رواية فصلية بديلة ( شموخ ) الجزء الثاني الفصل الخامس والاربعون بقلم ام ملكوت
:-مرت ساعتين على هل وضع كلهه مكمله ومنتظره كلهه دقايق واجتلي نوره علومهه متخربطه وكالت بصوت يرجف متصنعه الابتسامه...
_جنان يله طلعن انتن والنسوان يكول سلام راح تطلع الزفه
_اي تمام ..
عرفت سر توترهه هذا شكله سويلم حاجيله حجايه وياهه حتى هيج متخربطه علومهه وماتدري وين تروح مثل الطرمه .. المهم كمت لبست عبايتي
وطلعت للنسوان كتلهن يحضرن نفسهن واباوع لنوره لابسه الجبه والحجاب وصافنه وبالهه مو يمنه الله اعلم شحاجي وياهه نوب بس لا مسويله
سالفه وياهه وهيج مخلي البنيه ماتشوف الكدامهه من وراهه وتمشي بلا وعي بس لا سلام مو نفس اخوه يدور ختلات هذا مؤدب وعنده غيره على
عرضه بس مارتاحيت لصفناتهه هاي يمكن حاجي وياهه بسيطه بس يخلص العرس اكعد وياهه واخليهه تحجيلي غصب عنهه شنو جا غير اختهه
انه واكبر منهه لازم تحجيلي وانصحهه احسن ماتطيح بنفس اغلاطي يلي لولا ربي بعثلي شموخ تصيرلي اخت وتنصحني وتوعيني جان غطست
بيهن وتدمرت حياتي ومستقبلي .. تافافت ورحت كرصتهه من ايدهه افززهه لان الصياح مايفيد وياهه بقت تفرك بايدهه بالم ورجع اشتغل المحرك
لسانهه كتلهه يله امشي واجت وياي طلعنه كلنه سويه للساحه وصار ابوي يوزع النسوان عل كوسترات .. اجت عيني على حبيب روحي المولع
الساحه بكشخته واشرلي عل شال عود يريد ارفعه على وجهي حتى لا يشوفوني الزلم ابتسمت وسويت مثلما راد رفعت جانب العبايه وغطيت بي
حلكي وخشمي وبقيت لازمتهه بيدي ردت اروح ويه النسوان واجه علي لزمني من ايدي كدام الكل
واخذني لسيارته وانه اسحب نوره وياي صعدنه واجالنه صوت سلام من بعيد وهوه يكله..
_هووب نسيب انتظرني وياكم انه
_تامر انته ابو ذيبه
صفنه انه ونوره وحده بوجه الثانيه هاي الزلم كلهم هيج مطلعين القاب على بعضهم لو بس ولدنه
مميزين بالقابهم باوعت لنوره وهيه تشرد بعيونهه لمن صعد للسياره والتفت علينه يكول ..
_الله بالخير خويه جنان شلونج
_هلا سلام الحمدلله انته شلونك
_نحمد الله عايشين ..
يحجي وياي وعينه وباله يم نوره وهيه دايره وجهه عل جامه وعاقله ماجنهه هاي ام السان الخابصه البيت واركانه .. ابتسمت ورجع هوه عدل
كعدته والتفت محمد اخذله نظره لوجهي عكد حواجبه باستنكار ورجع دار وجهه عل شارع وحرك السياره بقيت اباوعله وبالي يمه شبي وليش هيج
باوعلي معقوله مكثره بالمكياج لو مو حلو علي عجيب امره .. المهم درت وجهي عل زفه وانه اشوف الولد جماعتهم شلون طالعين من الجامات
ويهوسون واولما وصلنه للصالون نزلوا ويه احسان شالوه على اكتافهم وصاروا يهوسون ومحمد وسلام نزلوا وياهم يهوسون وهمه شايلين الدي
جي بيدهم ويركصون حوالين احسان فتره ياله تركوا يدخل ورجعوا كلمن لسيارته .. طلع هوه وعروسته مغطيهه بعبايه عمي شعلان واختهه
1 تعليق
وامهه رافعات شوي من البدله عن الكاع ركبوهه بالسياره وحركنه والزفه صارت تجنن من بدايتهه لنهايتهه واكثر شي ونسنه هوه ركص محمد وسلام
وردحهم وهمه بالسياره عبالك كواوله اول مره اشوفهم هيج متونسين ويركصون طلع رجلي راكوص مو مثلي فاهي .. بقينه نضحك على
حركاتهم وسلام مايكعد راحه اخر شي شغل اغنيه "متكبره /حسام الرسام" وعله الصوت على علوه وصار يسوي حركات تضحك ويركص عليهه ونوره
انفكت جبستهه وماتت ضحك عليه ونوب اشو نسونه وتكابلوا سويه هوه ياشر عليهه وعلى روحه وهيه تكلب عيونهه عنه بغرور وترفع حواجبهه
بتعجب اخذوا دور ابطال الاغنيه باختصار طلع جريء الوليد و عرفته معترفلهه بحبه وهيه مامطيته عين و تتشرد منه ضحكت عليهم وهمه مستمرين لحدما كملت
ضحكنه سويه ووكفت الزفه باب الفندق وماحجيلكم عن الركص والطبول الصار باب الفندق نزلنه احنه والولد صعدناهم للفندق كصينه كم
صوره وياهم وطالعه تجنن منا هيه زهره ومكياجهه زهري عبالك ورده مفتحه صايره .. سلمنه عليهم ودعناهم وطلعنه لاكاني محمد لزم
ايدي وتمشينه للسياره صعدنه ونوره ويانه بس سلام صعد ويه ابوه لان كلمن راح يرجع لبيته .. شغل اغنيتنه المفضله [راح اكتب احبك/حسام الرسام ]
ولزم ايدي بيده يلي لازمه السكان وطلعنه ابوي وامي راحوا للبيت مباشرتا واحنه طلعنه نفتر ونوره ملتهيه تصور مسافه الطريق والجو شاعري والهوى عالي جان
ودي مارجع واضل افتر ولو هوه ماقصر ويانه اخذلنه موطه وراح عشانه لفات وجاب الحلويات ياله رجعنه بس بعد نحب الدياحه وهاي الطلعه
ماشبعنه منهه لان بس بالسياره كاعدين ومانزلنه ..المهم اخذلنه بقلاوه هاي الشي الوحيد يلي لما نطلع انه وياه او ناكل بره ماينساهه وصلنه
لبيتنه ونزل محمد فتحلي الباب مبتسم لزمت ايده ونزلت دخلنه واجه بابا حجه وياه واصر عليه يدخل يبات عدنه بس هوه رفض لان عنده شغل
بالشركه ورح يسهر عليه هوه وشركاءه عاد حلف عليه بابا مايطلع الا وهوه شارب جايه فقبل ودخلنه سويه للديوان وبابا راح للصاله عايفنه وحدنه ..
سديت باب الديوان وذبيت حجابي والعبايه وهوه اجه يتبختر بمشيته لزمني من خصري عاكد حواجبه بجديه وكال..
_هاي شمسويه بروحج انتي
_شمسويه
_شهل مكياج هذا طالعه تجيبين التايه ونوب طالعتلي كبال الزلم وكل واحد عينه مال مطي مبحلك عليج ماتستحين
_هاا العفو ماخليت بالي وياهم واصلا مكياجي خفيف مو بارز
_هذا مو بارز وهيج شحاله البارز بله
_تشوفه بعدين البارز
_اويلي عل بارز انه
_هههه منحرفف
_اليوم اشبعج انحراف بس خاف يداهمنه ابوج نفس ذاك اليوم من داهمنه احسان
_احم لا تحجي بهذاك اليوم استحي مدري شلون هيج ضعنه وماحسبنه حساب لاحد
_الشوك هذا حبيبي الشوك يلعب لعب مايعرف حدود وبعدين حلاة الحب بضياعه لو مانسويلنه عالم حلو وابيض وخاص بينه مانتسمى عشاك
_اي والله
_جنه
_عيونهه
_ احح مشتاقلج بكد رحمه الله اريد هيج كون انفرد بيج فد اسبوع بغرفه معزوله عن كل الدنيا ونضيع براحتنه وبدون محد يقاطعنه
_ جا اذا محد يقاطعنه اخاف نضيع زايد
_ هيج واضيع زايد بتفاصيلج وتنروي عشكنه الناقص
_اها ليش ناقص
_مايكتمل لو ماتصيرين ملكي تماما وادخل باعماقج
_ااحم لا تحجي هيج استحي
_ انتي تحرشي ومن اضل اغرد تكولين كافي استحي
_اي استحي من هيج كلام وانت ماشايف روحك شلون تباوع وشلون يطلع هل كلام بصوتك عبالك مدري شيصير بيه كلبي يضل يرجف
_اويلي عل يستحي ويرجف من تبوسيني ماتستحين
_ههه محمدد
_ههه يله كافي تعالي بحضني ولج عوفي السوالف بعدين
_ماا ماجي انته منحرف
_مو ترى اشبعج انحراف خليني عاقل
_ههه تمام سكتت ..
ابتسمت وسحبني من خصري مكعدني بحضنه واخذت شفايفه تستوطن اماكنها المفضله لحدما مرت فتره بسته خفيف بشفايفه وكمت للمطبخ
شافني بابا لمن طلع من الغرفه وراح يم محمد بالديوان سويتلهم جاي مهيل وصبيته بالكلاصات اخذته الهم شرب بابا نص الكلاص وهمه يسولفون
عن الدواجن وامراضهه والى اخرى تالي ترخص من محمد بعدما كملوا سوالف وراح نام بقينه بس انه وياه بالديوان .. صبيتله كلاص ماي
وقدمته اله صفن بيه لحظات جر حسره ولزم ايدي اخذ الكلاص مني خلاه على جهه وسحبني مكعدني
بحضنه بقى لحظات طويله يرتب بشعري وره اذني ويتامل بملامح وجهي وانه ضايعه بعيونه هنااك ياله حجه بعدما تنهد وكال..
_ما تدرين شكد احبج ياجنه مرات من اكعد واصفن بيج احس بالنعمه يلي عندي اكول هاي جنان
الجنت اباوعلهه من بعيد وروحي تتمنى الكلمه الحلوه منهه هسه كاعده بحضيني وكلبهه ملكي
_محمد
_تعبت انه بهاي السنتين وماجنتي حاسه بيه جنت كلما اشوفج ضايجه وذبلانه اكضي يومي الوب شكدما احاول اتقرب منج واخليج تحجيلي اليصير
وياج جنتي تردعيني برسميتج وياي وكلامج يلي بحدود الشغل وبس جنت اتعذب من بعيد وماكدر انوشن كلبج
_يروحي انته ياريتني ماردعتك ياريت انطيتك فرصه من قبل حتى تخليني احبك جان ماعشت العشته ولا انجرح كلبي من السمعته ..
غصيت بكلامي وتذكرت هذيج الشهرين التعذبت بيهه من بعده وانانيه مرتضى طفرت دمعه من
عيني مسحتهه بكسره خاطر وهوه تخبل بقى يسالني شبيه وليش وشصار حتى بجيت وكتله بعدما جريت حسره..
_اووف يا محمد يمكن مايجوز اكلك هل كلام بس انه حبي لمرتضى ذلني وبجاني واذاني فوك ماتصور حيل تاذيت وانته ماتدري ردت اتخبل
لدرجه الانتحار وانت ماداري عني وتخيل الكضيت شبابي كله مشتاقتله ومتلهفه على جيته طلع مايحبني وبس يريد يلعب علي ويتقربلي بالحرام
محمد شايف هاي الرقبه التضيع بيهه وتبصم عليهه حبك مره من المرات لمن انفصلت عنك حاول يتقربلي وردعته وتجاهلته وقتهه لمن نطقت
اسمك وجبت سيرتك لزمني من هاي الرقبه وخنكني طبع اصابيعه بيهه اسبوع يلي تطبعت هسه باثار حبك..
ماكدرت ماحجي واصلا ماعرفت ليش حجيتله وشلون مافكرت بكلامي قبلهه وان ممكن يمس غيرته ويعتبرهه سالفه شرف بس الاعرفه اني
صرت مثل الطفله بهل وقت يلي لمن شخص يضربهه تبقى بحسرتهه لحدما تشكي لابوهه .. احس عبالك جنت منتظره هل لحظه يلي اكعد
اشكيله بيهه حتى ياخذني لحضنه ويطبطب علي بس ماتخيلت ولا فكرت محمد بهل لحظه ومن بعد هل كلام ان راح يتخبل وتطك عروكه غضب ..
وطول كلامي وهوه عيونه يخبط بيهن الدم ولمن انتهيت شد قبضه ايده ولزمني من زندي وهوه يحجي بفحيح وعيونه تحولت حمره تماما..
_ليش ماحجيتيلي من قبل جنان وين جنتي توه ياله حجيتي وسوالج شي لمسج او تقرب منج لو لا
_لا ابد كتلك حاول يتقربلي بس من ماسمحتله وكتله اني على ذمه رجال ثاني خنكني وبعدها ماسمحت اختلط وياه بمكان واحد
_متاكده جنان
_اي والله شبيك
_جناان احجي الصدك تره راح اروح انعل شرفه واذا طلع مسويلج شي ادفني روحج قبلما ادفنج انه
_شبيك محمد شنو تروحله اكعد واسكت لا تتهور سالفه راحت ومشت واصلا من جنه انه وياك نريد ننفصل
_جنااان لمسج وتقرب عليج لو لاا
_لاا كتلك لاا ماتقرب مني ولا سوالي شي شبيك لا تخليني اندم لان كتلك..
بعدني عن حضنه وهوه عيونه حمره وعروك رقبته ناطه كام بنتر طلع بره ركب سيارته وراح شاخطهه
ومترب الدنيا متجاهل توسلاتي وتسالاتي ضربت على وجهي ورحت لابوي اركض بقيت ادك بالباب لحدما طلع وهوه يلبس بتشيرته لزمت ايده وكتله بخوف..
_بابا الحك محمد فدوا راح يذبحه لمرتضى
_شنوو
_بابا لحك عليه الله يخليك
_يله رايح وراه رايح..
هزيت راسي بايجابيه وهوه اخذ مفتاح سيارته وطلع وراه رحت انه اركض اخذت نقالي خابرت على شموخ نوب ماترد خاف نايمه هسه ..
يالله شسوي خاف يحجون كبال ابوي وتخرب الدنيا خرب عيشتي احتركت روحي هسه انه المن
احجي المن انغم على كلبي وحجيتله شكد غبيه .. بقيت اتصل عليهه ماكو تالي اتصلت على خالتي سماء رن شكم مره ياله ردت علي وكتلهه..
_الو خالتي شلونج
_هلا خاله الحمدلله انتي شلونج
_زينه اكلج خاله عمو شهم يمج
_اي هذا تردينه
_اي انطينياه فدوا
_خير خاله شصاير
_خير انشاءالله بس انطيني عمو اريد اكله شي
_تمام هاج هذا وياج .. الوو هاا عمي جنان
_الو عمو فدوا لحك على مرتضى وطلعه من البيت محمد وبابا جاي بالطريق لا تخلي تصير مشكله فدوا
_ليش شصاير ياستار
_محمد عرف بسوالف مرتضى ونيته القديمه وياي وان جان يريد يلعب علي فماتحمل اخذ سيارته
واجالكم وبابا طلع وراه حباب عمو خايفه يحجون كبال ابوي وتكبر المشكله اذا عرف ماريد تخرب علاقتكم بسبب هل شي
_تمام عمي لا يضل بالج هسه بس يجون اخذ محمد ومرتضى على جهه واحجي وياهم بدون مايدري ابوج
_اي فدوا عمو تره ابوي يلعب لعب اذا عرف بهاي السالفه وانه ماجان بيدي اسوي شي غير ان اكوله يلحك محمد لان خفت يسوي شي ويروح بيهه
_لا انشاءلله ماراح يسوي شي انه الزمه وافهمه
_تمام عمو شكرا الك طمني لمن يطلعون منكم فدوا
_انشاءالله بنيتي انشاءالله
_يله مع السلامه عمو
_الله وياج عمي ..
تنهد وسد الاتصال بقيت الوب وامي ونوره يمشن وراي يردن يعرفن شسالفه وشصار والمشكله ماكدر اكللهن بالحجيته لمحمد والنعمه امي تكضني
وتكتلني على سوايتي هاي راح تصير فتنه ومشاكل من وراي هسه وكتي انه ينكسر خاطري وافضفضله وشتوقعت يعني راح يطبطب على
ضهري ويكلي ميخالف يولي لو يكلي مالج شغل بي لهل درجه صرت غبيه وماعرفت ان هل شغله مالهه علاقه بيه وبي وانما بالشرف وتصير طلايب
وعشاير من وره هيج سالفه .. حاولت اخذ نفس اهدي روحي بس مافاد الخوف والرجفه اخذتني وهدت حيلي كعدت عل قنفه وحضنت رجلي
لصدري وامي مستمره تسالني شصار عاد كتلهه خابر احد وصارت مشكله بيناتهم وراح بابا وراه يرجعه حتى لا يسوي شي بالولد ..
سكتت عني وبقينه ننتظر كلهه ساعه مرت مثل السنه علي اتصلت علي شموخ ورديت بسرعه
واجالي صوتهه وهيه يمهه هوسه وصياح زلم كالب الدنيا بقت تصيح علي وتلومني وهيه تكول..
_ولجج جناان شلونن تحجين لمحمد على هاي السالفه ولج تعاركت الزلم وابوج لزم مرتضى وكتله كدام الناس بوكسات ولج راح تدمين الزلم بسوايتج هاي
_شسوي انه غبيه انه حماره لان حجيت لمحمد عبالي راح يعوفه لان سالفه قديمه وفاتت
1 تعليق
_اووف منج ومن سوالفج الطايشه اريد اعرف وين راح توصلين بذكاءج هذا
_شموخ حبابه خلي واحد يجي يجيبني الكم انه اكعد احجي ويه ابوي ومحمد وماخلي المشكله تكبر
_يمعوده شتحجين وياهم هسه ابوي فاككهم وكعدوا بالديوان يتفاهمون
_ميخالف خلي سلام يجي ياخذني عفيه والله اموت خوف اذا ابقى هنا
_هفف تمام راح احاجي واخلي يجي ياخذج هاي اذا مانحلت المشكله
_اي حبابه منتظره خبر منج
_تمام يله خل اروح اشوفه
_تمام باي
_باي خيه ..
سديت الاتصال وبقيت ادك وابجي بهستيريه وامي تلزم بيه وتساؤلاتهه ذبحتني بقيت منتظره خبر من شموخ بس ماكو ما ردت واتصل عليهه ماتجاوب
اتصلت على خالتي سماء هم ماتجاوب قلقت والخوف موتني والف فكره وفكره خطرت على بالي .. كلت خاف راح يجي سلام كمت لغرفتي
لبست الجبه والحجاب وطلعت للساحه بقيت انتظره وكل شوي اتصل على شموخ نوب صار نقالهه مغلق وخالتي ماترد يا الله شلون بيه شلون
بحظي انه يعني مارتاح الا اتغابه والم المصايب على راسي مارتاح الا تنجاب سيرتي كدام الناس .. بقيت انتظر سلام بالحديقه والوب وجسمي كله
ينتفض ويرجف وانه ادعي ماتكبر المشكله وتصير طلايب بسببي كلهه ساعه وانه احاول اتصل بشموخ مغلق نقالهه فجاتا انفتح الباب مالت الشارع
فزيت عبالي اجه سلام ماحس الا دخل محمد ووراه ابوي شايطين غضب شافني واجه علي بسرعه لزمني من زندي وكال بفحيح جمر كلبي..
_هاي شتسوين هنا ووين رايحه لابسه عبايتج
_ظل بالي يمكم وكلت لشموخ تدزلي سلام يوديني لبيت عمي يمكم هل جنت منتظرته
_امشي فوتي جوه وحسابج بعدين
_محمد ليش هيج تصرف وياي
_جنان فوتي جوه ..
ردت احجي واجه ابوي علي شايط غضب لزمني شعري من فوك الحجاب وكال..
_ولج تضمين علي جنان انه ابوج التعبت وربيتكم وعيشتكم كل هل سنين يجي واحد مثل مرتضى يريد يلعب بعرضي و تضمين علي والله اعلم شمسوي وشلاعب بيج
_لا بابا والله ماخلي...
_اشش اسكتي ماريد اسمعلج حس ولا اريد اشوف وجهج بعد وروحه لبيت عمج ماكو وتواصل بينكم مالج بعد فاهمه كلشي لازم اعرفه سمعته وياحيف تربايتي بيج ..
عاط بيه وبقيت ابجي وجع وندم وقهر من كلامه تقرب محمد لزم ايده وهوه يحاول يهدي اخذني لوره ضهره وهوه يحجي ويه ابوي ويكله..
_على كيفك عمي اهده جنان مالهه ذنب وهذا النذل حاول وهيه صدته المفروض تثق بيهه بنتك بعمرهه مافكرت تنزل راسك وتغلط بهيج امور
_لكك ماشفت اخوي شلون نزل راسه ماشفته شلون تعذر مني لك اذا هيه مامطيه مجال لمرتضى يكدر يسوي شي يكدر يتجاوز حدوده ويلعب وياهه لهل ... استغفرالله
1 تعليق
_اهده ياعمي اهده كتلك جنان مالهه علاقه وحتى عمهه كلك البنيه مالهه شغل وابتعدت عنه اولما درت بنيته عاطله وبنتك تربيتك هاي وانت تعرفهه زين
_لكك هاي تربيتي هاي نتيجه تعبي كبالك شوف كل الصار وياهه ومسوي وماجابت سيره ماحجتلنه ليش مو لانهه مكيفه وقابله بالوضعيه مو لان
ضاحك عليهه لك حتى خلاهه تفسخ خطبتكم وتلعب بكيفهه وانه الاغم ضال اماشيهه بكلشي تريد تسوي
_لااا عمي لاا حشاك ومايصير هيج تكول والله ماتوقعتهه منك يعني انه الغريب يلي ماعاشرت
جنان واعرفهه من سنتين ابصملك بالعشره انهه بريئه وانته ابوهه الربيتهه جاي تحجي هل حجي عنهه جا شخليت للغريب..
بقيت منزله راسي ودموعي تجري من صدمتي من كلام بابا ولومه وانهدام ثقته بيه حسيت نفسي بحلم وتمنيت لو يرجع بيه الوقت لقبل ٣ ساعات
جان اكتفيت بحضنه ومافتحت حلكي وحجيتله شي لمحمد .. بقه يهدي بي ويمنعه عني كلما اشتاط غضبه وانه ضامه روحي وره ضهره ملزمه
بطرف قميصه ارجف .. شويه واخذه وطلعوا من البيت يحجي وياه وانه كعدت بالكاع حاضنه روحي وابجي ليش هيج سويت ليش حجيت
لمحمد عن هيج سالفه ليش راح لبيت عمي بدون مايفكر بيه وباهلي ليش مرتضى سوه بيه هيج من
بدايه ليش حاول يستغلني وانه بت عمه وعرضه حتى العدو مايسوي هيج بعدوه لو عنده معزه لابو ليش كل هذا صار ياربي ليش ليش ...
.
.
:- مر اسبوعين من لما استلمت شغلي وقضاياي ولحد الان كدرت احل القضايا يلي استلمهه وحدي وبدون مساعده لشخص من زملائي المحققين
وطبعا جان احسان وياي يساعدني بالطفرات لمن اطلع واروح لمكان فهوه يكون وياي كضابط بالدائره ولمن نرجع كلمن يلتهي بشغله وخاصه انه
الزم شغلي من الصبح لحدما يخلص الدوام زين اذا كدرت اتغده بالمطعم المقابيلنه وارجع وبس بوقت الطلعه نوكف نسولف شويه وانه منتظره ابوي لو
سلام يجيلي رغم احس بعد خطوبته ان شي نقص بصداقتنه بس هل وضع احسن وحسيته مريح عكس باقي السنين يلي مرت وكاني جنت ماكله
همه وخايفه يتعلق بيه اكثر لو سولفت وياه وضحكت بس هسه احجي وياه طبيعي واضحك وانه بالي مطمن ان عنده خطيبه وبعد كم يوم
تصير مرته وحلاله وينساني .. واليوم ومثل اي يوم اعتيادي جان علي كود شغل وقضايا وصادف عرسه لاحسان ومن الضغط ماكدرت اروح لعرسه
واضيع يوم كامل وانه وراي شغل ثاني يوم وطالبين هل قضايا مني فخليت اهلي يرحون وريانتي دزيتهه وياهم تتونس خطيه بقه بس
مرتضى بالبيت مكابلني عفته بالديوان ورحت لغرفتي طلعت ملفات القضايا وبقيت ادرس عليهن وملف راهب كبالي استمد القوه والتدبير منه بعد رب العالمين..
مرت ساعات و كدرت اكمل قضيتين وباقيلي وحده سديت الملف وعفتهه وره العشه اكعد ادرسهه .. مدت ضهري عل جربايه وصفنت بالفراغ
دقايق واذن المغرب عاد كمت توضيت وصليت قريت قران ورجعوا اهلي من العرس كعدت يمهم شويه وكلهه ساعه كملوا بيهه صلاتهم وعشيتهم
وكعدنه ناكل فواكه هناك واتصلت جنان على امي وردت عليهه استغربت وصفنت بيهه ليش حتى تتصل جنان من رقم امي مو من عوايدهه باوعتلهه
بشك ومن خلال كلامهه الغريب عرفت صاير شي ..شالت النقال انطته لابوي حجه وياهه ولزمت
كلبي الله اعلم شصاير وياهه سد الاتصال ابوي وكال موجه الكلام لمحمد بعدما جر حسره ..
_بويه محمد وين اخوك النذل مرتضى
_طالع بويه ليش
_اتصل عليه خلي يجي بسرعه رمشه عين اريده كبالي
_شصاير بويه قلقتني
_تعال وياي بره ..
هز راسه محمد وكاموا طلعوا بره وسلام وياهم بقيت الوب شصاير وشحجت جنان وشدخل مرتضى شمسوين ياربي شهل سالفه خرطت
عافيتي .. كلهه دقايق واجه سلام يهف بعصبيه دخل لغرفته وبابا ومحمد بقوا بالساحه لحدما اجه مرتضى كلت هاي سالفه ماتفيد ماراح يحجون شي
خليت ورحت لغرفه سلام دكيت الباب ودخلت واشوفه كاعد صافن بالفراغ ويهز برجله بتوتر وعروكه ناطه اجيت كعدت يمه وكتله بتساءل..
_سلام شصاير ليش جنان اتصلت وليش ابوك راد مرتضى بسرعه احجيلي راح يوكف كلبي تره
_جنان حاجيه لخطيبهه على نيه مرتضى ومحاولاته ان يتقرب منهه وهذاك متخبل راكب سيارته وراح يجي لبيتنه يعارك والمشكله عمج اجه
وراه واتصلت حتى تخلي ابوي يكعد ويه محمد ومرتضى بدون مايدري ويسمع ابوهه حتى لا تصير مشكله جبيره
_تحجي صدك هاي جنان خرب شكلهه شلون تحجي هيج سالفه لخطيبهه هسه يجي وتصير دموم والله
_يولي انه كتله لابوي خلي يجي وياخذ حق مرته وانه من هسه اكلكم ساحب ايدي وشيسوي بمرتضى حل وياه
_ولك والناس خاف ننفضح كبال الجيران والماعرف يعرف وتصير سالفه عشاير نوب والطايح بيهه سمعه ابوك بين العالم هذا كله بكفه وعلاقه ابوك
وعمك بكفه ثانيه اذا عرف عمي ساجد شلون ابوي راح يكابله ويخلي عينه بعين اخوه
_وهذا كله من ورامن من وره هل زفت الماخذ اعراض الناس لعبه عنده لك ااخ لو ما اخوي واكبر مني وعلي الا اهد ويه الغريب واكسر ايده الحاول يمدهه على بت عمه
_اهده هسه انته اهده لا تتخربط علينه يمعود شوف وجهك شلون صار احمر
_استغفرالله ياربي والله هذا كله ماهامني بكثرما هامني ابوج لج ماشفتي شلون منزل راسه وهمه
ثكل جبال على اكتافه وهوه يحجيلنه وكل خوفه هوه شلون راح يخلي عينه بعين اخوه لو عرف بسوالف ابنه ..
بلعت ريجي بصعوبه وغصه حاوطت كلبي من سمعت بحال ابوي عفت سلام وطلعت للحديقه بعدني اريد احجي ويه ابوي ودخل مرتضى للبيت
ماحس الا اشتاطت عيونه غضب وراح عليه ضربه بوكس طير نص ملامح وجهه ولزمه من ياخته وهوه يصيح ..
_لككك عجبك الصاار ارتاحيت هسه من راح تغضحنه بين الناس وتخرب اخوتنه انه وعمك هسه ارتاحيت استاذ مرتضى لمن نزلت راس ابوك
وخليته محتار شيحجي وشيكول لعمك لو ساله وكله ابنك يريد يلعب بعرضي لكك جاوب لا تضل ساكت جاوبني من غضب الله...
_لاا بابا فدوا اهده لا تغضب عليه بهل ليله دخيلك كلشي ينحل كلشي اله حل وعمي ساجد زلمه حقاني ويدري كل زين ان مو غلطك ومالك
شغل بسوالف ابنك راح يفهمك ومايعاتبك ولا يسالك شي يابويه هذا اخوك والاخ سند واقرب
للشخص على روحه ماراح يكسر روحك ويخلي راسك ينزل كباله بابا عوفه الله يخليك هسه تكعد وياه وتفهمه ان الصار سوء تفاهم
_ولج بويه كسر ضهري اخوج ولج انه ردته يسندني ويجبر كسره ضهري على وليدي المات بس رجع كسرلي ضهري بسالفته هاي يريد ينزل راسي كدام
اخوتي لكك شسوي بيكك كلي شسووي بعد انتقام طاح على راسك ولفاك مني الله يطيح حظك ويعدمك عافيتك ..
بقه يدك عليه ويدعي وكوه ياله بعدناه انه ومحمد عنه دخلناهم للديوان وشربته ماي هده شويه وبقه صافن وانه روحي صارت تلوب عليه انقهرت
وماتحملت دموعي نزلت على صفنته وحيرته .. اندك باب الشارع وباوعلي محمد وكال وهوه يتوجه بره..
_شموخ دخلي جوه خاف اجه الولد
_اي رايحه ..
كمت بسرعه دخلت للمطبخ وبقيت اباوع من الشباج راح محمد فتح الباب ودخل خطيب جنان
مثل النار صاير شاد قبضه ايده ويحجي من بين سنونه تجنبا سماع الناس النه ..
_وينه اخوك وينه الاغم اليريد يلعب بعرضي خلي يطلعلي لا يضم راسه
_اهده ياخوي وصلي على محمد مو هيج تنحل المشاكل اذا عدنه الك حق تاخذه من هل عين واحنه الممنونين بس ادخل جوه خلي نتفاهم
وابوي منتظرك لا تلفت العين علينه بالنهايه هاي قضيه عرض والناس ماتضم هيج قضيه وتستر عليهه ..
شفته فرك وجهه بحيره ودخلوا للديوان وماحس الا صارت ربده وصوت ضرب واسمع ابوي يصيح عليهم و محمد يكله للولد ..
_يمعود اهده انه دخلتك حتى نحجي مو تتعارك وياه ..مرتضى غلط واحنه نعرف بي غلطان بس مايصير هيج تتهجم عليه
_لكك عوفني عليه خليني اشرب من دمه لكك عرضي هذا والبنيه على ذمتي وجان رايد يلعب
عليهه لكك تقبلوهه على عرضكم ولكم هاي عرضكم انتو قبلما يصير عرضي وحلالي تقبلوهه ينلعب بحلالكم من وره ضهركم
_مانقبلهه وهاي كلنه كبالك لا راضين على مرتضى ولا على الحاول يسوي بس صدكني لا تقرب لمرتك ولا مس طرفهه حتى
_لكك شلون ماتقرب ومس طرفهه وهوه خانكهه لكك لازم مرتي خانكهه ورايد يموتهه لكك انه اشري
دمعتهه بالغالي ويجي هل خسيس يخنكهه ويبجيهه والله لاطلع عار ومانعد عل زلم لو ماكسرت الايد النمدت عليهه
_صلي على محمد ياعمي مايصير هيج الحجي تريد حقك تاخذه من هل عين بس اهده ونصي صوتك لا تلتم الناس علينه اهده وهذا هوه كبالك
مرتضى ابني غلطان بكد شعر راسه ولو تريد تذبحه هسه ماكلك لا بس ياعمي الكتل والذبح ماراح يفيد لان سالفه راحت ومشت فاهده وصلي على محمد..
كمل كلامه بابا وندك باب الشارع طلع سلام فتحه ودخل عمي ساجد وهوه يسال على محمد ويسال شصاير وشسالفه دخلوه ولزمت كلبي هسه صدك
راح تصير كارثه بسبب لسان جنان لكك ااخ لو يمي الا اذب حركه كلبي بيهه ماحبت تحجي الا بليله عرس اخوهه ومالكت احد تحجيله غير
رجلهه .. تافافت ورحت اخذت نقالي ردت اتصل وماحس الا صارت هوسه وعمي طلعوا ابوي ومحمد بره وهوه يصيح على مرتضى وكل شوي
يسحله بوكسات اتصلت على جنان بنص هل هوسه بس شيفيد الغلط والحجي سوتهه ومشه الحال ..حجيت وياهه ورادت تجي كتلهه اشوف
سلام بلكي تجي تهدي الوضع وتحجي ويه ابوهه سديت الاتصال باوعتلهم من الشباج وهمه يصيحون لحدما فصلوهم وابوي طلع عمي بره
يهدي بي ومحمد اخذ خطيب جنان بصفحه يحجي وياه ومرتضى اخذ سيارته وشخطهه طالع من البيت خلي يروح بلكي يهدون وتنحل السالفه ..
كلهه دقايق ورجعوا دخلوهم للديوان وابوي سوده علي لازم عمي يمشي وياه منزل راسه والفشله مبينه بوجهه من سوده بوجهك مرتضى هم ..
ذبيت النقال وطلعت لمن شفته دخل للصاله كعد يمه يحاجي ويفهمه الصار كله وهوه تحلف بجنان نوب كعدنه وياه وصرنه نحاجي ونقنعه ان جنان
مالهه شغل وان من درت بنيته اتجاهه ابتعدت عنه وهيه اصلا مارادته من بدايه لهل سبب ماتطلكت من محمد لمن طلبت تفسخ الخطوبه وغيرها من
هل كلام ..المهم كلمه مني وكلمه من ابوي ياله هدأ شويه وعم الصمت بالمكان هنااك وحجه ابوي وياه وهوه منزل راسه ..
_اعذرني خويه وامسحهه بوجهي ماعرفت اربي ابني زين ماعرفت اعلمه يصون عرضه ويفدي بدمه مثلما علمنه ابونه
_لا تتعذر ياخوي مالك ذنب انته ابنك متربي وانه شهدت على تربيته بس الضاهر الغربه وبلاد الاجانب غيرته ونسته تربيته وحلال الله وحرامه
_والله من دريت بهاي السالفه لهسه انه ليلي مانامه اولما احط راسي عل مخده ادعي ربي مايجي
اليوم الراح تعرف بي بسوالف ابني متفشل منك ياخويه ومادري شلون احط عيني بعينك..
كام عمي على حيله كعد كبال ابوي ورفع راسه ونمردت روحي من شفت دمعه ابوي بعينه .. طبطب على ضهره عمي وكاله..
1 تعليق
_انت اخونه وعزوتنه والباقيلي من اهلي لا تسوي هيج وتنزل راسك انه المتفشل منك ياخوي لان دخلنه على بيتك بهاي الطريقه انته عزوتي وسندي
لا تنزل راسك وتعل كلبي ياخويه انته عزيز كلبي واليمسك يمسني والصار مالك ذنب بي ..
نزلت دمعته ابوي وتحاضنوا هوه وياه وصار يطبطب على ضهره ابتعدوا ومسحوا دمعتهم واحنه دمعتنه مانشفت على منظرهم .. ترخص من
ابوي وكام للديوان يحجي ويه محمد كلهه دقايق وطلعوا من الديوان ودعوا ابوي وخطيب جنان بعده معصب شكله بس ساكت .. سلموا على اهلي
وطلعوا من البيت رجعت كعدت يم امي وعبير واشوفهه مخليه ايدهه على خدهه ودمعتهه تجري صافنه خليت ايدي على رجلهه وكالت بعتب..
_ليش ماحجيتيلي ليش ضميتي علي السواه اخوج بالبنيه ليش كل هذا صاير ومحد كايلي هيج انه بنظركم مالي فايده ومالي حق اعرف بسوالف
جهالي هيج انه نازله من عينكم ومامخليلي اعتبار بالبيت حتى تضمون علي هيج سالفه
_لا يمه والله مو قصدنه هيج بس جنه خايفين عليج لان ندري شكد ضحيتي وتعبتي حتى تربينه
وندري ان الام ماتتحمل لو شافت تربيتهه تضيع كدامهه وتنخذل خفنه عليج من شعور الخذلان يمه وهذا يلي صار..
جرت حسره وهيه تبجي ودخل بابا والولد شافهه هيج لو تخبل اجه عليهه كرفص كبالهه وحضن وجهه بثنين اديه وهوه يسالهه بحنيه ..
_شبيهه سماي ليش تبجي اشو رفعي راسج عاينيلي
_ليش ضميت علي ماريد احجي وياكم بعد روح
_افاا انه الشهم تطرديني غير اموت بلياج
_لو تحبني ماتضم علي هيج سالفه
_لاا والله خفت عليج وماحجيتلج
_لا خفت علي ولا شي بس معتبرني هامش بحياتك انته وكلشي يصير وياك ماتشاركني بي مخليني عندك بس للخدمه
_لاا والله ابد مو هيج بله اشو رفعي راسج عايني بعيوني..كافي سمائي لا تسوين بيه هيج اعترف اني غلطت لان ضميت عليج بس وعيونج الغاليه
على كلبي جنت خايف عليج ماتتحملين وتنقهرين وانتي جنتي اكثر واحد تحبينه مرتضى من بين اولادج
_ليش ماكتلي حتى ارجع اربي ليش ماخليتني بالصوره حتى اعرف اتصرف ويه ابني ليش سويت هيج وانت تدري بهيج موقف فشلتي كدام اختي اكبر من فشلتك كدام اخوك
_ماراح تدري اختج ماراح يحجيلهه شي ساجد وصيته وهوه كال ماريد احجي واسوي حزازيات بين الخوات وبناتهن لا تخافين
_شجم دوب يا شهم راح يجي يوم وتدره وتعاتبني مثلما دره ساجد وعاتبك
_لا انشاءالله ماراح يجي هل يوم يله اهدي ومسحي دمعتج صدكيني كلشي راح ينحل
_انشاءالله..
مسح دموعهه واخذهه من ايدهه نومهه بالغرفه ورجع للصاله ودخل مرتضى للبيت باوعله ابوي
بعصبيه وشد قبضه ايده ورايح عليه يهف لزمه من ياخته وكله من بين سنونه متجنب سماع امي الهم..
_عاجبك الصار والسويته شعبالك من تلعب باعراض الناس الله ماراح يسلط عليك واحد يلعب بعرضك عبالك الفقير والنيته صافيه ماله حوبه ..
من وراك صارت هل مشكله والله اعلم الراح يصير بيت اخوي واليصير بين البنيه وخطيبهه من وره اكلان التبن مالك
_خلاص بويه سالفه راحت ومشت منو نبش عليهه وطلعهه الا هيه حاجيتلهم جانت ضامتهه الي عود
جانت بهذاك الوكت ساكته واليفه هسه من شافت عدهه واحد منطيهه عين صارت تلعب بذيلهه
_لكك شنو من مله انته شنو من بشر شهل كلب العليك هذا المليان سواد وانانيه ولا انه المن احجي
امشي ولي اطلع مني لا اجرم بيك امشي ولي ياحيف تربايتنه والله ماعرفنه نربي لا والله ..
نتره بابا من ياخته لازكه بالحايط وراح دخل لغرفته يم امي رفع راسه مرتضى باوعلنه بحقد وجنه تفشل لان ابوي تعامل وياه هيج كبالنه عود
كبريائه انجرح سوده بوجهه هزيت ايدي ماعاجبني وكمت شلت ريانه النايمه بحضني ورحت لغرفتي عايفته وراي يصيح ويغلط علي ودخلت
متجاهلته مريض نفسي ماله جاره ومايجوز عليه غير الشفقه .. تنهدت وهزيت راسي باسف خليت ريانه بجربايتهه وكعدت انه ادرس اخر ملف لليوم
كملته اخيرا ورفعت راسي شفتهه الساعه ب١٢ وانه عيوني مطفيه كلش بحيث اولما مددت ضهري اريحه غفيت بدون مادري للصبح...
.
.
:- مرت ساعه تقريبا وانه منتظرتهم بره اجت يمي امي ونوره حاجني ادخل جوه ورجعن يسالني شصاير وانه فقط ساكته وعيني عل باب عافني
وراحن لغرفهن وانه بقيت كاعده عل صبه كلهه دقايق ونفتح الباب داخلين سويه كمت رحت
اركض على ابوي وكفت كباله واخذت ايده ابوسهه وسحبهه مني باوعتله دموعي تجري وكتله ..
_بابا حبيبي باوعلي باوع بعيوني انه بنتك تربايتك معقوله ماتثق بيه بعد بس لاني ماحجيتلك الصار
وياي معقوله هذا زعلك بس لاني ماحجيت يعني مامهتم بدموعي ولا بشعوري بهذاك الوقت وكسره خاطري
_ خذلتيني وخذلت روحي لان ماعرفت ودريت الصار وياج بنفس الوقت خذلت نفسي ولامتني لان ماخذت حقج بذاك الوقت جنت اظن بنيتي ماتضم
عن ابوهه شي وكلشي يصير وياهه تجي تشكيله بس الظاهر بنتي كبرت وابتعدت وطارت بعيد عن حضن ابوهه مثل الطير لمن تنبت جناحاته
_لاا والله يابويه بعدني روحي متعلقه بيك وماتكدر بدونك بعدهه بنتك تحت جناحك ولو بعد الف سنه ماراح تتخلى عن حضنك بس انه يابويه ماجنت
اريد اخرب علاقتك بعمي ماجنت اريد تصير مشاكل من وراي وتخرب علاقتنه بعد كل هل سنين المرت واحنه نحارب ظروف الدنيا وناسهه سويه
اعذرني باابا بس لو انعاد بيه الزمن هم جان ضميت عليك وماخليت اخوك ينزل راسه كبالك
وياكل روحه قهر وضمتي لهل سالفه جانت بسبب عمي وعلاقته القويه بيك اكثر من خوفي منك ..
كملت كلامي وبقه صافن بالسما يفكر باوعت لمحمد وهوه شارد بعينه عني وباله الف حسبه رجعت عيني على ابوي لزمت ايده وكتله بتوسل..
_بابا اسفه ماعيدهه بعد ماضم عنك شي مالازم ينضم ماخليك غافل عن اليصير وياي بهل دنيا بعد بس انته ارضه عني ولا تزعل تدريني عندي بالدنيا
كلهه الا زعلك علي تعودت على نظراتك الدافيه انه يابويه لا تحرمني منهن البنيه خلاف ابوهه مالهه كلشي ..
نزل عينه علي وبلع ريجه بصعوبه لزم راسي وسحبني لحضنه نزلت دموعي ابجي وهوه يبوس
براسي ويمسد على شعري يسكت بيه دقايق ياله هديت وابتعدت عن حضنه مسح دموعي بثنين اديه وكال بحنيه..
_ماريد تضمين عني شي يابويه انه هنا حتى احافظ على كرامتكم وحقكم من ان ينظلم وان
ماحجيتيلي راح اطلع مقصر ومانعد عل اباء لو بنتي نامت مذلوله مكسوره
_انشاءالله بوجودك ماراح انذل ولا انكسر بعمري ولا تخاف علي منا ورايح عندي اسد ياكل كل ضبغ
يحاول يمس طرفي وماراح يخليك تقلق علي مو هيج لو انه غلطانه محمد ..
صفن بيه لحظات ودار عينه عني توجهت انظاره لابوي وطبطب على كتفه وهوه يكول..
_وياهه حق جنان ياعمي انت كفيت ووفيت كل هل عمر خليني اكمل عنك جنه عرضي وشرفي
وكرامتي وواجب على الزلمه ومن الشهامه يحافظ على عرضه وكرامته فنام وانت مرتاح البال لان
بنتك بالحفظ والصون ومحد يكدر يمسهه بعد وتاخذهه من هل شارب كل ايد انمدت عليهه وبجتهه رح تنكسر وانه ابن الشيخ
_والنعم منك ومن اصلك والله ويا زين اختيارهه بيك
_ونعم منك عمي واتشرف انه بيكم ..
ابتسم ابوي وتحاضنوا وهمه يطبطبون على اكتاف بعضهم ابتعدوا وراح بابا دخل جوه بعدما مسح على راسي وصبح على محمد ..
درت انظاري على ابو عيون خضرا وهوه داير عينه عني يلعب بجداحته اجيت تقربت منه لزمت الجداحه اخذتهه وهوه عيونه تراقبني شعلتهه وكتله بتساؤل..
_ هل تحبني
_جؤ
_هل تعشقني
_جؤ
_هل لا زلت تحب شفتاي
_جؤ
_اذا ما الفائده منها..
عكد حواجبه باستغراب وقربت الجداحه على شفايفي وهيه مشتعله ضربني بايدي شامرهه عني
وتقرب علي لزم شعري بعصبيه رافع راسي اله وكال من بين سنونه وانفاسه الحاره والمليانه جكاير تكفخ بوجهي...
شكرا لزيارتكم عالم روايات سكيرهوم
