رواية فصلية بديلة ( شموخ ) الجزء الثاني الفصل الثالث والاربعون بقلم ام ملكوت
:- كملنه تسوق اخيرا ورجعنه للبيت دخلنه وبوجهنه لغرفتي انه ونوره ومحمد راح للديوان ذبينه العلاليك وحتى نوره يلي بكل طلعه تفتش
العلاليك من ترجع هسه عافتهن وذبت روحهه تعبانه كامت للمطبخ جابتلي صلاحيه ماي شربت وغصيت على محمد اكيد محد اخذله ماي هسه
كطعتهه من بلعومي وكمت للمطبخ خليتله ماي بصلاحيه كزاز واخذت كلاص ورحت للديوان شفته كاعد يم احسان يسولف دخلت انطيته ماي
بالكلاص وشربه مره وحده وكال صبي بعد خطيه جا شكد عطشان .. صبيتله بعد شربه نصه وكال عاشت ايدج وهمس بذكر الحسين عليه السلام
ابتسمت ورجعت للمطبخ خليتلهم فواكه بصحن جبير وكلاصين عصير هوه واحسان واخذته للديوان شفت بابا داخل يمهم ورجعت اركض
خليت كلاص عصير ثالث وشوكه ورجعت للديوان قدمته الهم وطلعت اخذتلي تفاحتين انه ونوره
ورجعت للغرفه كعدنه نطلع بالملابس نوريهن لامي وهيه كلساع ضربت ايدهه وكالت...
_ولجن يمه فلستن الزلمه جايبات السوك كله وجايات شكالجن كلبجن
_امي شسويله سالي نوره احنه تعبنه ونكله تعبانين خل نرجع هوه مصر يدخلنه بكل محل يصادفه
ويخلينه نشتري منه هاي عود اخذنه من كل محل قطعتين الي والهه وهيج صارن هواي
_عاد خطيه هوه اشتره شي لروحه
_لا وين ملتهي يدفع عنه
_جا انتي ماجبتيله وياج قميص فانيله لباس
_هههه لا امي جبتله تخم ساعه وسلسال وحلقه فضه وجبتله تراكسود وشنو بعد جبتله نوره ذكريني دخت
_اي هنه هذن هاا وجبتيله حذاء رياضي همين
_اي صحيح بس وينه اشو ماكو
_شوفي بالعلاليك الرجاليه
_هذن هنه دورتهن ماكو خاف ماشتريناه لو نسيناه هناك ولج
_لا اشتريناه وخلاه بعلاكه وانه شلته بيدي بس خاف طايح بالسياره مالته روحي شوفي
_تمام بله خل اروح اشوفه ..
عفتهن وكمت للديوان دخلت لكيتهم كاعدين يكلبون بنقالاتهم رفع راسه محمد باوعلي رحت يمه كعدت وكتله..
_انطيني مفتاح السياره نسيت بيهه علاكه الاحذيه مانزلتهه
_ لحظه خل اروح وياج ماتعرفين تفتحيهه انتي
_تمام ..
كمت وكام هوه ترخص من ابوي واحسان وطلع مشيت وراه وراح للكراج فتح السياره بالريموت العنده وفتح الباب لزمني من ايدي دخلني بيهه
وانه اباوعله باستغراب ردت احجي وماحس الا صعد يمي وسد الباب حاضني بلعت ريجي بصعوبه وكتله وهوه مستمر مخلي جبينه على كتفي يتنفس بهدوء..
_محمد شبيك حبيبي
_تعبان جنتي
_سوده علي كاعد اتعبك وياي هل ايام
_لا مو انتي الدنيا كاعد تتعبني انه
_ليش شصاير وياك
_محتاجج يمي وحاير ومادري شسوي لا بيدي اخذج وياي ولا بيدي وابقى يمج
_ميخالف حبيبي لكلشي اكو حل لا تتعب روحك هل شكل
_توه بقيت كاعد على امل تجين يمي احضنج قبلما اروح للبيت تدرين حسيت بخنكه بكل مره افكر اروح لبيتي وانام وحدي وانتي هنا بعيده عني
_شكلك تعودت على ليله امس
_ههه اي و ربي ..
ابتعد عن حضني مسح وجهه بحيره وصفن بيه ثواني ورجع حاوط خصري بايده وكال محاول يلطف الجو..
_تدرين لو هسه يكلولي اهلج تبقى هنا و تنامون بالسياره اكلهم ممنون وماتقصرون
_ههه ليش
_اكيف غير حلالي يمي عسى مانام بالجوله وياج ولا انام على مخده مترفه بدونج
_يبعد حيلي انته محمد
_جنته وناره..
ابتسمت ولهنا الكلام يفشل بالتعبير عن مدى الحب يلي تكنه كلوبنه اتجاه بعضنه بس العيون كدرت توصل هل حب وهل مشاعر النه وتشعرنه بالسلام
والسعاده تنهدنه براحه بنفس الوقت وغصت باحضانه دقايق وطلعنه من السياره بعدما اخذت علاكه الاحذيه طلعت منهه حذائه ورجعتهه
ودخلت جوه اخذت ملابس محمد وشغلاته يلي اشتريتهن اله وطلعت لكيته واكف يم بابا واحسان يم باب الكلدور رحت انطيتهن اله وتشكرني مره ثانيه وتمشوا للكراج
كلهم سويه خلاهن بالسياره وسلم عليهم وركب سيارته لوحتله بيدي ابتسم واشرلي مع السلامه وطلع من البيت تنهدت ودعيت ربي يوصله
بالسلامه ويبعد عنه كل شر ورجعنه دخلنه للصاله رحت انه لغرفتي لميت شغلاتنه يلي اشتريناهن وتشكرتني نوره باحضانهه الخانقه مدري تعودت
على حضن محمد الهادئ مدري هيه حضنته خبصه هيج .. المهم شمرتلي بوسه بالهوى واخذت ملابسهه وطلعت ضحكت على شكلهه وفرحت
لفرحتهه اجيت رتبت ملابسي بالكنتور واجه بيدي الفستان الاحمر رفعته تمعنت النظر بي وضحكت لمن كالي بقه يلوب عل صوره من شافني لابسته
وراد يجيلي .. خليتله تعلاكه ورتبته بالكنتور كملت طفيت الضوه وتمددت عل جربايه راسلته وتطمنت عليه وصل وختمنه رسايلنه بحب كالعاده ولفينه راسنه ونمنه ...
وهيج يكون مر الاسبوع برمشه عين وصارت المحاكمه ودزوا علي رحت انطيتهم افادتي وبعدها سلمت كلشي بيد محمد هوه ضل يمشي بيهه
خطيه لحدما فزنه بيهه وتحاكمت بثينه ويلي اشتره المشروع منهه وحصلنه تعويض من الشركه بقيمه مليونين دينار عراقي عاد سلمتهن بيد محمد
لان هوه يلي سعى بيهه وتعب وهوه ماقبل ياخذهن الا بشرط ان يستثمرهن بالشركه الراح يفتحهه ويصير الي اسهم بيهه عاد وافقت وكلت
تمام مدام راح ياخذهن يعمر بيهن الشركه وماكو فرق بيناتنه انشاءلله.. واجه يوم الخطوبه وكلهه زارتنه وطبعا مثل اي اخت عريس ردت اروح
للصالون وماقبل استاذ محمد لان سمع باخوهه راح ياخذهه هيه واختهه عاد تخبل وكال مستحيل قطعا اروح فخليت نوره تروح بدالي وهذيج كيفت
عبالك عرسهه ورايحه للصالون الخبله .. بقيت انه اكرب بالبيت ويه امي لحدما اجو بيت عمو شهم واخذتني شموخ كرف للغرفه تريد تفهم شسالفه
فكلتلهه ان طلع سامعنه بيوم الحجت عن حبهه لراهب وسبب بعدهه عنه وكلت خل استغل الفرصه واقنعهه تحاجي حتى اذا مامتاكد من خطوته هاي
لا يورط البنيه وياه ويعيش تعيس وياهه.. كلتلهه تروح تصعد فوك السطح ورحت انه للديوان سلمت
على عمو شهم ومحمد وتجاوزت مرتضى ماسلمت عليه باوعله احسان بترقب وباوعلي اشرتله يجي وكام بسرعه اجه وكال من بين سنونه..
_المن اجيتي شصاير
_شموخ تريد تحجي وياك
_شموخ
_اي
_عن شنو تريد تحجي ماكلتلج
_لا روح بنفسك وشوفهه شتريد
_وين هيه
_فوك السطح راح اروح وتعال تره منتظرتك لا تغلس عن البنيه
_تمام روحي انتي جاي وراج ..
هزيت راسي بايجابيه وصعدت فوك السطح وهوه وراي يمشي اجيت اخذت ريانه ووكفت هوه مقابيلهه وكالتله...
.
.
:- راحت تصيحله وانه شلت ريانه وسبقتهم فوك السطح طلعت وصرت افتر والجو حلو دافي وهوى قوي خليت ريانه على رجلي وكعدت عل مسطبه
افكر شراح احجي ويه احسان وشلون اكدر اساله واخذ منه الجواب الصريح كلهه دقايق ودخلت جنان وهوه وراهه باوعتله وتحمحمت كمت على
حيلي وعفت ريانه اخذتهه جنان ورحت انه باتجاهه ابتسمت وهوه يباوعلي بنظرات حسيتهن فعلا اخر نظره حب يظهرها بعيونه الي وكفت كباله وحجيت بتساؤل..
_هاا احسان شلونك
_عايش بعدني والحمدلله
_الف مبروك عل خطوبه مقدما
_الله يبارك بيج يوم الالج
_ ههه بعيد هل يوم وماراح يجي
_لا يجي بعد مدام راح اخطب انه منا وهيج راح يجي هل يوم
_ خطوبتك ماراح تغير من قراري شي
_لا راح يغير وهواي همين
_كاعد تقنع نفسك بهل كلام حتى تظن ان خطوتك هاي صحيحه مو
_لااا
_تعرف هل طريق غلط وكاعد تمشي باتجاهه وماخذني انه حجه تضحك بيهه على نفسك مو
_لا شموخ مو هيج بس انه كبرت وصار لازم اتزوج واكون عائله واعيش مرتاح شجم دوب كاضيهه هيج افتر وراج
_ضيعت ١٢سنه وهسه جاي تضيع الباقي من عمرك بسببي
_شموخ سدي الموضوع اليوم خطوبتي والكلام ماراح يقدم ولا راح ياخر
_يعني مصر ومقرر تمشي بهل خطوه حتى لو جانت غلط وراح تدمر حياتك وحياة البنيه وياك
_لا ماتدمر تعرفيني شنو انه ومستعد اكضي عمري الباقي كله وانه احافظ على حياة البنيه واطفالنه من ان تدمر بالمستقبل
_وادري بيك كفو
_بس اريد شي واحد منج واعتبري هديه زواجي
_امر
_مايامر عليج ظالم بس اريد تفكرين زين بنفسج قبلما تتخذين اي قرار فمثلما هسه انتي خايفه على حياتي وحياة البنيه من الدمار لازم تخافين على
حياة الشخص التحبينه من ان تدمر تره كسره الكلب لو جت من الحبيب تهدم الحيل ياشموخ ولا تكونين سبب بهدم حيل شخص شاريج بعيونه وسهر ليالي العمر
_وبنتي ياحسان شنو ذنبهه هسه المهم عوفك من عدنه احنه خلي الكاتبه ربي النه هوه يصير
_ونعم بالله
_اي والله وهسه شنو انت محضر نفسك لحياتك الجديده
_اي بحيل الله كلشي تمام يمي
_هاذهو ربي يوفقك وياهه ويسعدك ويرزقكم الولد الصالح
_انشاءالله بس حرامات ريانه جبيره جان عل اقل لو مافلح الاب بالام يفلح ابني ببنتج
_هههه يصير اخوهه الصغيروني احسن بهواي من غير علاقات وشمدريك يجوز تجيهه اخت مو اخ
_على كولتج
_احسان
_امري
_رغم راح تبرد صداقتنه شوي بس
_لحظه لحظه ليش حتى تبرد صداقتنه
_مو راح تزوج بعد ومايصير البنيه تضل قلقه بسبب صداقتنه هيج راح تصير حزازيات ومشاكل بيناتكم
_لا ماراح يصير هيج لان مقرر من ثاني يوم الخطبه اخليهه بالصوره واحجيلهه عن صداقتنه لان رغم كلشي صداقتج عزيزه علي وماكدر افرط بيهه
_ههه ولا انه صدك
_جا هاي هيه بعد لا تبرد ولا تحتر خلينه على طبيعتنه ولا كان صاير شي
_تمام التريده
_ولو الوقت مو مناسب بس عندي الج مفاجاة
_شنو هيه
_باجر تعرفينهه مو اليوم
_اوو احجي احسان شيصبر فضولي لباجر
_ههه ماحجي والله منا لباجر انتي تشوفينهه بعينج
_هفف تمام نشوف بله شضام من مفاجاة بس الله اليستر منك
_لا تخافين مفاجاة حلوه وراح تحبيهه
_اذا متاكد هيج راح احبهه لعد هاذهو استبينا
_استبينا يله خل اروح انه للحلاق لان بعد مالحك لازم اخلص قبل العروس خو ماتجي والزلمه بعده
_اي صحيح يله روح لحك عل وقت
_اي يله اودعناكم
_الله وياك ..
ابتسم وبادلته الابتسامه عافنه ونزل من السطح التفتت على جنان وهيه عيونهه مدمعه وخانكتهه العبره تنهدت واجيت يمهه لزمت كتفهه وكتلهه..
_احسان كلبه قوي وطيب وصدكي لو جانت البنيه لطيفه وتحبه راح يحبهه هوه همين ويخليهه بعيونه
_هوه هم هيج كال بس مو بيدي خايفه عليه يتدمر اكثر شموخ ماريد اخوي يطيح بهيج موقف ويه بنت الناس ويكضيهه مشاكل
_لا لا تخافين احسان عاقل وفاهم وكد مسؤؤليه الزواج واكيد راح يسعد مرته ويدللهه حتى لو جان مايحبهه
_هفف مادري ياشموخ مادري
_مثلما كتلج حبيبتي احسان اعرفه اكثر من غيره وانه متاكده ان راح يعيش بسلام ويه مرته وماراح يسمح للمشاكل تدخل بيناتهم
_تمام انشاءلله
_يله مسحي دمعتج وخلي ننزل هسه الكل تلكينهم جايين وامج وامي مبتليات بالغده ووحده تطك راسهه بالثانيه
_هههه خرب شكلج ضحكتيني ومالي واهس بالضحكه
_يمعوده الدنيا مخلصه ضحكي وتونسي الا صدك على طاري الدنيا شخبار محمدج
_اووف اووف ياشموخه
_ياستار شصاير
_اعشكنه يخيه صرت متخبله عليه
_ههه يدومكم سويه يبعد عيني يدومكم
_ويدوملج التحبينه يارب
_خلينه ننزل يله بلا ما نفتح جروح الكلب هسه
_هههه تمام يله ..
نزلنه وفعلا لكينه الكل جاي بيت عمامي وخوالي وعماتي سحر وسمر خطيه لكيتهم بالمطبخ يساعدن امي وخالتي حلى عاد احنه عفناهن
ورحنه للغرفه مالت جنان كعدنه نمكيج ونحضر ونبدل واحس صار عندي واهس بعدما حجيت ويه احسان وتطمنت من ناحيته .. كملنه وره ساعتين
وطلعنه فرشنه السفره وصرنه ناخذ بلامه الاكل من المطبخ للصاله والكل كعد ياكل على ماكملنه صب اخذنه صحوناتنه احنه وكعدنه بالمطبخ
كلهه دقايق ودخل عمي ساجد كال حضرن الجاي كمت انه خليت القوري عل نار يحمى وحضرت استكاين وكلاصات بالصينيه وعبيت شكر خفيف
بيهن صبيت الجاي ودزيت زيودي ابن محسن يصيح لابوه عاد هوه راح بسرعه ورجع جايب ابوه من ايده وكف يمي وانه اصب بالجاي وكال..
_هاا شموخه شلونج صار زمان محد شايفج
_الحمدلله بخير انت شلونك المختفي حتى ماجيت بعرس محمد
_جا شنسوي بعد دوامي تدرينه حتى بالعطل ماكدر اتهنى بس همزين اجيت بحنته عوضته
_ايي بعد صرت هكر محد بحالك
_هههه لا والله اصلا تعب
_كواك الله ولو حاقده عليك انه
_هاي ليش
_ليش ماعلمتني قبل كم سنه على هكر النقالات جان اشتغلت وياك هسه
_ليش انتي قليله هل صرتي ملازم تحقيق وبعدلج سنه تستلمين شغلج ويصير الج راتبج
_اي هم صدك يله الله لا يعوزني الك
_هههه ايا خبله
_هههه..
ضحكت وهز راسه اخذ الصينيه من ايدي وراح وانه رجعت كعدت عل كرسي اكمل اكلي كلهه دقايق وخلصنه اكل وصارت هوسه عل مغاسل
كمنه انه وجنان بسرعه لمينه الاكل الزين قبلما يخربونه الجهال لان كالعاده كلمن تروح على صفحه ويعوفن الجهال تلعب بالنعمه وتطشر بيهه ..
المهم كملنه نكل الماعين وراحت نوره مسحت الارضيه وعطرت الصاله وانه وامي طلعنه خالتي حلى وجنان يرحن يبدلن و وكفنه نغسل الماعين
لحدما كملنه بعد انه كذلك رحت عدلت مكياجي وملابسي وكعدت ابدل لريانه ملابسهه طلعتلهه بنطرون اسود وقميص احمر وجاكيت اسود لبستهه
وسويت شعرها كصايب وحده فوك ووحده جوه وكالعاده ماتقبل تطلع الا امسح شويه حمره على شفايفهه عاد مسحت بصبعي من شفتي ومسحته
على شفتهه صاحت "ااالله " بذهول مزيف وضحكت عليهه وهي بقت تضحك اروح فدوى ونذر لهل ضحكه .. اجت جنان مبدله ومكمله وطالعه
تجنن وفعلا حسيتهه متغيره عن قبل بهوااي احسهه فراشه وتحوم بالبيت من نشاطهه والفرحه يلي بعيونهه الله يديمهه ويحفظلهه عزيز كلبهه
تنهدت وصحتلهه اجت كعدت يمي وسالتهه شنو الصار بيناتهم وشلون رجعوا سويه لان مامسولفتلي البذاته عاد تربعت كبالي وصارت تسولفلي الصار
والسوته تفاجات من خطوتهه الجريئه لان اعرفهه خجوله بهيج امور وتستحي تخطي هيج خطوه شكلهه جان مولع كلبهه زايد وخايفه تفقده
ومالحكت غير هل خطوه ترجع عقله لراسه ماتدري بي طار عقله ببوستهه .. المهم وصيتهه تدير باله عليه وماتنطي بال لاي شخص وتخلي
يضحك عليهه لو يخرب علاقتهم وطبعا المقصود هنا جان مرتضى ان ماتنطي مجال ولا تسمح ان يخرب عليهم فرحتهم عاد هيه موقفهه ثابت
ومصره على حب محمد وتمسكهه بي وشلون ماتتمسك بي وهيه عيونهه تلمع والابتسامه ماتفاركهه لمن تحجي بي وتجيب طاري .. اجت
خالتي حلى كالتلنه نبدل لان راح تطلع الزفه مالت المشيه همه جيران لهذا السبب راح نروح مشي بعد فرع واحد عنهم وجانت هل مشيه مختلفه تماما
عن مشيات عائلاتنه واول مره شخص يروح يخطب بنيه وماخذ شيوخه مشي لبيتهه .. عاد كمنه لبسنه الجبه والحجاب وكلمن لزمت جهالهه
ووكفت بالصاله لحدما طلعوا الشيوخ والزلم ياله صاحولنه طلعنه وراهم نمشي والفرقه تطبل كبالنه والشباب جماعه احسان يهوسون ويمشون
و احنه ميتين ضحك عليهم ومتونسين وحتى الجيران المايعرفنه هم طبك ويانه عل واهس وصاروا يهوسوله لحدما وصلنه لباب بيت البنيه
راحوا الغربه والشيوخ استقبلوهم ابو البنيه وخوانهه ودخلوهم للديوان واحنه اخذنه سلام وابنهم وره البيت دخلنه من باب المطبخ تسالمنه
ويه النسوان وماشاءالله هواي نسوان جايه رغم بيتهم جبير كلش بس من كثرهن يبين صغير وزحمه سلمت على كم وحده الواكفات بالباب ويه
ام العروس يستقبلونه والبقيه بعد مانعرفهم والعرفته ان البنات السلمنه عليهن هنه خواتهه ٣ صغار شابات وفعلا خوش بنات مثلما كالت جنان حبيتهن..
المهم دخلنه للصاله كعدنه عل قنفات بجهه ونسوانهم بجهه مقابيلنه خوش مصممين الصاله عبالك قاعه اهل العريس بصفحه واهل العروس بصفحه ..
اجت عيني عل عروس وشفتهه ماشاءالله جمالهه واناقتهه ونعومتهه تاخذ الكلب رغم احسهه قصيره تجي بطول جنان بس ناعمه تنشاف كأنها طفله
بعمر ال١٧ سنه مو بعمر ٢٣ .. راحت جنان سلمت عليهه وهيه خطيه مبين بعيونهه الخوف والتوتر حتى مابتسمت بس خفيف انتبهت على اديهه
ترجف لمن تلزم المسكه استغربت وكمت كعدت عل كرسي يمهه باوعتلي مزيفه الابتسامه لزمت ايدهه وكتلهه..
_هلو عمري انه بنت عم العريس اسمي شموخ
_هلا حياتي تشرفت بيج
_ليش احسج خايفه واديج ترجف
_لا بس هوه انه هيج اذا اتوتر يجيني برد واضل ارجف
_ لا تتوترين كلنه هيج اخذي نفس واهدي وجهج صار ليمونه لا تطيحين علينه نوب ويكول العريس مرتي حساسه
_هههه انشاءلله هذي الحلوه بنتج
_اي بنتي اسمهه ريان
_حلوه ماشاءالله وتشبهج حيل
_اي غير بنيتي العزيزه جا شتفيد ال٩ اشهر لو ماطلعت البنيه على امهه وكلبهه على كلبي
_اي والله صحيح
_بعدج متوتره
_اي بس بيني وبينج خايفه كلش واحس روحي تورطت
_لااا ليش تحسين هيج
_ماعرف بس اكيد انتي بنيه وتفهميني يعني شخص لا اعرفه ولا شايفته غير مره ولا سامعه
عنه شي غير الكم كلمه الكالوهه اهلي فما اعرف شنو راح تكون حياتي وياه ولا شنو طبيعه زواجنه راح تصير واحنه غربه
_كلنه هيج امي وامج وخالتي وخالتج تزوجن بدون مايشوفن ازواجهن غير مره وهيه بليله العرس وهسه اشوه عل اقل عندج فتره خطوبه
تكدرين تشوفين خطيبج وتتعرفين عليه شكد ماتردين وتعرفين طبيعته شنو وهذيج الساعه لو
شفتي وتاكدتي ان مو مناسب الج تكدرين تكعدين ويه اهلج وتحجيلهم واكيد همه ماراح يجبرونج عليه لو ماردتي
_اي صحيح بس
_ماكو بس توكلي على ربج ولا تتوترين وتخافين ماريد امدح بس احسان صديقي من الطفوله
واعرفه اكثر من اخته حتى واخذيهه مني راح يصونج ويحترمج ويخليج على راسه ويجي هذاك الوكت وتكولين شموخ كلامهه صدك
_تمام اذا هيج تكولين وانه هم احاول اتعرف عليه اكثر بالخطوبه ولو انه طبعي خجوله وشويه جاهله بهل سوالف بس بعد الله ييسرهه الي
_انشاءالله يروحي توكلي على ربج واخذي نفس هسه وابتسمي اليشوف وجهج اصفر ورجفه ايدج يكول مجبوره البنيه لو ماخذيهه فصليه
_هههه وين اكو فصليه يسوولهه خطبه وعرس
_ههه اي هيج خلي ضحكتج تنور المكان وين يصير عروسه وجنهه اميره كاعده حزينه
_عمري انتي شكرا والله خففتي عني توتري
_بالخدمه يروحي ..
ابتسمت ومسدت على كف ايدي بادلتهه وبقينه كاعدين نباوع للبنات وهنه يركصن اندك الباب وراحت المره امهه شويه ورجعت كالت راح ياخذ
موافقتهم الشيخ اخذتهه وكفت يم البنات واحسان واكف عل جهه ثانيه من الباب واخذ الشيخ موافقتهم سويه و الرجفه والغصه يلي بصوت
احسان هزت كياني ولا اراديا نزلت دمعتي اسف عليه ماتمنيته هيج يتزوج تمنيت لو جان يحب وحده غيري وينطي موافقته للشيخ والفرحه
بصوته مو الغصه احسان ابن عمي وصديقي وعزيز على كلبي ومايهون علي الصار وياه كل هل سنين رغم البعض يلومني ويكلي ليش ماحاولتي تحبينه
ليش ماحاولتي تتقبلينه او حتى تعتبري مثل الغريب متقدملج وتتزوجينه بس انه كلبي شلون بي روحي التعلقت كل هل سنين براهب شلون
تنساه شلون اتجاهل كلبي يلي هوه ملك لراهب واقبل باحسان وادمر حياته وحتى لو جنت ماحب راهب جانت صداقتنه واخوتنه توكف بعيني
مستحيل شخص يكدر يتزوج شخص جان طول عمره معتبره اخوه وصديقه وشلون مافكر مايكدر يستوعب فكره ان ينام على مخده وحده وياه بس
الاتمناه من ربي ان يعوضه عن كل هل سنين يلي مرت وهوه متعلق بقشه امل حبي واتمنى تكون هل بنيه الخلوقه اسم على مسمى وتكون زهره تزهر وتكبر بوسط كلبه وتملي بحب عطرهه ...
فزيت من صفنتي لمن كالت خالتي ان احسان راح يدخل يمهه كمت بسرعه اخذت ريانه وطلعت من المكان شارده منه شارده من تانيب الضمير شارده
من عيونه ونظراته يلي جنت خايفه تتجاهل عروسته وتتركز علي شارده من حقيقه حبه الي .. رحت للمطبخ وعلكوا الاغاني عل اخو عرفتهه جنان
ونوره كاعد يركصن عليهه وياهم كلهه نص ساعه تقريبا وطفوا الدي جي وطلعن النسوان من يمهم وسدن الباب اجت جنان يمي شربت ماي وكالت..
_ يمه تعبوني لا هوه يخطي ولا هيه اكله الزمهه من خصرهه وركصوا يكلي عيب من النسوان وهيه اكلهه لزمي ايده تكلي استحي شلون بيهم هذول مادري
_هههه هذول من النوع يلي هيه خجوله وهوه خجول الله يعينهم على حياتهم لو بقوا خجلانين حتى بحدهم
_اي والله ياخيه بس كليلي شلون شفتيهه البنيه مساع لمحتج تسولفين وياهه
_خوش بنيه مبينه طيوبه وفقيره ومثقفه اسلوبهه وكلامهه حلو بس ناعمه حيل
_ لا هيه رشيقه وشوي كصيره بس هسه من وكفوا سويه وهيه بالكعب وصلت لكتف احسان يعني مو كلش كصيره بالنسبه اله طولهه حلو
_ولج هوه انه من سلمت عليهه صارت لكتفي شلون وصلت لكتف احسان
_جا هوه انتي شايفه روحج بعدلج شويه وتصيرين بطول احسان غير توصلين لرقبته
_هاي شنو ولا منتبهه تصدكين
_اي ليش انتي شايفته احسان حتى تنتبهين على فرق الطول بينكم
_جنانوو
_ههه يله سكتت هوه احسان طوله تقريبا ١٨٠ وهيه طولهه كالت ١٦٠ همزين انه اطول منهه بشوي ههه
_ههه وشراح تستفادين لو صرتي اطول منهه بشوي
_اي حتى خاف اكلهه قزمه ماتكدر تردهه علي لان اطول منهه
_هههه يله بله خبله وعلي
_ جا شلون غير اخت العريس انه
_ الله يعينهه عليج
_لا ابد والله اتشاقه وياج غير اخليهه بعيوني شكم مرت اخو عندي هيه بس هاي المكروده يلي الله اعلم شني من عيشه راح تعيشهه عند اخوي
_صوتج يمعوده لا هسه عبالهم اهلهه احسان بي شي وتحجين هيج عليه
_اوو عبالي بيتنه اخذني الواهس
_هههه انتي كلشي ولا ياخذج الواهس تفضحينه
_اي والله شكلي مكثره كعده ويه نوره هليام الا صدك على طاري نوره شخباره سلوم
_ههه زين ملتهي بدراسته وهليام محمد حابسه بالغرفه ويدرسه مايخلي يطلع ويه جماعته حتى يطلع من الاوائل ويصير توظيفه مركزي
_اي احسن خلي يدرس احنه مانريد نسيب كسولي وعطال بطال
_يول يول شعدهه هسه على اساس اختج راح تاخذ دكتورا
_جا شلون لا تخافين عليهه هاي تشوفيهه لسان وضاله تسخت بس ذكيه وتلكفهه عل طاير بالدراسه
سجاجه باختصار وهذاك اليوم تكول اني اذا ماجبت طبيه فرشولي دوشك وره البيت يم البزازين وخلي اعيش وياهن
_هاي ليش
_اي تكول جا شني فايدتي بعد اصير بزونه احسن
_هههه والنعمه هاي البنيه مخبله وراح تخبل اخوي وياهه نوب وين الهادئ ياخذ مخبله لا فلحنه
بمحمد حاضرا ولا بسلام مستقبلا راح يتخبلون خواني ويمشون بالشوارع ويغنون يا غيده
_ههههه ااخ يمه بطني ههههه
_وزمهريرا فضحتينه هسه يكولون اخت العريس خفيفه
_لا لا سكتت كلشي الا اخت العريس
_اوو شيفكنه بعد صار عدهه مرت اخو
_جا شلون غير صرت حمايه انه
_الله يعيني وبعد شكم شهر تكليلي صرت عمه وماتتحاجين بعد
_هههه اي والعباس فنج تحاجيني بعد بس يصير عندي ابن اخو
_هههه امداج
_اتجاوزج بخشمي ننن
_عوذه احس مكابله نوره مو جنان
_هههه ..
سكتنه وكعدنه عقال لمن اجت ام العروس وخالتي يمنه وبقن يسولفن عن العرس وتحضيراته بسم الله بعدهم توه عقدوا وربي شكلهه خالتي ماراح تصبر
وتخلي يطول شهر كبل تعرسلهم .. كعدنه نص ساعه ثانيه وصاحوا علينه نحضر نفسنه رحنه للصاله نسلم عل عروس وشفت احسان واكف يمهه
يسولف ومبتسم رفع راسه باوعلي وبهتت ابتسامته ضميت روحي وره جنان وغميت كصتي هسه شمالني جيت ويه البنات عبالي طلع يم الزلم
باوعت وشفته طالع تافافت ودخلنه يم البنيه سلمنه عليهه واجت يمي تسالمنه وكالت بهمس..
_شكله فعلا مثلما كلتي لحد هنا تمام وخوش ولد احسه ولطيف ومتفهم
_بعد وبعد كلما عاشرتي حبيتي اكثر بس هاا الكل يدري بيه ضد الحب فما اشجعج على ان تحبينه اكثر مما يحبج خلي لنفسج نصيب من هل حب وضمي على جهه
_ههه انشاءالله راح اسوي مثلما نصحيتيني بس والله رغم ماعرفتج الا اليوم بس احس تعرفيني واعرفج من زمان واتمنى نكون صديقات
_وانه كذلك يروحي هوه بعد اي بنيه نرتاحلهه وترتاحلنه تصف عل كروب مالت الصداقه بدون
طلب واستئذان وانتي كذلك بدون ماناخذ اذنج اصلا اعتبرناج وحده من عدنه وصديقه النه
_هههه يبعد روحي شموخه
_حياتي ..
ابتسمت بامتنان وحضنتني باوستهه ونزلت على ريانه شلتهه بيدي وطلعنه من البيت شفت الشيوخ والمعازيم رايحين من اولما كملوا العرسان
عقدهم وباقين بس عائلاتنه القريبه رجعنه للبيت مثلما اجينه مشي وصلنه ودخلنه الزلم للديوان والنسوان من المطبخ للصاله رحنه .. دخلت انه
وجنان لغرفتهه ذبيت الحجاب والجبه وكعدت عل جربايه فتحت كصايب ريانه الخبصتني بيهن تتخبل اذا شديت شعرهه تريدهه مفتوح وتلفح بي
نهاركله ماتحب الرتابه بعد حيل امهه مدري عليمن طالعه .. بدلتلهه ملابسهه لبستهه كلابيه نص ردن طويله وخفيفه ونومتهه يمي عل جربايه دخلت
جنان للحمام سبحت وغيرت ملابسهه وطلعت انطتني ترواكه من عدهه وكمت انه همين دخلت سبحت ونشفت بدلت وطلعت لكيتهه مخليه ريانه
بحضنه ويسولفن ويه محمد بالمكالمه فيديو.. كعدت عل ميز وبقيت انشف بشعري بالخاوليه وصافنه بالفراغ احس حاوطني تعب وثقل طاح
على اكتافي خلاني اخلي راسي عل ميز مغمضه عيوني واحساسي معدوم ماعرف شصار بيهه بهل دقيقه ماعرف تعب ماعرف خنكه او ملل او ضوجه
او ماعرف مجرد بس مخليه راسي عل ميز ومغمضه وبالي وكلبي فارغ من الاحساس والتفكير وبس صوره راهب كبالي وسرعان ما دب الاحساس
بكلبي ونزلت دموعي وغصه استوطنت صدري بدون ماحس لمن تخلخل لاذني صوت الاغنيه يلي شغلوهه محمد وجنان " اه من هواك //اليسا"
حسيتهه اجت على جرحي مثل الجمر ولجمته حاوطني شعور بالوحده غريب اول مره احس بي فتحت عيوني بخوف والنقال بحضني ردت اخذه
وانه دموعي تجري على خدي ردت افقد السيطره على كلبي واتصل على راهب ردت افقد زمام الامور من ايدي واتصل حتى اسمع صوته لو حتى بس انفاسه..
وبصعوبه كدرت اتمالك نفسي شمرت النقال من ايدي عل ميز سحبت حجابي وطلعت من الغرفه بسرعه وانه البسه على راسي صعدت فوك السطح
بظلمه هالليل طلعت وانه لازمه صدري مختنك ورافعه راسي للسما محاوله اجر النفس اختنكت واختنك بريتي الهوى روحي مجمره ونار احس تطلع من
عيوني سندت حيلي عل حايط وغمضت عيوني كعدت بالكاع وانه حاضنه روحي .. رغم قوه كلبي رغم صبري كل هل سنين رغم معرفتي بمستحيله
لقاءنه الا ان روحي صارت تحترك اكثر كلما شفته كبالي ودرت عيني عنه جان بعيد والبعيد الماتشوفه العين يهون فراكه وهيج صار كل السنين الفاتت
بس هسه شلون بيه شيصبر كلبي وهوه كبالي اشوفه كل يوم ونظراته خنجر يغرزهن بكلبي بكل قوه وقساوه شلون.. رفعت راسي للسما شهكت
وطلعت من لساني كلمه يااالله بدون ماحس روحي وكلبي نطقهه بكثر حاجتي بهل لحظه لرحمته وقوته ردت انطق وادعي ينسيني حبه بس
كلبي مايهون عليه ينمحي حب راهب من عنده مايهون علي اعيش حياتي طبيعي وهوه خلص عمره منتظرني ويحترك على شوفتي ماكدر يالله
دخيلك والله ماكدر احس روحي بكل مره تريد تستسلم وتروحله تركض ترتمي بحضنه وكوه اسيطر عليهه احسه مثل الصباره وكلما
شافته روحي ركضت اله وبكل مره الزمهه تجرحني وتخلي كلبي ينزف وجع ...
مر الوقت وانه عيوني معلكتهه بامل بالسما ومنتظره انشراح صدري من ربي ودمعتي على خدي بس سرعان ماحسيت على شخص يصعد من
درج كمت بسرعه مسحت دموعي اخذت نفس والتفتت عل باب سويت نفسي اتمشه انفتح باب البيتونه وصاحت باسمي جنان متسائله اذا انه
موجوده او لا كتلهه هنا انه ورحت يمهه باوعتلي وكالت بخوف وهيه تلزم بوجهي..
_شبيهه عيونج شموخ جنتي تبجين شنو
_لا بس مو نعسانه هل صارن حمر
_شموخ
_هاا
_ليش كاعد تعذبين بروحج صدكيني الحرمان وهذا التسمينه تضحيه ماراح يفيدج ولا رح يسعد بنتج راح يبقى يعذبج طول العمر والبنيه تحس بامهه
شنو بيهه وشنو البنفسهه واذا كبرت بنتج وعرفت انج مضحيه بسعادتج وحبيب روحج لخاطر تكعدين تربيهه وتديرين بالج عليهه شراح تتوقعين
تحس وقتهه وبشنو تفكر مثلا عبالج راح تكون ممنونه وتكول امي عاشت تعيسه علمودي لو تكول امي هيه اختارتني على سعادتهه ونعم الله عليهه لا
وصدكيني لو كبرت و عرفت بوجع كلبج راح تبقى تكره نفسهه ومرضهه كلما شافت الحزن بعيونج راح تلوم نفسهه وتتمنى الموت لان خربت حياة
امهه وعيشتهه بوحده وحسره كل هل سنين ساعتهه لا انتي راح تكونين سعيده ولا بنتج راح تكون مرتاحه
_جنان كافي لا تحجين فدوا عوفيني بحالي
_شموخ مايصير والله مايصير مثلما تفكرين ببنتج يلي انتي امهه فكري بهذاك الرجال يلي هوه ابن وعنده ام همين وتخاف عليه وعلى دمعته مثلما تخافين على بنتج ودمعتهه
_شترديني اسوي جنان تردين اعوف راهب وريان واهلي واحبابي وادفن روحي لك فهموهه هاي انه وراهب مستحيل ننجمع بعد هل شي ماممكن يصير
واذا على ريان فما راح اخليهه تحس على يلي بكلبي ولا اضهرلهه اني تعيسه بالعكس راح اخليهه تقوه بيه وتحس بثقه كلما تشوفني
_وانتي وكلبج شموخ انه كضيت عمري كله وياج وكبرت وانه اشوفج تهتمين بالغير وتحلين مشاكلهم ودراستج ووظيفتج وبنتج هيه الشي الوحيد يلي ماضحيتي بي زين وكلبج يمته تتفرغيله وتديرين بال اله
_ماراح يصير هل شي خلاص جنان عوفج من هل موضوع ريانه وين
_هفف جوه يم خالتي سماء نايمه بغرفتي
_تمام راح انزل يمهه انام انه همين
_تمام خيه روحي خل اشوف تاليتج وين..
تنهدت وباوعتلي بلوم جريت حسره ونزلت من الدرج شفت البيت فارغ و نسوان عمامي رايحات لبيوتهن بس اهلي باقين رحت لغرفه جنان شفت
امي نايمه عل جربايه وريانه يمهه وخالتي حلى فارشتلهه بالكاع هيه ونوره ونايمات اجيت اخذت دوشك من المخليهن على جهه النه فرشتهه
وتمددت شفت الساعه ب١٢ بليل هاي انه من ال٨ كاعده فوك السطح وعبالي بس ساعه وحده مرت.. جريت حسره و اجت جنان فرشت يمي وتمددت
صفنت بملامحي لحظات وتنهدت وهيه تعدل بنومتهه غطت راسهه ونامت وانه باقيه معصم ايدي على عيني واتنفس بضيقه محاوله افرغ
عقلي من التفكير ويهده بالي لحدما غفيت بدون مادري بروحي للصبح فزيت والغرفه هدوء باوعت حوالي شفتهه كلهه نايمه رفعت راسي عل ساعه
ب٤ ونص الفجر راحت عيني على ريانه شفتهه مكشفه كمت على حيلي غطيتهه وبوستهه براسهه بقيت امسد على شعرهه واتامل بشكلهه وشلون
نايمه شلون بيه يايمه يابنيتي يردوني اعيش حياتي واتركج ويه مرضج وتعبج يردوني ابعدج عن الناس يلي ربيتي وياهم وروحج متعلقه بيهم
يلوموني لان اختاريتج وفضلتج على سعادتي مايدرون بيج انتي روحي وراهب مجرد شعور عميق ساكن بيهه .. اكدر اصبر على كلشي واصبر
على فراكه بس ابد ماتحمل يصير بيج شي لو افقدج يايمه انتي سعادتي وانتي سلامي ولعيونج اتنازل عن كل الدنيا مو بس عن احلامي وسعاده روحي ...
شكرا لزيارتكم عالم روايات سكيرهوم
