. 

نهاوند ـ يمه على كيفك تخاف عليها أحنه هم نخليها ووراها بناتها عود نذب عليها الطبخ هي طبخها طيب بالعزايم . 

نور ـ ما حجه وراح وشوي وخابر تحضرن ومشن كلهن وأمي ولبنى ولينا وحبوبه ضلن كاعدات أني قبل لايفتحن الموضوع كمت للغرفه . 

مر الوگت وسمعت صوت نافع يحاجيهن وكلهن نخبصن . 

نافع ـ رايح أجيبهم من المطار عمه لبسي عبايتج تعالي وياي عمتي تعبانه من الطياره 

الحجيه عطايات ـ عمت عيني عليج يصبيحه أنه هم أجي وياك چا شعندي باقيه گومي لبسي عبايتج بساع . 

نور ـ تحضروا ومشوا ونافع قبل لا يطلع أجاني 

نافع ـ ها ما تروحين 

نور ـ لا ولازم عاجبك سواية صاحبك وتردين أروحله برجليه عكب كل السواه صارله سنه ونص وأنت أكثر واحد جنت شاهد على معاناتي 

ـ يله هذا هو مو لزوم تروحين .. لبنى أخذي لينا روحي عمتي نهاوند دزت عليج شيفگني من لسانها بس البنات ما أوصيج عليهن 

ـ أن شاء الله .. 

لينا ـ أني ما أروح أخذها بطريقك وصلها رأسي يوجعني

نافع ـ ديله تحضري 

نور ـ كلها راحت ضليت بس أني ولينا وبنين .. بقيت بغرفتي تجاهلت الوضع لأن ما يهمني أذا هما عدهم عادي .. عندي مو عادي مشاعري وگلبي مو لعبه عنده يروح وسنه ونص ويرجع ويلكي نور نفس ما عافها لا هذا حلم بإحلامه ما يصير ..

كعدت أتابع شغلي واثبت الحجوزات علمود العصر أطلع الطلبيه لأبو التوصيل باجر يوصلها أحسن ما كاعده ..

مر الوگت ودخلت عليه أمي عصبيه وتحجي اليوم شيسگتها تأكل رأسي والله 

سميعه ـ شو گومي لحدهسه كاعده شحنتي تسوين مو گتلج تحضري 

نور ـ ما أكوم گتلج ما اروح كافي تلحين 

ـ ولج خالتج حالها يكسر الگلب مردتلي گلبي عمت عيني عليها شلون المرض مدمر عافيتها وشكلها لوتشوفينها أنتِ شتگولين 

ـ الله يشافيها

ـ ولج نور تردين تخبليني 

ـ گتلج ما أروح بيا لغه أحجيها 

ـ خالتج ولج خالتج ربتج لازم گلبج حن لو أنتِ مثل أبوج ما تنسين تبقين حقده 

ـ أي مثل أبويه ما انسى مثل ماهو ما نسى سوالف أهلج أني هم ما أنسى سواية أبن أختچ وأبويه هم طلع غلطان من جان شايف غافر بعين الجبيره وتالي شسوى هالغافر .. ما تخليني ساكته ماما ترى بطيتي گلبي ولا عبالك أنه بنتج . 

ـ خلص سگتي سگتي أنفتگتي عليه شيسد حلگج عاد گومي جهزي بنتج أخذها وياي أبوها دز عليها وعليج بس شسويلج ما منچ الهدايه وراد هو يجي بس أنه كتله لا أنه أجيبها وياي . 

ـ أي خبلي خاف هو ما متخبل گوي عينه منين أتلگاها منج من عنده بس عوزج تأخذيني گبل تنوميني بغرفته .. كفختني بالمخده وشالت بنين تسبحها كمت طلعتلها ملابس كشختها وأمي مطنگره شالتهت وحتى لينا اخذتها وياها هيج عناد بيه 

ـ أبقي لوحدج وجه البومه 

ـ أني وجه البومه خلف الله عليچ .. طلعن وقفلت الباب ورجعت سويتلي غده لنفسي اكلت بدون شهيه ورجعت تمددت حاولت أنام ما أكدر سوالف أمي تدك برأسي ماكو هيج أم هيج مسترخصتني بس تريدني اروحله بعد كل اللي سواه بحقي بس مستحيل بعد أرجعلك ..

أندك الباب ورجع أندك الجرس طلعت باوعت دخل ميثم شايل جدريه وشفت خيال غافر! واكف يم الباب هو وسيارته گبل طبيت ما خليته يشوفني .. دخل ميثم خلاها عالسنك 

ميثم ـ هذا غداج وغافر أجه يريد يحجي وياج واكف يم الباب تطلعين . 

نور ـ ما أطلع هاي أمك دزته 

ـ لا أمي شعليها كاعده يم خالتي وهو أصلاً ما تغدا ودزني عليج گتله ما تجي 

ـ أي عفيه عليك وهسه هم روح گوله ما تجي 

ـ لا ما عليه طلعيني منها أنه زلمجن أحترمهم خوش زلم 

ـ يمه فدوه دروح وهو هسه يشوف محد يطلعله ويرجع

ـ مو عيب ولج وخطيه خالتي من صدك مريضه 

ـ ميثم لاتصير مثل أمي تأكل رأسي

ـ يله ما عليه أروح أنام العصر أروح وياج نطلع الطلبات اليوم مو

ـ أي عيني روح ساعتين نوب أكعدك .. راح وبقيت أباوع من الشباك الباب مفتوح بس أسمع طبات خفيفه على باب عرفتها هاي بنين .. وأنفتح الباب دخل بهذاك طوله ما لحكت اركز عليه دخل بنين وخله جنطتها وسد الباب وراه

رحت جبتها وأجيت أنومها ريحة عطره بيها ضليت العب بشعراتها الى أن نامت شفتي أبوج الأناني هسه متذكر عنده بنيه بس يله يبقى أبوج مالي حق أحرمج منه .. 

للعصر يله رجعن لينا گبل دخلت غرفتها وأمي باوعتلي صدت وجهه مني أني هم غلست وكفت تحضرت يله ميثم وين صرت تأخرنا . 

ميثم ـ أگولج الله عليج خل نرجع من وگت عندي لعبة اليوم 

نور ـ ميثم لاتورطني ويه أمي لاتنسى عندك أمتحان اليوم وأخذ كتابك وياك أشرحلك وأفهمك عوفلي للعبه هسه .

سگت بس حسيته ضاج وطلعنا وأمي مزعوجه حيل ووصيت لينا على بنين وأني طالعه شفت سيارة نافع بعدها طابگه يم بابهم ومشينا بالفرع واخذنا تكسي وتوجهنا للمحل .. 

وصلت وبلشت تجهيزات والحمدلله الشغل زين وطلعنا الطلبيات وقبل المغرب دخل علينا أستاذ علي!! تفأجت بي .. هلا بيك أستاذ 

علي ـ هلا بيچ ست نور جنت بشغله منا ومريت گلت أسلم عليج . 

نور ـ أهلا بيك أستاذ أتفضل .. غمزت لميثم أركض جيب ضيافه .. راح وهو كعد ويباوع على المحل وعلى العامله شلون تتعامل ويه الزبائن وأني حاطه أيدي بگلبي لان هو شريك وكل شغلي معتمد عليه والبضاعه كلها من المصنع مالته بالكويت . 

ـ الشغل زين وما شاء الله أشوف البضاعه عندج باقي منها شيء قليل 

ـ أي والله عليها سحب الف الحمدلله 

ـ فاخر فاخر وإن شاء الله هالأيام اروح الكويت وأدزلج بضاعه أشتغلتها جديد نفس الموديلات الدزيتهن 

ـ ها كملن بهل السرعه 

ـ باقي أسبوع ويكملن وبقيتهن الج لان الشغل يمج ماشي كلش زين أذا يستمر هيج 

ـ اي الحمدلله . 

ـ بس يوصلن سوي بيهن جلسة تصوير علمود اذا صار سحب عليهن نكرر الموديل بالمصنع يشتغلونه اكثر من مره وأبقي حصري فقط بمحلج ست نور . 

ـ تسلم أستاذ ما قصرت 

ـ ولو بالخدمه وأني يعجبوني الناس المثلج يهتمون بشغلهم وينطونه حقه عفيه عليج .. 

ـ تسلم .. أجه ميثم ضيفه كعد شوي وحجينا بخصوص العمل والديكور مال المحل وشوي وراح ودخل نافع بطلعته وباوع عليه بنص عين شگوو 

نافع ـ هذا شجابه 

نور ـ غير علمود الشغل 

ـ وأني مو بلغته بخصوص الشغل يتعامل وياي مو وياج 

ـ ترى هو چاي بشغله وگال مريت عليكم يعني ما جاي مخصوص 

ـ مخصوص ما مخصوص ما يتعامل وياج وعنده كلام يخابرني وأني أتفاهم وياه بس مال يجيج للمحل وأنتِ تحجين وياه هذا المحل أهجمه مثل ما فتحته أسده وأنعل والديه لأبو الدخل شراكه وياه  . 

َـ نافع شبيك غير علمود الشغل والبضاعه 

ـ أني أحجي وياه وشحجيت وياج نور ويه صخام ما تتعاملين ما تحجين حجايه ويه رجال والشغل أني فتحته اني تكفلت بي أني تعاملت ويه هذا ** ووافقت على الشراكه بس مال يضل رايح جاي أنعل والديه والله الوصها بكراج چلب نور  .. 

ـ تمام خلص أنت أحجي وياه خابره وتفاهم وياه علمود البضاعه الجديده 

ـ وشبسرعه خلص البضاعه ما صار كم أسبوع من دزيت الموديلات اله لو بس يريد يجي المحل يشوفنا طوله يتمندل أبن القندره

ـ شمدريني هو كال بعد أسبوع اروح 

ـ خير أن شاء الله  .. شوفي نور قسم بذات الله أذا سمعت بي چاي مره ثانيه لو أنتِ تحجين أو تتعاملين وياه ما تلومين الا نفسج أسوي مشكله جبيره ومحمد .. 

أني من وافقت على المشروع أني اتكفل بگلشي أنتِ فقط تابعين الشغل كاعده ما عليج حتى بيع ما تبيعين أكو عامله جبتها هي تتعامل ويه الزبائن وتبيعلهم صخام رجال ما تحجين وياه اهلا وسهلا ما أريد . 

ـ  أي خلص والله شبيك معصب 

ـ ما معصب بس ما عجبني جيته للمحل  .. 

ـ يله ما صار شيء .. جر الگرسي وكعد وباوع على ميثم عينه بكتابه والعامله شالت جنطتها تريد تمشي 

رهف ـ ست نور أني خلصت ما باقي شيء 

نور ـ روحي عيني وباجر الصبح تعالي باجر ما عندي دوام افتح الصبح 

ـ أن شاء الله .. 

ـ راحت وكعدت ونافع ضايج شگو شبيك 

ـ سلامتج يله اذا ماكو شغل عزلي خل أوصلج صارت دنيا ليل كافي المن مفتحه

ـ تمام حسيته بي شيء وطلعنا وصلنا البيت وأمي مطنگره والبيت أجوائه مشحونه .. سبحت وكعدت أمشط ودخلت أمي . 

سميعه ـ تحضري خالتج وغافر هسه يجون عليج . 

نور ـ يجون عليه وعلى شنو جايين خير

ـ يرجعونج غير 

ـ أني مو حجيت وياج وگتلج ما أرجع لو تردين ترجعيني 

ـ أي چا شتسوين رجلج ورجع وهسه يجي وأكعدوا وتفاهموا 

ـ ما أكعد ولا أتفاهم وكلامي واضح وحجيتلج بس أنتِ تردين تخليني بموقف 

ـ ما يصير تبقين هيج أكعدي احجي وياه أسمعي منه وخالتج تعبانه راح تجيج بنفسها شتردين بعد 

ـ سگتت وأنتظرناهم ما أجو كالوا يمهم ناس وتأجلت وثاني يوم الصبح أني مشيت للشغل وبنص الشغل خابرتني أمي ها ماما 

ـ أجو عليج عزلي محلج وتعالي عيب ماما

ـ عندي شغل ماما وين أعزل هسه والمحل مليان وكتلج ما أحجي ويه حجايه وحده والدرب الجابه يرجعه لايتعب نفسه ويتعب أمه المريضه يحطها ويداريها أفضل ما يضل ملاحك نور لان شلته من حياتي .. سدت الخط بوجهي . 

وضلت تتصل ما جاوبتها بعد ووصلتني رساله من نافع 

نافع ـ عزلي المحل ورجعي البيت هي مو مال عناد أكعدي وأحجي وياه وما راح يجرج بحبل غصب عنج 

نور ـ أتعوذت الشيطان وعزلت أني والعامله وأخذت تكسي ورجعت البيت ولاحظت ماكو سياره يم بيتنا گل ظني راحوا طلعوا ما جايين بسياره ولينا واكفتلي يم الباب المطبخ ونوب باب الأستقبال مفتوح خرب مو وكته .. أخذت نفس ومسحت وجهي وأحاول أسيطر على الغضب البداخلي لو اشوفه أكله بسنوني من كثر ما مقهوره وحاقده عليه حتى على خالتي گلبي مورم منهم .. 

.. وصلت جان كاعد مقابل الباب خوش مستغل الكعده دا يشوف زين .. وگفت نزعت الكعب ودخلت عليهم بدون ما أباوعله السلام عليكم تقربت على خالتي باوستها الحمدلله على سلامتج خاله شلونچ 

صبيحه ـ هلا بيج عيني خاله الحمدلله زينه أنتِ شلونچ

نور ـ كلش زينه عيوني خاله شاء الله أجر وعافيه ولو أنصدمنا بهل الخبر لأن أحنه أخر الناس يله عرفنا بس المهم سلامتچ .. 

صبيحه ـ الله يعافيج بنيتي . 

نور ـ كعدت بصفها مقابله وباوعتلها وركزت على شكلها وحده ثانيه وملامحها متغيره وجهه ما بي قطره شعر ولا حواجب ولاحظت حتى صدرها ممسوح!

ما گدرت أبقى أختنگت ردت أكوم وصلني صوته لدرجه غمضت عيوني شگد تجاهلته ما ردت أشوفه وحاولت ما اباوعله بس هو حجه وغير گلشي . 

غافر ـ شلونچ نور 

نور ـ رفعت رأسي صارت عيوني بعيونه باوعتله ثواني لدرجه الغصه بصدري أبتلعتها ودفعت ثمنها لليالي من عمري عشتها بهضم ودمعتي على خدي وأنت السبب عفتني لسبب مجهول وبعدين ترجع لسبب مرض أمك 

جاوبته بثقه وأبتسامه خفيفه الف الحمدلله بخير

.. يله من رخصتج خاله 

صبيحه ـ وين بنيتي كاعده وأحنه جايين عليچ جايين نرجعج ويانا .! 

نور ـ خاله أذا چاين بخصوص هذا الموضوع فه لاتعبون نفسكم أختصرها عليكم مال رجعه بعد كل اللي صار ما ارجع هذا شيء مستحيل وأنسوا مثل ما أني نسيت .

صبيحه ـ كعدي خل نشوفچ وأحنه جايين عليچ وهم غافر يريد يحاجيج . 

نور ـ ما عندي شيء أحجي وسالفتكم هاي ما ينحجي بيها أبداً وسنه ونص وين جنتوا هسه متذكرين نور وتردون تحجون وياها على أي أساس نحجي! .. 

ـ بس نور ماما 

ـ شوفي خاله أني ما ردت أفتح الموضوع وأحجي بي نهائي لان نهيته وقفلته من ساعة الوصلني منه خبر بعد ما يرجع يعني أحنه مو مهمين عنده من الأساس بيومها عشت يوم للعدو ما أتمناه يعيشه بدون أي تردد رحت وأنفصلت عنه وبعد من السابع المستحيلات نرجع 

لو يخلقلي الف عذر ما أتقبل أي كلام لا منچ ولا منه . 

صبيحه ـ على كيفج يا ماما هدي وحقج والله حقج وما الوم اللي يلومج وصبرتي كل هالوگت وغافر ترى يا يمه ماله ذنب هو عبد مأمور وأني بلغته ما يجيب طاري مرضي لأي أحد وأحنه مرينا بفترة صعبه يا ماما أيام

هو لليل ما ينامه مگابلني وكاعد . 

ـ ليش خاله المرض عيب لو فشله من العالم لو خفتي من عندي أتشمت بيچ مو هاي الجنتي تفكرين بيها لو أنتِ هامج أبنج وتفكرين بي جان ما سويتي اللي سويتي أنتِ أنانيه أكثر منه 

غافر ـ نور شو هيج بابا أحترمي 

نور ـ چا شتريد مني وعلى أساس جايب أمك وچاي وتردوني أرجع وعادي طبيعي الأمر عدكم وكسرتي منو يجبرها والأيام العشتها لوحدي منو يعوضناها وبنتك العفتها ما سألت عنها أني طبني مرض بنتك ليش شنو ذنبها ما حنيت عليها ما گلت بنتي لو أني ما فكرت بيه مو أساس أنت الزين ما بيهم وكظبة أيد أبويه وأمن عليه عندك هو هيج تصون الأمانه .. 

ـ نور 

ـ خل أكمل كلامي .. 

ونفرض أني ما عندي أم ما عندي بيت يلمني ما عندي راتب مالت بابا يكفي مصاريفي ومصاريف بنتي وهواي أمور أحتاجها ما متوفره اليه ما گلت هاي شلون تدبر نفسها شلون تعيش بنتك شلون تگدر تربيها منين تجيب مصاريفها هاي ما فكرت بيها بس فكرت تمشي مو 

لو عادي عندك تشمر بنات الناس عند أهلها وتمشي لبسبب مجهول وتخلي وراك الف علامة أستفهام! ليش السبب والحجي العفته وراك...طيب من هذا ما فكرت بسمعتي وبسمعتك مو أنه محسوبه عليك لو مطلگني بيها باب وجواب عادي مشاكل أني وامه وهو أختار أمه وأنفصلنا ما بيها شيء الف مألفه عافوا نسوانهم علمود أمهاتهم بس مو تنهزم بليلة ظلمه وبعد سنة ونص راجعلي وتعالي نرجع عفواً أنت صاحي 

سميعه ـ نور لسانج لا أكسر حلگج أحجي عدل 

نور ـ ماما دخيل بختج عوفيني أحجي والحياة حياتي والجرى على گلبي مو على گلب أحد أني الصبرت وتحملت وعشت هذيج الليالي لوحدي أبجي ودمعتي على خدي أنتظرك أنتظر سبب واحد شنو الخلاك تختفي! 

.. الأفكار كلها تگومت برأسي ردت سبب مقنع واحد والله بوكتها لو چايني وگايلي أمي مريضه أعذرك وأني الممنونه وخليت كل الأسباب بيه بس مال بعد ست أشهر تخابر نافع أني أذا أمي صارلها شيء رجعه للعراق ما أرجع! يعني شُنو غافر هاي تگدر تبررلي عنها لا ما تگدر ولو تكعد هسه منا لبعد سنه تبرر وتنطي أعذار ما أقبلك أي عذر نص كلمه منك ما أسمع بعد . 

سميعه ـ وين موليه أكعدي أنتِ سمعتي منه گبل گبتي وثگبتي بنار ونفط أنطي مجال شجاج 

نور ـ وعلى شنو نحجي يله أحجي مو تريد نحجي 

غافر ـ بس أهدئي أحنه ما جايين نتعارك وگالتلج أمي حقج وأني هم أكولج حقج وأني الغلطان من رأسي لرجليه وأعتذر منج بس الصار أكبر مني نور 

والأيام المرت عليه ما أكدر أوصفلج مرارتها وأمي لحدللحظه حالتها تعبانه يعني المرض هد حيلي گبل لا يهد حيل أمي وما رايد منج تفهميني بس رايد نكعد ونحجي ونتفاهم ونوصل لحل . 

صبيحه ـ أني أعتذر منج ماما نور وحقج علينا وليدي متبهذل حاله ورايدج ومتأمل بيج تتفهمينه وتتفهمين وضعه وتسمعين وتعذرينه وكل اللي صار بسببي أني لا عشت وأرتاحيتوا بحياتكم ولا متت وخلصتكم مني 

غافر ـ يمه شنو لزومه هالحجي هسه عوفي الموت رحمه لأبويه . 

نور ـ أنزعج ورجعت كعدت بس أحس نار تطلع من رأسي ما أكدر أنسى ما أكدر گلبي يغلي نار منهم سوالفهم ما تنهضم وأعذارهم تافهه .. 

غافر ـ وهسه نگدر نحجي بهدوء وحقج أذا أنفعلتي عاذرج وأجي وياج وأعذرج بس أني هم عندي حق 

نور ـ حق! عن أي حق تحجي بي أصلاً ما عندك شيء يمي عده بنتك وأصلاً أنت ما معترف بيها لو هامتك جان عفتها . 

ـ أني ما عفتها 

ـ لا عفتها 

ـ گتلج ما عفتها بكيفي 

ـ لا بكيفك وعلى مزاجك ومال عذرك أمك مريضه هذا مو عذر تقنعني بي

ـ نور شبيج شنو مرض أمي مو عذر كافي

ـ لا مو عذر وعوفلي مرض أمك على صفحه وكأبلني وأنطيني سبب واحد عذر بس والله هسه البس عبايتي واجي وياك بثوبي بس سبب واحد ولاتحجيلي عن مرض أمك وهالأمور كلنا نعرفها 

.. وأذا صدك جاي وترجعني أنطيني سبب خلاك تختفتي سبب خلاك ما يوم أتصلت سألت عني وعن بنتك ها أحجي مو تريدنا نحجي يله أسمعك .. 

ـ ترى أني ما جنت العب ولا جنت بنزهه لو أتونس جنت أعالج أمي وهذا السبب كافي عندي وزين تدرين ما عندي بالدنيا بس أمي 

واليوم الطلعت بي منا وسافرت وياها جنت بمصيبه حتى بنفسي ما فكرت مشيت مثل الأعمى ولو ما مسافر جان من زمان طالع بجنازة أمي .. وأني ويني بيا حال وأني أشوف أمي كل ليله تنامه تنازع هي والموت وبينها شعره أمي جانت منتهيه سوت عمليه وفشلت وبدال العمليه وبهذا عمرها أني أربع عمليات مسويلها خاف ما تدرين 

والكيماوي الضربته ماكو حره تجرعه أنتهت جنت مأيس منها ترجع تطيب 

أني أشتريت أمي بدم گلبي طلبتها طلابه من الأطباء ما خليت دكتور ما رحتله بعت العندي والما عندي بس علمود يضلي نفسها بالدنيا ومن خابرت أمي ضالها أخر عمليه نسبة نجاحها قليله لوتموت لو تعيش أني وحظي ومن خابرت نافع جنت عاجز أمي بين الحياة والموت أي ما أنكر گلت ما ارجع العراق لان وضعي جان صعب ويصعب حالي على كافر مو بس عالمسلم هاي أمي. 

ـ تمام هاي أمك وأني عند أمي وبيت أبويه وكلمن عنده حجايته يوفرها على نفسها 

ـ هو هيج نور 

ـ گتلك ما عندي أحجي وياكم أنتو لحيتوا والأفضل هيج 

گام وگف مزعوج ويباوعلي وأني منزله رأسي 

صبيحه ـ بس ماما ما يصير هيج تحجين يا نور ياحبيبتي على كيفج وياه وأني گتلج أني السبب بگلشي

غافر ـ يمه 

صبيحه ـ والله غافر ماله دخل وحتى المشكله الصارت أني السبب بيها وساعة شيطان والبشر من كلمه والنار من حطب واني نلعب بعقلي نورس هم حجت حجي ما بنلبس عليه ثوب والمفروض ما أسمعلها وأطردها من بيتي واجي اواجهج وحتى غافر من حجيتله ما صدك ولا أقتنع بهذا الكلام لان يعرفج ويعرف صاحبه بس ساعة شيطان تريد تصير ويمكن الله جعلها سبب علمود أتخربط ويتكشفون بيه هذاك المرض وخلانا ووصلنا لهذا الوضع . 

وأذا عليه ما الج غرض بيه أني جابلي عامله هي تداريني وتدير بالها عليه واذا تردين أنتِ هم جيبي مربيه ما الي شغله بيكم والله حلگي ما افتحه اني صحتي على گدي ما أريد گلشي غير أشوفكم مرتاحين وأشوف أبني سعيد هو هم تبهذل وياي وعافج وحقج والله يا بنتي حقج .. بس هم أعذريني وأني خالتج حسبة أمج وهو گلبه طيب هذا أبو بنين .. وأذا تردين أخلي يأجرلج بيت لوحدج أو أني أطلع من البيت وأنتوا أخذوا راحتكم شگو عليه والعامله تدير بالها عليه وهو العمر بيد الله مو يدري شگد اعيش بعد . 

غافر ـ يمه فدوه رحتلج گافي شنو لزومه هالحجي ونور واعيه وأصيله وتتفهم 

نور ـ ليش أنت خليت بيها أصيله خليت بيها واعيه وخليت الأصل الكم أنت وأمك 

غافر ـ نور أحترمي خالتج وساكتلج كلمة والثانيه أمك وهي مريضه وحالتها تعبانه وبهذا وضعها اجتج وأنتِ هيج تحاجينها 

صبيحه ـ لا يمه ميخالف معذوره 

غافر ـ يابه معذوره وعاذرينج 

سميعه ـ أحجي عدل لا أكسر حلگج أشو ما تحترمين 

نور ـ وگفت ما عندي شيء أحجي من رخصتكم . 

صبيحه ـ نعوفها على راحتها خلها تفكر ما نستعجل عليها .. تعال يمه غافر ساعدني أشو دخت . 

نور ـ أجه سندها وطلعت أمي وياهم وبقيت على وكفتي عبر من يمي وصل الباب ورجع 

غافر ـ أنداري وباوعيلي وأحجي بوجهي ليش منزله رأسج ما راح أذبحج لو خايفه تخلين عينج بعيني 

نور ـ غافر أذا تريد يبقى الأحترام وما يخشن الحجي بينا ما أغثكم وتغثوني أخذ خالتي وأمشي أفضل الي والك . 

ـ ماشي رايح وكل كلامج الحجيتي مقبول عندي وعاذرج عليه بس ها كم يوم وأرجعلج لحد ما يلين گلبج وتمشين وياي لبيتج . 

ـ لاترجع بعد. 

ـ لا أرجع لحد ما تتفهميني وتعذريني ونوصل لحل ونرجع

ـ مستحيل بعد نرجع وياريت تجيب السيد وتطلكني وتخلصني منك .. عفته ومشيت ضل على وگفته شويه وطلع دخلت الغرفه مقهوره وصافنه وصلتني من عنده رساله 

غافر ـ أدري أعصابج تلفانه مني بس أخليج ترتاحين

وأني أسف لعيونج الحلوه الزعلتهن وادري كلمة أسف ما تطيب خاطرج بس جاي أحاول أصلح اللي صار بينا ..

نور ـ ماكو شيء يتصلح بعد .. أنت أنتهيت وطلعتك من حياتي لو تتأسف منا لبعد سنين ليگدام ما يتغير شيء عندي والعافني بأول مشكله صارت ما أمن أعيش وياه تحت أي سبب كان

.. رسلتها وقبل لا يرد حظرته .. 

سميعه ـ شُنـــنو هالحجي أستجلبتي أنتِ طلعت عينج

أدبسزز شلون هيج تحاجين خالتج ورجلج ما أحترمتي أحد ما احترمتي خالتج مريضه وتعبانه واجتي عليج برجليها واعتذرتلج وحجتلج السبب وهو حجالج شتردين أنتِ يبوسون رأسج علمود ترضين عليهم . 

نور ـ ما أريد گلشي بس يعوفوني 

ـ عساج لا ردتي مو بكيفج أمشي أني شوفي اني وكفت وياج وساندتج وكلنا وگفنا وياج ووكلنا خطيه ونافع يركض بأيده ورجليه واني أنطيتج فلوس فتحتي مشروع گلت ميخالف أنهضمت بس هسه مال تنجلبين وتقللين أحترامات أحطج رأسج وأدوس عليه بالقندره ولج طايحة الحظ شيبررلج أمه مريضه كاصين صدرها حافرينه حفر كوه تمشي يمصخمه غافر مصيبته مصيبه ما شفتي شلون مخلص من القهر والهم هو حاله حال لو باقي بالخارج أشرفله اجه وكابلج وأنتِ تنبحين عليه بهذا كلامج مثل السم على أقل هناك كبله لايشوفج ولاتشوفينه بس لا هنا شفتي توكحتي بالزايد بس اني الج منا وهيج 

ـ شترديني أسوي اكوله اي هذا هو وأمشي وياه 

ـ ما گتلج أمشي وياه بس أحجي بإحترام وخالتج كلمه والثانيه أمك وهي كاعده تسمعج أنتِ هنتيها قبل تهينين أبنها تخبلتي على عمرج . 

نور ـ حجت حجت وقست بالكلام هواي وطلعت وعافتني ضليت بالغرفه حتى بنين ما شفتها سألت عليها لينا گالت راحت ويه ابوها صارلها أبو .. 

لليل نافع دزلي رساله 

نافع ـ نور يابه ما يصير هيج من أولها قافله أنطي فرصه لنفسج واله واكعدي أنتِ وياه وأحجوا بهدوء ترى ماكو مشكله تنحل بالعرك وعمتي فاحطه من وراج لان اختها مريضه على كيفج وياهم . 

نور ـ نافع رجاءً أبقى على موقفك وخليك بعيد عن هالمشكله ولاتتدخل رجاءً وأعرف هو دزك ويريد منك تقنعني بس أني قافله وشيء ونهيته لا أنت ولا غيرك

ـ أنجبي نور خوش ابقى على موقفك شُنـــنو 

أشو ما تعرفين تحجين وبعدين أنتوا مثل جلاب النكره يوم صحاب يوم كحاب بس اني ضال بالوجه الاسود عبالي أدمي وصوجي تدخلت وعمتي طلبت مني واذا على غافر لو يطلب عيوني أنطيهن اله لان أمه شتردين يسوي رجال ما عنده عذر غير أمه حتى سالفة نورس مو أباله ولا معترف بيها بس جانت سبب لا أكثر . 

ـ أي هذا هو 

ـ أي مشكلتج وهاي حياتج وأنتِ أعرف بيها بس أذا تبقين بهذا أسلوبج تخسرين الكل وأولهم أني .. باي 

ـ غلقت الموبايل مقهوره من الكل ونفسيتي تعبانه وفجأه لكيت الكل ضدي وأني الغلطانه وغافر المعذور بس يبقى القرار النهائي أني وياك مستحيل نرجع .. 

_________________

لبنى ـ من سمعنا غافر يريد يرجع الكل دخلوا حالة أنذار بالأخص خواله بالهم يم أم غافر لان الوصلنه من غافر أمه تعبانه وأنقهرنا عليها هذا المرض للعدو ما تتمناه 

ما گالوا يا يوم يرجع لان بعده ينتظر تستقر حالتها الصحيه .. وأني منا رانيه الليل كله تزوع حالتها حاله وتكح عبالي سنونها بس يمكن أستبرت الجو صاير يارد وطلعت بالصاله غسلتها وأنطيتها شراب وردت من رأسها فيضت الدنيا وعلى صوتها كعد نافع أخذها مني غسلها وكمت شلت الفرشه شمرتها بالطرمه ورجعت غسلت وغيرت ثوبي ولكيته منومها ها نامت . 

نافع ـ أي وليش ما گلتي من العصر جان وديتها 

لبنى ـ جانت بس مصخنه عبالي من سنونها انطيتها أدول صارت زينه 

ـ قلة أهمالج هاي أنتبهي عليها طفله مو مال عبالج . 

ـ الصبح نوديها والله عبالي بس صخونه 

ـ ديله نامي وشگو مصلخه لو عاجبج تتمرضين 

ـ أهو نافع شلبس يعني ولاتخاف عليه ما يصيرلي شيء عود اني أحير بروحي . 

ـ تغطي زين 

ـ ضل يباوعلي ورانيه بحضنه شگو ما تنام 

ـ تعالي يمي لاتبردين ما تردين حضن 

ـ لا رانيه نايمه خطيه 

ـ بس أني أريدج يمي 

ـ عوفه بعدين خطيه 

ـ تعالي يمي هاي البعدين شوگت تجيني تعاي 

ـ تقربت يمه ويغطي بينا سوده عليه رفوفه بالسرير ضلت لوحدها ونمنا للصبح كعدت ما لگيتهم مديت رأسي لگيتها مسويلها بيضه ومشغللها الموبايل وهو صافن عليها ويغيرلها المقاطع صفنت عليه ياربي شگد يحب الجهال .. 

.. رفعت شعري وطلعت ها صباح الخير شهل النشاط من الصبح لايكلك تصير أب 

نافع ـ ليش مو من أعجابج

ـ لا والله من أعجابي شحاجيه .. 

ـ أكول لبنى 

ـ ها .. واكفه اسوي الجاي وهو كاعد يدك بالجداحه عالميز قلقتني شبيك 

ـ سؤال 

ـ جواب 

ـ ماكو منا منا! 

ـ أنداريت عليه شگو أسم الله 

ـ جاهل 

ـ وين 

ـ بطني وين يعني غير أبطنج .. 

ـ ها قصدك حمل 

ـ أي .. 

ـ قالقتك السالفة 

ـ گلش وگلبي مفركس علما يصيرلي منج جاهل

ماكو اعراض نفسج تلعب مشتهيه أكله كارهه أكله . 

ـ لا والله وهو يصير لاتستعجل على رزقك 

ـ لا مستعجل وميت .. هي شگد بعدلها 

ـ باوعتله نافع أريد أتريك وأنت قالقتك هالسالفه والله من تغيبلي ابلغك أني هم اريد مو بس أنتَ 

ـ ها تردين مني طفل ما عبالي! 

ـ أي ليش لعد وكومه مو بس واحد أترسلك البيت جهال

بس أنطي صبر 

ـ الله وأيدج 

ـ تدلل .. كعدت مقابله خليت جبن ومربى وهو طلع جگارته نافع شاركني بس يوم واحد وأتريك وياي 

عاف جگارته على طارف الگوب ثبتها وگام تقرب عليه باسني .. 

ـ هاي أحلى مشاركه وأطيب ريوك تردين مني شيء ثاني أني خادم حبيبي 

ـ لا سلامتك بس ما عبالي هيج نتريك رومانسيتك منحرفه 

ـ چا وين أكو رومانسيه عاقله .. أخرب على الرومانسيه الأعيشها وياج 

ـ خجلني أبن خوش أوادم ما خلاني أندل حلگي ثولني قسم بالله . 

ـ عاينيلي 

ـ باوعتله لكيته صافن بيه وغرگانه سفنه ويدخن وينفض الدخان عمداً بوجهي ودك موبايله ورجعت تريگت وهو دخل سبح ولبس ها تطلع 

ـ أي على أبويه چاي هنا أروح أشوفه عينج على رانيه لما العصر أوديها حجزتلها 

ـ تمام .. طلع وگمت نومتها وكعدت رفيف رضعتها وگمت على شغلي جنت لابسه ثوب فانيل لونه أبيض وطويل ونص ردن من كعدت من النوم ما غيرته وضيك لا والله أني سمنانه هالفتره وكلما التزم يجيبلي بقلاوه ما يخليني أضعف .. 

نظفت البيت وأجيت أغسل الحوش وشفت الموكيت مال الليل والماي جان جاي خل أغسلها واخلص منها دام شمس زينه .. 

جبت تايت وجلافه وكعدت أغسل بيها وأخذني واهس غسلت دواسات و‏شغلت الماطور ‏البنات يمي يفترن 

‏لابسات أحذيه ‏ويلعبن باب المطبخ ‏خفت عليهن من المي بس شسوي

‏بلشت أفرش بالفرشه وانكعها بالمي‏مندمجه اغسل تبللت أخذت الشال تحزمت بي وأجتي رفيف أجيت عليها اوخرها من ماي وكعت بطولي وكل ملابسي تنگعت خرب شجابج عليه متگوليلي كعدتها بمكانها ورفعت ثوبي ورجعت أغسل وما أحس الا الباب أنفتح دخل نافع 

‏

نافع ـ ‏شجاي اتسوين

لبنى ـ ‏جاي اغسل 

ـ ‏اي دخذي البنات وعوفي هسه وطبي جوه أريد أدخل السياره

‏ـ وأني جاي العب مو داكولك جاي اغسل ووين أودي الفرشات أنتظرني اكمل ودخلها.. ‏اني احجي بس احس نبرتي عاليه

ـ ‏لبنى هاي الصوت العالي عليمن .. تحجين وياي مو اچي أسر حلكج والله. 

‏ـ أهوو نافع من الحلوك الكسرتها عاد جفيني شرك خل اكمل غسل ‏يتمشى هو إني اغسل ما أهتميت ‏صار كدامي هزني برجله كمت وكفت . 

ـ ‏شو تعاي تعاي أنتِ ينرادلج جره أذن مستوكحه زايد صوتج صاير عليه عليمن هالتتنر ولچ . 

ـ عوفني نافع مو وگتك صحت بي و‏خلاه أيده ولزم ركبتي قوي من وره و‏من حلاه روحي دفعته بعكسي صارت الضربه قويه على صدره بحيث أنلهد وأنكطع نفسه ونفس الوقت ‏هو إتفاجئ ضل ساكت . 

‏گبل أخذت البنات وطلعت ركض لداخل ‏ارجف

‏كلبي يريد يطلع من مكانه لان متأكده منه ما يفوتها اليه ‏بس سديت الباب وطلعت صار كبالي وبدون سابق أنذار توالني ضرب بهل الراشديات وبثكل أيده 

نافع ـ ‏لج حيوانه أربيج والله من جديد أذا ما متربايه عادي 

ـ ‏الله عليك والله موقصدي والله ‏خنكني من رگبتي ولازمني من شعري وضاغط عليه وأنگلب وحش وواحد ثاني

ـ لج مسترجله شفتي روحج شوفه و‏عبالج الشخصيه بالمرادد والصوت العالي طلعت عينج كلمه الج كلمه اليه 

ـ ‏الله عليك بروح لباقر عوفني ‏سحب نفس وسحب ايده مني وعافني و‏كعدت ألم بشعري وامسح بوجهي

‏دموعي مطر واني مبلله صطكت روحي من البرد 

ـ حقيره أدبسزز أني أعلمج والله والله لاربيلج گلب 

‏لج هذا صوتج اخفي وأعدمه والله من ترفعينه وأيدج هاي اذا انرفعت اكسرها واعلكها ‏غضب مو مره صركاعه 

وبعدين أنتِ شايفه ثوبج لازك على جسمج طبعاً ما دايره بال لا أبالي وأني أحجي وأوصي وأنبه الخاتونه تعاندين بيه ما تگولين جوارين حايط ناصي أحد صعد سطح شافني بهل اللبس المخازي ما تفكرين بس تفكرين تجلفين منو رايد منج تغسلين وبناتج وراج ومطربسه بهل البرد وثوبج لاطش على جسمج أنوب أبيض خاف ما ينشاف شيء عارضته للعين عرض مجاني أدبسزز 

ـ لاتگول أدبسزز لاتگول أدبسزز أني مو مثل التعرفهن عقلك عارفهن عبالك كل النسوان مثلهن .. جرني من شعري عوفني تخبلت اليوم عوفني . 

ـ من سوالفج من لسانج هذا .. سگتي ولچ تردين تموتين تردين تموتين 

ـ علواه أموت وأخلص منك ومن هالحياة الگشره وكيفت بروحي وگلت أي الحمدلله أرتاحيت كرت عينها أخذت حماها وأرتاحت تبخاتت بي كرت عيني على هالزواج . 

ـ ولج سگتيييي سگتيييي غضب على يومچ والله هذا لسانج اكصه

ـ ‏خليت ايدي على حلكي وابجي ‏توبه والله توبه بدون قصد دفرني برجله

‏جانوا يگولون أيده ثگيله بالضرب ما أصدك لما شفت بعيني أبتعد وهو ساكت باوعلي صديت وجهي عنه مقهوره منه كعدت بجيت بجي على حظي ما صاير أمداني من بين النسوان أمداني .. 

بقيت حاضنه بنتي وبثوبي وسمعت الباب أنطب گمت عسريع باوعت المرايا ثوبي لاطش صفنت بعدين حلفت ما أضل دقيقه بهل المهجوم خنگني يطلع يقفل الباب يطب ويطلع يوصي ويدقق عبالك بس هو عرضه عزيز عليه وكل الناس كواويد أشو يا ادبسزز تبقالك بهل المهجوم عاشت وارتاحت من أمداني على هيج عيشه من أولها أيده اخذت عالضرب تاليها شلون والله لو اعرف اضل بالشوارع يا نافع ما اضللك بهل البيت... 

لبست عبايتي وأخذت بناتي وطلعت لبيت أهلي تلگتني خالتي سميعه وتباوعلي وتسأل عفتها ودخلت گبل للغرفه 

سميعه ـ شگو شبيج وگعتي گلبي وجهج ما يعجبني شصاير متعارگين يمه . 

لبنى ـ خاله بعدين هسه تعبانه .. لينا جانت ما موجوده ولا نور بس خالتي وبعدني ما مأخذه نفس أتصل عليه بس فتحت الخط أجاني صوته يعيط .. 

نافع ـ نفس الدقيقه الطلعتي بيها من البيت ومن دون علمي هسه ترجعين وتنزرعين كدامي لا أجيج لبيت أهلج أطلع جنازتج ومحمد يا لبنى أحرك بيت أبوج على رأسج . 

لبنى ـ ما أرجع 

ـ أنتِ لا ترجعين وشوفي شيصير وشيجرالچ اليوم سهله تطلعين من دون علمي كواد أني كواد ضاربتني عرض الحايط وماشيه لأهلج فوك غلطج وگوات عينج بسيطه 

جايج والله لشحطج من بيت أهلج لبيتي شحط والله اليوم أكفر بيج . 

ـ خلص تعال أخذنا ... سد الخط خفت منه لاصدك يسويها لان كلامه عصبيته تصرع صرع .. لبست وأندك الجرس وطلعت مثل المثوله وخالتي ما فاهمه شگوو .. 

جان وأكف يم الباب أخذ وحده من البنات وصعدت وطلعنا ونزل فتح الباب ودخل السياره بس طبگها نزلت ما أريد أتواجه وياه . 

نافع ـ وين موليه طلعتج من البيت هاي عليها تكسير رأس .. أنتِ بهاي تصرفاتج وين تردين توصيلين تردين تخلين رأسج برأسي . 

ـ سگتت ما حجيت ومشيت وعاط بيه 

ـ من أحاجيج تبقين مزروعه كدامي وتسمعين لو گملت تولين بس ما عليج التعب ينرادلج خبز هواي علمود تعرفين مالات الأوادم وتلحكينهم لان المره الما تسمع كلمة رجلها وتعرف أطباعه وتدير بالها زين تضل زعطوط وأرعنه .. 

ـ دخلت الغرفه بس شنو أختنگت خنك بالأخص من كالي زعطوط وحجايته تدك برأسي يابه جنت أحسه شايفني بعين جبيره بس من گالها أستحقرت روحي رغم هو الغلطان بحقي وعلى سبب تافه سواله مشكله .. 

الظهر أني كاعده بغرفتي وبناتي يحوصن يمي تالي گمت باوعت لكيته نايم بالصاله أيده على رأسه أرتاحيت من گتلتني وقهرتني دأشبع نوم .. 

سويت الغده وصبيت للبنات وهو فات توضى وراح يصلي أني هم ما كلتله عالغده اجه أصبله ما اجه كيفه 

كملت البنات ورحت نومتهن وهو رجع الصاله واني نمت للمغرب يله حسيت على نفسي وبناتي هم وياي لان الأضويه طافيه مأخذتهن النومه .. 

كعدت وسمعت صوت بالحمام راجع من الجم باوعت الساعه اليوم عنده خفر .. فتحت الجدراي على حطتهن ما مأكل .. دخلت الغرفه لكيته يلبس ملابسه وگف خله ملابس بالجنطه وحضرها وشالها وطلع حتى بدون ما يوصي كالعاده .. بقيت على كعدتي أباوع على منشفته وساعته عافها عالميز وفزيت من صفنتي لمن سمعت صوت زهور! شجابها .. 

طلعت وبأيدها جنطتها زهور يا هلا بيج 

زهور ـ ما تردون خطار اليوم أني خطاركم 

لبنى ـ هلا بيج عيني أحلى خطار أتفضلي وويامن أجيتي 

ـ نافع من العصر گالي اليوم تجين يمنا وأني ما گلت باطل طاك گلبي من البيت ومن الشغل گلت اجي أغير جو يمج وهم نكعد نسولف . 

ـ هلا بيج عيوني .. دخلت ومن صدك فرحت بيها وكعدنا سوينا العشه وتعشينا وشوي وميثم جاب علاكه حلويات وفواكهه وحبشكلات أخذتهن منه 

ميثم ـ هذن نافع گالي وصلهن . 

لبنى ـ ماشي عيني انطيته حصته وراح ورجعت سوينه كعده تونست بيها بقينا كاعدين لـ ٣ يله قفلت ونمنا واجيت على مخدتي وتذكرته بالعاده يدزني يم أهلي اليوم دز أخته تبات يمي ليش هيج سويت يجوز ما يريد أحد يعرف بينا مشكله يله همزين ما حجيت لخالتي هي هم ما ناقصه تشيل همي .. 

بقيت أتگلب وتذكرت للحظه الصفنت بيها على نفسي بالمرايا شلون ثوبي لاطش وطابع على كل جسمي ومن فتح الباب الشارع صار كدامي وأني ولساني والجوارين ضليت اجيبها منا اوديها منا ما نمت للصبح اني عيني ما تأخذ نوم مقهوره منه ومقهوره من نفسي . 

الصبح كمت أكوم انظف واغسل ملابسه ضلن بالغساله .. كمت كملت شغلي بس الحوش عفته من يرجع اغسله كدام عينه بلكي يرتاح رأسه من تفكيره 

طبخت الغده وهو مل بين اليوم تأخر هو خفارته تبلش من ثمانيه باليل لثمانيه الصبح مرات لـ التسعه يله يجي اليوم دگت بالعشره هو ماكو .. 

.. زهور عفتها نايمه بالغرفه بالكاع فرشت خطيه وسمعت صوت المفاتيح أجه توترت وانخبصت كبل أنطيت ظهري وكفت انظف الخضروات .. سمعت طبة الجنطه من ذبها عالميز يعني غسلي ملابسي 

باوعتله طلع من الغرفه شايل ملابسه راح يسبح ومن طلع علك بدلته مالت الدوام عالدرج ..

كعد بالصاله بس صوت موبايله يتصفح يوصلني باوعت الساعه صارت بـ ١١ وأني قفلت من النعس طفيت الطباخ ورحت نمت ما بيه بعد من وراه ولا نمت 

حسيت أحد يكعدني وأني ميته نعس عوفني نافع نعسانه 

زهور ـ خرب أني زهور كعدي دنيا عصر راح اروح والبنات غديتهن وأنتِ نايمه ردت أكعدج نافع گالي عوفيها .. هسه راح امشي گلت اسلم عليج 

لبنى ـ ها عيني ما أدري والله .. ليش ضلي شعندج 

ـ لا فدوه كلهم يضيعون من دوني بالأخص ناجح وأبويه هنا متعلم عليه .. يله أجيج أن شاء الله 

ـ هلا بيج عيني گمت وياها وناجح جان واكف ويه نافع بالحوش گبل رجعت لان ما لابسه شال .. دورت على بناتي ماكو وينهم ودخل هو البنات وين 

نافع ـ يم أبويه دز عليهن 

لبنى ـ عبرني ورجعت المطبخ أريد أشوفه مأكل لا راسلت زهور اكلج نافع أكل 

زهور ـ لا والله صبيتله گال ما أريد 

لبنى ـ تمام عيني .. شفته دخل لابس ملابس الجم وطلع هذا يضل هيج بدون أكل ..

گمت طلعت صدر دجاح ولحم وقطعته وشيشيته وعيني تراقب الساعه وثرمتله سلطه وخضروات وأجه گبل دخل الحمام ركض طلعت المنقله ولابسه ازرار الصلاة وأخلص من للسانه يضل يحجي .. خليتهن وكعدت لما كملتهن وهو كاعد بالصاله ولا كأنما اليه وجود عادمني من حياته أعدام .. 

رتبت اله الصينيه وخليتها كدامه هذا عشاك أتعشى وزعلان مني ميخالف بس النعمه شعليها بزعلك ولا باوع ولا أهتز عيونه بهل الموبايل .. 

عفته ورحت صليت وبقيت بغرفتي وأنتظر البنات وسمعت صوتهن أجني عيني يمه باوعت عالصينيه عالسنك فارغه همزين مأكل شكيت كلت خاف ذابهن باوعت السله لا مأكل الحمدلله .. صحت نافع تريد أصبلك چاي ما رد تقربت يمه أصبلك چاي ما جاوب . 

تالي صبيتله وخليته كدامه وضل على هالحال يومين ينام بالأستقبال وأني اسوي طلباته بدون ما يگولي لان لاحظت يعتمد على نفسه حتى چاي هو يخدر ويصب وما يگولي ..

ما توقعت زعله هيج ثكيل وقاسي لدرجه ما أسمعله صوت منعزل ولا يباوعلي مو من نوع الرجال يحن لهفته ما يصبر أخر همه الموضوع زعله اهم من لبنى حتى .. 

أني أدري بروحي غلطانه بحقه هو يغار وحريص ما حفظت أطباعه بس موهيج هو هم ما قصر ضربني وقسىٰ عليه شسويله أبوس رأسه .. 

البيت صاير ولا ينسكن أعصابي مشدوده وأقل غلطه أفرغ قهري بناتي وهو يصيح ويحجي ما يقبل أحجي عليهن 

گام يتأخر بالرجعه وهو قليل يضل لهل الوگت ضل بالي هذا ينخاف منه خل أشوفلي حل وأرضي مو مال أني هم اضل شايله خشمي صار أربعة أيام شو ولا أباله . 

گمت تحضرت مثل ما أتحضرله كل مره وفتحت شعري وسرحته ناعم على طوله ورشيت عطورات ومسك اليحبه ومكياج والبنات نايمات وهدوء وهو ماكو

راسلته نافع وين أنتِ .. شافها گبل وما رد 

ضل بالي يمك .. شافها هم ما رد 

عفته وتمددت وسمعت صوت سيارته گمت باوعت ودخل .. جنت واكفه يم الباب عبرني بدون ما يباوع عبالك ما يشوف كدامه خرب أني لبنى تذوب من تشوفني .. أخذ مخدته وبطانيته ودخل الأستقبال وسد الباب بحيث بقيت جامده من تصرفه . 

رجعت نمت مقهوره حيل من تصرفه وثاني يوم صادف غافر يرجع من قهري گمت تحضرت وكشخت كشخه زينه عناد بي وطلعت ولا أهتملي! .. وصلنا بيت أهلي كدامهن حجه وياي عود يبين أحنه زوجين مثاليين .. 

وصلنا البيت وراح المطار ولكيتهن غاسلات ومنظفات وكلها چايه وعوذه الما متوقعة أشوفها نورس چايه هي وأخواتها شهل الصلافه .. 

سلمت عليها ودخلت غيرت عبايتي جنت لابسه دشداشه قديقه لون ماروني طوخ بيها بصمه بالصدر طالعتني تشق هههه .. 

والبنات زهور وزينب أخذنهن مني ورحت على خالتي نهاوند وبلشت الطبخ طبخنا جدر لحم جايبيهن ذبايح من القريه وخالتي لميعه وناجح ذابيحين ومجهزينه 

اني بس عليه طبخت .. 

وأني أشتغل ونورس كاشخه عالأخير وبس تباوعلي تجاهلتها بس عيني عليها ما أكدر هسه يجي وهي تفتر كدامه خرب حظي انوب زعلان .. 

كملنا الطبخ وباوعت الساعه بعد ما چاين 

وأخذت زهور ورحت سبحت عالسريع وكشخت ورجعت ومن دخلت نورس ضربتني بجتفي . 

نورس ـ ها لبنى شلونج ويه أبو النسوان

لبنى ـ ردت أمشي وگالت 

ـ زين حافظه أطباعه يتخبل من المره بيها ريحة طبخ ركضتي كشختي واجيتي شدعوه هيج صارعج بس حقج هو ينخاف منه 

ـ أنتِ شتردين بالضبط 

ـ سلامتج اسأل عليچ والصراحه مستغربه هذا الهدوء منه بعلاقته وياج! لان هو ماكو وحده تفهمه فميال على جنس النساء يحب يستكشفهن كلهن بس أظن الظاهر هو ساكت لان راضيته وشابعته لان أنتِ ذوقه يموت ويخرب على المربربه والمصبوبه مثلج لان القلبج جانن نفسچ متشوفيني ما بقيت وياه لعبت نفسي من ذوقه .. 

نفس طبيعة جسمج وتضاريسج لهذا كارص عليج وما لاعب بذيله بس مع ذلك ديري بالج منه هو أبو رغبات يجوز بعدلج فتره مو أكثر ويگوم يدور غير جسم يمل من المربربه ويدور على المعصصه ديري بالج لاتأمنين بي هذا ثعلب ومگار .

ـ عفتها ما تحملت كمية كلامها وحقارتها عليه لا ما يسويها هو عاقل ما عنده هيج سوالف هاي تريد تهجم بيتي وميته وطاگه من عدنا .. تجاهلتها تماماً لان أدري بيها خبيثه وحقوده ختولي 

.. وجابلتلي موبايلي زهور هو يتصل جاوبته ها عيني . 

نافع ـ وين صرتن بالطبخ 

لبنى ـ خلينا اللحم عالنار بعد التمن خالتي گالت هي تطبخه 

ـ كثرتهن لان جماعتنا يجون عالغده 

ـ منو جماعتكم 

ـ أصدقائنا بالدوام هذا واحد شام خبر عزيمه وطاشها بالفرع والقسم كله وخبص الجو عليه كلها تتصل تالي عزمتهم كلهم 

ـ ها ما أدري خالتي نهاوند گالت نطبخ على گد الموجودين . 

ـ لا طبخي بعد اذا باقي لحم طبخي ذبيحه كامله وأذا ماكو دزي ناجح يجيب لحم طلي وأريد أنتِ تطبخين الأكل

ـ مو اني سبحت وكملت 

ـ وشعندج سابحه لازم وليتي للبيت

ـ أي رحت سبحت ورجعت 

ـ أني شحاجي وياج أنتِ ليش ما تأخذين الكلام وطبلة أذنج من حديد لو من كونكريت كلمتي مالها مسموع عندچ

ـ أستغفر الله رحت سبحت لان ريحة طبخ ووليت أخذت زهور وياي 

ـ بس أجي الا ما حفرت رجلج بالدريل ونصبت جهاز تنصت أني مو نافع علمود وين ما تولين اعرف وكبل طلقه وحده وأشل رجليج شل . 

ـ هو شگو 

ـ أكو واحد متحلفلج 

ـ والله أنت بس تريد مشاكل 

ـ يله ولي روحي طبخي ساعه النوب أجي 

ـ ما أطبخ خابر على طباخ خل هو يطبخ ودبر وضعك مشكلتك أني ما عليه 

ـ سهله لبنى 

ـ سهلات باي . 

ـ أني أعلمج بس أرجع الا أطبر لسانج عرصه 

ـ سد الخط ورحت گتلهن وطلعن ذبيحه گامله وخليتها وطبختها ونكعت التمن أني أستلمت طبخ أصدقائه وخالتي نهاوند طبخت العيال ..

وسمعت هورن أجه ابو طبر ابو رأس المصفح أبو خبالات .. 

كلهن وگفن ونزل غافر وساعد أمه وشفتها أنصدمت بشكلها وحده ثانيه ضعيفه والوجه ما بي ولا شعرايه أنقهرت على حالها تقدمت سلمت عليها وشفت غافر الف الحمدلله على سلامتك وسلامة الوالده ما بيها 

غير العافيه . 

غافر ـ الله يسلمج خيتي أم رانيه رحمه الله والديج . 

لبنى ـ واكفه بصف خالتي نهاوند وهو جگارته بحلكه عفيه جگاره مشاركه وياك بكل الظروف والأنواء الجويه لو لان شاف الحلوات دخنت عجاجته .. أبتسمت بمكر بوجهه وعكد حواجبه مال واحد حاقد وجه اليهودي 

.. رحت المطبخ يم البنات ينظفن خضروات گابلتهن وهو واكف يفتر ويخابر ويحجي ويه خالتي نهاوند عينه بالجدر وهذيج أنكرصت هم واكفه يمهم وسوت نفسها تفر بالجدر عود هي الطبخت وأني شنو جنت افلس نوه تمر! ليكون عباله هي الطبخت! 

هنا شطتت من القهر عيوني صارت بكصتي حتى صدعت نوب هو عالزعل حليان وملامحه القاسيه لايكليه حتى بزعله حلو خرب بروح أمك حربيه على هالصماخ الحلو .. لزمت نفسي من شفته أجه علينا

وگف باوع على الخضروات ويحاجي أخواته وهي وراه بحيث من عبرت جسمها طخ بظهره الا فز وأبتعد من الباب وخزرها بنظره گبل نزلت رأسها . 

نافع ـ نظفن بعد أذا ماكو خل ميثم يجيب وطرشي جبتوا قواطي بيبسي لبن لاتنسون شيء 

زهور ـ أي عيني جابوا لا اكو ما يحتاج لاتشيل هم . 

نافع ـ زين زين . 

لبنى ـ خالتي نهاوند أجتي وكلهن موجودات وگفت بصفه وهمست شعندك بس تفتر لو ما صدك شفت الحلوات وخيالها كدامك ما لزمت الكاع تبسمرت هنا 

گبل عاط بيه بحيث فززني 

نافع ـ شبيج أنتِ أني بيا حال وأنتِ وسوالفچ الطايح حظهل مو تشوفيني مخبوص ودايخ بالعزيمه هذا عقلج يمت تكبرينه . 

لبنى ـ حجه بعصبيه وكدامهن وخله وطلع وأني ضليت ساكته وكلهن موجودات فشلني كدامهن بالأخص هي الحقيره خلت أيدها على حلگها يابه فد أنقهرت صرت نار

" حتى لطبخ بعد ما وصلت لزمت المطبخ على شغلات الخفيفه وخالتي نهاوند حارت لان جنت اساعدها عفتها ما أريد أطلع وأشوفه وخل هو يحير وعماته خل يطبخله 

نهاوند ـ لبنى عوفي من أيدج وتعالي ساعديني بالتمن ما ضل وگت يولي لما أسوي الحشوه كومه تريد مني شغل .. نورس كملي تگلأه ولحگيني 

لبنى ـ هزيت رأسي وأني أستلمتها وكعدت أسوي الحشوه ومخبوصه وكام يدز عليه يريدني اروحله بس والله ما أكوم 

زينب ـ نافع يصيحچ 

لبنى ـ رجعت أشتغل وگام يصيح 

نافع ـ لبنى لبنى 

لبنى ـ أنطيته الأذن الطرشه وصوته صار قريب أجه للمطبخ وراه خالتي نهاوند شايله الجفجير وأني ملتهيه 

نافع ـ لبنى مو دزيت عليج 

لبنى ـ جنت شايله السجين وصحت بي بعصبيه شتريد بس تصييح مو تشوفني چاي أشتغل جاهل اني بس اصيح وأدزز عليه .. صفن بوجهي ثواني ومشىٰ مزعوج

نهاوند ـ على كيفج وياه شكالچ گمتي تصيحين هو هيج المره تحاجي رجلها عود أنتِ العاقله كومي شوفي شيريد وتعالي نطبخ التمن شجاج قبل لايجي جنتي شحلاتج هو اجه كمتي ما تشوفين دربج 

لبنى ـ أنقهرت وطلعت وراه جان واكف قريب جدوره وماكو أحد بس هو مشيت قبل لا أوصله گبل تقرب سحبني من طارف دشداشتي وأخذني ورا البيت على صفحه ولزمني من أذني قوي 

نافع ـ على منو تصيحين ها عليمن أحجي عليمن! 

لبنى ـ أنت بس تصيح ثولتني وأني جاي أشتغل

ـ عليه لبنى تصيحين عليه جدام النسوان تريدين تسترجلين لو تردين تفرضين نفسج وشخصيتج القويه مو أدوس عليج وعلى شخصيتج وهذا صوتج العالي أعدمه الج والله ..

ولج المره بنعومه صوتها قشمر وأنتِ كلما أحاجيج تتنرين وتصيحين بوجهي جاهل كدامج . 

بس مو هنا حسابج بس خل نرجع لبيتنا وأطبك عليج الباب وأعلمج التأديب على أصوله يا حيوانه . 

ـ ضربني على رأسي وجرني من طارف دشداشتي 

ـ رجعي كملي شغلج مثل خوش أدامي لا أگوم الجدر على رأسج وأنعل يومج لاتشعلين گلبي لا أشلع أفادج دماغسزز . 

ـ عافني وراح ورجعت كملت الطبخ والتمن وگلشي على أصوله وأجه شاف الكميه ما حجه وخالتي كامت تزامط بيه كدامه عبالك حست هو مزعوج مني 

نهاوند ـ شلون مره ذيب والله ذيب جنت شايله هم وهي بساعه ترست الجدروره وطبخت هاي صدك من النسوان گبل وما تشيل هم للعزايم هاي صدك من نسوانك . 

لبنى ـ ما حجه شيء وأني هم گملت شغلي ودخلت بالصاله جوه بعد ما طلعت وغافر طلع من غرفته يباوع عالكل عالرايحه والجايه يدور على نور. 

كاعده وأنوم برانيه وفاتت نورس فتحت المجمده طلعت قواطي البيبسي وأجه هو باوع الكميه وباوعلي صديت وجهي عنه عبرتي تطكك بصدري ..

بقيت نومتهن ولما وصلوا جماعته وگمت صار وگت الصب وگف اني أصب وخالتي تخلي التمن واني أخلي للحم وهو على رأسي يخلي زايد وكملنا وفضت العزيمه وكلهن كعدن يتغدن وأني عفتهن ورحت يم بناتي وشويه وشفته أجه يغسل باوعلي تقرب نشف بالخاولي ومشىٰ ما حجه شيء .. 

گمت ساعدتهن ذبن عليه الچاي والمواعين خالتي نهاوند ذبتهن على نورس واخواتها لان كظنها تخست وهي حقانيه والتشغلت بعد ما عليها .. 

كملنا وهما وأصدقائهم بالأستقبال وأحنه كلنا كعدنا بالصاله يم أم غافر والحجيه وخالتي حتى لينا موجوده بس سوده عليه وجهه طافي مالها خلك الحمل من هسه متعبها .. 

دزوا على چاي وگمت صبيتلهم وهي شافته أجه تتنعوص 

نورس ـ نافع بابا أهنا بعده لو راح 

نافع ـ وشمدريني بإبوج سارح بي . 

لبنى ـ أنطيته الچاي ورجعت وهي ضلت بالمطبخ تجاهلتها باوعت الساعه صار العصر وكلهن گامن يرحن بس الحجيه ضلت .. كلهن مشن بيت عمي مشعان رادن اروح وياهن ما رحت خفت من للسانه خليت وكعدت يم الحجيه .. 

وصلتني رساله من عنده 

نافع ـ يله تحضري وما ناسيها الج بس نوصل البيت 

لبنى ـ گمت وطلعنا وأني خايفه منه لايضربني أيده ثگيله حتى خايفه من لسانه شوي هو يقسي بالكلام يدگن ببسامير بگلبي حجايته ما أهضمها .. 

وصلنا البيت طبگ السياره نزلت قبله والبنات ركضن كدامي بعدني ما منزله جنطتي جرني من أيدي سحبني نافع الله عليك والله مو قصدي نافع أمانه لاتضربني . 

دخلني الغرفه وركع الباب وصمطني براشدي ولزمني من شعري قوي نافع والله مو قصدي . 

ـ شلون تصيحين عليه جدامهن شلون 

ـ والله مو قصدي جنت أشتغل وأنت تصيح نثولت والله

ـ ‏شوفي أني هذا گلبي معمل منج بس أگول ميخالف تتعلم نافع أسكت داري نعمتك

‏تتعلم ميخالف ميخالف بس بعد ماكوو ميخالف طگت حوصلتي منج إنفجرت وهذا گلبي ما يتحمل بعد ‏التنتر مالتج وقله الاحترامات هاي ماينسكت عليها ‏..

أكفر بساعه السوده الجمعتني بيج أنه ‏أصيحلج تجاوبين عبالك جاهل رايدج مو رجلج لج أنتِ ما معترفه بيه 

‏لج أنتِ هاي الكيميا إلي تصير بين الرجال والمره ماكو

رجال يجي من شغله تتلگه مرته تهلي بي الله يساعدك أشسويت ما سويت بس همج بناتچ أما نافع ضاربته عرض الحايط ولج كلمتي مالها أي أهميه عندج . 

بس شحجي عبس أحساس ماكو صفر ماكو.. ‏لج إني ما أحب المقارنات ولا احب أهينج بحاجه ‏بس هاي أختج لينا جنت اكول كبل لينا مسترجله لج والله احتقرت روحي من عطتي بوجهي كدام عمتي وجدامهن كلهن ووره دقايق اجا حربي وشلون ركضت تستقبل ووتهلي بي لج صوتها ما ينسمع عود هو الغلطان بحقها والحق وياها لج والله تستحي ترفع عينها بوجهه من شدة الأحترامها اله تخاف منه تهابه تهاب رجلها .. 

بس أنتِ عرصه ما تهابين أحد ‏لج شناقصني وهيچ مستصغرتني ‏مقصر وياج بشيء مو رجال أحجي لج تهيني 

.. ‏لج إني أتمنى من ارجع للحظات اخزنها بالي تتلكيني وحضن كلمه حلوه تزيح التعب ..أني الابادر واغلس

‏كلمه حبيبي تستحسفينها بيه 

‏وأضمن عليج حتى هاي نومه من وره خشمج ‏كوه هي كووووه أنتِ مارايدتني عيشتي وياج من لا جاااااره والله 

‏قالب ثلج على گلبج من اروح لدوام 

‏درتاحي والله يا لبنى تحلمين أباوع بخلقتج بعد

نافع ـ ‏الله عليك نافع لا تزودها لا تبالغ عبالك متحمل عليه

ـ ‏‏لا مو متحمل والله بس موقف صغير كافي أن يطلع هالانفجارات الي بداخلي . 

ـ ‏لا تضل تشبج أني ما مقصره وياك لا أكل لا شرب لا ملابس كلشي على اتم وجهه . 

‏ـ هو أنتِ شيهمج عبالج حياه الزوجيه نهار كله محزمه وتشتغلين ‏شمعرفج بابا أنتِ بالزواج

ـ ‏اي بس تره زواج هم مو بس نومه 

ـ ‏باع عقلج الزعطوط شيفكر. 

ـ ‏كعد تعبان گلبه مليان مني صفن عليه وتالي صفك أيد وتمدد وضل نايم اني رحت غسلت وبدلت كملت 

بناتي صارت دنيا مغرب هو نايم والتعب مبين عليه خليت رأسي عالباب أباوع عليه واتأمله أنت شمدريك بگلبي شمحل الك يعني شرط أحجي .. نزلت دمعتي ورحت عشيت بناتي وتذكرت كلمته أهم شيء عندج بناتچ! 

ضل نايم بالغرفه تالي گمت سويتله عشه وأني ما أكلت شيء بطني مليانه قهر .. رحت كعدته وفز أكعد تعشى باوعلي وأندار نام على بطنه .. عفته العشه مالته عالميز ونومت بناتي ونمت بصفه هو شافني نمت شال مخدته وطلع وضل يومين ساكت ما يحجي قلة على گد سؤال والجواب .. 

طگ گلبي يومين لا يحجي حتى معصب هم أسمع صوته هسه قافل ويطلع يروح على غافر لليل يله يجينا 

گمت مثل كل يوم نفس الروتين البنات يلعبن يمي واني الف كبه 

هو يفتر مثل المصراع طاب طالع جكارته بحلكه غركانه سفنه واليوم عنده خفاره هسه بس أكمل أحضر جنطته أجه دنك حشو گبه ويمطك حسيته يعاند بيه ومشى ورجعت الف بس بالي عنده 

اخر شي شفته يصلح بالماطور مدري شعنده اليوم ما داح زين يله وأكوله يوديني على أهلي أشوف أخواتي وأفهم على سالفة نور شصار وياها هاي إذا وافق يأخذني وياه .. 

كملت الكبه وضل الحشو كلت اليوم والله ما اقدمله كبه ولا اخلي يأكل ويه البنات لان كلمره يشبعني قهر يأكل الحشو ويفلس التمن على صفحه همه ليش سموها كبه تمن غير نأگلها . 

هو بالعادة من يروح الخفاره يتعشى لان وراه سهر 

يجوع .. گملت تگلاه وصبيت عشه للبنات 

خليت ماعون بي كبه وزلاطه صح مايعرفن ياكلن بس يتنعوصن بس أحب اجواء كعدت الاكل اصنع جو لنفسي ياگلن كبه ويلعبن بالزلاطه يحاولن ياكلن 

اشو هو اجته صفنه على الوضع . 

نافع ـ ليش ما صبيتيلي عشه وياهن

لبنى ـ أنتِ أساساً متحب تلعوص البنات كلت اصبلك وحدك احسن

ـ أشو أنتِ مستهتره فد مره طايحه الحظ . 

ـ غلست عن الموشح الجميل ورحت خليت الحشو بالماعون وكليتله تمن بدون حشو أصابع والله اليوم الا اطلعلك گلب ثاني .. خليت العشا كدامه 

نافع ـ وين الكبه مو تعرفين اني أحبها 

ـ اي أعرف هياته الحشو وهياته تمن تگلاه

ـ قشمر كدامج شنو 

ـ لا حشاكً خفت يتعصب رحت جبت كبه وخليتها كدامه

ـ ما تكعدين تأگلين ويه بناتج

ـ لا بالعافيه ما مشتهيه عفته ورحت يم البنات أوكل بيهن وهو صافن علينا جاب الصينيه واجا يمنا يشاركنا بالاكل

ـ أدري عازلتني وحدي شنو بيه جرب. 

ـ لا كلت تنزعج من تصرفات البنات ميعرفن يأگلن 

ـ شعجب من هسه معلمتهن عالاكل يأكلن بنفسهن 

ـ لا مو اكل هيج خفايفي سنه ونص كافي وما كاطعه الحليب بس يحبن يأكلن 

ـ طيبه الكبه

ـ هو أنت شفتهمت منها مأكل الحشو ومخلي التمن

ـ أني أحبها هيج

ـ جيد اروح اجيبلك جاي .. أجه غسل ومشى أحضرلك جنطتك 

ـ لا ما يحتاج أني أحضرها 

ـ ما ناقشته كملت شغلي وطلع كل ظني راح الدوام ويدزلي ميثم بس شويه ورجع ودخل الغرفه ضليت كاعده وبناتي نعسن وگمت لكيته ‏متمدد نايم اليوم بالغرفه

نافع ـ ‏إذا تردين اخذي بناتج ونامي بالصاله

ـ ‏لا شعندي الصاله بارده انام يمك .. ‏ضل ساكت وحاط ايده على عيونه

.. ‏نومت البنات خليتهن بالسرير ‏رحت بدلت رشيت عطر ومسك و‏خليت لوشن وأمسح بأديه وحديت عيوني عليه اليوم لو بالهدف لو بالنجف كافي طك گلبي عليه أعترف بغلطي وأعتذر منه وشيصير خل يصير . 

‏رحت تمددت يمه هو جسمه تشنج طبكت روحي وخليت أيديه وحضنته من ضهره گبل ‏رفع ايديه وبعدهن

ـ ‏شو وخري عيناي أعرفج تعرفيني حاضنتني . 

ـ ‏نافع حبيبي! 

ـ ‏لا حبيبج ولا أعرفج وخري منا 

ـ ‏نافع بطل زعل وأعرف بروحي غلطانه وأجيتك أعتذر 

ـ أي اليعرف روحه غلطان تنكسر عينه يصير فقير ‏مو صوته واصل لسابع جار وأعصابه گابه كالبه البيت جحيم

‏هو إني ادري الرجال من يزعل هيج يسوي ما أدري اكو بعض نسوان تصعد مشاعرهن وهورموناتهن هلكد

ـ ‏لا تحجي هيج إني تتلف أعصابي من أنت متحاجيني تدري بيه أحبك مو الا أعبرلك بس أني هيج شوي عندي برود ما أعرف أعبر عن مشاعري الجياشه . 

‏ـ أي برودج خل يوگلچ خبز متفيدني أنت

ـ ‏حضنته مره ثانيه وتجرأت وبسته من شعره من ركبته

‏يروحي فدوه لعمرك دندارلي خلي انام بحضنك! 

ـ أشو وخري ما أريد وخري 

‏

ـ ‏لا طوخها حبيبي

ـ من كون ‏حبتج حيه وخري مني 

ـ ‏نافع يروحي أنتِ 

ـ أخاف مبدلينچ شُنو مغيره أعدادتج صايره رومانسيه وكل حبيبي ويروحي شسالفه 

ـ ‏لعد شعندي غيرك أنت أبو بيتي وان شاء الله يرزقني منك عشر جهال 

ـ ‏اي يلا روحي نامي ولو شينومج أنتِ مبينه مستويه

‏مناك أربعة أيام ومنا يومين يا ويلاه ستة أيام شيصبرج فلفل عجم أنتِ

ـ ‏لعد شون نورس تگولي أنتِ ذوقه! گبل ‏اندارلي

ـ هسه أني وياج نحجي شجاب قندره بالموضوع

ـ ‏ضحكت وبسته من يم شواربه هو اني جبت طاريها حتى أصيدك

‏ـ وخري منا مالي خلك لسوالفچ 

ـ ‏رجع اندار وقفل ايديه زعلان 

ـ هاي شُـنو

ـ ‏صعدت من فوكاه وعبرت على جهته

ـ ‏خرررب بيومج جعصتيني لج صيني صايره فيل وخري

‏ـ أفتح بايديه وهو قافلهن باوعت لوجهه ة‏قربت روحي اله بسته من خده ‏من ركبته فتحت أيديه رخاهن على الاخر نمت بحضنه اشتم ريحته وايديه تلعب بشعره وأتلمس بشرته وكل هذا هو صافن على حركاتي متفاجئ مصدوم ما مصدك ما ادري بس الأدري لازم أراضي . 

‏.. قريبه منه وأنفاسنا وحده أخذني بقبله عميقه ثقيله 

‏خفيفه على روح وركبتي تشنجت واني وأعيش أحلى لحظات الاشتياق من بعد الزعل همست

‏لأتعيد جفاك عليه أني ما أتحمل فراگك.. 

‏يحضتن رأسي لصدره بكل قوته . 

ـ ‏حتى تتأدبين مره ثانيه ميهون عليه ضعفج تجاهي 

‏وما أريد أستغل هالشيء بس أريد نعيش بسلام وضجت منج ومن نفسي لا مديت أيدي عليچ وأني

ما أريد أضربج بس أنتِ بتصرفاتج جبرتيني وصح أني أضرب وأيدي ثكيله بس مو عليج أنتِِ ما تستاهلين مني الا كل الخير . 

ـ ‏رجعت أبوسه بكل ماعندي رغبه اطفي نار إشتياقنه لبعض ‏وكانت ليله حلوه ومن العمر .. 

‏كعدت الصبح وأني بحضنه والبنات جايات يمي نايمات

‏حضنته بكل قوتي ‏شدد لزمته الي وباسني من شعري

‏اليوم ماخذ أجازه شنو .. 

ـ ‏ااممم 

ـ ‏ليش

ـ ‏من وراج

ـ ‏ليش شمعرفك راح نتراضى

‏گلبي حس گبل خابرت وصاحبي ناوب بمكاني

ـ زين سويت الساعه بيش

ـ بالعشره ‏كومي حضريلي ملابسي أسبح وچاي

ـ ‏طلعت عالسريع نشيطه واضحك يربي البارحه وجهي يتلاطم سبحان الله شنو تغيرت نفسيتي بسرعه . 

وسويتله الجاي ‏وسويت لروحي كهوه غسلت وجهي نشفته وشربت كهوه ونصيت الجاي يتهدر هو اجه

‏هو يفتر الجكاره بحلكه

‏

ـ شُـــنو ما كملت الباجه

ـ ‏لا بعدها مكرعنه

ـ ‏لسانج ينرادله كص لازم أطبره لازم 

ـ ‏الله وأيدك لزم وجهي عصر فكي يتحسس شفافي و‏أخذ بوسه و‏أتعمق بيها ‏رفع راسه وحجه 

‏ـ أنتِ شُـنو هاي بوستج كل مره تختلف تحسسني بإحساس يختلف . 

ـ ‏خليت ايديه تلتاف على ركبته . 

ـ و‏بكل أنت مره تعيشيني شعور حلو

ـ ‏لآنج تستاهلين كلشي حلو 

ـ ‏كعدني عالميز وهو ماد ايده عالميز ويسحب نفس جگاره 

ـ ‏هذا الميز راح ينكسر ميشيلج والله 

ـ وضحك.. ‏كمزت أنت مو مال رومانسيه بس تتنمر وتعيب مانسالكياها من كتلي صيني بكد الفيل بس عبرتها كلت خل أقشمره واراضي ‏بعدين اضمها الك 

‏رافع حواجبه وعيونه أنفجرت 

ـ ‏هاي عليمن اقشمره لج

ـ ‏عليه عليه شبيك أني القشمر والله حبيبي فدوه والله جفصت ردت غير كلمه وهاي كمزت بحلكي

ـ ‏خفت حلگج 

ـ گمت ‏صبيتله جاي هو يبتسم و‏رحت سبحت وهو يفتر يشغل ماطور يطفي الاضويه و‏طلعت انشف شعري البنات كاعدات ومسويلهن كل وحده بيضه 

‏مكيفات خطيه 

ـ ‏هاج نسوانج اروح اسبح اطلع اجيب مسواك ثلاجتج وجهه الارمله فارغه . 

ـ ‏بعده ما داخل الحمام ولزمته و‏جذبني خربطه شعره وتشيرته وأحتضنته نافع 

ـ ها ولچ أشو شگلج مو راحه 

ـ خليني أحجي شبيك تخرب اللحظات 

ـ خل أجيب جگاره بروح أبوج

ـ أوكف عوف الجگاره هسه گبل سحبني من خصري وقربني اله 

ـ أحجي أسمعج حبيبي 

ـ أني ‏كلش أحبك وما جنت أعرف بروحي هلكد أحبك ومدمنه عليك 

ـ ‏ياريت من زمان كاتلج حتى تحسين بقيمتي

ـ ‏ضحكت وبسته من خده عادي ‏أحلى من العسل على گلبي أحتضني وشالني

ـ ‏مو أگلج انتي تتحارشين كوه كوه أنتِ ميته عليه مو بس تحبيني . 

ـ ‏ضحكت من گلبي على صوته شلون يحجي 

‏وحركاته طيرت عقلي .. 

‏طلع من الحمام وأني مأخذه أجازه مسفطه اليوم كلشي ما اشتغلت صارت بـ ١١ وينشف بشعره ويحجي

‏نافع ـ أني بعد ما أكدر أروح خفاره

لبنى ـ ‏ليش عيني شبيك .. ‏كعد يمي وسحب رأسي لحضنه

ـ ‏ما بيه بدونج روحي تتفركس عليج و‏هذا أستاذ عاصف لازم الكاله صرفه ينقل دوامي صباحي 

ـ ‏أي احسن والله

‏ـ خو أنتِ تكيفين

ـ ‏اي طبعا أنت بالخفاره كلشي ما أفتهم منك

ـ لا باقي على گلبج 

ـ أي عادي 

ـ ‏اليوم كلشي ماكو

ـ ‏اي خلينا ناخذ أستراحه بعدني مشتاقه

‏ـ خرب لحد هسه

ـ أي ‏لزمت ركبته والله هسه أنتِ لو صغير احطك بگلبي 

‏اكلك وما اشبع

ـ ‏لا يا نافع صار بيها أكل 

ـ ‏احجي ويا وأخذني نومني بحضه ‏خلي نرجع نام نعسانه اني أريد أنام شنسوي بالاكل 

ـ ‏والبنات شون

ـ ‏اجيبهن ونقفل الغرفه شيسون قابل

‏ـ أنتِ قافله اليوم

ـ ‏اي مو شون ما جان

ـ ‏لج لبنى خاف تفترسيني

ـ ‏اي دير بالك .. متونس على حركاتي گمت ‏جبت البنات قفلت الباب ونمت بحضنه بلهفه و‏رانيه شلعت شعري ‏تالي تعبن ونامن ما گعدنه غير لـ أربعه العصر

‏

‏طلعت لكيته يحمي جاي واني مقفله عيوني صايره صيني خط ونخله وفسفوره من النوم صارلي فتره أبداً ما أنام باليل ويگولي ما تريدني ما تحبيني أني غير لو نمت گلبي أشتعل بنار ...

يارب تكون أخر مره ازعله بيها لان أكتشفت نفسي أحبه وحب مو شلون ما جان شوكت وشلون ويمتى حبيته وتعلقت بي هالكثر ما أدري بس احبه وهاي هي .. 

‏ـ أني اروح اجيب عشا غدا ريوك من وراج ما تسوكت وهسه جوعان كعدت عالميز وخليت راسي نمت والبنات هو مطلعهن بالحديقه يتشمسن شمس الشتا حلوه 

‏لحد الخمسه جايب المسواك اني گمت سبحت وصليت قضاء ‏وعزلت البيت نشرت الملابس وتعشينا ورا العشه 

تحضرنا ورحنا للبيت أهلي هو شويه بس شاف لينا وراح على غافر ودزلي رساله 

نافع ـ قنعي أختج حجزتلها يم دكتورة باجر نوديها أني وياج لان حربي يريد يأخذها ما تفعل عناد وهي حامل مو مال أهمال لا يصيرلها شيء . 

لبنى ـ تمام رحت عليها لينا ما يصير هامله نفسج نسيتي نفسج حامل شنو بس نايمه جاي تأخذين علاجج

لينا ـ أي جاي أخذ والله بس أني نعسانه أريد أنام روحي بالنوم لبنى وحربي هم روحي بي 

ـ كولي نساوتج بحربي مو 

ـ گلش أطك روحي اذا يوم ما أشم ريحته هيج أختنك بس مصبره روحي

ـ خرب بحظج وتالي ويه وضعج سمعت يريد يأخذج الدكتوره ما تقبلين ليش 

ـ ما أريد ما بيه شيء وجاي أخذ علاجي 

ـ لا لازم تشوفين وضعج العلاج مو كافي وأنت حامل ودوامج وضعج ما يسمح تبقين بهل الأهمال لا توكعين وبعدين حربي يدري بيج حامل

ـ لا لا ما گتله 

ـ شلون يعني تبقون ضامين عليه ترى ما يصير حرام ماما هو ابوه لازم أول الناس يكون عنده علم هاي مال ضامين عليه أأنتِ ونافع ونور واكفه ترى

ـ شمدريني ما كلتله بالبدايه بعد ما حجيت

ـ باجر تحضري باجر نوديج أني ونافع خوش ومن نرجع من الدكتوره تخابرينه وتگولليه حربي لازم يدري بحملج 

ـ وأذا أخذني غصب 

ـ هاي بعد ضلت يمج وهو من يوم راحت بنت خاله رجع القصر بس يجي هنا مرات بيت عمي ما مبطل جياته

ـ أي أدري گالي وهالفتره ملتهي بدوامه 

ـ لازم تفكرين بعد ضلت يمج هسه خل نروح ونشوف وضعج عگبها الله كريم 

ـ تمام عيني .. شلونج تراضيتوا أنتِ ونافع 

ـ زينين لايضل بالج علينا 

ـ بلابل الحب أنتوا وديري بالج من العين ترى كلهن يحجن بيج يگولن ويه نورس المسكينه ما كعد حظها وياه بس ويه أرملة أخوه كعد حظه وتوالموا ويمشي وراه وحاطها ويفتر بالسياره ويحير شجيب الها ووين ما يطلع حاطها بالسياره مثل الشيخه يتكشخ بيها . 

ـ منو يگول 

ـ سمعت خالتي تشكي لأمها مدري منين سامعه حاجيات بيج تگول الها أنزرگت عين ما صلت عالنبي لان الحجيه گايله نافع مرتاح كون يضل هيج وخايفه من أيديهن لا يسوله شيء تريد اسويله حجاب مدري شنو يحمي من السحوره . 

ـ يمه أسم الله عوذه من عيونهن 

ـ گومي على خالتي تريد توصيج على شغلات تسويهن 

ـ تمام گايمه مو تنسين تحضري باجر العصر نمرلج 

ـ أن شاء الله عيني . 

ـ رحت على خالتي كاعده ونور يمها ها نور شلونج عيني 

سميعه ـ زينه تراها مكابلتني وجه جلب البوچي 

نور ـ يمه كافي عاد بزعتيني ترى كاعده بيت أبويه 

ـ يمه جزعتي گلبي بهل الگلمه وأني خراعة خضره كاعده هنا كلمه والثانيه بيت أبويه طبعاً بيت أبوج چا بيت الكواويد بس أنتِ صايره زماله مثل بول البعير تردين ليورا . 

لبنى ـ نور نفضت نفسها وكامت شكو شبيها 

سميعه ـ لازمه رجليها للحايط ما تفعل ترد لرجلها وأنه ضليت بين حانه ومانه منا أختي ومنا هو عمت عيني متبهذل حاله ويريد مريته وبنته يمه مشلوع گلبه وهم أمه وقهر مرضها مو قليل عليه والأفنديه حاظرته ومن يجي ما تطلعه وكل أحترامات ما عدها متخبله وكاعده من خبال جلاب السود كون . 

لبنى ـ ميخالف خاله لاتلحين عليها عوفيها على راحتها هي تصفن على وگتها 

ـ هاي تصفن هاي تخلي الواحد صافن بزمانه .. هسه عوفينا منها دزيت عليج أريد أحاجيج بسالفه مهمه وتديرين بالج منها .. اكو حيه تحوم وتريد تلتف عليج 

ـ نورس 

ـ چا أكو غيرها دامج تعرفينها ديري بالج منها وأنه بالعزيمه وصلني طارف حجي متلاغيه أنتِ وزلمتج وعرفت هي السبب مو 

ـ لا سالفه ثانيه أنحلت 

ـ أي زين لاتخلين زعلج أو زعله يبات الليل بساعتها بس تبرد المشكله راضي وعوفيلي الكرامه على صفحه نافع خوش نافع وكاظب دربه وبيته وكلها تمدح منه حتى أمي راضيه عليه شايفته مرتاح بهل الزواج

.. داري وشبعي دلال وغنچ ولاتخلينه يتأخر بالليل دنيا ما بيها أمان والنسوان الما يخافن الله ضالات والرجال مثل الطفل بسرعه ينغوي وينضحك على عقله بسوالف تعبانه حشى الزينين بيهم بس أنه اوصيج تديرين بالج لان كلهن حاطات عينهن وراج وحاسدتچن عليه وعلى عيشتج . 

ـ أن شاء الله خاله 

ـ أي يمه أقري قرأن أقري سورة البقره يوميه وحصني بيتج وبناتج وزلمتج والأذكار يوميه أقريهن وأنطيج بخور من أمي جابته اليه كالت خل تبخر بي بيتها . 

ـ أخذته منها وأنشغل بالي ما صدكت تراضينا نوب عليه العيون والله صدك كلامها أنصابينا بعين ما صلت عالنبي .. ورجعت البيت هو طلع برى حربي جان موجود وضل بالي شنو سبب وگفته وياه ومن اجه سألته ها حربي راح 

نافع ـ أي رجع القريه .. أكولج لينا حاجيتله لا 

لبنى ـ حملها قصدك 

ـ أي 

ـ لا 

ـ خير أن شاء الله .. بلغتيها باجر نوديها 

ـ أي .. سگت وضل بالي مشغول بسالفتها وثاني يوم مرينا عليها ونزلت البنات بقيتهن يم خالتي ولكيتها متحضره ونور هم أجتي ويانا شعجب ومحلج اليوم معزله . 

نور ـ ما عندي بضاعه لما توصلني هالأسبوع وأريد اطلع من البيت وأخلص من كلام أمي أكلت رأسي 

وخالتي صبيحه تريد تجي ما أريد أتصادم وياه ولا

ويه أبنها 

لبنى ـ يله تعالي .. يله لينا وين صرتي 

لينا ـ أجيت عيني .. 

لبنى ـ طلعنا ثلاثتنا وبطلعتنا أنصدمنا بوجود حربي لابس قميص نيلي وعيونه أكلت لينا كبل صعد واشرلنا نافع صعدنا ثلاثتنا أني ونور ولينا .. 

‏ثلاث خوات كل وحده بينا تحمل هم جبير ‏كل يوم وحده بينا تتنجرح ونسندها يوم اني يوم نور يوم لينا كانت هاي القاضيه النه .. 

‏وصلنا الدكتوره ‏دخلنا ‏فحصتها سونار الدكتوره ركزت برجلها ‏قطعه دمويه متكتله . 

الدكتوره ـ ‏شنو هاي الي برجلها شوكت ثارت

‏لينا ـ ما أعرف دكتوره البارحه شفتها عبالي من التعب تطلع مرات تصير عند خالتي 

‏لبنى ـ دكتوره هي تخربطت قبل أيام وأخذناها للطوارئ أكتشفنا حامل وحجزنا واجينا يمج

الدكتوره ـ خير أن شاء الله ماما‏ الحمل عمره اربع أسابيع

‏نبض ماكو .. ‏التهابات عدها وأضافه لكل هذا تسوون الها تحاليل أضافيه نتأكد من شغله مهمه جداً وبعدين نحجي .. 

‏اول حمل الها

لبنى ـ ‏اي دكتوره أول حمل 

دكتوره ـ ‏تمام تگدر تبقى متمدده عالقنفه مالها داعي تاخذوها تتعب بالزايد بس صيحي الممرضه تأخذ عينات دم .. 

لبنى ـ ماشي ‏طلعت وعفتها متمدده ونور تتنظر

نور ـ ‏هاي بشري شكالت طمنيني

لبنى ـ ‏تكول حامل بس مابي نبض بعد عمره أربع أسابيع ‏بس سآلت على القطعه الدمويه الي برجلها من فحصتها شافتها ‏

نور ـ شنو هاي قطعه دمويه فهميني لبنى الدكتوره شگالتلچ 

لبنى ـ هو أني فهمت شيء علمود أفهمج عفتها ورحت صحت الممرضة دخلت أخذت دم وطلعت .. 

‏التحليل أكثر من ساعه ونص وماكو ‏لحد ما اجا نافع وراه حربي .. و‏بطلت اكله شيخ لأن طلع ميستاهل هالكلمه

‏الشيخ حظ وبخت وهم ماعدهم ولا ذره منهن بنيه يتيمه ‏كسروا حالها ‏راح عالتحاليل جابهن واجه وأني قبطت قهر ما احجي أبداً وياه مجرد اخذت التحاليل ‏ودخلت عليها و‏من شافتهن أنزعج حالها! 

الدكتوره ـ أشك بشيء بس ما كدر إجزم حالباً وهسه كل عشرة أيام لازم يمي أي مشكله تواجهه صخونه أقل شيء لازم تجيني . 

لبنى ـ ليش دكتوره أكو شيء يخوف أسم الله 

الدكتوره ـ لا مو شرط بس الحرص واجب عشر أيام واشوفها وأريدكم تديرون بالكم عليها وعلى نفسيتها البنيه مريضه حالتها جداً تعبانه وهسه كتبتلها مقويات وعلاج التهابات تستمر عليه بإنتظام . 

لبنى ـ أن شاء الله دكتوره طلعت لينا قبلي وأني رجعت عليها الله عليج دكتوره أني يتيمه أم وأب وعيني على الله وعلى أختي أمانة الله طمنيني عنها خوما بيها شيء يخوف . 

دكتوره ـ حبيبتي گولي يالله أختج مثل الورده ليش تفاولين عليها واذا حجيت ووصيت فه علمودها لان بعدها طفله وصغيره والأريده منج تديرين بالج عليها وعلى تغذيتها وضعها وعشرة ورجعيها لاتخافين ماما 

لبنى ـ طلعت وأني أمسح بدموعي وهما واكفين ونظرات القلق والخوف بعيونهم حربي هزلي رأسه واخذها للسياره ونافع ونور وگفوا يسألوني وحجيت الهم الكالته اليه الدكتوره . 

نافع ـ هو علمود تخثر الدم هسه سألت أبو التحليل ولان هي حامل تخاف على وضعها والطب تتطور كولي يالله شگو قابل .. يله أمشن . 

نور ـ يعني ما يخوف الله عليك نافع والله گلبي خلصان من القهر 

نافع ـ بابا شگو شو أمشن وفضني . 

لبنى ـ لحكناها وشافتنا عيونها تراقب ملامحنا ونافع جاب العلاج وأجه صعدت وطول الطريق ساكتين لما وصلناها وهو نزل وياها وردت أنزل نافع ما قبل 

نافع ـ نرجع البيت وحربي صار عنده علم بحملها وأصلاً هو يدري بيها حامل من زمان شاك بيها وهسه خل يحجي ويتفاهم وياها لازم يوصلون لحل . 

لبنى ـ الله كريم .. وصلنا البيت بعدني بعبايتي وأجه حربي كعد بالصاله رحت سويتله الچاي وصوته عالي وأنصدمت من گال لنافع 

حربي ـ لا هاي هيه ما بيها مجال بعد أني على شُـنو مبقيها وهي حامل وصحتها على گدها وأنت تضل تودص وتجيب رايح چاي اني موجود وأخذها غصباً 

عليها تريد تزعل تريد ترضى كافي عاد صبرت عليها هواي واليوم مأخذها وماشي للقصر ..